Tabangi ang Uban nga “Magmasinugtanon Gikan sa Kasingkasing”
1. Unsay gikinahanglan ni Jehova sa iyang mga magsisimba?
1 Ang pagkamasinugtanon mahinungdanon aron dawaton ni Jehova ang atong pagsimba. (Deut. 12:28; 1 Ped. 1:14-16) Sa dili madugay, pagahukman sa Diyos ‘kadtong wala makaila sa Diyos ug kadtong wala magsunod sa maayong balita.’ (2 Tes. 1:8) Sa unsang paagi makatabang kita sa uban nga ‘magmasinugtanon gikan sa kasingkasing’ sa mga pagtulon-an sa Pulong sa Diyos?—Roma 6:17.
2. Nganong hinungdanon ang pagtabang sa uban nga maugmad ang lig-ong pagtuo?
2 Pinaagi sa Pagtabang nga Maugmad ang Pagtuo ug Gugma: Diha sa Kasulatan, ang pagkamasinugtanon suod nga nalangkit sa pagtuo. Si apostol Pablo naghisgot bahin sa “sugo sa walay kataposang Diyos nga ipalambo ang pagkamasinugtanon pinaagi sa pagtuo.” (Roma 16:26) Ang Hebreohanon kapitulo 11 nagpunting ug daghang panig-ingnan sa pagtuo, nga kadaghanan kanila nalangkit sa paglihok nga kaharmonya sa gipahayag nga kabubut-on ni Jehova. (Heb. 11:7, 8, 17) Sa laing bahin, ang pagkadili-masinugtanon nalangkit sa kawalay-pagtuo. (Juan 3:36; Heb. 3:18, 19) Kinahanglan natong ugmaron ang kahanas sa paggamit sa Pulong sa Diyos aron matabangan ang uban sa pag-ugmad sa matang sa pagtuo nga mopatunghag pagkamasinugtanon.—2 Tim. 2:15; Sant. 2:14, 17.
3. (a) Sa unsang paagi ang pagkamasinugtanon nalangkit sa gugma? (b) Sa unsang paagi makatabang kita sa mga ginatun-an sa Bibliya sa pag-ugmad ug gugma alang kang Jehova?
3 Ang pagkamasinugtanon nalangkit usab sa gugma alang sa Diyos. (Deut. 5:10; 11:1, 22; 30:16) “Kini ang kahulogan sa paghigugma sa Diyos,” nag-ingon ang 1 Juan 5:3, “nga atong bantayan ang iyang mga sugo; ug bisan pa niana ang iyang mga sugo dili mabug-at.” Sa unsang paagi makatabang kita sa mga ginatun-an sa Bibliya sa pag-ugmad ug gugma alang kang Jehova? Pangitag mga kahigayonan panahon sa pagtuon aron maugmad ang ilang pagpabili sa mga hiyas ni Jehova. Ipahayag ang imong dulot nga pagkamapasalamaton sa Diyos. Tabangi ang ginatun-an nga hunahunaon gayod ang pag-ugmad ug personal nga relasyon uban kang Jehova. Labaw sa tanan, ang gugma kang Jehova motukmod sa uban ug kanato usab sa pagsugot kaniya gikan sa kasingkasing.—Mat. 22:37.
4. (a) Nganong hinungdanon ang atong panig-ingnan? (b) Unsay angay natong himoon aron atong maugmad ang “kasingkasing nga masinugtanon”?
4 Pinaagi sa Atong Panig-ingnan: Ang usa ka puwersadong paagi nga kita makadasig sa uban sa pagsugot sa maayong balita maoy pinaagi sa atong panig-ingnan. Hinunoa, gikinahanglan ang mapinadayonong paningkamot sa atong bahin aron maugmad ang “usa ka kasingkasing nga masinugtanon.” (1 Hari 3:9; Prov. 4:23) Unsay nalangkit niana? Atimana ang imong kasingkasing pinaagi sa regular nga pagtuon sa Bibliya ug pagtambong sa mga tigom. (Sal. 1:1, 2; Heb. 10:24, 25) Pakig-uban niadtong kansang mga kasingkasing nahiusa sa matuod nga pagsimba. (Prov. 13:20) Pakig-ambit kanunay sa pagsangyaw sa kanataran, uban ang sinserong tinguha sa pagtabang sa mga tawo diha sa inyong teritoryo. Pag-ampo alang sa tabang ni Jehova aron magiyahan kita sa pag-ugmad ug maayong kasingkasing. (Sal. 86:11) Likayi ang mga butang nga makadaot sa imong kasingkasing, sama sa imoral o mapintas nga kalingawan. Maoy pangagpasa ang mga butang nga makapasuod kanimo sa Diyos ug makapalig-on sa imong relasyon kaniya.—Sant. 4:7, 8.
5. Sa unsang paagi ang mga masinugtanon gipanalanginan?
5 Gipasaligan ni Jehova ang iyang karaang mga alagad nga modangat kanila ang mga panalangin kon sila mamati sa iyang tingog. (Deut. 28:1, 2) Sa susama karong adlawa, si Jehova dagayang magapanalangin “niadtong nagasugot kaniya ingon nga magmamando.” (Buh. 5:32) Busa, pinaagi sa atong pagpanudlo ug panig-ingnan, makatabang unta kita sa uban nga mahimong masinugtanon gikan sa kasingkasing.