PINADAYAG

Ang Gregong pulong (a·po·kaʹly·psis) nga gihubad nga pinadayag o pagpadayag nagtumong sa “usa ka pagbutyag” ug sagad gigamit maylabot sa mga pagpadayag sa espirituwal nga mga butang o sa kabubut-on ug mga katuyoan sa Diyos. (Luc 2:32; 1Co 14:​6, 26; 2Co 12:​1, 7; Gal 1:12; 2:2; Efe 1:17; Pin 1:1; Int) Tungod sa paglihok sa espiritu sa Diyos nahimo ang maong mga pinadayag. Mahitungod sa pagpadayag sa “sagradong tinago,” si apostol Pablo misulat: “Sa ubang mga kaliwatan kini nga tinago wala ipahibalo ngadto sa mga anak sa mga tawo ingon sa pagkapadayag niini karon ngadto sa iyang balaang mga apostoles ug mga manalagna pinaagi sa espiritu, nga mao, nga ang katawhan sa kanasoran mahimong kaubang mga manununod ug kaubang mga sangkap sa lawas ug mga mag-aambit uban kanato sa saad nga nahiusa kang Kristo Jesus pinaagi sa maayong balita.”​—Efe 3:1-6; Rom 16:25.

Ang basahon sa Mga Buhat kusganong nagpamatuod nga kini nga pagpadayag sa sagradong tinago nahitabo tungod sa paglihok sa espiritu sa Diyos. Ubos sa pagtultol sa espiritu sa Diyos nga si Pedro, Pablo, ug Bernabe miwali ngadto sa mga dili-Hudiyo. Ang dili-Hudiyo nga mga magtutuo, ang “katawhan sa kanasoran,” nakadawat sa balaang espiritu samtang dili-tinuli, sa ingon nahimong usa ka katawhan alang sa ngalan sa Diyos. (Buh 10:9-48; 13:2-4) Ang manalagnang si Amos, ubos sa pag-inspirar, nagtagna niini ug, sa unang siglo K.P., ang katumanan sa iyang tagna nadayag pinaagi sa paglihok sa espiritu sa Diyos.​—Buh 15:7-20; itandi ang Am 9:​11, 12, LXX.

Ang Bibliya naghisgot usab bahin sa “pagpadayag sa matarong nga paghukom sa Diyos” (Rom 2:5), “sa pagpadayag sa mga anak sa Diyos” (Rom 8:19), ug sa ‘pagpadayag ni Jesu-Kristo’ ug “sa iyang himaya.” (1Pe 1:13; 4:13) Ang pagtagad sa konteksto ug sa kaamgid nga mga teksto motabang sa pagtino kon kanus-a nahitabo ang maong mga pagpadayag, o mga pinadayag. Sa matag kahimtang, ang pagpadayag, o pinadayag, maoy usa ka panahon nga ang matarong nga mga tawo makadawat sa partikular nga mga ganti ug mga panalangin o ipahinabo ang kalaglagan sa mga daotan.

Pagpadayag sa mga Anak sa Diyos. Sa iyang sulat ngadto sa mga taga-Roma, gipaila ni apostol Pablo ang “mga anak” sa Diyos ingong nakadawat sa usa ka espiritu sa pagsagop. Ingong kaubang mga manununod ni Kristo, kini nga mga anak sa Diyos pagahimayaon. (Rom 8:14-18) Ang Ginoong Jesu-Kristo magausab sa ilang gipaubos nga lawas aron mahiuyon sa iyang mahimayaong lawas (Flp 3:​20, 21), ug sila magmando uban kaniya ingong mga hari. (2Ti 2:12) Busa ang “pagpadayag sa mga anak sa Diyos” nagtumong sa panahon sa dihang madayag nga sila nahimaya na gayod ug nagamando kauban ni Kristo Jesus. Ang himaya nga ipadayag kanila dako gayod kaayo nga tungod niana ang tanan nilang kanhing pag-antos sa yuta mahimong ingon lamang sa walay bili. (Rom 8:​18, 19) Kini nga pagpadayag gilakipan ug dagkong mga panalangin, kay si apostol Pablo misulat: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—Rom 8:21.

Pagpadayag sa Matarong nga Paghukom sa Diyos. Sa Roma 2:5 ang “pagpadayag sa matarong nga paghukom sa Diyos” gilangkit sa ‘adlaw sa kapungot sa Diyos.’ Busa, ang matarong nga paghukom sa Diyos ipadayag sa dihang “siya magabalos sa matag usa sumala sa iyang mga binuhatan,” kinabuhing walay kataposan niadtong milahutay sa pagbuhat kon unsay maayo ug kalaglagan niadtong nagbuhat sa pagkadili-matarong.​—Rom 2:6-8.

Pagpadayag ni Jesu-Kristo. Ang “pagpadayag ni Jesu-Kristo” ug “sa iyang himaya” maoy usa ka panahon sa pagganti sa iyang matinumanong mga sumusunod ug sa pagpahamtang ug panimalos sa dili-diyosnong mga tawo. Busa siya gipadayag ingong usa ka mahimayaong Hari, nga gihatagan ug gahom sa pagganti ug sa pagsilot. Ang Kasulatan nagpakita nga ang dinihogan sa espiritu nga mga Kristohanon nga matinumanong milahutay sa pag-antos “malipay sa hilabihan” sa pagpadayag sa himaya ni Kristo. (1Pe 4:13) Ang sinulayang kalidad sa ilang pagtuo mahimong usa ka hinungdan sa pagdayeg ug himaya ug dungog inigpadayag ni Jesu-Kristo, ug kini nga mga Kristohanon mahimong mga dumadawat sa dili-takos nga kalulot. (1Pe 1:​7, 13) Sa laing bahin, kadtong wala makaila sa Diyos ug wala magasunod sa maayong balita bahin sa Ginoong Jesus pagalaglagon sa walay kataposan, nga tungod niana makabaton ug kahupayan kadtong nakaagom ug kasakitan sa ilang mga kamot.​—2Te 1:6-10.