“Ang Espiritu Mismo Nagpamatuod”

1-2. Unsang katingalahang butang ang nahitabo sa adlaw sa Pentekostes 33 C.E.?

DOMINGGO kadto sa buntag didto sa Jerusalem. Ang tuig maoy 33 C.E., ug adlaw kadto sa Pentekostes. May mga 120 ka tinun-an nga nagtigom sa lawak sa itaas sa usa ka balay. (Buh. 1:13-15; 2:1) Pipila ka adlaw una niini, giingnan sila ni Jesus nga magpabilin sa Jerusalem kay makadawat silag espesyal nga regalo. (Buh. 1:4, 5) Unsay sunod nga nahitabo?

² “Kalit lang nga may kabanha gikan sa langit, sama gayod nianang naghuros nga kusog nga hangin.” Kini madungog sa tibuok balay. Unya, dihay “pormag mga dila nga daw kalayo” nga mipatong sa ulo sa mga tinun-an, ug silang tanan “napuno sa balaang espiritu.” (Buh. 2:2-4) Niining katingalahang paagi, gibubo ni Jehova kanila ang iyang balaang espiritu. (Buh. 1:8) Sila ang unang gidihogan sa balaang espiritub ug gihatagag paglaom nga magmando uban ni Jesus sa langit.

 3. Nganong kadtong nanambong sa Pentekostes wala magduhaduha nga sila gidihogan sa balaang espiritu?

³ Kon usa ka sa mga tinun-an nga nagtigom niadtong adlawa sa lawak sa itaas, dili gyod to nimo makalimtan. Dihay pormag dila nga daw kalayo nga mipatong sa imong ulo, ug misugod ka pagsultig laing pinulongan! (Buh. 2:5-12) Dili gyod ka magduhaduha nga gidihogan ka sa balaang espiritu. Pero ang tanan bang gidihogan sa balaang espiritu nakadawat niana sa talagsaong paagi ug sa samang higayon sa ilang kinabuhi? Wala. Giunsa nato pagkahibalo?

 4. Ang tanan bang dinihogan sa unang siglo gidihogan sa samang higayon sa ilang kinabuhi? Ipatin-aw.

⁴ Hisgotan nato kon kanus-a lagmit dihogan ang usa ka tawo. Ang maong grupo sa mga 120 ka Kristohanon dili lang maoy gidihogan sa balaang espiritu niadtong Pentekostes, 33 C.E. Sa ulahing bahin nianang adlawa, mga 3,000 pa ang nakadawat sa gisaad nga balaang espiritu. Gidihogan sila dihang sila gibawtismohan. (Buh. 2:37, 38, 41) Apan sa misunod nga mga tuig, dili tanang dinihogang Kristohanon ang gidihogan panahon sa ilang bawtismo. Ang mga Samarianhon gidihogan paglabay sa pipila ka panahon human sa ilang bawtismo. (Buh. 8:14-17) Ug sa talagsaon kaayong kahimtang, si Cornelio ug ang iyang panimalay gidihogan bisag wala pa mabawtismohi.​—Buh. 10:44-48.

 5. Sumala sa 2 Corinto 1:21, 22, unsay mahitabo dihang ang usa dihogan sa balaang espiritu?

⁵ Hisgotan sab nato kon unsay mahitabo dihang ang usa ka tawo dihogan sa balaang espiritu. Sa sinugdan ang pipila nga gidihogan malisdan tingali sa pagdawat nga gipili sila ni Jehova. Basin maghunahuna sila, ‘Nganong gipili man ko sa Diyos?’ Ang uban dili tingali ingon nianag reaksiyon. Bisan unsa pa man, gipatin-aw ni apostol Pablo kon unsay mahitabo sa tanan nga gidihogan: “Human mo motuo, kamo, pinaagi kaniya, giselyohanc sa gisaad nga balaang espiritu, nga maoy garantiya sa atong panulondon.” (Efe. 1:13, 14; footnote) Busa gigamit ni Jehova ang iyang balaang espiritu aron klarong ipaila ngadto niini nga mga Kristohanon nga gipili niya sila. Niining paagiha, ang balaang espiritu gihatag kanila ingong “timaan [garantiya]” aron pasaligan sila nga sa umaabot sila mabuhi sa walay kataposan didto sa langit ug dili sa yuta.​—Basaha ang 2 Corinto 1:21, 22.

 6. Unsay angayng buhaton sa usa ka dinihogan aron madawat niya ang iyang langitnong ganti?

⁶ Kon mahimong dinihogan ang usa ka Kristohanon, segurado na ba nga moadto siya sa langit? Dili. Segurado siya nga gipili siya nga moadto sa langit. Pero angay niyang hinumdoman kini nga tambag: “Mga igsoon, pagkugi pa gyod mo aron maseguro ninyo ang inyong pagkatinawag ug pagkapinili, kay kon padayon mong mohimo niini dili gyod mo mapakyas.” (2 Ped. 1:10) Busa bisan pag ang usa ka dinihogan napili, o gitawag, aron moadto sa langit, madawat lang niya ang iyang ganti kon magpabilin siyang matinumanon.​—Filip. 3:12-14; Heb. 3:1; Pin. 2:10.

 7. Unsaon pagkahibalo sa mga dinihogan nga sila gidapit nga moadto sa langit?

⁷ Apan unsaon pagkahibalo sa usa nga siya gidapit nga moadto sa langit? Ang tubag klarong makita diha sa giingon ni Pablo sa mga taga-Roma nga “gitawag aron mahimong mga balaan.” Siya miingon kanila: “Kamo wala makadawat ug espiritu sa pagkaulipon aron mahadlok mo pag-usab, apan kamo nakadawat sa espiritu nga nagsagop ninyo ingong mga anak, nga pinaagi niining espirituha kita nagatawag: ‘Abba, Amahan!’ Ang espiritu mismo nagpamatuod uban sa atong espiritu nga mga anak ta sa Diyos.” (Roma 1:7; 8:15, 16) Busa pinaagi sa iyang balaang espiritu, klarong ipaila sa Diyos sa mga dinihogan nga sila gidapit nga moadto sa langit.​—1 Tes. 2:12.

 8. Giunsa pagpakita sa 1 Juan 2:20, 27 nga ang mga dinihogan wala magkinahanglag kompirmasyon gikan sa uban?

⁸ Paneguroon ni Jehova nga kadtong makadawat sa iyang imbitasyon nga moadto sa langit walay pagduhaduha diha sa ilang hunahuna ug kasingkasing. (Basaha ang 1 Juan 2:20, 27.) Siyempre, ang mga dinihogan kinahanglang matudloan ni Jehova pinaagi sa kongregasyon sama sa uban. Pero wala sila magkinahanglag kompirmasyon gikan sa uban nga sila dinihogan. Gigamit ni Jehova ang labing gamhanang puwersa sa uniberso, ang iyang balaang espiritu, aron klarong ipaila kanila nga sila dinihogan!

 9. Sumala sa Efeso 1:18, unsang kausaban ang masinati sa usa dihang siya dihogan?

⁹ Kadaghanan sa mga alagad sa Diyos karon malisdan tingali sa pagsabot kon unsay mahitabo sa usa dihang dihogan siya sa Diyos. Natural lang ni kay sila mismo wala man dihogi. Gilalang sa Diyos ang tawo aron mabuhi sa walay kataposan sa yuta, dili sa langit. (Gen. 1:28; Sal. 37:29) Pero nagpili si Jehova ug pipila ka tawo aron mabuhi sa langit. Busa dihang dihogan niya sila, usbon dayon niya ang ilang paglaom ug paagi sa paghunahuna, aron maglaom na sila sa kinabuhi didto sa langit.​—Basaha ang Efeso 1:18.

10. Unsay ipasabot sa pagkahimong ‘gipanganak pag-usab’? (Tan-awa sab ang footnote.)

¹⁰ Dihang ang mga Kristohanon dihogan sa balaang espiritu, sila “ipanganak pag-usab,” o “ipanganak gikan sa itaas.”d Gipakita sab ni Jesus nga imposibleng mapatin-aw sa bug-os ngadto sa dili dinihogan kon unsay bation sa usa nga ‘gipanganak pag-usab,’ o “gipanganak sa espiritu.”​—Juan 3:3-8; footnote.

11. Ipatin-aw ang kausaban sa panghunahuna nga mahitabo dihang dihogan ang usa.

¹¹ Unsang kausaban sa panghunahuna ang mahitabo dihang dihogan ang mga Kristohanon? Sa wala pa sila dihogi, sila naglaom nga mabuhi sa walay kataposan dinhi sa yuta. Naghinamhinam sila sa panahon dihang wagtangon ni Jehova ang tanang pagkadaotan ug himoon ang yuta nga paraiso. Tingali giimadyin nila ang ilang kaugalingon nga nagsugat sa namatay nilang membro sa pamilya o higala. Pero human sila madihogi, lahi na ang ilang panghunahuna. Ngano? Dili tungod kay dili na sila ganahan sa yutan-ong paglaom. Wala mausab ang ilang hunahuna tungod sa kaguol o grabeng pag-antos. Dili pod tungod kay kalit nilang nahunahunaan nga laay ang pagkinabuhi sa walay kataposan dinhi sa yuta. Hinunoa, gigamit ni Jehova ang iyang balaang espiritu aron usbon ang ilang paagi sa paghunahuna ug ang ilang paglaom.

12. Sumala sa 1 Pedro 1:3, 4, unsay pagbati sa mga dinihogan sa ilang paglaom?

¹² Ang usa nga gidihogan basin mobating dili takos niining bililhong pribilehiyo. Pero dili gyod siya magduhaduha nga gipili siya ni Jehova. Siya malipay ug mapasalamaton kaayo dihang maghunahuna siya sa iyang paglaom.​—Basaha ang 1 Pedro 1:3, 4.

13. Unsay pagbati sa mga dinihogan sa ilang kinabuhi dinhi sa yuta?

¹³ Nagpasabot ba ni nga ang mga dinihogan gusto nang mamatay? Gitubag ni Pablo kanang pangutanaha. Iyang gikomparar ang ilang tawhanong lawas ngadto sa usa ka tolda, nga nag-ingon: “Sa pagkatinuod, kita nga ania niini nga tolda nag-agulo, nga nabug-atan, kay dili nato kini gustong hukason, apan gusto natong isul-ob ang lain, aron nga ang may kamatayon lamyon sa kinabuhi.” (2 Cor. 5:4) Kini nga mga Kristohanon wala laayi sa kinabuhi dinhi sa yuta, nga gusto na nilang mamatay dayon. Hinunoa, sila malipayon sa ilang kinabuhi ug gusto nilang gamiton ang matag adlaw sa pag-alagad kang Jehova uban sa ilang pamilya ug mga higala. Pero bisag unsa pay ilang ginabuhat, pirme gyod silang maghunahuna sa ilang mahimayaong paglaom.​—1 Cor. 15:53; 2 Ped. 1:4; 1 Juan 3:2, 3; Pin. 20:6.

14. Unsay wala magpamatuod nga ang usa gidihogan sa balaang espiritu?

¹⁴ Tingali naghunahuna ka kon gidihogan ka ba sa balaang espiritu. Kon mao, hunahunaa kining importanteng mga pangutana: Dako ba kaayo ang imong tinguha nga buhaton ang kabubut-on ni Jehova? Gibati ba nimo nga madasigon kaayo ka sa buluhatong pagsangyaw? Ganahan ka bang magtuon sa Pulong sa Diyos ug mosusi sa “lawom nga mga butang sa Diyos”? (1 Cor. 2:10) Gibati ba nimo nga gipalampos pag-ayo ni Jehova ang imong ministeryo? Gibati ba nimo nga duna kay dakong responsibilidad sa pagtabang sa uban sa espirituwal nga paagi? Nakita ba nimo ang pamatuod nga gitabangan ka ni Jehova sa daghang espesipikong paagi? Kon oo ang imong tubag niining tanang pangutana, nagpasabot ba ni nga sa langit na ang imong paglaom? Wala. Ngano? Tungod kay mahimong mobatig ingon niana ang tanang alagad sa Diyos, dinihogan man o dili. Ug pinaagi sa iyang balaang espiritu, si Jehova makatabang kang bisan kinsa sa iyang mga alagad sa paghimo sa maong mga butang, bisag unsay ilang paglaom. Sa tinuoray lang, kon nagduhaduha ka kon gidihogan ka ba sa balaang espiritu, nagpasabot kana nga wala ka dihogi. Kadtong gipili ni Jehova walay pagduhaduha kon gidihogan ba sila o wala! Segurado sila!

15. Giunsa nato pagkahibalo nga dili tanang nakadawat sa espiritu sa Diyos ang gipili nga moadto sa langit?

¹⁵ Sa Bibliya, daghang tawo nga may pagtuo ang nakadawat ug balaang espiritu; pero, ang ilang paglaom dili sa langit. Si David gigiyahan sa balaang espiritu. (1 Sam. 16:13) Ang balaang espiritu nagtabang kaniya nga makasabot sa lawom nga mga butang bahin kang Jehova ug naggiya kaniya sa pagsulat sa pipila ka bahin sa Bibliya. (Mar. 12:36) Bisan pa niana, si apostol Pedro miingon nga si David “wala mosaka sa kalangitan.” (Buh. 2:34) Si Juan nga Tigbawtismo ‘napuno sa balaang espiritu.’ (Luc. 1:13-16) Si Jesus miingon nga walay tawong labaw kang Juan, pero miingon siya nga si Juan dili bahin sa langitnong Gingharian. (Mat. 11:10, 11) Gigamit ni Jehova ang iyang balaang espiritu sa paghatag kanilag gahom sa paghimog talagsaong mga butang, pero wala niya gamita ang maong espiritu sa pagpili kanila aron mopuyo sa langit. Nagpasabot ba ni nga dili sila sama ka matinumanon niadtong gipili nga magmando sa langit? Wala. Nagpasabot kana nga banhawon sila ni Jehova aron magpuyo sa Paraiso dinhi sa yuta.​—Juan 5:28, 29; Buh. 24:15.

16. Unsang ganti ang gipaabot sa kadaghanang alagad sa Diyos karon?

¹⁶ Karon, ang kadaghanan sa mga alagad sa Diyos dinhi sa yuta wala maglaom nga moadto sa langit. Sama kang Abraham, Sara, David, Juan nga Tigbawtismo, ug sa daghan pang lalaki ug babaye sa kapanahonan sa Bibliya, sila naglaom nga mabuhi sa yuta dihang ang Gingharian sa Diyos magmando na kanila.​—Heb. 11:10.

17. Unsang mga pangutana ang atong hisgotan sa sunod nga artikulo?

¹⁷ Tungod kay ang pipila ka dinihogan kauban pa sa katawhan sa Diyos karon, natural nga may mga pangutanang motungha. (Pin. 12:17) Pananglitan, unsay angayng panglantaw sa mga dinihogan sa ilang kaugalingon? Kon duna moy kauban sa kongregasyon nga nagsugod sa pagpakig-ambit sa mga emblema panahon sa Memoryal, unsaon nimo siya pagtratar? Ug komosta kon magkadaghan ang moingon nga sila dinihogan? Angay ka bang mabalaka niana? Tubagon kanang mga pangutanaha sa sunod nga artikulo.