Naghulat nga ‘Maikagong Nagpaabot’

“Ang maikagong pagpaabot sa kalalangan nagahulat sa pagpadayag sa mga anak sa Diyos.”​—ROMA 8:19.

 1. Unsang samang kahimtang ang nahitabo tali sa mga Kristohanon karong adlawa ug niadtong sa unang siglo?

ANG kahimtang sa matuod nga mga Kristohanon karon kaamgid niadtong sa unang-siglong mga Kristohanon. Usa ka tagna nakatabang sa mga alagad ni Jehova niadtong mga adlawa sa pagkahibalo kon kanus-a motungha ang Mesiyas. (Daniel 9:​24-​26) Ang mao gihapong tagna nagtagna sa kalaglagan sa Jerusalem apan walay nasudlang mga impormasyon nga nagpaarang sa mga Kristohanon sa pagkahibalong daan kon kanus-a laglagon kadtong siyudara. (Daniel 9:​26b, 27) Sa susama, usa ka tagna nga gihatag sa Diyos nakapukaw sa sinserong mga estudyante sa Bibliya sa ika-19ng siglo sa pagpaabot. Pinaagi sa paglangkit sa “pito ka panahon” sa Daniel 4:​25 uban “sa mga panahon sa mga Hentil,” sila naghulat nga madawat ni Kristo ang Gingharianong gahom sa 1914. (Lucas 21:​24, King James Version; Ezequiel 21:​25-​27) Samtang ang basahon ni Daniel nasudlan ug daghang tagna, walay usa niini ang nakahimo sa presenteng-adlawng mga estudyante sa Bibliya sa pagkalkulo sa eksaktong panahon kon kanus-a laglagon ang bug-os nga sistema sa mga butang ni Satanas. (Daniel 2:​31-​44; 8:​23-​25; 11:​36, 44, 45) Apan, kini mahitabo sa dili madugay, kay kita nagkinabuhi na “sa panahon sa kataposan.”​—Daniel 12:4.a

Pagkamabinantayon sa Panahon sa Presensiya ni Kristo

2, 3. (a) Unsay nalangkob sa pangunang pamatuod nga kita nagkinabuhi na sa panahon sa presensiya ni Kristo diha sa harianong gahom? (b) Unsay nagpakita nga ang mga Kristohanon gisugo sa pagpadayon sa pagbantay panahon sa presensiya ni Jesu-Kristo?

² Tinuod, tungod sa tagna ang mga Kristohanon nagpaabot na sa wala pa hatagi si Kristo ug Gingharianong gahom sa 1914. Apan ang “ilhanan” nga gihatag ni Kristo bahin sa iyang presensiya ug sa konklusyon sa sistema sa mga butang nagpasiugda ug mga hitabo. Ug ang kadaghanan niini makita human nagsugod ang iyang presensiya. Ang maong mga hitabo​—mga gubat, kakulangan sa pagkaon, mga linog, mga kamatay, pagdaghan sa pagkamalapason, paglutos sa mga Kristohanon, ug tibuok-kalibotan nga pagsangyaw sa maayong balita sa Gingharian​—magsilbing pangunang pamatuod nga kita karon nagkinabuhi na sa panahon sa presensiya ni Kristo diha sa harianong gahom.​—Mateo 24:​3-14; Lucas 21:​10, 11.

³ Bisan pa niana, ang bug-os nga diwa sa tambag ni Jesus agig panamilit ngadto sa iyang mga tinun-an maoy: “Padayon sa pagtan-aw, padayon sa pagtukaw, . . . padayong magbantay.” (Marcos 13:​33, 37; Lucas 21:​36) Ang mainampingong pagbasa sa konteksto niining mga tambag nga magmabinantayon nagpakita nga si Kristo sa panguna wala maghisgot bahin sa pagpadayon sa pagbantay ug maayo sa mga ilhanan sa sinugdanan sa iyang presensiya. Hinunoa, siya nagsugo sa iyang tinuod nga mga tinun-an sa pagpadayon sa pagbantay sa panahon sa iyang presensiya. Alang sa unsa nga gisugo ang matuod nga mga Kristohanon sa pagpadayon sa pagbantay?

 4. Nagsilbi sa unsang katuyoan ang ilhanan nga gihatag ni Jesus?

⁴ Gihatag ni Jesus ang iyang dakong tagna sa pagtubag sa pangutana: “Kanus-a man kining mga butanga mahitabo [mga hitabo nga motultol sa kalaglagan sa Hudiyonhong sistema sa mga butang], ug unsa man unya ang ilhanan sa imong pagkaanaa ug sa katiklopan sa sistema sa mga butang?” (Mateo 24:3) Ang gitagnang ilhanan magpaila dili lamang sa presensiya ni Kristo kondili usab sa mga hitabo nga motultol sa kataposan sa presenteng daotang sistema sa mga butang.

 5. Sa unsang paagi gipakita ni Jesus nga samtang presente sa espirituwal nga paagi, siya “moabot” pa?

⁵ Si Jesus nagpakita nga sa panahon sa iyang “pagkaanaa” (Grego, pa·rou·siʹa) siya moabot uban ang gahom ug himaya. Mahitungod sa maong ‘pag-abot’ (gipaila pinaagi sa mga matang sa Gregong pulong erʹkho·mai), siya miingon: ‘Unya ang ilhanan sa Anak sa tawo magpakita sa langit, ug niana ang tanang tribo sa yuta magapukpok sa ilang kaugalingon sa pagminatay, ug ilang makita ang Anak sa tawo nga moabot diha sa mga panganod sa langit uban ang gahom ug dakong himaya. . . . Karon kat-oni gikan sa kahoyng igos ingong sambingay kining puntoha: Sa dihang ang linghod nga mga sanga niini molapyo na ug mogitib na ang dahon niini, mahibaloan ninyo nga haduol na ang ting-init. Maingon man usab kamo, sa dihang inyong makita kining tanang butanga, hibaloi nga haduol na siya [Kristo] diha sa mga pultahan. . . . Busa, padayon sa pagbantay tungod kay wala kamo mahibalo kon sa unsang adlawa moabot ang inyong Ginoo. . . . Pamatud-i ang inyong kaugalingon nga andam, tungod kay sa takna nga wala ninyo hunahunaa nga kini mao, ang Anak sa tawo moabot.’​—Mateo 24:​30, 32, 33, 42, 44.

Nganong Moabot si Jesu-Kristo?

 6. Sa unsang paagi ang kalaglagan sa “Dakong Babilonya” mahitabo?

⁶ Bisan tuod ug presente ingong Hari sukad sa 1914, pagahukman pa ni Jesu-Kristo ang mga sistema ug mga indibiduwal una pa ipahamtang ang paghukom ngadto niadtong iyang makaplagang daotan. (Itandi ang 2 Corinto 5:10.) Sa dili madugay ibutang ni Jehova diha sa mga hunahuna sa mga lider sa politika sa paglaglag sa “Dakong Babilonya,” ang kalibotanong imperyo sa bakak nga relihiyon. (Pinadayag 17:​4, 5, 16, 17) Espesipikong gipahayag ni apostol Pablo nga laglagon ni Jesu-Kristo “ang tawo sa kalapasan”​—ang apostatang klero sa Kakristiyanohan, ang prominenteng bahin sa “Dakong Babilonya.” Si Pablo nagsulat: “Ang tawo sa kalapasan mapadayag, si kinsa patyon sa Ginoong Jesus pinaagi sa espiritu sa iyang baba ug wagtangon pinaagi sa pagpadayag sa iyang pagkaanaa.”​—2 Tesalonica 2:​3, 8.

 7. Sa dihang moabot ang Anak sa tawo diha sa iyang himaya, unsang paghukom ang iyang ipakanaog?

⁷ Sa haduol nga umaabot, pagahukman ni Kristo ang katawhan sa kanasoran pinasukad sa ilang paglihok ngadto sa iyang mga igsoon dinhi sa yuta. Atong mabasa: ‘Sa dihang moabot ang Anak sa tawo diha sa iyang himaya, ug ang tanang anghel uban kaniya, niana siya molingkod sa iyang mahimayaong trono. Ug ang tanang kanasoran tigomon atubangan kaniya, ug siya maglain sa katawhan gikan sa usag usa, maingon sa usa ka magbalantay nga nagalain sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala. . . . Ang hari moingon ngadto [sa mga karnero], ‘Sa pagkamatuod ako magaingon kaninyo, Sa sukod nga gibuhat ninyo kini sa usa sa labing ubos niining akong mga igsoon, inyo kining gibuhat kanako.’ . . . Ug [ang mga kanding] mobiya ngadto sa walay-kataposang pagputol, apan ang mga matarong ngadto sa kinabuhing walay-kataposan.’​—Mateo 25:​31-46.

 8. Sa unsang paagi gibatbat ni Pablo ang pag-abot ni Kristo sa pagpahamtang sa paghukom diha sa mga dili-diyosnon?

⁸ Ingon sa gipakita diha sa sambingay sa mga karnero ug mga kanding, ipahamtang ni Jesus ang kataposang paghukom diha sa tanang dili-diyosnon. Gipasaligan ni Pablo ang nag-antos nga mga isigkamagtutuo sa “kahupayan uban kanamo inigpadayag sa Ginoong Jesus gikan sa langit uban sa iyang gamhanang mga anghel sa nagadilaab nga kalayo, sa dihang siya magapanimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus. Kini sila mismo makaagom sa hudisyal nga silot sa kalaglagang walay-kataposan gikan sa atubangan sa Ginoo ug gikan sa himaya sa iyang kusog, sa panahon nga siya moabot aron pagahimayaon may kalabotan sa iyang mga balaan.” (2 Tesalonica 1:​7-10) Uban niining kulbahinam nga mga hitabo nga anaa sa atong unahan, dili ba angayng magpasundayag kita ug pagtuo ug maikagong magpadayon sa pagbantay sa pag-abot ni Kristo?

Maikagong Naghulat sa Pagpadayag ni Kristo

9, 10. Nganong ang mga dinihogan nga ania pa sa yuta maikagong nagpaabot sa pagpadayag ni Jesu-Kristo?

⁹ Ang ‘pagpadayag sa Ginoong Jesus gikan sa langit’ dili lamang aron sa pagpahinabog kalaglagan sa daotan kondili aron usab pagagantihan ang mga matarong. Ang mga nanghibilin sa dinihogang mga igsoon ni Kristo nga ania pa sa yuta mahimong mag-antos sa dili pa ang pagpadayag ni Kristo, apan sila mangayaon sa ilang mahimayaong langitnong paglaom. Ngadto sa dinihogang mga Kristohanon, si apostol Pedro nagsulat: “Padayon kamo sa pagmaya sanglit mga mag-aambit man kamo sa mga pag-antos sa Kristo, aron kamo magamaya ug usab magangaya sa hilabihan sa panahon sa pagpadayag sa iyang himaya.”​—1 Pedro 4:13.

¹⁰ Ang mga dinihogan determinadong magpabiling matinumanon hangtod nga si Kristo ‘magtigom kanila ngadto kaniya’ aron nga “ang sinulayang kalidad” sa ilang pagtuo “makaplagan nga usa ka hinungdan sa pagdayeg ug himaya ug dungog diha sa pagpadayag ni Jesu-Kristo.” (2 Tesalonica 2:1; 1 Pedro 1:7) Mahitungod sa maong matinumanong inanak-sa-espiritu nga mga Kristohanon, kini ang ikaingon: “Ang pagpanaksi bahin sa Kristo gihimong lig-on taliwala kaninyo, aron kamo dili gayod makulangan sa bisan unsang gasa, samtang kamo nagahulat nga maikagon sa pagpadayag sa atong Ginoong Jesu-Kristo.”​—1 Corinto 1:​6, 7.

11. Samtang naghulat sa pagpadayag ni Jesu-Kristo, unsay ginahimo sa dinihogang mga Kristohanon?

¹¹ Ang dinihogang nanghibilin sama ug pagbati kang Pablo, kinsa nagsulat: “Akong giisip nga ang mga pag-antos karong panahona walay bisan unsa nga bili kon itandi sa himaya nga igapadayag dinhi kanato.” (Roma 8:18) Ang ilang pagtuo dili kinahanglang palig-onon sa mga kalkulasyon sa panahon. Sila nagpabiling okupado sa pag-alagad kang Jehova, nga naghatag ug usa ka maayong panig-ingnan sa ilang mga kauban, ang “ubang mga karnero.” (Juan 10:16) Kini nga mga dinihogan nahibalo nga haduol na ang kataposan niining daotang sistema, ug sila nagpatalinghog sa tambag ni Pedro: “Palig-ona ang inyong kaisipan alang sa buluhaton, hupti sa bug-os ang inyong mga panimuot; ibutang ang inyong paglaom diha sa dili-takos nga kalulot nga igapadangat kaninyo inigpadayag unya ni Jesu-Kristo.”​—1 Pedro 1:13.

“Ang Maikagong Pagpaabot sa Kalalangan”

12, 13. Sa unsang paagi ang tawhanong kalalangan ‘gipailalom sa kakawangan,’ ug unsay gipangandoy sa ubang mga karnero?

¹² Ang ubang mga karnero aduna bay maikagong gipaabot sa kinabuhi? Segurado gayod nga aduna. Sa labing tino sila aduna. Human naghisgot bahin sa mahimayaong paglaom niadtong gisagop ni Jehova ingong iyang inanak-sa-espiritu nga “mga anak” ug “kaubang manununod uban ni Kristo” sa langitnong Gingharian, si Pablo nag-ingon: ‘Ang maikagong pagpaabot sa kalalangan nagahulat sa pagpadayag sa mga anak sa Diyos. Kay ang kalalangan gipailalom sa kakawangan, dili pinaagi sa kaugalingong kabubut-on niini kondili pinaagi kaniya nga nagsakop niini, pinasukad sa paglaom aron nga ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.’​—Roma 8:​14-21; 2 Timoteo 2:​10-12.

¹³ Pinaagi sa sala ni Adan, ang tanan niyang mga kaliwat ‘gipailalom sa kakawangan,’ nangatawo diha sa pagkaulipon sa sala ug kamatayon. Sila wala makahimo sa pagpahigawas sa ilang kaugalingon gikan sa maong pagkaulipon. (Salmo 49:​7; Roma 5:​12, 21) Oh, pagkadako sa pangandoy sa ubang mga karnero nga makabaton ug ‘kagawasan gikan sa pagkaulipon sa pagkadunot’! Apan sa dili pa kana mahitabo, pipila ka butang ang kinahanglang mahitabo sumala sa mga panahon ug mga yugto sa panahon ni Jehova.

14. Unsa unyay malangkit diha “sa pagpadayag sa mga anak sa Diyos,” ug sa unsang paagi mosangpot kini sa pagkabaton sa katawhan ug ‘kagawasan gikan sa pagkaulipon sa pagkadunot’?

¹⁴ Ang nanghibilin sa dinihogang “mga anak sa Diyos” kinahanglang ‘igapadayag’ una. Unsay nalangkit niini? Sa tinudlong panahon sa Diyos, madayag ngadto sa ubang mga karnero nga ang dinihogan sa kataposan ‘tinimrehan’ na ug nahimaya sa pagmando uban ni Kristo. (Pinadayag 7:​2-4) Ang gibanhawng “mga anak sa Diyos” ‘igapadayag’ usab sa dihang moduyog sila uban kang Kristo sa paglaglag sa daotang sistema sa mga butang ni Satanas. (Pinadayag 2:​26, 27; 19:​14, 15) Dayon, sa panahon sa Usa ka Libo ka Tuig nga Pagmando ni Kristo, sila dugang ‘igapadayag’ ingong mga galamiton isip mga saserdote sa pag-apod-apod sa mga kaayohan sa halad lukat ni Jesus ngadto sa tawhanong “kalalangan.” Kini mosangpot sa pagkabaton sa katawhan ug ‘kagawasan gikan sa pagkaulipon sa pagkadunot’ ug sa kataposan mosulod ngadto “sa mahimayaong kagawasan sa mga anak sa Diyos.” (Roma 8:21; Pinadayag 20:​5; 22:​1, 2) Uban nianang dagkong mga palaaboton, ikahibulong ba nga ang ubang mga karnero “nagahulat sa pagpadayag sa mga anak sa Diyos” nga ‘maikagong nagpaabot’?​—Roma 8:19.

Ang Pailob ni Jehova Nagkahulogan ug Kaluwasan

15. Unsa ang dili gayod nato angay kalimtan labot sa pagtakda ni Jehova ug panahon sa mga hitabo?

¹⁵ Si Jehova mao ang Dakong Tigbantay sa Oras. Ang iyang pagtakda ug panahon sa mga hitabo mapamatud-ang hingpit. Ang mga butang daw dili kanunay mahitabo sumala sa atong pagdahom mismo. Apan, kita bug-os makatuo nga ang tanang saad sa Diyos mamatuman. (Josue 23:14) Tingali iyang gitugotan ang mga butang nga magpadayon sa taastaas nga panahon kay sa gidahom sa daghan. Apan maningkamot kita sa pagsabot sa iyang mga paagi ug magmadinalayegon sa iyang kaalam. Si Pablo nagsulat: “O ang kalalom sa bahandi sa Diyos ug kaalam ug kahibalo! Pagkadili-matukib sa iyang mga paghukom ug pagkadili-masubay ang iyang mga dalan! Kay ‘kinsa ang nakahibalo sa kaisipan ni Jehova, o kinsa ang nahimo niyang magtatambag?’”​—Roma 11:​33, 34.

16. Kinsay makapahimulos sa pailob ni Jehova?

¹⁶ Si Pedro nagsulat: “Mga hinigugma, sanglit nagapaabot man kamo niining mga butanga [ang kalaglagan sa daang “mga langit” ug “yuta” ug ang kapuli niini pinaagi sa gisaad nga “bag-ong mga langit” ug “bag-ong yuta” sa Diyos], buhata kutob sa inyong maarangan nga makaplagan niya sa kataposan nga walay-buling ug walay-lama ug anaa sa pakigdait. Dugang pa, isipa ang pailob sa atong Ginoo ingong kaluwasan.” Tungod sa pailob ni Jehova, minilyon pa ang gihatagan ug higayon nga maluwas latas sa “adlaw ni Jehova,” nga kalit nga moabot “ingon sa usa ka kawatan.” (2 Pedro 3:​9-15) Ang iyang pailob nagtugot usab sa matag usa kanato sa ‘pagpadayon sa pagpanglimbasog sa atong kaugalingong kaluwasan uban ang kahadlok ug pagpangurog.’ (Filipos 2:12) Si Jesus miingon nga kinahanglan natong ‘tagdon ang atong kaugalingon’ ug ‘magpadayon sa pagtukaw’ kon kita buot nga pagakahimut-an ug molampos sa “pagbarog atubangan sa Anak sa tawo” sa panahon nga siya moabot alang sa paghukom.​—Lucas 21:​34-36; Mateo 25:​31-33.

Padayon sa Paghulat nga Malahutayon

17. Unsang mga pulong ni apostol Pablo ang angay natong patalinghogan?

¹⁷ Giawhag ni Pablo ang iyang espirituwal nga mga igsoon sa pagpunting sa ilang mga mata, “dili sa mga butang makita, kundili sa mga butang nga dili-makita.” (2 Corinto 4:​16-18) Dili siya buot nga adunay makasalipod sa ilang panan-aw sa langitnong ganti nga gibutang sa ilang atubangan. Dinihogan man kita nga mga Kristohanon o sakop kita sa ubang mga karnero, atong ibutang sa hunahuna ang katingalahang paglaom nga gibutang sa atong atubangan ug dili moangka. Pasagdi nga kita ‘magpadayon sa paghulat nga malahutayon,’ nga magpamatuod nga “kita dili ang matang nga nagapanibog ngadto sa kalaglagan, kundili ang matang nga adunay pagtuo ngadto sa pagtipig nga buhi sa kalag.”​—Roma 8:​25; Hebreohanon 10:39.

18. Nganong kita makasalig sa pagtugyan sa mga panahon ug mga yugto sa panahon diha sa mga kamot ni Jehova?

¹⁸ Kita makasalig sa pagtugyan sa mga panahon ug mga yugto sa panahon diha sa mga kamot ni Jehova. Ang katumanan sa iyang mga saad “dili malangan” sumala sa iyang eskedyul sa panahon. (Habacuc 2:3) Kasamtangan, ang tambag ni Pablo ngadto kang Timoteo adunay dugang kahulogan alang kanato. Siya nag-ingon: “Ako solemneng nagasugo kanimo atubangan sa Diyos ug kang Kristo Jesus, si kinsa gikatino nga maghukom sa mga buhi ug mga patay, ug sa iyang pagpadayag ug sa iyang gingharian, iwali ang pulong, magmadalion diha niini sa paborableng panahon, sa masamokong panahon . . . Himoa ang buluhaton sa usa ka tig-ebanghelyo, buhata sa bug-os ang imong ministeryo.”​—2 Timoteo 4:​1-5.

19. Panahon pa gihapon karon sa katawhan ni Jehova sa pagbuhat ug unsa, ug ngano?

¹⁹ Ang mga kinabuhi nameligro​—ang atong kaugalingong kinabuhi ug niadtong sa atong mga silingan. Si Pablo nagsulat: “Hatagig kanunayng pagtagad ang imong kaugalingon ug ang imong pagpanudlo. Pabilin niining mga butanga, kay pinaagi sa pagbuhat niini imong maluwas ang imong kaugalingon ug kadtong kinsa mamati kanimo.” (1 Timoteo 4:16) Mubo na kaayo ang panahon alang niining daotang sistema sa mga butang. Samtang kita naghulat nga maikagon sa kulbahinam nga mga hitabo nga anaa sa atong unahan, amgohon nato kanunay nga panahon ug yugto sa panahon pa gihapon karon ni Jehova aron isangyaw sa iyang katawhan ang maayong balita sa Gingharian. Kanang buluhatona kinahanglang taposon alang sa iyang katagbawan. “Unya,” ingon sa giingon ni Jesus, “moabot ang kataposan.”​—Mateo 24:14.

[Mga footnote]

Agig Repaso

◻ Labot sa mga kalkulasyon sa panahon, sa unsang paagi ang atong kahimtang susama niadtong sa unang-siglong mga Kristohanon?

◻ Nganong ang mga Kristohanon “padayong magbantay,” bisan sa panahon sa presensiya ni Kristo?

◻ Nganong ang tawhanong kalalangan maikagong nagpaabot sa “pagpadayag sa mga anak sa Diyos”?

◻ Nganong kita makasalig sa pagtugyan sa mga panahon ug mga yugto sa panahon diha sa mga kamot ni Jehova?

[Hulagway sa panid 17]

Ang mga Kristohanon kinahanglang padayong magtukaw samtang nagapaabot sa pag-abot ni Kristo

[Hulagway sa panid 18]

Ang dinihogang nanghibilin nagpabiling okupado sa pag-alagad kang Jehova, nga wala magbase sa ilang pagtuo sa mga kalkulasyon sa panahon