Palaloma pa ang Inyong Inigsoong Gugma
“Magpadayon sa paglakaw diha sa gugma, ingon nga si Kristo nahigugma usab kaninyo.”—EFE. 5:2.
1. Unsay giingon ni Jesus nga hinungdanong timailhan sa iyang mga sumusunod?
ANG pagsangyaw sa maayong balita sa Gingharian sa Diyos sa balaybalay maoy timailhan sa mga Saksi ni Jehova. Bisan pa niana, si Kristo Jesus mipili ug laing bahin sa Kristiyanidad nga magpaila sa iyang matuod nga mga tinun-an. Siya miingon: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:34, 35.
2, 3. Unsay epekto sa atong inigsoong gugma niadtong nagtambongan sa atong mga tigom?
2 Sa tawhanong katilingban walay laing nagpakitag gugma nga sama nianang sa matuod nga Kristohanong panag-igsoonay. Samag magnet, ang gugma maghiusa sa mga alagad ni Jehova ug magdani sa sinserong mga tawo ngadto sa matuod nga pagsimba. Pananglitan, tagda si Marcelino, usa ka lalaki sa Cameroon nga nabuta didto sa iyang trabahoan. Human sa iyang aksidente, mikaylap ang hulungihong nga siya nabuta tungod kay siya usa ka ungo. Inay hupayon siya, ang pastor ug ang ubang mga membro sa simbahan nagpalagpot kaniya sa ilang grupo. Sa dihang gidapit si Marcelino sa usa sa mga Saksi ni Jehova nga motambong sa tigom, siya nagpanuko. Dili niya gustong isalikway pag-usab.
3 Wala damha ni Marcelino ang nahitabo didto sa Kingdom Hall. Siya mainitong giabiabi, ug nahupayan sa mga pagtulon-an sa Bibliya nga iyang nadungog. Siya misugod pagtambong sa tanang tigom sa kongregasyon, miuswag sa iyang pagtuon sa Bibliya, ug nabawtismohan niadtong 2006. Karon siya nagpaambit sa kamatuoran ngadto sa iyang pamilya ug mga silingan ug nagdumala nag ubay-ubayng panagtuon sa Bibliya. Buot ni Marcelino nga ang iyang mga ginatun-an sa Bibliya makasinati usab sa gugma nga iyang naeksperyensiyahan taliwala sa katawhan sa Diyos.
4. Nganong angay natong sundon ang tambag ni Pablo nga “magpadayon sa paglakaw diha sa gugma”?
4 Makapadani ang atong inigsoong gugma, apan kitang tanan kinahanglang maningkamot nga magpabilin kana. Hunahunaa ang usa ka daob panahon sa mabugnaw nga kagabhion, nga makapadani sa mga tawo tungod sa kainit ug kahayag niini. Kon dili kini sugnoran, kini mapalong. Sa samang paagi, mohuyang ang talagsaong bugkos sa gugma diha sa kongregasyon kon ang tagsatagsa ka Kristohanon dili maningkamot sa pagpalig-on niana. Sa unsang paagi mahimo nato kana? Si apostol Pablo mitubag: “Magpadayon sa paglakaw diha sa gugma, ingon nga si Kristo nahigugma usab kaninyo ug nagtugyan sa iyang kaugalingon alang kaninyo ingon nga usa ka halad ug usa ka halad-nga-inihaw ngadto sa Diyos ingon nga usa ka humot nga alimyon.” (Efe. 5:2) Ang pangutana nga angay natong konsiderahon mao, Sa unsang mga paagi ako makapadayon sa paglakaw diha sa gugma?
“Kamo, Usab, Magpasangkad”
5, 6. Nganong giawhag ni Pablo ang mga Kristohanon sa Corinto nga “magpasangkad”?
5 Si apostol Pablo misulat sa mga Kristohanon sa karaang Corinto: “Ang among baba gibuka nganha kaninyo, mga taga-Corinto, ang among mga kasingkasing gipasangkad. Kamo dili hagip-ot ug luna sulod kanamo, kondili kamo hagip-ot ug luna diha sa inyong malumong mga pagmahal. Busa, agig balos—ako mosulti sama ug ngadto sa mga anak—kamo, usab, magpasangkad.” (2 Cor. 6:11-13) Nganong giawhag ni Pablo ang mga taga-Corinto sa pagpasangkad sa ilang gugma?
6 Tagda kon sa unsang paagi nagsugod ang kongregasyon sa karaang Corinto. Si Pablo miabot sa Corinto sa tinghunlak sa 50 K.P. Bisan tuod sa sinugdan dihay pipila ka tawo nga misupak sa iyang pagsangyaw, si apostol Pablo wala mohunong. Sa wala madugay, daghan diha sa maong siyudad ang mituo sa maayong balita. Sulod sa “usa ka tuig ug unom ka bulan,” si apostol Pablo naggugol sa iyang panahon sa pagtudlo ug pagpalig-on sa bag-ong kongregasyon. Klaro nga duna siyay halalom nga gugma alang sa mga Kristohanon sa Corinto. (Buh. 18:5, 6, 9-11) Daghan silag katarongan nga mahigugma ug motahod usab kaniya. Apan, ang pipila diha sa kongregasyon mipalayo kaniya. Tingali wala sila makauyon sa iyang prangka nga tambag. (1 Cor. 5:1-5; 6:1-10) Ang uban namati tingali sa pagbutangbutang sa “maayong-laki nga mga apostoles.” (2 Cor. 11:5, 6) Gusto ni Pablo nga mahalon usab siya sa tanang igsoon. Busa siya mihangyo kanila nga “magpasangkad” pinaagi sa pagpakigsuod kaniya ug sa ubang mga isigkamagtutuo.
7. Sa unsang paagi kita ‘makapasangkad’ sa pagpasundayag ug inigsoong gugma?
7 Komosta sa atong bahin? Sa unsang paagi kita ‘makapasangkad’ sa pagpasundayag ug inigsoong gugma? Ang mga indibiduwal nga managsamag edad o kagikan dali ra tingaling magkasuod. Kadtong susamag mga hilig maylabot sa kalingawan subsob nga magkauban. Apan kon kadtong parehas natog gusto ang pirme na lang natong ikauban, kita kinahanglang “magpasangkad.” Maalamong suknaon nato ang atong kaugalingon: ‘Panagsa ra ba kong makig-partner ug sangyaw o makighugoy-hugoy sa mga igsoon nga dili nako suod? Diha sa Kingdom Hall, ako bang gilimitehan ang akong pagpakig-uban niadtong bag-ong nakig-uban sa kongregasyon tungod kay naghunahuna ko nga kinahanglan pa silang maningkamot aron mahimo ko nilang higala? Pareho ba nakong timbayahon ang mga tigulang ug ang mga batabata pa sa kongregasyon?’
8, 9. Sa unsang paagi ang tambag ni Pablo sa Roma 15:7 motabang kanato sa pagpalalom sa atong inigsoong gugma?
8 Maylabot sa pagtimbaya, ang mga pulong ni Pablo sa mga taga-Roma makatabang kanato sa pag-ugmad ug hustong panglantaw sa atong mga isigkamagsisimba. (Basaha ang Roma 15:7.) Ang Gregong pulong nga gihubad dinhi ug “dawata” nagpasabot ug “pag-abiabi, pagtugot nato sa usa nga moapil sa atong grupo ug panaghigalaay.” Sa dihang ang usa ka maabiabihong tagbalay sa panahon sa Bibliya mag-abiabi sa iyang mga higala, iyang ipakita nga nalipay siya nga makita sila. Si Kristo masambingayong nag-abiabi kanato nianang paagiha, ug giawhag kita sa pagsundog kaniya diha sa atong pag-abiabi sa mga isigkamagtutuo.
9 Samtang atong timbayahon ang atong mga igsoon diha sa Kingdom Hall ug sa ubang mga dapit, mahimo kitang mogugol ug pipila ka minutos sa pagpakigsulti niadtong wala nato makita o maestorya sa miagi. Sa sunod nga tigom, atong mahimo ang susama niana ngadto sa ubang mga igsoon. Sa dili madugay, halos tanang igsoon atong maestorya. Dili kita angayng mabalaka kon dili nato maestorya ang tanan sa mao rang adlaw. Walay angayng masilo kon dili nato sila matimbaya sa matag tigom.
10. Unsang bililhong kahigayonan ang mabatonan sa tanan diha sa kongregasyon, ug sa unsang paagi bug-os natong mapahimuslan kana?
10 Ang pagtimbaya sa uban mao ang unang lakang sa pag-abiabi kanila. Mahimong motultol kana sa makalingawng mga panaghisgot ug dumalayong mga panaghigalaay. Pananglitan, sa dihang ang nanambong sa mga kombensiyon ug mga asembliya makig-ilaila ug makig-estorya sa uban, sila maghinamhinam nga magkita sila pag-usab. Ang mga boluntaryo sa pagpanukod ug Kingdom Hall maingon man kadtong mitabang sa mga igsoon nga naapektohan sa mga kalamidad sagad masuod sa usag usa tungod kay ilang nakita ang maayong mga hiyas sa matag usa. Adunay daghang kahigayonan sa pag-ugmad ug dumalayong mga panaghigalaay diha sa organisasyon ni Jehova. Kon kita “magpasangkad,” mas modaghan ang atong mga higala ug mas molig-on ang gugma nga naghiusa kanato diha sa matuod nga pagsimba.
Paggahin ug Panahon Alang sa Uban
11. Ingon sa gipakita sa Marcos 10:13-16, unsang ehemplo ang gihatag ni Jesus?
11 Ang tanang Kristohanon makapaningkamot nga mahimong daling duolon, sama kang Jesus. Tagda kon unsay gibuhat ni Jesus sa dihang gipugngan sa iyang mga tinun-an ang mga ginikanan sa pagdala sa ilang mga anak ngadto kaniya. “Pasagdi ang mga bata nga moduol kanako,” siya miingon. “Ayaw sila pagpugngi, kay ang gingharian sa Diyos ilaha sa mga ingon kanila.” Dayon, “iyang gikugos ang mga bata ug gipanalanginan sila, nga gitapion ang iyang mga kamot diha kanila.” (Mar. 10:13-16) Handurawa kon unsa ka dako ang kalipay nga gibati niadtong mga bataa sa dihang gipakitaan silag mahigugmaong pagtagad sa Dakong Magtutudlo!
12. Unsay makapugong kanato sa pagpakig-estorya sa uban?
12 Ang matag Kristohanon angayng mangutana sa iyang kaugalingon, ‘Dali ba kong duolon o pirme lang kong puliki tan-awon?’ Usahay, may mga batasan nga makababag sa kabildohay. Pananglitan, kon kanunay tang mogamit ug cell phone o maminaw ug mga rekording atubangan sa mga tawo, basin maghunahuna sila nga dili ta ganahang makig-uban nila. Kon pirme tang makita sa uban nga nalingaw kaayo sa atong madaladalang kompiyuter, tingali makaingon sila nga dili ta gustong makig-estorya nila. Siyempre, adunay “panahon sa paghilom.” Apan kon anaa kita sa taliwala sa mga tawo, sagad kana maoy “panahon sa pagsulti.” (Eccl. 3:7) Ang pipila moingon tingali, “Gusto nakong maghilomhilom” o “Di ko ganahang makig-estorya kon mabuntag.” Bisan pa niana, ang pagbuntog nato sa maong pagbati maoy pamatuod sa gugma nga ‘wala mangita sa kaugalingong kaayohan niini.’—1 Cor. 13:5.
13. Sumala kang Pablo, unsay angayng tinamdan ni Timoteo ngadto sa mga igsoon sa kongregasyon?
13 Si Pablo nagdasig sa batan-ong si Timoteo sa pagpakitag pagtahod sa tanang membro sa kongregasyon. (Basaha ang 1 Timoteo 5:1, 2.) Angay sab natong isipon ang tigulang nga mga Kristohanon ingon nga atong mga inahan ug amahan ug ang mga batan-on ingong atong mga igsoon. Kon mao nay atong tinamdan, dili sila magpanuko sa pagduol kanato.
14. Sa unsang paagi makabenepisyo ka sa makapalig-ong pakigkabildohay sa uban?
14 Kon atong apilon ang uban sa makapalig-on nga kabildohay, kita makatabang kanila sa espirituwal ug emosyonal nga paagi. Usa ka brader nga nagtrabaho sa usa ka sangang buhatan malipayng mahinumdom sa pipila ka tigulang nga mga Bethelite nga kanunayng mogahin ug panahon sa pagpakig-estorya kaniya sa dihang bag-o pa siya sa Bethel. Tungod sa ilang makapadasig nga mga pulong, iyang gibati nga siya bahin gayod sa pamilyang Bethel. Karon naningkamot siya sa pagsundog kanila pinaagi sa pagpakig-estorya sa kaubang mga Bethelite.
Ang Pagkamapainubsanon Motabang Kanato sa Pagpakighusay
15. Unsay nagpakita nga usahay mahitabo ang dili pagsinabtanay sa atong taliwala?
15 Si Euodia ug Sintique, duha ka Kristohanon sa karaang Filipos, dayag nga nalisdan sa pagsulbad sa problema nga mitungha tali kanila. (Filip. 4:2, 3) Ang grabeng panaglalis ni Pablo ug Bernabe nahibaloan sa mga igsoon ug miresulta sa ilang panagbulag. (Buh. 15:37-39) Kini nga mga asoy nagpakita nga usahay mahitabo ang dili pagsinabtanay tali sa matuod nga mga magsisimba. Si Jehova nagtagana kanatog tabang sa paghusay sa maong mga panagbangi ug sa pagpasig-uli sa panaghigalaay. Apan duna pa siyay gikinahanglan kanato.
16, 17. (a) Unsa ka hinungdanon ang pagkamapainubsanon sa paghusay sa mga panagbangi? (b) Sa unsang paagi ang asoy bahin sa pagduol ni Jacob kang Esau nag-ilustrar sa kahinungdanon sa pagkamapainubsanon?
16 Handurawa nga kamo sa imong higala mobiyahe sakay sa awto. Sa dili pa mo mosugod sa inyong panaw, kinahanglang gamiton nimo ang yawi sa pagpaandar sa makina. Aron mahusay ang dili pagsinabtanay, kinahanglang gamitan usab kini ug yawi. Ang yawi mao ang pagkamapainubsanon. (Basaha ang Santiago 4:10.) Ingon sa gipakita sa mosunod nga pananglitan diha sa Kasulatan, ang maong yawi motabang niadtong dunay kasungian sa pagpadapat sa mga prinsipyo sa Bibliya.
17 Bayente ka tuig na ang milabay sukad nga si Esau nasuko pag-ayo tungod sa pagkabalhin sa pagkapanganay ngadto sa iyang kaluha, nga si Jacob, ug gusto niyang patyon kini. Ang kaluha hapit nang magkita pag-usab, “ug si Jacob nahadlok pag-ayo ug nabalaka.” Iyang gibati nga lagmit gayong atakehon siya ni Esau. Apan sa ilang panagtagbo, dihay gibuhat si Jacob nga wala damha ni Esau. Siya “miyukbo sa yuta” samtang nagkaduol sa iyang igsoon. Unsay sunod nga nahitabo? “Si Esau midagan sa pagsugat kaniya, ug siya migakos kaniya ug mihalog sa iyang liog ug mihalok kaniya, ug sila nanghilak.” Nalikayan ang panag-away. Ang pagkamapainubsanon ni Jacob nakatabang sa pagpuypoy sa pagdumot nga hayan gihambin ni Esau.—Gen. 27:41; 32:3-8; 33:3, 4.
18, 19. (a) Sa dihang motungha ang mga panagbangi, nganong hinungdanon nga kitay mouna sa pagpadapat sa tambag sa Kasulatan? (b) Nganong dili kita angayng mawad-ag paglaom kon ang usa dili dayon mosanong sa atong pagpakighusay kaniya?
18 Ang Bibliya naundan ug maayo kaayong tambag sa paghusay sa mga panagbangi. (Mat. 5:23, 24; 18:15-17; Efe. 4:26, 27)a Apan, kon dili kita mapainubsanong modawat sa maong tambag, lisod ang pagpakighusay. Ang paghulat nga ang atong kabangi ang magpakitag pagkamapainubsanon dili mao ang solusyon.
19 Kon dili molampos ang atong unang pagsulay sa pagpakighusay sa atong igsoon, dili kita angayng mawad-ag paglaom. Basin nagkinahanglan siyag panahon sa pagpakalma sa iyang gibati. Si Jose giluiban sa iyang mga igsoon. Dugaydugay pa una sila nagkita pag-usab, ug nianang tungora siya na ang primer ministro sa Ehipto. Apan, sa kataposan sila nagbag-o ug nangayog pasaylo. Gipasaylo sila ni Jose, ug ang mga anak ni Jacob nahimong usa ka nasod nga may pribilehiyo sa pagdala sa ngalan ni Jehova. (Gen. 50:15-21) Kon kita adunay pakigdait sa atong mga igsoon, kita makatabang sa pagpatunhay sa panaghiusa ug kalipay sa kongregasyon.—Basaha ang Colosas 3:12-14.
Maghigugmaay Kita “sa Buhat ug sa Kamatuoran”
20, 21. Unsay atong makat-onan sa paghugas ni Jesus sa tiil sa iyang mga apostoles?
20 Sa gabii una siya mamatay, giingnan ni Jesus ang iyang mga apostoles: “Ako nagtagana ug sumbanan alang kaninyo, nga, ingon sa akong gibuhat kaninyo, pagabuhaton usab ninyo.” (Juan 13:15) Bag-o pa lang siyang nahuman paghugas sa tiil sa iyang 12 ka apostoles. Ang gibuhat ni Jesus dili lamang usa ka kostumbre ni buhat sa kalulot. Sa wala pa iasoy ang bahin sa paghugas sa tiil, si Juan misulat: “Si Jesus, kay nahigugma sa mga iyaha nga ania sa kalibotan, naghigugma kanila hangtod sa kataposan.” (Juan 13:1) Ang gugma ni Jesus sa iyang mga tinun-an ang nagtukmod kaniya sa pagbuhat sa trabaho nga kasagarang ginahimo sa usa ka ulipon. Sila usab kinahanglang mobuhat ug mahigugmaong mga butang alang sa usag usa. Oo, ang tinuod nga inigsoong gugma angayng magpalihok kanato sa pagpakitag pagmahal ug kahangawa sa tanan natong mga igsoon.
21 Si apostol Pedro, kansang tiil gihugasan sa Anak sa Diyos, nakasabot sa kahulogan sa gibuhat ni Jesus. Siya misulat: “Karon nga nalunsay na ninyo ang inyong mga kalag pinaagi sa inyong pagkamasinugtanon sa kamatuoran uban sa dili-salingkapaw nga inigsoong pagbati ingong sangpotanan, mainiton nga maghigugmaay sa usag usa gikan sa kasingkasing.” (1 Ped. 1:22) Si apostol Juan, kansang mga tiil nahugasan usab sa Ginoo, misulat: “Minahal nga mga anak, maghigugmaay kita, dili pinaagi sa pulong ni sa dila, kondili sa buhat ug sa kamatuoran.” (1 Juan 3:18) Hinaot nga ang atong kasingkasing magpalihok kanato sa pagpasundayag sa atong gugma sa atong mga igsoon.
[Footnote]
a Tan-awa ang librong Organisado Aron Buhaton ang Kabubut-on ni Jehova, panid 144-150.
Nahinumdom Ka Ba?
• Sa unsang mga paagi kita ‘makapasangkad’ sa atong gugma sa usag usa?
• Unsay motabang kanato sa paggahin ug panahon sa uban?
• Sa unsang paagi makatabang ang pagkamapainubsanon sa pagpakighusay?
• Unsay angayng magtukmod kanato sa pagpakitag pagmahal sa mga isigkamagtutuo?
[Hulagway sa panid 21]
Mainitong abiabiha ang mga isigkamagtutuo
[Hulagway sa panid 23]
Ayaw palabya ang mga kahigayonan sa paggahin ug panahon sa uban