Ang Paggamit ni Jehova sa “Kabuangan” sa Pagluwas Niadtong Nagatuo
“Sanglit, diha sa kaalam sa Diyos, ang kalibotan pinaagi sa kaalam niini wala makaila sa Diyos, gikahimut-an sa Diyos ang pagluwas sa mga nagatuo pinaagi sa kabuangan niadtong ginawali.”—1 CORINTO 1:21.
1. Sa unsang diwa nga gamiton ni Jehova ang “kabuangan,” ug sa unsang paagi nahibalo kita nga ang kalibotan ug ang kaalam niini wala makaila sa Diyos?
UNSA? Mogamit ba god si Jehova ug binuang? Dili gayod! Apan siya makahimo ug nagagamit nianang daw binuang sa kalibotan. Iyang himoon kini aron maluwas ang mga tawo nga nakaila ug nahigugma kaniya. Pinaagi sa iyang kaalam, ang kalibotan dili makadangat sa pag-ila sa Diyos. Gipatin-aw kini ni Jesu-Kristo sa dihang siya miingon diha sa pag-ampo: “Amahan nga matarong, ang kalibotan, sa pagkatinuod, wala makaila kanimo.”—Juan 17:25.
2. Sa unsang paagi ang mga paagi ni Jehova ug ang mga paagi sa kalibotan daw managsamang tan-awon, apan unsa ang mga kamatuoran?
2 Ang mga pulong ni Jesus nagpaila nga lahi ang mga paagi ni Jehova gikan nianang sa kalibotan. Sa atubangan ang katuyoan sa Diyos ug ang katuyoan niining kalibotana daw managsamang tan-awon. Daw ang mga tumong niining kalibotana may panalangin sa Diyos. Pananglitan, ang Bibliya nag-ingon nga ang Diyos magtukod ug usa ka matarong nga kagamhanan nga mohatag diha sa kinabuhi ug kalinaw, kalipay, ug kauswagan sa katawhan sa yuta. (Isaias 9:6, 7; Mateo 6:10) Sa susama, ang kalibotan nagpalanog sa iyang katuyoan sa paghatag sa mga tawo ug kalinaw, kauswagan, ug maayong kagamhanan pinaagi sa gitawag nga bag-ong kalibotan nga kahikayan. Apan ang mga katuyoan ni Jehova ug ang katuyoan sa kalibotan dili managsama. Ang katuyoan ni Jehova mao ang pagbayaw sa iyang kaugalingon ingon nga mao ang Supremong Soberano sa uniberso. Iyang himoon kini pinaagi sa usa ka langitnong kagamhanan nga mopapha sa tanang mga kagamhanan sa yuta. (Daniel 2:44; Pinadayag 4:11; 12:10) Busa ang Diyos walay gikausahan niining kalibotana. (Juan 18:36; 1 Juan 2:15-17) Maoy hinungdan nga naghisgot ang Bibliya ug duha ka matang sa kaalam—“ang kaalam sa Diyos” ug “ang kaalam sa kalibotan.”—1 Corinto 1:20, 21.
Ang Pangunang Depekto sa Kaalam sa Kalibotan
3. Bisag ang kaalam sa kalibotan daw madanihon nga tan-awon, nganong ang gisaad sa tawo nga bag-ong kalibotan nga kahikayan dili gayod makatagbaw?
3 Alang niadtong wala matultoli sa kaalam sa Diyos, ang kaalam sa kalibotan daw madanihon. Anaa ang hamiling-paminawon nga mga pilosopiya sa kalibotan nga madanihon sa hunahuna. Ang libolibong mga institusyon sa mas hataas nga edukasyon nagahatag ug impormasyon nga giisip sa kadaghanan nga gikan sa labing bantogang mga hunahuna sa katawhan. Ang dagko kaayong mga librariya puno sa natigom nga kahibalo sa mga kasiglohang eksperyensiya sa tawo. Bisan pa niini, hinunoa, ang bag-ong kalibotan nga kahikayan nga gilaraw sa mga magmamando sa kalibotan maoy pagmando lamang sa dili-hingpit, namansahan-sa-sala, mamatay nga mga tawo. Busa, ang maong kahikayan maoy dili-hingpit, nagasobli sa daghang kasaypanang nahimo sa miagi ug dili gayod makatagana sa tanang mga panginahanglan sa katawhan.—Roma 3:10-12; 5:12.
4. Nailalom sa unsa ang gilaraw nga bag-ong kalibotan nga kahikayan, ug uban sa unsa nga sangpotanan?
4 Ang gilaraw sa tawo nga bag-ong kalibotan nga kahikayan nailalom dili lamang sa tawhanong kahuyangan kondili sa impluwensiya usab sa daotang espiritu nga mga linalang—oo, si Satanas nga Yawa ug ang iyang mga demonyo. Gibutaan ni Satanas ang mga hunahuna sa mga tawo aron sila dili motuo sa “mahimayaong maayong balita mahitungod kang Kristo.” (2 Corinto 4:3, 4; Efeso 6:12) Sa ingon, ang kalibotan nag-antos sa nagkalainlaing balatian. Kini nakigbisog ug nag-antos sa iyang malaglagong pagsulay sa pagmando sa kaugalingon nga walay tabang sa Diyos ug walay pagtagad sa balaan nga kabubut-on. (Jeremias 10:23; Santiago 3:15, 16) Busa, sumala sa gipamulong ni apostol Pablo, “ang kalibotan pinaagi sa kaalam niini wala makaila sa Diyos.”—1 Corinto 1:21.
5. Unsa ang labing dakong depekto sa kaalam sa kalibotan?
5 Nan, unsay ikasulti bahin sa labing dakong depekto sa kaalam niining kalibotana, apil ang mga plano niini alang sa usa ka bag-ong kalibotan nga kahikayan? Kini mao ang pagsalikway sa kalibotan sa butang nga dili gayod masalikway—ang supremo nga pagkasoberano ni Jehova nga Diyos. Mapahitas-on kining nagadumili sa pag-ila sa pagkasoberano sa Diyos. Tinuyo nga gikalimtan sa kalibotan si Jehova sa iyang tanang mga plano ug misalig sa iyang kaugalingong katakos ug mga laraw. (Itandi ang Daniel 4:31-34; Juan 18:37.) Tin-aw nga gipahayag sa Bibliya nga “ang pagkahadlok kang Jehova maoy sinugdan sa kaalam.” (Proverbio 9:10; Salmo 111:10) Bisan pa, ang kalibotan wala gani makakat-on niining pangunang kinahanglanon sa kaalam. Nan, kon walay balaanong pagpaluyo, unsaon kini sa paglampos?—Salmo 127:1.
Pagsangyaw sa Gingharian—Binuang o Praktikal?
6, 7. (a) Unsay ginasangyaw niadtong gitultolan sa kaalam sa Diyos, apan unsay paglantaw kanila sa kalibotan? (b) Sumala sa kang kinsang kaalam nanagwali ang klero sa Kakristiyanohan, ug unsa ang mga resulta?
6 Sa laing bahin, kadtong nakaila sa Diyos nagapasundayag sa kaalam sa Diyos ug nagapatultol niana. Sumala sa gitagna ni Jesus, ilang ginasangyaw “kining maayong balita sa gingharian . . . sa tibuok ginapuy-ang yuta.” (Mateo 24:14; 28:19, 20) Ang mao bang pagsangyaw praktikal karong adlawa, bisag ang atong yuta napuno sa pag-awayay, polusyon, kakabos, ug tawhanong pag-antos? Alang sa mga maalamon-sa-kalibotan kini nga pagwali mahitungod sa Gingharian sa Diyos daw dako nga binuang, dili praktikal. Ilang gilantaw ang mga magwawali sa Gingharian sa Diyos ingong mga samokan nga nagbabag sa kagamhanan ug nagpahinay sa kauswagan niini ngadto sa mithianong politikanhong kagamhanan. Niini sila gipaluyohan sa mga klero sa Kakristiyanohan, nga nagwali sumala sa kaalam niining kalibotana ug wala sultihi ang mga tawo sa ilang gikinahanglang masayran bahin sa bag-ong kalibotan sa Diyos ug sa Gingharian nga kagamhanan niini, bisag mao kini ang pangunang pagtulon-an ni Kristo.—Mateo 4:17; Marcos 1:14, 15.
7 Gihisgotan sa manalaysay nga si H. G. Wells kini nga kapakyasan sa klero sa Kakristiyanohan. Siya misulat: “Talagsaon ang dakong pasiugda nga gihatag ni Jesus sa pagtulon-an nianang iyang gitawag nga Gingharian sa Langit, ug sa pagtanding kini wala hatagig importansiya diha sa paagi ug pagtulon-an sa kadaghanang Kristohanong mga iglesya.” Bisan pa, aron ang mga tawo niining kaliwatana makabaton ug kinabuhi, sila kinahanglang makadungog una bahin sa natukod nga Gingharian sa Diyos, ug aron matuman kana kinahanglang dunay mosangyaw sa maayong balita mahitungod niana.—Roma 10:14, 15.
8. Nganong ang pagwali sa maayong balita sa Gingharian mao ang labing praktikal nga butang nga buhaton karong adlawa, apan unsang buhat ang walay malungtarong kaayohan?
8 Nan, ang pagsangyaw sa maayong balita sa Diyos, mao ang labing praktikal nga butang nga pagabuhaton karong adlawa. Tungod kini kay ang mensahe sa Gingharian nagahatag ug tinuod nga paglaom nga makahatag sa tawhanong mga kasingkasing ug kalipay sa panahon niining kataposang mga adlaw sa dihang ‘moabot ang kritikal nga mga panahon nga lisod sagubangon.’ (2 Timoteo 3:1-5; Roma 12:12; Tito 2:13) Samtang ang kinabuhi niining kalibotana walay kasegurohan ug mubo, ang kinabuhi diha sa bag-ong kalibotan sa Diyos maoy walay-kataposan, tugob sa kalipay, kadagaya, ug kalinaw dinhi mismo sa yuta. (Salmo 37:3, 4, 11) Sama sa gipamulong ni Jesus, “unsa may kapuslanan alang sa usa ka tawo kon maangkon niya ang tibuok kalibotan apan pagapildihan sa iyang kalag? o unsay may ikahatag sa tawo nga arang ikailis alang sa iyang kalag?” Kon mawad-an ang tawo sa katungod nga mabuhi diha sa bag-ong kalibotan sa Diyos, unsa may kapuslanan niining kalibotana nga lumalabay? Ang materyal nga mga butang nga gipahimuslan sa maong indibiduwal walay kapuslanan, kawang, ug lumalabay.—Mateo 16:26; Ecclesiastes 1:14; Marcos 10:29, 30.
9. (a) Sa dihang ang usa ka tawo nga gidapit aron mahimong sumusunod ni Jesus mihangyo ug pag-oktaba, unsay gitambag kaniya ni Jesus nga buhaton? (b) Sa unsang paagi ang tubag ni Jesus nagaapektar kanato?
9 Ang usa ka tawo nga gidapit ni Jesus nga mahimong iyang sumusunod miingon: “Tugoti una ako sa pag-adto ug sa paglubong sa akong amahan.” Unsay gitambag kaniya ni Jesus nga buhaton? Nahibalo nga ioktaba sa tawo ang labing hinungdanong buluhaton pinaagi sa yanong paghulat hangtod nga mamatay ang iyang mga ginikanan, si Jesus mitubag: “Pasagdi ang mga patay maoy maglubong sa ilang mga minatay, apan lumakaw ka ug isangyaw ang gingharian sa Diyos.” (Lucas 9:59, 60) Kadtong nagpakitag kaalam pinaagi sa pagsunod kang Kristo dili makabiya sa pagtuman sa ilang buluhaton sa pagsangyaw sa mensahe sa Gingharian. Ang kaalam sa Diyos nagpaamgo kanila nga kining kalibotana ug ang mga magmamando niini hinukman na sa kamatayon. (1 Corinto 2:6; 1 Juan 2:17) Ang mga tigpaluyo sa pagkasoberano sa Diyos nahibalo nga ang bugtong tinuod nga paglaom sa katawhan nahisandig sa balaang pagpangilabot ug sa pagmando. (Zacarias 9:10) Busa samtang kadtong may kaalam niining kalibotana dili motuo sa Gingharian sa Diyos ug dili gusto nianang langitnong kagamhanan, ang mga tawo nga gitultolan sa kaalam sa Diyos nagahimo sa butang nga mohatag ug tinuod nga kaayohan sa ilang isigkatawo, nagaandam kanila alang sa kinabuhing dayon diha sa gisaad nga bag-ong kalibotan ni Jehova.—Juan 3:16; 2 Pedro 3:13.
“Kabuangan Alang Niadtong Nagakalaglag”
10. (a) Sa dihang nakombertir si Saulo sa Tarsus, unsang buluhaton ang iyang gikuha, ug unsay iyang paglantaw niadto? (b) Ilado sa unsa ang karaang mga Grego, apan unsay paglantaw sa Diyos sa ilang kaalam?
10 Si Saulo sa Tarsus, nga nahimong Pablo nga apostol ni Jesu-Kristo, mikuha niining makaluwas-ug-kinabuhi nga buluhaton. Makataronganon ba ang paghunahuna nga sa dihang nakombertir ni Jesu-Kristo si Saulo, Iyang gitudlo siya sa binuang nga buluhaton? Dili kana maoy hunahuna ni Pablo. (Filipos 2:16) Niadtong panahona ang mga Grego mao ang giisip nga labing makinaadmanong mga tawo sa kalibotan. Ilang gipasiatab ang ilang bantogang mga pilosopo ug mga tawong maalamon. Bisan tuod Grego ang sinultihan ni Pablo, siya wala mosunod sa pilosopiya ug kinaadman sa Grego. Ngano? Tungod kay ang kaalam niining kalibotana maoy kabuangan alang sa Diyos.a Si Pablo nangita sa kaalam sa Diyos, nga nagtukmod kaniya sa pagwali sa maayong balita gikan sa balay ug balay. Ang labing dakong Magwawali sa tanang panahon, si Jesu-Kristo, naghatag ug panig-ingnan ug iyang gisugo siya sa pagbuhat sa sama nga buluhaton.—Lucas 4:43; Buhat 20:20, 21; 26:15-20; 1 Corinto 9:16.
11. Sa diwa, unsay gisulti ni Pablo mahitungod sa iyang buluhaton sa pagsangyaw ug sa kaalam sa kalibotan?
11 Si Pablo miingon niini bahin sa iyang buluhaton sa pagwali: “Ako gipadala ni Kristo . . . sa pagwali sa maayong balita, dili pinaagi sa kaigmat sa mga pulong, aron ang kahoy sa pagsakit ni Kristo dili himoon nga walay kapuslanan. Kay ang pulong mahitungod sa kahoy sa pagsakit [halad lukat ni Jesus] kabuangan alang niadtong nagakalaglag, apan alang kanato nga ginaluwas kini maoy gahom sa Diyos. Kay kini ang nahisulat: ‘Akong pagalaglagon ang kaalam sa mga manggialamon, ug ang kinaadman sa mahait ug salabotan akong ihiklin.’ Hain na man ang mga tawong manggialamon [sama sa pilosopo]? Hain na man ang eskriba? Hain na man ang maglalantugi niining sistema sa mga butang? Wala ba pakabinuanga sa Diyos ang kaalam sa kalibotan? Sanglit, diha sa kaalam sa Diyos, ang kalibotan pinaagi sa kaalam niini wala makaila sa Diyos, gikahimut-an sa Diyos ang pagluwas sa mga nagatuo pinaagi sa kabuangan niadtong ginawali.”—1 Corinto 1:17-21.
12. Unsay ginapalampos ni Jehova pinaagi sa “kabuangan niadtong ginawali,” ug unsay reaksiyon niadtong nagatinguha “sa kaalam gikan sa kahitas-an”?
12 Bisag daw dili-katuohan, ang gitawag mismo sa kalibotan nga buang mao kadtong gigamit ni Jehova ingong iyang mga magwawali. Oo, pinaagi sa kabuangan sa ministeryo niini nga mga magwawali, ginaluwas sa Diyos kadtong nagatuo. Gihikay ni Jehova ang mga butang aron ang mga magwawali niining “kabuangan” dili magpasidungog sa ilang kaugalingon, ug ang ubang mga tawo dili sa tukma magpasidungog sa mga tawo nga gikan kanila ilang nadunggan ang maayong balita. Ingon kini niini aron “walay unod ang makapasigarbo diha sa atubangan sa Diyos.” (1 Corinto 1:28-31; 3:6, 7) Tinuod, ang magwawali adunay dakong bahin, apan ang mensahe nga siya gisugo sa pagwali mopalampos sa kaluwasan sa tawo kon siya motuo niana. Kadtong buot sa “kaalam nga gikan sa kahitas-an” dili motamay sa mensahe sa magwawali tungod kay daw buang ug timawa siyang tan-awon, ginalutos, ug nagaduaw sa balay ug balay. Hinunoa, ang mga maaghop nagtahod sa magmamantala sa Gingharian ingong magwawali nga gisugo ni Jehova ug nga nagaabot diha sa ngalan sa Diyos. Ilang hatagan ug dakong importansiya ang mensahe nga ginadala sa magwawali pinaagi sa binaba ug sa pinatik nga panid.—Santiago 3:17; 1 Tesalonica 2:13.
13. (a) Unsay paglantaw sa mga Hudiyo ug sa mga Grego sa pagwali bahin sa paglansang ni Kristo? (b) Gikan sa unsang mga pundok sa mga tawo nga dili daghan ang gitawag aron mahimong mga sumusunod ni Jesus, ug ngano?
13 Nagpadayon sa iyang paghisgot bahin sa mga paagi sa Diyos, si Pablo miingon: “Ang mga Hudiyo nangayo ug mga ilhanan ug ang mga Grego nangita ug kaalam; apan atong giwali ang gilansang nga Kristo, nga alang sa mga Hudiyo usa ka kapangdolan apan alang sa kanasoran kabuangan; apan, alang kanila nga mga tinawag, mga Hudiyo ug mga Grego, si Kristo mao ang gahom sa Diyos ug ang kaalam sa Diyos. Kay ang binuang sa Diyos labi pang maalamon kay sa mga tawo, ug ang kahuyang sa Diyos labi pang kusgan kay sa mga tawo. Palandonga ang iyang pagtawag kaninyo, mga igsoon, dili daghan kaninyo ang mga maalamon sumala sa sukdanan sa tawo, dili daghan ang mga makagagahom, dili daghan ang mga hamili sa ilang pagkatawo; apan gipili sa Diyos ang mga butang nga kabuangan sa kalibotan, aron sa pagpakaulaw sa mga maalamon; ug gipili sa Diyos ang mahuyang sa kalibotan, aron sa pagpakaulaw sa mga kusgan.”—1 Corinto 1:22-27; itandi ang Isaias 55:8, 9.
14. (a) Kon pangutan-on bahin sa ilang mga kredensiyal, unsay ipakita sa mga Saksi ni Jehova? (b) Nganong midumili si Pablo sa pagpahimuot sa mga Grego sa pagpakitag bisan unsang pasundayag sa kaalam sa kalibotan?
14 Sa dinhi pa si Jesus sa yuta, ang mga Hudiyo nangayo ug ilhanan gikan sa langit. (Mateo 12:38, 39; 16:1) Apan mibalibad si Jesus sa paghatag ug bisan unsang ilhanan. Sa susama, ang mga Saksi ni Jehova karong adlawa walay ginapakitang samag-ilhanan nga mga kredensiyal. Hinunoa, ilang ipunting ang ilang buluhaton sa pagwali sa maayong balita, sumala sa narekord diha sa mga bersikulo sa Bibliya sama sa Isaias 61:1, 2; Marcos 13:10; ug Pinadayag 22:17. Ang mga Grego sa karaan nangita ug kaalam, hataas nga edukasyon sa mga butang niining kalibotana. Samtang si Pablo naedukar sa kaalam niining kalibotana, siya midumili sa pagpahimuot sa mga Grego pinaagi sa pagpasundayag sa bisan unsa niana. (Buhat 22:3) Siya misulti ug misulat sa ordinaryo nga Grego sa komun nga mga tawo, inay ang klasikal nga Grego. Gisultihan ni Pablo ang mga taga Corinto: “Sa akong pag-anha kaninyo, mga igsoon, [ako] wala moanha nga may hinashasan nga mga pulong o kaalam nga nagsangyaw kaninyo sa balaan nga tinagoan sa Diyos. . . . Ang akong pagsulti ug ang akong pagwali dili pinaagi sa madanihong mga pulong sa kaalam kondili pinaagi sa pagpadayag sa espiritu ug gahom, aron ang inyong pagtuo, magasukad dili diha sa kaalam sa tawo, kondili diha sa gahom sa Diyos.”—1 Corinto 2:1-5.
15. Mahitungod sa unsa nga gipahinumdoman ni Pedro ang mga mayubiton sa maayong balita, ug sa unsang paagi ang kahimtang karong adlawa sama sa mga adlaw ni Noe?
15 Niining kataposang mga adlaw, ang mga mayubiton sa maayong balita sa umaabot nga bag-ong kalibotan sa Diyos ug sa nagsingabot nga kataposan niining kalibotana gipahinumdoman ni apostol Pedro nga ang kalibotan sa mga adlaw ni Noe “nakaagom ug kalaglagan sa dihang gilunopan kinig tubig.” (2 Pedro 3:3-7) Nag-atubang nianang malaglagong kataposan, unsay gihimo ni Noe? Daghang tawo nagtuo nga usa lamang siya ka magtutukod ug arka. Apan si Pedro nag-ingon nga sa dihang gipakanaog sa Diyos ang Baha diha sa karaang kalibotan, Iyang “giluwas si Noe, nga usa ka magwawali sa pagkamatarong, uban sa pito ka tawo.” (2 Pedro 2:5) Sa ilang kalibotanong kaalam, kadtong dili-diyosnong mga tawo nga nabuhi sa wala pa ang Lunop tino nga nagbiaybiay sa giwali ni Noe ug gitawag siyang buang, dili-realistiko, ug dili-praktikal. Karong adlawa, ang tinuod nga mga Kristohanon nagaatubang ug samang kahimtang, sanglit gitandi ni Jesus ang atong kaliwatan nianang sa mga adlaw ni Noe. Bisan pa sa mga mayubiton, hinunoa, ang pagwali sa maayong balita sa Gingharian dili kay ordinaryong sulti lamang. Sama sa pagwali nga gihimo ni Noe, kini nagkahulogang kaluwasan alang sa magwawali ug niadtong mamati kaniya!—Mateo 24:37-39; 1 Timoteo 4:16.
‘Magpakabuang Aron Mahimong Maalamon’
16. Unsay mahitabo sa kaalam niining kalibotana diha sa Armageddon, ug kinsa ang maluwas ngadto sa bag-ong kalibotan sa Diyos?
16 Sa dili madugay, sa Armageddon, ipahinabo ni Jehova nga Diyos nga ang tanang “kaalam sa mga tawong maalamon” mangawagtang. Iyang isalikway ang tanang “kinaadman sa mga tawong manggialamon” nga nanagna kon sa unsang paagi ang ilang bag-ong kalibotan nga kahikayan mohatag ug mas maayong mga kahimtang sa katawhan. “Ang gubat sa dakong adlaw sa Diyos nga Labing Makagagahom” mougdaw sa tanang hiwi nga pangatarongan, pilosopiya, ug kaalam niining kalibotana. (1 Corinto 1:19; Pinadayag 16:14-16) Ang mangaluwas lamang nianang gubata ug makabaton ug kinabuhi diha sa bag-ong kalibotan sa Diyos mao kadtong nagatuman nianang gitawag niining kalibotana nga kabuangan—oo, ang mahimayaong maayong balita sa Gingharian ni Jehova.
17. Sa unsang paagi ang mga Saksi ni Jehova nahimong ‘mga buang,’ ug determinado sa pagbuhat ug unsa ang mga magwawali sa maayong balita sa Diyos?
17 Ang mga Saksi ni Jehova, nga tinultolan sa iyang espiritu, dili maulaw sa pagsangyaw nianang gitawag sa kalibotan nga kabuangan. Inay maningkamot nga mahimong maalamon sa kalibotan, sila nangahimong ‘mga buang.’ Sa unsang paagi? Pinaagi sa pagtuman sa buluhaton sa pagsangyaw sa Gingharian aron sila mahimong maalamon, sama sa gisulat ni Pablo: “Kon aduna kaninyoy naghunahuna nga siya maalamon niining sistemaha sa mga butang, magpakabuang una siya, aron mahimo siya nga maalamon.” (1 Corinto 3:18-20) Ang mga magwawali sa maayong balita ni Jehova nahibalo sa bili sa ilang mensahe nga makaluwas ug kinabuhi ug magpadayon sa pagsangyaw niana nga walay hunong hangtod sa kataposan niining kalibotana ug ang kaalam niini diha sa gubat sa Armageddon. Sa dili madugay, igabayaw ni Jehova nga Diyos ang iyang pagkasoberano sa uniberso ug mohatag ug walay kataposang kinabuhi ngadto sa tanan nga nagatuo karon ug nagalihok sa “kabuangan niadtong ginawali.”
[Footnote]
a Bisan pa sa tanang mga debate sa pilosopiya ug mga pagtuki sa maalamong mga tawo sa karaang Gresya, ang ilang mga sinulat nagpakita nga sila walay nakitang tinuod nga basehanan sa paglaom. Ang mga propesor nga si J. R. S. Sterrett ug Samuel Angus miingon: “Walay lain nga basahon ang naundan ug hilabihang makaluluoyng mga pagbakho bahin sa mga kaguol sa kinabuhi, sa paglabay sa gugma, sa pagkamalimbongon sa paglaom, ug sa kabangis sa kamatayon.”—Funk and Wagnalls New “Standard” Bible Dictionary, 1936, panid 313.
Unsay Imong mga Tubag
◻ Unsa ang duha ka matang sa kaalam?
◻ Unsa ang labing dakong depekto sa kaalam sa kalibotan?
◻ Nganong ang pagwali sa maayong balita mao ang labing praktikal nga butang buhaton?
◻ Unsay mahitabo sa dili madugay sa tanang kaalam sa kalibotan?
◻ Nganong ang mga Saksi ni Jehova dili maulaw sa pagwali nianang gitawag sa kalibotan nga kabuangan?
[Hulagway sa panid 23]
Ang mga Grego nangita sa kaalam sa kalibotan ug naglantaw sa pagsangyaw ni Pablo ingon nga binuang