Ang Duha ka Kinadak-ang mga Kapahayagan sa Gugma nga Sukad Gihimo
“Kay gihigugma gayod sa Diyos ang kalibotan nga tungod niana gihatag niya ang iyang bugtong Anak, aron ang tanan nga motuo kaniya dili malaglag, kondili makabaton ug kinahubing dayon.”—JUAN 3:16.
“ANG Diyos gugma.” Duha ka beses nga gipahayag ni apostol Juan kanang mga pulonga. (1 Juan 4:8, 16) Oo, si Jehova nga Diyos mahigugmaon sa paagi nga siya usab maalamon, makataronganon, ug makagagahom. Dugang pa, siya MAO ang gugma. Siya mao ang larawan, ang personipikasyon, sa gugma. Tingali mangutana ka sa imong kaugalingon: ‘Nasayod ba ako kon nganong mao kana ang kamatuoran? Makahatag ba ako ug katin-awan, nga gipaluyohan sa ebidensiya o mga panig-ingnan nga nagpamatuod nga Siya gugma? Ug unsay kalabotan niini sa akong kinabuhi ug mga kalikohan?’
2. Unsay gihatag sa Diyos nga makitang mga kapahayagan sa iyang gugma?
2 Pagkadako sa gugma nga gihatag ni Jehova nga Diyos diha sa iyang tawhanong mga linalang sa yuta! Palandonga ang bug-os nga katahom ug pag-obra sa atong mga mata, ang pagkakahibulongan sa atong kusgang mga bukog, ang gahom sa atong mga kaunoran, ug ang pagkasensitibo sa atong panghikap. Kita may katarongan sa pagpahayag sa mga pagbati sa salmista: “Dayegon ko ikaw tungod kay makalilisang ug kahibulongan uyamot ang pagbuhat kanako.” Palandonga, usab, ang matahom nga mga kabukiran, ang linawng mga sapa sa matin-awng tubig, ang mga hawanan sa mga bulak, ug ang maanindot nga mga pagsalop sa adlaw. “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga bahandi.”—Salmo 139:14; 104:24.
3, 4. Unsay mga pananglitan ang gihatag sa Hebreohanong Kasulatan sa mga kapahayagan sa gugma sa Diyos?
3 Ang mga kapahayagan sa gugma sa Diyos wala matapos dihang mirebelde ang iyang unang tawhanong mga linalang. Pananglitan, nagpakita si Jehova ug gugma pinaagi sa pagtugot sa maong magtiayon sa pagpanganak aron makapahimulos sa tagana ni Jehova pinaagi sa iyang gisaad nga “binhi.” (Genesis 3:15) Sa ulahi, iyang gisugo si Noe sa paghimog arka aron maluwas ang tawhanong rasa ug ang ubang mga linalang sa yuta. (Genesis 6:13-21) Unya iyang gipakita ang iyang dakong gugma kang Abraham, nga nailhang higala ni Jehova. (Genesis 18:19; Isaias 41:8) Aron sa pagluwas sa mga kaliwat ni Abraham gikan sa pagkaulipon sa Ehipto, dugang mihatag ang Diyos ug kapahayagan sa iyang gugma sumala sa atong makita diha sa Deuteronomio 7:8: “Tungod sa paghigugma ni Jehova kaninyo . . . nga gikuha kamo ni Jehova pinaagi sa kamot nga kusgan.”
4 Bisan pag padayong nagpakitag pagkawalay utang-kabubut-on ang mga Israelitas ug masubsob nga mirebelde, wala dayon sila isalikway ni Jehova. Hinunoa, siya mahigugmaong mihangyo kanila: “Bumiya kamo gikan sa inyong daotang mga dalan, kay ngano man nga magpakamatay kamo, Oh balay sa Israel?” (Ezekiel 33:11) Apan, bisan pa nga personipikasyon sa gugma si Jehova, siya matarong ug maalamon usab. Busa miabot ang panahon dihang ang iyang rebelyosong katawhan midangat sa kinutoban sa iyang hataas nga pailob! Sila misangko sa punto nga “wala nay pagkaayo,” busa gitugotan niya sila nga mabihag sa Babilonya. (2 Cronicas 36:15, 16) Apan wala matapos didto ang gugma sa Diyos. Iyang gitino nga tapos sa 70 ka tuig ang nanghibilin kanila gitugotan sa pagpauli sa ilang yutang natawhan. Palihog basaha ang Salmo 126 ug tan-awa gikan niini kon unsay gibati sa namauli bahin niini.
Nangandam Alang sa Iyang Kinadak-ang Kapahayagan sa Gugma
5. Nganong ikaingon nga ang pagpadala sa iyang Anak dinhi sa yuta maoy usa ka kapahayagan sa gugma sa Diyos?
5 Balik sa kasaysayan miabot ang panahon alang kang Jehova sa paghatag kinadak-ang kapahayagan sa iyang gugma. Masinakripisyohon gayod kadto nga gugma. Nangandam alang niini, gipabalhin sa Diyos ang kinabuhi sa iyang bugtong Anak gikan sa espirituhanong paglungtad sa langit ngadto sa tagoangkan sa usa ka ulay nga Hudiyo nga si Maria. (Mateo 1:20, 23; Lucas 1:26-35) Handurawa ang linain nga pagkasuod nga naglungtad tali kang Jehova ug sa iyang Anak. Atong mabasa ang bahin sa una-tawhanong paglungtad ni Jesus ilalom sa simbolo sa gilarawan nga kaalam: “Ako didto tupad sa [Diyos] ingon nga usa ka batid nga magbubuhat, ug ako sa matag-adlaw maoy kahimuot niya, nagakalipay sa kanunay sa iyang atubangan.” (Proverbio 8:30, 31) Busa dili ka ba makauyon nga ang pagbiya sa Iyang bugtong Anak sa Iyang presensiya maoy usa na ka pagsakripisyo kang Jehova?
6. Unsang amahanong kaikag ang gipakita ni Jehova diha sa yutan-ong kinabuhi ni Jesus?
6 Sa walay duhaduha, gitan-aw ni Jehova sa mainiton ug dakong kaikag ang pagdako sa iyang anak gikan sa tawhanong pagsamkon paunahan. Gikunsaran si Maria sa balaang espiritu aron walay makadaot sa nagtubong binhi sa tagoangkan. Gitino ni Jehova nga makaadto si Jose ug Maria sa Bethlehem sa pagparehistro aron si Jesus matawo didto sa katumanan sa Miqueas 5:2. Pinaagi sa usa ka manulonda, gipasidan-an sa Diyos si Jose sa plano ni Haring Herodes sa pagpatay, nga nagtukmod kang Jose ug sa iyang pamilya sa pagkalagiw ngadto sa Ehipto hangtod nga namatay si Herodes. (Mateo 2:13-15) Dayag nga padayon ang kaikag sa Diyos sa pagtubo ni Jesus. Pagkadako sa kalipay sa Diyos sa pagtan-aw sa 12-anyos nga si Jesus nga nakapatingala sa mga magtutudlo ug sa uban diha sa templo nga may mga pangutana ug mga tubag!—Lucas 2:42-47.
7. Unsa ang tulo ka kapahayagan nga nagpamatuod sa kaikag sa Diyos diha sa ministeryo ni Jesus?
7 Sa napulog-walo ka tuig sa ulahi nagtan-aw si Jehova dihang miduol si Jesus kang Juan Bawtista aron magpabawtismo. Dayon malipayon niyang gipadala ang iyang balaang espiritu diha kang Jesus ug miingon: “Kini ang akong Anak nga pinalangga, kaniya may kalipay ako.” (Mateo 3:17) Ang tanang Kristohanong amahan makahanduraw kon unsa ka malipayon sa Diyos sa pagsubay sa ministeryo ni Jesus ug sa pagtan-aw sa paagi sa iyang pagtumong sa tanang pagdayeg ngadto sa iyang langitnong Amahan. Diha sa usa ka okasyon gidala ni Jesus ang pipila ka apostoles sa hataas nga bukid. Didto gipahinabo ni Jehova nga si Kristo modan-ag sa labaw-sa-kinaiyahan nga himaya, ug ang Amahan miingon: “Kini ang akong Anak nga pinalangga, kaniya may kalipay ako; patalinghogi ninyo siya.” (Mateo 17:5) Gipadungog ni Jehova ang iyang tingog sa ikatulong higayon sa pagtubag sa hangyo ni Jesus sa Diyos sa pagpasidungog sa iyang kaugalingong ngalan. Si Jehova miingon: “Gipasidunggan ko na kini ug pagapasidunggan ko kini pag-usab.” Dayag nga gihimo kini alang sa kaayohan ni Jesus, kay ang pipila ka kaubanan niya nagtuo nga manulonda ang nagsulti, samtang ang uban nagtuo nga nagdalogdog lang kadto.—Juan 12:28, 29.
8 Unsay imong mahukom gikan niining lakbit nga pagrepaso sa mga lihok sa Diyos diha sa iyang Anak ug sa iyang kaikag kaniya? Yano nga gimahal gayod ni Jehova ang iyang bugtong Anak. Uban niini sa hunahuna, ug sa pagpabili kon unsay bation sa tanang tawhanong ginikanan sa ilang bugtong anak, palandonga ang sunod nga nahitabo—ang sinakripisyo nga kamatayon ni Jesus.
Ang Kinadak-ang Kapahayagan sa Gugma
9, 10. Unsa ang kinadak-ang kapahayagan sa gugma sa Diyos diha sa katawhan, nagpakita sa unsang pamatuod sa Kasulatan?
9 Ang Bibliya nagpakita nga ang atong langitnong Amahan adunay empatiya. Atong mabasa diha sa Isaias 63:9 mahitungod sa iyang katawhang Israel: “Sa tanan nilang mga kasakitan siya gisakit. Ug giluwas sila sa iyang kaugalingong mensahero. Diha sa iyang gugma ug sa iyang kaluoy sila gitubos niya, iyang gidala sila ug gisagakay sila sa tanang mga adlaw sa dugay nang panahong miagi.” Pagkamakapaguol alang kang Jehova sa pagpamati ug sa pagtan-aw sa “makusog nga pagsinggit ug paghilak” ni Jesus. (Hebreohanon 5:7) Nag-ampo si Jesus nianang paagiha sa tanaman sa Getsemane. Gibilanggo siya, giatubang ug hulohusay, gibun-og ug gibunalan, ug gidus-an ug tunokong korona ang iyang ulo. Hinumdomi, nga gitan-aw kining tanan sa iyang mahigugmaong Amahan. Iyang nakita usab si Jesus nga napandol tungod sa kabug-at sa gipas-ang kahoyng bitayanan ug nagtan-aw sa iyang Anak nga sa kataposan gilansang niadtong kahoya. Dili nato kalimtan nga makapugong ang Diyos sa iyang pag-antos sa kabahin sa iyang pinalanggang Anak. Apan gitugotan ni Jehova si Jesus sa pag-antos ug dako. Sanglit may pagbati ang Diyos, ang pagtan-aw niining mga hitaboa alang kaniya sa walay duhaduha nakahatag labing masakit nga iyang naagian o maagian niya.
10 Sumala sa nahisgotan na, atong nakita karon kon unsa ka dako sa kahulogan sa mga pulong ni Jesus ngadto kang Nicodemus: “Gihigugma pag-ayo sa Diyos ang kalibotan nga tungod niana gihatag niya ang iyang bugtong Anak, aron ang tanan nga motuo kaniya dili malaglag kondili makabaton ug kinabuhing dayon.” (Juan 3:16) Adunay samang kahulogan ang mga pulong ni Juan, ang minahal ni Jesus nga apostol: “Pinaagi niini ang gugma sa Diyos gipadayag alang kanato, tungod kay gipadala sa Diyos ang iyang bugtong Anak sa kalibotan . . . ingong halad-pasighiuli sa atong mga sala.”—1 Juan 4:9, 10.
11. Sa unsang paagi gipasiugda ni apostol Pablo ang kinadak-ang kapahayagan sa gugma?
11 Nan, imong masabtan kon nganong gipasiugda ni apostol Pablo, diha sa Roma 5:6-8, ang dakong gugma ni Jehova sa mga pulong: “Si Kristo, samtang maluya pa kita, nagpakamatay alang mga tawong dili-diyosnon sa gitagal nga panahon. Talagsa ra nga adunay magpakamatay alang sa usa ka tawong matarong; hinoon, alang sa maayong tawo, tingali, adunay mangako sa pagpakamatay. Apan ang Diyos nagapadayag sa iyang gugma alang kanato nga, bisan mga makasasala pa kita, si Kristo nagpakamatay alang kanato.” Sa pagkatinuod, ang pagpakanaog sa iyang bugtong Anak sa yuta, sa pag-antos, ug sa pagkamatay sa labing makauulawng kamatayon, nakahimo si Jehova ug kinadak-ang kapahayagan sa gugma.
Ang Ikaduhang Kinadak-ang Kapahayagan sa Gugma
12, 13. (a) Sa unsang paagi tagsaon ang kapahayagan ni Jesus sa gugma? (b) Sa unsang paagi gihatagag pagtagad ni Pablo ang dakong gugma ni Jesus?
12 ‘Unsa,’ tingali mangutana ka, ‘ang sunod nga kinadak-ang kapahayagan sa gugma?’ Si Jesu-Kristo miingon: “Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala.” (Juan 15:13) Tinuod, sa tibuok kasaysayan sa tawo, dunay pipila nga nakasakripisyo sa ilang mga kinabuhi alang sa uban. Apan limitadong kinabuhi lamang ang ilang nabatonan; sa ulahi mamatay ra sila. Apan, si Jesu-Kristo, maoy usa ka hingpit nga tawo nga may katungod nga mabuhi. Siya walay gipaabot nga napanunod nga kamatayon sama sa tanang nanghibiling katawhan; ni may makapugos sa pagkuha sa kinabuhi ni Jesus kon dili kini niya itugot. (Juan 10:18; Hebreohanon 7:26) Hinumdomi ang iyang mga pulong: “Nagahunahuna ka ba nga dili ako makapangayo sa akong Amahan sa pagpadala kanako karon dayon ug mga manulonda nga kapin sa napulog-duha ka lehiyon?”—Mateo 26:53; Juan 10:17-18.
13 Dugang kitang makapabili sa gugma nga nalangkit sa gihimo ni Jesus pinaagi sa pagtan-aw sa sunod nga bahin: Iyang gibiyaan ang mahimayaong paglungtad ingong espiritung linalang sa langit diin didto nagpuyo siya ingong suod nga kauban ug isigkamagbubuhat nga Soberano ug Hari sa uniberso sa walay kataposan. Sa gihapon, tungod sa dili-mahakogong gugma, gihimo ni Jesus ang gisugilon kanato ni Pablo: “Bisan ug naglungtad siya diha sa kinaiya sa Diyos, [siya] wala maghunahuna sa pag-ilog, sa ato pa, nga siya mahisama sa Diyos. Hinunoa, iyang gihaw-asan ang iyang kaugalingon ug misagop sa kinaiya sa ulipon ug diha sa iyang pagkahisama sa tawo. Labaw pa niana, sa nakita siya diha sa dagway nga tawhanon, siya nagpaubos sa iyang kaugalingon ug nahimong masinugtanon hangtod sa kamatayon, oo, kamatayon diha sa kahoy sa pagsakit.”—Filipos 2:6-8.
14. Sa unsang paagi gipamatud-an ni propetang Isaias ang dakong kapahayagan sa gugma ni Jesus?
14 Dili ba usa kadto ka kapahaygan sa gugma? Mao gayod—ikaduha lamang kang Jehova nga Diyos, nga iyang langitnong Amahan. Ang matagnaong mga pulong sa Isaias kapitulo 53 nagpamatuod sa tanang giantos ni Jesus: “Gitamay siya ug gisalikway sa mga tawo, usa ka tawo alang sa kasub-anan ug nakasinati sa kasakitan. . . . Sa pagkatinuod gipas-an niya ang atong kasakitan; ug gipas-an niya ang atong kasub-anan. Apan siya giila nato nga binunalan, hinampak sa Diyos ug sinakit. Apan siya gisamaran tungod sa atong kalapasan; siya napangos tungod sa atong mga kasal-anan. . . . Tungod sa iyang mga labod kita nangaayo. . . . Iyang gibubo ang iyang kalag ngadto sa kamatayon.”—Isaias 53:3-5, 12.
15, 16. Gikan sa unsang mga pulong ni Jesus nga kadto maoy usa ka pagsakripisyo alang kaniya?
15 Tungod sa tanan nga nalangkit sa iyang kamatayon, si Jesus miampo sa tanaman sa Getsemane: “Amahan ko, kon mahimo man, isaylo lang kanako kining kopa. Apan, dili sumala sa akong pagbuot, kondili sa imo.” (Mateo 26:39) Unsay gipangayo ni Jesus dihang gipahayag kadtong mga pulonga? Nagtinguha ba siya sa pagsalikway sa iyang pagkahimong “Kordero sa Diyos nga magakuha sa sala sa kalibotan”? (Juan 1:29) Dili mahimong mao kanay kahulogan, kay masubsob nang gipahayag ni Jesus sa iyang mga disipulo nga siya mag-antos ug mamatay, gipadayag pa gani ang matang sa iyang kamatayon nga siya mamatay. (Mateo 16:21; Juan 3:14) Busa adunay laing butang nga anaa sa hunahuna ni Jesus dihang nag-ampo niini.
16 Walay duhaduha nabalaka si Jesus sa sumbong sa pasipala nga iyang nakita nga ipasaka batok kaniya, ang labing grabeng krimen nga mahimong sad-an ang Hudiyo. Nganong mabalaka sa bakak nga mga sumbong? Tungod kay ang iyang kamatayon ilalom niadtong kahimtanga makahatag pasipala sa iyang langitnong Amahan. Oo, ang walay-buling nga Anak sa Diyos, nga nahigugma gayod sa pagkamatarong ug nagadumot sa pagkadaotan ug nga mikanaog sa yuta aron sa paghimaya sa ngalan sa iyang Amahan, karon patyon sa kaugalingong katawhan sa Diyos ingong tigtampalas ni Jehova nga Diyos.—Hebreohanon 1:9; Juan 17:4.
17 Sa sayo sa iyang ministeryo si Jesus miingon: “Sa pagkatinuod, ako adunay bawtismo nga kanako igabawtismo, ug hilabihan ang kaguol ko hangtod nga mamatuman kini!” (Lucas 12:50) Karon mao ang kinatayoktokan sa iyang bawtismo. Maoy hinungdan nga ang iyang singot daw nahimong mga tinulo nga dugo dihang miampo siya. (Lucas 22:44) Dugang pa, dihay mabug-at nga palas-anon nga iyang gipas-an niadtong gabhiona, usa ka palas-anon nga dili arang nato masabtan. Siya nasayod nga kinahanglang magpakita siyag pagkamatinumanon tungod kay kon siya mapakyas, pagkadakong tamparos unya kini alang kang Jehova! Makapangangkon si Satanas nga husto siya ug sayop si Jehova nga Diyos. Apan pagkadakong tamparos diha sa nawong ni Satanas nga Yawa tungod kay nagpamatuod si Jesus nga matinumanon hangtod sa kamatayon! Busa iyang napamatud-an si Satanas nga daotan, tampalasan, ug dakong bakakon.—Proverbio 27:11.
18. Nganong hilabihan ang kalisod nga gibati ni Jesus niadtong gabhiona?
18 Si Jehova nga Diyos may pagsalig sa pagkamaunongon sa iyang Anak nga sa ingon iyang gitagna nga magpabiling matinumanon si Jesus. (Isaias 53:9-12) Ug nasayod usab si Jesus nga ang palas-anon sa paghupot sa integridad nasandig kaniya. Mahimong mapakyas siya. Mahimong makasala siya. (Lucas 12:50) Ang iyang kaugalingong kinabuhing walay kataposan ug ang bug-os tawhanong rasa nagbitay sa timbangan niadtong gabhiona. Pagkadakong pagsulay kadto! Kon naluya ug nakasala pa si Jesus, dili siya makapangayog kaluoy pinasukad sa laing sakripisyo, sama sa atong mahimo nga dili-hingpit nga mga linalang.
19. Unsay nahimo ni Jesus tungod sa iyang dili-mahakogong dalan?
19 Sa pagkatinuod, ang pag-antos ni Jesus sa Nisan 14, 33 K.P., mao ang kinadak-ang kapahayagan sa dili-mahakogong gugma nga nahimo sukad sa bisan unsang tawo, ikaduha lamang nianang kang Jehova nga Diyos. Ug pagkadako sa mga butang nga iyang nahimo alang kanato pinaagi sa iyang kamatayon! Pinaagi sa iyang kamatayon siya nahimong “Kordero sa Diyos nga magakuha sa sala sa kalibotan.” (Juan 1:29) Iyang gibuksan ang dalan alang sa 144,000 nga mga sumusunod sa iyang tunob nga mahimong mga hari ug mga saserdote ug magmando uban kaniya sulod sa usa ka libo ka tuig. (Pinadayag 20:4, 6) Dugang pa, ang “dakong panon” sa “ubang mga karnero” karon nakapahimulos gikan sa halad ni Kristo ug makalaom nga mabuhi sa kataposan niining daang sistema sa mga butang. Kini sila ang unang makapahimulos sa mga panalangin sa yutan-ong paraiso. Sa walay duhaduha adunay bilyonbilyong katawhan nga pagabanhawon ingong resulta sa gipamulong ni Jesus. Sila, usab, makabaton ug higayon sa pagtagamtam sa kinabuhing dayon diha sa yutan-ong Paraiso. (Pinadayag 7:9-14; Juan 10:16; 5:28, 29) Sa pagkatinuod, “bisan unsa pa ka daghan sa mga saad sa Diyos, sila nangahimong Oo pinaagi kaniya,” sa ato pa, pinaagi ni Jesu-Kristo.—2 Corinto 1:20.
20. Sa unsang paagi kita mosanong sa duha ka kinadak-ang mga kapahayagan sa gugma sa bahin ni Jehova nga Diyos ug kang Jesu-Kristo?
20 Tukma gayod nga magpakita kitag apresasyon sa tanang nahimo ni Jehova nga Diyos ug ni Jesu-Kristo alang kanato pinaagi sa paghatag kanato niining kinadak-ang mga kapahayagan sa gugma. Nakautang kita kanila niining apresasyona, ug aron bug-os kitang makapahimulos, kinahanglang ipakita nato ang maong apresasyon. Ipakita sa sunod nga artikulo ang pipila sa labing maayong mga paagi nga atong mahimo kini.
Nakahinumdom Ka Ba?
◻ Unsang mga kapahayagan sa gugma sa Diyos ang makita sa tanang katawhan?
◻ Sa unsang paagi nasayod kita nga nag-antos si Jehova dihang iyang nakita ang iyang Anak nga nag-antos?
◻ Sa unsang paagi ang kamatayon ni Jesus alang sa katawhan lahi sa uban nga tingali nakasakripisyo sa ilang mga kinabuhi?
◻ Sa unsang paagi maapektohan kita sa gugma nga gipakita ni Jehova ug ni Jesus?
1. Unsay kahulogan sa pulong ang “Diyos gugma”?
8. Unsay imong pagbati bahin sa gugma sa Diyos?
17. Nganong ang matang sa kamatayon nga giatubang ni Jesus nakitang masakit kaniya?