Angay Ka Bang Mag-ampo Kang Jesus?

GIISIP sa pipila ka tawo nga husto ang pag-ampo kang Jesus. Sa Alemanya daghan ang gitudloan sa mga bata pa nga sa dili pa sila mangaon kinahanglang akobon nila ang ilang mga kamot ug magpasalamat kang Jesu-Kristo.

Sumala sa Bibliya, si Jesus sa pagkatinuod adunay taas kaayong posisyon sa langit. Ugaling, kana ba nagpasabot nga angay kitang mag-ampo kaniya? Ikaw tingali lakip niadtong kinsa, tungod sa gugma alang kang Jesus, nagatumong sa mga pag-ampo ngadto kaniya, apan unsay paghunahuna mismo ni Jesus sa maong mga pag-ampo?

Una, nganong mitungha man kini nga pangutana? Tungod kay ang Bibliya nag-ingon nga si Jehova nga Diyos mao ang “Tigpatalinghog sa pag-ampo.” Nan, dili ikatingala nga ang mga alagad sa Diyos sa karaang mga panahon, sama sa mga Israelinhon, nag-ampo ngadto lamang kang Jehova nga Diyos, ang Labing Gamhanan.​—Salmo 5:1, 2; 65:2.

Nausab ba ang mga butang sa dihang si Jesus, ang Anak sa Diyos, mianhi sa yuta sa pagluwas sa katawhan gikan sa sala ug kamatayon? Wala, ang mga pag-ampo gitumong gihapon ngadto kang Jehova. Sa dinhi pa sa yuta si Jesus mismo subsob nga nag-ampo ngadto sa iyang langitnong Amahan, ug iyang gitudloan ang uban sa pagbuhat niana. Hunahunaa lamang ang sulondang pag-ampo, nga usahay gitawag nga Pag-ampo sa Ginoo o ang Amahan Namo, nga maoy usa sa labing-iladong mga pag-ampo sa kalibotan. Si Jesus wala magtudlo kanato sa pag-ampo ngadto kaniya; siya naghatag kanato niini nga sulondan: “Amahan namo sa mga langit, balaana ang imong ngalan.”​—Mateo 6:6, 9; 26:39, 42.

Karon atong tan-awon ang ulohan sa bug-os pa pinaagi sa pagsusi kon unsa sa pagkatinuod ang pag-ampo.

Unsa ang Pag-ampo?

Ang matag pag-ampo maoy usa ka porma sa pagsimba. Ang The World Book Encyclopedia nagpamatuod niini, nga nag-ingon: “Ang pag-ampo maoy usa ka porma sa pagsimba diin mahimong magtanyag ang usa ka tawo ug debosyon, pasalamat, kumpisal, o pangaliyupo ngadto sa Diyos.”

Sa usa ka okasyon si Jesus nag-ingon: “Kini nahisulat, ‘Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.’” Gisunod ni Jesus ang pasukaranang kamatuoran nga ang pagsimba​—ingon man usab ang mga pag-ampo—​itumong lamang ngadto sa iyang Amahan, si Jehova nga Diyos.​—Lucas 4:8; 6:12.

Pag-ila Kang Jesus Diha sa Atong mga Pag-ampo

Si Jesus namatay ingong usa ka halad lukat alang sa katawhan, gibanhaw sa Diyos, ug gibayaw ngadto sa usa ka labawng posisyon. Sama sa imong mahanduraw, kining tanan naghatag kausaban mahitungod sa dalawatong mga pag-ampo. Sa unsang paagi?

Gibatbat ni apostol Pablo ang dakong impluwensiya nga nahatag sa posisyon ni Jesus diha sa pag-ampo ingon sa mosunod: “Tungod niini mismong katarungana usab ang Diyos mibayaw kaniya ngadto sa usa ka labaw nga katungdanan ug sa maluloton mihatag kaniya sa ngalan nga labaw sa tanang uban pa nga ngalan, aron nga sa ngalan ni Jesus mangapiko ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.”​—Filipos 2:9-11.

Ang mga pulong nga “sa ngalan ni Jesus mangapiko ang tanang tuhod” nagpasabot ba nga kita angayng mag-ampo ngadto kaniya? Dili. Ang nalangkit nga Gregong mga pulong dinhi “nagpaila sa ngalan nga niana kadtong nagapiko sa tuhod mahiusa, nga ang tanan mahiusa (πᾶν γόνυ) sa pagsimba. Ang ngalan nga nadawat ni Jesus nagapalihok sa tanan sa nahiusang pagsimba.” (A Grammar of the Idiom of the New Testament, ni G. B. Winer) Sa pagkatinuod, aron mahimong dalawaton ang usa ka pag-ampo, kini kinahanglang itanyag “sa ngalan ni Jesus,” apan kini, hinunoa, itumong ngadto kang Jehova nga Diyos ug magsilbi alang sa iyang kahimayaan. Tungod niining katarongana, si Pablo nag-ingon: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos.”​—Filipos 4:6.

Sama nga ang usa ka dalan motultol ngadto sa usa ka destinasyon, sa ingon si Jesus mao ang “dalan” nga motultol ngadto sa Diyos nga Labing Gamhanan. “Ako ang dalan ug ang kamatuoran ug ang kinabuhi. Walay usa nga makaadto sa Amahan gawas kon pinaagi kanako,” gitudloan ni Jesus ang mga apostoles. (Juan 14:6) Busa, angay natong itanyag ang atong mga pag-ampo ngadto sa Diyos pinaagi kang Jesus ug dili direkta ngadto kang Jesus mismo.a

‘Apan,’ ang pipila tingali mangutana, ‘dili ba giasoy man sa Bibliya nga ang tinun-ang si Esteban ug si apostol Juan nakigsulti kang Jesus sa langit?’ Tinuod kana. Ugaling, kadtong mga hitaboa wala maglangkit sa pag-ampo, kay si Esteban ug Juan ang matag usa nakakita kang Jesus diha sa panan-awon ug nakigsulti kaniya nga direkta. (Buhat 7:56, 59; Pinadayag 1:17-19; 22:20) Hinumdomi nga ang yanong pagpakigsulti bisan ngadto sa Diyos wala magpasabot nga kini mismo usa na ka pag-ampo. Si Adan ug Eva nakigsulti sa Diyos, nagtanyag ug mga pasangil tungod sa ilang dakong sala, sa dihang gihukman Niya sila human sa ilang sala sa Eden. Ang ilang pagpakigsulti kaniya nianang paagiha dili usa ka pag-ampo. (Genesis 3:8-19) Busa, dili husto ang pagpunting kang Esteban o Juan nga nakigsulti kang Jesus ingong ebidensiya nga kita sa pagkatinuod angayng mag-ampo ngadto kaniya.

Sa Unsang Paagi ‘Gitawag’ ang Ngalan ni Jesus?

Ikaw ba may nagpabiling mga pagduhaduha, nga sa gihapon naghunahuna nga husto ang pag-ampo ngadto kang Jesus? Usa ka babaye misulat sa usa ka sangang buhatan sa Watch Tower Society: “Ikasubo, ako dili gihapon kombinsido nga ang unang mga Kristohanon wala mag-ampo ngadto kang Jesus.” Diha sa iyang hunahuna ang mga pulong ni Pablo sa 1 Corinto 1:2, diin iyang gihisgotan ang “tanan nga sa bisan diin nagatawag sa ngalan sa atong Ginoo, si Jesu-Kristo.” Angay nga matikdan, hinunoa, nga sa orihinal nga pinulongan, ang pulong “pagatawgon” mahimong magpasabot sa mga butang gawas sa pag-ampo.

Sa unsang paagi ang ngalan ni Kristo ‘gitawag’ bisan diin? Usa ka paagi mao nga ang mga sumusunod ni Jesus sa Nasaret sa publiko nag-ila kaniya nga mao ang Mesiyas ug “Manluluwas sa kalibotan,” nga naghimog daghang milagrosong mga buhat diha sa iyang ngalan. (1 Juan 4:14; Buhat 3:6; 19:5) Busa, ang The Interpreter’s Bible nag-ingon nga ang mga pulong “sa pagtawag sa ngalan sa atong Ginoo . . . nagpasabot nga ipaila ang iyang pagkaginoo inay kay sa mag-ampo ngadto kaniya.”

Ang pagdawat kang Kristo ug pagpakitag pagtuo diha sa iyang giulang dugo, nga makahimo sa pagpasaylo sa atong mga sala, usab maglakip sa “pagtawag sa ngalan sa atong Ginoo, si Jesu-Kristo.” (Itandi ang Buhat 10:43 sa 22:16.) Ug kita sa literal maghisgot sa ngalan ni Jesus sa dihang kita mag-ampo ngadto sa Diyos pinaagi kaniya. Busa, samtang ginapakita nga kita makahimo sa pagtawag sa ngalan ni Jesus, ang Bibliya wala magpaila nga kita angayng mag-ampo ngadto kaniya.​—Efeso 5:20; Colosas 3:17.

Kon Unsay Mahimo ni Jesus Alang Kanato

Sa tin-aw gisaad ni Jesus sa iyang mga tinun-an: “Kon kamo mangayog bisan unsa sa akong ngalan, kini akong pagabuhaton.” Kini nagkinahanglan bang mag-ampo ngadto kaniya? Dili. Ang paghangyo igatumong ngadto kang Jehova nga Diyos​—apan diha sa ngalan ni Jesus. (Juan 14:13, 14; 15:16) Atong ihangyo sa Diyos nga ang Iyang Anak, si Jesus, magagamit sa iyang dakong gahom ug awtoridad tungod ug alang kanato.

Sa unsang paagi nakigkomunikar si Jesus sa iyang matuod nga mga sumusunod karong adlawa? Ang paghubit ni Pablo sa kongregasyon sa dinihogang mga Kristohanon mahimong magsilbing usa ka ilustrasyon. Siya nagtandi niini ngadto sa usa ka lawas ug si Jesu-Kristo mao ang ulo. Ang “ulo” nagsuplay sa mga membro sa espirituwal nga lawas sa ilang mga panginahanglan pinaagi sa “mga lutahan ug sa mga ugat sa lutahan,” o ang mga paagi ug mga kahikayan sa pagtagana sa iyang kongregasyon sa espirituwal nga pagkaon ug pagtultol. (Colosas 2:19) Sa samang paagi, si Jesus karong adlawa nagagamit ug “mga gasa sa lalaki,” o takos sa espirituwal nga mga lalaki, aron manguna diha sa kongregasyon, bisan ang pagpadapat ug pagtul-id kon kini kinahanglanon. Walay tagana alang sa mga membro sa kongregasyon nga makigkomunikar nga direkta kang Jesus ug mag-ampo ngadto kaniya, apan sila tinong angay gayod​—oo, kinahanglang​—mag-ampo ngadto sa Amahan ni Jesus, si Jehova nga Diyos.​—Efeso 4:8-12.

Sa Unsang Paagi Pasidunggan Nimo si Jesus?

Mahitungod sa kaluwasan sa katawhan, pagkahinungdanon ang papel ni Jesus! Si apostol Pedro nag-ingon: “Walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.” (Buhat 4:12) Nahibalo ka ba sa kahinungdanon sa ngalan ni Jesus?

Pinaagi sa dili pagdirekta sa atong mga pag-ampo nga personal ngadto kang Jesus, kita wala magpaubos sa iyang posisyon. Hinunoa, si Jesus ginapasidunggan kon kita mag-ampo diha sa iyang ngalan. Ug ingon nga ginapasidunggan sa mga anak ang ilang mga ginikanan pinaagi sa pagkamasinugtanon, kita nagapasidungog kang Jesu-Kristo pinaagi sa pagsugot sa iyang mga sugo, ilabina ang bag-ong sugo sa paghigugma sa usag usa.​—Juan 5:23; 13:34.

Dalawatong mga Pag-ampo

Ginatinguha ba nimo ang pagtanyag ug dalawatong mga pag-ampo? Nan idirekta kini ngadto kang Jehova nga Diyos, ug buhaton kana diha sa ngalan sa iyang Anak, si Jesus. Tun-i ang kabubut-on sa Diyos, ug himoang ang imong mga pag-ampo magbanaag niana nga pagsabot. (1 Juan 3:21, 22; 5:14) Pagbatog kusog gikan sa mga pulong sa Salmo 66:20: “Dalayegon ang Diyos, kinsa wala magsalikway sa akong pag-ampo, ni sa iyang mahigugmaong kalulot gikan kanako.”

Ingon sa atong nakita, ang mga pag-ampo maoy usa ka porma sa pagsimba nga iya lamang gayod sa Labing Gamhanang Diyos. Pinaagi sa pagtumong sa tanan natong mga pag-ampo ngadto kang Jehova nga Diyos, ginapaila nato nga atong gibutang sa kasingkasing ang gitudlo ni Jesus nga paagi sa pag-ampo: “Amahan namo sa mga langit.”​—Mateo 6:9.

[Footnote]