Ang Hunahuna sa Bibliya

Sayop Bang Magpaanyag ang mga Babaye?

“ANG mga babaye gusto kaayong mosunod sa uso,” miingon si George Simonton, usa ka beterano nga tigdisenyog sinina ug propesor sa Fashion Institute of Technology sa New York. Siya miingon: “Ang mga babaye gustong magpadayag sa ilang pagkababaye, gustong mahimong esmarte tan-awon, gustong magpaguwapa . . . Sa akong hunahuna ang pagpaanyag sa mga babaye nagpakitag pagtahod sa kaugalingon ug pagtahod sa mga tawo.” Oo, ang dayandayan dugay nang gidawat ingong paagi sa mga babaye sa pagpadayag sa ilang pagkababaye, aron moguwapa, ug aron makabaton sila ug kompiyansa sa kaugalingon.

Apan, tungod sa relihiyon, ang uban negatibo ug tinamdan bahin sa dayandayan sa mga babaye. “Ang mga babaye nga relihiyoso . . . kon . . . maanyag na daan, . . . dili na kinahanglang magpaguwapa pa, kondili maningkamot nga magpabiling simple,” misulat si Tertullian sa ikatulong siglo K.P. Mahitungod sa mga pangpaanyag sa nawong, siya nagpadayon: “Ang mga babaye makasala sa Diyos kon ilang pahiran ang ilang mga nawong ug mga krema, kon ilang butangan ug papula ang ilang mga aping, o kon ilang linyahan ang ilang mga kilay.” Ug iyang gitawag ang bulawan ug plata nga “mga pahiyas” ingong “mga gamit aron mahimong makabibihag.”

Karon, daghan gihapon ang negatibo kaayo ug tinamdan bahin sa mga dayandayan sa mga babaye. Gidid-an pa gani sa ubang mga relihiyon ang ilang mga membro sa paggamit ug bisan unsang pahiyas nga mga alahas, mek-ap, o maanindot nga mga sinina. Sayop bang magpaanyag ang Kristohanong babaye, o maningkamot siya nga magpaanyag?

Ang Hunahuna sa Diyos

Wala idetalye sa Bibliya ang bahin sa paggamit ug mga alahas ug paggamit ug mga pangpaanyag. Bisan pa niana, dunay igong ebidensiya nga nagpakita nga ang Diyos wala magdili niini o sa ubang matang sa mga dayandayan.

Pananglitan, sa naghubit sa iyang paagi sa pagpanalangin sa Jerusalem, ang Diyos naghisgot niana nga siyudad nga sama sa usa ka babaye, nga nag-ingon: “Gidayandayanan ko ikaw sa mga pahiyas . . . , ug ikaw nahimong maanyag gayod kaayo.” (Ezequiel 16:11-​13) Ang gihisgotan nga simbolikong mga pahiyas mao ang mga pulseras, kuwentas, ug ariyos. Paborableng gipanag-ing usab sa Kasulatan ang mga pahiyas nga bulawan sa usa ka “maalamong magbabadlong” kansang mga pulong gipatalinghogan sa usa ka madinawatong mamiminaw. (Proverbio 25:​1, 12) Kon dili negatibo ang paghisgot sa Kasulatan bahin sa mga pahiyas, kini nagpakita lamang nga dili supak ang Diyos nga mogamit ang mga babaye ug maanindot nga mga pahiyas aron sila moguwapa.

Ang Kristohanong mga Babaye Magpaanyag

Ang ubang mga teksto sa Bibliya direktang naghisgot bahin sa dayandayan sa mga babaye. Si apostol Pablo misulat: “Gitinguha ko nga ang mga babaye magdayandayan sa ilang kaugalingon sa mahapsay nga sinina.” Kon ang mga babaye magpaanyag nga ‘makasaranganon ug nga may maayong panghunahuna,’ mahimong nagpakita kini nga ang mga babaye nagtahod sa Diyos. (1 Timoteo 2:​9, 10) Kon ang Kristohanong mga babaye magpatahom nga makasaranganon, kini makahatag ug kadayeganan sa mga pagtulon-an sa Diyos ug sa kongregasyon.

Ang ubang mga tawo mangatarongan nga ang maong mga bersikulo nag-ingon nga ang pagpaanyag dili “pinaagi sa mga estilo sa pagsalapid sa buhok ug sa bulawan o sa mga perlas o sa mahalon kaayong sapot, kondili sa paagi nga nahiangay sa mga babaye nga nagpaila nga masimbahon sa Diyos, sa ato pa, pinaagi sa maayong mga buhat.” Nagpasabot ba kini nga ang mga babaye kinahanglang dili mangareglar sa buhok aron hapsayng tan-awon o dili magsul-ob ug mga alahas?

Dili kana maoy gipasabot; ang Bibliya walay daotang giingon bahin sa mga dayandayan. Busa imbes idili ang pipila ka pahiyas, gidasig ni Pablo ang mga babaye nga ilang tagdon pag-una ang pagdayandayan sa ilang kaugalingon ug Kristohanong mga hiyas ug maayong mga buhat.

Ang Motibo sa Pagpaanyag Hinungdanon

Si apostol Pablo nagsulat: “Dili na kita maghinukmanay sa usag usa, hinunoa himoa kini nga inyong desisyon, nga dili magbutang atubangan sa igsoon ug kapandolan o hinungdan sa pagkadagma.” (Roma 14:13) Sa unsang paagi aplikado kini sa kon unsay atong pilion nga mga dayandayan?

Una, gisultihan kita ni Pablo nga dili kita “maghinukmanay sa usag usa.” Kita kinahanglang magbantay batok sa ‘pagbutang ug kapangdolan atubangan sa igsoon.’ Ang mga sukdanan kon unsay dalawaton nagkalainlain sa matag nasod ug kultura. Kon unsay dalawaton sa usa ka panahon ug dapit tingali dili dalawaton sa lain. Dili kita angay mahimong kapangdolan o hinungdan sa pagkatugaw sa tanlag sa uban pinaagi sa paggamit ug dayandayan nga kuwestiyonable sa atong kultura. Maayong pangutan-on sa mga babayeng diyosnon ang ilang kaugalingon: Unsay panglantaw sa komunidad sa akong gisul-ob? Ang mga membro ba sa kongregasyon natugaw, naglibog, o naulaw sa akong gisul-ob? Bisan pag may katungod ang Kristohanong babaye sa pagpamesti o pagpamostura sa usa ka paagi, dili niya ipamugos ang iyang katungod kon ang iyang estilo sa pagpamostura makatugaw sa tanlag sa uban.​—1 Corinto 10:​23, 24.

Dugang pa, ang sobrang paghatag ug atensiyon sa panagway mahimong moresulta ug dili-maayong tinamdan. Diha sa kadaghanang nasod karon, may mga babaye nga magpaanyag aron lang magpaibog sa mga lalaki. Apan, likayan gayod sa Kristohanong mga babaye kini nga paagi sa pagpaanyag, ug maningkamot hinuon nga makabaton ug maayong panghunahuna ug magmaputli sa ilang personal nga mga kalihokan, “aron ang pulong sa Diyos dili mapasipalahan.”​—Tito 2:​4, 5.

Ang mga babayeng diyosnon nakasabot nga kon unsa man ugaling ang ilang pilion nga dayandayan, ang ilang tinuod nga katahom mao ang “natago nga pagkatawo sa kasingkasing” ug kini makita diha sa ilang tinamdan ug panggawi. (1 Pedro 3:​3, 4) Ang babaye nga mopilig makataronganong estilo sa iyang pamiste, sa iyang paggamit ug mga pangpaanyag sa nawong, ug alahas makabaton ug pagtahod sa uban ug makapasidungog sa iyang Maglalalang.