Malipayong Pagsagubang sa Paspas nga Kinabuhi sa Kalibotan

KADAGHANANG TAWO NAGSAGUBANG SA MGA KAPIT-OSAN SA KINABUHI, APAN DIYUTAY RA ANG MALIPAYONG NAGSAGUBANG NIANA. NAGKINAHANGLAN KANAG ESPESYAL NGA MATANG SA KAALAM.

NGA nag-ila niini, ang librong The 24-Hour Society nag-ingon: “Kinahanglang atong ugmaron ang kaalam aron kapanalipdan ang mga panginahanglan ug kinaiya sa tawo diha sa teknolohikanhong kalibotan nga atong gimugna.”

Ikalipay, ang praktikal nga kaalam sayon nga mabatonan diha sa labing kaylap nga gipanagtag nga basahon sa kalibotan​—ang Pulong sa Diyos, ang Bibliya. Kay dinasig sa Usa nga hingpit nakasabot sa mga panginahanglan ug kinaiya sa tawo, ang Bibliya adunay sinulayan-ug-napamatud-ang mga prinsipyo. Ang pagpadapat niining mga prinsipyoha motabang kanimo nga mas makakontrolar sa imong kinabuhi, nga mohatag kanimog kalipay samtang nagsagubang ka sa paspas nga kinabuhi sa kalibotan karong adlawa.​—Isaias 48:18; 2 Timoteo 3:16.

Kining mga prinsipyoha nagtagad sa tulo ka dagkong natad. Una, gipunting niini kon asa ka makahimo sa maalamong pagpakunhod. Ikaduha, makatabang kini kanimo sa pagtino sa mga prioridad. Ikatulo, motagana kinig espirituwal nga panglantaw bahin sa kinabuhi nga mas maayo pa kay sa sekular lamang nga punto de bista. Atong hisgotan karon kining tulo ka natad.

Hupti ang Yano ug Hapsay nga Kinabuhi

Handurawa nga ikaw magkamping sulod sa pipila ka adlaw. Buot nimo nga mahayahay, busa magdala kag dakong tolda uban ang tanang kasangkapan nga mahunahunaan. Magdala ka usab ug treyler nga punog muwebles, kasangkapan sa pagluto, usa ka freezer, mabitbit nga generator, mga suga, TV, ug daghan pang laing mga butang, lakip ang pagkaon. Ugaling lang, ang paghikay niining tanang butang nagkinahanglag daghang oras! Unya, pagkatapos sa imong mubong bakasyon, kinahanglan nimo ang sama ka dakong panahon sa pag-empake na usab​—nga dili na hisgotan ang paghipos niining tanang butang diha sa balay. Sa paghinumdom sa miagi, imong naamgohan nga ang imong panahon kulang aron makapahimulos sa pagkamping! Mahibulong ka kon takos ba kadto sa tanang kahago.

Alang sa milyonmilyong tawo karong adlawa, ang kinabuhi mismo susamag diyutay sa maong biyahe alang sa pagkamping. Sila mogugol ug daghan kaayong panahon aron mabatonan ug mamentinar ang di-maihap nga materyal nga mga butang nga gipatuo kanato niining kalibotana nga atong gikinahanglan aron kita malipay. Sa kasukwahi, si Jesu-Kristo miingon: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15) Oo, ang kalidad sa kinabuhi dili masukod sumala sa materyal nga bahandi. Sa pagkamatuod, ang bahandi sagad makadugang sa mga kapit-osan ug mga kabalaka sa kinabuhi. “Ang kadagaya sa dato dili magpakatulog kaniya,” matod sa Ecclesiastes 5:12.

Busa maugdang nga palandonga ang matag usa sa imong mga kabtangan, ug suknaa ang imong kaugalingon, ‘Tinuod ba nga gikinahanglan kining butanga, o sagbot ba kini? Makapauswag ba kini sa kalidad sa akong kinabuhi, o mangawat kinig bililhong panahon?’ Ang introduksiyon sa librong Why Am I So Tired?, ni Leonie McMahon, nagpahayag: “Ang pag-imbento sa nagkalainlaing mga kasangkapan, nga gituyo sa pagwagtang sa kalaay sa buluhaton sa panimalay, miresulta sa panginahanglan sa ginang sa balay sa pagbaton ug trabaho sa gawas sa balay, aron makapalit ug makabayad sa pagmentinar niana.”

Kon imong himoong yano ang imong kinabuhi, makabaton kag mas dakong panahon alang sa pamilya, sa mga higala, ug sa imong kaugalingon. Kanang panahona hinungdanon alang sa imong kalipay. Ayaw panig-ingon sa mga tawong nakadiskobre nga ulahi kaayo sa kinabuhi nga ang mga higala ug pamilya labi pang hinungdanon​—ug makaiikag​—kay sa salapi ug mga butang. Mga tawo lang ang mahigugma kanimo. Ang mga deposito sa bangko, mga papeles sa aksiyones, kompiyuter, telebisyon, ug ubang kahimanan, bisan pag kini mahimong adunay angay nga dapit, maoy pakpak lang sa kinabuhi, dili ang suoy niini. Kadtong mopalabi nianang mga butanga wala magmahal sa ilang kinabuhi ug ngadtongadto mahimong dili-matagbawon ug mayugtanon pa.​—1 Timoteo 6:​6-10.

Dumalaha ang Panahon ug Tinoa ang mga Prioridad

Sa pipila ka bahin ang pagdumala sa panahon maoy sama sa pagbalanse sa usa ka badyet sa salapi. Kon mosulay ka nga buhaton ang daghan kaayo sa diyutay nimong oras, wala ka magkinabuhing sumala sa imong kinitaan kon bahin sa panahon. Ang maong estilo-sa-kinabuhi sa way-sipyat mosangpot sa kapakyasan, kapit-osan, ug kakapoy. Busa tun-i ang pagtino sa mga prioridad.

Una, tinoa kon unsa ang mas hinungdanong mga butang, ug gahini kinig igong panahon. Alang sa mga Kristohanon, ang espirituwal nga mga buluhaton kanunay nga pagaunahon. (Mateo 6:​31-34) Kon buhaton nga dinalidali o hapawhapaw lang ang hinungdanong mga butang, kasagarang mosangpot ang seryosong mga suliran. Busa, tingali kinahanglang kuhaon nimo ang butang nga gastoso sa panahon apan mohatag lang ug gamayng kaayohan.

Sa pagtino sa mga prioridad, tagda ang imong panginahanglan sa gamayng panahon nga mag-inusara​—panahon alang sa makapalig-ong pamalandong ug pagpalagsik na usab. “Ang mapuslanong panahon sa pag-inusara,” matod sa magasing Psychology Today, maoy “kinahanglanong tambal sa pagpasig-uli sa kusog diha sa samag-masinggan nga kalibotan. . . . Ang panahon sa pag-inusara maoy sama sa panubil sa kinabuhi.” Ang mga tawong puliki kaayo nga dili makapamalandong basin dili maugdang sa ilang tinamdan bahin sa kinabuhi.

Kamakasaranganon ug Espirituwalidad

Ang kamakasaranganon ug espirituwalidad maoy duha sa labing maayong mga kahinguhaan nga posibleng mabatonan nimo kon bahin sa pagkinabuhig malipayon, balanseng kinabuhi. Hinungdanon ang kamakasaranganon kay motabang kini kanimo sa paglikay sa pagpas-an sa dili-realistikong lulan sa trabaho ug sa mga responsabilidad. Kon ikaw makasaranganon, nahibalo ka kon kanus-a mobalibad sa trabahong obertaym o ubang mga kalihokang makabalda sa mas hinungdanong butang. Ang makasaranganong mga tawo dili masina sa nabatonan ug ginabuhat sa uban; busa, sila lagmit mas matagbawon. Sa baylo, ang tinuod nga kamakasaranganon maoy usa ka bahin sa espirituwalidad, ang laing hinungdanong yawi aron mas makontrolar ang atong mga kinabuhi.​—Miqueas 6:8; 1 Juan 2:​15-17.

Ang espirituwalidad nga gipasukad sa tukmang kahibalo sa Bibliya maghimo kanimo nga usa ka tawong mas makaila ug makasabot​—usa nga dili malingla sa way-pulos, sekular nga mga kahubitan sa kalamposan. Pamatia ang maalamong tambag sa 1 Corinto 7:31: “Kadtong nagagamit sa kalibotan manig-ingon kanilang wala magagamit niini sa bug-os; kay ang talan-awon niining kalibotana nagakausab.” Ang mga Kristohanon “nagagamit sa kalibotan” sa dihang nagataganag materyal alang sa ilang kaugalingon ug sa ilang mga pamilya, apan dili nila itugot nga lamyon sila niining kalibotana. Nahibalo sila nga kini dili mohatag ug tinuod nga kasegurohan, nga kini sa dili madugay bug-os nga malaglag, ug ang tinuod nga kalamposan​—kasegurohan ug kinabuhing walay kataposan sa usa ka paraisong yuta​—nagdepende sa pagbarog sa usa ka tawo uban sa Diyos. (Salmo 1:​1-3; 37:​11, 29) Busa pamatia ang tambag ni Jesus, ug mamuhunan sa maalamong paagi pinaagi sa pagtigom ug “mga bahandi sa langit, diin walay tangkob ni taya nga magakutkot, ug diin walay mga kawatan nga magalungkab ug magapangawat.”​—Mateo 6:20.

Likayi ang Kabalaka ug Kaplaga ang Matuod nga Kalinaw

Samtang kining presenteng sistema nagkaduol sa kataposan niini, tinong modako ang kapit-osan ug mga panginahanglan niini sa imong panahon. Busa, pagkahinungdanon nga ikaw maningkamot nga ipadapat ang tambag sa Bibliya: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” Ang maong kalinaw dili makab-ot ni bisan kinsa nga may sekular lamang nga hilig nga wala makasabot sa bili sa pag-ampo.​—Filipos 4:​6, 7.

Bisan pa niana, himoon ni Jehova kanimo ang labaw pa kay sa paghatag kanimog kalinaw sa hunahuna. Tabangan ka niya sa pagpas-an sa imong lulan sa responsabilidad sa kada adlaw kon imong ‘itugyan kaniya ang tanan nimong mga kabalaka.’ (1 Pedro 5:7; Salmo 68:19) Busa maalamon nga mamati sa Diyos kada adlaw pinaagi sa pagbasag usa ka bahin sa iyang Pulong. Kinsa ba ang makahatag kanimog mas maayong tambag kay sa imong Maglalalang? (Salmo 119:​99, 100, 105) Oo, gipakita sa kasinatian nga kadtong nagbutang sa Diyos nga sentro sa ilang kinabuhi natabangan pag-ayo sa malipayong pagsagubang sa paspas nga kinabuhi sa kalibotan karong adlawa.​—Proverbio 1:33; 3:5, 6.

[Blurb sa panid 11]

Tinoa ang mga prioridad, lakip ang imong panginahanglan sa panahon nga mag-inusara ug sa espirituwalidad

[Hulagway sa panid 9]

Mahimo ba nimong yano ug hapsay ang imong kinabuhi?

[Hulagway sa panid 10]

Gipalabi mo ba ang mga butang o ang mga tawo?