Himoa ang Publikong Kapahayagan Alang sa Kaluwasan
“Ang tanang nanagtawag sa ngalan ni Jehova mamaluwas.”—ROMA 10:13.
1. Latas sa kasaysayan, unsang mga pasidaan ang gipalanog?
ANG kasaysayan nagbatbat ug daghang ‘mga adlaw ni Jehova.’ Ang Lunop sa adlaw ni Noe, ang paglaglag sa Sodoma ug Gomora, ug ang pagkalumpag sa Jerusalem sa 607 W.K.P. ug sa 70 K.P. maoy dagko ug makalilisang nga mga adlaw ni Jehova. Kadto maoy mga adlaw sa pagpahamtang ug hustisya niadtong kinsa mirebelde kang Jehova. (Malaquias 4:5; Lucas 21:22) Niadtong mga adlawa, daghan ang nangamatay tungod sa ilang tumang-pagkadaotan. Apan ang pipila nakalabang-buhi. Gipalanog ni Jehova ang mga pasidaan, nga nagpahibalo sa mga tuman-kadaotan sa nagsingabot nga katalagman ug naghatag sa matarong-ug-kasingkasing nga mga tawo ug kahigayonan nga makakaplag ug kaluwasan.
2, 3. (a) Unsang matagnaong pasidaan ang gikutlo sa Pentekostes? (b) Sukad sa Pentekostes 33 K.P., unsay gikinahanglan sa pagtawag sa ngalan ni Jehova?
2 Ang pagkalumpag sa Jerusalem sa 70 K.P. maoy talagsaong pananglitan niini. Nagtagna sa maong hitabo mga 900 ka tuig una pa niana, si propetang Joel misulat: “Ako magpakita sa mga tilimad-on diha sa kalangitan ug sa yuta, dugo ug kalayo ug mga haligi sa aso. Ang adlaw mismo mahimong kangitngitan, ug ang bulan mahimong dugo, sa dili pa moabot ang dako ug makalilisang nga adlaw ni Jehova.” Sa unsang paagi ang usa makalabang-buhi sa maong makahahadlok nga panahon? Si Joel misulat ubos sa pagdasig: “Mahitabo gayod nga si bisan kinsa nga magatawag sa ngalan ni Jehova pagaluwason; kay didto sa Bukid sa Sion ug sa Jerusalem atua unya kadtong makalingkawas, sumala sa giingon ni Jehova, ug taliwala sa mga nakalabang-buhi, kadtong pagatawgon ni Jehova.”—Joel 2:30-32.
3 Sa Pentekostes 33 K.P., si apostol Pedro namulong sa usa ka panon sa mga Hudiyo ug mga proselita sa Jerusalem ug mikutlo sa tagna ni Joel, nga nagpakita nga ang iyang mga mamiminaw makadahom ug katumanan sa ilang adlaw: “Ako magahatag ug mga tilimad-on diha sa langit sa itaas ug mga ilhanan diha sa yuta sa ubos, dugo ug kalayo ug gabon sa aso; ang adlaw mahimo nga kangitngit ug ang bulan nga dugo sa dili pa moabot ang dako ug mabantogong adlaw ni Jehova. Ug ang tanang nagatawag sa ngalan ni Jehova maluwas.” (Buhat 2:16-21) Ang mga panon nga naminaw kang Pedro ngatanan nailalom sa Moisesnong Kasugoan, ug busa nakaila sila sa ngalan ni Jehova. Si Pedro misaysay nga, sukad karon, ang pagtawag sa ngalan ni Jehova maglakip ug mas labaw pa. Sa talagsaong paagi, naglakip kini sa pagpabawtismo sa ngalan ni Jesus, ang usa nga gipatay ug unya gibanhaw ngadto sa imortal nga langitnong kinabuhi.—Buhat 2:37, 38.
4. Unsang mensahe ang kaylap nga gipahayag sa mga Kristohanon?
4 Gikan sa Pentekostes padayon, ang mga Kristohanon nagsangyaw sa pulong mahitungod sa gibanhawng Jesus. (1 Corinto 1:23) Ilang gipahibalo nga ang mga tawo mahimong sagopon ingong espirituwal nga mga anak ni Jehova nga Diyos ug mahimong bahin sa usa ka bag-ong “Israel sa Diyos,” usa ka espirituwal nga nasod nga ‘magpahayag sa kahamili ni Jehova.’ (Galacia 6:16; 1 Pedro 2:9) Kadtong magpabiling matinumanon hangtod sa kamatayon makapanunod sa imortal nga langitnong kinabuhi ingong kaubang mga manununod ni Jesus sa iyang langitnong Gingharian. (Mateo 24:13; Roma 8:15, 16; 1 Corinto 15:50-54) Dugang pa, kining maong mga Kristohanon maoy magmantala sa pag-abot sa dako ug makalilisang nga adlaw ni Jehova. Kinahanglang pasidan-an nila ang Hudiyonhong kalibotan nga mahiagom kana sa usa ka kasakitan nga molabaw sa bisan unsa nga mihampak sa Jerusalem ug sa nag-angkong katawhan sa Diyos hangtod niadtong panahona. Bisan pa niana, aduna unyay mga makalabang-buhi. Kinsa? Kadtong nanagtawag sa ngalan ni Jehova.
“Sa Kataposang mga Adlaw”
5. Unsang mga katumanan sa tagna ang nagakahitabo karon?
5 Sa daghang paagi, ang mga kahimtang niadto naglandong sa atong makita karong adlawa. Sukad sa 1914, ang katawhan nagkinabuhi na sa usa ka linaing yugto sa panahon nga gihisgotan sa Bibliya ingong “ang panahon sa kataposan,” “ang katiklopan sa sistema sa mga butang,” ug ang “kataposang mga adlaw.” (Daniel 12:1, 4; Mateo 24:3-8; 2 Timoteo 3:1-5, 13) Sa atong siglo, ang mabangis nga mga gubat, walay-pugong nga kapintasan, ug ang pagkadaot sa katilingban ug sa kalikopan nagtagana ug talagsaong katumanan sa tagna sa Bibliya. Kining tanan maoy bahin sa ilhanan nga gitagna ni Jesus, nga nagpakita nga ang katawhan hapit nang mahiagom sa kataposan, mahukmanon nga makalilisang nga adlaw ni Jehova. Matapos kini sa gubat sa Armagedon, ang kinatayuktokan sa usa ka “dakong kasakitan ingon nianang wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab.”—Mateo 24:21; Pinadayag 16:16.
6. (a) Sa unsang paagi nagalihok si Jehova aron sa pagluwas sa mga maaghop? (b) Asa nato makaplagi ang tambag ni Pablo kon unsaon paglabang-buhi?
6 Samtang ang adlaw sa kalaglagan labi pang nagkaduol, si Jehova molihok aron sa pagluwas sa mga maaghop. Niining “panahon sa kataposan,” gitigom niya ang mga nahibilin sa espirituwal nga Israel sa Diyos ug nagliso sa pagtagad sa iyang mga alagad sa yuta, gikan sa 1930 padayon, sa pagpanigom sa “usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila.” Ingong usa ka grupo, kini sila “nanagpakagawas gikan sa dakong kasakitan” nga buhi. (Pinadayag 7:9, 14) Apan sa unsang paagi ang matag indibiduwal magtino sa iyang paglabang-buhi? Si apostol Pablo mitubag nianang pangutanaha. Sa Roma kapitulo 10, naghatag siya ug maayong tambag aron makalabang-buhi—tambag nga napadapat sa iyang adlaw ug kana mapadapat usab sa atoa.
Usa ka Pag-ampo Alang sa Kaluwasan
7. (a) Unsang paglaom ang gipaila sa Roma 10:1, 2? (b) Nganong mas kaylap nga gipawali ni Jehova ang “maayong balita” karon?
7 Sa dihang si Pablo misulat sa basahon sa Roma, gisalikway na ni Jehova ang Israel ingong nasod. Sa gihapon, ang apostol nagpalig-on: “Ang maayong kabubut-on sa akong kasingkasing ug ang akong pangamuyo sa Diyos alang kanila maoy, sa pagkatinuod, alang sa ilang kaluwasan.” Ang iyang paglaom mao nga ang indibiduwal nga mga Hudiyo mahimong makabaton ug tukmang kahibalo sa kabubut-on sa Diyos, nga motultol sa ilang pagkanaluwas. (Roma 10:1, 2) Dugang pa, magtinguha si Jehova sa kaluwasan niadtong anaa sa tibuok kalibotan sa katawhan nga nagapasundayag ug pagtuo, sumala sa gipakita sa Juan 3:16: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kondili makabaton ug kinabuhing walay-kataposan.” Ang halad lukat ni Jesus nag-abli sa dalan alang nianang dakong kaluwasan. Maingon sa adlaw ni Noe ug sa ubang mga adlaw sa paghukom nga misunod, si Jehova adunay “maayong balita” nga gimantala, nga nagpunting sa dalan sa kaluwasan.—Marcos 13:10, 19, 20.
8. Sa pagsundog sa sumbanan ni Pablo, ngadto kang kinsa gipaabot sa mga Kristohanon ang maayong kabubut-on karong adlawa, ug sa unsang paagi?
8 Nagpakita sa iyang kaugalingong maayong kabubut-on ngadto sa Hudiyo ug Hentil, si Pablo misangyaw sa matag kahigayonan. Siya “nangombinsir sa mga Hudiyo ug mga Grego.” Giingnan niya ang mga ansiyano sa Efeso: “Ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay. Apan ako bug-os nga nagpanaksi ngadto sa mga Hudiyo ug ngadto sa mga Grego mahitungod sa paghinulsol ngadto sa Diyos ug sa pagtuo diha sa atong Ginoong Jesus.” (Buhat 18:4; 20:20, 21) Sa susama, ang mga Saksi ni Jehova karong adlawa naggugol sa ilang panahon sa pagsangyaw, dili lamang ngadto sa nag-angkong mga Kristohanon kondili sa tanang katawhan, bisan ngadto sa “kinalay-ang dapit sa yuta.”—Buhat 1:8; 18:5.
Gisugid “ang ‘Pulong’ sa Pagtuo”
9. (a) Unsang matanga sa pagtuo ang gidasig sa Roma 10:8, 9? (b) Kanus-a ug sa unsang paagi kita mohimog pagsugid sa atong pagtuo?
9 Ang malahutayong pagtuo gikinahanglan aron maluwas. Nagkutlo sa Deuteronomio 30:14, si Pablo mipahayag: “‘Ang pulong haduol kanimo, sa imong kaugalingong baba ug sa imong kaugalingong kasingkasing’; nga mao, ang ‘pulong’ sa pagtuo, nga atong ginawali.” (Roma 10:8) Samtang atong ginasangyaw kanang “‘pulong’ sa pagtuo,” mag-anam ug kadulot ang pagkatisok niana sa atong mga kasingkasing. Mao kana ang nahitabo kang Pablo, ug ang iyang dugang mga pulong makapalig-on sa atong determinasyon nga mahisama kaniya sa pagpakig-ambit sa maong pagtuo ngadto sa uban: “Kon imong ipahayag diha sa dayag kanang ‘pulong sa imong kaugalingong baba,’ nga si Jesus maoy Ginoo, ug magpasundayag ug pagtuo sa imong kasingkasing nga ang Diyos nagbangon kaniya gikan sa mga patay, ikaw mamaluwas.” (Roma 10:9) Dili lang kay kining maong pagsugid gihimo atubangan sa uban sa panahon sa bawtismo apan kinahanglang kana maoy padayong pagpahayag, usa ka masibotong publikong pagpamatuod mahitungod sa tanang dagkong mga bahin sa kamatuoran. Ang maong kamatuoran nasentro sa hamiling ngalan sa Soberanong Ginoong Jehova; sa atong Mesiyanikong Hari ug Manlulukat, ang Ginoong Jesu-Kristo; ug sa maanindot nga mga saad sa Gingharian.
10. Kaharmonya sa Roma 10:10, 11, sa unsang paagi nato dumalahon kining “‘pulong’ sa pagtuo”?
10 Walay kaluwasan alang ni bisan kinsa nga dili modawat ug mopadapat niining “‘pulong’ sa pagtuo,” sanglit ang apostol nagpadayon sa pagpamulong: “Pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag diha sa dayag alang sa kaluwasan. Kay ang Kasulatan nagaingon: ‘Walay magabutang sa iyang pagtuo kaniya ang mahigawad.’” (Roma 10:10, 11) Kinahanglang makabaton kita ug tukmang kahibalo sa iyang “‘pulong’ sa pagtuo” ug magpadayon sa pag-amoma niana diha sa atong mga kasingkasing aron kita mapalihok sa pagsugilon niana ngadto sa uban. Si Jesus mismo nagpahinumdom kanato: “Ang bisan kinsa nga magkaulaw kanako ug sa akong mga pulong niining mananapaw ug makasasala nga kaliwatan, ikaulaw usab siya sa Anak sa tawo inig-abot niya diha sa himaya sa iyang Amahan uban sa balaang mga anghel.”—Marcos 8:38.
11. Unsa ka kaylap nga imantala ang maayong balita, ug ngano?
11 Sumala sa gitagna ni propetang Daniel, niining panahon sa kataposan, “sila nga manggialamon” makita nga nagadan-ag “ingon sa kahayag sa hawan sa kalangitan,” samtang ang pagsangyaw sa Gingharian milukop sa kinatumyang mga bahin sa yuta. Sila ‘nanagkabig sa daghan ngadto sa pagkamatarong,’ ug ang tinuod nga kahibalo sa pagkatinuod nahimong dagaya, kay si Jehova nagapadan-ag ug labi pang sanag nga kahayag sa mga tagna mahitungod niining panahon sa kataposan. (Daniel 12:3, 4) Aniay mensahe sa kaluwasan nga hinungdanon sa kaluwasan sa tanang nahigugma sa kamatuoran ug pagkamatarong.
12. Sa unsang paagi ang Roma 10:12 nalangkit sa sugo sa manulonda nga gibatbat sa Pinadayag 14:6?
12 Si apostol Pablo nagpadayon: “Walay pagpalahi tali sa Hudiyo ug sa Grego, kay adunay sama rang Ginoo ibabaw sa tanan, kinsa adunahan ngadto kanilang tanan nga nanagtawag kaniya.” (Roma 10:12) Ang “maayong balita” kinahanglang igasangyaw karong adlawa nga mas kaylap pa sa tibuok yutang gilapdon—ngadto sa tanang katawhan, ngadto sa kinatumyang mga bahin sa yuta. Ang manulonda sa Pinadayag 14:6 padayong nagalupad sa kinatung-an sa langit, nga nagpiyal kanato sa “walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan.” Sa unsang paagi makabenepisyo kini niadtong tanan nga mosanong?
Pagtawag sa Ngalan ni Jehova
13. (a) Unsa ang atong tinuig nga teksto sa 1998? (b) Nganong kining tinuig nga teksto haom kaayo karong adlawa?
13 Nagkutlo sa Joel 2:32, si Pablo mipahayag: “Ang tanang nanagtawag sa ngalan ni Jehova mamaluwas.” (Roma 10:13) Pagkatukma gayod nga kanang mga pulonga napili ingong tinuig nga teksto sa mga Saksi ni Jehova alang sa 1998! Wala pa sukad masukad nahimong labing hinungdanon nga mopadayon sa unahan uban ang pagsalig kang Jehova, nga magpahibalo sa iyang ngalan ug sa hamiling mga katuyoan nga gihawasan niana! Sama sa unang siglo, maingon man usab sa kataposang mga adlaw sa presenteng dunot nga sistema sa mga butang, ang nagalanog nga singgit gipatugbaw: “Pagpakaluwas gikan niining baliko nga kaliwatan.” (Buhat 2:40) Kana maoy samag-trompetang pagdapit sa tanang mahinadlokon sa Diyos nga katawhan sa tibuok kalibotan nga motawag kang Jehova sa paghatag ug kaluwasan kanila ug usab niadtong maminaw sa ilang publikong pagpahayag sa maayong balita.—1 Timoteo 4:16.
14. Sa unsang Bato nga kita motawag aron maluwas?
14 Unsay mahitabo sa dihang ang dakong adlaw ni Jehova mobuto niining yutaa? Kadaghanan dili modangop kang Jehova aron maluwas. Ang katawhan sa katibuk-an ‘magsigeg ingon ngadto sa kabukiran ug ngadto sa dagkong-bato: “Tumpagi kami ug tagoi kami gikan sa nawong sa Usa nga naglingkod sa trono ug gikan sa kapungot sa Kordero.”’ (Pinadayag 6:15, 16) Ang ilang paglaom anaa sa samag bukid nga mga organisasyon ug mga institusyon niining sistemaha sa mga butang. Apan, pagkalabi pang maayo kon sila mosalig sa kinadak-ang Bato sa tanan, si Jehova nga Diyos! (Deuteronomio 32:3, 4) Bahin kaniya, si Haring David miingon: “Si Jehova mao ang akong bato ug ang akong kuta ug ang Tigtagana ug kaikyasan alang kanako.” Si Jehova mao ang “atong Bato sa kaluwasan.” (Salmo 18:2; 95:1) Ang iyang ngalan maoy “usa ka malig-ong torre,” ang bugtong “torre” nga may igong kalig-on sa pagpanalipod kanato panahon sa umaabot nga kalisod. (Proverbio 18:10) Busa, hinungdanon nga daghan kutob sa maarangan sa duolan sa unom ka bilyong tawo nga buhi karong adlawa ang matudloan sa pagtawag sa ngalan ni Jehova sa kamatinumanon ug kasinsero.
15. Unsay gipakita sa Roma 10:14 mahitungod sa pagtuo?
15 Sa kahaom, si apostol Pablo nagpadayon sa pagpangutana: “Apan, unsaon nila pagtawag kaniya kang kinsa wala sila magbutang ug pagtuo?” (Roma 10:14) Adunay daghan nga mahimo pang matabangan nga himoon “ang ‘pulong’ sa pagtuo” nga ilaha, aron makatawag kang Jehova alang sa kaluwasan. Ang pagtuo hinungdanon kaayo. Si Pablo miingon sa laing sulat: “Kon walay pagtuo imposible sa pagpahimuot [sa Diyos] pag-ayo, kay siya nga nagaduol sa Diyos kinahanglang motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Apan, sa unsang paagi ang minilyon pa makabaton ug pagtuo sa Diyos? Sa sulat ngadto sa mga taga-Roma, si Pablo nangutana: “Unsaon, sa baylo, pagbutang nila ug pagtuo kaniyang kinsa wala nila madunggi?” (Roma 10:14) Nagtagana ba si Jehova ug mga paagi aron sila makadungog? Seguradong nagtagana gayod siya! Pamatia ang nagpadayong mga pulong ni Pablo: “Unsaon, sa baylo, nila pagkadungog kon walay magwali?”
16. Sa langitnong kahikayan, nganong hinungdanon ang mga magsasangyaw?
16 Gikan sa pangatarongan ni Pablo tin-aw kaayo nga gikinahanglan ang mga magsasangyaw. Gipakita ni Jesus nga ingon gayod niini, bisan “hangtod sa katiklopan sa sistema sa mga butang.” (Mateo 24:14; 28:18-20) Ang pagsangyaw maoy hinungdanong bahin sa langitnong kahikayan sa pagtabang sa mga tawo nga makatawag sa ngalan ni Jehova aron pagaluwason. Bisan diha sa Kakristiyanohan ang mayoriya walay gibuhat sa pagpasidungog sa hamiling ngalan sa Diyos. Hilabihan nga gipakasayop ug sabot si Jehova sa daghan nga mao ra ug ang duha ka bahin sa dili-ikapatin-aw nga doktrina sa Trinidad. Dugang pa, daghan ang nasakop sa matang nga gihisgotan sa Salmo 14:1 ug 53:1: “Ang buang miingon sa iyang kasingkasing: ‘Walay Jehova.’” Kinahanglang masayod sila nga si Jehova mao ang buhi nga Diyos, ug kinahanglang masabtan nila ang tanang gihawasan sa iyang ngalan aron sila pagaluwason sa nagsingabot nga dakong kasakitan.
Ang ‘Matahom nga mga Tiil’ sa mga Magwawali
17. (a) Nganong haom alang kang Pablo nga mokutlo sa usa ka tagna sa kapasig-ulian? (b) Unsay nalangkit sa pagkabaton ug ‘matahom nga mga tiil’?
17 Si apostol Pablo adunay usa pa ka hinungdanong pangutana: “Unsaon, sa baylo, nila pagwali gawas kon sila gipadala? Maingon gayod sa nahisulat: ‘Pagkatahom sa mga tiil niadtong mga nagapahayag sa maayong balita sa maayong mga butang!’” (Roma 10:15) Dinhi si Pablo mikutlo sa Isaias 52:7, nga maoy bahin sa usa ka tagna sa kapasig-ulian nga gipadapat sukad sa 1919. Karon, sa makausa pa, si Jehova nagpadala “sa usa nga nagdala sa maayong balita, sa usa nga nagmantala sa pakigdait, sa usa nga nagdala ug maayong balita sa mas maayong butang, sa usa nga nagmantala sa kaluwasan.” Sa kamatinumanon, ang dinihogan sa Diyos nga “mga bantay” ug ang ilang mga kauban nagpadayon sa pagsinggit nga malipayon. (Isaias 52:7, 8) Ang mga tiil niadtong nagmantala sa kaluwasan karon tingalig kapoyon, naabogan pa gani, samtang sila maglakaw gikan sa balay ngadto sa balay, apan pagkasanag gayod sa ilang mga nawong sa kalipay! Sila nahibalo nga sila gisugo ni Jehova sa pagmantala sa maayong balita sa pakigdait ug sa paghupay sa nanagbalata, nga nagtabang kanila nga motawag sa ngalan ni Jehova ug maluwas sa umaabot.
18. Unsay giingon sa Roma 10:16-18 mahitungod sa kataposang resulta sa pagpalanog sa maayong balita?
18 Kon kaha ang mga tawo “nagabutag pagtuo sa butang nadunggan” o mopili sila sa pagsupak niana, matuod gayod ang mga pulong ni Pablo: “Sila wala mapakyas pagdungog, dili ba? Tan-awa, sa pagkatinuod, ‘ang ilang tingog nahingadto sa tibuok nga yuta, ug ang ilang mga pamulong ngadto sa kinatumyan sa gipuy-ang yuta.’” (Roma 10:16-18) Maingon nga “ang mga langit nagapahayag sa himaya sa Diyos,” ingon sa gipasundayag sa iyang mga buhat sa paglalang, mao man usab ang iyang mga Saksi dinhi sa yuta kinahanglang magmantala “sa tuig sa maayong kabubut-on sa bahin ni Jehova ug sa adlaw sa pagpanimalos sa bahin sa atong Diyos . . . aron sa paghupay sa tanang nanagbalata.”—Salmo 19:1-4; Isaias 61:2.
19. Unsay moresulta niadtong ‘motawag sa ngalan ni Jehova’ karon?
19 Ang dako ug makalilisang nga adlaw ni Jehova nagkaduol na gayod. “Alaot ang adlaw; kay ang adlaw ni Jehova haduol na, ug ingon sa usa ka paglaglag gikan sa Makagagahom nga Usa moabot kini!” (Joel 1:15; 2:31) Maoy atong ginaampo nga daghan pa ang dinaliang mosanong sa maayong balita, nga magpanon ngadto sa organisasyon ni Jehova. (Isaias 60:8; Habacuc 2:3) Hinumdomi nga ang ubang mga adlaw ni Jehova nagpahinabog kalaglagan sa mga tuman-kadaotan—sa adlaw ni Noe, sa adlaw ni Lot, ug sa mga adlaw sa apostatang Israel ug Juda. Anaa na kita karon sa ngilit sa kinadak-ang kasakitan sa tanan, sa dihang ang alimpulos ni Jehova magpapha sa tumang-kadaotan gikan sa nawong sa yuta, nga mag-abli sa dalan ngadto sa usa ka paraiso sa walay-kataposang pakigdait. Usa ka ba unya niadtong ‘magatawag sa ngalan ni Jehova’ sa pagkamatinumanon? Kon mao, pagmaya! Gisaaran ka sa Diyos mismo nga ikaw luwason.—Roma 10:13.
Unsaon Nimo Pagtubag?
◻ Unsang bag-ong mga butang ang gimantala human sa Pentekostes 33 K.P.?
◻ Sa unsang paagi patalinghogan sa mga Kristohanon “ang ‘pulong’ sa pagtuo”?
◻ Unsay gipasabot sa ‘pagtawag sa ngalan ni Jehova’?
◻ Sa unsang diwa nga ang mga mensahero sa Gingharian adunay ‘matahom nga mga tiil’?
[Kapsiyon sa panid 18]
Ang katawhan sa Diyos nagpahayag sa iyang kahamili sa Puerto Rico, Senegal, Peru, Papua New Guinea—oo, sa tibuok yuta