Laom Kang Jehova, ug Magmaisogon

“Laom kang Jehova; magmaisogon ka ug lig-ona ang imong kasingkasing. Oo, laom kang Jehova.”—SALMO 27:14.

 1. Unsa ka hinungdanon ang paglaom, ug sa unsang paagi gigamit ang maong termino diha sa Kasulatan?

ANG tinuod nga paglaom sama sa usa ka hayag nga suga. Kini motabang kanato sa paglantaw saylo sa presenteng mga pagsulay ug sa pag-atubang sa umaabot nga maisogon ug malipayon. Si Jehova lamang ang makahatag kanato ug seguradong paglaom, nga iyang gitagana pinaagi sa iyang inspiradong Pulong. (2 Timoteo 3:16) Gani, ang mga pulong nga “paglaom,” “naglaom,” ug “nagalaom” makita ug kapin sa 160 ka beses diha sa Bibliya ug nagtumong sa mahinamon ug seguradong pagpaabot sa usa ka maayong butang ug nagtumong usab sa butang nga gipaabot.a Ang maong paglaom mas labaw pa kay sa usa ka pangandoy lamang, nga lagmit walay pasukaranan o posibilidad nga matuman.

 2. Sa unsang paagi ang paglaom nakaapektar sa kinabuhi ni Jesus?

² Sa dihang nag-atubang sa mga pagsulay ug mga kalisdanan, si Jesus milantaw saylo sa presenteng kahimtang ug naglaom kang Jehova. “Tungod sa kalipay nga gibutang sa iyang atubangan siya nag-antos sa estaka sa pagsakit, nga wala igsapayan ang kaulaw, ug milingkod sa tuong kamot sa trono sa Diyos.” (Hebreohanon 12:2) Tungod kay ang iyang pagtagad nasentro pag-ayo sa palaaboton nga mabindikar ang pagkasoberano ni Jehova ug mabalaan ang Iyang ngalan, si Jesus wala gayod motipas sa iyang dalan sa pagkamasinugtanon ngadto sa Diyos, bisan unsa pay iyang giantos.

 3. Sa unsang paagi ang paglaom nakaapektar sa kinabuhi sa mga alagad sa Diyos?

³ Gihisgotan ni Haring David ang kalambigitan tali sa paglaom ug kaisog, nga nag-ingon: “Laom kang Jehova; magmaisogon ka ug lig-ona ang imong kasingkasing. Oo, laom kang Jehova.” (Salmo 27:14) Kon buot nato nga magmalig-on ang atong kasingkasing, kinahanglang dili gayod nato tugotan nga malubog ang atong paglaom kondili huptan kining tin-aw kanunay sa hunahuna ug pakamahalon. Ang pagbuhat niana motabang kanato sa pagsundog kang Jesus sa pagpakitag kaisog ug kasibot samtang kita nakigbahin sa buluhaton nga iyang gisugo sa iyang mga tinun-an nga buhaton. (Mateo 24:14; 28:19, 20) Sa pagkatinuod, ang paglaom gihisgotan duyog sa pagtuo ug gugma ingong usa ka hinungdanon, dumalayon nga hiyas nga maoy timailhan sa kinabuhi sa mga alagad sa Diyos.—1 Corinto 13:13.

Ikaw ba ‘Nagmadagayaon sa Paglaom’?

 4. Sa unsa nga ang dinihogang mga Kristohanon ug ang ilang kauban nga “ubang mga karnero” maikagong nagpaabot?

⁴ Ang katawhan sa Diyos adunay maanindot nga kaugmaon sa ilang atubangan. Ang dinihogang mga Kristohanon mahinamong nagpaabot sa pag-alagad uban kang Kristo didto sa langit, samtang ang “ubang mga karnero” naglaom nga “ipagawas gikan sa pagkaulipon sa pagkadunot ug makabaton sa mahimayaong kagawasan sa [yutan-ong] mga anak sa Diyos.” (Juan 10:16; Roma 8:19-21; Filipos 3:20) Kanang “mahimayaong kagawasan” naglakip sa pagkaluwas gikan sa sala ug sa daotang mga sangpotanan niini. Sa pagkatinuod, si Jehova—ang Maghahatag sa “matag maayong gasa ug matag hingpit nga regalo”—mohatag sa kinamaayohang gasa lamang ngadto sa nagmaunongon kaniya.—Santiago 1:17; Isaias 25:8.

 5. Sa unsang paagi kita “modagaya sa paglaom”?

⁵ Unsa ka dako ang angay nga mahimong epekto sa Kristohanong paglaom diha sa atong kinabuhi? Sa Roma 15:13, atong mabasa: “Hinaot nga ang Diyos nga nagahatag ug paglaom magpuno kaninyo sa tanang kalipay ug kalinaw pinaagi sa inyong pagpanuo, aron kamo modagaya sa paglaom uban ang gahom sa balaang espiritu.” Oo, ang paglaom ikatandi, dili sa usa ka kandila diha sa mangiob nga dapit, kondili sa hayag nga mga bidlisiw sa adlaw panahon sa kabuntagon, nga tungod niana ang kinabuhi sa usa matugob sa kalinaw, kalipay, katuyoan, ug kaisog. Matikdi nga kita “modagaya sa paglaom” kon kita motuo sa sinulat nga Pulong sa Diyos ug makadawat sa iyang balaang espiritu. Nag-ingon ang Roma 15:4: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” Busa pangutan-a ang imong kaugalingon: ‘Gihuptan ba nakong hayag ang akong paglaom pinaagi sa pagkahimong maayong estudyante sa Bibliya, nga nagabasa niana adlaw-adlaw? Subsob ba akong nag-ampo alang sa espiritu sa Diyos?’—Lucas 11:13.

 6. Aron mahuptang sanag ang atong paglaom, unsay angay natong bantayan?

⁶ Si Jesus, nga atong Ehemplo, napalig-on gayod sa Pulong sa Diyos. Pinaagi sa pagpalandong sa iyang panig-ingnan, dili ‘kapoyon ug maluya ang atong mga kalag.’ (Hebreohanon 12:3) Makataronganon lamang nga kon ang atong hinatag-sa-Diyos nga paglaom mongitngit na diha sa atong hunahuna ug kasingkasing o kon kita malinga—tingali sa materyal nga mga butang o sa sekular nga mga tumong—sa dili madugay kita kapoyon sa espirituwal, ug sa ngadtongadto mosangpot kini sa pagkawala sa moral nga kalig-on ug kaisog. Niana nga tinamdan, basin makasinati pa gani kita ug “pagkalunod labot sa [atong] pagtuo.” (1 Timoteo 1:19) Sa laing bahin, ang tinuod nga paglaom magpalig-on sa atong pagtuo.

Paglaom—Hinungdanon sa Pagtuo

 7. Sa unsang paagi ang paglaom hinungdanon sa pagtuo?

⁷ “Ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita,” nag-ingon ang Bibliya. (Hebreohanon 11:1) Busa, ang paglaom dili lamang gamay nga bahin sa pagtuo; kini maoy hinungdanong bahin sa pagtuo. Tagda si Abraham. Sa tawhanong panglantaw, siya ug ang iyang asawa nga si Sara, lapas na sa panuigon nga manganak sa dihang si Jehova nagsaad kanila ug manununod. (Genesis 17:15-17) Unsay reaksiyon ni Abraham? “Bisan tuod dili na malaoman, apan pinasukad sa paglaom siya nagbatog pagtuo, nga siya mahimong amahan sa daghang kanasoran.” (Roma 4:18) Oo, ang hinatag-sa-Diyos nga paglaom ni Abraham naghatag ug lig-ong pasukaranan sa iyang pagtuo nga siya makabaton ug anak. Tungod niini, ang iyang pagtuo nagpalig-on sa iyang paglaom ug naghimo niana nga mas masanagon pa. Aw, si Abraham ug Sara nakabaton gani ug kaisog nga mobiya sa ilang panimalay ug sa ilang mga paryente ug magpuyo diha sa mga tolda sa langyawng yuta sa tibuok nilang kinabuhi!

 8. Sa unsang paagi ang matinumanong paglahutay magpalig-on sa paglaom?

⁸ Nahuptan ni Abraham nga masanag ang iyang paglaom pinaagi sa bug-os nga pagkamasinugtanon kang Jehova, bisan sa dihang ang pagbuhat niana lisod kaayo. (Genesis 22:2, 12) Sa samang paagi, pinaagi sa atong pagkamasinugtanon ug paglahutay diha sa pag-alagad kang Jehova, kita makasalig nga atong madawat ang atong ganti. “Ang paglahutay,” misulat si Pablo, moresulta sa “usa ka inuyonang kahimtang,” nga, sa baylo, magpatunghag paglaom, “ug ang paglaom dili motultol sa pagkahigawad.” (Roma 5:4, 5) Maoy hinungdan nga si Pablo misulat usab: “Kami nagtinguha nga ang matag usa kaninyo magpakita sa samang kakugi aron makabaton sa bug-os nga pagsalig sa paglaom hangtod sa kataposan.” (Hebreohanon 6:11) Ang maong positibong panglantaw, nga gipasukad sa suod nga relasyon kang Jehova, makatabang kanato sa pag-atubang sa bisan unsang kalisdanan nga maisogon ug malipayon.

“Magmaya Diha sa Paglaom”

 9. Unsay atong buhaton nga regular nga makatabang kanato sa ‘pagmaya diha sa paglaom’?

⁹ Ang atong hinatag-sa-Diyos nga paglaom labaw pa gayod sa bisan unsa nga ikatanyag sa kalibotan. Ang Salmo 37:34 nag-ingon: “Laom kang Jehova ug bantayi ang iyang dalan, ug siya magabayaw kanimo aron sa pagpanag-iya sa yuta. Sa dihang pagalaglagon ang mga daotan, ikaw makakita niana.” Oo, kita may katarongan gayod nga “magmaya diha sa paglaom.” (Roma 12:12) Apan, aron mahimo kana kinahanglang hunahunaon nato kanunay ang atong paglaom. Kanunay ka bang mamalandong bahin sa imong hinatag-sa-Diyos nga paglaom? Makita ba nimo ang imong kaugalingon sa Paraiso, nga himsog ug panglawas, walay mga kabalaka, gilibotan sa mga tawo nga imong gimahal, ug nakigbahin sa makapatagbaw gayod nga buluhaton? Namalandong ka ba labot sa mga esena sa Paraiso nga gipakita diha sa atong mga publikasyon? Ang maong regular nga pagpamalandong ikatandi nato sa paglimpiyo sa bentana diin ang usa makalantaw sa usa ka maanindot nga talan-awon. Kon dili nato limpiyohan ang salamin niana, sa dili madugay dili na nato maklaro ang maanindot nga talan-awon tungod sa kahugaw niana. Dayon ang ubang mga butang mahimong makadani sa atong pagtagad. Hinaot nga dili gayod nato tugotan nga mahitabo kana!

10. Nganong ang atong pagpaabot sa ganti magpakita nga kita adunay suod nga relasyon kang Jehova?

¹⁰ Siyempre, ang atong pangunang rason sa pag-alagad kang Jehova mao ang atong gugma kaniya. (Marcos 12:30) Bisan pa niana, angay nga kita mahinamong magpaabot sa ganti. Sa pagkatinuod, gidahom ni Jehova nga buhaton nato kana! Ang Hebreohanon 11:6 nag-ingon: “Kon walay pagtuo imposible ang pagpahimuot kaniya, kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” Nganong gusto man ni Jehova nga isipon nato siya ingong Tigganti? Tungod kay kon buhaton nato kana, atong gipakita nga kita nakaila kaayo sa atong langitnong Amahan. Siya manggihatagon, ug siya nahigugma sa iyang mga anak. Hunahunaa kon unsa kita ka masulub-on ug ka daling mahigawad kon kita walay “kaugmaon ug paglaom.”—Jeremias 29:11.

11. Sa unsang paagi ang iyang hinatag-sa-Diyos nga paglaom nakatabang kang Moises sa paghimog maalamong mga desisyon?

¹¹ Ang usa ka talagsaong panig-ingnan sa usa nga nagsentro gayod sa iyang pagtagad diha sa iyang hinatag-sa-Diyos nga paglaom mao si Moises. Ingong “anak sa anak nga babaye ni Paraon,” magamit unta ni Moises ang iyang gahom, pagkainila, ug bahandi sa Ehipto. Mangagpas ba siya niining mga butanga, o moalagad ba siya kang Jehova? Si Moises maisogong mipili sa naulahi. Ngano? Tungod kay siya “nagtutok man ngadto sa pagbayad sa ganti.” (Hebreohanon 11:24-26) Oo, si Moises nagpabili gayod sa paglaom nga gibutang ni Jehova sa iyang atubangan.

12. Nganong ang Kristohanong paglaom sama sa usa ka helmet?

¹² Gitandi ni apostol Pablo ang paglaom sa usa ka helmet. Ang atong mahulagwayong helmet manalipod sa atong gahom sa pagsabot, nga motabang kanato sa paghimog maalamong mga desisyon, paghimog hustong mga prioridad, ug paghupot sa integridad. (1 Tesalonica 5:8) Gisul-ob ba nimo kanunay ang imong mahulagwayong helmet? Nan, kon mao, sama kang Moises ug Pablo, imong gibutang ang imong paglaom “dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.” Tinuod, ang dili pagsunod sa kon unsay uso pinaagi sa pagsalikway sa hakog nga mga pangagpas nagkinahanglag kaisog, apan takos kana sa paningkamot! Sa pagkatinuod, nganong modawat ug lain pa gawas sa “tinuod nga kinabuhi,” nga gitagana niadtong naglaom ug nahigugma kang Jehova?—1 Timoteo 6:17, 19.

“Dili Ko Gayod Ikaw Pagabiyaan”

13. Unsay pasalig ni Jehova sa iyang maunongong mga alagad?

¹³ Ang mga tawo nga nagbutang sa ilang paglaom sa presenteng sistema sa mga butang mahadlok maghunahuna bahin sa makalilisang nga mga butang nga ilang atubangon samtang ang kalibotan nag-antos sa nagkagrabeng “mga kaul-ol sa kasakit.” (Mateo 24:8) Apan kadtong naglaom kang Jehova dili mobati nianang matanga sa kahadlok. Sila magpadayon sa ‘pagpuyo sa kasegurohan ug dili matugaw sa kalisang sa katalagman.’ (Proverbio 1:33) Tungod kay wala nila ibutang ang ilang paglaom sa presenteng sistema, sila malipayong nagsunod sa tambag ni Pablo: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay siya nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’”—Hebreohanon 13:5.

14. Nganong ang mga Kristohanon dili kinahanglang maghinobra ka mabalak-on bahin sa ilang materyal nga mga panginahanglan?

¹⁴ ‘Dili gayod,’ “ni sa bisan unsang paagi”—kining puwersadong mga ekspresyon klarong nagpakita nga ang Diyos mag-atiman kanato. Gipasaligan usab kita ni Jesus sa mahigugmaong kabalaka sa Diyos, nga nag-ingon: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang [ang materyal nga mga kinahanglanon sa kinabuhi] igadugang ra kaninyo. Busa, ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka.” (Mateo 6:33, 34) Nahibalo si Jehova nga malisdan kita sa pagkahimong masiboton alang sa iyang Gingharian ug sa samang higayon bug-os nga moabaga sa responsibilidad sa pagtagana sa atong pisikal nga mga panginahanglan. Busa mosalig kita sa iyang katakos ug tinguha sa pag-atiman sa atong mga panginahanglan.—Mateo 6:25-32; 11:28-30.

15. Sa unsang paagi ang mga Kristohanon makahupot ug ‘yanong mata’?

¹⁵ Gipakita nato ang atong pagsalig kang Jehova kon atong huptan ang ‘yanong mata.’ (Mateo 6:22, 23) Ang yanong mata sinsero, putli ug motibo, ug walay kadalo ug hakog nga ambisyon. Ang paghupot ug yanong mata wala magpasabot ug pagkinabuhi sa tumang kakabos o pagpasagad sa atong Kristohanong responsibilidad sa pag-atiman sa atong pisikal nga mga panginahanglan. Hinunoa, kini nagpasabot ug pagpakitag “maayong panghunahuna” samtang ginauna nato ang pag-alagad kang Jehova.—2 Timoteo 1:7.

16. Nganong gikinahanglan ang pagtuo ug kaisog aron sa paghupot ug yanong mata?

¹⁶ Ang paghupot ug yanong mata nagkinahanglag pagtuo ug kaisog. Pananglitan, kon ang usa ka amo moinsistir nga regular kang motrabaho sa panahon nga gieskedyul alang sa Kristohanong mga tigom, maisogon ka bang mosunod sa imong espirituwal nga mga prioridad? Kon ang usa ka tawo nagduhaduha nga tumanon ni Jehova ang Iyang saad nga atimanon ang Iyang mga alagad, nan dugangan lamang ni Satanas ang pagpit-os ug kanang tawhana basin mohunong na gayod sa pagtambong sa mga tigom. Oo, ang atong kakulang ug pagtuo magtugot kang Satanas sa pagkontrolar kanato aron nga siya, dili si Jehova, ang maghimo sa atong mga prioridad. Pagkamakapasubo unya niana!—2 Corinto 13:5.

“Laom Kang Jehova”

17. Sa unsang paagi kadtong nagasalig kang Jehova gipanalanginan bisan karon?

¹⁷ Ang Kasulatan subli-subling nagpakita nga kadtong nagalaom ug nagasalig kang Jehova dili gayod mapakyas. (Proverbio 3:5, 6; Jeremias 17:7) Tinuod, may mga panahon nga sila magmakontento tingali sa diyutay lang nga materyal nga mga butang, apan ilang giisip kini ingong gamay nga sakripisyo kon itandi sa mga panalangin nga giandam alang kanila. Sa ingon ilang gipakita nga sila ‘naglaom kang Jehova’ ug masaligon nga sa ngadtongadto iyang ihatag sa mga nagmaunongon kaniya ang tanang matarong nga mga tinguha sa ilang kasingkasing. (Salmo 37:4, 34) Busa, sila tinuod nga malipayon bisan karon. “Ang pagdahom sa mga matarong maoy paglipay, apan ang paglaom sa mga daotan mahanaw.”—Proverbio 10:28.

18, 19. (a) Unsang mahigugmaong pasalig ang gihatag ni Jehova kanato? (b) Sa unsang paagi mahuptan nato si Jehova diha sa atong “tuong kamot”?

¹⁸ Sa dihang ang usa ka batang lalaki maglakaw uban sa iyang amahan nga naghawid sa kamot niini, siya mobating luwas ug may kasegurohan. Mao usab kanay atong bation samtang kita maglakaw uban sa atong langitnong Amahan. “Ayaw kahadlok,” miingon si Jehova sa Israel, “kay ako uban kanimo. . . . Ako sa pagkatinuod magatabang kanimo. . . . Kay ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”—Isaias 41:10, 13.

¹⁹ Pagkamahigugmaon ang maong paglarawan—si Jehova nagahawid sa imong kamot! “Si Jehova gibutang ko sa kanunay sa akong atubangan,” misulat si David. “Tungod kay ania siya sa akong tuong kamot, ako dili matarog.” (Salmo 16:8) Sa unsang paagi mahuptan nato si Jehova diha sa atong “tuong kamot”? Labing menos adunay duha ka paagi. Ang una, tugotan nato ang iyang Pulong nga mogiya kanato sa matag bahin sa atong kinabuhi; ug ikaduha, kita makalantaw sa mahimayaong ganti nga gibutang ni Jehova sa atong atubangan. Ang salmistang si Asap miawit: “Ako nagauban kanunay kanimo; gikuptan mo ang akong tuong kamot. Pinaagi sa imong tambag pagatultolan mo ako, ug sa ulahi dad-on mo ako sa himaya.” (Salmo 73:23, 24) Tungod sa maong pasalig, kita makaatubang gayod sa umaabot nga masaligon.

“Ang Inyong Kaluwasan Nagakaduol Na”

20, 21. Unsang kaugmaon ang naghulat niadtong nagalaom kang Jehova?

²⁰ Sa kada adlaw nga molabay, nag-anam ka dinalian nga huptan nato si Jehova diha sa atong tuong kamot. Sa dili madugay, sugod sa paglaglag sa bakak nga relihiyon, ang kalibotan ni Satanas makasinatig kasakit nga wala pa gayod masinati niini sukad. (Mateo 24:21) Ang dili-matinuohong katawhan mobatig hilabihang kahadlok. Apan, sulod nianang gubot nga panahon, ang maisogong mga alagad ni Jehova magmaya sa ilang paglaom! “Inigsugod pagkahitabo niining mga butanga,” miingon si Jesus, “tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.”—Lucas 21:28.

²¹ Busa magmaya kita sa atong hinatag-sa-Diyos nga paglaom ug dili magpalimbong o magpatental sa mga kabaldahan nga maabtikong gigamit ni Satanas. Sa samang panahon, maningkamot kita sa pag-ugmad sa pagtuo, gugma, ug diyosnong kahadlok. Sa pagbuhat niana, makabaton kitag kaisog sa pagsugot kang Jehova ilalom sa tanang sirkumstansiya ug sa pagsukol sa Yawa. (Santiago 4:7, 8) Oo, “magmaisogon kamo, ug magmalig-on unta ang inyong kasingkasing, kamong tanan nga nagahulat kang Jehova.”—Salmo 31:24.

[Footnote]

Makatubag Ka Ba?

• Sa unsang paagi ang paglaom ni Jesus nakatabang sa pagpatungha sa iyang kaisog?

• Sa unsang paagi ang pagtuo ug paglaom nalangkit sa usag usa?

• Sa unsang paagi ang paglaom ug pagtuo makahatag sa usa ka Kristohanon ug kaisog sa paghimog maayong mga prioridad sa kinabuhi?

• Nganong kadtong ‘nagalaom kang Jehova’ makalantaw sa umaabot nga masaligon?

[Hulagway sa panid 28]

Bata man o tigulang, makita ba nimo ang imong kaugalingon sa Paraiso?