“Sa Unsang Paagi Banhawon ang mga Patay?”

1-2. Nganong ang tanang Kristohanon angayng mainteres sa langitnong pagkabanhaw?

KADAGHANAN sa mga alagad ni Jehova karon naglaom nga mabuhi sa walay kataposan sa yuta. Pero ang nahibilin sa dinihogan sa espiritu nga mga Kristohanon naglaom nga mabanhaw ngadto sa langit. Kini nga mga dinihogan interesado kaayong mahibalo bahin sa ilang kinabuhi sa langit, pero komosta kadtong dunay yutan-ong paglaom? Sa ato unyang makita, ang langitnong pagkabanhaw maghatag sab ug mga panalangin niadtong naglaom nga mabuhi sa walay kataposan sa yuta. Busa sa langit man o sa yuta ang atong paglaom, angay tang mainteres sa langitnong pagkabanhaw.

² Gigiyahan sa Diyos ang pipila ka tinun-an ni Jesus sa unang siglo sa pagsulat bahin sa langitnong paglaom. Si apostol Juan mipatin-aw: “Kita mga anak na sa Diyos, apan wala pa ipadayag kon mahimong unsa unya kita. Pero nahibalo ta nga dihang ipadayag na siya, kita mahisama niya.” (1 Juan 3:2) Busa ang dinihogang mga Kristohanon wala mahibalo kon unsa unyay ilang kinabuhi dihang mabanhaw sila ngadto sa langit nga may espirituhanong lawas. Pero, literal nilang makita si Jehova dihang madawat nila ang ilang ganti. Wala ipadayag sa Bibliya ang tanang detalye bahin sa langitnong pagkabanhaw, pero si apostol Pablo naghatag ug pipila ka impormasyon bahin niana. Ang mga dinihogan makauban ni Jesus dihang iyang ‘wagtangon ang tanang gobyerno ug tanang awtoridad ug gahom.’ Apil niana “ang kataposang kaaway, ang kamatayon.” Sa kataposan, si Jesus ug ang iyang kaubang mga magmamando magpasakop sa ilang kaugalingon ug sa tanang butang ngadto kang Jehova. (1 Cor. 15:24-28) Nindot gyod kaayo nang panahona!b

 3. Ingon sa gipakita sa 1 Corinto 15:30-32, sa unsang paagi ang pagtuo ni Pablo sa pagkabanhaw nakatabang niya?

³ Ang pagtuo ni Pablo sa pagkabanhaw nakatabang niya sa paglahutay sa lainlaing mga pagsulay. (Basaha ang 1 Corinto 15:30-32.) Iyang giingnan ang mga taga-Corinto: “Kada adlaw nag-atubang kog kamatayon.” Si Pablo miingon sab: “Nakigbugno ko sa bangis nga mga mananap sa Efeso.” Tingali naghisgot siya bahin sa iyang pagpakigbugno ug tinuod nga mga mananap sa arena sa Efeso. (2 Cor. 1:8; 4:10; 11:23) O tingali ang iyang gitumong mao ang paglutos gikan sa mga Hudiyo o sa uban pa nga samag “bangis nga mga mananap.” (Buh. 19:26-34; 1 Cor. 16:9) Bisan unsa pa man, si Pablo nakasinatig grabeng mga kapeligrohan, pero positibo gihapon ang iyang panglantaw sa umaabot.​—2 Cor. 4:16-18.

 4. Sa unsang paagi ang paglaom sa pagkabanhaw nagpalig-on sa mga Kristohanon karon? (Tan-awa ang hulagway sa atubangan sa magasin.)

⁴ Nagkinabuhi ta sa peligrosong mga panahon. Ang pipila sa atong mga igsoon nabiktima sa krimen. Ang uban nagpuyo sa lugar diin dunay gubat ug mibating dili luwas. Sa ubang lugar, ang katawhan ni Jehova walay kagawasan sa pagsangyaw, ug sila nag-alagad kaniya bisag posibleng mapriso sila o mamatay. Bisan pa niana, kining tanang mga igsoon nagpadayon sa pagsimba kang Jehova, ug sila maayong ehemplo para nato. Wala sila mahadlok kay nahibalo sila nga bisag mamatay sila karon, si Jehova nagsaad nilag mas nindot nga kaugmaon.

 5. Unsang sayop nga panglantaw ang makapahuyang sa atong pagtuo sa pagkabanhaw?

⁵ Si Pablo nagpasidaan sa mga Kristohanon bahin niining sayop nga panglantaw: “Kon ang mga patay dili banhawon, ‘mangaon kita ug manginom, kay ugma kita mangamatay.’” Mao ni panglantaw sa pipila ka tawo bisan sa panahon nga wala pa mabuhi si Pablo. Tingali gikutlo niya ang Isaias 22:13, nga naghisgot sa panglantaw sa mga Israelinhon. Imbes makigsuod sa Diyos, mas gusto nilang maglipaylipay. Ang maong mga Israelinhon naghunahuna nga kinahanglan silang mag-enjoy sa ilang kinabuhi karon, kay basig ugma mamatay na sila. Pero girekord sa Bibliya ang dili maayong mga resulta sa sayop nga panghunahuna sa mga Israelinhon.​—2 Cron. 36:15-20.

 6. Sa unsang paagi ang paglaom sa pagkabanhaw angayng mag-impluwensiya sa pagpili natog mga higala?

⁶ Klaro nga ang kamatuoran nga si Jehova makabanhaw sa mga patay angayng mag-impluwensiya sa atong pagpilig mga higala. Kinahanglang likayan sa mga igsoon sa Corinto ang pagpakig-uban niadtong dili motuo sa pagkabanhaw. Duna ni leksiyon para kanato: Wala gyoy maayong resulta ang kanunayng pagpakig-uban niadtong mga tawo nga puro lipaylipay lang ang gusto ug wala maghunahuna sa umaabot. Ang pirmeng pagpakig-uban kanila makadaot sa panglantaw ug pamatasan sa tinuod nga Kristohanon. Posible pa ganing maimpluwensiyahan siya sa paghimo sa mga butang nga gidumtan sa Diyos. Busa, si Pablo puwersadong nag-awhag: “Hunahunaa ninyog maayo aron makaamgo mo ug buhata ang matarong ug ayaw pagpakasala.”​—1 Cor. 15:33, 34.

 7. Sumala sa 1 Corinto 15:35-38, unsa tingali gipangutana sa pipila bahin sa pagkabanhaw?

⁷ Basaha ang 1 Corinto 15:35-38. Ang usa nga gustong magtanom ug pagduhaduha bahin sa pagkabanhaw nangutana tingali: “Sa unsang paagi banhawon ang mga patay?” Maayong konsiderahon nato ang tubag ni Pablo kay daghang tawo karon ang dunay personal nga opinyon kon unsay mahitabo sa tawo human sa kamatayon. Pero unsay gitudlo sa Bibliya?

 8. Unsang ilustrasyon ang makatabang nato nga masabtan ang langitnong pagkabanhaw?

⁸ Dihang ang usa mamatay, ang iyang lawas madugta. Pero ang Usa nga naglalang sa uniberso gikan sa wala makabanhaw nianang tawhana ug makahatag kaniya sa lawas nga iyang gikinahanglan. (Gen. 1:1; 2:7) Si Pablo migamit ug ilustrasyon aron ipakita nga dili kinahanglang ibalik sa Diyos ang mao ra nga lawas. Hunahunaa ang ‘usa ka lugas,’ o “binhi.” Ang binhi nga gitanom motubo ug mahimong bag-ong tanom. Ang bag-ong tanom lahi kaayo sa gamayng binhi. Gigamit ni Pablo kini nga pagtandi aron ipakita nga ang atong Maglalalang ‘makahatag ug lawas sumala sa iyang kabubut-on.’

 9. Unsay giingon sa 1 Corinto 15:39-41 bahin sa lainlaing matang sa lawas?

⁹ Basaha ang 1 Corinto 15:39-41. Gihisgotan ni Pablo nga ang Diyos naglalang ug lainlaing matang sa lawas. Pananglitan, ang lawas sa baka, langgam, ug isda dili managsama. Siya miingon nga diha sa langit, makita nato ang kalainan sa adlaw ug sa bulan. Ug siya midugang nga “ang himaya sa usa ka bituon lahi nianang sa laing bituon.” Oo, bisag dili nato kini makita, ang mga siyentista nag-ingon nga naay lainlaing matang sa mga bituon​—dunay dagko, gagmay, pula, puti, ug dunay yellow sama sa atong adlaw. Miingon sab si Pablo nga “dunay mga lawas nga langitnon ug mga lawas nga yutan-on.” Sa unsang paagi? Aw, sa yuta, unodnon ang atong lawas. Pero sa langit, dunay espirituhanong mga lawas, sama nianang sa mga anghel.

10. Unsang matanga sa lawas ang mabatonan niadtong banhawon ngadto sa langit?

¹⁰ Matikdi ang sunod nga giingon ni Pablo: “Mao man usab sa pagkabanhaw sa mga patay. Ang lawas nahisamag binhi nga ipugas nga madunot, apan banhawon nga dili madunot.” Siyempre, inigkamatay, ang lawas sa tawo madugta ug mobalik sa abog. (Gen. 3:19) Busa sa unsang paagi nga ang lawas “banhawon nga dili madunot”? Si Pablo wala maghisgot bahin sa tawo nga gibanhaw dinhi sa yuta, sama sa gibanhaw ni Elias, Eliseo, ug Jesus. Ang gitumong ni Pablo mao ang tawo nga gibanhaw ug gihatagag lawas nga mabuhi sa langit, sa ato pa, “espirituhanon.”​—1 Cor. 15:42-44.

11-12. Unsang kausaban ang nasinati ni Jesus dihang siya gibanhaw, ug sa unsang paagi ang mga dinihogan makaeksperyensiyag sama niana?

¹¹ Sa dinhi pa si Jesus sa yuta, duna siyay unodnong lawas. Pero dihang siya gibanhaw, siya “nahimong espiritu nga nagahatag ug kinabuhi” ug mibalik sa langit. Sa susama, ang dinihogang mga Kristohanon banhawon ngadto sa espirituhanong kinabuhi. Si Pablo nagpatin-aw: “Sama nga nabatonan nato ang larawan sa usa nga hinimo sa abog, mabatonan usab nato ang larawan sa usa nga langitnon.”​—1 Cor. 15:45-49.

¹² Angayng hinumdoman nga si Jesus wala banhawa nga may unodnong lawas. Sa hapit nang matapos ang paghisgot ni Pablo, iya kanang gipatin-aw: “Ang unod ug dugo dili makapanunod sa Gingharian sa Diyos” didto sa langit. (1 Cor. 15:50) Ang mga apostoles ug ang ubang dinihogan dili banhawon ngadto sa langit sa lawas nga unod ug dugo, nga madugta. Kanus-a sila banhawon? Gipasiugda ni Pablo nga sa umaabot pa ang ilang pagkabanhaw, dili dihadiha. Sa dihang gisulat ni Pablo ang 1 Corinto, ang pipila ka tinun-an “nangatulog na sa kamatayon,” sama kang apostol Santiago. (Buh. 12:1, 2) Pero, ang ubang apostoles ug dinihogan wala pa ‘mangatulog sa kamatayon.’​—1 Cor. 15:6.

13. Unsay mahitabo panahon sa presensiya ni Jesus?

¹³ Si Jesus ug Pablo parehong nagtagna bahin sa usa ka importanteng panahon sa kasaysayan​—ang presensiya sa Kristo. Niana nga presensiya dunay mga gubat, linog, kamatay, ug ubang daotang panghitabo sa kalibotan. Nakita nato nga natuman kining tagnaa sukad niadtong 1914. Duna pay laing importante nga bahin niana nga ilhanan. Si Jesus miingon nga ang maayong balita nga nagmando na ang Gingharian sa Diyos, isangyaw “sa tibuok yuta sa pagpamatuod ngadto sa tanang kanasoran, ug unya moabot ang kataposan.” (Mat. 24:3, 7-14) Si Pablo miingon nga ang “presensiya sa Ginoo” mao sab ang panahon sa pagbanhaw sa dinihogang mga Kristohanon nga “nangatulog sa kamatayon.”​—1 Tes. 4:14-16; 1 Cor. 15:23.

14. Unsay mahitabo sa mga dinihogan nga mamatay panahon sa presensiya sa Kristo?

¹⁴ Ang mga dinihogan karon nga mamatay banhawon dayon ngadto sa langit. Gipamatud-an ni sa giingon ni Pablo sa 1 Corinto 15:51, 52: “Dili kitang tanan mangatulog sa kamatayon, apan kitang tanan mangausab, sa daklit, sa pagpamilok sa mata, panahon sa kataposang trompeta.” Kini nga mga pulong ni Pablo padayong nagakatuman karon! Dihang mabanhaw kining mga igsoon sa Kristo, sila magmalipayon gayod; ila nang ‘makauban kanunay ang Ginoo.’​—1 Tes. 4:17.

15. Unsa unyay buluhaton niadtong mangausab “sa pagpamilok sa mata”?

¹⁵ Gisultihan ta sa Bibliya kon unsay buhaton didto sa langit niadtong mangausab “sa pagpamilok sa mata.” Si Jesus miingon kanila: “Sa usa nga magmadaogon ug magtuman sa akong mga buhat hangtod sa kataposan, ihatag nako kaniya ang awtoridad ibabaw sa kanasoran, sama sa awtoridad nga akong nadawat gikan sa akong Amahan. Ug bantayan niya ang katawhan pinaagig bunal nga puthaw aron mangadugmok sila samag kulonon nga mga sudlanan.” (Pin. 2:26, 27) Mosunod sila sa ilang Komandante ug ilang bantayan ang mga nasod pinaagig bunal nga puthaw.​—Pin. 19:11-15.

16. Sa unsang paagi daghan ang magmadaogon batok sa kamatayon?

¹⁶ Klaro nga ang mga dinihogan magmadaogon batok sa kamatayon. (1 Cor. 15:54-57) Pinaagi sa ilang pagkabanhaw, makatabang sila sa pagwagtang sa tanang pagkadaotan sa yuta panahon sa umaabot nga gubat sa Armagedon. Minilyon pang Kristohanong mga lalaki ug babaye ang ‘makalabang sa dakong kasakitan’ ug makapuyo sa bag-ong kalibotan. (Pin. 7:14) Ilang makita ang laing kadaogan batok sa kamatayon​—ang pagbanhaw sa bilyonbilyong tawo nga nangamatay kaniadto. Imadyina kon unsa ka malipayon kanang panahona! (Buh. 24:15) Ug ang tanan nga bug-os nga magmaunongon kang Jehova magmadaogon sab batok sa napanunod nga kamatayon. Sila mahimong mabuhi sa walay kataposan.

17. Unsay gidasig kanato sa 1 Corinto 15:58 nga atong buhaton karon?

¹⁷ Ang tanang Kristohanon nga buhi karon angayng magmapasalamaton sa makapahupayng mga pulong bahin sa pagkabanhaw nga gisulat ni Pablo ngadto sa mga taga-Corinto. Duna tay maayong mga rason nga sundon ang tambag ni Pablo nga himoon ang atong maarangan “diha sa buluhaton sa Ginoo.” (Basaha ang 1 Corinto 15:58.) Kon kanunay natong buhaton ang atong maarangan niana nga buluhaton, makalaom ta sa usa ka malipayon kaayo nga kinabuhi sa umaabot. Kana nga kinabuhi mas nindot pa kay sa bisan unsa nga atong maimadyin. Seguradong magpamatuod nâ nga wala makawang ang atong paghago may kalabotan sa Ginoo.