Tinuod nga Kalipay sa Pag-alagad Kang Jehova
“Malipayon siya nga anaa kaniya ang Diyos ni Jacob alang sa iyang panabang, kansang paglaom anaa kang Jehova nga iyang Diyos.”—SALMO 146:5.
1, 2. Unsay gikaingon mahitungod sa kahulogan sa kalipay, ug unsay kahulogan sa kalipay alang sa kadaghanang tawo karong adlawa?
UNSA ang kalipay? Ang mga leksikograpo, pilosopo, ug mga teologo naningkamot sa paghubit niini sa daghan nang kasiglohan. Apan sila wala makahatag ug kahubitan nga giuyonan sa kadaghanan. Ang Encyclopædia Britannica miangkon: “‘Ang kalipay’ maoy usa sa labing maidlas nga mga pulong.” Ang kalipay dayag nagkahulogan ug magkalahing mga butang ngadto sa nagkalainlaing mga tawo, depende sa ilang panglantaw sa kinabuhi.
2 Alang sa kadaghanang tawo ang kalipay nagalibot sa maayong panglawas, materyal nga mga kabtangan, ug maayong panagkauban. Apan, dunay mga tawo nga nakabaton nianang tanan apan dili malipayon. Alang sa mga lalaki ug babaye nga nagpahinungod kang Jehova nga Diyos, ang Bibliya nagataganag ideya sa kalipay nga lahi gikan sa hunahuna sa kadaghanan.
Usa ka Lahi nga Hunahuna sa Kalipay
3, 4. (a) Kinsay gisultihan ni Jesus nga malipayon? (b) Unsay mamatikdan labot sa mga hinungdan sa kalipay nga gihisgotan ni Jesus?
3 Diha sa iyang Wali sa Bukid, wala moingon si Jesu-Kristo nga ang kalipay nagadepende sa maayong panglawas, materyal nga mga kabtangan, ug sa susama niana. Iyang gipahayag nga ang tinuod nga malipayon mao kadtong “mahunahunaon sa ilang espirituwal nga panginahanglan” ug kadtong “gigutom ug giuhaw sa pagkamatarong.” Nalangkit niining duha ka butang nga gikinahanglan alang sa tinuod nga kalipay mao ang daw sumpaki nga pulong ni Jesus: “Malipayon kadtong nagabalata, sanglit sila pagalipayon.” (Mateo 5:3-6) Dayag, nga si Jesus wala mag-ingon nga ang mga tawo sa awtomatiko magmalipayon sa dihang sila mamatyan ug minahal. Hinunoa, siya naghisgot bahin kanila nga nagmasulob-on sa ilang makasasalang kahimtang ug sa mga sangpotanan niini.
4 Si apostol Pablo naghisgot sa tawhanong kalalangan nga nagaagulo sa kasal-anan pinasukad sa paglaom nga kini “ipahigawas gikan sa kaulipnan sa pagkadunot.” (Roma 8:21, 22) Ang mga tawo nga modawat sa nagatabon-sa-sala nga tagana ni Jehova pinaagi sa halad lukat ni Kristo ug motuman sa kabubut-on sa Diyos tinuod nga mapahalipayan ug lipayon. (Roma 4:6-8) Diha sa Wali sa Bukid, gipahayag usab ni Jesus nga malipayon “ang mga maaghop,” “ang maluloy-on,” “ang putli ug kasingkasing,” ug “ang makigdaiton.” Siya mihatag ug pasalig nga bisan tuod ginalutos, ang mga maaghop dili mapildihan sa ilang kalipay. (Mateo 5:5-11) Makaiikag nga kining tinuboy nga mga katarongan sa kalipay naghimo sa dato ug kabos nga managsama.
Ang Basehanan sa Tinuod nga Kalipay
5. Unsay basehanan sa kalipay sa dedikadong mga alagad sa Diyos?
5 Ang tuboran sa tinuod nga kalipay dili makita diha sa materyal nga bahandi. Ang maalamong Haring Solomon miingon: “Ang panalangin ni Jehova—mao ang makapadato, ug wala siyay idugang nga kasakit niana.” (Proverbio 10:22) Alang sa mga linalang nga nagaila sa pagkasoberano ni Jehova sa uniberso, ang kalipay nalangkit gayod sa panalangin sa Diyos. Ang dedikadong tawo kinsa nakabaton ug mibati nga gipanalanginan siya ni Jehova tinuod gayod nga malipayon. Sumala sa panglantaw sa Bibliya, ang kalipay nalangkit sa pagbatig pagkakontento, pagkatagbaw, ug katumanan diha sa pag-alagad kang Jehova.
6. Unsay gikinahanglan sa katawhan ni Jehova aron sila tinuod nga magmalipayon?
6 Ang matuod nga kalipay nagadepende diha sa matarong nga relasyon uban kang Jehova. Kini gipasukad diha sa gugma sa Diyos ug sa pagkamatinumanon ngadto kaniya. Ang dedikadong mga alagad ni Jehova kinasingkasing nga miuyon sa mga pulong ni Pablo: “Walay usa kanato, sa pagkatinuod, ang nagkinabuhi sa iyang kaugalingon lamang . . . Kita nagkinabuhi alang kang Jehova . . . Kita iya ni Jehova.” (Roma 14:7, 8) Busa, ang matuod nga kalipay dili mabatonan nga bulag gikan sa pagsunod kang Jehova ug sa malipayong pagpasakop sa iyang kabubut-on. Si Jesus miingon: “Malipayon kadtong nagapatalinghog sa pulong sa Diyos ug nagatuman niana!”—Lucas 11:28.
Umalagi nga mga Hinungdan sa Kalipay
7, 8. (a) Sa unsang paagi ang mga hinungdan sa kalipay maklasipikar? (b) Unsay ikaingon bahin sa kaminyoon ug pagpanganak?
7 Ang nahisgotan nga mga katarongan sa kalipay mahimong terminohan ug “mga paninugdan,” o “permanenteng mga hinungdan,” kay angay kini alang sa dedikadong mga alagad ni Jehova sa tanang panahon. Dugang pa, anaa kanang matawag nga mga umalagi, mga butang nga mohatag ug kalipay sa usa ka higayon apan mohatag ug diyutay o kaha walay kalipay sa ubang panahon. Sa panahon sa mga patriarka ug sa una-Kristohanon, ang kaminyoon ug ang pagpanganak giisip nga kinahanglanon alang sa kalipay. Kini gipabanaag sa makapatandog nga hangyo ni Raquel kang Jacob: “Hatagi akog mga anak kay kondili mamatay ako.” (Genesis 30:1) Kini nga tinamdan sa pagpanganak haom sa katuyoan ni Jehova alang sa maong yugto sa panahon.—Genesis 13:14-16; 22:17.
8 Ang kaminyoon ug pagpanganak giisip nga hinatag-sa-Diyos nga mga panalangin taliwala sa katawhan ni Jehova sa unang mga panahon. Apan, nalangkit niini ang kalisdanan ug ubang mga kahimtang sa panahon sa malisod nga mga yugto sa ilang kasaysayan. (Itandi ang Salmo 127, 128 sa Jeremias 6:12; 11:22; Lamentaciones 2:19; 4:4, 5.) Busa, dayag nga ang kaminyoon ug pagpanganak maoy dili-permanenteng mga hinungdan sa kalipay.
Kalipay nga Walay Pagminyo sa Miagi
9. Nganong ang anak nga babaye ni Jepte nakadawat ug tuig-tuig nga komendasyon?
9 Daghan sa mga alagad sa Diyos ang nakakaplag ug tinuod nga kalipay bisag wala magminyo. Agig pagtahod sa panaad sa iyang amahan, ang anak nga babaye ni Jepte nagpabiling dalaga. Dugaydugay nga siya ug ang iyang mga higala nanagbakho sa iyang pagkaulay. Apan pagkadako sa kalipay niya sa pag-alagad sa bug-os panahon diha sa balay ni Jehova, tingali lakip “sa mga ulipong mga babaye nga maoy nagpalakaw sa pag-alagad sa pultahan sa balongbalong nga pagatigoman”! (Exodo 38:8) Tungod niini, siya nakadawat ug tuig-tuig nga komendasyon.—Maghuhukom 11:37-40.
10. Unsay gipangayo ni Jehova kang Jeremias, ug mopatim-aw ba nga siya dunay dili-malipayong kinabuhi ingong sangpotanan?
10 Tungod sa makuyawng panahon nga gikinabuhian ni propetang Jeremias, gisugo siya sa Diyos nga dili magminyo ug magbaton ug mga anak. (Jeremias 16:1-4) Apan nasinati ni Jeremias ang kamatinud-anon sa mga pulong sa Diyos: “Bulahan ang tawo nga nagbutang sa iyang pagsalig kang Jehova, ug kansang pagsalig mao si Jehova.” (Jeremias 17:7) Sa kapin ug 40 ka tuig sa pag-alagad ingong manalagna, matinumanong nag-alagad si Jeremias sa Diyos ingong dili-minyo. Segun sa atong nahibaloan, siya wala gayod magminyo ug magbatog mga anak. Apan, kinsay makaduhaduha nga si Jeremias malipayon, sama sa matinumanon Hudiyohanong nahibilin nga ‘masilakon sa kalipay tungod sa kaayo ni Jehova’?—Jeremias 31:12.
11. Unsa ang pipila ka panig-ingnan sa Kasulatan sa matinumanong mga alagad ni Jehova nga malipayon bisag sila walay mga kapikas?
11 Daghan pang ubang mga tawo ang nakaalagad kang Jehova nga malipayon nga walay kapikas sa kaminyoon. Sila maoy mga dili-minyo, biyuda o mga biyudo. Lakip kanila mao ang manalagnang babaye nga si Anna; tingali si Dorcas, o Tabitha; si apostol Pablo; ug ang labing dakong panig-ingnan sa tanan—si Jesu-Kristo.
Dili-minyo Apan Malipayon Karong Adlawa
12. Alang sa unsa nga naghatag ug luna ang pipila ka malipayon dedikadong mga alagad ni Jehova karong adlawa, ug ngano?
12 Karong adlawa, libolibo sa mga Saksi ni Jehova ang matinumanong nagaalagad sa Diyos nga walay kapikas sa kaminyoon. Ang uban nakadawat sa panapit ni Jesus: “Pasagdi siyang makahatag luna [sa gasa sa pagkadili-minyo] mohatag luna alang niana.” Ilang gibuhat kini “alang sa gingharian sa mga langit.” (Mateo 19:11, 12) Sa ato pa, ilang gigamit ug maayo ang ilang hinatag-sa-Diyos nga kagawasan pinaagi sa paggugol ug daghang panahon ug kusog sa pagpauswag sa mga intereses sa Gingharian. Daghan kanila ang nagaalagad ingong mga payunir, misyonaryo, o mga membro sa pamilyang Bethel sa mga hedkuwarter sa kalibotan sa Watch Tower Society o sa usa sa mga sanga niini.
13. Unsang mga panig-ingnan ang nagpakita nga ang usa ka Kristohanon mahimong magpabiling dili-minyo ug malipayon?
13 Giasoy sa usa ka edarang igsoong babaye ang iyang kasaysayan sa kinabuhi diha sa mabutyagong titulo “Dalaga ug Malipayon Ingong Payunir.” (Ang Bantayanang Torre, Nobyembre 1, 1985, panid 23-6) Ang laing dili-minyong igsoong babaye nga nakagugol ug 50 anyos sa pag-alagad sa Bethel miingon: “Bug-os akong natagbaw sa akong kinabuhi ug sa akong buluhaton. Mas okupado kaayo ako karon kay sa kaniadto diha sa buluhaton nga gimahal ko pag-ayo. Wala ako magbasol. Mao gihapon kining desisyona ang akong himoon.”—Ang Bantayanang Torre, Disyembre 15, 1982, panid 15.
14, 15. (a) Sumala kang apostol Pablo, unsay gikinahanglan aron makapabiling dili-minyo? (b) Nganong miingon si Pablo nga ang tawong dili-minyo nagabuhat ug “labi pa ka maayo” ug “labi pa nga malipayon”?
14 Matikdi ang pulong “desisyon.” Si Pablo misulat: “Kon ang bisan kinsa nga nakahukom na diha sa iyang kasingkasing, nga wala pugsa, apan maoy iyang kaugalingong kabubut-on ug nakahimo niini nga desisyon diha sa iyang kaugalingong kasingkasing, nga huptan ang iyang pagkaulay, siya nagabuhat ug maayo. Apan siya usab nga nagatugyan sa iyang pagkaulay diha sa kaminyoon nagabuhat ug maayo, apan siya nga wala magatugyan niini diha sa kaminyoon nagabuhat ug labi pa ka maayo.” (1 Corinto 7:37, 38) Nganong “labi pa ka maayo”? Si Pablo miingon: “Buot ko nga mahigawas kamo gikan sa kabalaka. Ang lalaki nga dili-minyo mabalak-on alang sa mga butang sa Ginoo, kon unsaon niya sa pagbatog pag-uyon sa Ginoo. . . . Dugang pa, ang babaye nga dili-minyo, ug ang ulay, mabalak-on alang sa mga butang sa Ginoo . . . Apan gisulti ko kini alang sa inyong kaugalingong kaayohan, . . . aron dasigon kamo kon unsa ang angayan ug nga nagkahulogan sa padayong pag-alagad diha sa Ginoo nga walay kababagan.”—1 Corinto 7:32-35.
15 Ang “padayong pag-alagad sa Ginoo nga walay kababagan” uban ang panglantaw sa ‘pagbaton ug pag-uyon sa Ginoo’ nalangkit ba sa kalipay? Dayag nga mao kanay hunahuna ni Pablo. Naghisgot bahin sa usa ka Kristohanong balong babaye, siya miingon: “Siya may kagawasan sa pagpamana kang bisan kinsa nga buot niya, basta diha lamang sa Ginoo. Apan labi pa siyang malipayon kon magpabilin siya sa iyang kahimtang, sumala sa akong hunahuna. Nagtuo ako nga nabatonan ko usab ang espiritu sa Diyos.”—1 Corinto 7:39, 40.
Mga Kaayohan sa Dili-minyong Kahimtang
16. Unsa ang pipila ka kaayohang gitagamtam sa dili-minyong mga Saksi ni Jehova?
16 Kon ang usa ka Kristohanon maoy dili-minyo tungod sa personal nga desisyon o napugos sa mga sirkumstansiya, ang dili-minyo nga kahimtang adunay daghang personal nga mga kaayohan. Ang mga tawong dili-minyo sa katibuk-an dunay mas daghang panahon sa pagtuon sa Pulong sa Diyos ug sa pagpalandong niana. Kon ilang pahimuslan kini nga sirkumstansiya, ang ilang espirituwalidad molalom. Sanglit walay kapikas sa kaminyoon nga makaabag sa ilang mga suliran, daghan ang nakakat-on sa dugang nga pagsalig kang Jehova ug sa pagpangita sa iyang pagtultol diha sa tanang butang. (Salmo 37:5) Kini makatabang sa pagpatunghag mas suod nga relasyon kang Jehova.
17, 18. (a) Unsang kahigayonan alang sa usa ka napadako nga natad sa pag-alagad ang mabatonan sa dili-minyong mga alagad ni Jehova? (b) Sa unsang paagi gihubit sa pipila ka dili-minyong mga alagad ni Jehova ang ilang kalipay?
17 Ang dili-minyong mga Kristohanon dunay mga kahigayonan alang sa nagadakong natad sa pag-alagad alang kadayeganan ni Jehova. Ang espesyal nga pagbansay nga ginahatag karon sa Ministerial Training School maoy alang lamang sa dili-minyong igsoong mga lalaki ug mga biyudo. Ang dili-minyong mga babaye usab mas may kagawasan sa pagkab-ot sa mga pribilehiyo diha sa pag-alagad sa Diyos. Ang edarang igsoong babaye nga gihisgotan sa sinugdan miboluntaryo sa pag-alagad diha sa usa ka nasod sa Aprika sa dihang, sa pagkutlo kaniya, siya “may pagkaluyahon nga babaye nga kapin nag 50 anyos ang panuigon.” Ug siya nagpabilin didto, bisan pa sa panahon sa pagdili, dihang ang tanang misyonaryo gipapauli. Siya nag-alagad gihapon didto ingong payunir, bisan ug siya karon kapin na sa 80 anyos. Siya ba malipayon? Diha sa iyang kasaysayan sa kinabuhi siya misulat: “Nakahimo ako sa paggamit sa dugang nga kagawasan ug kasayon sa paglihok nga gikatagana sa pagkadi-minyo aron magmapuliki diha sa ministeryo, ug kini naghatag kanako ug dakong kalipay. . . . Sa paglabay sa katuigan milalom pa ang akong relasyon kang Jehova. Ingong usa ka dili-minyong babaye diha sa nasod sa Aprika, nakita ko siyang usa ka Tigpanalipod.”
18 Talagsaon, usab, mao ang mga pulong sa usa ka igsoong lalaki nga nag-alagad sa mga hedkuwarter sa Watch Tower Society sa daghang dekada. Siya malipayon, bisag siya wala maminyo ug bisag siya dunay langitnong paglaom nga walay palaabotong magminyo. Sa edad 79, siya misulat: “Matag adlaw mangayo ako sa atong mahigugmaon langitnong Amahan diha sa pag-ampo ug tabang ug kaalam aron magpabilin akong mahimsog ug malig-on sa espirituwal ug sa pisikal aron makapadayon ako sa pagbuhat sa iyang balaang kabubut-on. Sulod niining nanglabay nga kuwarentay-nuybe ka tuig sa pag-alagad kang Jehova natagamtam ko gayod ang usa ka malipayon, magantihon ug gipanalanginang paagi sa kinabuhi. Ug uban sa dili-takos nga kalulot ni Jehova ako nagalantaw sa unahan sa padayong pag-alagad alang sa iyang kahimayaan ug kadungganan ug alang sa panalangin sa iyang katawhan. . . . [Ang] kalipay ni Jehova ang nakatabang kanako sa pagpadayon sa maayong pagpakigbugno sa pagtuo, nagapaabot sa panahong ang mga kaaway ni Jehova mawagtang na ug ang tibuok yuta mapuno sa iyang himaya.”—Numeros 14:21; Nehemias 8:10; The Watchtower, Nobyembre 15, 1968, panid 699-702.
Diha sa Unsa Nagadependeang Tinuod nga Kalipay?
19. Diha sa unsa nagadepende kanunay ang atong kalipay?
19 Ang atong hamiling relasyon uban kang Jehova, ang iyang pag-uyon, ug ang iyang panalangin—kini mao ang mga hinungdan nga mohatag kanatog tinuod nga kalipay hangtod sa kahangtoran. Uban niining hustong panglantaw kon unsay mopatunghag tinuod nga kalipay, bisan ang minyong mga alagad ni Jehova makaamgo nga ang ilang kaminyoon dili mao ang labing hinungdanong butang sa ilang mga kinabuhi. Sila nagapatalinghog sa tambag ni apostol Pablo: “Kini ang akong ikaingon, mga igsoon, ang panahon hamubo na. Busa kadtong dunay mga asawa magkinabuhi ingon nga daw walay mga asawa.” (1 Corinto 7:29) Kini wala magpasabot nga pasagdan ang ilang mga asawa. Ginauna sa hamtong Kristohanong mga bana ang pag-alagad kang Jehova, ug maingon man ang ilang diyosnon, mahigugmaon, ug mapaluyohong mga asawa, ang pipila gani nag-alagad sa bug-os panahon ingong mga kauban sa ilang mga bana.—Proverbio 31:10-12, 28; Mateo 6:33.
20. Unsang hustong tinamdan sa daghang Kristohanon mahitungod sa ilang pribilehiyo sa kaminyoon?
20 Ang minyong igsoong mga lalaki nga nagapanawng mga magtatan-aw, mga boluntaryo sa Bethel, mga ansiano sa kongregasyon—sa pagkatinuod, ang tanang minyong mga Kristohanon nga nagbutang pag-una sa mga intereses sa Gingharian—wala ‘magpahimulos sa kalibotan sa bug-os’; sila naningkamot sa pagpahaom sa ilang minyong mga pribilehiyo ngadto sa ilang kinabuhing gipahinungod sa pag-alagad kang Jehova. (1 Corinto 7:31) Apan, sila malipayon. Ngano? Tungod kay ang nangibabaw nga katarongan sa ilang kalipay dili ang ilang kaminyoon kondili ang ilang pag-alagad kang Jehova. Ug daghan sa matinumanong mga bana ug mga asawa—oo, ug ang ilang mga anak usab—malipayon nga ingon niini ang mga butang.
21, 22. (a) Sumala sa Jeremias 9:23, 24, unsay mopatugob kanato sa kalipay? (b) Unsang mga hinungdan sa kalipay ang gihisgotan sa Proverbio 3:13-18?
21 Ang propetang Jeremias misulat: “Kini ang giingon ni Jehova: ‘Ayaw pagpahimayaa ang tawong manggialamon sa iyang kaalam, ni pagpahimayaon ang tawong kusganon sa iyang kusog, ayaw pagpahimayaa ang tawong adunahan sa iyang bahandi. Apan pahimayaa siya nga nagahimaya niini, nga siya nakasabot ug nakaila kanako, nga ako mao si Jehova, ang Usa nga nagahatag sa mahigugmaong kalulot, hustisya ug pagkamatarong sa yuta; kay niining mga butanga ako nahimuot,’ nagaingon si Jehova.”—Jeremias 9:23, 24.
22 Dili man kita minyo o minyo, ang atong labing dakong tuboran sa kalipay angay mao ang atong kahibalo bahin kang Jehova ug ang pagtuo nga mabatonan ta ang iyang panalangin tungod kay atong ginabuhat ang iyang kabubut-on. Kita usab malipayon nga nakabatog pagsabot sa kon unsay naglangkob sa tinuod nga sukod sa mga sukdanan, ang mga butang nga gikahimut-an ni Jehova. Ang minyong Haring Solomon wala mag-isip sa kaminyoon nga mao ang bugtong yawi sa kalipay. Siya miingon: “Malipayon ang tawo nga nakakaplag ug kaalam, ug ang tawo nga nakabatog pagsabot, kay ang pagpakabaton niana labi pang maayo kay sa pagmanggad ug salapi ug ang kaayohan niini labaw pa kay sa bulawan. Kini labi pang bililhon kay sa korales, ug walay mausa sa mga butang nga imong gitinguha ang ikatandi niini. Ang hataas nga mga adlaw anaa sa tuong kamot niini; diha sa walang kamot niini mao ang bahandi ug kadungganan. Ang mga dalan niini maoy mga dalan sa kahimut-anan, ug ang tanang alagianan niini malinawon. Kini maoy kahoy sa kinabuhi niadtong mokupot niini, ug malipayon kadtong magahawid gayod niini.”—Proverbio 3:13-18.
23, 24. Nganong kita makatino nga ang tanang matinumanong mga alagad ni Jehova magmalipayon unya diha sa bag-ong sistema sa mga butang?
23 Hinaot nga kadtong minyo taliwala kanato makakaplag ug walay kataposang kalipay sa pagtuman sa balaang kabubut-on. Ug hinaot ang atong minahal nga mga igsoong lalaki ug babaye nga mipili nga dili magminyo o kaha napugos tungod sa mga sirkumstansiya molahutay sa tanan nilang mga pagsulay ug sa pagkaplag ug kalipay ug katagbawan diha sa pag-alagad kang Jehova karon ug hangtod sa kahangtoran. (Lucas 18:29, 30; 2 Pedro 3:11-13) Diha sa umaabot nga bag-ong sistema sa mga butang sa Diyos, ang “mga linukot nga basahon” pagabuksan. (Pinadayag 20:12) Kini pagaundan unya sa makalilipay bag-ong mga kasugoan ug mga kalagdaan nga makaamot sa kalipay sa masinundanong katawhan.
24 Tino gayod, kita makasalig nga ang atong “malipayong Diyos” nagatagana kanatog kahibulongan maayong mga butang nga mosangpot sa atong bug-os nga kalipay. (1 Timoteo 1:11) Ang Diyos magpadayon sa ‘pagbukhad sa iyang mga kamot ug sa pagtagbaw sa tinguha sa tanang buhing butang.’ (Salmo 145:16) Dili ikahibulong nga aduna ug kanunay nga mabatonan ang tinuod nga kalipay diha sa pag-alagad kang Jehova.
Unsaon Nimo Pagtubag?
◻ Unsa ang basehanan sa kalipay sa dedikadong mga alagad ni Jehova?
◻ Sa panahon sa Bibliya, kinsa ang pipila sa malipayong dili-minyong mga alagad ni Jehova?
◻ Nganong girekomendar ni Pablo ang pagkadili-minyo, ug sa unsang paagi kini nakita sa pipila ka Kristohanon nga usa ka malipayon nga kinabuhi?
◻ Diha sa unsa nagadepende kanunay ang atong kalipay?
◻ Nganong kita makasalig nga ang tanang mga matinumanon diha sa bag-ong sistema sa mga butang magmalipayon?
[Hulagway sa panid 16]
Daghang dili-minyong mga igsoong babaye malipayong nagaalagad kang Jehova ingong bug-os panahong mga ministro
[Hulagway sa panid 18]
Ang pag-alagad sa mga intereses ni Jehova mao ang pangunang tuboran sa kalipay