“Ang Diyos Nahigugma Kanato Niining Paagiha”
“Kon ang Diyos nahigugma kanato niining paagiha, nan kita sa atong kaugalingon nahailalom sa obligasyon nga maghigugmaay sa usag usa.”—1 JUAN 4:11.
1. Sa Marso 23 human sa pagsalop sa adlaw, nganong minilyong katawhan magtigom sa mga Kingdom Hall ug sa ubang mga tigomanan sa tibuok globo?
SA Dominggo, Marso 23, 1997, human sa pagsalop sa adlaw, tino nga adunay kapin sa 13,000,000 ka tawo sa tibuok-kalibotan ang magtigom sa mga Kingdom Hall ug sa ubang mga tigomanan nga ginagamit sa mga Saksi ni Jehova. Ngano? Tungod kay ang ilang mga kasingkasing natandog sa labing dakong pagpasundayag sa gugma sa Diyos diha sa katawhan. Si Jesu-Kristo nagpunting sa pagtagad nianang talagsaong pamatuod sa gugma sa Diyos, nga nag-ingon: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.”—Juan 3:16.
2. Unsang mga pangutana ang mapuslanong ipangutana natong tanan sa atong kaugalingon bahin sa atong pagsanong sa gugma sa Diyos?
2 Samtang atong hisgotan ang gugma nga gipakita sa Diyos, maayong pangutan-on nato ang atong kaugalingon, ‘Gipabilhan ko ba gayod ang nahimo sa Diyos? Ang paagi ba sa akong paggamit sa akong kinabuhi nagpamatuod sa pagpabili niana?’
“Ang Diyos Gugma”
3. (a) Nganong ang pagpasundayag sa gugma dili talagsaon alang sa Diyos? (b) Sa unsang paagi ang gahom ug kaalam makita diha sa iyang mga buhat sa kalalangan?
3 Ang pagpakitag gugma dili talagsaon sa bahin sa Diyos tungod kay “ang Diyos gugma.” (1 Juan 4:8) Ang gugma maoy iyang nangibabaw nga kinaiya. Sa dihang iyang giandam ang yuta aron pagapuy-an sa tawo, ang iyang pagpataas sa kabukiran ug ang pagtigom sa tubig ngadto sa mga linaw ug kadagatan maoy katingalahan kaayong pagpasundayag sa gahom. (Genesis 1:9, 10) Sa dihang gipalihok sa Diyos ang siklo sa tubig ug ang siklo sa oksiheno, sa dihang iyang gidisenyo ang dili-maisip nga mga mikroorganismo ug lainlaing mga tanom sa paghimo sa kemikal nga mga elemento sa yuta nga pagkaon nga makaon sa tawo aron mabaskog ang ilang mga kinabuhi, sa dihang iyang giangay ang oras sa atong biolohikanhong mga orasan aron mosibo sa gitas-on sa mga adlaw ug sa mga bulan sa planetang Yuta, kini nagpasundayag ug dakong kaalam. (Salmo 104:24; Jeremias 10:12) Bisan pa, ang labi pang talagsaon diha sa pisikal nga kalalangan mao ang pamatuod sa gugma sa Diyos.
4. Sa pisikal nga kalalangan, unsay pamatuod sa gugma sa Diyos nga angay makita ug pabilhan natong tanan?
4 Ang atong igtitilaw mopadayag kanato sa gugma sa Diyos inigpaak nato sa lumoy, hinog nga prutas nga dayag nga gihimo dili lamang sa pagpabaskog kanato kondili usab sa paghatag kanatog kalipay. Ang atong mga mata makakita sa dayag nga pamatuod niana diha sa hilabihan ka matahom nga mga pagsalop sa adlaw, sa punog-bituon nga kalangitan sa matin-awng kagabhion, sa nagkalainlaing mga porma ug hayag nga mga kolor sa kabulakan, sa mga kalaki sa nati nga mga mananap, ug sa mainit nga mga pahiyom sa atong mga higala. Ang atong mga ilong magpamatikod kanato niana sa dihang mahingos nato ang maamyon nga kahumot sa mga bulak sa tingpamulak. Ang atong dalunggan makadungog niana samtang nagapamati kita sa mga kinanaas sa busay, sa mga awit sa kalanggaman, ug sa mga tingog sa mga minahal. Atong mabati kana sa dihang mainitong gakson kita sa atong usa nga minahal. Ang pipila ka matang sa mga mananap gisangkapan ug mga abilidad sa pagkakita, pagkadungog, o pagkapanimahog mga butang nga dili mahimo sa mga tawo. Apan ang mga tawo, nga gihimo sa dagway sa Diyos, adunay katakos sa pagkabati sa gugma sa Diyos sa usa ka paagi nga walay mananap ang makahimo.—Genesis 1:27.
5. Sa unsang paagi gipakita ni Jehova ang tugob nga gugma kang Adan ug Eva?
5 Sa dihang gilalang ni Jehova nga Diyos ang unang mga tawo, si Adan ug Eva, iyang gilibotan sila ug pamatuod sa iyang gugma. Nagtanom siya ug usa ka tanaman, usa ka paraiso, ug gipatubo ang mga kahoy sa tanang matang diha niana. Naghatag siya ug suba aron tubigan kana ug gipuno kana ug maanindot kaayong kalanggaman ug kahayopan. Iyang gihatag kining tanan ngadto kang Adan ug Eva ingong ilang pinuy-anan. (Genesis 2:8-10, 19) Gitagad sila ni Jehova ingong iyang mga anak, ingong bahin sa iyang unibersohanong pamilya. (Lucas 3:38) Kay nakataganag Eden ingong sumbanan, ang langitnong Amahan niining unang tawhanong paris naghatag sa atubangan nila ug makatagbawng buluhaton sa pagpasangkad sa Paraiso nga molukop sa tibuok globo. Ang tibuok yuta pagapuy-an sa ilang mga anak.—Genesis 1:28.
6. (a) Unsay imong pagbati bahin sa rebelyosong dalan nga gisubay ni Adan ug Eva? (b) Unsay nagpakita nga kita nakakat-on gikan sa nahitabo sa Eden ug nga kita nakapahimulos niana nga kahibalo?
6 Apan, wala magdugay si Adan ug Eva nag-atubang ug usa ka pagsulay sa pagkamasinugtanon, usa ka pagsulay sa pagkamaunongon. Ang una ug unya ang sunod napakyas sa pagpakitag pagpabili sa gugma nga gituga kanila. Ang ilang gihimo makalilisang. Kadto dili-mapasaylo! Tungod niini, sila nawad-an sa ilang relasyon sa Diyos, gipalagpot gikan sa iyang pamilya, ug gipalayas gikan sa Eden. Atong mabati gihapon karon ang mga epekto sa ilang sala. (Genesis 2:16, 17; 3:1-6, 16-19, 24; Roma 5:12) Apan kita ba nakakat-on gikan sa nahitabo? Sa unsang paagi kita nagasanong sa gugma sa Diyos? Ang mga desisyon ba nga atong ginahimo matag adlaw nagpakita nga kita nagpabili sa iyang gugma?—1 Juan 5:3.
7. Bisan pa sa gihimo ni Adan ug Eva, sa unsang paagi gipakita ni Jehova ang gugma alang sa ilang mga anak?
7 Bisan ang dakong kawalay-pagpabili nga gipakita sa atong unang tawhanong mga ginikanan alang sa tanang nahimo sa Diyos kanila wala makapugong sa kaugalingong gugma sa Diyos. Agig kaluoy alang sa mga tawo nga wala pa niadto mangatawo—lakip niadtong buhi kanato karong adlawa—gitugotan sa Diyos si Adan ug Eva sa pagpatunghag pamilya una pa sila nangamatay. (Genesis 5:1-5; Mateo 5:44, 45) Kon wala pa niya kadto himoa, walay usa unta kanato ang nangatawo. Pinaagi sa anam-anam nga pagpadayag sa iyang kabubut-on, si Jehova nagtagana usab ug basehanan sa paglaom alang sa tanang anak ni Adan nga magpasundayag ug pagtuo. (Genesis 3:15; 22:18; Isaias 9:6, 7) Ang iyang kahikayan naglakip ug paagi diin ang mga tawo sa tanang kanasoran makabatog balik niadtong giwala ni Adan, nga mao, ang hingpit nga kinabuhi ingong inuyonang mga sakop sa unibersohanong pamilya sa Diyos. Iyang gihimo kini pinaagi sa pagtagana ug lukat.
Nganong Gikinahanglan ang Usa ka Lukat?
8. Nganong wala na lang magsugo ang Diyos nga bisag si Adan ug Eva kinahanglang mamatay, walay usa sa ilang masinugtanong mga anak ang kinahanglang mamatay?
8 Kinahanglan ba gayod ang panglukat diha sa matang sa usa ka tawhanong kinabuhi nga ibayad? Nganong wala na lang magsugo ang Diyos nga bisag si Adan ug Eva kinahanglang mamatay tungod sa ilang pagrebelde, ang tanan niyang mga anak nga magmasinugtanon sa Diyos mahimong mabuhi sa walay-kataposan? Gikan sa mubog-abot nga tawhanong panglantaw, kana daw makataronganong pamation. Apan, si Jehova maoy “mahigugmaon sa pagkamatarong ug hustisya.” (Salmo 33:5) Human lamang nga si Adan ug Eva nahimong mga makasasala nga sila nanganak; busa walay usa niadtong mga anaka ang natawong hingpit. (Salmo 51:5) Silang tanan nakapanunod sa sala, ug ang silot sa sala mao ang kamatayon. Kon wala kini tagda ni Jehova, unsang matanga sa panig-ingnan ang iyang mahatag alang sa mga sakop sa iyang unibersohanong pamilya? Dili niya mahimong isalikway ang iyang kaugalingong matarong nga mga sukdanan. Iyang gitahod ang mga ginapangayo sa hustisya. Wala gayoy usa ang may lig-ong katarongan sa pagsaway sa paagi sa pagpakiglabot sa Diyos sa mga isyung nalangkit.—Roma 3:21-23.
9. Sumala sa sukdanan sa hustisya sa Diyos, unsang matanga sa lukat ang gikinahanglan?
9 Nan, sa unsang paagi ang hustong basehanan matagan-an sa pagluwas sa mga anak ni Adan nga magpasundayag ug mahigugmaong pagkamasinugtanon kang Jehova? Kon gihalad sa usa ka hingpit nga tawo ang kinabuhi diha sa kamatayon, gikinahanglan sa hustisya nga ang bili nianang hingpit nga kinabuhi makatabon sa mga sala sa mga tawo nga motuo ug modawat sa lukat. Sanglit ang sala sa usa ka tawo, si Adan, maoy hinungdan nga nahimong mga makasasala ang tibuok tawhanong pamilya, ang giula nga dugo sa laing hingpit nga tawo, nga katumbas ug bili, makatimbang sa mga timbangan sa hustisya. (1 Timoteo 2:5, 6) Apan asa makita ang ingon niining matanga sa tawo?
Unsa ka Dako ang Bili?
10. Nganong ang mga anak ni Adan dili makatagana sa gikinahanglang lukat?
10 Taliwala sa mga anak sa makasasalang Adan, walay usa ang makatagana sa gikinahanglan sa pagpalit ug balik sa mga palaaboton sa kinabuhi nga giwala ni Adan. “Walay bisan usa kanila ang makahimo sa bisan unsang paagi sa pagtubos bisan sa usa ka igsoon, ni magahatag sa Diyos ug lukat alang kaniya; (ug ang pangtubos sa ilang kalag bililhon kaayo nga kini mihunong hangtod sa kahangtoran) nga siya mabuhi gihapon sa walay kataposan ug dili makakita sa gahong.” (Salmo 49:7-9) Imbes pasagdan ang katawhan nga walay paglaom, si Jehova mismo maluluy-ong mihatag ug tagana.
11. Pinaagi sa unsa nga gitagana ni Jehova ang hingpit tawhanong kinabuhi nga gikinahanglan alang sa usa ka angay nga lukat?
11 Si Jehova wala magpadala ug usa ka manulonda sa yuta aron magpatusotuso nga namatay pinaagi sa pagpahimutang ug usa ka gipakatawo nga lawas samtang siya nagpadayon sa pagkinabuhi ingong usa ka espiritu. Hinunoa, pinaagi sa paghimog milagro nga ang Diyos lamang, ang Maglalalang, ang makalaraw, iyang gibalhin ang puwersa-sa-kinabuhi ug sumbanan sa kinaiya sa usa ka langitnong anak ngadto sa tagoangkan sa usa ka babaye, si Maria nga anak ni Heli, sa tribo ni Juda. Ang aktibong gahom sa Diyos, ang iyang balaang espiritu, nagpanalipod sa pagtubo sa bata diha sa tagoangkan sa iyang inahan, ug kini natawong usa ka hingpit nga tawhanon. (Lucas 1:35; 1 Pedro 2:22) Unya nabatonan niining usa nga iyang magamit ang bili nga gikinahanglan sa pagtaganag lukat nga bug-os magtagbaw sa mga kinahanglanon sa hustisya sa Diyos.—Hebreohanon 10:5.
12. (a) Sa unsang diwa nga si Jesus mao ang “bugtong-gianak nga Anak” sa Diyos? (b) Sa unsang paagi ang pagpadala sa Diyos niining usa sa pagtagana sa lukat nagpasiugda sa Iyang gugma alang kanato?
12 Ngadto kang kinsa sa iyang panonpanong langitnong mga manulonda nga gihatag ni Jehova kining buluhatona? Ngadto sa usa nga gihubit diha sa Kasulatan ingong iyang “bugtong-gianak nga Anak.” (1 Juan 4:9) Kining ekspresyona gigamit sa paghubit, dili kon nahimong unsa siya ingong usa ka tawo, kondili kon unsa siya una pa niana diha sa kalangitan. Siya lamang ang usa nga direktang gilalang ni Jehova nga walay tabang ni bisan kinsa. Siya ang Panganay sa tanang kalalangan. Siya ang usa nga gigamit sa Diyos aron mapatungha ang tanang ubang mga linalang. Ang mga manulonda maoy mga anak sa Diyos, sama nga si Adan maoy anak sa Diyos. Apan si Jesus gihubit ingon nga nakabaton sa “himayang ingon nianang iya sa bugtong-gianak nga anak gikan sa usa ka amahan.” Siya ginaingon nga “anaa sa dughan nga pagkabutang uban sa Amahan.” (Juan 1:14, 18) Ang iyang relasyon sa Amahan maoy usa ka suod, masanduroton, mahigugmaon nga relasyon. Siya, sama sa iyang Amahan, adunay gugma alang sa katawhan. Ang Proverbio 8:30, 31 nagpadayag kon unsay gibati sa iyang Amahan labot niini nga Anak ug kon unsay gibati sa Anak labot sa katawhan: “Ako mao ang usa nga gikahimut-an pag-ayo niya [Jehova] sa matag adlaw, ako malipayon sa tanang panahon sa iyang atubangan, . . . ug ang mga butang nga gikalipayan ko [Jesus, ang Dakong Magbubuhat ni Jehova, ang larawan sa kaalam] maoy sa mga anak sa tawo.” Kini nga labing pinalanggang Anak ang gipadala sa Diyos sa yuta sa pagtagana sa lukat. Busa, pagkamakahuloganon ang pulong ni Jesus: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak”!—Juan 3:16.
13, 14. Sa unsang paagi ang rekord sa Bibliya bahin sa pagsulay ni Abraham sa paghalad kang Isaac makatabang kanato sa pagpabili labot sa gihimo ni Jehova? (1 Juan 4:10)
13 Aron matabangan kita sa pagsabot kon unsay kahulogan niana, sa dugay na kaayong panahon kanhi sa wala pa mianhi si Jesus sa yuta, gisugo sa Diyos si Abraham, nga duolan sa 3,890 ka tuig kanhi: “Kuhaa, palihog, ang imong anak, ang imong bugtong anak nga imong gihigugma pag-ayo, si Isaac, ug lakaw ngadto sa yuta sa Moria ug didto itanyag siya ingong halad nga sinunog diha sa usa sa mga bukid nga akong igaingon kanimo.” (Genesis 22:1, 2) Sa pagkamatinuohon, si Abraham misugot. Ibutang ang imong kaugalingon sa kahimtang ni Abraham. Unsa kaha kon imong anak kadto, imong bugtong anak nga gihigugma mo pag-ayo? Unsa kahay imong gibati samtang nagbugha ka sa kahoy alang sa halad nga sinunog, nga mibiyahe sa daghang adlaw ngadto sa yuta sa Moria, ug sa pagbutang sa imong anak diha sa halaran?
14 Nganong adunay ingon niana nga pagbati ang usa ka mahangawaong ginikanan? Ang Genesis 1:27 nag-ingon nga gilalang sa Diyos ang tawo diha sa Iyang dagway. Ang atong mga pagbati sa gugma ug pagkamahangawaon nagpabanaag sa limitado kaayong paagi sa kaugalingong gugma ug pagkamahangawaon ni Jehova. Sa kahimtang ni Abraham, ang Diyos nangilabot, nga tungod niana si Isaac wala gayod mahalad. (Genesis 22:12, 13; Hebreohanon 11:17-19) Apan, sa iyang kaugalingong kahimtang, si Jehova wala maghikaw sa pagtagana sa lukat, bisag kadto nahimo nga may dako kaayong bili kaniya ug sa iyang Anak. Ang nahimo maoy, dili tungod sa bisan unsang obligasyon sa bahin sa Diyos, kondili, hinunoa, usa ka pagpasundayag sa talagsaon kaayong dili-takos nga kalulot. Ato ba gayod kana nga gipabilhan?—Hebreohanon 2:9.
Kon Unsay Gipaposible Niini
15. Sa unsang paagi ang lukat nakaapekto sa mga kinabuhi bisan niining presenteng sistema sa mga butang?
15 Kanang maong mahigugmaong tagana nga gihimo sa Diyos adunay dako kaayong epekto sa mga kinabuhi niadtong midawat niana diha sa pagtuo. Sila niadto nahimulag sa Diyos ingong resulta sa sala. Sila maoy, ingon sa pagkapadayag sa iyang Pulong, ‘mga kaaway tungod kay ang ilang mga kaisipan diha man sa mga buhat nga tuman-kadaotan.’ (Colosas 1:21-23) Apan sila “gipahiuli ngadto sa Diyos pinaagi sa kamatayon sa iyang Anak.” (Roma 5:8-10) Kay nakabag-o sa ilang dalan sa kinabuhi ug midawat sa kapasayloan nga gipaposible sa Diyos ngadto niadtong nagapasundayag ug pagtuo sa halad ni Kristo, sila gihatagan ug hinlo nga konsensiya.—Hebreohanon 9:14; 1 Pedro 3:21.
16. Unsang mga panalangin ang gihatag ngadto sa gamayng panon tungod sa ilang pagtuo sa lukat?
16 Gipaabot ni Jehova ngadto sa limitadong gidaghanon niini, usa ka “gamayng panon,” ang dili-takos nga pabor sa pagkahimong kauban sa iyang Anak diha sa langitnong Gingharian, uban sa tumong sa pagtuman sa orihinal nga katuyoan sa Diyos alang sa yuta. (Lucas 12:32) Kini sila gikuha ‘gikan sa matag tribo ug dila ug katawhan ug nasod . . . aron mahimong usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.’ (Pinadayag 5:9, 10) Ngadto kanila, si apostol Pablo nagsulat: “Kamo nakadawat ug espiritu sa pagsagop ingong mga anak, nga pinaagi niining espirituha kita nagatuaw: ‘Abba, Amahan!’ Ang espiritu mismo nagapanaksi uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo.” (Roma 8:15-17) Sa pagkahimong sinagop sa Diyos ingong iyang mga anak, sila gihatagan ug hamiling relasyon nga giwala ni Adan; apan ngadto niining mga anaka nga ihatag ang dugang mga pribilehiyo sa langitnong pag-alagad—usa ka butang nga wala gayod mabatoni ni Adan. Dili ikahibulong nga si apostol Juan miingon: “Tan-awa kon unsang matanga sa gugma ang gihatag kanato sa Amahan, aron nga kita pagatawgong mga anak sa Diyos”! (1 Juan 3:1) Ngadto kanila nga gipasundayag sa Diyos dili lamang ang may prinsipyong gugma (a·gaʹpe) kondili usab ang malulot nga pagmahal (phi·liʹa), nga maoy timaan sa bugkos nga naglungtad taliwala sa matuod nga mga higala.—Juan 16:27.
17. (a) Ngadto sa tanan nga nagapasundayag ug pagtuo sa lukat, unsang kahigayonan ang gihatag? (b) Unsa unyay kahulogan sa “mahimayaong kagawasan sa mga anak sa Diyos” alang kanila?
17 Ngadto sa uban usab—ang tanan nga nagapasundayag ug pagtuo sa tugob nga tagana sa Diyos nga kinabuhi pinaagi kang Jesu-Kristo—gibuksan ni Jehova ang higayon aron mabatonan ang hamiling relasyon nga giwala ni Adan. Si apostol Pablo nagbatbat: “Ang maikagong pagpaabot sa kalalangan [ang tawhanong kalalangan nga gikan kang Adan] nagahulat sa pagpadayag sa mga anak sa Diyos [sa ato pa, sila naghulat sa panahon sa dihang madayag kaayo nga ang mga anak sa Diyos kinsa mga manununod uban ni Kristo sa langitnong Gingharian nagahimog positibong aksiyon alang sa katawhan]. Kay ang kalalangan gipailalom sa pagkawalay-pulos [sila nangatawo sa sala nga may palaabotong kamatayon, ug wala gayoy paagi diin mapahigawas nila ang ilang kaugalingon], dili pinaagi sa kaugalingong kabubut-on niini apan pinaagi kaniya nga nagsakop niini, pinasukad sa paglaom [nga gihatag sa Diyos] aron nga ang kalalangan mismo usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:19-21) Unsay kahulogan niana nga kagawasan? Nga sila napahigawas gikan sa pagkaulipon sa sala ug kamatayon. Sila makabaton ug kahingpitan sa hunahuna ug lawas, sa Paraiso ingong ilang pinuy-anan, ug kinabuhing walay-kataposan diin ilang pagatagamtamon ang ilang kahingpitan ug sa pagpasundayag sa ilang pagpabili kang Jehova, ang bugtong matuod nga Diyos. Ug sa unsang paagi gipaposible kining tanan? Pinaagi sa halad lukat sa bugtong Anak sa Diyos.
18. Sa Marso 23 human sa pagsalop sa adlaw, unsay atong pagahimoon, ug ngano?
18 Sa Nisan 14, 33 K.P., sa usa ka itaas nga lawak sa Jerusalem, gisugdan ni Jesus ang Memoryal sa iyang kamatayon. Ang tinuig nga paghandom sa iyang kamatayon nahimong usa ka hinungdanong okasyon sa mga kinabuhi sa tanang matuod nga mga Kristohanon. Si Jesus mismo nagsugo: “Padayong buhata kini sa paghandom kanako.” (Lucas 22:19) Sa 1997 ang Memoryal pagahimoon human sa pagsalop sa adlaw sa Marso 23 (ang panahon nga magsugod ang Nisan 14). Nianang adlawa, wala nay lain pang mas importante kay sa pagtambong alang niining Memoryal nga okasyon.
Unsay Imong Tubag?
◻ Sa unsang mga paagi nagpakita ang Diyos ug tugob nga gugma alang sa katawhan?
◻ Nganong gikinahanglan ang hingpit nga tawhanong kinabuhi sa paglukat sa mga anak ni Adan?
◻ Sa unsang dako kaayong bili nga gitagana ni Jehova ang lukat?
◻ Unsay gipaposible sa lukat?
[Hulagway sa panid 10]
Gihatag sa Diyos ang iyang bugtong Anak