Unsay Giingon sa Bibliya Bahin sa Pagpuasa?
Tubag sa Bibliya
Panahon sa Bibliya, ang pagpuasa dalawaton sa Diyos dihang gihimo kini uban ang hustong motibo. Apan dihang gihimo kini tungod sa sayop nga mga rason, wala kini uyoni sa Diyos. Hinuon, ang Bibliya wala magsugo o magdili sa mga tawo karon sa pagpuasa.
Unsang mga kahimtang nga nagpuasa ang pipila panahon sa Bibliya?
Dihang mangayog tabang ug giya sa Diyos. Ang mga tawo nga nagpanaw paingon sa Jerusalem nagpuasa aron ipakita nga sinsero sila sa pagpangayog tabang sa Diyos. (Esdras 8:21-23) Dihay mga panahon nga si Pablo ug Bernabe nagpuasa dihang nagtudlog mga ansiyano sa kongregasyon.—Buhat 14:23.
Dihang mamalandong pag-ayo bahin sa katuyoan sa Diyos. Human sa iyang bawtismo, si Jesus nagpuasa sulod sa 40 ka adlaw aron andamon ang iyang kaugalingon sa pagbuhat sa kabubut-on sa Diyos sa iyang umaabot nga ministeryo.—Lucas 4:1, 2.
Dihang maghinulsol sa nangaging mga sala. Pinaagi kang propetang Joel, giingnan sa Diyos ang dili matinumanong mga Israelinhon: “Balik kanako uban sa bug-os ninyong kasingkasing, ug uban sa pagpuasa ug uban sa paghilak ug uban sa pagminatay.”—Joel 2:12-15.
Dihang magsaulog sa Adlaw sa Pagtabon sa Sala. Ang Balaod nga gihatag sa Diyos sa nasod sa Israel naglakip sa sugo nga magpuasa sa tinuig nga Adlaw sa Pagtabon sa Sala.a (Levitico 16:29-31) Ang pagpuasa haom niini nga okasyon kay kini nagpahinumdom sa mga Israelinhon nga sila dili hingpit ug nagkinahanglan sa kapasayloan sa Diyos.
Unsay pipila ka dili hustong motibo sa pagpuasa?
Aron dayegon sa uban. Gitudlo ni Jesus nga ang pagpuasa tungod sa relihiyon angayng personal ug pribado nga butang tali sa indibiduwal ug sa Diyos.—Mateo 6:16-18.
Aron pamatud-an ang kaugalingon nga matarong. Kon ang usa magpuasa, wala kana magpasabot nga siya mas maayog moralidad ug espirituwalidad.—Lucas 18:9-14.
Aron tabonan ang tinuyo nga pagpakasala. (Isaias 58:3, 4) Gidawat lang sa Diyos ang mga pagpuasa nga inubanag pagkamasinugtanon ug kinasingkasing nga paghinulsol sa bisan unsang sala nga nahimo.
Aron ipakita nga kunohay nagtuman sa relihiyosong kostumbre. (Isaias 58:5-7) Niining bahina, ang Diyos samag ginikanan nga dili malipay dihang ang iyang mga anak magpakitag gugma kaniya tungod lang kay obligado sila niini, dili kinasingkasing.
Gisugo ba ang mga Kristohanon sa pagpuasa?
Wala. Gisugo sa Diyos ang mga Israelinhon sa pagpuasa sa Adlaw sa Pagtabon sa Sala, apan giwagtang na niya kini human nga permanenteng natabonan ni Jesus ang mga sala sa mahinulsolong katawhan. (Hebreohanon 9:24-26; 1 Pedro 3:18) Ang mga Kristohanon dili ilalom sa Moisesnong Balaod, diin bahin ang Adlaw sa Pagtabon sa Sala. (Roma 10:4; Colosas 2:13, 14) Busa ang matag Kristohanon maoy modesisyon kon siya magpuasa o dili.—Roma 14:1-4.
Ang mga Kristohanon nahibalo nga ang pagpuasa dili maoy pangunang bahin sa ilang pagsimba. Ang pagpuasa wala gayod ilangkit sa Bibliya sa kalipay. Sa kasukwahi, ang matuod nga Kristohanong pagsimba nailhan sa kalipay, nga nagbanaag sa personalidad ni Jehova, ang “malipayong Diyos.”—1 Timoteo 1:11; Ecclesiastes 3:12, 13; Galacia 5:22.
Sayop nga mga ideya bahin sa panglantaw sa Bibliya sa pagpuasa
Sayop nga ideya: Giawhag ni apostol Pablo ang mga Kristohanong magtiayon sa pagpuasa.—1 Corinto 7:5, Biblia sa Kristohanong Katilingban.
Ang tinuod: Ang labing karaang mga manuskrito sa Bibliya wala maghisgot ug pagpuasa sa 1 Corinto 7:5.b Dayag nga ang mga tigkopya sa Bibliya nagdugang sa ideya sa pagpuasa, dili lang niining bersikuloha kondili sa Mateo 17:21; Marcos 9:29; ug Buhat 10:30 usab. Kadaghanang modernong hubad sa Bibliya nagtangtang niining sayop nga ideya sa pagpuasa.
Sayop nga ideya: Ang mga Kristohanon kinahanglang magpuasa sa paghandom sa 40 ka adlaw nga pagpuasa ni Jesus sa kamingawan human sa iyang bawtismo.
Ang tinuod: Wala gayod isugo ni Jesus ang maong pagpuasa, ug wala poy makita sa Kasulatan nga gihandom kana sa unang mga Kristohanon.c
Sayop nga ideya: Ang mga Kristohanon kinahanglang magpuasa dihang maghandom sa kamatayon ni Jesus.
Ang tinuod: Wala sugoa ni Jesus ang iyang mga tinun-an sa pagpuasa dihang maghandom sa iyang kamatayon. (Lucas 22:14-18) Bisag miingon si Jesus nga ang iyang mga tinun-an magpuasa inigkamatay niya, wala siya magsugo apan nagsulti lang siya kon unsay mahitabo. (Mateo 9:15) Gisugo sa Bibliya ang mga Kristohanon nga gigutom nga mokaon daan sa balay sa dili pa magsaulog sa Memoryal sa kamatayon ni Jesus.—1 Corinto 11:33, 34.
a Giingnan sa Diyos ang mga Israelinhon: “Inyong pagasakiton ang inyong mga kalag” sa Adlaw sa Pagtabon sa Sala. (Levitico 16:29, 31) Kini gisabot nga nagtumong sa pagpuasa. (Isaias 58:3) Busa ingon niini ang pagkahubad sa Contemporary English Version: “Kinahanglang dili mo mokaon aron ipakita ang inyong kasubo tungod sa inyong mga sala.”
b Tan-awa ang A Textual Commentary on the Greek New Testament, ni Bruce M. Metzger, Third Edition, panid 554.
c Bahin sa kasaysayan sa 40 ka adlaw nga pagpuasa panahon sa Kuwaresma, ang New Catholic Encyclopedia nag-ingon: “Sa unang tulo ka siglo, ang yugto sa pagpuasa ingong pagpangandam sa pista sa paskuwa [Easter] wala molapas sa usa ka semana; kasagaran usa o duha ra kini ka adlaw. . . . Unang gihisgotan ang yugto sa 40 ka adlaw diha sa ikalimang lagda sa Konsilyo sa Nicaea (325), bisag gilalisan sa pipila ka eskolar kon Kuwaresma ba ang gitumong niini.”—Second Edition, Volume 8, panid 468.