Paglahutay nga Makaangkon sa Kadaogan

“Kamo nagakinahanglan ug paglahutay, aron nga, tapos kamo makabuhat sa kabubut-on sa Diyos, kamo makadawat sa katumanan sa saad.”—HEBREOHANON 10:36.

 1. Nganong ang paglahutay usa ka kinahanglanon alang sa tanan nga nagaalagad kang Jehova nga Diyos karong adlawa?

KINING tibuok kalibotan nahiluna sa gahom sa usa ka diyos nga masukolon. Ang dili-makitang magmamando niini, si Satanas nga Yawa, nagbug-os sa tanan niyang kusog sa pagsupak kang Jehova ug pagpakigbisog batok sa pagbayaw sa pagkasoberano ni Jehova sa tibuok kalibotan pinaagi sa Mesiyanikong Gingharian. Tungod niana dili kalikayan nga bisan kinsa nga nagpahinungod sa iyang kaugalingon ngadto sa Diyos ug mibarog sa Iyang kiliran sa isyu sa pagkasoberano kanunay supakon niining kalibotana. (Juan 15:18-20; 1 Juan 5:19) Busa matag usa kanato kinahanglang andam sa paglahutay hangtod kining kalibotana bug-os mapukan sa Armageddon. Aron mahilakip sa mga mananaog sa Diyos nga midaog sa kalibotan pinaagi sa ilang pagtuo ug pagkamatarong, kinahanglang molahutay kita hangtod sa kataposan. (1 Juan 5:4) Sa unsang paagi mahimo nato kana?

 2, 3. Sa unsang paagi si Jehova nga Diyos ug si Jesu-Kristo labing dagkong mga panig-ingnan sa pagkamalahutayon?

² Sa usa ka butang, alang sa pagdasig makalantaw kita sa duha ka talagsaong panig-ingnan sa paglahutay. Kinsa ba sila? Ang usa mao si Jesu-Kristo, “ang panganay sa tanang kalalangan,” si kinsa matinumanong milahutay sa pag-alagad sa Diyos sukad sa paglalang kaniya sa usa ka panahong wala hisayri sa nangagi. Sa iyang pagpadayon sa pag-alagad sa Diyos nga matinumanon, si Jesus nahimong panig-ingnan alang sa tanang intelihenteng linalang nga human niadto gilalang sa langit ug sa yuta. (Colosas 1:15, 16) Bisan pa niana, ang labing dakong panig-ingnan sa paglahutay mao si Jehova nga Diyos, kinsa dugay nang nagpailob sa rebelyon batok sa iyang unibersohanong pagkasoberano ug mopadayon sa pagpailob hangtod siya molihok aron sulbaron sa bug-os ang isyu sa pagkasoberano.

³ Si Jehova nag-antos sa sulundang paagi sa mga butang maylabot sa iyang dignidad ug iyang labing laglom personal nga mga pagbati. Siya nagpugong atubangan sa dakong paghagit ug nagpugong sa paglihok batok sa nagtamay kaniya​—apil si Satanas nga Yawa. Mapasalamaton kita sa pag-antos sa Diyos ug sa iyang kaluoy. Kon wala kana, dili gayod unta nato mapahimuslan bisan ang labing mubo nga kinabuhi. Tinuod, gipaila ni Jehova nga Diyos nga walay ikatanding kaniya sa iyang pagkamainantoson.

 4, 5. (a) Sa unsang paagi ang ilustrasyon ni Pablo sa usa ka magkokolon nagpakita sa pagkamainantoson sa Diyos ug sa iyang kaluoy? (b) Sa unsang paagi ang kaluoy sa Diyos mapamatud-an nga wala makawang?

⁴ Gipunting ni apostol Pablo ang pagkamainantoson ug ang kaluoy sa Diyos sa nagaingon siya: “Dili ba ang magkokolon may gahom ibabaw sa yutang-kolonon aron sa pagbuhat gikan sa samang umol sa usa ka sudlanan alang sa madungganong kagamitan, sa laing sudlanan alang sa dili-madungganong kagamitan? Kon, karon, ang Diyos, bisan pag may tinguha sa pagpasundayag sa iyang kapungot ug sa pagpaila sa iyang gahom, nagtugot uban ang dakong hataas nga pailob sa mga sudlanan sa kapungot nga angay sa kalaglagan, aron ikapaila niya ang kadagaya sa iyang himaya ibabaw sa mga sudlanan sa kaluoy, nga iyang giandam daan alang sa iyang himaya, nga mao, kita, si kinsa iyang gitawag dili lamang gikan sa mga Hudiyo kondili gikan usab sa mga nasod, unsay naa niana?”​—Roma 9:21-24.

⁵ Sumala sa gipakita niining mga pulonga, sulod niining yugtoa karon sa iyang pagkamainantoson, si Jehova nagapadayon sa iyang mahimayaong katuyoan ug nagpakitag kaluoy diha sa pila ka tawhanong sudlanan. Giandam niya ang maong mga sudlanan alang sa walay-kataposang himaya ug niana magpildi sa daotang mga katuyoan sa iyang dakong magsusupak, si Satanas nga Yawa, ug sa tanang kaabin ni Satanas. Dili tanang tawo ang misangpot nga mga sudlanan sa kapungot, nga angay sa kalaglagan. Kana nagpaila sa kaayohan sa pagpailob sa Diyos nga Makagagahom sa Tanan. Dili unya makawang ang iyang kaluoy. Mosangpot kana sa (1) usa ka mahimayaong Gingharianong pamilya sa mga langit ubos sa minahal nga Anak ni Jehova, si Jesu-Kristo, ug (2) usa ka napasig-uli ug nahingpit nga banay sa tawhanong mga linalang diha sa usa ka paraisong yuta, nga ang tanan mga manununod sa kinabuhing walay kataposan.

Paglahutay Hangtod sa Kataposan

 6. (a) Nganong ang mga Kristohanon dili makalikay sa pagsulay sa pagkamalahutayon? (b) Unsay kasagaran ipasabot sa Gregong pulong alang sa “paglahutay”?

⁶ Tungod nianang kahibulongang paglaom sa unahan, ang makapalig-ong mga pulong ni Jesus angay kanunay managingting sa atong mga igdulongog, nga mao: “Siya nga nakalahutay hangtod sa kataposan mao ang mamaluwas.” (Mateo 24:13) Hinungdanon nga maayo ang pagsugod diha sa dalan sa pagkatinun-an ni Kristo. Apan ang labing bililhon mao kon giunsa nato paglahutay, kon unsa ka maayo ang atong pagtapos sa dalan. Gipasiugda kini ni apostol Pablo sa miingon siya: “Kamo nagakinahanglan sa paglahutay, aron nga, tapos kamo makabuhat sa kabubut-on sa Diyos, kamo makadawat sa katumanan sa saad.” (Hebreohanon 10:36) Ang Gregong pulong nga gihubad dinhi nga “paglahutay” mao ang hy·po·mo·neʹ. Kini kasagaran nagpasabot sa maisogon, matubayon, o mapailobon nga pag-antos nga dili mawad-ag paglaom atubangan sa mga kababagan, mga paglutos, mga pagsulay, ug mga tentasyon. Kon nagalaom kita nga maangkon ang kaluwasan sa kataposan, kinahanglang mopailalom kita sa usa ka pagsulay sa paglahutay ingong bahin sa kinahanglanong pagpangandam alang sa maong kaluwasan.

 7. Unsang panglimbong ang kinahanglang likayan nato, ug kansang panig-ingnan ang motabang nato sa paglahutay?

⁷ Angay dili nato limbongan ang atong kaugalingon pinaagi sa makapahimuot-sa-kaugalingon nga ideya nga matapos nato dayon ang pagsulay. Aron ang mga isyu sa unibersohanong pagkasoberano ug ang pagkamatarong sa tawo matubag sa tino, wala ipahigawas ni Jehova ang iyang kaugalingon. Giantos niya ang daotang mga butang bisan pag iya unta kanang mapapas dayon. Si Jesu-Kristo usab usa ka panig-ingnan sa pagkamainantoson. (1 Pedro 2:21; itandi ang Roma 15:3-5.) Tungod niining magilakong mga panig-ingnan sa atong atubangan, seguradong kita andam usab nga molahutay hangtod sa kataposan.​—Hebreohanon 12:2, 3.

Usa ka Kinahanglanong Katakos

 8. Unsang hiyas ang kinahanglan natong tanan ang gipasundayag ni apostol Pablo?

⁸ Walay alagad sa Diyos, bisan gikan sa labing sayo nga panahon, ang napahigawas sa panginahanglan nga pamatud-an ang iyang pagkamatarong pinaagi sa paglahutay. Ang ilado kaayong mga tawo sa kasaysayan sa Bibliya nga nagpabiling matinumanon hangtod sa kamatayon ug nahimong takos alang sa kinabuhing walay kataposan sa mga langit mipamatuod gayod sa ilang pagkalig-on. Pananglitan, ang kanhi Pariseo, si Saulo sa Tarso, miingon ngadto sa mga taga-Corinto: “Ako wala mapamatud-i nga iwit sa inyong labing hawod nga mga apostol sa usa ka butang, bisan pag ako dili unsa man. Sa pagkamatuod, ang mga ilhanan sa usa ka apostol nahimo sa inyong taliwala pinaagi sa bug-os nga pagkamainantoson, ug pinaagi sa mga ilhanan ug mga katingalahan ug mga gamhanang buhat.” (2 Corinto 12:11, 12) Bisan pa sa kabug-at sa buluhaton, gimahal kaayo ni Pablo ang iyang ministeryo nga giantos niya ang daghan ug maikagong naningkamot nga dili kana pakaulawan.​—2 Corinto 6:3, 4, 9.

 9. (a) Giunsa pagpakita sa dinihogang nahibilin ang paglahutay, ug unsa ang sangpotanan? (b) Unsay nagasilbing usa ka pagdasig kanato sa pagpadayon nga matinumanon sa balaang pag-alagad?

⁹ Sa bag-o pang panahon, ang dinihogang mga Kristohanon nga nag-alagad sa Diyos sa wala pa ang unang gubat sa kalibotan nasayod nga ang 1914 magtimaan sa kataposan sa Panahon sa mga Hentil, ug daghan kanila nagdahom nga makadawat sa ilang langitnong ganti nianang halandumong tuig. Apan kadto wala matuman. Sumala sa gipakita sa mga panghitabo karon, sila may tinagpulo ka katuigan nga nahidugang niana. Panahon niining wala-damhang paglugway sa ilang yutan-ong pagkinabuhi, naagoman nila ang pagdalisay diha sa kamot ni Jehova nga Diyos. (Zacarias 13:9; Malakias 3:2, 3) Ang padayon nga paglahutay misangpot sa ilang kaayohan. Ingong mga alagad ni Jehova, nalipay sila nga gitudlo nga katawhan nga nagdala sa iyang ngalan. (Isaias 43:10-12; Buhat 15:14) Karong adlawa, kay nakalabang sa duha ka gubat sa kalibotan ug sa ubay-ubay gagmayng mga away, sila nalipay nga giabagan sa pagsabwag sa maayong balita pinaagi sa nag-usbaw nga dakong panon sa ubang mga karnero, nga karon mokabat ug kapin sa upat ka milyon. Ang espirituwal nga paraiso nga ilang gipahimuslan nakakaylap sa tibuok yuta, bisan ngadto sa kinalay-ang kapuloan sa dagat. Kining inuyonan nga pagtagad, nga dugang ug dugang gipabilhan nato samtang mas taas pa ang atong kinabuhi, nahimong usa ka pagdasig aron sa pagpadayong matinumanon sa balaang pag-alagad hangtod ang kabubut-on ug katuyoan ni Jehova bug-os nga matuman.

10. Basin may maluya kanato, unsay regular nga gikinahanglan?

¹⁰ Sanglit ang atong ganti nagdepende sa atong pagkamalig-on, kinahanglan nato kanunay ang panambag niining hinungdanong butang. (1 Corinto 15:58; Colosas 1:23) Aron walay kaluya taliwala sa katawhan ni Jehova, kinahanglang regular kitang dasigon sa paglahutay sa kamatuoran ug sa bililhong pribilehiyo sa pagpakaylap sa kamatuoran, sama sa bag-ong napormang mga kongregasyon sa unang siglo pinaagi sa mga pagduaw pag-usab ni Pablo ug Bernabe. (Buhat 14:21, 22) Himoon natong hugot nga hukom ug determinasyon nga, sumala sa pagpahayag ni apostol Juan niini, ang kamatuoran magapabilin diha kanato, “ug kini magauban kanato sa walay kataposan.”​—2 Juan 2.

Paghulat Uban ang Di-matarog nga Paglahutay

11. Unsa ang daw lagda sa Diyos sa iyang mga alagad, ug sa unsang paagi kini giilustrar sa kaso ni Jose?

¹¹ Kinahanglan ug panahon aron matapos ang pagsulay labot kanato. (Santiago 1:2-4) Paghulat! Paghulat! Paghulat! daw mao ang lagda sa Diyos sa iyang mga alagad sa kakaraanan sa dihang sila gisulayan bahin sa ilang determinasyon sa pagpadayon sa pagtuo. Apan ang paghulat, sa kataposan, napamatud-an sa kanunay nga magantihon alang niadtong matinumanong mga alagad. Si Jose, pananglitan, naghulat ug 13 ka tuig ingong usa ka ulipon ug usa ka binilanggo, apan ang kasinatian midalisay sa iyang pagkatawo.​—Salmo 105:17-19.

12, 13. (a) Sa unsang paagi si Abraham usa ka panig-ingnan sa matinumanon nga paglahutay? (b) Sa unsang paagi ang pagtuo ug pagkamalahutayon ni Abraham nahimong usa ka sumbanan alang kanato?

¹² Si Abraham maoy 75 anyos na sa dihang gitawag siya sa Diyos gikan sa Ur sa mga Caldeanhon aron moadto sa Yutang Saad. Siya hapit nag 125 anyos sa dihang nadawat niya ang gipanumpaan nga paglig-on sa saad sa Diyos​—nga nahitabo dayon tapos ipasundayag ni Abraham ang kalig-on sa iyang pagtuo pinaagi sa pag-abot sa punto nga ihalad ang iyang hinigugma nga anak, si Isaac, nga mihunong lang sa dihang gipugngan sa manulonda ni Jehova ang iyang kamot ug gisanta ang paghalad. (Genesis 22:1-18) Ang kalim-an ka tuig maoy hataas nga panahon aron si Abraham maghulat ingong usa ka dumuloong sa usa ka langyawng yuta, apan siya nagpabilin pag laing 50 ka tuig hangtod nga siya namatay sa 175 anyos na sa pangedaron. Nianang tanang panahon, si Abraham usa ka matinumanong saksi ug propeta ni Jehova nga Diyos.​—Salmo 105:9-15.

¹³ Ang pagtuo ug paglahutay ni Abraham gipadayag ingong usa ka sumbanan alang sa tanang alagad sa Diyos nga buot makadawat sa gisaad nga mga panalangin pinaagi kang Jesu-Kristo, ang Binhi ni Abraham. (Hebreohanon 11:8-10, 17-19) Mahitungod kaniya, atong mabasa sa Hebreohanon 6:11-15: “Matinguhaon kami nga ang matag usa kaninyo magpakita sa samang pagkamakugihon aron makabaton sa bug-os nga pagsalig sa paglaom hangtod sa kataposan, aron kamo dili unta mahimong taspokan, kondili mahimong mga manunundog niadtong si kinsa pinaagi sa pagtuo ug pailob magapanunod sa mga saad. Kay sa gihimo sa Diyos ang iyang saad kang Abraham, sanglit siya dili makapanumpa pinaagi sa usa nga dako pa, siya nanumpa sa iyang kaugalingon, nga nag-ingon: ‘Tino nga sa panalangin pagapanalanginan ko ikaw, ug sa pagdaghan ikaw padaghanon ko.’ Ug busa tapos ipakita ni Abraham ang pailob, iyang nabatonan ang maong saad.”

14. Nganong dili angay nga kita maghunahuna nga ang pagsulay sa pagkamalahutayon maoy way-kataposan ug ang ganti dili mabatonan?

¹⁴ Nakita na sa dinihogang nahibilin nga milabay ang 77 ka tuig sukad sa pagkatapos sa Hentil nga mga Panahon niadtong 1914, sa dihang gidahom sa pipila kanila ang paghimaya sa matuod Kristohanong kongregasyon ngadto sa langit. Unsa ka dugay pa kinahanglang maghulat ang nahibilin wala kita masayod. Nan angay ba nga kita matarog ug maghunahuna nga ang paghulat walay kataposan ug ang ganti usa ka panghanduraw nga tumong? Dili! Kana dili gayod magbayaw sa pagkasoberano sa Diyos o magpasidungog sa iyang ngalan. Dili siya ikapakamatarong atubangan sa kalibotan sa dihang ihatag kanato ang kadaogan ug ang mosangpot nga ganti nga kinabuhing walay kataposan. Bisan unsa ka taas ang panahon, ang nahibilin, kauban sa ilang matinumanon samag-karnero nga mga kauban, determinado nga maghulat nga si Jehova molihok sa iyang kaugalingong panahon. Sa pagpakita sa maong sulundang pagkamalahutayon, ginasunod nila ang dalan ni Abraham.​—Roma 8:23-25.

15. (a) Unsa ang atong kontrasenyas, ug pinaagi sa unsang mga kasinatian nga kita gilig-on sa Diyos nga madaogon? (b) Unsang tambag ni Pablo ang nagapabilin nga angay sa atong adlaw?

¹⁵ Nan, ang kontrasenyas sa gihapon mao ang di-matarog nga paglahutay sa pagbuhat sa kabubut-on sa Diyos. (Roma 2:6, 7) Sa nangagi kita iyang gipaluyohan latas sa grabeng mga kasakitan, apil ang mga pagbilanggo ug mga kampo konsentrasyon, ug giluwas niya kita nga madaogon uban ang himaya alang sa iyang ngalan ug katuyoan.a Buhaton ni Jehova ang sama sulod sa panahon nga nahibilin pa sa pagtapos sa atong pagsulay. Ang pag-awhag ni Pablo nagpabiling haom alang sa atong adlaw: “Kay kamo nagakinahanglan ug lig-on nga pailob ug paglahutay, aron nga kamo makabuhat ug bug-os makatuman sa kabubut-on sa Diyos, ug niana makadawat ug makadala ug makapahimulos sa bug-os kon unsay gisaad.”—Hebreohanon 10:36, The Amplified Bible; Roma 8:37.

16. Nganong dili nato isipon ang atong pahinungod kang Jehova sa limitado lang nga paagi o nga may mga kondisyon?

¹⁶ Samtang si Jehova may buluhaton alang kanato nga pagabuhaton taliwala niining daotang kalibotan, nan, sa pagsunod sa panig-ingnan ni Jesus, buot natong mobuhat nianang buluhatona hangtod kini matapos. (Juan 17:4) Ang atong pagpahinungod kang Jehova dili pinasukad sa kasabotan nga siya alagaron nato sa kadiyut nga panahon ug dayon moabot ang Armageddon. Ang atong pagpahinungod maoy walay kataposan. Ang buluhaton sa Diyos alang kanato dili matapos sa gubat sa Armageddon. Ugaling, maoy tapos lamang nga atong nabuhat ang buluhaton nga pagabuhaton sa dili pa ang Armageddon nga atong makita ang talagsaong mga butang nga moabot tapos nianang dakong gubat. Unya, dugang sa makalipay nga pribilehiyo sa pagpadayon sa iyang buluhaton, kita pagagantihan sa dugay-nang-gilaomang mga panalangin nga iyang gisaad.​—Roma 8:32.

Ang Gugma sa Diyos Motabang Kanato sa Paglahutay

17, 18. (a) Sa panahon sa kalisod, unsay motabang nato sa paglahutay uban sa pag-uyon sa Diyos? (b) Unsay motabang nato sa pag-angkon sa kadaogan, ug unsay dili nato isulti bahin sa panahong nahibilin?

¹⁷ Tingali, sa dihang lisod ang panahon, kita makapangutana: ‘Sa unsang paagi kita makalahutay ug taastaas pa?’ Ang tubag? Pinaagi sa paghigugma sa Diyos uban sa bug-os natong kasingkasing, hunahuna, kalag, ug kusog. “Ang gugma hataas ug pailob ug maluluton. Ang gugma dili abughoan, kini dili magpasigarbo, dili magpaburot. Kini mopailob sa tanang butang, motuo sa tanang butang, molaom sa tanang butang, moantos sa tanang butang. Ang gugma dili makawang.” (1 Corinto 13:4, 7, 8) Gawas kon kita molahutay tungod sa gugma sa Diyos, ang atong paglahutay walay bili. Apan kon kita mag-agwanta sa mga kabug-at tungod sa atong debosyon kang Jehova, nan ang atong paglahutay magbaton sa epekto nga magapalalom sa atong gugma kaniya. Ang gugma alang sa Diyos, iyang Amahan, nakapaarang kang Jesus sa paglahutay. (Juan 14:30, 31; Hebreohanon 12:2) Kon ang tinuod natong motibo mao ang gugma sa Diyos, ang atong Amahan, unsa ba ang dili nato maantos?

¹⁸ Ang atong di-matarog nga gugma kang Jehova nga Diyos ang nakapaarang nato sa pagpabiling madaogon sa kalibotan sulod niining labing lisod nga panahon sa pagsulay. Ug si Jehova, pinaagi kang Jesu-Kristo, mopadayon sa paghatag kanato sa tabang nga atong gikinahanglan bisan pag unsa ka dugay kining daang sistema sa mga butang tugotan nga molungtad. (1 Pedro 5:10) Hinuon, kita dili managna kon pila pa ang panahon nga nahibilin, ug kita dili mopiho sa usa ka petsa. Itugyan nato kana ngadto sa Dakong Tigbantay sa Oras, si Jehova nga Diyos.​—Salmo 31:15.

19, 20. (a) Unsay atong pag-isip sa matag molabay nga adlaw nga kita nagmalahutayon? (b) Unsang binuang ang buot natong likayan, ug ngano?

¹⁹ Hinuon, ang kaliwatan nga gitagna nga makasaksi ug makasinati sa “konklusyon sa sistema sa mga butang” karon tigulang na sa edad. (Mateo 24:3, 32-35) Busa dili gayod nato hikalimtan nga ang matag molabay nga adlaw nga kita nagmalahutayon maoy usa ka adlaw nga menos alang kang Satanas ug sa iyang mga demonyo sa paghugaw sa uniberso tungod sa ilang paglungtad mismo ug usa ka adlaw nga mas duol sa panahon nga si Jehova dili na moantos sa paglungtad sa “mga sudlanan sa kapungot nga angay sa kalaglagan.” (Roma 9:22) Sa dili na madugay, sa dihang ang hataas nga pailob ni Jehova matapos na, iyang ipahungaw ang iyang kapungot diha sa dili-diyosnong mga lalaki ug mga babaye. Sa ingon, iyang ipadayag ang iyang balaang pagkadili-uyon sa ilang mga binuhatan, bisan pag iyang gitugotan sila sa pagpadayon sulod niining tanang yugto sa panahon.

²⁰ Labing binuang nga dili nato ipadayon ang atong mahigugmaong paningkamot sa pag-angkon sa mahimayaong ganti nga gitanyag kanato pinaagi kang Jesu-Kristo. Hinunoa, determinado kita sa pagpadayong matinumanon ingong mga Saksi dapig ni Jehova niining labing bililhong panahon sa dihang si Jehova hapit nang magbayaw sa iyang kaugalingon ingong Unibersohanong Soberano.

[Footnote]

Unsaon Nimo Pagtubag?

◻ Nganong dili kita makalikay nga sulayan ang atong paglahutay?

◻ Unsang panglimbong ang buot natong likayan?

◻ Sa paglikay nga kita maluya, unsay gikinahanglan?

◻ Unsa ang atong kontrasenyas?

◻ Sa panahon sa kalisod, unsay motabang nato sa paglahutay?

[Hulagway sa panid 11]

Ang katawhan sa Diyos, sama niining mga Saksi sa Port of Spain, Trinidad, kanunay naghulat kang Jehova