4. Unsang tambag ang gihatag ni Pablo diha sa 1 Corinto 10:12, 13?

⁴ Sa dihang gisulatan ni Pablo ang mga Kristohanon nga nagpuyo sa Corinto—usa ka siyudad nga nabantog sa moral nga kadunotan niini—siya naghatag ug realistikong pasidaan batok sa tentasyon ug sa gahom sa sala. Siya miingon: “Siya nga nagahunahunang siya nagabarog pabantaya nga dili siya matumba. Walay tentasyon nga midangat kaninyo gawas sa unsay sagad diha sa mga tawo. Apan ang Diyos kasaligan, ug dili niya itugot nga tentalon kamo labaw sa kon unsay inyong maagwanta, apan uban sa tentasyon siya usab maghimog kalingkawasan aron kamo makalahutay niini.” (1 Corinto 10:12, 13) Kitang tanan—bata ug tigulang, lalaki ug babaye—masugamak sa daghang tentasyon sa eskuylahan, sa trabahoan, o bisan asa. Busa, atong tukion ang gisulti ni Pablo ug sabton kon unsay kahulogan niini alang kanato.

 7. Nganong makahupay ang pagkahibalo nga ang uban malamposong nakapakigbisog sa tentasyon?

⁷ Pagkadakong kahupayan ang atong madawat gikan sa mga pulong ni Pablo: “Walay tentasyon nga midangat kaninyo gawas sa unsay sagad diha sa mga tawo”! (1 Corinto 10:13) Si apostol Pedro misulat: “Bumarog kamo batok [sa Yawa], nga lig-on diha sa pagtuo, kay nahibalo nga ang samang mga butang maylabot sa mga pag-antos ginapahinabo diha sa tibuok kapunongan sa inyong mga igsoon dinhi sa kalibotan.” (1 Pedro 5:9) Oo, ang uban nakaatubang ug susamang mga tentasyon ug malamposong nakapakigbisog niana sa tabang sa Diyos, ug mao man usab kita. Apan, ingong tinuod nga mga Kristohanon nga nagkinabuhi sa malaw-ayg gawi nga kalibotan, kitang tanan makadahom nga tentalon sa madugay o madali. Nan, sa unsang paagi kita makasalig nga mabuntog ang tawhanong kahuyangan ug tentasyon nga magpakasala?