Mga Kristohanon—Malig-on Apan Mauyonon
ANG harianong kahoyng oak maoy larawan sa kalig-on. Dihang huyopon sa kusog nga hangin, kini walay problema sa pagbarog batok kanila. Samtang ang malig-ong oak makalahutay sa daghang mga bagyo tungod sa kalig-on niini ug may igong kagahi ug katig-a, ang gamayng dahon sa sagbot makalahutay usab apan sa lahi nga rason. Ang sekreto niini? Pagkamalubayon o pagkamauyonon. Kini molubaylubay apan dili mabali bisan sa puwersa sa hangin.
Ang pagkamalubayon o kagahi—nan, hain, ang labing hinungdanon? Sa pagkatinuod, gikinahanglan sa Kristohanon kining duha. Apan, ang pagtimbang sa kalig-on ug kamauyonon tingalig kulang bisan taliwala sa pila ka katawhan sa Diyos. Sila dunay hataas nga mga prinsipyo, apan dunay pila nga daw dili mauyonon. Ang uban daw sama sa ‘tangbo nga ginakusokuso sa hangin.’ (Mateo 11:7) Sila madala sa mga kalisod ug sa mga impluwensiya niining daotang kalibotan. O tingali mapinasagdanon sila hangtod sa punto nga matugoton.
Sumala sa giingon ni Solomon: “Adunay tinudlong panahon sa tanang butang.” (Ecclesiastes 3:1) Busa, kanus-a nga ikaw magmaistrikto ug magmauyonon?
Kanus-a nga Magmalig-on
Kas-a, si Haring Saul sa Israel tin-aw nga gisugo: “Busa lakaw, ug hampaka si Amalek [usa ka kaawayng nasod] ug hutda paglaglag ang tanan nga anaa niya, ug ayaw pagkaluoy kaniya, ug patya sila, lalaki ug babaye, bata ug masuso, baka ug karnero, kamelyo ug asno.” (1 Samuel 15:3) Ang mga Amalekanhon dunay kasaysayan nga nagbatok sa Diyos ug sa iyang katawhan ug busa takos laglagon. (Deuteronomio 25:17-19) Apan, “si Saul ug ang katawhan naluoy kang Agag [ang hari sa Amalek] ug sa labing maayo sa mga karnero ug sa mga baka . . . , apan wala bumuot sa paglaglag nga hurot kanila.” Wala mouyon si Jehova sa pagpiko ni Saul sa mga balaod, “Tan-awa!” miingon ang manalagnang Samuel, “Ang pagsugot labi pang maayo kay sa halad.”—1 Samuel 15:9-22.
Ang pagtulon-an niini dayag: Walay pagkamauyonon kon bahin sa pagsugot sa Diyos. “Kay ang paghigugma alang sa Diyos mao,” miingon si apostol Juan, “nga pagabantayon ta ang mga sugo sa [Diyos]; ug ang iyang mga sugo dili mabug-at.” (1 Juan 5:3) Ang eksperyensiya ni Sadrach, Meshach, ug Abednego nagpakita kon asa kutob nga ang mga alagad sa Diyos andam sa pagpakita sa iyang pagsugot. Sila midumili sa pagsimba sa larawan nga gipatindog ni haring Nabucodonosor sa Babilonya. Ngano? Tungod kay ang balaod sa Diyos tin-awng nagtunglo sa pagsimba sa mga diyosdiyos. (Exodo 20:4-6) Sila wala mangatarongan nga gikinahanglan sa mga sirkumstansiya ang pagpiko niining maong sugo sa Diyos. Hinunoa, sila sa walay pagkompromiso mipuli sa kamatayon alang sa pagsugot.—Daniel 3:16-18.
Wala kaayoy problema ang kadaghanang mga Kristohanon sa pagsunod sa klarong mga kasugoan sa Bibliya. Apan ang mga Kristohanon gisugo: “Magmasinugtanon kamo niadtong nagapanguna kaninyo.” (Hebreohanon 3:17) Ang mga ansiano sa kongregasyon tingali mohatag ug espisipikong oras sa panagtagbo sa kongregasyon alang sa pag-alagad sa kanataran. O tingali moingon nga ang kasangkapan sa Kingdom Hall gamiton sa usa ka paagi. Tinuod, walay teksto sa Bibliya nga nag-ingon kon unsaon sa pagsibo o kinsa ang mosibo sa thermostat. Apan, kon maghimog mga desisyong ingon niini ang mga ansiano, dili ba maayong butang ang pagsunod?
Sa susama, tingali ang bana mohimog nagkalainlaing desisyon alang sa iyang pamilya. Ang Kristohanong asawa malagmit dili mouyon sa iyang paghukom sa pila ka bahin, apan siya maningkamot sa “pagsunod sa kasugoan sa iyang bana.” (Roma 7:2) Ang pagsunod sa mga ansiano, sa mga bana, sa mga ginikanan, ug sa mga amo angay dili ipadaplin sa ngalan sa pagkamauyonon.—Colosas 3:18-24.
Kon Kanus-a Magmauyonon
Bisan pa, may panahon usab nga magmauyonon. Gipakita kini ni apostol Pablo dihang miingon siya: “Ipaila ang inyong pagkamakataronganon ngadto sa tanang tawo.” (Filipos 4:5) Ang Gregong pulong nga gigamit ni apostol Pablo dinhi nagkahulogan “dili sa pag-insister sa pagsunod sa letra por letra sa balaod; kini nagpahayag nga ang pagkamahunahunaon nga nagatan-aw sa ‘tinawhanon ug makataronganong paagi sa mga kamatuoran sa usa ka kaso.’” (W. E. Vine, An Expository Dictionary of New Testament Words) Ang pagkamataronganon maoy pagkamainandamon sa pagpasibo sa naglungtad nga mga kahimtang.
Pananglitan, usa ka misyonero nga nag-alagad sa langyaw nga nasod tingali makaamgo nga ang lokal nga mga lagda sa pamatasan lahi sa nasod nga siya gipadako. Apan kon iyang lantawong ubos ang mga paagi sa lokal nga mga tawo ug modumili sa pagpasibo, unsa kaha ka epektibo ang iyang ministeryo? Busa sa maalamon mopasibo siya sa maayong mga paagi sa bag-ong kultura.—1 Corinto 9:19-23.
Makaikag, human gihisgotan ang duha ka babaye diha sa kongregasyon nga nag-away, gidasig ni Pablo ang mga Kristohanon sa Filipos nga magmakataronganon. (Filipos 4:2-5) Bisag wala kita suginli ni Pablo sa hinungdan sa panag-away, ang kakulang sa pagkamataronganon mao ang hinungdan sa nadaot nga relasyon. Walay ganahang moduol sa usa ka tawo nga kritikal o sobra ka pugoso. “Dili ka maglabi sa pagpakamatarong,” nagpasidaan si Solomon, “ni magpalabi ikaw sa pagkamanggialamon. Ngano man nga laglagon mo ang imong kaugalingon?”—Ecclesiastes 7:16.
Ang mga Kristohanon angay mohatag luna sa mga dili-kahingpitan sa uban. Pagkamaayo kon atong tan-awon ang mga butang sumala sa tinamdan sa ubang tawo! Apan makasubo, ang ubang mga Kristohanon sa karaang Corinto nabalaka kaayo sa ilang personal nga “mga katungod” nga tungod niana midangop sila sa pagkiha sa kaubang mga magtutuo. Pinaagi sa pagreklamo sa ilang mga problema atubangan sa mga dili-magtutuo, sila naghatag kaulawan dili lang sa kongregasyon kondili nagpadako usab sa kal-ang sa ilang tunga.—1 Corinto 6:1-6.
Busa gidasig ni Pablo ang nasilong mga Kristohanon sa Corinto sa pagbaton ug mauyonong espiritu. Siya miawhag: “Sa pagkamatuod, kini kaparotan kaninyo tungod kay kamo nagkihaay sa usag usa. Nganong dili na man lang kamo magpadaog? Nganong dili na man lang kamo magpalimbong?” (1 Corinto 6:7) Isipon sa Kristohanon nga ganansiya ang pagbaton ug maayong relasyon uban sa iyang espirituwal nga mga igsoong lalaki ug babaye.
Ang pagkamakataronganon ilabinang angay niadtong dunay awtoridad. Pananglitan, ang mga ginikanan tingali mohatag oras kon kanus-a moabot sa gabii ang ilang mga anak nga lalaki ug babaye. Apan ingnon ta nga mohangyo ang usa ka anak nga tugotan sa usa ka higayon? Dili ba mas maayong tagdon ang espisipikong mga kahimtang nga nalangkit? Ug unsay ikasulti bahin sa Kristohanong mga ansiano? Dili ba ang pagkamataronganon maoy usa sa ilang mga kuwalipikasyon? (1 Timoteo 3:3) Oo. Apan kanus-a ug sa unsang paagi ilang ipakita kining hiyasa?
Mga Ansiano—Malig-on Apan Mauyonon
Gitandi ni apostol Pablo kas-a ang mga tawong “makataronganon” batok niadtong mga tawong “lisod pahimut-an.” (1 Pedro 2:18) Tingali motanyag ang pila ka ansiano ug mga sugyot sa pagtabang sa igsoon nga mouswag ang iyang katakos sa pagsulti. Apan kon mosugyot ang ansiano ug lisod nga sukdanan ug dili motagad sa edukasyon, katakos, ug mga kahimtang sa igsoon, unsay mahitabo? Tingali masuko sa tambag ang igsoon o maluya, moingon nga ang mga ansiano “lisod pahimut-an.”
Kinahanglang mauyonon usab ang mga ansiano sa pagpadapat sa nagkalainlaing mga balaod sa kongregasyon. Dili gayod nila tugotan ang mga balaod ‘mopahimo sa pulong sa Diyos nga walay kapuslanan’ pinaagi sa paghatag sobrang gibug-aton sa mga balaod kay sa hingpit nga mga prinsipyo sa Pulong ni Jehova.—Mateo 15:6; 23:23.
Maayo nga magmauyonon ang mga ansiano kon dili malapas ang mga prinsipyo sa Kasulatan tungod sa maong pagkamauyonon. Pananglitan, tingali sila moingon nga sa katibuk-an, diha sa daghang tawong mga kombensiyon, wala aghata ang paggahin ug mga lingkoranan. Apan kana bang balaora ipatuman diha sa usa ka gamayng kongregasyon nga diin daghan ang mga lingkoranan? O tingali bation sa mga ansiano nga sa katibuk-an ang usa ka porma sa pamiste—sama sa diyaket o kurbata alang sa mga lalaki—maoy angay alang sa balay-ug-balay nga pagsangyaw. Mao kanay nahitabo diha sa usa ka kongregasyon sa yuta sa South America. Apan nahibaloan sa usa ka ansiano didto nga mihunong ang usa ka batan-ong lalaki sa pagsangyaw sa maayong balita ngadto sa uban. Ang katarongan? Dili siya makaabot sa pagpalit ug diyaket ug kurbata. Napalandong sa ansiano nga ang pagkamauyonon ang gikinahanglan ug busa gidasig ang batan-on sa pagsugod sa pakigbahin sa iyang pagtuo ngadto sa uban.
Ang pagkamauyonon kinahanglan ipakita usab sa pag-atiman sa hudisyal nga mga kaso diha sa kongregasyon. Bisag kinahanglan nga ipalagpot ang makasasala, komusta kon magpakita ug paghinulsol? Si Jehova naghatag ug tukmang sumbanan sa pag-atiman sa mga tawo sa Nineve. Gisultihan sa Diyos si Jonas: “Kap-atan na lamang ka adlaw ug ang Nineve pagalaglagon.” Bisan pa, dihang ang mga tawo naghinulsol, si Jehova wala moinsister sa pagsunod sa gipahayag nga kalaglagan. Iyang giila nga nausab na ang mga kahimtang. (Jonas 3:4, 10) Sa susama, ang mga ansiano angay malipay sa ‘pagpasaylo sa madagayaon gayod’ kon dunay tinuod nga ebidensiya sa tinuod nga paghinulsol.—Isaias 55:7.
Ang pagbaton ug pagkatimbang tali sa pagkamalig-on ug pagkamauyonon dili sayon. Ang dili-hingpit nga tawo daw kiling sa mga paghingapin. Apan ang mga Kristohanong naningkamot nga magmalig-on apan mauyonon dagayang gantihan. Tungod kay sila naningkamot nga mahimong mauyonon, ilang tagamtamon ang mas maayong relasyon sa uban ug malikayan ang dakong emosyonal nga problema. Dugang pa, sanglit malig-on man ang tinudlong mga ansiano, ang pagkamakanunayon sa maayong binuhatan ingong mga maghuhupot-sa-integridad, maoy maayong pananglitan nga makadani sa pagsalig ug sa kooperasyon sa kongregasyon, samtang ang tanan magpadayon sa paglaom sa walay kataposang kinabuhi.—Isaias 32:2; 1 Corinto 15:58.