Alang sa Kinabuhi ug Kalinaw, Lakaw Uyon sa Espiritu
‘Lakaw, dili uyon sa unod, kondili uyon sa espiritu.’—ROMA 8:4.
1, 2. (a) Nganong peligroso kon ang usa mabalda samtang nagdrayb? (b) Unsay mahitabo kon ang usa mabalda sa espirituwal?
ANG sekretaryo sa transportasyon sa Amerika miingon: “Daghang drayber ang nalinga samtang nagdrayb ug kining problemaha nagkagrabe kada tuig.” Ang cellphone maoy usa nga makabalda sa mga nagdrayb. Kapin sa 30 porsiyento sa mga gisurbi miingon nga sila nabanggaan o hapit mabanggai kay ang drayber naggamit ug cellphone. Lagmit makadaginot ug panahon ang pagbuhat ug laing butang samtang magdrayb, apan kini peligroso.
2 Ingon usab niana kon bahin sa atong espirituwalidad. Sama nga ang nabalda nga drayber sagad dili makabantay sa mga kapeligrohan, ang tawo nga nabalda sa espirituwal daling mabiktima. Kon magpabalda kita gikan sa Kristohanong pagkinabuhi ug teokratikanhong mga kalihokan, mahimong madaot ang atong pagtuo. (1 Tim. 1:18, 19) Si apostol Pablo nagpasidaan bahin niini dihang iyang giingnan ang mga Kristohanon sa Roma: “Ang paghunahuna sa unod nagkahulogan ug kamatayon, apan ang paghunahuna sa espiritu nagkahulogan ug kinabuhi ug kalinaw.” (Roma 8:6) Unsay gipasabot ni Pablo? Sa unsang paagi nato malikayan ang “paghunahuna sa unod” ug tinguhaon ang “paghunahuna sa espiritu”?
Sila “Dili Mahinukman”
3, 4. (a) Unsang personal nga pagpakigbisog ang gihisgotan ni Pablo? (b) Nganong angay kitang mainteres sa kahimtang ni Pablo?
3 Sa iyang sulat sa mga taga-Roma, si Pablo naghisgot bahin sa iyang pagpakigbisog—ang panag-away tali sa iyang unod ug hunahuna. (Basaha ang Roma 7:21-23.) Si Pablo wala magpasumangil nga daw dili niya kapugngan nga makasala o naluoy sa kaugalingon. Siya hamtong ug dinihogang Kristohanon nga gipili ingong “apostol alang sa kanasoran.” (Roma 1:1; 11:13) Nan, nganong si Pablo misulat bahin sa iyang pagpakigbisog?
4 Si Pablo miingon nga dili niya mabuhat ang kabubut-on sa Diyos sumala sa iya gayong gitinguha. Ngano? “Ang tanan nakasala ug wala makaabot sa himaya sa Diyos,” siya miingon. (Roma 3:23) Kay kaliwat ni Adan, si Pablo dili hingpit ug may sayop nga mga tinguha. Kita makasabot kaniya kay kita usab dili hingpit ug nag-atubag susamang pakigbisog kada adlaw. Dugang pa, dunay daghang kabaldahan nga makapatipas nato gikan sa ‘hagip-ot nga dalan padulong sa kinabuhi.’ (Mat. 7:14) Apan dili kay walay paglaom ang kahimtang ni Pablo, ug mao man usab kita.
5. Diin nakakaplag si Pablo ug tabang ug kahupayan?
5 Si Pablo misulat: “Kinsa ang magluwas kanako . . . ? Salamat sa Diyos pinaagi kang Jesu-Kristo nga atong Ginoo!” (Roma 7:24, 25) Dayon siya nakigsulti niadtong “nahiusa kang Kristo Jesus”—ang dinihogang mga Kristohanon. (Basaha ang Roma 8:1, 2.) Pinaagi sa iyang balaang espiritu, sila gisagop ni Jehova ingong mga anak, nga nagtawag kanila ingong “kaubang mga manununod ni Kristo.” (Roma 8:14-17) Ang espiritu sa Diyos, uban sa ilang pagtuo sa halad lukat ni Kristo, motabang kanila nga magmadaogon sa pagpakigbisog nga gihubit ni Pablo ug busa sila “dili mahinukman.” Sila mahigawas “gikan sa balaod sa sala ug sa kamatayon.”
6. Nganong angayng masabtan sa tanang alagad sa Diyos ang gipamulong ni Pablo?
6 Bisan tuod si Pablo nakigsulti sa mga dinihogan, ang iyang giingon bahin sa espiritu sa Diyos ug sa halad lukat ni Kristo makabenepisyo sa tanang alagad ni Jehova bisag unsa pay ilang paglaom. Ang tambag ni Pablo maoy para sa mga dinihogan, apan hinungdanong masabtan kana sa tanang alagad sa Diyos ug maningkamot sa pagsunod niana.
Kon sa Unsang Paagi ang Diyos “Naghukom sa Sala Diha sa Unod”
7, 8. (a) Sa unsang diwa nga ang Balaod ‘mahuyang tungod sa unod’? (b) Unsay gipalampos sa Diyos pinaagi sa iyang espiritu ug sa lukat?
7 Sa Roma kapitulo 7, giila ni Pablo ang gahom sa sala diha sa dili hingpit nga unod. Sa kapitulo 8, gihisgotan niya ang gahom sa balaang espiritu. Iyang gipatin-aw kon sa unsang paagi ang espiritu sa Diyos makatabang sa mga Kristohanon sa pagpakigbisog batok sa gahom sa sala aron sila magkinabuhi uyon sa kabubut-on ni Jehova ug maangkon ang iyang pag-uyon. Gipakita ni Pablo nga gigamit sa Diyos ang iyang balaang espiritu ug ang halad lukat sa iyang Anak sa pagpalampos sa usa ka butang nga dili mahimo sa Moisesnong Balaod.
8 Ang Balaod, uban sa daghang sugo niini, naghukom sa mga makasasala. Dugang pa, ang hataas nga mga saserdote nga ilalom sa Balaod maoy dili hingpit ug dili makatanyag ug halad nga tumbas sa sala. Busa ang Balaod ‘mahuyang tungod sa unod.’ Apan “pinaagi sa pagpadala sa iyang kaugalingong Anak sa dagway sa makasasalang unod” ug sa paghalad kaniya ingong lukat, ang Diyos “naghukom sa sala diha sa unod,” sa ingon nagbuntog sa ‘dili mahimo sa Balaod.’ Ingong resulta, ang mga dinihogan giisip nga matarong pinasukad sa ilang pagtuo sa halad lukat ni Jesus. Sila giawhag sa ‘paglakaw, dili uyon sa unod, kondili uyon sa espiritu.’ (Basaha ang Roma 8:3, 4.) Gani, kinahanglang himoon nila kini hangtod matapos ang ilang yutan-ong kinabuhi aron madawat “ang purongpurong sa kinabuhi.”—Pin. 2:10.
9. Unsay kahulogan sa pulong “balaod” sa Roma 8:2?
9 Gawas pa sa “Balaod,” si Pablo naghisgot sa “balaod nianang espiritu” ug sa “balaod sa sala ug sa kamatayon.” (Roma 8:2) Unsa kini nga mga balaod? Ang pulong “balaod” dinhi wala magtumong sa mga lagda, sama nianang sa Moisesnong Balaod. Ang usa ka reperensiya nag-ingon nga ang Gregong pulong alang sa balaod dinhi nagpasabot sa maayo o daotang butang nga ginabuhat sa tawo ug nga nagkontrolar kanila samag balaod. Kini usab mahimong magtumong sa sukdanan sa kinabuhi nga ilang gipili.
10. Sa unsang paagi kita nailalom sa balaod sa sala ug sa kamatayon?
10 Si apostol Pablo misulat: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Kay mga kaliwat ni Adan, kita nailalom sa balaod sa sala ug sa kamatayon. Ang atong makasasalang unod kanunayng nag-agda kanato sa pagbuhat sa mga butang nga dili makapahimuot sa Diyos, nga mosangpot lang sa kamatayon. Sa iyang sulat sa mga taga-Galacia, gitawag ni Pablo ang maong mga buhat ug kinaiya nga “mga buhat sa unod.” Dayon siya midugang: “Kadtong nagabuhat sa maong mga butang dili makapanunod sa gingharian sa Diyos.” (Gal. 5:19-21) Kining matanga sa mga tawo susama ra niadtong naglakaw uyon sa unod. (Roma 8:4) Gibuhat nila ang gidiktar sa ilang dili hingpit nga unod. Apan kadto lang bang nakighilawas, nalangkit sa idolatriya ug espiritismo, o nagbuhat ug ubang grabeng sala ang naglakaw uyon sa unod? Dili, kay ang mga buhat sa unod naglakip usab sa giisip sa uban nga personal lang nga mga kahuyangan, sama sa pangabugho, pagsinta sa kasuko, pakigtigi, ug kasina. Kinsay makaingon nga bug-os na siyang nahigawas sa paglakaw uyon sa unod?
11, 12. Unsay gitagana ni Jehova aron mahigawas kita gikan sa balaod sa sala ug sa kamatayon? Unsay kinahanglan natong himoon aron maangkon ang pag-uyon sa Diyos?
11 Pagkamalipayon nato nga si Jehova mihimog paagi aron kita mahigawas sa balaod sa sala ug sa kamatayon! Si Jesus miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” Pinaagi sa pagdawat sa gugma sa Diyos ug sa pagpasundayag ug pagtuo sa halad lukat ni Jesu-Kristo, kita mapahigawas sa pagkahinukman tungod sa atong napanunod nga sala. (Juan 3:16-18) Busa kita makaingon sama ni Pablo: “Salamat sa Diyos pinaagi kang Jesu-Kristo nga atong Ginoo!”
12 Ang atong kahimtang susama nianang gitambalan sa grabeng sakit. Bug-os lang kitang maayo kon atong sundon ang isulti sa doktor. Bisag ang atong pagtuo sa lukat magpahigawas kanato gikan sa balaod sa sala ug sa kamatayon, kita dili hingpit ug makasasala gihapon. Labaw pa ang gikinahanglan aron maangkon ang suod nga relasyon sa Diyos ug ang iyang pag-uyon ug panalangin. Kon buot natong maayo gikan sa pagkadili-hingpit, si Pablo miingon nga kinahanglan kitang molakaw uyon sa espiritu.
Lakaw Uyon sa Espiritu—Sa Unsang Paagi?
13. Unsay kahulogan sa paglakaw uyon sa espiritu?
13 Dihang maglakaw, kita nagaabante padulong sa usa ka lugar. Busa aron kita makalakaw uyon sa espiritu, kinahanglang mouswag kita sa kamatuoran. (1 Tim. 4:15) Bisag dili nato kini mahimo sa hingpit nga paagi, matag adlaw angay kitang maningkamot sa pagsunod sa giya sa espiritu. Ang “paglakaw pinaagi sa espiritu” makapahimuot sa Diyos.—Gal. 5:16.
14. Unsay kiling niadtong “nahiuyon sa unod”?
14 Sa iyang sulat sa mga taga-Roma, si Pablo sunod naghisgot sa duha ka matang sa tawo nga magkalahig hunahuna. (Basaha ang Roma 8:5.) Dinhi ang unod wala magpasabot sa pisikal nga lawas. Sa Bibliya, ang pulong “unod” usahay nagpasabot sa makasasala ug dili hingpit nga kahimtang sa tawo. Kini nga kahimtang maoy hinungdan sa panagsumpaki sa unod ug hunahuna nga gihisgotan ni Pablo. Apan dili sama niya, kadtong “nahiuyon sa unod” wala gani makigbisog. Inay tagdon ang gidahom sa Diyos kanila ug dawaton ang iyang tabang, mas gusto nilang ‘itumong ang ilang hunahuna sa mga butang sa unod.’ Sila sagad naghunahuna sa pagtagbaw sa ilang unodnong tinguha. Sa laing bahin, ang sagad nga gihunahuna niadtong “nahiuyon sa espiritu” mao ang “mga butang sa espiritu”—espirituwal nga mga tagana ug kalihokan.
15, 16. (a) Sa unsang paagi ang pagtumong sa hunahuna sa usa ka butang makaapektar sa tinamdan sa usa? (b) Asa napokus ang hunahuna sa kadaghanan karon?
15 Basaha ang Roma 8:6. Sa paghimog usa ka butang—maayo man o daotan—itumong una sa usa ang iyang hunahuna niana. Ang mga tawo nga kanunayng naghunahuna sa mga butang sa unod sa dili madugay makaugmad ug tinamdan o kiling nga bug-os nasentro sa mga butang sa unod. Ang ilang hunahuna, interes, ug pagbati sagad mapokus na sa maong mga butang.
16 Asa napokus ang hunahuna sa kadaghanan karon? Si apostol Juan misulat: “Ang tanan nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—wala magagikan sa Amahan, apan nagagikan sa kalibotan.” (1 Juan 2:16) Kini nga mga tinguha naglakip sa kahilayan, pagkainila, ug materyal nga mga butang. Ang mga libro, magasin, mantalaan, pelikula, salida sa TV, ug Internet napuno sa maong mga butang, kay kana ang gihunahuna ug gipangandoy sa kadaghanan. Apan “ang paghunahuna sa unod nagkahulogan ug kamatayon.” Kini nagpasabot nga madaot ang atong relasyon sa Diyos karon ug moresulta sa atong kamatayon sa umaabot. Ngano? “Tungod kay ang paghunahuna sa unod nagkahulogan ug pakig-away sa Diyos, kay kini wala mailalom sa balaod sa Diyos, ni, sa pagkatinuod, mapailalom kini. Busa kadtong nahiuyon sa unod dili makapahimuot sa Diyos.”—Roma 8:7, 8.
17, 18. Sa unsang paagi nato tinguhaon ang paghunahuna sa espiritu, ug unsay resulta niini?
17 “Ang paghunahuna sa espiritu nagkahulogan ug kinabuhi ug kalinaw”—kinabuhing walay kataposan sa umaabot ingon man kalinaw sa hunahuna ug kalinaw uban sa Diyos karon. Sa unsang paagi nato tinguhaon ang “paghunahuna sa espiritu”? Pinaagi sa makanunayong pagpokus sa atong hunahuna sa espirituwal nga mga butang ug pag-ugmad sa espirituwal nga hilig ug tinamdan. Samtang himoon nato kini, ang atong panghunahuna ‘mailalom sa balaod sa Diyos’ ug ‘mahiuyon’ sa iyang hunahuna. Dihang makaatubag tentasyon, mahibalo kita kon unsay angayng buhaton. Makahimo kitag hustong desisyon nga nahiuyon sa espiritu.
18 Busa hinungdanong ipokus nato ang atong hunahuna sa espirituwal nga mga butang. Mahimo nato kini pinaagi sa ‘pag-andam sa atong kaisipan alang sa buluhaton,’ nga magsentro sa atong kinabuhi sa espirituwal nga mga kalihokan sama sa regular nga pag-ampo, pagbasa ug pagtuon sa Bibliya, pagtambong sa tigom, ug pagsangyaw. (1 Ped. 1:13) Inay magpabalda sa unodnong mga butang, ipokus nato ang atong hunahuna sa espirituwal nga mga butang. Sa ingon, kita nagalakaw uyon sa espiritu. Kini magdalag mga panalangin, kay ang paghunahuna sa espiritu nagkahulogan ug kinabuhi ug kalinaw.—Gal. 6:7, 8.
Makapatin-aw Ka Ba?
• Unsay ‘dili mahimo sa Balaod,’ ug sa unsang paagi kini gibuntog sa Diyos?
• Unsa ang “balaod sa sala ug sa kamatayon,” ug sa unsang paagi kita mapahigawas gikan niini?
• Unsay angay natong himoon aron maugmad “ang paghunahuna sa espiritu”?
[Mga hulagway sa panid 12, 13]
Ikaw ba nagalakaw uyon sa unod o uyon sa espiritu?