Ang Paghigugma sa Silingan Posible

ANG ilustrasyon ni Jesu-Kristo mahitungod sa Samarianhon nagpakita kon unsa gayoy tinuod nga kahulogan sa paghigugma sa silingan. (Lucas 10:25-37) Si Jesus nagtudlo usab: “‘Higugmaa si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong hunahuna.’ Mao kana ang dako ug unang sugo. Ug ang ikaduha, nga susama niini, mao kini, ‘Higugmaa ang imong silingan sama sa imong kaugalingon.’”​—Mateo 22:37-39.

Sama sa kadaghanang tawo, nalisdan ka ba sa paghigugma sa imong silingan nga sakop sa laing rasa gawas sa imoha? Tingali tinuod kini tungod kay ikaw mismo may nahibaloan o nakaeksperyensiyag pagpihig ug inhustisya. Ikaw o ang imong mga minahal tingali nag-antos sa pag-abuso sa mga kamot sa mga tawo sa laing pundok.

Sanglit gipakita ni Jesus nga ang usa sa kasugoan sa Diyos mao nga atong higugmaon ang atong silingan, mahimong posible ang pagbuntog sa maong kusganong mga pagbati. Ang sekreto sa paghimo niini mao ang paglantaw sa mga tawo ingon sa paglantaw sa Diyos ug ni Kristo. Niining bahina atong konsiderahon ang panig-ingnan ni Jesus ug sa unang mga Kristohanon.

Ang Maayong Panig-ingnan ni Jesus

Ang unang siglong mga Hudiyo may kusganong mga pagbati batok sa mga Samarianhon, usa ka katawhan nga nagpuyo sa dapit sa tunga sa Judea ug sa Galilea. Sa usa ka higayon ang mga magsusupak nga Hudiyohanon matamayong nangutana kang Jesus: “Dili ba husto kami sa among pag-ingon, Ikaw Samarianhon ug giyawaan?” (Juan 8:48) Kusganon kaayo ang pagbati batok sa Samarianhon nga gitunglo gani sa ubang mga Hudiyo ang mga Samarianhon sa publiko diha sa mga sinagoga ug nag-ampo adlaw-adlaw nga dili unta hatagan ang mga Samarianhon ug kinabuhing walay kataposan.

Sa walay duhaduha ang kahibalo niining dulot kaayo nga pagdumot maoy nakaaghat kang Jesus sa paghatag sa ilustrasyon bahin sa Samarianhon nga nagpakita sa iyang kaugalingon nga tinuod nga silingan pinaagi sa pag-atiman sa tawong Hudiyo nga gibunalan sa mga tulisan. Unsa kahay itubag ni Jesus sa dihang ang Hudiyong tawong batid sa Moisesnong Kasugoan nangutana: “Kinsa man gayod ang akong silingan?” (Lucas 10:29) Aw, mahimong tubagon ni Jesus nga direkta pinaagi sa pag-ingon: ‘Ang imong silingan nag-apil dili lamang sa imong isigka Hudiyo kondili sa ubang katawhan usab, bisag usa ka Samarianhon.’ Apan, malisdan gayod unta ang mga Hudiyo sa pagdawat niana. Busa iyang giasoy ang ilustrasyon bahin sa usa ka Hudiyo nga nakadawat sa kaluoy sa Samarianhon. Gitabangan ni Jesus sa ingon ang Hudiyohanong mga tigpatalinghog sa paghimog konklusyon nga ang tinuod nga gugma sa silingan moabot pa ngadto sa dili mga Hudiyo.

Si Jesus walay pagbati nga batok-Samarianhon. Miagi sa usa ka higayon sa Samaria, siya mipahulay diha sa daplin sa atabay samtang milakaw ang iyang mga tinun-an sa duol nga siyudad aron sa pagpalit ug makaon. Sa dihang miduol ang usa ka babayeng Samarianhon aron sa pagkuhag tubig, siya miingon: “Paimna ra ako.” Sanglit ang mga Hudiyo wala may pakiglabot sa mga Samarianhon, ang babaye nangutana: “Naunsa ba nga ikaw nga usa ka Hudiyo, mihangyo man kanako nga paimnon ko nga usa ka babayeng Samarianhon?” Unya si Jesus nagpamatuod kaniya, nga dayag nga miingon nga siya mao ang Mesiyas. Ang babaye misanong pinaagi sa pag-adto sa siyudad ug sa pagpanawag sa uban sa pagkuyog ug sa pagpamati kaniya. Ang resulta? “Daghan sa Samarianhon sa maong siyudad mituo kaniya.” Pagkamaayong resulta tungod kay si Jesus wala mabugkos sa naglungtad nga tinamdan sa iyang katalirongang mga Hudiyo!​—Juan 4:4-42.

Ang Diyos Walay Pinalabi

Maoy katuyoan sa Diyos nga ang mga Hudiyo sa panguna mao ang sangyawan ni Jesus, “ang nangawalang mga karnero sa balay sa Israel.” (Mateo 15:24) Busa, ang iyang unang mga sumusunod maoy Hudiyo ug kaliwat. Apan tulo ka tuig human nga gibubo ang balaang espiritu sa Pentekostes 33 K.P., gipatin-aw ni Jehova nga nagtinguha siya nga ipaabot sa Hudiyohanong mga magtutuo ang buluhaton sa paghimog-tinun-an ngadto sa katawhan sa kanasoran, ang mga Hentil.

Sa Hudiyohanong hunahuna, ang paghigugmag usa ka Samarianhon sama sa kaugalingon malisod kaayo. Mas malisod usab ang pagpakitag gugma sa silingan ngadto sa walay-sirkunsisyong mga Hentil, mga tawo nga walay gikausahan sa mga Hudiyo sama sa mga Samarianhon. Mikomento bahin sa tinamdan sa mga Hudiyo ngadto sa mga Hentil, ang The International Standard Bible Encyclopaedia nag-ingon: “Among nakita, sa panahon sa B[ag-ong] T[ugon], ang labing grabeng kasilag, pagtamay ug pagdumot. Sila [mga Hentil] giisip nga mahugaw, diin gidili ang mahigalaong pagpakiglabot kanila. Sila maoy mga kaaway sa Diyos ug sa Iyang katawhan, diin sila gihikawan sa kahibalo mahitungod sa Diyos gawas kon sila makabig, ug bisan pa sila dili, sama sa karaang mga panahon, mahimong dawaton diha sa bug-os nga pag-ubanay. Ang mga Hudiyo gidid-an sa pagtambag kanila, ug kon sila mangutana bahin sa mga butang mahitungod sa Diyos sila pagatunglohon.”

Samtang daghan ang may hunahunang sama niini, gipahinabo ni Jehova si apostol Pedro nga makakita ug panan-awon diin siya gisugo sa ‘paghunong sa pagtawag nga mahugaw sa mga butang nga gihinloan na sa Diyos.’ Dayon gipadala siya sa Diyos ngadto sa panimalay sa Hentil nga si Cornelio. Nagpamatuod si Pedro bahin kang Kristo ngadto kang Cornelio, sa iyang pamilya, ug sa ubang mga Hentil. “Sa pagkatinuod,” miingon si Pedro, “naila ko nga ang Diyos wala diay pinalabi, hinunoa sa matag usa ka nasod ang tawo nga magakahadlok kaniya ug magabuhat sa matarong dalawaton kaniya.” Samtang nagsangyaw pa si Pedro, mikunsad ang balaang espiritu diha sa bag-ong mga magtutuo, nga niadtong higayona gibawtismohan ug nahimong unang Hentil nga mga sumusunod ni Kristo.​—Buhat, kapitulo 10.

Gidawat sa mga Hudiyo kining bag-ong hitabo, nakaamgo nga ang sugo ni Jesus sa “paghimog tinun-an sa katawhan sa tanang kanasoran” dili limitado sa mga Hudiyo diha sa tanang kayutaan kondili nag-apil sa mga Hentil. (Mateo 28:19, 20; Buhat 11:18) Nakabuntog sa bisan unsang batok-Hentil nga mga pagbati, sila madasigong nag-organisar ug kampaniya sa pagsangyaw sa paghimog mga tinun-an taliwala sa kanasoran. Wala moabot ug 30 ka tuig sa ulahi, mahimong ikaingon nga ang maayong balita gikawali na “ngadto sa tanang binuhat sa silong sa langit.”​—Colosas 1:23.

Ang nanguna niining buluhaton sa pagsangyaw mao si apostol Pablo, nga usa mismo ka Kristohanon nga Hudiyo ug kaliwat. Sa wala pa mahimong sumusunod ni Kristo, siya maoy usa ka madasigong sakop sa relihiyosong sekta sa mga Pariseo. Ilang gitamay dili lamang ang mga Hentil kondili bisan ang komong mga tawo nga sama kanila ug nasyonalidad. (Lucas 18:11, 12) Apan wala itugot ni Pablo kadtong mga hunahunaa nga magpugong kaniya sa pagpakitag gugma sa silingan ngadto sa uban. Hinunoa, siya nahimong “usa ka apostol sa kanasoran [mga Hentil],” gigugol ang iyang kinabuhi sa buluhaton sa paghimog-tinun-an sa tibuok kayutaan sa Mediteraneo.​—Roma 11:13.

Sa panahon sa iyang ministeryo, si Pablo gibato, gibunalan, ug gibilanggo. (Buhat 14:19; 16:22, 23) Ang mao bang mapintas nga kasinatian nagpasuko kaniya ug nakahinapos nga nag-usik-usik siya sa iyang panahon taliwala sa pipila ka nasod ug etnikong grupo? Wala gayod. Siya nahibalo nga may mga indibiduwal nga matinud-anon ug kasingkasing nga nakatag sa tibuok daghang etnikong mga grupo sa iyang adlaw.

Sa dihang nakita ni Pablo ang mga Hentil nga andam nga magpatudlo sa mga dalan sa Diyos, siya nakakat-on sa paghigugma kanila. Pananglitan, ngadto sa mga taga-Tesalonica siya misulat: “Nagmalulot kami diha sa taliwala ninyo, sama sa iwa nga nagaalima sa iyang kaugalingong mga anak. Busa, tungod sa among malulot nga pagbati alang kaninyo, malipay kaayo kaming magpaambit kaninyo, dili lamang sa maayong balita sa Diyos, kondili usab sa among kaugalingong mga kalag, kay nahimo kamo nga mahal uyamot kanamo.” (1 Tesalonica 2:7, 8) Kining kinasingkasing nga mga pulong nagpakita nga tinuod nga nahigugma si Pablo sa Hentil nga mga taga-Tesalonica ug wala magtugot nga may makadaot sa kalipay sa maayong relasyon uban kanila.

Nagalihok nga Gugma sa Silingan

Karong adlawa, sama sa unang siglo, ginaugmad niadtong nakig-uban sa Kristohanong kongregasyon ang paghigugma alang sa silingan sa katawhan sa tanang etnikong mga grupo. Pinaagi sa pag-ugmad sa diyosnong mga hunahuna sa uban ug sa pagpakig-ambit sa maayong balita sa Gingharian uban kanila, ang tinuod nga mga Kristohanon nakapasangkad sa ilang pagsabot sa katawhan nga wala unta nila makaila. Sila may inigsoong gugma pa gani alang kanila. (Juan 13:34, 35) Mahimong masinati usab nimo kini.

Ang maong gugma naglungtad sa mga Saksi ni Jehova, bisag makita sila sa 229 ka yuta ug naghawas sa “tanang kanasoran ug mga tribo ug katawhan ug mga pinulongan.” (Pinadayag 7:9) Ingong tibuok-kalibotan nga panag-igsoonay, sila nahiusa sa pagsimba kang Jehova, tungod sa ilang pagdumili sa pagpakigbahin sa mga away sa rasa ug mga indigay, ug sa ilang pagsalikway sa mga pagpihig nga nagakuha sa katawhan sa mainit nga mga relasyon uban sa isigkatawo.

Pakig-uban sa mga Saksi, ug imong makita kon sa unsang paagi ang katawhan sa tanang etnikong mga kagikan nagabuhat sa kabubut-on sa Diyos. Imong makita ang gugma sa silingan nga nagalihok samtang ginasangyaw nila ang maayong balita sa Gingharian sa Diyos. Oo, ug diha sa ilang mga kongregasyon, imong mahimamat ang malulot, sinserong mga tawo nga nagapakita diha sa ilang mga kinabuhi nga sila tinuod gayod nga nakakat-on sa paghigugma sa ilang silingan.

[Hulagway sa panid 6]

Diha sa mga kongregasyon sa mga Saksi ni Jehova, makita mo ang malipayong katawhan sa tanang rasa

[Picture Credit Line sa panid 4]

Arrival of the Good Samaritan at the Inn/The Doré Bible Illustrations/Dover Publications, Inc.