Ang Pagkainuyonan sa Diyos Motultol sa Kinabuhing Walay Kataposan
“Panalanginan mo si bisan kinsa nga matarong, Oh Jehova; ingon sa usa ka dakong taming, likosan mo sila uban ang pag-uyon.”—SAL. 5:12.
1, 2. Unsay gipangayo ni Elias sa balo sa Zarepta, ug unsay iyang gipasalig sa balo?
ANG inahan ug ang iyang anak lalaki gigutom, ingon man ang propeta sa Diyos. Sa dihang nangandam sa pagluto ang maong balo sa Zarepta, si propeta Elias nangayog tubig ug tinapay. Siya andam mohatag kaniyag tubig, apan alang sa pagkaon ang balo may ‘usa lamang ka hakop nga harina sa tadyaw ug diyutay nga lana sa gamayng banga.’ Iyang gisultihan ang propeta nga dili siya makahatag kaniyag pagkaon.—1 Hari 17:8-12.
2 “Kon unsay atua didto himoan mo una ako ug gamayng lingin nga tinapay,” miinsistir si Elias, “ug dad-on mo gayod kini kanako, ug makahimo ka ug alang sa imong kaugalingon ug sa imong anak nga lalaki human niana. Kay mao kini ang giingon ni Jehova nga Diyos sa Israel, ‘Ang tadyaw sa harina dili mahutdan, ug ang gamayng banga sa lana dili makabsan.’”—1 Hari 17:13, 14.
3. Unsang importanteng desisyon ang atong giatubang?
3 Dili lamang ang pagpaambit sa iyang diyutayng pagkaon ang kinahanglang desisyonan sa balo. Siya ba mosalig nga si Jehova magluwas kaniya ug sa iyang anak, o palabihon ba niya ang iyang materyal nga panginahanglan kay sa pag-uyon ug pagpakighigala sa Diyos? Kitang tanan kinahanglang mohimog susamang desisyon. Kita ba mas mahunahunaon sa pagbaton sa pag-uyon ni Jehova kay sa materyal nga kasegurohan? May rason gayod kita nga mosalig sa Diyos. Ug duna kitay mahimo aron mabatonan ang iyang pag-uyon.
‘Ikaw Takos nga Modawat sa Pagsimba’
4. Nganong si Jehova takos sa atong pagsimba?
4 Gidahom ni Jehova nga ang mga tawo moalagad kaniya sa dalawatong paagi. Ang grupo sa mga manulonda nagkausa sa pagpamatuod niana: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (Pin. 4:11) Kay siya ang Maglalalang, si Jehova takos sa atong pagsimba.
5. Nganong ang gugma sa Diyos angayng magpalihok kanato sa pag-alagad kaniya?
5 Ang laing rason nga kita angayng mag-alagad kang Jehova mao ang iyang di-hitupngang gugma kanato. Ang Bibliya nag-ingon: “Gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.” (Gen. 1:27) Ang tawo gihatagan sa Diyos ug kagawasan sa pagpili uban ang katakos sa pagdesisyon. Pinaagi sa paghatag kanatog kinabuhi, si Jehova nahimong atong Amahan. (Luc. 3:38) Samag usa ka responsableng amahan, iyang gitagana ang tanang gikinahanglan sa iyang mga anak aron magmalipayon. ‘Siya nagapasubang sa iyang adlaw ug nagapaulan,’ aron ang Yuta magpatunghag dagayang pagkaon alang kanato diha sa matahom nga palibot.—Mat. 5:45.
6, 7. (a) Unsay naagoman sa mga kaliwat ni Adan tungod sa iyang sala? (b) Unsa ang mga benepisyo sa halad-lukat ni Kristo alang niadtong nagtinguha sa pag-uyon sa Diyos?
6 Si Jehova nagluwas usab kanato gikan sa teribleng sangpotanan sa sala. Pinaagi sa pagpakasala, si Adan nahisamag sugarol nga nangawat gikan sa iyang pamilya. Pinaagi sa pagrebelde kang Jehova, gikawat ni Adan ang palaaboton sa iyang mga anak—ang kalipay nga dayon. Tungod sa iyang kahakog, ang katawhan naulipon sa pagkadili-hingpit. Busa, ang tanan masakit, maguol, ug sa kataposan mamatay. Aron ang usa ka ulipon makagawas, gikinahanglan ang bayad ug kana gibayran ni Jehova aron maluwas kita sa maong teribleng sangpotanan. (Basaha ang Roma 5:21.) Uyon sa kabubut-on sa iyang Amahan, gihatag ni Jesu-Kristo ang “iyang kalag nga usa ka lukat baylo sa daghan.” (Mat. 20:28) Sa dili madugay, ang mga tawong giuyonan sa Diyos bug-os nga makapahimulos sa mga benepisyo sa lukat.
7 Ang atong Maglalalang, si Jehova, labaw ug nahimo kay ni bisan kinsa aron kita makabatog malipayon ug makahuloganong kinabuhi. Kay iyang giuyonan, ato unyang makita kon unsaon niya paghanaw ang tanang pag-antos sa katawhan. Ipakita ni Jehova sa matag usa kanato nga siya ang “tigganti sa mga matinuorong nagapangita kaniya.”—Heb. 11:6.
“Ang Imong Katawhan Magatanyag sa Ilang Kaugalingon nga Kinabubut-on”
8. Unsay atong makat-onan sa kasinatian ni Isaias bahin sa pag-alagad sa Diyos?
8 Aron makabaton sa pag-uyon sa Diyos, kinahanglang gamiton nato ang atong kagawasan sa pagpili sa hustong paagi kay si Jehova dili mopugos kang bisan kinsa sa pag-alagad kaniya. Sa panahon ni Isaias, Siya nangutana: “Kinsa ang akong ipadala, ug kinsa ang moadto alang kanamo?” Gipakita ni Jehova ang pagtahod sa propeta pinaagi sa pag-ila sa iyang katungod sa pagdesisyon. Handurawa ang kalipay ni Isaias sa dihang siya mitubag: “Ania ako! Ipadala ako.”—Isa. 6:8.
9, 10. (a) Unsa ang angay natong tinamdan bahin sa pag-alagad sa Diyos? (b) Nganong angay kitang mag-alagad kang Jehova nga bug-os kalag?
9 Ang mga tawo makapili kon moalagad ba sila sa Diyos o dili. Buot ni Jehova nga kita moalagad kaniya nga kinabubut-on. (Basaha ang Josue 24:15.) Si bisan kinsa nga nagsimba sa Diyos nga kontragusto dili makapahimuot kaniya; ni dawaton niya ang pagsimba niadtong kansang motibo mao ang pagpahimuot lamang sa ubang tawo. (Col. 3:22) Kon kita nag-alagad nga ‘nagpanuko’ sa pagkaagi nga atong gitugotan ang kalibotanong kalihokan nga magbalda sa atong pagsimba, dili kita makabaton sa pag-uyon sa Diyos. (Ex. 22:29) Si Jehova nahibalo nga ang bug-os-kalag nga pag-alagad kaniya makahatag kanatog kaayohan. Si Moises nag-awhag sa mga Israelinhon nga pilion ang kinabuhi ‘pinaagi sa paghigugma kang Jehova nga ilang Diyos, pinaagi sa pagpamati sa iyang tingog ug sa pag-unong kaniya.’—Deut. 30:19, 20.
10 Si Haring David sa karaang Israel miawit kang Jehova: “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar. Sa kahalangdon sa pagkabalaan, gikan sa tagoangkan sa kaadlawon, ikaw adunay pundok sa mga batan-on nga sama gayod sa mga yamog.” (Sal. 110:3) Daghang tawo karon ang nagkinabuhi lamang alang sa materyal nga kasegurohan ug kalingawan. Apan, kadtong nahigugma kang Jehova nag-una sa ilang sagradong pag-alagad. Ang ilang pagkamasiboton sa pagsangyaw sa maayong balita nagpaila kon unsay ilang prioridad. Bug-os silang nagsalig nga si Jehova magtagana sa ilang adlaw-adlawng panginahanglan.—Mat. 6:33, 34.
Mga Halad nga Giuyonan sa Diyos
11. Unsang benepisyo ang gilaoman nga madawat sa mga Israelinhon pinaagi sa pagtanyag ug mga halad kang Jehova?
11 Ilalom sa pakigsaad sa Balaod, ang katawhan sa Diyos nagtanyag ug dalawatong mga halad aron mabatonan ang iyang pag-uyon. “Kon maghalad kamo ug usa ka halad-sa-panag-ambit alang kang Jehova,” nag-ingon ang Levitico 19:5, “igahalad ninyo kini aron kamo makabaton ug pag-uyon.” Nianang basahona usab, atong mabasa: “Kon maghalad kamo ug halad-sa-pagpasalamat ngadto kang Jehova, inyo kining ihalad aron kamo makabaton ug pag-uyon.” (Lev. 22:29) Sa dihang ang mga Israelinhon nagtanyag ug dalawatong mga halad nga hayop kang Jehova, ang aso niana samag “makapahupay nga alimyon” alang sa matuod nga Diyos. (Lev. 1:9, 13) Siya nahupayan ug nahimuot sa mga ekspresyon sa gugma sa iyang katawhan. (Gen. 8:21) Sa maong mga balaod, atong makaplagan ang prinsipyo nga mapadapat karon. Kadtong nagtanyag ug dalawatong mga halad kang Jehova makadawat sa iyang pag-uyon. Unsang mga halad ang iyang dawaton? Tagda ang duha ka bahin sa kinabuhi: ang atong panggawi ug sinultihan.
12. Unsang mga buhat ang makapahimong dulumtanan sa ‘atong pagtugyan sa atong lawas nga usa ka halad’ sa Diyos?
12 Si apostol Pablo misulat sa mga taga-Roma: “Itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.” (Roma 12:1) Aron mabatonan ang pag-uyon sa Diyos, ang usa kinahanglang maghupot ug hinlo nga lawas. Kon iyang hugawan ang iyang lawas pinaagi sa pagtabako, pagmama, pagdroga, o paghuboghubog, ang maong halad walay bili. (2 Cor. 7:1) Dugang pa, sanglit siya nga “nagapakighilawas nagapakasala batok sa iyang kaugalingong lawas,” ang tanang matang sa imoral nga panggawi makapahimo sa iyang halad nga dulumtanan kang Jehova. (1 Cor. 6:18) Aron mahimuot ang Diyos, ang usa angayng ‘magmabalaan sa tanan niyang panggawi.’—1 Ped. 1:14-16.
13. Nganong angay kitang magdayeg kang Jehova?
13 Ang laing halad nga makapalipay kang Jehova nalangkit sa atong sinultihan. Kadtong nahigugma kang Jehova kanunayng nagdayeg kaniya sa publiko ug sulod sa balay. (Basaha ang Salmo 34:1-3.) Basaha ang Salmo 148-150, ug matikdi kon unsa ka subsob nga kining tulo ka salmo nagdasig kanato sa pagdayeg kang Jehova. Tinuod nga “sa mga matul-id ang pagdayeg angayan.” (Sal. 33:1) Ug ang atong Ehemplo, si Jesu-Kristo, nagpasiugda sa kahinungdanon sa pagdayeg sa Diyos pinaagi sa pagsangyaw sa maayong balita.—Luc. 4:18, 43, 44.
14, 15. Si Oseas nag-awhag sa mga Israelinhon sa pagtanyag ug unsang mga halad, ug unsay sanong ni Jehova?
14 Pinaagi sa masibotong pagsangyaw, atong gipamatud-an ang atong gugma kang Jehova ug ang tinguha nga mabatonan ang iyang pag-uyon. Pananglitan, tagda kon giunsa pagtambag ni propeta Oseas ang mga Israelinhon nga nalambigit sa bakak nga pagsimba ug nawad-an sa pag-uyon sa Diyos. (Os. 13:1-3) Si Oseas nag-awhag kanila sa pagpangaliyupo: “Hinaot pasayloon mo [Jehova] ang kasaypanan; ug dawaton ang maayo, ug sa baylo among ihalad ang mga toreyong baka sa among mga ngabil.”—Os. 14:1, 2.
15 Ang torong baka maoy kinamahalang hayop nga ikatanyag sa mga Israelinhon kang Jehova. Busa, ‘ang mga toreyong baka sa atong mga ngabil’ nagtumong sa sinsero, maayong-pagkahan-ay nga mga pulong sa pagdayeg sa matuod nga Diyos. Unsay sanong ni Jehova niadtong naghimo niana? Siya miingon: “Higugmaon ko sila sa kinabubut-on.” (Os. 14:4) Si Jehova nagpasaylo, nagpakita sa iyang pag-uyon, ug nakighigala niadtong nagtanyag sa maong mga halad sa pagdayeg.
16, 17. Sa dihang ang pagtuo sa Diyos magtukmod sa usa sa pagsangyaw sa maayong balita, unsa unya ang sanong ni Jehova?
16 Ang pagdayeg kang Jehova sa publiko maoy dakong bahin sa matuod nga pagsimba. Ang paghimaya sa matuod nga Diyos gipabilhan pag-ayo sa salmista nga siya mihangyo sa Diyos: “Kahimut-i intawon ang kinabubut-ong mga halad sa akong baba, Oh Jehova.” (Sal. 119:108) Komosta karon? Bahin sa dakong panon sa katawhan karon, si Isaias mitagna: “Ang mga pagdayeg kang Jehova ilang ipahibalo. . . . [Ang ilang mga gasa] mosaka sa halaran [sa Diyos] uban ang pag-uyon.” (Isa. 60:6, 7) Ingong katumanan, minilyon ang nagtanyag sa Diyos ug “halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan.”—Heb. 13:15.
17 Komosta ka? Nagatanyag ka ba sa Diyos ug dalawatong mga halad? Kon wala, mohimo ka bag gikinahanglang mga kausaban ug mosugod pagdayeg kang Jehova sa publiko? Sa dihang ang pagtuo sa Diyos magtukmod kanimo sa pagsugod sa pagsangyaw sa maayong balita, ang imong halad mahimong “labi pang makapahimuot kang Jehova kay sa usa ka torong baka.” (Basaha ang Salmo 69:30, 31.) Magmasaligon nga ang “makapahupay nga alimyon” sa imong halad sa pagdayeg makaabot kang Jehova ug imong mabatonan ang iyang pag-uyon. (Ezeq. 20:41) Di-masukod unya ang imong kalipay.
‘Panalanginan ni Jehova si Bisan Kinsa nga Matarong’
18, 19. (a) Unsa ang panghunahuna sa kadaghanan karon bahin sa pag-alagad sa Diyos? (b) Unsay resulta sa dihang mawala ang pabor sa Diyos?
18 Sama sa adlaw ni Malaquias, daghang tawo karon ang moingon: “Walay kapuslanan ang pag-alagad sa Diyos. Walay kaayohan sa pagtuman sa iyang kasugoan.” (Mal. 3:14, Biblia sa Kristohanong Katilingban) Tungod sa ilang pagkamateryalistiko, giisip nila nga dili matuman ang katuyoan sa Diyos ug nga ang iyang mga balaod dili na mapadapat. Alang kanila, ang pagsangyaw sa maayong balita maoy pag-usik-usik sa panahon ug hinungdan sa panaglalis.
19 Ang maong panghunahuna nagsugod sa tanaman sa Eden. Si Satanas nagdani kang Eva nga dili pabilhan ang talagsaong kinabuhi nga gihatag ni Jehova kaniya ug ang pag-uyon sa Diyos. Karon, gipatuo ni Satanas ang mga tawo nga walay kapuslanan ang pagbuhat sa kabubut-on sa Diyos. Apan, naamgohan ni Adan ug Eva nga sa dihang mawala ang pabor sa Diyos, mawala usab ang kinabuhi. Ug kadtong nagsunod sa ilang daotang panig-ingnan karon, makaamgo usab niana sa dili madugay.—Gen. 3:1-7, 17-19.
20, 21. (a) Unsay gihimo sa balo sa Zarepta, ug unsay resulta niana? (b) Sa unsang paagi ug nganong angay natong sundogon ang balo sa Zarepta?
20 Itandi ang makapasubong gidangatan ni Adan ug Eva ug ang sangpotanan sa mga panghitabo nga gihisgotan ganina bahin kang Elias ug sa balo sa Zarepta. Sa pagkadungog sa makapadasig nga mga pulong ni Elias, ang balo naglutog tinapay ug gidalitan niyag una ang propeta. Dayon gituman ni Jehova ang iyang saad pinaagi kang Elias. Ang asoy nag-ingon: “Siya nagpadayon sa pagkaon, siya uban kaniya ug sa iyang panimalay, sulod sa daghang mga adlaw. Ang tadyaw sa harina wala mahutdi, ug ang gamayng banga sa lana wala makabsi, sumala sa pulong ni Jehova nga iyang gisulti pinaagi kang Elias.”—1 Hari 17:15, 16.
21 Sa bilyonbilyong katawhan karon, diyutay ra ang mosundog sa gihimo sa balo sa Zarepta. Siya bug-os nga misalig sa Diyos sa kaluwasan, ug gitabangan gayod siya. Kini ug ang ubang asoy sa Bibliya nagpamatuod nga si Jehova takos sa atong pagsalig. (Basaha ang Josue 21:43-45; 23:14.) Ang mga Saksi ni Jehova karon naghatag ug dugang pamatuod nga Siya dili gayod mobiya niadtong nakabaton sa iyang pag-uyon.—Sal. 34:6, 7, 17-19.a
22. Nganong tinguhaon nato ang pag-uyon sa Diyos sa walay langan?
22 Haduol na ang adlaw sa Diyos sa paghukom “sa tanang nagapuyo ibabaw sa tibuok nawong sa yuta.” (Luc. 21:34, 35) Wala gayoy makaikyas niana. Walay bahandi o materyal nga mga butang ang makatupong sa bili sa mga pulong sa tinudlo-sa-Diyos nga Maghuhukom: “Umari, kamong gipanalanginan sa akong Amahan, panunda ninyo ang gingharian nga giandam alang kaninyo.” (Mat. 25:34) Oo, ‘panalanginan ni Jehova si bisan kinsa nga matarong; ingon sa usa ka dakong taming, likosan niya sila uban ang pag-uyon.’ (Sal. 5:12) Dili ba angay natong tinguhaon ang pag-uyon sa Diyos?
[Footnote]
Nahinumdom Ka Ba?
• Nganong takos si Jehova sa atong kinasingkasing nga pagsimba?
• Unsang mga halad ang dalawaton kang Jehova karon?
• Unsay gitumong sa ekspresyong ‘mga toreyong baka sa atong mga ngabil,’ ug nganong angay kitang magtanyag niana kang Jehova?
• Nganong angay natong tinguhaon ang pag-uyon sa Diyos?
[Hulagway sa panid 13]
Unsang importanteng desisyon ang giatubang sa kabos nga balo?
[Hulagway sa panid 15]
Unsang benepisyo ang atong madawat sa pagtanyag ug halad sa pagdayeg kang Jehova?
[Hulagway sa panid 17]
Ang imong bug-os nga pagsalig kang Jehova dili gayod makawang