Ipadayon ang Pagwali sa Gingharian
“Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang kanasoran; ug unya moabot ang kataposan.”—MATEO 24:14.
1, 2. (a) Unsa ang labing hinungdanong buluhaton niining sigloha, ug unsang gilapdon kini ginabuhat? (b) Unsa ang ebidensiya nga si Jehova nagapanalangin sa maong buluhaton?
ANG pagwali sa maayong balita sa Gingharian sa Diyos mao ang labing hinungdanong buluhaton niining sigloha. Kini ang buot sa Diyos nga Gamhanan sa Tanan nga buhaton karon, ug kini ginahimo sa pagtuman sa iyang matagnaong Pulong. Ang imong sanong niini moapektar sa imong walay-kataposang dulnganan.—1 Corinto 9:16, 23.
2 Makapalipay ang pagtan-aw nga padayong nagauswag ang gidaghanon sa nakig-ambit niining buluhatong pagwali, nga karon may kapin sa tulo ka milyon nga nakig-ambit. Mas daghan pa kay sukad masukad ang nagasulod sa bug-os-panahong ministeryo. Ug daghan pang interesadong tawo nagadawat ug pagtuon sa Bibliya ug naningkamot nga makakat-on sa pagbuhat sa kabubut-on sa Diyos.
3. Unsay mahimong isulti sa pipila mahitungod sa panginahanglan nga ipadayon ang pagwali sa maayong balita?
3 Ugaling, usahay ang pipila tingali “mohunong sa pagbuhat kon unsay maayo” ug “kapoyon” sa buluhatong pagwali. (Galacia 6:9; Hebreohanon 12:3) Tingali sila moingon nga ang ilang teritoryo nalukop na kaayo sa pagwali sa maayong balita ug ang mga tawo nakabaton na sa ilang baroganan ug karon mapikal kon moduaw kita sa ilang mga balay. Kadtong nagahimo sa buluhatong pagwali dinha nakabatog diyutay ra kaayong resulta o wala na gani. Busa, gibati nila, tingali natuman na ang buluhaton, ug dili na kinahanglang ipadayon. Unsay nakadaot niining panghunahunaa?
Nganong Mopadayon?
4. Unsay magatukmod kanato sa pagpadayon sa pagwali bisan sa teritoryo diin ang pagsanong dili maayo?
4 Nahauna, ang atong matinumanong paglahutay sa buluhatong pagwali dili angay magdepende kon kaha ang mga tawo mamati kanato o dili. Si Jeremias nagwali sa 40 ka tuig sa Jerusalem bisan pag diyutay ra kaayo ang namati ug daghan ang mapintasong misupak kaniya. Nganong siya milahutay? Kay siya nagbuhat sa usa ka buluhatong gisugo ni Jehova, ug kay ang iyang matagnaong kahibalo kon unsay mahitabo sa Jerusalem nagpugos niya sa pagpadayon sa pagsulti. (Jeremias 1:17-19) Siya miingon: “Sa akong kasingkasing kini nahisama sa nagasiga nga kalayo nga natuob sa akong mga bukog; ug ako gikapoyan sa pagpugong niini, ug ako dili na makaantos niini.” (Jeremias 20:7-10) Ang atong kahimtang susama. Si Jehova, pinaagi ni Jesu-Kristo, mao ang nagsugo nga ang “maayong balita” igawali sa tibuok gipuy-ang yuta. (Mateo 24:14) Kon dili mamati ang mga tawo, ang pagpadayon sa pagbuhat kon unsay matarong mohatag kanatog kahigayonan sa pagpadayag sa giladmon sa atong gugma ug debosyon kang Jehova. (1 Juan 5:3) Gawas pa, kon atong palandongon kon unsay anaa sa duol nga umaabot alang sa katawhan, sa unsang paagi kita makapugong sa atong kaugalingon sa pagpaningkamot nga pasidan-an ang atong mga silingan?—2 Timoteo 4:2.
5. (a) Tungod sa unsang laing katarongan kita angay molahutay sa buluhatong pagwali? (b) Sa unsang paagi ang buluhatong pagwali usa ka pasikaranan sa paghukom?
5 Dugang pa, ang pagwali ni Jeremias usa gayod ka buluhaton sa paghukom. Sa 607 W.K.P., walay mausa niadtong namatay o naulipon sa dihang napukan ang Jerusalem ang makaingong sila wala masayod nganong kadto nahitabo kanila. Sa 40 ka tuig nga miagi, si Jeremias tinong nagpasidaan kanila sa maong sangpotanan kon sila magpadayong masuklanon kang Jehova. (Itandi ang Ezekiel 2:5.) Sa susama karong adlawa, ang pagwali sa maayong balita ingong “usa ka pamatuod sa tanang kanasoran” maoy pasikaranan sa paghukom. Gitin-aw kini ni apostol Pablo sa mipahayag siyang si Kristo Jesus manimalos “niadtong wala makaila sa Diyos ug niadtong wala magmasinugtanon sa maayong balita mahitungod sa atong Ginoong Jesus.” (2 Tesalonica 1:8, 9) Ang mga tawo pagahukman pinasukad sa ilang pagsanong sa maayong balita. Busa, ang buluhatong pagwali kinahanglang ipadayong kusog ug tin-aw hangtod sa kataposan. (Pinadayag 14:6, 7) Walay bisan unsa ang angay makapugong sa pagpaabot sa maong bililhong mensahe ngadto sa mga tawo sa labing subsob nga posible. Kini nagapatong ug dakong responsabilidad sa tanang dedikadong mga alagad ni Jehova.
6. Bisan pag ang atong mensahe tingali kaylap nahibaloan, nganong kinahanglan kita mopadayon sa pagwali?
6 Matuod, kita tingali kaylap nang nakawali sa atong lugar. Apan daghan kaayong butang ang nagakahitabo sa kalibotan nga bisan pag daghang tawo ang nakadungog sa atong mensahe, sila mahikalimot dayon niana kon mohunong kita sa pagwali. Hunahunaa ang mga rebolusyon, mga aksiyon sa terorista, mga welga, mga eskandalo, ug ubang hitabong kaylap gimantala. Unya anaa ang daghang matang sa popular nga kalingawan ug ubang kabaldahan. Kinahanglang mopadayon kita sa pagwali aron ang mensahe mabutang kanunay sa atubangan sa mga tawo bisan pa niining tanang ubang butang nga moangkon sa ilang pagtagad.
7. Sa unsang paagi ang reaksiyon sa daghan karong adlawa susama sa iya sa mga Israelinhon sa pagpanagna ni Isaias, apan nganong kini dili angay magpugong kanato sa pagwali?
7 Kon daghan ang mosulay sa dili pagpanumbaling kanato, angay natong hinumdoman kon unsang matanga sa mga tawo ang kinahanglang walihan ni propeta Isaias. Giingnan siya ni Jehova: “Kay kini usa ka masukihon nga katawhan, bakakon nga mga anak, mga anak nga dili buot mamati sa kasugoan ni Jehova; nga nagaingon sa mga nagatan-aw, ‘Ayaw kamo pagtan-aw,’ ug niadtong may mga panan-awon, ‘Ayaw kamo pagbatog mga panan-awon alang kanamo sa matarong nga mga butang. Pagsulti kamog malumo nga mga butang; panan-aw ug mga panglimbong. Pahawa kamo sa dalan; tipas kamo sa alagianan. Himoa nga ang Balaang Usa sa Israel mahanaw tungod kanamo.’” Bisan pa niana, matinumanong giingnan ni Isaias ang katawhan: “Si Jehova maoy Diyos sa hustisya. Malipayon ang tanang nagahulat kaniya.” (Isaias 30:9-11, 18) Angay natong buhaton ang sama. Basta kita mopadayon, ang atong mensahe makasuhot sa usa ka sukod. Ang pipila mamati ug ang uban dili. Apan ang tanan makahigayon sa pagpamati.
‘Sa Unsang Paagi Sila Mamati?’
8. Bisan pag ang mga tawo tingali nakabatog baroganan batok sa kamatuoran, unsang mga hinungdan ang tingali makausab sa ilang mga hunahuna?
8 Tingali gibati natong ang mga tawo sa usa ka teritoryo nakabatog tinong baroganan ug determinadong mosalikway sa atong mensahe o mosupak pa niini. Apan hinumdomi, ang kahimtang sa mga kinabuhi sa mga tawo kanunayng mabalhinon. Tingali makaatubang silag bag-ong mga suliran o mga kahimtang ugma, sunod semana, o sunod bulan nga maghimo nilang madawaton sa kamatuoran. Tingali sila makadungog sa makapabalakang mga hitabo sa kalibotan o tingali makaagom sa kalisod sa pangabuhi, sakit, o kamatayon sa pamilya. Kanang mga butanga basin makapamata kanila ug tungod niana buot nilang masayran ang hinungdan sa ilang kasakitan. Kon mopadayon kita sa pagwali, sila mahibalo kon asa modangop.
9. Sa unsang paagi ang atong buluhatong pagwali ikatandi nianang iya sa mga tigluwas sa usa ka dapit sa katalagman?
9 Ang atong kahimtang ikatandi sa mga tigluwas sa usa ka lugar sa katalagman, sama sa pagkatapos sa usa ka linog. Ang pipila tingali nagtrabaho sa usa ka lugar diin hikaplagan ang diyutay rang naluwas, apan ang kamatuorang ang ilang kaubang mga magbubuhat mas daghag nakaplagang naluwas sa laing dapit dili magpahinabo nga sila mohinayhinay ug moundang. Hinunoa, ang tanang tigluwas molahutay nga dili kapoyon bisan pag sila mobating tingali wala nay naluwas sa giasayn nilang seksiyon. Ug unya, usahay sila makakaplag ug lain pang naluwas. Pahunongon lamang ang pagpangita sa dihang ang panahong milabay mopadayag nga wala nay paglaom. Aw, ang atong pagpangita wala pa pahunonga, ug kita nakakaplag pag linibong buot maluwas gikan niining daang kalibotan ug molabang-buhi sa “dakong kasakitan.” (Pinadayag 7:9, 14) Bisan pa sa mga lugar nga bug-os nang pagkakobre ug diin ang kadaghanang tawo walay pagsanong, duna pay diyutayng mga resulta. Ug adunay dugang mga katarongan sa pagpadayon sa pagwali.
10. Sa unsang paagi lamang ang mga tawo mahibalo kon asa modangop kon buot nilang pangitaon ang kamatuoran, sumala sa Roma 10:13, 14?
10 Ang mga tawo kinahanglang pahinumdoman kanunay nga “ang tanan nga nagatawag sa ngalan ni Jehova mamaluwas.” Ugaling, sumala sa gipadayon ni Pablo sa iyang sulat ngadto sa mga taga-Roma, “unsaon nila pagtawag kaniya nga wala nila tuohi? Sa baylo, unsaon nila sa pagtuo kaniya nga wala nila hidunggi? Sa baylo, unsaon nila pagkadungog kon walay magawali?” (Roma 10:13, 14) Kining mga pulonga angay magsilsil diha sa matag usa kanato sa panginahanglan nga ipadayon ang pagwali sa maayong balita sa Gingharian sa Diyos.
11. Unsa ang atong responsabilidad ngadto sa mga batan-on nga nagakahamtong?
11 Samtang nagpadayon ang panahon sa kataposan, nangatawo ang mga bata ug nanagko ngadto sa pagkahamtong o sa edad nga responsable. Kadaghanan kining mga batan-ona walay pagtagad sa kamatuoran. Ang ilang mga ginikanan tingali nagsalikway sa mensahe ug nagsultig batok niini. Apan karon kining mga batan-ona edaran na sa paghunahunang maugdang sa mga kahimtang sa kalibotan, sa kaugmaon, ug sa ilang katuyoan sa kinabuhi. Kinahanglan usab nga sila motawag sa ngalan ni Jehova aron sila maluwas. Apan “unsaon . . . nila sa pagtuo kaniya nga wala nila hidunggi?” (Roma 10:14) Sa daghang kaso ang maong mga tin-edyer ug mga bag-ong hamtong nagasanong sa kamatuoran, busa kinahanglang atong pangitaon ug walihan sila.
12. Sa unsang paagi ang atong pagpadayon sa buluhatong pagwali usa ka ekspresyon sa kaluoy ni Jehova?
12 Ang kamatuoran nga ang dalan bukas pa para sa pagwali maoy ekspresyon sa kaluoy ni Jehova. Si apostol Pedro misulat: “Si Jehova dili langaylangayan kon bahin sa iyang saad, sumala sa pag-isip sa pila ka tawo sa pagkalangaylangayan, kondili siya mapailobon kaninyo tungod kay dili niya buot nga may malaglag kondili buot nga ang tanan makadangat sa paghinulsol. Dugang pa, isipa ang pailob sa atong Ginoo ingong kaluwasan.” (2 Pedro 3:9, 15) Ang tinguha ni Jehova nga ang tanang matang sa mga tawo mamaluwas gipahayag dili lamang pinaagi sa iyang mapailobong pagtugot ug panahon una niya ipahamtang ang paghukom kondili pinaagi usab sa iyang padayong pag-awhag sa mga tawo nga moliso kaniya ug mamaluwas. (1 Timoteo 2:4) Samtang kita nagapadayon sa pagwali sa maayong balita, atong ginapasiugda ang kaluoy sa Diyos, ug niining paagiha kita nagadayeg kaniya.
Paglikay sa Pagkasad-an sa Dugo
13, 14. (a) Sa unsang paagi ang atong buluhatong pagwali ikatandi sa buluhaton sa usa ka magbalantay, sumala sa gihisgotan sa tagna ni Ezekiel? (b) Nganong si Pablo nakaingon nga siya “hinlo sa dugo sa tanang tawo,” ug sa unsang paagi lamang ang mga Saksi ni Jehova makasulti niini karong adlawa?
13 Ang responsabilidad sa dedikadong mga Saksi ni Jehova sa pagpasidaan sa mga tawo sa umaabot nga paghukom sa Diyos ikatandi sa iya ni Ezekiel sa iyang panahon. Siya gitudlong magbalantay sa balay sa Israel. Ang iyang tinudlong-buluhaton mao ang pagpasidaan sa mga Israelinhon nga moabot kanila ang kalaglagan kon sila dili motalikod sa ilang daotang mga dalan. Kon ingong magbalantay siya mapakyas sa pagpahayag sa pasidaan, ang kalaglagan moabot gihapon sa daotang katawhan, apan ang ilang dugo mahipatong sa ulo sa mapinasagdanong magbalantay. Niini gipadayag ni Jehova ang iyang tinamdan bahin sa pagpatuman sa paghukom: “Ako nagakalipay, dili sa kamatayon sa usang daotan, kondili nga ang usang daotan motalikod sa iyang dalan ug magpadayong buhi. Tumalikod ka, tumalikod ka sa imong daotang mga dalan, kay ngano ba nga ikaw mamatay gayod, Oh balay sa Israel?”—Ezekiel 33:1-11.
14 Giila ni apostol Pablo ang iyang tulubagon ingong magbalantay, nga mipahayag ngadto sa mga ansiano nga taga-Efeso: “Busa ako nagatawag kaninyo sa pagpamatuod niining adlawa mismo nga ako mahinlo sa dugo sa tanang tawo.” Nganong siya nakaingon niana? Siya mipadayon: “Kay ako wala magpugong sa pagpahayag kaninyo sa tanang tambag sa Diyos.” (Buhat 20:26, 27) Kana matuod sa magbalantay nga matang karong adlawa, ang nahibilin sa dinihogang mga sumusunod ni Jesu-Kristo. Silang tanan, nga uban sa kapin sa tulo ka milyon nilang mga kauban nga nagalaom nga makalabang-buhi sa kalaglagan niining sistema sa mga butang ug makadawat sa kinabuhing walay kataposan sa yuta, angay nga dili gayod maghinayhinay sa pagwali sa maayong balita sa Gingharian sa Diyos ug pagpasidaan sa umaabot nga pagpatuman sa Iyang paghukom. Niining paagiha ilang malikayan ang pagkasad-an sa dugo.
15. Sumala sa Ezekiel kapitulo 9, kinsa ang gipatikan, ug kinsa ang nagpatik?
15 Ang buluhatong pagwali karong adlawa matagnaong gibatbat sa Ezekiel kapitulo 9. Dinhi, ang silot ni Jehova gitino alang sa siyudad sa Jerusalem. Una ipatuman ang maong paghukom, ang usa ka lalaking nagsapot sa lino ug may tintero sa sekretaryo sa iyang hawak gimandoan sa paglatas sa siyudad ug pagpatik sa mga agtang sa tanan nga nagapanghupaw mahitungod sa dulumtanang mga butang ginahimo dinha. Sa mahuman ang maong buluhaton sa pagpatik, pagalaglagon ang tanan sa siyudad gawas niadtong gipatikan alang sa kaluwasan. Sa malamposong pagkatapos sa iyang buluhatong pagpatik, ang lalaki mitaho: “Nabuhat ko ang sumala sa imong gisugo kanako.” (Ezekiel 9:11) Matinumanon niyang gituman ang iyang tinudlong-buluhaton hangtod sa kataposan.
16. (a) Kinsay gihulagwayan sa lalaking nasul-oban ug lino karong adlawa? (b) Sa unsang paagi ang isyu sa pagbayaw sa pagkasoberano ni Jehova nagatukmod kanato sa pagpadayon sa pagwali?
16 Ang lalaking nagsapot sa lino nagahulagway sa dinihogang nahibilin sa mga sumusunod ni Kristo, ug gikuyogan sila sa “dakong panon” sa “ubang mga karnero.” Ang dakong isyu karong adlawa, sama sa panahon ni Ezekiel, mao ang pagbayaw sa pagkasoberano ni Jehova. Mahitungod sa kalaglagan niining presenteng daotang sistema sa mga butang sa gubat sa dakong adlaw sa Diyos nga Gamhanan sa Tanan, si Jehova nagaingon: “Ug ang kanasoran makaila nga ako mao si Jehova.” (Pinadayag 7:2; Juan 10:16; Ezekiel 39:7) Aron mahibaloon kini sa kanasoran, ang mga alagad ni Jehova sa yuta kinahanglang mopadayon sa pagwali sa iyang ngalan ug katuyoan ingong usa ka pamatuod sa tanang kanasoran.
17, 18. (a) Sa unsang paagi ang atong pagpadayon sa pagwali nagatabang kanato sa pagpabiling nagatukaw? (b) Unsang taho ang buot natong tanan nga himoon kang Jehova inigtapos na niya sa buluhatong pagwali, ug sa unsang paagi lamang atong mahimo kini?
17 Pinaagi sa pagpadayon sa pagwali sa maayong balita sa Gingharian, padayon natong mahuptan ang atong pagkamabinantayon. Kita nakaamgo nga padayon sa kahinungdanon sa ngalan ug katuyoan ni Jehova. Kon kita maghinayhinay, ang atong paglaom sa Gingharian magmahuyang, ug kita maganoy sa “mga kabalaka ug sa mga bahandi ug mga kalingawan niining kinabuhia . . . ug walay madala sa kahingpitan.” (Lucas 8:14) Pinaagi sa madasigong pagpadayon sa pagmantala sa “maayong balita,” kita matinumanong nagasunod sa mga sugo sa atong Agalon, si Jesu-Kristo: “Magpadayon sa pagtan-aw, magpadayon sa pagtukaw, kay kamo wala mahibalo kon kanus-a ang tinudlong panahon. Apan ang akong igaingon kaninyo akong igaingon sa tanan, Magpadayon sa pagtukaw.”—Marcos 13:10, 33, 37.
18 Nan, magpadayon tang tanan sa pagpangita ‘niadtong nagapanghupaw’ samtang si Jehova nagtugot pag panahon alang niini. Hinaot kitang tanan, kon kaha sakop sa dinihogang nahibilin o sa “ubang mga karnero,” magmatinumanon sa pagtuman sa atong tinudlong-buluhaton sa pagwali sa maayong balita sa Gingharian sa tibuok gipuy-ang yuta alang sa usa ka pamatuod sa tanang kanasoran. (Mateo 24:14) Dihang taposon ni Jehova mismo kining buluhatona pinaagi sa pagsugod sa “dakong kasakitan,” hinaot ang matag usa kanato makaarang sa pagsulti kang Jehova, ‘Among nabuhat ang sumala sa imong gisugo.’
Nahinumdom Ka Ba?
◻ Unsay ginapaila sa mga resulta sa atong pagwali?
◻ Unsa ang ubang katarongan nganong kita mopadayon sa pagwali?
◻ Sa unsang paagi ang atong pagwali usa ka ekspresyon sa kaluoy ni Jehova?
◻ Sa unsang paagi kita nagapabiling hinlo sa dugo sa tanang tawo?
◻ Sa unsang paagi ang atong pagwali nagatabang kanato sa pagpabiling nagatukaw?
[Chart sa panid 28]
ANG MGA RESULTA SA PAGWALI SA PITO KA TUIG
Gibawtismohan Tumatambong sa Memorial Pagtuon sa Bibliya
1981 119,836 5,987,893 1,475,177
1982 138,540 6,252,787 1,586,293
1983 161,896 6,767,707 1,797,112
1984 179,421 7,416,974 2,047,113
1985 189,800 7,792,109 2,379,146
1986 225,868 8,160,597 2,726,252
1987 230,843 8,965,221 3,005,048