Ang Basahon sa Kinaiyahan ug ang Bibliya

“Ang uniberso makapahingangha kanako! Dili ako makahunahunang makalungtad ang maong ‘orasan’ nga walay Tagbuhat sa orasan.”—Voltaire, ika-18 nga siglong Pranses nga pilosopo.

ANG eksaktong orasan makadasig sa pagdayeg alang sa kahanas ug kalantip sa kaisipan sa tagbuhat niini. Apan komosta ang uniberso alirong nato? Makapadayag ba kana, labing menos sa usa ka sukod, sa personalidad sa Maglalalang niini?

Halos 2,000 ka tuig kanhi, si apostol Pablo, usa sa mga magsusulat sa Bibliya, mihatag ug tubag sa maong pangutana: “Kay ang dili-makitang mga hiyas [sa Diyos] tin-awng makita sukad sa paglalang sa kalibotan paunahan, tungod kay sila maila pinaagi sa mga butang nabuhat, bisan ang iyang walay-kataposang gahom ug Pagkadiyos.” (Roma 1:20) Busa, unsay atong makat-onan gikan sa pagtan-aw niining basahon sa kinaiyahan?

Kon Unsay Gitudlo Kanato sa Orasan Bahin sa Tagbuhat sa Orasan

Usa ka habog nga busay, ang dagat panahon sa bagyo, usa ka tin-awng gabii nga punog libolibong mga bituon—kini sila pila ka butang nga makapahunahuna nato sa usa ka gamhanang Maglalalang. Ang pagkaeksakto sa mga giliyokan sa mga planeta makapahinumdom usab kanato, samang kini nakapahinumdom kang Voltaire, nga ang Maglalalang usa ka Dakong Organisador, usa ka Batid nga Tagbuhat sa orasan.—Salmo 104:1.

Ang kadaiya sa mga abot sa yuta—ang prutas ug utanon nga atong ginadawat nga dagaya—nagapamatuod usab sa kamahatagon sa Diyos. Gipamatud-an kini ni Pablo sa gipahayag niya nga ang Diyos “wala magpasagad nga siya walay pamatuod sa pagkaaging siya nagbuhat ug maayo, nga nagahatag kaninyog ulan gikan sa langit ug sa mabungahong mga panahon, nga nagapuno sa inyong mga kasingkasing sa katugob sa pagkaon ug sa kasadya.”—Buhat 14:17.

Kon Unsay Wala Itug-an Kanato sa Orasan

Ang dugang pagsusi sa basahon sa kinaiyahan magtudlo kanato sa lain pang mga hiyas sa Diyos. Apan kon kita mosalig lamang sa atong makat-onan gikan sa kalalangan, ang atong kahibalo sa Diyos mahimong limitado sa kanunay. Ang Pranses nga magsusulat si Robert Lenoble nagsaysay niini diha sa iyang librong Esquisse d’une histoire de l’idée de Nature, (An Outline History of the Idea of Nature): “Iliso kanunay sa tawo ang iyang pagtagad sa Kinaiyahan aron matugkad ang misteryo niini ug madiskobrehan ang sekreto niini, usa ka sekretong dili gayod mogawas sa usa ka laboratoryo.” Kapig katunga sa mga Pranses nga gisurbi sa Katolikong mantalaang La Croix—kon kaha sila mga magtutuo o mga ateyista—mouyon niini ug modawat nga “ang siyensiya dili gayod makahatag ug igong katin-awan bahin sa uniberso, sanglit daghang butang ang nahisakop sa pilosopikanhon o relihiyosong natad.”

Mga 3,500 ka tuig kanhi, ang matinumanong Job nahidangat sa samang konklusyon. Iyang gipatungha ang pangutana: “Apan ang kaalam—diin kini hikaplagi, ug diin karon, ang dapit sa pagsabot?” Kini ba nga kaalam hikaplagan diha sa basahon sa kinaiyahan? “Ang kahiladman sa katubigan nagaingon, ‘Kini wala kanako!’ Ang dagat usab nagaingon, ‘Kini wala kanako!’ Kini tinago gikan sa mga mata sa tanang buhi, ug gikan sa mga nagalupad nga kalalangan sa kalangitan kini sinalipdan.”—Job 28:12, 14, 21.

Nan, asa man kita moadto sa pagkaplag sa maong kaalam? Kanang basahona mismo nagatubag: “Ang Diyos mao ang Usa nga nakasabot sa dalan niini, ug nahibalo sa dapit niini.” (Job 28:23) Ug gipaambit sa Diyos ang iyang kaalam sa katawhan sa kahibulongang paagi pinaagi sa iyang Pulong, ang Bibliya.

Linaing Kahibalo Gikan sa Bibliya

Ang Bibliya nagahatag kanatog talagsaong pagsabot sa sinugdan sa katawhan. Kini nagatug-an kanatong giandam sa Diyos ang yuta ug dayon gibutang dinha ang unang magtiayon. Ang una natong mga ginikanan mabuhi untang walay kataposan diha sa hingpit nga silinganan. Apan sila mirebelde, ug tungod sa ilang sala ilang gibuksan ang dalan alang sa tanang pagkadaotan—apil ang sala ug kamatayon—nga nagsakit sa katawhan.—Genesis, mga kapitulo 1 hangtod 3; Roma 5:12-21.

Ang Bibliya nagatug-an usab kanato sa detalyado sa mga lakang gihimo sa Diyos sa pagsulbad sa kahimtang. Libolibong katuigan tapos kang Adan ug Eva, ang kaugalingong Anak sa Diyos, si Jesus, mianhi sa yuta sa paghatag sa katawhan ug higayon nga mapasig-uli sa Diyos. Sa ingon gitanyag ni Kristo sa mga tawo nga motuo kaniya ug moila sa bili sa iyang halad sa kalaoman sa kinabuhing dayon sa yuta nga mahimong paraiso.—Lucas 23:43; Juan 3:16.

Kining paglaoma gitanyag sa matag usa kanato. Aron matuman kini kinahanglang makabaton kita sa tukmang ‘kahibalo sa bugtong matuod nga Diyos ug sa usang iyang gipadala, si Jesu-Kristo.’ Kinahanglang magkinabuhi usab kitang nahiuyon sa maong paglaom. Kining tukmang kahibalo hikaplagan diha sa Bibliya.—Juan 17:3; Santiago 2:24-26.

Gusto ba nimong makabatog detalyadong tubag sa mga pangutana sama sa, Diin man gikan ang tawo? Unsay mahitabo sa pagkamatay? Unsa ang mga hinungdan sa mga suliran sa katawhan? May paglaom ba nga may adlaw rang masulbad kana? Kanus-a ug sa unsang paagi ipatungha sa Diyos ang hingpit nga mga kahimtang alang sa katawhan? Kon mao, gidasig ka namo sa pagsusi sa Bibliya, ang bugtong basahon nga mohatag kanimo sa mga tubag gikan sa Diyos sa uniberso ug ang bugtong basahon nga nasudlan sa “pasikaranan sa paglaom sa kinabuhing walay kataposan.” Ang katuyoan sa mga basahon sa Watch Tower Society mao ang pagtabang kanimo sa pagkaplag niining mga tubaga diha sa imong Bibliya.—Tito 1:1, 2.

[Hulagway sa panid 5]

Ang uniberso nagpadayag sa mga kinaiya sa personalidad sa Diyos

[Hulagway sa panid 6]

Ang Bibliya lamang ang makatug-an kanato sa mga katuyoan sa Diyos bahin sa tawo ug sa yuta