Ipadayon Ninyo ang Pagpangita sa Gingharian ug Pagkamatarong sa Diyos
“Nan, ipadayon ninyo ang pagpangita pag-una sa gingharian ug sa iyang pagkamatarong, ug kining tanang ubang butang igadugang kaninyo.”—MATEO 6:33.
1, 2. Gihimo sa mga eskriba ug mga Pariseo nga unsa ang mga buhat nga maayo sa ilang kaugalingon, ug unsang pasidaan ang gihatag ni Jesus ngadto sa iyang mga sumusunod?
ANG mga eskriba ug mga Pariseo nangita sa pagkamatarong sa ilang kaugalingong paagi, nga dili mao ang paagi sa Diyos. Dili lang kana, apan sa dihang sila nagbuhat sa mga buhat nga sa kaugalingon maoy maayo, kana ilang gihimo nga sinalingkapawng mga buhat aron makita sa mga tawo. Sila nag-alagad, dili sa Diyos, kondili sa ilang kaugalingong garbo. Si Jesus mipasidaan sa iyang mga tinun-an batok sa maong pagpakaaron-ingnon: “Pagbantay kamo nga dili ninyo buhaton ang inyong pagkamatarong atubangan sa mga tawo aron makita nila; kay sa ingon niana wala kamoy balos gikan sa inyong Amahan nga anaa sa mga langit.”—Mateo 6:1.
2 Si Jehova nagapabili sa mga nagahatag sa mga kabos—apan dili sa mga nagahatag nga sama sa mga Pariseo. Gipasidan-an ni Jesus ang iyang mga tinun-an batok sa pagsundog kanila: “Busa sa magahatag ka ug mga gasa sa kaluoy, ayaw paghuyop ug trompeta sa atubangan mo, ingon sa ginahimo sa mga maot sulod sa mga sinagoga ug sa kadalanan, aron sila pagadayegon sa mga tawo. Sa pagkamatuod ako magaingon kaninyo, Sila nakadawat na sa ilang balos sa bug-os.”—Mateo 6:2.
3. (a) Sa unsang paagi ang mga eskriba ug mga Pariseo gibayran nga bug-os tungod sa ilang pagpanghatag? (b) Sa unsang paagi lahi ang baroganan ni Jesus bahin sa pagpanghatag?
3 Ang Gregong Pulong alang sa ‘sila nakadawat sa bug-os’ (a·peʹkho) maoy termino nga kasagaran makita diha sa mga resibo. Ang pagkagamit niini diha sa Wali sa Bukid nagapaila nga “sila nakadawat sa ilang balos,” nga mao, “sila nakapirma sa resibo sa ilang balos: ang ilang katungod sa pagdawat sa ilang balos natuman na, sa tukma samag sila nahatagan na ug resibo alang niana.” (An Expository Dictionary of New Testament Words, ni W. E. Vine) Ang mga gasa alang sa mga kabos sa dayag gisaad diha sa kadalanan. Sa mga sinagoga ang mga ngalan sa mga naghatag gisibya. Kadtong naghatag ug dagkong mga kantidad gipasidunggan ilabina pinaagi sa pagbatog mga lingkoran tapad sa mga rabbi panahon sa pagsimba. Sila nanghatag aron makita sa mga tawo; sila nakita ug gidayeg sa mga tawo; busa, sila makatimrig “Nabayran sa Bug-os” sa resibo alang sa balos gikan sa ilang paghatag. Pagkalahi sa baroganan ni Jesus! Panghatag “sa tago; unya ang imong Amahan nga nagatan-aw sa tago magabalos kanimo.”—Mateo 6:3, 4; Proverbio 19:17.
Mga Pag-ampo nga Kahimut-an sa Diyos
4. Nganong ang mga pag-ampo sa mga Pariseo nakapahinabo nga gitawag ni Jesus kadtong mga tawhana nga mga salingkapaw?
4 Gipabilhan ni Jehova ang mga pag-ampo nga gitumong kaniya—apan dili sama sa pag-ampo sa mga Pariseo. Si Jesus miingon ngadto sa iyang mga sumusunod: “Sa magaampo kamo, dili kamo magpanig-ingon sa mga salingkapaw; tungod kay buot nilang moampo nga nagatindog diha sa mga sinagoga ug sa mga eskina sa dagkong mga dalan aron makita sa mga tawo. Sa pagkamatuod ako magaingon kaninyo, Sila nakadawat sa ilang balos sa bug-os.” (Mateo 6:5) Ang mga Pariseo may daghang pag-ampo nga pagalitokon kada adlaw, sa tinong mga oras, bisan kon diin sila. Angay unta, ila kanang himoon sa pribado. Apan, nga tinuyo, sila nakaarang sa pagkatua “sa mga eskina sa dagkong mga dalan,” nga makita sa mga tawong nagaagi sa upat ka direksiyon, inig-abot sa oras sa pag-ampo.
5. (a) Unsang dugang mga buhat ang nakapahinabo nga ang mga pag-ampo sa mga Pariseo wala dungga sa Diyos? (b) Unsang mga butang ang gibutang ni Jesus nga una diha sa iyang sulundang pag-ampo, ug ang mga tawo karong adlawa nagauyon ba niana?
5 Aron sa pagpasundayag sa pagkabalaan konohay, sila “ingong pasumangil nagahimog hatag-as nga mga pag-ampo.” (Lucas 20:47) Usa ka gikabilinbiling lagda nag-ingon: “Ang mga tawong diyosnon sa karaan tighulat ug usa ka oras una nila litokon ang Tefillah [pag-ampo].” (Mishnah) Sa maong panahon ang tanan makakita gayod sa ilang pagkadiyosnon ug mahingangha niana! Ang maong mga pag-ampo makaabot hangtod lang sa ilang mga ulo. Si Jesus miingon nga moampo sa pribado, nga dili magsumaysumay nga kawang, ug siya mihatag kanila sa usa ka yanong sulundan. (Mateo 6:6-8; Juan 14:6, 14; 1 Pedro 3:12) Ang sulundang pag-ampo ni Jesus nagbutang nga una sa unang mga butang: “Amahan namo sa mga langit, balaanon unta ang imong ngalan. Umanhi ang imong gingharian. Matuman ang imong kabubut-on.” (Mateo 6:9-13) Diyutay rang tawo karong adlawa ang nakaila sa ngalan sa Diyos, unsa pa kayha nga buot magbalaan niana. Sa ingon sila nagahimo kaniyang walay-ngalan nga diyos. Umanhi ang Gingharian sa Diyos? Daghan nagahunahuna nga kini ania na, nga anaa sa ilang kahiladman. Sila tingali magaampo nga matuman ang iyang kabubut-on, apan ang kadaghanan nagabuhat sa ilang kaugalingong kabubut-on.—Proverbio 14:12.
6. Nganong gisaway ni Jesus ang mga Hudiyonhong pagpuasa ingong walay kapuslanan?
6 Ang puasa dalawaton kang Jehova—apan dili sumala sa pagbuhat niana sa mga Pariseo. Sama sa paghatag ug limos ug sa pag-ampo sa mga eskriba ug mga Pariseo, giisip usab ni Jesus ang ilang pagpuasa ingong walay kahulogan: “Sa magapuasa kamo, ayaw kamo pagpadayag nga masulob-on sama sa mga maot, kay sila magapadaotdaot sa ilang mga nawong aron lang makita sa mga tawo nga sila nagapuasa. Sa pagkatinuod ako magaingon kaninyo, Sila nakadawat na sa ilang balos sa bug-os.” (Mateo 6:16) Ang ilang gikabilinbiling kalagdaan nagpaila nga panahon sa mga pagpuasa ang mga Pariseo dili manghugas o manghaplas sa ilang kaugalingon apan magbutang ug abo sa ilang mga ulo. Sa dihang dili magapuasa, ang mga Hudiyo regular nga naghugas sa ilang kaugalingon ug naghaplas sa ilang lawas sa lana.
7. (a) Sa unsang paagi ang mga sumusunod ni Jesus magagawi sa dihang magapuasa? (b) Bahin sa pagpuasa, unsay buot ni Jehova sa adlaw ni Isaias?
7 Mahitungod sa pagpuasa, giingnan ni Jesus ang iyang mga sumusunod: “Manghiso kamo sa inyong ulo ug manghilam-os sa inyong nawong, aron makita nga kamo nagapuasa, dili alang sa mga tawo, kondili alang sa inyong Amahan.” (Mateo 6:17, 18) Sa adlaw ni Isaias ang nahulog sa pagtuo nga mga Hudiyo nagkalipay sa ilang pagpuasa, nga nagsakit sa ilang mga kalag, nga nagaduko sa ilang mga ulo, ug nagalingkod sa sako ug abo. Apan buot ni Jehova nga ilang pagawson ang mga gidaogdaog, pakan-on ang mga gigutom, hatagag puy-anan ang mga walay pinuy-anan, ug bistehan ang mga hubo.—Isaias 58:3-7.
Pagtigom ug Bahandi sa Langit
8. Unsay nakapahinabo nga ang mga eskriba ug mga Pariseo nahikalimot kon unsaon pag-angkon ang pag-uyon sa Diyos, ug unsang prinsipyoha, nga sa ulahi gipahayag ni Pablo, ang ilang nahikalimtan?
8 Sa ilang pagtinguha sa pagkamatarong, nahikalimtan sa mga escriba ug mga Pariseo kon sa unsang paagi maangkon ang pag-uyon sa Diyos ug naghatag ug bug-os nga pagtagad sa pagdayeg sa mga tawo. Sila napuliki kaayo sa gikabilinbiling kalagdaan sa mga tawo nga ilang gihiklin ang nahisulat nga Pulong sa Diyos. Gibutang nila ang ilang mga kasingkasing diha sa yutan-ong posisyon inay kay sa langitnong bahandi. Wala nila pakabanaa ang yanong kamatuoran nga gisulat katuigan sa ulahi sa usa ka Pariseo nga nahimong Kristohanon: “Bisan unsa ang inyong ginabuhat, buhata kana nga tibuok kalag ingon nga ngadto kang Jehova, ug dili ngadto sa mga tawo, kay kamo nahibalo nga gikan kang Jehova kamo magadawat sa nahiangay nga ganti nga panulondon.”—Colosas 3:23, 24.
9. Unsang mga kapeligrohan ang makapameligro sa yutan-ong bahandi, apan unsay makahupot nga luwas sa matuod nga bahandi?
9 Si Jehova interesado sa imong debosyon kaniya, dili sa imong kuwarta sa bangko. Siya nahibalo nga kon asa ang imong kasingkasing atua didto ang imong bahandi. Ang taya ug tangkob nagakutkot ba sa imong bahandi? Ang mga kawatan makakubkob ba sa mga bungbong nga lapok ug makakawat niana? O ning modernong panahon sa kalisod sa ekonomiya, ang implasyon makapakubos ba sa gahom sa pagpalit niini o ang pagkahugno sa baligyaan sa stocks makapapas ba niana? Ang nagasulbong nga gidaghanon sa krimen makapahinabo ba nga makawat ang imong bahandi? Dili kon kana gitigom sa langit. Dili kon ang imong mata—usa ka lamparahan nga nagadan-ag sa tibuok nimong lawas—maoy yano, gisentro sa Gingharian sa Diyos ug sa iyang pagkamatarong. Ang bahandi may paagi sa pagkahanaw. “Ayaw paghago sa pagpakadato. Hunong sa imong kaugalingong pagsabot. Gipatan-aw mo ba ang imong mga mata niana, sa dihang kini walay kapuslanan? Kay walay pakyas kini nagahimo ug mga pako alang sa kaugalingon nga sama sa iya sa usa ka agila ug nagalupad paingon sa mga langit.” (Proverbio 23:4, 5) Busa nganong dili makatulog tungod sa bahandi? “Ang pagkaadunahan sa usa ka dato dili motugot kaniya sa pagkatulog.” (Ecclesiastes 5:12) Hinumdomi ang pasidaan ni Jesus: “Dili ka makapaulipon sa Diyos ug sa Bahandi.”—Mateo 6:19-24.
Pagtuo nga Maghanaw sa Kabalaka
10. Nganong hinungdanon kaayo nga ibutang nimo ang imong pagtuo diha sa Diyos inay kay diha sa materyal nga katigayonan, ug unsang tambag ang gihatag ni Jesus?
10 Buot ni Jehova nga ibutang nimo ang imong pagtuo diha kaniya, dili sa materyal nga katigayonan. “Kon walay pagtuo dili mahimo ang pagpahimuot pag-ayo kaniya, kay siya nga nagaduol sa Diyos kinahanglang motuo nga siya mao ug siya nahimong tigganti niadtong tim-os nagapangita kaniya.” (Hebreohanon 11:6) Si Jesus miingon: “Bisan pag ang usa ka tawo may kadagaya ang iyang kinabuhi wala magagikan sa mga butang iyang napanag-iya.” (Lucas 12:15) Ang minilyon sa bangko dili makapaobrang padayon sa daot nga baga o makapabomba sa gikapoyng kasingkasing. Busa maoy “tungod niini nga ako magaingon kaninyo,” si Jesus mipadayon sa iyang Wali sa Bukid: “Hunong na kamo sa pagkabalaka mahitungod sa inyong mga kalag kon unsay inyong kan-on o kon unsay inyong imnon, o mahitungod sa inyong mga lawas bahin sa kon unsay inyong isul-ob. Dili ba ang kalag labaw pa kay sa pagkaon ug ang lawas kay sa biste?”—Mateo 6:25.
11. Diin hikaplagi ni Jesus ang kadaghanan sa iyang mga ilustrasyon, ug sa unsang paagi kini gipasundayag diha sa Wali sa Bukid?
11 Si Jesus hanas sa binaba nga mga ilustrasyon. Gipalandong niya kini sila sa bisan asa siya motan-aw. Siya nakakitag usa ka babaye nga nagpatong sa usa ka dinagkotang lamparahan sa tungtongan ug naghimo niadto nga usa ka ilustrasyon. Siya nakakitag usa ka magbalantay sa kahayopan nga naglain sa mga karnero gikan sa mga kanding; kadto nahimong usa ka ilustrasyon. Siya nakakitag mga bata nga nagdula sa dapit baligyaan; kadto nahimong usa ka ilustrasyon. Ug busa kadto nahiapil sa Wali sa Bukid. Samtang siya naghisgot bahin sa kabalaka mahitungod sa pisikal nga mga kinahanglanon, siya nakakitag mga ilustrasyon diha sa mga langgam nga naglupadlupad ug sa mga liryo nga nagtabon sa mga kiliran sa bukid. Ang mga langgam nagapugas ug nagaani ba? Wala. Ang mga liryo nagakalinyas ug nagahabol ba? Wala. Ang Diyos nagbuhat kanila; siya nagaatiman kanila. Kamo, hinunoa, labaw pag bili kay sa mga langgam ug sa mga liryo. (Mateo 6:26, 28-30) Gihatag niya ang iyang Anak alang kaninyo, dili alang kanila.—Juan 3:16.
12. (a) Ang mga ilustrasyon mahitungod sa mga langgam ug kabulakan nagpasabot ba nga ang mga tinun-an ni Jesus dili na kinahanglan magbuhat? (b) Unsang punto ang gihimo ni Jesus mahitungod sa buhat ug pagtuo?
12 Si Jesus wala dinhi magsulti sa iyang mga sumusunod nga dili kinahanglan nga sila magtrabaho aron makapakaon ug makapabiste sa ilang kaugalingon. (Tan-awa ang Ecclesiastes 2:24; Efeso 4:28; 2 Tesalonica 3:10-12.) Niadtong buntag sa tingpamulak, ang mga langgam puliking nangakha alang sa pagkaon, nagbirigbirig, nagbuhat ug mga salag, naglumlom, nagpakaon sa ilang mga kuyabog. Sila nagbuhat apan walay kabalaka. Ang kabulakan puliki sa pagduot sa ilang mga gamot sa yuta sa pagpangitag tubig ug minerales ug pagpasudlot sa ilang mga dahon aron makaabot sa kahayag sa adlaw. Kinahanglang motubo sila sa pagkagulang ug mamulak ug magsabwag sa ilang binhi sa dili pa sila mamatay. Sila nagbuhat apan walay kabalaka. Ang Diyos nagatagana alang sa mga langgam ug mga liryo. ‘Dili ba labaw pa nga siya motagana alang kaninyo, kamo nga diyutay ug pagtuo?’—Mateo 6:30.
13. (a) Nganong nahiangay nga si Jesus migamit sa sukod nga maniko sa naghisgot mahitungod sa pagdugang sa gitas-on sa kinabuhi sa usa? (b) Sa unsang paagi mapatas-an nimo ang imong kinabuhi sa waykataposang minilyong milya, ingnon ta?
13 Busa magbaton ug pagtuo. Ayaw pagkabalaka. Ang kabalaka dili makapausab sa bisan unsa. “Kinsa ba kaninyo pinaagi sa pagkabalaka,” nangutana si Jesus, “ang makadugang ug usa ka maniko sa iyang gitas-on sa kinabuhi?” (Mateo 6:27) Apan nganong gilangkit ni Jesus ang pisikal nga sukod sa distansiya, usa ka maniko, ngadto sa sukod sa panahon sa gitas-on sa kinabuhi? Lagmit tungod kay ang Bibliya subsob nagtandi sa gitas-on sa kinabuhi sa mga tawo ngadto sa usa ka panaw, pinaagi sa paggamit sa mga pamulong sama sa “ang dalan sa mga makasasala,” “ang alagianan sa mga matarong,” ang ‘sangkad nga dalan paingon sa kalaglagan,’ ug ‘mapig-ot nga dalan paingon sa kinabuhi.’ (Salmo 1:1; Proverbio 4:18; Mateo 7:13, 14) Ang pagkabalaka mahitungod sa inadlawng mga kinahanglanon dili makapalugway sa kinabuhi bisan sa usa ka tipik, “usa ka maniko,” ingnon ta. Apan adunay usa ka paagi sa pagpataas sa imong kinabuhi sa waykataposang minilyong mga milya, ingnon ta. Dili pinaagi sa pagkabalaka ug sa pag-ingon: “Unsay atong kan-on?” o “Unsay atong imnon?” o “Unsay atong isul-ob?” kondili pinaagi sa pagbatog pagtuo ug pagbuhat kon unsay ginasulti ni Jesus nga atong buhaton: “Nan, magpadayon sa pagpangita pag-una sa gingharian ug sa iyang pagkamatarong, ug kining tanan nga ubang butang igadugang kaninyo.”—Mateo 6:31-33.
Pagkab-ot sa Gingharian sa Diyos ug sa Iyang Pagkamatarong
14. (a) Unsa ang tema sa Wali sa Bukid? (b) Sa unsang sayop nga paagi ang mga eskriba ug mga Pariseo nangita sa Gingharian ug sa pagkamatarong?
14 Sa unang tudling-pulong sa iyang Wali sa Bukid, si Jesus naghisgot sa Gingharian sa mga langit ingong ilaha niadtong mahunahunaon sa ilang espirituwal nga panginahanglan. Sa ikaupat nga tudling-pulong, siya miingon nga kadtong gigutom ug giuhaw sa pagkamatarong pagabusgon. Dinhi gibutang ni Jesus ang Gingharian ug pagkamatarong ni Jehova sa unang dapit. Kana mao ang tema sa Wali sa Bukid. Kana mao ang tubag sa mga kinahanglanon sa tanang tawo. Apan pinaagi sa unsa nga makab-ot ang Gingharian sa Diyos ug ang pagkamatarong sa Diyos? Sa unsang paagi mopadayon kita sa pagpangita kanila? Dili sa paagi sa pagpangita sa mga eskriba ug mga Pariseo. Gipangita nila ang Gingharian ug ang pagkamatarong pinaagi sa Moisesnong Kasugoan, nga giangkon nila nag-apil sa gikabilinbiling kalagdaan, sanglit nagtuo sila nga ang nahisulat nga Kasugoan ug ang gikabilinbiling kalagdaan gihatag sa Diyos ngadto kang Moises sa Bukid Sinai.
15. (a) Sumala sa mga Hudiyo, kanus-a nagsugod ang ilang gikabilinbiling kalagdaan, ug sa unsang paagi ilang gibayaw kana sila nga labaw pa sa nahisulat Moisesnong Kasugoan? (b) Kanus-a ba gayod nagsugod ang gikabilinbiling kalagdaan, ug unsay epekto diha sa Moisesnong Kasugoan?
15 Ang ilang gikabilinbiling kalagdaan bahin niini miingon: “Gidawat ni Moises ang Kasugoan [potnot, “Ang ‘Binaba nga Kasugoan’”] gikan sa Sinai ug gihatag kana ngadto kang Josue, ug si Josue ngadto sa mga ansiano, ug ang mga ansiano ngadto sa mga Propeta; ug ang mga Propeta naghatag niana ngadto sa mga tawo sa Dakong Sinagoa.” Sa wala madugay ang ilang gikabilinbiling kasugoan gibayaw labaw pa sa nahisulat nga Kasugoan: “[Kon] iyang lapason ang mga pulong sa [nahisulat] nga Kasugoan, siya dili sad-an,” apan kon “iyang dugangan ang mga pulong sa mga Eskriba [gikabilinbiling kalagdaan], siya sad-an.” (Mishnah) Ang ilang gikabilinbiling kalagdaan wala magsugod sa Sinai. Ngani, nagsugod kana sa pagkatigom mga duha ka siglo una pa ni Kristo. Kana gidugangan, gikuhaan, ug nagnulo sa nahisulat nga Moisesnong Kasugoan.—Itandi ang Deuteronomio 4:2; 12:32.
16. Sa unsang paagi ang pagkamatarong sa Diyos motungha alang sa katawhan?
16 Ang Gingharian ug ang pagkamatarong sa Diyos motungha dili pinaagi sa Kasugoan apan nga gawas niana: “Pinaagi sa mga buhat sa kasugoan walay unod ang igapahayag nga matarong sa iyang atubangan, kay pinaagi sa kasugoan mao ang tukmang kahibalo sa sala. Apan karon gawas sa kasugoan ang pagkamatarong sa Diyos napadayag, kay kini gipamatud-an sa Kasugoan ug sa mga Propeta; oo, sa pagkamatarong sa Diyos pinaagi sa pagtuo diha kang Jesu-Kristo.” (Roma 3:20-22) Busa ang pagkamatarong sa Diyos motungha pinaagi sa pagtuo kang Kristo Jesus—kini igong “gipamatud-an sa Kasugoan ug sa mga Propeta.” Ang Mesiyanikong mga tagna natuman diha kang Jesus. Siya nagtuman usab sa Kasugoan; kadto gikuha gikan sa dalan pinaagi sa paglansang ngadto sa iyang kahoy sa pagsakit.—Lucas 24:25-27, 44-46; Colosas 2:13, 14; Hebreohanon 10:1.
17. Sumala kang apostol Pablo, sa unsang paagi ang mga Hudiyo nasipyat sa pagkahibalo sa pagkamatarong sa Diyos?
17 Busa, si apostol Pablo misulat bahin sa pagkapakyas sa mga Hudiyo sa pagpangita sa pagkamatarong: “Kay ako nagapamatuod nga sila may kadasig alang sa Diyos; apan dili sumala sa tukmang kahibalo; kay, nga wala mahibalo sa pagkamatarong sa Diyos apan nagatinguha sa pagtukod sa ilang kaugalingon, sila wala magpasakop ngadto sa pagkamatarong sa Diyos. Kay si Kristo mao ang kataposan sa Kasugoan, mao nga ang tanan nga nagtuo makabaton unta sa pagkamatarong.” (Roma 10:2-4) Si Pablo misulat usab mahitungod kang Kristo Jesus: “Ang usa nga wala makaila ug sala gihimo niya nga sala alang kanato, aron kita mahimong pagkamatarong sa Diyos pinaagi kaniya.”—2 Corinto 5:21.
18. Sa unsang paagi “si Kristo nga gilansang” giisip sa Hudiyong mga magtutuo sa gikabilinbiling kalagdaan, sa Gregong mga pilosopo, ug “niadtong gipanawag”?
18 Giisip sa mga Hudiyo ang himalatyong Mesiyas ingong huyang nga walay kapuslanan. Gitamay sa Gregong mga pilosopo ang maong Mesiyas ingong kabuangan. Bisan pa niana, kini maoy sumala sa gimantala ni Pablo: “Ang mga Hudiyo nangayog mga ilhanan ug ang mga Grego nangitag kaalam; apan ginawali namo si Kristo nga gilansang, alang sa mga Hudiyo usa ka hinungdan sa kapandolan apan alang sa mga nasod kabuangan; bisan pa niana, alang niadtong gipanagtawag, ang mga Hudiyo ug mga Grego, si Kristo ang gahom sa Diyos ug ang kaalam sa Diyos. Tungod kay ang butang binuang sa Diyos labi pang maalamon kay sa mga tawo, ug ang butang mahuyang sa Diyos labi pang kusgan kay sa mga tawo.” (1 Corinto 1:22-25) Si Kristo Jesus maoy usa ka pasundayag sa gahom ug kaalam sa Diyos ug mao ang paagi sa Diyos sa pagkamatarong ug kinabuhing walay kataposan alang sa masinugtanong katawhan. “Walay kaluwasan diha kang bisan kinsa nga lain, kay walay laing ngalan sa silong sa langit ang gihatag sa mga tawo nga pinaagi niana kita mangaluwas.”—Buhat 4:12.
19. Unsay ipakita sa mosunod nga artikulo?
19 Ang mosunod nga artikulo mopadayag nga aron kita makaikyas sa kalaglagan ug makakab-ot sa kinabuhing walay kataposan, kinahanglang ipadayon nato ang pagpangita sa Gingharian sa Diyos ug sa iyang pagkamatarong. Kana pagahimoon dili lamang pinaagi sa pagpatalinghog sa mga pulong ni Jesus kondili pinaagi usab sa pagbuhat kanila.
Mga Pangutana sa Pagsubli
◻ Gihimong unsa sa Hudiyong mga relihiyonista ang ilang mga gasa sa kaluoy, mga pag-ampo, ug mga pagpuasa?
◻ Diin ba ang luwas nga dapit nga tigoman sa imong bahandi?
◻ Nganong atong pagalikayan ang kabalaka bahin sa atong materyal nga mga kinahanglanon?
◻ Unsang dili-tinuod nga pangangkon ang gipahayag sa mga Hudiyo bahin sa sinugdanan sa ilang gikabilinbiling kalagdaan?
◻ Pinaagi sa unsa nga motungha ang Gingharian sa Diyos ug ang iyang pagkamatarong?
[Hulagway sa panid 16]
Gusto sa mga Pariseo nga moampo nga nagtindog sa mga eskina sa kadalanan, diin sila makita sa mga tawo