“Karon Mao na ang Panahon nga Ilabinang Dalawaton”
“Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.”—2 COR. 6:2.
1. Nganong kinahanglan kitang mahibalo kon unsay labing importanteng buluhaton sa usa ka panahon?
“ADUNAY tinudlong panahon alang sa tanang butang, bisan usa ka panahon alang sa matag kalihokan ilalom sa mga langit.” (Eccl. 3:1) Si Solomon nagsulat nga importanteng mahibaloan ang labing maayong panahon alang sa usa ka mapuslanong buluhaton—pagpanguma, pagbiyahe, pagnegosyo, o pagpakigsulti sa uban. Apan, kinahanglang mahibalo usab kita kon unsay labing importanteng buluhaton sa usa ka panahon. Sa laing pagkasulti, kinahanglang tin-aw kanato ang atong mga prioridad.
2. Nganong nahibalo kita nga sa dihang nagsangyaw si Jesus, iyang nasabtan ang panahon nga siya nagkinabuhi?
2 Sa dinhi pa si Jesus sa yuta, nasabtan gayod niya ang panahon nga siya nagkinabuhi ug kon unsay angay niyang buhaton. Kay tin-aw kaniya ang iyang mga prioridad, nahibalo siya nga kadto ang dugay nang gipaabot nga panahon nga matuman ang daghang tagna bahin sa Mesiyas. (1 Ped. 1:11; Pin. 19:10) May buluhaton nga kinahanglan niyang himoon aron makaila ang mga tawo nga siya ang gisaad nga Mesiyas. Kinahanglang magpamatuod siya sa bug-os bahin sa kamatuoran sa Gingharian ug magtigom sa mahimong iyang kaubang mga manununod sa Gingharian. Kinahanglang ipahiluna usab niya ang pundasyon sa Kristohanong kongregasyon, nga magtuman sa buluhatong pagwali ug paghimog mga tinun-an hangtod sa kinalay-ang mga dapit sa yuta.—Mar. 1:15.
3. Sa unsang paagi ang pagkahibalo ni Jesus nga dinalian ang panahon nakaapektar sa iyang kalihokan?
3 Ang pagkahibalo ni Jesus nga dinalian ang panahon nagtukmod kaniya nga magmasiboton sa pagbuhat sa kabubut-on sa iyang Amahan. Giingnan niya ang iyang mga tinun-an: “Sa pagkatinuod, dako ang alanihon, apan diyutay ang mga mamumuo. Busa pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Luc. 10:2; Mal. 4:5, 6) Sa sinugdan, si Jesus nagpilig 12 dayon 70 gikan sa iyang mga tinun-an, naghatag kanilag instruksiyon, ug nagsugo kanila sa pagsangyaw sa makapaukyab nga mensahe: “Ang gingharian sa mga langit haduol na.” Ug maylabot kang Jesus, atong mabasa: “Sa pagkahuman [niya] sa paghatag ug mga instruksiyon sa iyang napulog-duha ka tinun-an, siya milakaw gikan didto aron sa pagtudlo ug sa pagwali sa ilang mga siyudad.”—Mat. 10:5-7; 11:1; Luc. 10:1.
4. Sa unsang paagi gisundog ni Pablo si Jesu-Kristo?
4 Si Jesus hingpit nga sulondan sa kasibot ug debosyon sa tanan niyang sumusunod. Kini ang gitumong ni apostol Pablo sa giawhag niya ang iyang isigkamagtutuo: “Mahimong mga tigsundog kanako, ingon nga ako nagsundog kang Kristo.” (1 Cor. 11:1) Sa unsang paagi gisundog ni Pablo si Kristo? Sa panguna, pinaagi sa pagbuhat sa iyang maarangan sa pagsangyaw sa maayong balita. Sa mga sulat ni Pablo ngadto sa mga kongregasyon, atong makita ang mga ekspresyong “ayaw paglangaylangay sa inyong buluhaton,” “magpaulipon kang Jehova,” ‘kanunayng magmapuliki sa buluhaton sa Ginoo,’ ug “bisan unsay inyong ginabuhat, buhata kini nga tibuok-kalag ingon nga alang kang Jehova.” (Roma 12:11; 1 Cor. 15:58; Col. 3:23) Wala gayod malimot si Pablo sa milagrosong pagpakigsulti ni Jesu-Kristo kaniya sa dalan paingon sa Damasco ug sa mga pulong ni Jesus nga gisulti kaniya sa tinun-ang si Ananias: “Kining tawhana maoy usa ka piniling sudlanan alang kanako aron magdala sa akong ngalan ngadto sa tanang kanasoran maingon man sa mga hari ug sa mga anak sa Israel.”—Buh. 9:15; Roma 1:1, 5; Gal. 1:16.
“Ang Panahon nga Ilabinang Dalawaton”
5. Unsay nagtukmod kang Pablo nga magmasiboton sa ministeryo?
5 Kon atong basahon ang Mga Buhat, atong makita ang kaisog ug kasibot ni Pablo sa ministeryo. (Buh. 13:9, 10; 17:16, 17; 18:5) Nasabtan ni Pablo ang kahinungdanon sa panahon nga siya nagkinabuhi. Siya miingon: “Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.” (2 Cor. 6:2) Balik sa tuig 537 W.K.P., kadto ang dalawatong panahon nga ang mga binihag sa Babilonya makabalik sa ilang yutang-natawhan. (Isa. 49:8, 9) Apan, unsa may gitumong ni Pablo niana? Ang konteksto motabang kanato sa pagsabot kon unsay diha sa iyang hunahuna.
6, 7. Unsang dakong kadungganan ang gihatag sa dinihogang mga Kristohanon karon, ug kinsay nakigtambayayong kanila?
6 Sa unang bahin sa iyang sulat, si Pablo naghisgot bahin sa dakong kadungganan nga gihatag kaniya ug sa iyang kaubang mga dinihogan. (Basaha ang 2 Corinto 5:18-20.) Iyang gipatin-aw nga sila gipili sa Diyos alang sa usa ka katuyoan—aron tumanon ang “ministeryo sa pagpasig-uli,” ug dasigon ang mga tawo nga ‘magpasig-uli ngadto sa Diyos.’ Kana nagpasabot sa pagpasig-uli sa maayong relasyon uban sa Diyos.
7 Sukad sa rebelyon sa Eden, ang tanang tawo nahimulag kang Jehova. (Roma 3:10, 23) Ang maong pagkabulag nagbanlod sa katawhan sa espirituwal nga kangitngitan, nga miresulta sa pag-antos ug kamatayon. “Kita nahibalo nga ang tibuok kalalangan duyog nga nagpadayon sa pag-agulo ug anaa sa kasakitan hangtod karon,” misulat si Pablo. (Roma 8:22) Apan ang Diyos mihimog mga lakang aron sa pag-awhag, nga sa pagkatinuod ‘pagpakiluoy,’ sa mga tawo aron sila mobalik, o mapasig-uli kaniya. Kana ang ministeryo nga gipiyal kang Pablo ug sa iyang kaubang mga dinihogan kaniadto. Ang ‘panahon nga dalawaton’ mahimong “adlaw sa kaluwasan” alang niadtong nagtuo kang Jesus. Ang tanang dinihogang Kristohanon ug ilang mga kauban, ang “ubang mga karnero,” nga nakigtambayayong kanila, padayong nagdapit sa mga tawo aron makabenepisyo sa ‘panahon nga dalawaton.’—Juan 10:16.
8. Nganong talagsaon kaayo ang pag-awhag nga magpasig-uli sa Diyos?
8 Talagsaon kaayo ang pag-awhag nga magpasig-uli sa Diyos kay bisag ang tawo maoy nagrebelde sa Eden, ang Diyos mismo ang nangitag paagi aron mapasig-uli ang maayong relasyon. (1 Juan 4:10, 19) Unsay iyang gihimo? Si Pablo mitubag: “Ang Diyos pinaagi kang Kristo nagpasig-uli sa usa ka kalibotan ngadto sa iyang kaugalingon, nga wala magaisip ngadto kanila sa ilang mga kalapasan, ug iyang gitugyan ang pulong sa pagpasig-uli nganhi kanamo.”—2 Cor. 5:19; Isa. 55:6.
9. Unsay gibuhat ni Pablo aron ipakita ang iyang apresasyon sa kaluoy sa Diyos?
9 Pinaagi sa pagtagana sa halad lukat, gipahinabo ni Jehova nga kadtong magpasundayag ug pagtuo mapasaylo sa ilang kalapasan ug mapasig-uli ang maayong relasyon kaniya. Dugang pa, siya nagpadalag mga mensahero aron awhagon ang tanang tawo nga makig-uli kaniya samtang posible pa. (Basaha ang 1 Timoteo 2:3-6.) Kay nakasabot sa kabubut-on sa Diyos ug sa panahon nga siya nagkinabuhi, si Pablo nagmakugihon sa “ministeryo sa pagpasig-uli.” Ang kabubut-on ni Jehova wala mausab. Siya nag-awhag gihapon niana karon. Ang mga pulong ni Pablo nga “karon mao na ang panahon nga ilabinang dalawaton” ug “karon mao na ang adlaw sa kaluwasan” mapadapat hangtod karon. Pagkamaluluy-on ug pagkamabination nga Diyos si Jehova!—Ex. 34:6, 7.
Ayawg ‘Sipyata ang Katuyoan Niini’
10. Unsay kahulogan sa “adlaw sa kaluwasan” alang sa dinihogang mga Kristohanon, kaniadto ug karon?
10 Ang unang nakabenepisyo sa kahigayonan nga mapasig-uli sa Diyos mao kadtong “nahiusa kang Kristo.” (2 Cor. 5:17, 18) Para kanila, “ang adlaw sa kaluwasan” nagsugod sa Pentekostes 33 K.P. Sukad niadto, sila gipiyalan sa buluhaton sa pagmantala sa “pulong sa pagpasig-uli.” Karon, ang nanghibilin sa dinihogang mga Kristohanon padayong nagtuman sa “ministeryo sa pagpasig-uli.” Ilang giila nga ang upat ka manulonda nga nakita ni apostol Juan sa iyang panan-awon “hugot nga nagkupot sa upat ka hangin sa yuta, aron walay hanging mohuyop sa yuta.” Busa, ang “adlaw sa kaluwasan” ug ang “panahon nga ilabinang dalawaton” nagpadayon hangtod karon. (Pin. 7:1-3) Tungod niini, sukad sa sayong bahin sa ika-20ng siglo, ang dinihogang nanghibilin masibotong nagtuman sa “ministeryo sa pagpasig-uli” hangtod sa kinalay-ang bahin sa yuta.
11, 12. Sa nagsingabot ang ika-20ng siglo, sa unsang paagi gipakita sa dinihogang mga Kristohanon nga sila nakasabot sa pagkadinalian sa panahon? (Tan-awa ang hulagway sa panid 15.)
11 Pananglitan, sumala sa librong Mga Saksi ni Jehova—Mga Magmamantala sa Gingharian sa Diyos, sa nagsingabot ang ika-20ng siglo, “Si C. T. Russell ug ang iyang mga kauban nagtuo gayod nga sila anaa na sa panahon sa ting-ani ug nga ang katawhan kinahanglang makadungog sa nagahatag-kagawasan nga kamatuoran.” Unsay ilang gihimo bahin niana? Kay nakaamgo nga panahon na kadto sa ting-ani—“panahon nga ilabinang dalawaton”—gibati sa maong mga brader nga dili igo ang pagdapit sa mga tawo sa pagtambong sa relihiyosong mga serbisyo. Ang klero sa Kakristiyanohan dugay nang naghimo niana. Hinunoa, ang maong mga dinihogan nangitag praktikal nga mga paagi sa pagpakaylap sa maayong balita. Ug ilang gigamit ang bag-ong teknolohiya aron sa pagpauswag sa ilang buluhaton.
12 Aron mapakaylap ang maayong balita sa Gingharian, ang maong gamayng grupo sa masibotong mga ministro naggamit ug mga tract, pulyeto, magasin, ug libro. Sila nagsulat usab ug mga sermon ug mga artikulo alang sa libolibo ka mantalaan. Ilang gisibya sa nasyonal ug internasyonal nga mga estasyon sa radyo ang mga programa nga base sa Kasulatan. Sila naggama ug nagpasalidag mga pelikula nga may rekording sa tingog, nga wala pa mahimo niadto sa industriya sa pelikula. Unsay resulta sa ilang kasibot? Karon, may kapin sa pito ka milyong tawo nga misanong ug miduyog sa pagmantala sa mensahe: “Magpasig-uli kamo ngadto sa Diyos.” Sa pagkatinuod, kadtong karaang mga alagad ni Jehova maayong mga ehemplo sa kasibot bisan pa sa limitadong kahimtang.
13. Unsang katuyoan sa Diyos ang angay natong hunahunaon?
13 Ang gisulti ni Pablo nga “karon mao na ang panahon nga ilabinang dalawaton” tinuod gihapon. Kitang nakasinati sa dili-takos nga kalulot ni Jehova mapasalamaton nga gihatagan kitag kahigayonan nga makadungog ug makadawat sa mensahe sa pagpasig-uli. Imbes makontento lang sa kaugalingon, atong hunahunaon ang sunod nga giingon ni Pablo: “Kami nangaliyupo usab kaninyo nga dili dawaton ang dili-takos nga kalulot sa Diyos ug sipyaton ang katuyoan niini.” (2 Cor. 6:1) Ang katuyoan sa dili-takos nga kalulot sa Diyos mao ang ‘pagpasig-uli sa kalibotan ngadto sa iyang kaugalingon’ pinaagi ni Kristo.—2 Cor. 5:19.
14. Unsang positibong pagsanong ang nagakahitabo diha sa daghang nasod?
14 Ang kadaghanan sa katawhan, nga gibutaan ni Satanas, nahimulag gihapon sa Diyos ug wala mahibalo sa katuyoan sa dili-takos nga kalulot sa Diyos. (2 Cor. 4:3, 4; 1 Juan 5:19) Apan tungod sa nagkagrabeng kahimtang sa kalibotan, daghan ang misanong sa dihang gipasabot kanila nga ang pagkanahimulag sa Diyos mao ang hinungdan sa tawhanong pagkadaotan ug pag-antos. Bisan sa mga nasod diin ang kadaghanan walay pagtagad sa atong pagsangyaw, daghan karon ang nagdawat sa maayong balita ug nagbag-o sa ilang kinabuhi aron mapasig-uli sa Diyos. Nan, ato bang nasabtan nga karon mao na ang panahon nga kita mas magmasiboton sa pag-awhag: “Magpasig-uli kamo ngadto sa Diyos”?
15. Imbes magsangyaw lamang ug mensahe nga makapagaan sa pagbati sa mga tawo, unsay gusto nato nga ilang mahibaloan?
15 Ang atong buluhaton dili maoy pagsulti lamang sa mga tawo nga kon modangop sila sa Diyos, siya motabang kanila sa ilang mga problema ug sa ingon mogaan ang ilang pagbati. Kana lamang ang tuyo sa kadaghanan sa pag-adto sa simbahan, ug ang mga simbahan interesado sab sa pagtagbaw sa maong tinguha. (2 Tim. 4:3, 4) Dili kana ang tumong sa atong ministeryo. Ang maayong balita nga atong ginasangyaw mao nga si Jehova, tungod sa iyang gugma, andam mopasaylo sa mga kalapasan pinaagi kang Kristo. Busa, ang mga indibiduwal mapasig-uli na sa Diyos. (Roma 5:10; 8:32) Apan “ang panahon nga ilabinang dalawaton” duol nang matapos.
“Magmainiton sa Espiritu”
16. Unsay nakatabang kang Pablo nga mahimong maisogon ug masiboton?
16 Nan, sa unsang paagi nato maugmad ug mahuptan ang kasibot alang sa matuod nga pagsimba? Lagmit ang pipila maulawon o hilomon ug sila malisdan tingali sa pagpakighigala. Apan, maayong hinumdoman nga ang kasibot dili lamang pagpakitag emosyon o kaukyab; ni magdepende kini sa personalidad sa usa ka tawo. Gipakita ni Pablo kon sa unsang paagi maugmad ug mahuptan ang kasibot sa dihang gidasig niya ang iyang isigka-Kristohanon: “Magmainiton sa espiritu.” (Roma 12:11) Ang espiritu ni Jehova nakatabang sa apostol aron siya makabatog kaisog ug makalahutay sa pagsangyaw. Sukad sa pagtawag ni Jesus kaniya hangtod sa iyang kataposang pagkabilanggo ug pagkamartir sa Roma—kapig 30 ka tuig—wala mausab ang kasibot ni Pablo. Siya kanunayng nagsalig sa Diyos, nga pinaagi sa espiritu naghatag kang Pablo sa gikinahanglang kusog. “Sa tanang butang ako adunay kusog pinaagi kaniya nga naghatag ug gahom kanako,” siya miingon. (Filip. 4:13) Makabenepisyo gayod kita kon atong sundogon ang iyang panig-ingnan!
17. Sa unsang paagi kita ‘magmainiton sa espiritu’?
17 Ang pulong nga gihubad “magmainiton” sa literal nagkahulogang “nagbukal.” (Kingdom Interlinear) Aron padayong magbukal ang tubig sa takori, kinahanglan ang padayong suplay sa kainit. Sa susama, aron “magmainiton sa espiritu,” kinahanglan nato ang padayong pag-agos sa balaang espiritu. Aron mabatonan kana, atong pahimuslan ang tanang tagana ni Jehova sa pagpalig-on kanato sa espirituwal. Nagpasabot kana nga seryosohon nato ang pagsimba sa pamilya ug sa kongregasyon—nga mahimong regular sa personal ug sa pamilyahanong pagtuon, pag-ampo, ug sa pagtambong sa mga tigom uban sa isigka-Kristohanon. Kana motabang kanato nga makabaton sa “kalayo” aron magpadayon ang “pagbukal,” ug sa ingon kita kanunayng ‘magmainiton sa espiritu.’—Basaha ang Buhat 4:20; 18:25.
18. Ingong dedikadong mga Kristohanon, unsa ang tumong nga angay natong isentro ang atong hunahuna?
18 Ang usa ka dedikadong tawo nagsentro sa iyang hunahuna sa usa ka tumong ug dili daling malinga o mawad-ag kadasig sa pagkab-ot niana. Ingong dedikadong mga Kristohanon, ang atong tumong mao ang pagbuhat sa kabubut-on ni Jehova, sama sa gibuhat ni Jesus. (Heb. 10:7) Karon, kabubut-on ni Jehova nga kutob sa mahimo daghan ang mapasig-uli kaniya. Busa, kinahanglang magmasiboton kita—sama kang Jesus ug Pablo—niining labing importante ug dinalian kaayong buluhaton karon.
Nahinumdom Ka Ba?
• Unsang buluhaton ang gipiyal kang Pablo ug sa ubang dinihogan?
• Sa unsang paagi gipahimuslan sa dinihogang nahibilin “ang panahon nga ilabinang dalawaton”?
• Sa unsang paagi ang Kristohanong mga ministro “magmainiton sa espiritu”?
[Hulagway sa panid 12]
Si Pablo wala gayod malimot sa milagrosong pagpakigsulti ni Jesu-Kristo kaniya