Ang Paglaom sa Pagkabanhaw Adunay Gahom
“Akong nadawat ang kapildihan sa tanang butang . . . aron mailhan [si Jesu-Kristo] ug ang gahom sa iyang pagkabanhaw.”—FILIPOS 3:8-10.
1, 2. (a) Katuigan kanhi, sa unsang paagi gihubit sa usa ka klerigo ang pagkabanhaw? (b) Sa unsang paagi mahitabo ang pagkabanhaw?
SA UNANG bahin sa katuigang 1890, ang publikong prensa nagtaho bahin sa talagsaong wali sa usa ka klerigo sa Brooklyn, New York, T.B.A. Siya miingon nga ang pagkabanhaw maglakip sa pagtigom pag-usab ug paghatag ug kinabuhi sa tanang bukog ug unod nga naglangkob kaniadto sa lawas sa tawo, kini man nalaglag pinaagi sa kalayo o sa aksidente, gikaon sa mananap nga mapintas o nahimong abono. Ang magwawali nagtuo nga sa usa ka 24-oras nga adlaw, ang hangin mapuno sa mga kamot, bukton, tiil, tudlo, bukog, ugat, ug panit sa binilyong tawo nga nangamatay. Kining maong mga parte mangita sa ubang bahin sa mao gihapong lawas. Ang mga kalag manganaog dayon gikan sa langit ug impiyerno aron mopuyo niining nabanhawng mga lawas.
2 Ang pagkabanhaw pinaagi sa pag-organisar pag-usab sa orihinal nga mga atomo dili-makataronganon, ug ang mga tawo walay dili-mamatay nga kalag. (Ecclesiastes 9:5, 10; Ezequiel 18:4) Dili na kinahanglang tigomon pa ni Jehova, ang Diyos sa pagkabanhaw, ang mga atomo sa materya nga sa sinugdan naglangkob sa lawas sa tawo. Makahimo siya ug bag-ong mga lawas alang niadtong mga binanhaw. Sa iyang Anak, si Jesu-Kristo, si Jehova naghatag ug gahom sa pagbangon sa mga patay, uban sa posibilidad nga mabuhi sa walay kataposan. (Juan 5:26) Busa si Jesus miingon: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi.” (Juan 11:25, 26) Pagkamakapadasig nga saad! Kini magpalig-on kanato sa paglahutay sa mga pagsulay ug sa pag-atubang gani sa kamatayon ingong matinumanong mga Saksi ni Jehova.
3. Nganong kinahanglang depensahan ni Pablo ang pagkabanhaw?
3 Ang pagkabanhaw dili kaharmonya sa pagtulon-an nga ang mga tawo dunay dili-mamatay nga kalag—panglantaw sa Gregong pilosopo nga si Plato. Busa, unsay nahitabo sa dihang si apostol Pablo nagsangyaw ngadto sa inilang mga Grego sa Areopago sa Atenas, nga naghisgot kang Jesus, ug miingon nga ang Diyos nagbanhaw kaniya? “Buweno,” matod pa sa asoy, “sa dihang sila nakadungog bahin sa pagkabanhaw sa mga patay, ang pipila misugod sa pagyagayaga.” (Buhat 17:29-34) Daghan nga nakakita sa binanhawng Jesu-Kristo ang buhi pa gihapon ug, bisan pa sa pagbiaybiay, nagpamatuod nga siya gibangon gikan sa mga patay. Apan ang bakak nga mga magtutudlo nga nakig-uban sa kongregasyon sa Corinto nagpanghimakak sa pagkabanhaw. Busa si Pablo mihimog gamhanang pagdepensa niining Kristohanong pagtulon-an diha sa 1 Corinto kapitulo 15. Ang mainampingong pagtuon sa iyang mga argumento magpamatuod gayod sa pagkasegurado ug sa gahom sa paglaom sa pagkabanhaw.
Lig-ong Pamatuod sa Pagkabanhaw ni Jesus
4. Unsang pamatuod sa saksing nagpakakita sa pagkabanhaw ni Jesus ang gihatag ni Pablo?
4 Matikdi kon sa unsang paagi gisugdan ni Pablo ang iyang pagdepensa. (1 Corinto 15:1-11) Gawas kon ang mga taga-Corinto mahimong mga magtutuo sa walay katuyoan, sila manghawid pag-ayo sa maayong balita sa kaluwasan. Si Kristo namatay alang sa atong mga sala, gilubong, ug gibangon. Sa pagkatinuod, ang binanhawng Jesus nagpakita kang Cefas (Pedro), “unya ngadto sa napulog-duha.” (Juan 20:19-23) Nakita siya sa mga 500 ka tawo, tingali sa dihang siya nagsugo: “Panglakaw kamo ug paghimog mga tinun-an.” (Mateo 28:19, 20) Nakakita si Santiago kaniya, maingon man ang tanang matinumanong mga apostoles. (Buhat 1:6-11) Duol sa Damasco, si Jesus nagpakita kang Saulo “nga daw ngadto sa usang natawong ahat”—nga morag si Saulo nabanhaw na ngadto sa espirituhanong kinabuhi. (Buhat 9:1-9) Ang mga taga-Corinto nahimong mga magtutuo tungod kay gisangyawan sila ni Pablo, ug ilang gidawat ang maayong balita.
5. Unsa ang pangatarongan ni Pablo sumala sa nasulat sa 1 Corinto 15:12-19?
5 Matikdi ang pangatarongan ni Pablo. (1 Corinto 15:12-19) Sanglit ang mga saksing nagpakakita nagwali nga si Kristo gibanhaw, nganong ikaingon man nga walay pagkabanhaw? Kon si Jesus wala pa bangona gikan sa mga patay, kawang lang ang atong pagwali ug ang atong pagtuo, ug kita mga bakakon kinsa nagpamatuod batok sa Diyos pinaagi sa pag-ingon nga iyang gibanhaw si Kristo. Kon ang mga patay dili bangonon, ‘kita anaa pa sa atong mga sala,’ ug kadtong nangamatay nga nahiusa kang Kristo nangahanaw. Dugang pa, “kon kining kinabuhia lamang kita naglaom diha kang Kristo, sa tanang tawo kita ang labing angay kaluy-an.”
6. (a) Unsay giingon ni Pablo sa pagpamatuod sa pagkabanhaw ni Jesus? (b) Unsa ang “kataposang kaaway,” ug sa unsang paagi kini pagawagtangon?
6 Gipamatud-an ni Pablo ang pagkabanhaw ni Jesus. (1 Corinto 15:20-28) Maingon nga si Kristo mao “ang unang-bunga” niadtong nangatulog sa kamatayon, ang uban usab pagabanhawon. Samtang ang kamatayon miresulta tungod sa pagsupak sa tawo nga si Adan, ang pagkabanhaw maoy pinaagi sa usa ka tawo—si Jesus. Kadtong iyaha pagabangonon sa panahon sa iyang presensiya. Si Kristo ‘magwagtang sa tanang kagamhanan ug tanang awtoridad ug gahom’ nga supak sa pagkasoberano sa Diyos ug magmando ingong Hari hangtod nga ibutang ni Jehova ang tanang kaaway ilalom sa iyang mga tiil. Bisan ang “kataposang kaaway”—ang kamatayon nga napanunod gikan kang Adan—pagawagtangon pinaagi sa merito sa halad ni Jesus. Unya itugyan ni Kristo ang Gingharian ngadto sa iyang Diyos ug Amahan, nga magpasakop sa iyang kaugalingon ngadto “sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.”
Gibawtismohan Alang sa mga Patay?
7. Kinsa ang “ginabawtismohan sa katuyoan sa pagkahimong ingon nga mga patay,” ug unsay kahulogan niini alang kanila?
7 Ang mga magsusupak sa pagkabanhaw gipangutana: “Unsay buhaton nilang kinsa ginabawtismohan sa katuyoan sa pagkahimong ingon nga mga patay?” (1 Corinto 15:29) Wala ipasabot ni Pablo nga ang mga buhi pagabawtismohan alang sa mga patay, kay ang mga tinun-an ni Jesus kinahanglang personal nga magtuon, motuo, ug mabawtismohan. (Mateo 28:19, 20; Buhat 2:41) Ang dinihogang mga Kristohanon “ginabawtismohan sa katuyoan sa pagkahimong ingon nga mga patay” pinaagi sa pagkalangkit pag-ayo sa dalan sa kinabuhi nga mosangko sa kamatayon ug pagkabanhaw. Kining matanga sa bawtismo magsugod sa dihang ang espiritu sa Diyos magpatungha sa langitnong paglaom diha kanila ug matapos sa dihang sila bangonon gikan sa kamatayon ngadto sa imortal nga espiritung kinabuhi sa langit.—Roma 6:3-5; 8:16, 17; 1 Corinto 6:14.
8. Sa unsa makaseguro ang mga Kristohanon bisan pag si Satanas ug iyang mga alagad mopatay kanila?
8 Sumala sa gipakita sa mga pulong ni Pablo, ang paglaom sa pagkabanhaw makapaarang sa mga Kristohanon sa pagbarog atubangan sa kapeligrohan matag takna ug sa pag-atubang sa kamatayon adlaw-adlaw tungod sa pagbuhat sa buluhatong pagwali sa Gingharian. (1 Corinto 15:30, 31) Sila nahibalo nga si Jehova makabanhaw kanila kon tugotan niya si Satanas ug ang iyang mga alagad nga mopatay kanila. Ang Diyos lamang ang makapatay sa ilang kalag, o kinabuhi, sa Gehenna, nga nagsimbolo sa walay-kataposang kalaglagan.—Lucas 12:5.
Panginahanglan nga Magmaigmat
9. Aron ang paglaom sa pagkabanhaw adunay makapalig-ong gahom sa atong kinabuhi, unsay angay natong likayan?
9 Ang paglaom sa pagkabanhaw nagpalig-on kang Pablo. Samtang didto siya sa Efeso, ang iyang mga kaaway nagbanlod kaniya sa natad dulaanan aron makigbugno sa mapintas nga mga mananap. (1 Corinto 15:32) Kon nahitabo kana, siya gipahigawas, maingon nga si Daniel giluwas gikan sa mga leyon. (Daniel 6:16-22; Hebreohanon 11:32, 33) Sanglit naglaom siya sa pagkabanhaw, wala mabatoni ni Pablo ang tinamdan sa mga apostata sa Juda sa adlaw ni Isaias. Sila miingon: “Mangaon ug manginom kita, kay ugma mangamatay kita.” (Isaias 22:13, Septuagint) Aron ang paglaom sa pagkabanhaw adunay makapalig-ong gahom sa atong kinabuhi sama sa kang Pablo, angay natong likayan kadtong duna nianang dili-maayong espiritu. “Ayaw pagpahisalaag,” nagpasidaan si Pablo. “Ang daotang pakig-uban nagadaot sa mapuslanong mga batasan.” (1 Corinto 15:33) Siyempre, kining prinsipyoha mapadapat sa lainlaing bahin sa kinabuhi.
10. Sa unsang paagi mahuptang buhi ang atong paglaom sa pagkabanhaw?
10 Niadtong nagduhaduha sa pagkabanhaw, si Pablo miingon: “Pagmata kamo ngadto sa pagkamay-pamuot sa matarong nga paagi ug ayaw pagpakasala, kay ang pipila walay kahibalo sa Diyos. Ako nagapamulong aron kamo mobatig kaulaw.” (1 Corinto 15:34) Niining “panahon sa kataposan,” kinahanglang molihok kita nga kaharmonya sa tukmang kahibalo sa Diyos ug kang Kristo. (Daniel 12:4; Juan 17:3) Kini padayong magpabuhi sa atong paglaom sa pagkabanhaw.
Gibanhaw Uban sa Unsang Lawas?
11. Giunsa pag-ilustrar ni Pablo ang pagkabanhaw sa dinihogang mga Kristohanon?
11 Sunod gihisgotan ni Pablo ang pipila ka pangutana. (1 Corinto 15:35-41) Tingali sa paningkamot nga himoong kaduhaduhaan ang pagkabanhaw, ang usa mangutana tingali: “Sa unsang paagi ang mga patay pagabangonon? Oo, sa unsang matang sa lawas sila mamao unya?” Sumala sa gipakita ni Pablo, ang usa ka binhi nga ipugas sa yuta sa pagkatinuod mamatay una sa dili pa kini moturok. Sa susama, ang dinihogan-sa-espiritu nga tawo kinahanglang mamatay. Maingon nga ang tanom moturok gikan sa binhi ingong bag-ong lawas, busa ang gibanhawng lawas sa dinihogang Kristohanon lahi sa tawhanong unod. Bisan tuod duna siyay susamang mga kinaiya sa iyang nabatonan sa wala pa siya mamatay, siya pagabangonon ingong bag-ong linalang uban ang espirituhanong lawas nga makapuyo sa langit. Siyempre, kadtong banhawon dinhi sa yuta pagabangonon diha sa tawhanong mga lawas.
12. Unsay kahulogan sa ekspresyong “langitnong mga lawas” ug “yutan-ong mga lawas”?
12 Sumala sa giingon ni Pablo, ang tawhanong unod lahi nianang sa mga mananap. Bisan ang unod sa lainlaing mga mananap magkalahi. (Genesis 1:20-25) Ang “langitnong mga lawas” sa espiritung mga linalang lahi ug himaya gikan sa unodnong “yutan-ong mga lawas.” Dunay kalainan usab sa himaya sa adlaw, bulan, ug mga bituon. Apan ang binanhawng mga dinihogan mas mahimayaon gayod.
13. Sumala sa 1 Corinto 15:42-44, unsay ipugas ug unsay bangonon?
13 Kay nahisgotan na ang mga kalainan, si Pablo midugang: “Mao man usab ang pagkabanhaw sa mga patay.” (1 Corinto 15:42-44) Miingon siya: “Ipugas kini sa pagkadunot, kini bangonon sa pagkadili-madunot.” Dinhi si Pablo mahimong nagpasabot sa mga dinihogan ingong pundok. Ipugas sa pagkadunot diha sa kamatayon, kini bangonon sa pagkadili-madunot, walay sala. Bisan tuod wala pasidunggi sa kalibotan, kini bangonon sa langitnong kinabuhi ug mapadayag uban kang Kristo sa himaya. (Buhat 5:41; Colosas 3:4) Sa kamatayon kini ipugas nga “usa ka pisikal nga lawas” ug bangonon ingong “espirituwal nga lawas.” Sanglit posible kini sa kahimtang sa inanak-sa-espiritu nga mga Kristohanon, makaseguro kita nga ang uban mahimong bangonon sa kinabuhi dinhi sa yuta.
14. Sa unsang paagi gipakita ni Pablo ang kalainan ni Kristo ug Adan?
14 Sunod gipakita ni Pablo ang kalainan ni Kristo ug ni Adan. (1 Corinto 15:45-49) Si Adan, ang unang tawo, “nahimong buhing kalag.” (Genesis 2:7) “Ang kataposang Adan”—si Jesus—“nahimong nagahatag-kinabuhi nga espiritu.” Iyang gihatag ang iyang kinabuhi ingong halad lukat, una alang sa iyang dinihogang mga sumusunod. (Marcos 10:45) Ingong mga tawo, sila ‘susamag dagway sa usa nga hinimo sa abog,’ apan sa dihang gibanhaw sila nahisama sa kataposang Adan. Siyempre, ang halad ni Jesus makabenepisyo sa tanang masinugtanong katawhan, lakip niadtong gibanhaw dinhi sa yuta.—1 Juan 2:1, 2.
15. Nganong ang dinihogang mga Kristohanon dili banhawon sa unod, ug sa unsang paagi sila banhawon panahon sa presensiya ni Jesus?
15 Sa dihang mamatay ang dinihogang mga Kristohanon, sila dili banhawon sa unod. (1 Corinto 15:50-53) Ang madunotong lawas sa unod ug dugo dili makapanunod sa pagkadili-madunoton ug sa langitnong Gingharian. Ang ubang mga dinihogan dili kinahanglang makasinati ug dugayng pagkatulog sa kamatayon. Sa pagtapos sa ilang yutan-ong dalan sa pagkamatinumanon panahon sa presensiya ni Jesus, sila “mangausab, sa daklit, sa pagpamilok sa mata.” Sila banhawon dayon ngadto sa espirituhanong kinabuhi sa pagkadili-madunoton ug himaya. Sa ngadtongadto, ang langitnong “pangasaw-onon” ni Kristo may gidaghanon nga 144,000.—Pinadayag 14:1; 19:7-9; 21:9; 1 Tesalonica 4:15-17.
Kadaogan Ibabaw sa Kamatayon!
16. Sumala kang Pablo ug sa mas unang mga propeta, unsay mahitabo sa kamatayon nga napanunod gikan sa makasasalang Adan?
16 Si Pablo madaogong nagpahayag nga ang kamatayon pagalamyon sa walay kataposan. (1 Corinto 15:54-57) Sa dihang ang madunoton ug mamatay nga tawo magsul-ob ug pagkadili-madunoton ug pagkadili-mamatay, kining mga pulonga matuman: “Ang kamatayon gilamoy hangtod sa walay kataposan.” “Kamatayon, hain ang imong kadaogan? Kamatayon, hain ang imong ikot?” (Isaias 25:8; Oseas 13:14) Ang ikot nga magpatunghag kamatayon mao ang sala, ug ang kalig-on sa sala mao ang Balaod, nga naghukom sa mga makasasala ngadto sa kamatayon. Apan tungod sa halad ug pagkabanhaw ni Jesus, ang kamatayon nga napanunod gikan sa makasasalang Adan dili na magmadaogon.—Roma 5:12; 6:23.
17. Sa unsang paagi ang mga pulong sa 1 Corinto 15:58 mapadapat karon?
17 “Tungod niana, akong hinigugmang mga igsoon,” matod ni Pablo, “magmalig-on, dili-matarog, nga kanunay may daghang buhaton diha sa buluhaton sa Ginoo, nga nahibalo nga ang inyong kahago dili kawang may kalabotan sa Ginoo.” (1 Corinto 15:58) Kanang mga pulonga mapadapat karon sa dinihogang mga nahibilin ug sa “ubang mga karnero” ni Jesus bisan pag mamatay sila niining kataposang mga adlaw. (Juan 10:16) Ang ilang mga kahago ingong mga magmamantala sa Gingharian dili makawang, kay ang pagkabanhaw naghulat kanila. Nan, ingong mga alagad ni Jehova, magmapuliki kita sa buluhaton sa Ginoo samtang nagpaabot sa adlaw sa dihang kita malipayong mosinggit: “Kamatayon, hain ang imong kadaogan?”
Ang Paglaom sa Pagkabanhaw Natuman!
18. Unsa ka lig-on ang paglaom ni Pablo sa pagkabanhaw?
18 Ang mga pulong ni Pablo nga gisulat sa 1 Corinto kapitulo 15 nagpadayag nga ang paglaom sa pagkabanhaw may gahom sa iyang kinabuhi. Segurado gayod siya nga si Jesus gibangon gikan sa mga patay ug nga ang uban mapagawas usab gikan sa komon nga lubnganan sa tawo. Nabatonan ba nimo ang maong lig-ong pagtuo? Giisip ni Pablo ang hakog nga mga bentaha ingong “mga basura” ug ‘gidawat ang kapildihan sa tanang butang’ aron ‘mailhan si Kristo ug ang gahom sa iyang pagkabanhaw.’ Ang apostol andam nga mopailalom sa kamatayon nga sama nianang kang Kristo sa paglaom nga madawat ang “mas sayo nga pagkabanhaw.” Gitawag usab ug “unang pagkabanhaw,” nasinati kini sa 144,000 ka dinihogang mga sumusunod ni Jesus. Oo, sila gibanhaw ngadto sa espirituhanong kinabuhi sa langit, samtang “ang uban sa mga patay” pagabanhawon dinhi sa yuta.—Filipos 3:8-11; Pinadayag 7:4; 20:5, 6.
19, 20. (a) Kinsang mga tawhana nga gisulat diha sa Bibliya ang banhawon sa kinabuhi dinhi sa yuta? (b) Kang kansang pagkabanhaw ang imong ginapaabot?
19 Ang paglaom sa pagkabanhaw nahimong mahimayaong katinuoran alang sa mga dinihogan nga nagmatinumanon hangtod sa kamatayon. (Roma 8:18; 1 Tesalonica 4:15-18; Pinadayag 2:10) Ang mga makalabang-buhi sa “dakong kasakitan” makakita nga matinuod ang paglaom sa pagkabanhaw dinhi sa yuta samtang ‘ang dagat magtugyan sa mga patay nga diha niini, ug ang kamatayon ug Hades magtugyan sa mga patay nga diha niana.’ (Pinadayag 7:9, 13, 14; 20:13) Lakip niadtong banhawon sa kinabuhi dinhi sa yuta mao si Job, kinsa nag-antos sa kamatayon sa iyang pito ka anak nga lalaki ug tulo ka anak nga babaye. Handurawa ang iyang kalipay sa pag-abi-abi kanila—ug pagkamalipayon unya nila nga sila duna pa diay pito ka igsoong mga lalaki ug tulo ka laing matahom nga mga igsoong babaye!—Job 1:1, 2, 18, 19; 42:12-15.
20 Pagkadakong panalangin unya kana sa dihang si Abraham ug Sara, Isaac ug Rebeca—oo ug daghang uban pa, lakip ang “tanang propeta”—banhawon ngadto sa kinabuhi dinhi sa yuta! (Lucas 13:28) Usa nianang maong mga propeta mao si Daniel, kinsa gisaaran ug pagkabanhaw ilalom sa Mesiyanikong pagmando. Sulod sa mga 2,500 ka tuig, si Daniel nagpahulay diha sa lubnganan, apan pinaagi sa gahom sa pagkabanhaw, sa dili madugay siya ‘mobarog alang sa iyang bahin’ ingong usa sa “mga prinsipe sa tibuok yuta.” (Daniel 12:13; Salmo 45:16) Pagkamakalilipay unya ang pag-abiabi dili lamang sa mga matinumanon sa kakaraanan kondili usab sa imong amahan, inahan, anak nga lalaki, anak nga babaye, o sa ubang mga minahal nga gikuha gikan kanimo sa kaaway nga kamatayon!
21. Nganong dili kita maglangan sa pagbuhat ug maayong mga butang alang sa uban?
21 Ang pipila sa atong mga higala ug mga minahal nag-alagad na tingali sa Diyos sulod sa mga dekada ug tigulang na. Ang katigulangon magpalisod tingali kanila sa pagsagubang sa mga suliran sa kinabuhi. Pagkamahigugmaon nga ihatag kanila ang bisan unsang tabang nga atong mahimo karon dayon! Unya dili kita magbasol nga wala nato matuman ang atong mga obligasyon ngadto sa atong mga minahal sa usa ka paagi kon biktimahon na sila sa kamatayon. (Ecclesiastes 9:11; 12:1-7; 1 Timoteo 5:3, 8) Makaseguro kita nga si Jehova dili malimot sa maayong mga butang nga atong gibuhat alang sa uban, bisan unsay ilang edad o mga kahimtang. “Samtang kita may panahong paborable alang niini,” misulat si Pablo, “buhaton nato ang maayo ngadto sa tanan, apan ilabina kanilang iglabot nato sa pagtuo.”—Galacia 6:10; Hebreohanon 6:10.
22. Hangtod matuman ang paglaom sa pagkabanhaw, determinado kitang mobuhat sa unsa?
22 Si Jehova mao “ang Amahan sa malumong mga kaluoy ug ang Diyos sa tanang paghupay.” (2 Corinto 1:3, 4) Ang iyang Pulong naghupay kanato ug nagtabang kanato sa paghupay sa uban pinaagi sa gamhanang paglaom sa pagkabanhaw. Hangtod nga masaksihan nato ang katumanan nianang maong paglaom pinaagi sa pagbangon sa mga patay ngadto sa kinabuhi dinhi sa yuta, mahisama unta kita kang Pablo, kinsa nagtuo sa pagkabanhaw. Hinaot nga sundogon nato ilabina si Jesus, kansang paglaom sa gahom sa Diyos sa pagbanhaw kaniya natinuod. Kadtong anaa sa handomanang mga lubnganan sa dili madugay makadungog sa tingog ni Kristo ug manggula. Hinaot maghatag kini kanato ug kahupayan ug kalipay. Apan labaw sa tanan, hinaot nga magmapasalamaton kita kang Jehova, kinsa nagpaposible sa kadaogan ibabaw sa kamatayon pinaagi sa atong Ginoong Jesu-Kristo!
Unsay Imong Tubag?
• Unsang pamatuod sa saksing nagpakakita sa pagkabanhaw ni Jesus ang gihatag ni Pablo?
• Unsa ang “kataposang kaaway,” ug sa unsang paagi kini pagawagtangon?
• Sa kahimtang sa dinihogang mga Kristohanon, unsay ipugas ug unsay bangonon?
• Kinsang mga tawhana nga gisulat diha sa Bibliya ang buot nimong mahimamat sa dihang bangonon sila ngadto sa kinabuhi dinhi sa yuta?
[Hulagway sa panid 16]
Si apostol Pablo mihimog gamhanang pagdepensa sa pagkabanhaw
[Mga hulagway sa panid 20]
Ang pagkabanhaw ni Job, sa iyang pamilya, ug sa daghang uban pa mahimong hinungdan sa hilabihang kalipay!