Kining Maayong Balita Kinahanglang Mawali Una

“Sa tanang kanasoran ang maayong balita kinahanglan nga mawali una.”​—MARCOS 13:10.

 1, 2. Unsa ang marka sa mga Saksi, ug ngano?

NGANONG ang mga Saksi ni Jehova magsige ug sangyaw? Sa walay duhaduha ilado kita sa tibuok kalibotan tungod sa atong publikong ministeryo, kon kaha gikan sa balay ug balay, sa kadalanan, o sa dipormal nga paagi. Sa matag haom nga okasyon, ipaila nato ang atong kaugalingon ingong mga Saksi ug sa mataktikanhong paagi mosulay sa pagpadayag sa maayong balita nga atong gipakahamili. Sa pagkamatuod, makaingon kita nga kini nga pag-alagad mao ang atong marka!​—Colosas 4:6.

² Hunahunaa lang kini​—sa matag higayong makita sa mga tawo diha sa ilang kasilinganan ang grupo sa maayog-pamisteng mga lalaki, mga babaye, ug mga bata nga nagdalag mga bag, unsay kasagarang mosantop sa ilang hunahuna? Kini ba, ‘Oy, ania na sad ang mga Katoliko (o Ortodokso)!’ o, ‘Ania na sad ang mga Pentekostal (o mga Baptist)!’ Dili. Ang mga tawo nahibalo nga kining mga relihiyona walay tibuok nga mga pamilya nga nagaministeryo sa balay-ug-balay. Tingali ang pipila ka relihiyosong grupo nagpadalag mga “misyonaryo” sulod sa duha ka tuig nga asaynment ngadto sa usa ka dapit, apan ang kadaghanan sa ilang membro wala magapakigbahin sa bisan hain niana nga ministeryo. Ang mga Saksi ni Jehova lamang ang nailhan sa tibuok kalibotan sa ilang kasibot sa pagpadayag sa ilang mensahe ngadto sa uban sa matag haom nga okasyon. Ug sila ilado tungod sa ilang mga magasin, Ang Bantayanang Torre ug Pagmata!​—Isaias 43:10-12; Buhat 1:8.

Lahi sa Klero sa Kakristiyanohan

 3, 4. Sa unsang paagi sagad nga gihulagway sa palumagian sa balita ang klero sa Kakristiyanohan?

³ Lahi kaayo, ang mga taho sa mantalaan matag karon ug unya nagayagyag sa daghang klero sa pipila ka nasod ingong mga pedophile o mga tawong gustog bata nga maoy kaparis sa pagpakigsekso, imoral nga mga mangingilad, ug mga tikasan. Ang ilang mga buhat sa unod ug ang ilang maluho kaayong mga estilo-sa-pagkinabuhi dayag nga makita sa tanan. Maayo kaayo kining pagkapahayag sa usa ka popular nga tigkomposog awit diha sa iyang awit nga nag-ulohang “Would Jesus Wear a Rolex [mahal kaayo nga bulawang relo] on His Television Show?” Siya nangutana: “Si Jesus ba kaha mahimong politiko kon Siya mobalik sa Yuta? Manag-iyag ikaduhang balay sa Palm Springs [dato nga komunidad sa California] ug mosulay sa pagtago sa Iyang bahandi?” Pagkahaom sa mga pulong ni Santiago: “Nagpuyo kamo sa kaluho ibabaw sa yuta ug mipahimulos sa mahilayong kalipayan. Inyong gipatambok ang inyong mga kasingkasing sa adlaw sa pagpangihaw.”​—Santiago 5:5; Galacia 5:19-21.

⁴ Ang pakig-abyanay sa mga klero uban sa mga politiko ug ang pag-apil-apil pa gani sa mga piliay ingong mga kandidato sa politika nagpadayag kanila ingong modernong-adlawng mga eskriba ug mga Pariseo. Sa samang panahon, diha sa mga nasod sama sa Tinipong Bansa ug Canada, ang mga kaha sa relihiyon natiti tungod sa mahal nga bayad sa bista ug sa mga danyos batok sa klero, gumikan sa ilang mahilayon nga paggawi uban sa mga bata ug mga hamtong.​—Mateo 23:1-3.

 5. Nganong ang klero sa Kakristiyanohan dili makapamatuod nga sila “ang kasaligan ug mabuot nga ulipon”?

⁵ Tukma, si Jesus nakaingon sa klero sa iyang adlaw: “Alaot kamo, mga eskriba ug mga Fariseo, mga salingkapaw! tungod kay sama kamog pinaputi nga mga lubnganan, nga sa panggawas sa pagkatinuod matahom tan-awon apan sa sulod puno sa mga bukog sa patayng mga tawo ug sa tanang matang sa pagkadili-hinlo. Nianang paagiha kamo usab, sa pagkatinuod sa panggawas, matarong tan-awon sa mga tawo, apan sa sulod puno kamo sa pagkasalingkapaw ug kalapasan.” Busa, wala ihatag sa Diyos ngadto sa klero sa Kakristiyanohan, Katoliko man, Protestante, Ortodokso, o walay denominasyon, ang sugo sa pagwali sa maayong balita. Sila wala makapamatuod nga sila mao ang gitagnang “kasaligan ug mabuot nga ulipon.”​—Mateo 23:27, 28; 24:45-47.

Nganong Iwali Una ang Maayong Balita?

 6. Unsang mga panghitabo ang mahitabo sa dili madugay?

⁶ Diha sa iyang mubo nga bersiyon sa sugo ni Jesus nga iwali ang maayong balita sa tanang kanasoran, si Marcos lamang ang migamit sa pulong “una.” (Marcos 13:10; itandi ang Mateo 24:14.) Ang bersiyon ni J. B. Phillips mabasa: “Sa dili pa moabot ang kataposan ang ebanghelyo kinahanglang iwali ngadto sa tanang kanasoran.” Ang paggamit sa adberbio nga “una” nagpasabot nga adunay ubang mga hitabo nga mosunod sa tibuok-kalibotang buluhaton sa pag-ebanghelyo. Kadtong maong mga hitabo maglakip sa gisaad nga dakong kasakitan ug matarong nga pagmando ni Kristo ibabaw sa bag-ong kalibotan.​—Mateo 24:21-31; Pinadayag 16:14-16; 21:1-4.

 7. Nganong buot sa Diyos nga mawali una ang maayong balita?

⁷ Busa nganong buot ang Diyos nga mawali una ang maayong balita? Usa ka katarongan mao nga siya Diyos sa gugma, hustisya, kaalam, ug gahom. Sa katumanan sa mga pahayag ni Jesus nga natala sa Mateo 24:14 ug Marcos 13:10, atong makita ang talagsaong pasundayag niining maong mga hiyas ni Jehova. Lakbit natong usa-usahon pagsusi kini ug tan-awon kon sa unsang paagi sila nalangkit sa pagwali sa maayong balita.

Ang Maayong Balita ug Gugma ni Jehova

 8. Sa unsang paagi nahimong kapadayagan sa gugma sa Diyos ang pagwali sa maayong balita? (1 Juan 4:7-16)

⁸ Sa unsang paagi ang pagwali sa maayong balita nagapabanaag sa gugma sa Diyos? Una sa tanan, tungod kay kini maoy usa ka mensahe nga dili iya lamang sa usa ka rasa o pundok. Kini mao ang maayong balita alang “sa tanang kanasoran.” Gihigugma pag-ayo sa Diyos ang tawhanong pamilya nga iyang gipadala ang iyang bugtong Anak sa yuta aron mahimong halad lukat alang sa mga sala sa tanang katawhan, dili lamang sa usa ka rasa. Si apostol Juan nagsulat: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kondili makabaton ug kinabuhing walay-kataposan. Kay gipadala sa Diyos ang iyang Anak nganhi sa kalibotan, dili aron iyang hukman ang kalibotan, kundili aron ang kalibotan luwason pinaagi kaniya.” (Juan 3:16, 17) Tino ang maayong balita, ang mensahe nga nagasaad ug bag-ong kalibotan sa kalinaw, panaghiusa, ug hustisya, maoy usa ka ebidensiya sa gugma sa Diyos.​—2 Pedro 3:13.

Ang Maayong Balita ug Gahom ni Jehova

 9. Nganong wala gamita ni Jehova ang gamhanang mga relihiyon sa Kakristiyanohan sa pagwali sa maayong balita?

⁹ Sa unsang paagi napasundayag ang gahom ni Jehova pinaagi sa pagwali sa maayong balita? Tagda ang mosunod, kinsay iyang gigamit sa pagtuman niining maong sugo? Ang labing gamhanan bang relihiyosong mga organisasyon sa Kakristiyanohan, sama sa Iglesya Romana Katolika o ang iladong mga denominasyon sa Protestante? Dili, ang ilang pag-apil-apil sa politika naghimo kanilang dili-kuwalipikado alang niining buluhatona. (Juan 15:19; 17:14; Santiago 4:4) Ang ilang bahandi ug ang ilang mga koneksiyon ug impluwensiya sa mga hamili nagamandong matang wala makadani kang Jehova nga Diyos, ni ang ilang puno sa tradisyon nga teolohiya. Ang tawhanong gahom wala kinahanglana aron matuman ang kabubut-on sa Diyos.​—Zacarias 4:6.

10. Kinsay gipili sa Diyos nga maoy magwali?

¹⁰ Sama kini sa giingon ni apostol Pablo diha sa iyang sulat ngadto sa kongregasyon sa Corinto: “Inyong nakita ang iyang pagtawag kaninyo, mga igsoon, nga dili daghan nga maalamon sa paaging unodnon ang gitawag, dili daghan ang gamhanan, dili daghan ang hamilig kagikan; apan gipili sa Diyos ang mga binuang nga butang sa kalibotan, aron iyang mapakaulawan ang mga tawong maalamon; ug gipili sa Diyos ang huyang nga mga butang sa kalibotan, aron iyang mapakaulawan ang kusganong mga butang; ug gipili sa Diyos ang tinamay nga mga butang sa kalibotan ug ang mga butang nga gipakaubos, mga butang nga wala pa mahimong mao, aron iyang mawagtang ang mga butang nga mao na, aron walay unod nga makapanghambog sa panan-aw sa Diyos.”​—1 Corinto 1:26-29.

11. Unsang mga kamatuoran bahin sa mga Saksi ang naghimo kanila nga talagsaon?

¹¹ Diyutay lamang ang sapian sa mga membro sa mga Saksi ni Jehova ug tino nga walay mga gamhanan sa politika. Ang ilang hugot nga pagpabiling neyutral may kalabotan sa politika nagkahulogang sila walay impluwensiya sa politika. Sa kasukwahi, sila sagad nangahimong mga biktima sa mapintas nga paglutos nga gipaluyohan sa mga lider sa relihiyon ug sa politika niining ika-20ng siglo. Apan, bisan pa sa mabangis nga pagsupak nga gipasiugda batok kanila sa mga disipulo sa Nazismo, Fascismo, Komunismo, nasyonalismo, ug bakak nga relihiyon, dili lamang nagawali ang mga Saksi sa maayong balita sa tibuok kalibotan kondili midaghan usab sila sa katingalahan.​—Isaias 60:22.

12. Nganong nagmalamposon ang mga Saksi?

¹² Sa unsa gipahinungod sa mga Saksi ang ilang kalamposan? Si Jesus nagsaad sa iyang mga sumusunod: “Kamo magadawat ug gahom sa dihang ang balaang espiritu moabot nganha kaninyo, ug kamo mahimong mga saksi nako sa Jerusalem ug sa tibuok Judea ug Samaria ug ngadto sa kinalay-ang dapit sa yuta.” Busa, unsa gayod ang tuboran sa ilang kalamposan? Si Jesus nag-ingon: “Kamo magadawat ug gahom sa dihang ang balaang espiritu moabot nganha kaninyo.” Sa susama karong adlawa, ang gahom gikan sa Diyos, dili ang tawhanong katakos, mao ang yawi sa kalamposan sa mga Saksi sa ilang tibuok-kalibotang ministeryo. Gigamit ang daw kinahuyangan sa katawhan, ang Diyos nagapalampos sa kinadak-ang edukasyonal nga buluhaton sa kasaysayan.​—Buhat 1:8; Isaias 54:13.

Ang Maayong Balita ug Kaalam ni Jehova

13. (a) Nganong ang mga Saksi boluntaryong nag-alagad ug walay bayad? (b) Sa unsang paagi gitubag ni Jehova ang pagbiaybiay ni Satanas?

¹³ Ang maayong balita ginawali pinaagig mga boluntaryo. Si Jesus nag-ingon: “Nakadawat kamo nga walay bayad, panghatag nga walay bayad.” (Mateo 10:8) Busa, walay usa sa mga Saksi ni Jehova ang nagadawat ug suhol sa pag-alagad sa Diyos, ni nangita silag suhol. Sa pagkamatuod, sila walay mga koleksiyon gani diha sa ilang mga tigom. Sila malipay, pinaagi sa ilang debotado dili-mahakogong pag-alagad, sa paghatag sa Diyos ug tubag ngadto sa iyang tigsumbong, si Satanas nga Yawa. Kining espiritu nga magsusupak sa Diyos sa tinuod nag-ingon nga ang mga tawo dili moalagad sa Diyos nga may dili-mahakogong motibo. Sa iyang kaalam si Jehova nakapatungha ug dili-malalis nga tubag sa pagbiaybiay ni Satanas​—minilyong maunongong Kristohanong mga Saksi nga nagawali sa maayong balita gikan sa balay ug balay, sa kadalanan, ug sa dipormal nga paagi.​—Job 1:8-11; 2:3-5; Proverbio 27:11.

14. Unsa ang “natagong kaalam” nga gihisgotan ni Pablo?

¹⁴ Laing ebidensiya sa kaalam sa Diyos sa pagpawali sa maayong balita mao nga ang saad mismo sa Gingharian maoy usa ka pasundayag sa kaalam sa Diyos. Si apostol Pablo nagsulat: “Karon kami nagapamulong ug kaalam taliwala niadtong mga hamtong, apan dili ang kaalam niini nga sistema sa mga butang ni nianang sa mga magmamando niini nga sistema sa mga butang, kinsa mangawagtang ra. Apan among ginapamulong ang kaalam sa Diyos ingong sagrado nga tinago, ang natagong kaalam, nga gikatudlo-daan sa Diyos sa wala pa ang sistema sa mga butang alang sa atong himaya.” Kanang maong “natagong kaalam” nagtumong sa maalamong mga paagi sa Diyos sa pagtapos sa rebelyon nga nagsugod sa Eden. Ang kaalam sa maong sagrado nga tinago gipadayag diha kang Jesu-Kristo, kinsa mao ang sentro sa maayong balita sa Gingharian sa Diyos.a​—1 Corinto 2:6, 7; Colosas 1:26-28.

Ang Maayong Balita ug Hustisya sa Diyos

15. Sa unsang paagi kita nahibalo nga si Jehova maoy usa ka Diyos sa hustisya? (Deuteronomio 32:4; Salmo 33:5)

¹⁵ Ilabina may kalabotan sa hustisya nga makita nato ang bili sa pulong “una” diha sa Marcos 13:10. Si Jehova maoy Diyos sa hustisya nga gitimbangan ug mahigugmaong-kalulot. Siya miingon pinaagi sa iyang propetang si Jeremias: “‘Pasagdi siya nga nagapanghambog sa iyang kaugalingon manghambog sa iyang kaugalingon tungod niini mismong butanga, ang pagbaton ug salabotan ug ang pagbaton ug kahibalo bahin kanako, nga ako si Jehova, ang Usa nga nagahatag sa mahigugmaong-kalulot, hustisya ug pagkamatarong sa yuta; kay niining mga butanga ako nahimuot,’ nagaingon si Jehova.”​—Jeremias 9:24.

16. Sa unsang paagi ikailustrar nga ang hustisya nagkinahanglan sa paghatag una ug pasidaan?

¹⁶ Sa unsang paagi gipakita ang hustisya ni Jehova maylabot sa pagwali sa maayong balita? Ipanag-ing nato kini sa usa ka inahan nga naglutog lamian kaayong tsokolateng keyk nga pagakan-on sa dihang mangabot ang mga bisita sa hapon. Kon biyaan niya kini diha sa lamesa nga dili sultihan ang iyang mga anak kon kanus-a kini pagakan-on, unsa man ang natural nga kiling sa mga bata? Kitang tanan mga bata usab kaniadto! May pipila ka gagming nga mga tudlo ang gustong mohikap sa keyk! Karon kon ang inahan napakyas sa paghatag ug igong pasidaan, wala siyay lig-ong basehanan alang sa pagdisiplina. Sa laing bahin, kon klaro niyang isulti nga ang keyk kaonon ra unya inigpangabot sa mga bisita ug busa dili pagahilabtan, nan siya sa tataw nakahatag ug pasidaan. Kon adunay molapas, aduna siyay katungod sa paghimog lig-on ug matarong nga aksiyon.​—Proverbio 29:15.

17. Sa unsang paagi gipakita ni Jehova ang hustisya sa linaing paagi sukad sa 1919?

¹⁷ Si Jehova, sa iyang hustisya, dili magpahamtang sa iyang hudisyal nga aksiyon batok niining daotang sistema sa mga butang nga dili una mohatag ug igong pasidaan. Busa, ilabina sukad niadtong 1919, human gipahinabo sa unang gubat sa kalibotan ang “kaul-ol sa kasakit,” si Jehova nagpadala sa iyang mga Saksi sa tibuok yuta nga masibotong nagamantala sa maayong balita. (Mateo 24:7, 8, 14) Ang mga nasod walay katarongang mangangkon nga wala mahibalo niining talagsaong pasidaan.

Unsa ka Kaylap nga Nawalihan ang Kalibotan?

18. (a) Unsa ang ebidensiya bahin sa kalihokan sa mga Saksi sa hilit nga mga dapit? (b) Unsang ubang mga pananglitan ang imong nahibaloan?

¹⁸ Ang usa ka timaan sa pagkaepektibo niining tibuok-kalibotang edukasyonal nga buluhaton makita diha sa librong Last Places​—A Journey in the North. Giasoy sa awtor niini nga sa dihang iyang gisusi sa iyang mga tsart sa dagat ang hilit nga isla sa Foula, usa sa Shetland Islands sa amihanan sa Scotland, gipakita sa mga tsart nga ang “tanan sa palibot sa isla adunay WKS (wrecks), RKS (rocks), LDGS (ledges), ug OBS (obstructions).” Kining mga timaan “nagpasidaan sa pumapanaw nga marinero sa paglikay. Ang katubigan sa Foula daghan kaayog kapeligrohan, nga naghimo sa isla nga peligroso kaayong sungsongon sa mga tigyate, mga biyahero, ug bisan sa mga trabahante sa obras publikas sa Rayna sa Inglaterra, apan dili​—nahibaloan nako sa pipila ka adlaw​—sa mga Saksi ni Jehova.” Siya nagpadayon: “Maingon nga siksik nga nagapangita silag mga kabig diha sa mga baryong kabos sa dagkong siyudad ug diha sa Ikatulong Kalibotan, sa ingon nagapangabig usab sila alang sa ilang tinuohan diha sa halayo kaayong Foula.” Siya midawat nga usa ka lokal nga molupyo, si Andrew, may kopya sa Ang Bantayanang Torre nga gibilin diha sa iyang hagdanan mga bulan sa miagi. Dayon siya midugang: “Usa ka semana sa ulahi nakakita akog kopya sa [Pagmata! sa pinulongang Danes] sa Faeroes [mga isla sa North Sea] ug duha ka bulan sa ulahi usa ka kopya sa [Ang Bantayanang Torre sa pinulongang Danes] sa Nuuq, Greenland.” Pagkamaayong pamatuod sa masibotong buluhaton sa mga Saksi ni Jehova sa maong mga rehiyon sa amihanan!

Unsay Nakatukmod sa mga Saksi sa Pagpadayon?

19, 20. (a) Unsay nagtukmod sa mga Saksi ni Jehova sa pagpadayon sa pagwali? (b) Unsang mga pangutana ang tubagon sa sunod?

¹⁹ Tinuod, ang pagwali gikan sa balay ug balay sa mga dili-kaila dili masayon, bisan pag ang usa tingali dugay na kaayong nahimong Saksi. Nan unsay katarongan nga nagapadayon kining maong mga Kristohanon? Ang ilang Kristohanong dedikasyon ug pagbati sa responsabilidad. Si Pablo nagsulat: “Kon, karon, akong ginapahayag ang maayong balita, dili kini katarongan alang kanako nga manghambog, kay ang panginahanglan gikapatong ibabaw kanako. Sa pagkatinuod, alaot ako kon wala ko ipahayag ang maayong balita!” Ang tinuod nga mga Kristohanon adunay mensahe nga nagkahulogan ug kinabuhi, busa makaako kaha sila sa paghikaw niini ngadto sa uban? Ang mismong prinsipyo sa pagkasad-an sa dugo tungod sa kapakyasan sa paghatag ug pasidaan panahon sa kapeligrohan maoy usa ka puwersadong katarongan sa pagwali sa maayong balita.​—1 Corinto 9:16; Ezekiel 3:17-21.

²⁰ Nan, sa unsang paagi igawali ang maayong balita? Unsa ang yawi sa kalamposan sa mga Saksi? Unsang dagway sa ilang ministeryo ug organisasyon ang makatabang sa pag-ila kanila ingong ang tinuod nga relihiyon? Ang among sunod nga artikulo magatubag niining maong mga pangutana.

[Footnote]

Nahinumdom Ka Ba?

◻ Unsay nagpalahi sa mga Saksi ni Jehova gikan sa klero?

◻ Sa unsang paagi ang pagwali nagbanaag sa gugma, gahom, ug kaalam sa Diyos?

◻ Sa unsang paagi ang pagwali sa maayong balita nagbanaag sa hustisya sa Diyos?

◻ Unsay nagtukmod sa mga Saksi ni Jehova sa pagpadayon sa ilang ministeryo?

[Hulagway sa panid 15]

Bisan unsa tingali ka nahilit sa mga tawo, buot sa mga Saksi ni Jehova nga sila maabot