MGA TEKSTO GIPATIN-AW
Roma 10:13—“Nagtawag sa Ngalan sa Ginoo”
“Ang matag usa nga motawag sa ngalan ni Jehova maluwas.”—Roma 10:13, Bag-ong Kalibotang Hubad.
“Ang tanan nga nagtawag sa ngalan sa Ginoo maluwas.”—Roma 10:13, Ang Biblia.
Kahulogan sa Roma 10:13
Ang Diyos dili mapihigon, ug gusto niya nga ang tanang tawo maluwas ug makabaton ug kinabuhing walay kataposan, bisag unsa pay ilang nasyonalidad, rasa, o kahimtang sa kinabuhi. Pero aron mabatonan kana, kinahanglang motawag ta sa ngalan ni Jehova, ang personal nga ngalan sa Labing Gamhanang Diyos.a—Salmo 83:18.
Sa Bibliya, ang ekspresyong “motawag sa ngalan ni Jehova” nagpasabot ug labaw pa kay sa pagkaila lang sa ngalan sa Diyos ug paggamit niini diha sa pagsimba. (Salmo 116:12-14) Apil niini ang atong pagsalig sa Diyos ug pagpangayog tabang kaniya.—Salmo 20:7; 99:6.
Importante kang Jesu-Kristo ang ngalan sa Diyos. Ang unang mga pulong sa iyang modelong pag-ampo nag-ingon: “Amahan namo nga anaa sa mga langit, balaanon unta ang imong ngalan.” (Mateo 6:9) Gipakita sab ni Jesus nga kinahanglan natong ilhon, sundon, ug higugmaon si Jehova aron makabaton tag kinabuhing walay kataposan.—Juan 17:3, 6, 26.
Nganong makaingon ta nga si Jehova ang “Ginoo” nga gihisgotan sa Roma 10:13 sa Ang Biblia? Kay ang maong bersikulo gikutlo gikan sa Joel 2:32, diin sa orihinal nga Hebreohanong Kasulatan gigamit ang ngalan sa Diyos,b dili ang titulong “Ginoo.”
Konteksto sa Roma 10:13
Gipakita sa Roma kapitulo 10 nga ang usa ka tawo makabaton sa pag-uyon sa Diyos kon siya magpakitag pagtuo kang Jesu-Kristo. (Roma 10:9) Gisuportahan kini sa ubang teksto nga gikutlo gikan sa Daang Tugon. Ang tawo makapakitag pagtuo pinaagi sa “pagpahayag sa [iyang] pagtuo ngadto sa uban,” ug apil niini ang pagsangyaw sa maayong balita bahin sa kaluwasan ngadto sa mga dili magtutuo. Tungod niana, ang uban nahatagan ug kahigayonan nga makabaton ug pagtuo nga moresultag kinabuhing walay kataposan.—Roma 10:10, 14, 15, 17.
Basaha ang Roma kapitulo 10 apil ang mga footnote ug cross-reference.
a Ang ngalan sa Diyos makitag mga 7,000 ka beses sa karaang mga manuskrito sa Bibliya. Sa Hebreohanong pinulongan, ang ngalan sa Diyos gisulat sa upat ka letra, nga nailhang Tetragrammaton. Ang ngalan sa Diyos komon nga gihubad ingong “Jehovah” sa Iningles; pero mas gustong gamiton sa pipila ka eskolar ang hubad nga “Yahweh.”
b Posible nga ang Kristohanong mga magsusulat sa Bibliya migamit sa ngalan sa Diyos dihang ilang gikutlo ang mga bersikulo sa “Daang Tugon” nga naay ngalan sa Diyos. Ang The Anchor Bible Dictionary nag-ingon: “Naay mga ebidensiya nga ang Tetragrammaton, ang Balaang Ngalan nga Yahweh, makita diha sa pipila o sa tanang teksto sa B[ag-ong] T[ugon] nga gikutlo gikan sa D[aang] T[ugon] dihang unang gisulat ang BT.” (Volume 6, panid 392) Para sa dugang impormasyon, tan-awa ang topiko nga “Ang Balaang Ngalan sa Kristohanon Gregong Kasulatan” sa Apendise A5 sa rebisadong edisyon sa Bag-ong Kalibotang Hubad sa Balaang Kasulatan.