Pabiling Suod sa Teokrasya
“Si Jehova mao ang atong Maghuhukom, si Jehova mao ang atong Maghahatag-ug-balaod, si Jehova mao ang atong Hari.”—ISAIAS 33:22.
1. Nganong ang kagamhanan maoy hinungdanon kaayong butang sa kadaghanang tawo?
ANG ulohan labot sa kagamhanan hinungdanon kaayo alang sa tanan. Ang maayong kagamhanan mohatag ug pakigdait ug kauswagan. Ang Bibliya nag-ingon: “Pinaagi sa hustisya ang usa ka hari magapalig-on sa yuta.” (Proverbio 29:4) Sa laing bahin, ang dili maayong kagamhanan motultol ug inhustisya, korapsiyon, ug pagpanglupig. “Sa dihang ang usa ka tawong daotan maghari, ang katawhan magapanghupaw.” (Proverbio 29:2) Sa tibuok kasaysayan, nakasulay na ang mga tawo ug daghang matang sa kagamhanan, ug ikasubo, sila kanunayng ‘nanghupaw’ tungod sa pagpanglupig sa ilang mga magmamando. (Ecclesiastes 8:9) Aduna bay bisan unsang matang sa kagamhanan nga molampos sa pagdalag dumalayong katagbawan sa mga ginsakpan niini?
2. Nganong ang “teokrasya” maoy tukmang paghubit sa kagamhanan sa karaang Israel?
2 Ang magsusulat sa kasaysayan nga si Josephus naghisgot ug usa ka talagsaong matang sa kagamhanan sa dihang siya nagsulat: “Gisalig sa ubang mga tawo ang supremong politikanhong gahom ngadto sa mga monarkiya, ang uban ngadto sa mga oligarkiya, apan ang uban pa ngadto sa mga masa. Apan, ang atong maghahatag-ug-balaod [Moises] wala gayod madani niining mga matanga sa politikanhong organisasyon, apan naghatag ug gambalay sa iyang batakang-balaod diin—kon gamiton man ang dili kasagarang pulong—mahimong matawag nga usa ka ‘teokrasya,’ pagbutang sa tanang sobrenidad ug awtoridad diha sa mga kamot sa Diyos.” (Against Apion, II, 164-5) Sumala sa Concise Oxford Dictionary, ang teokrasya nagkahulogang “usa ka matang sa kagamhanan sa Diyos.” Ang pulong dili makita diha sa Bibliya, apan tukma kaayo kini sa paghubit sa kagamhanan sa karaang Israel. Bisan pag ang mga Israelinhon nakabaton ug makitang hari, ang ilang tinuod nga magmamando mao si Jehova. Ang Israelinhong manalagna nga si Isaias nag-ingon: “Si Jehova mao ang atong Maghuhukom, si Jehova mao ang atong Maghahatag-ug-balaod, si Jehova mao ang atong Hari.”—Isaias 33:22.
Unsa ang Tinuod nga Teokrasya?
3, 4. (a) Unsa ang tinuod nga teokrasya? (b) Sa haduol nga umaabot, unsang mga panalangin ang ipatungha sa teokrasya ngadto sa tanang katawhan?
3 Sukad nga gimugna ni Josephus ang pulong, daghang katilingban gibatbat ingong mga teokrasya. Ang uban niini mopatim-aw nga mapig-oton, panatiko, ug mabangis nga mahariharion. Tinuod ba kini nga mga teokrasya? Dili sa diwa sa pagkagamit ni Josephus sa pulong. Ang suliran mao nga ang kahulogan sa “teokrasya” gipasangkad. Ang librong World Book Encyclopedia nagbatbat niini ingong “usa ka matang sa kagamhanan diin ang estado gimandoan sa usa ka pari o mga pari, ug diin ang mga membro sa pagkapari adunay awtoridad sa sibil ug relihiyosong mga butang.” Apan, ang tinuod nga teokrasya dili kagamhanan sa mga pari. Kini sa pagkatinuod mao ang pagmando sa Diyos, kagamhanan sa Maglalalang sa uniberso, si Jehova nga Diyos.
4 Sa haduol nga umaabot, ang tibuok yuta mailalom sa teokrasya, ug pagkadakong panalangin unya kini! ‘Ang Diyos mismo mouban [sa katawhan]. Ug iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang miagi na.’ (Pinadayag 21:3, 4) Walay parianong pagmando sa mga tawong dili-hingpit ang makapatungha ug ingon niana nga kalipay. Ang pagmando lamang sa Diyos. Busa, ang matuod nga mga Kristohanon dili mosulay sa pagpatunghag teokrasya pinaagi sa politikanhong aksiyon. Sila mapailobong naghulat sa Diyos nga magtukod ug usa ka tibuok-kalibotang teokrasya sa iyang kaugalingong panahon ug sa iyang kaugalingong paagi.—Daniel 2:44.
5. Asa naglihok ang tinuod nga teokrasya karon, ug unsang mga pangutana ang gipatugbaw mahitungod niana?
5 Apan, kasamtangan, ang tinuod nga teokrasya naglihok. Asa? Taliwala niadtong kinabubut-ong nagpasakop sa pagmando sa Diyos ug nakigkooperar sa pagtuman sa iyang kabubut-on. Ang maong mga matinumanon gitigom ingong usa ka tibuok-kalibotang espirituwal nga “nasod” diha sa espirituwal nga “yuta” niini. Sila mao ang mga nanghibilin sa “Israel sa Diyos” ug sa ilang kapin sa lima ug tunga ka milyong kaubanang Kristohanon. (Isaias 66:8; Galacia 6:16) Kini sila nagpasakop kang Jesu-Kristo, ang langitnong Hari nga gientrono ni Jehova nga Diyos, ang ‘Hari sa walay kataposan.’ (1 Timoteo 1:17; Pinadayag 11:15) Sa unsang paagi kining organisasyona teokratikanhon? Sa unsang paagi gilantaw sa mga sakop niini ang awtoridad sa sekular nga mga kagamhanan? Ug sa unsang paagi ang prinsipyo sa teokrasya gipatunhay sa mga tawo nga adunay awtoridad sulod sa ilang espirituwal nga komunidad?
Usa ka Teokratikanhong Organisasyon
6. Sa unsang paagi ang usa ka makita, tawhanong organisasyon pagamandoan sa Diyos?
6 Sa unsang paagi ang usa ka tawhanong organisasyon pagamandoan ni Jehova, kinsa nagpuyo sa dili-makitang mga langit? (Salmo 103:19) Sa paagi nga kadtong nakig-uban niana nagsunod sa dinasig nga tambag: “Salig kang Jehova uban sa bug-os mong kasingkasing ug ayaw pagsalig sa imong kaugalingong pagsabot.” (Proverbio 2:6; 3:5) Ilang gitugotan ang Diyos nga momando kanila samtang sila nagbantay sa “balaod sa Kristo” ug nagpadapat sa dinasig nga mga prinsipyo sa Bibliya diha sa ilang adlaw-adlawng mga kinabuhi. (Galacia 6:2; 1 Corinto 9:21; 2 Timoteo 3:16; tan-awa ang Mateo 5:22, 28, 39; 6:24, 33; 7:12, 21.) Sa paghimo niini, sila kinahanglang mga estudyante sa Bibliya. (Salmo 1:1-3) Sama sa “hamilig-hunahuna” nga mga taga-Berea sa karaan, sila wala magsunod ug mga tawo kondili nag-usisa kanunay sa Bibliya sa mga butang nga ilang natun-an. (Buhat 17:10, 11; Salmo 119:33-36) Sila nag-ampo sama sa salmista: “Tudloi ako sa pagkamaayo, pagkamakataronganon ug kahibalo, kay ako nagpasundayag ug pagtuo sa imong mga sugo.”—Salmo 119:66.
7. Unsa ang kahikayan sa pagdumala diha sa teokrasya?
7 Sa matag organisasyon, kinahanglang adunay usa nga may awtoridad o magtaganag pagtultol. Ang mga Saksi ni Jehova dili eksepsiyon, ug ilang gisunod ang gambalay sa awtoridad nga gilatid ni apostol Pablo: “Ang ulo sa matag lalaki mao ang Kristo; sa baylo ang ulo sa usa ka babaye mao ang lalaki; sa baylo ang ulo sa Kristo mao ang Diyos.” (1 Corinto 11:3) Kaharmonya niini, ang kuwalipikadong mga lalaki lamang ang mag-alagad ingong mga ansiyano sa mga kongregasyon. Ug bisan pag si Jesus—“ang ulo sa matag lalaki”—atua sa langit, dinhi sa yuta aduna pay “mga nahibilin” sa iyang dinihogang mga igsoon, nga adunay paglaom sa pagmando uban kaniya sa langit. (Pinadayag 12:17; 20:6) Kini sila maoy naglangkob sa daghag-bahin nga ‘matinumanon ug maalamong ulipon.’ Ang mga Kristohanon nagpakita sa ilang pagkamasinakopon ngadto kang Jesus, ug busa ngadto sa ulo ni Jesus, si Jehova, pinaagi sa pagdawat sa maong “ulipon.” (Mateo 24:45-47; 25:40) Niining paagiha, ang teokrasya mahusay. “Ang Diyos usa ka Diyos, dili sa kasamok, kundili sa kalinaw.”—1 Corinto 14:33.
8. Sa unsang paagi ang Kristohanong mga ansiyano nagpaluyo sa prinsipyo sa teokrasya?
8 Ang Kristohanong mga ansiyano nagpaluyo sa prinsipyo sa teokrasya tungod kay ilang giila nga sila may tulubagon kang Jehova kon unsaon nila pagpasundayag sa ilang limitadong sukod sa awtoridad. (Hebreohanon 13:17) Ug sa paghimog mga desisyon, sila nagsalig sa kaalam sa Diyos, dili sa ilang kaugalingong kaalam. Niining bahina, sila nagsunod sa panig-ingnan ni Jesus. Siya mao ang labing maalam nga tawo nga nabuhi sukad. (Mateo 12:42) Bisan pa niana, iyang gisultihan ang mga Hudiyo: “Ang Anak dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginahimo sa Amahan.” (Juan 5:19) Ang mga ansiyano usab adunay samang tinamdan kang Haring David. Iyang gipasundayag ang mabug-at nga awtoridad diha sa teokrasya. Bisan pa niana, siya nagtinguha sa pagsunod sa dalan ni Jehova, dili sa iyang kaugalingong dalan. Siya nag-ampo: “Tudloi ako, Oh Jehova, sa imong dalan, ug mandoi ako sa alagianan nga matul-id.”—Salmo 27:11.
9. Mahitungod sa nagkalainlaing mga paglaom ug nagkalainlaing mga pribilehiyo sa pag-alagad diha sa teokrasya, unsang timbang nga hunahuna ang gihuptan sa dedikadong mga Kristohanon?
9 Gikuwestiyon sa uban kon makataronganon ba nga ang awtoridad diha sa kongregasyon ipasundayag lamang sa kuwalipikadong mga lalaki o kon makataronganon nga ang uban adunay langitnong paglaom samtang ang uban adunay yutan-ong paglaom. (Salmo 37:29; Filipos 3:20) Ang dedikadong mga Kristohanon, hinunoa, nakasabot nga kining mga kahikayana gilatid diha sa Pulong sa Diyos. Kini maoy teokratikanhon. Kon may mokuwestiyon man kanila, kasagaran kini himoon niadtong mga tawo nga dili moila sa mga prinsipyo sa Bibliya. Gawas pa, ang mga Kristohanon nahibalo nga ang mga lalaki ug mga babaye managsama diha sa mga mata ni Jehova kon bahin na sa kaluwasan. (Galacia 3:28) Alang sa tinuod nga mga Kristohanon, ang pagkahimong mga magsisimba sa Soberano sa uniberso mao ang kinatas-ang posibleng pribilehiyo, ug sila malipay sa pagdawat sa bisan unsang papel nga ilatid ni Jehova alang kanila. (Salmo 31:23; 84:10; 1 Corinto 12:12, 13, 18) Dugang pa, ang kinabuhing walay kataposan, sa langit man o diha sa usa ka paraisong yuta, maoy usa ka tinuod nga katingalahang paglaom.
10. (a) Unsang maayong tinamdan ang gipasundayag ni Jonathan? (b) Sa unsang paagi ang mga Kristohanon karon nagpakita ug usa ka tinamdan nga sama nianang kang Jonathan?
10 Busa, ang mga Saksi ni Jehova kaamgid ni Jonathan, ang mahinadlokon-sa-Diyos nga anak ni Haring Saul. Si Jonathan lagmit mahimong usa ka maayo kaayong hari. Apan, tungod sa pagkadili-matinumanon ni Saul, gipili ni Jehova si David nga mahimong ikaduhang hari sa Israel. Naglagot ba si Jonathan niini? Wala. Siya nahimong usa ka maayong higala ni David ug gani gipanalipdan pa siya batok kang Saul. (1 Samuel 18:1; 20:1-42) Sa samang paagi, kadtong adunay yutan-ong paglaom dili masina niadtong adunay langitnong paglaom. Ug ang tinuod nga mga Kristohanon dili masina niadtong adunay teokratikanhong awtoridad sa kongregasyon. Hinunoa, ilang “hatagan sila ug labi pa kay sa labaw-ordinaryo nga pagtagad diha sa gugma,” nga moila sa ilang kuging pagtrabaho alang sa ilang espirituwal nga mga igsoong lalaki ug babaye.—1 Tesalonica 5:12, 13.
Ang Teokratikanhong Panghunahuna Labot sa Sekular nga Pagmando
11. Unsay panglantaw sa mga Kristohanon nga nagpasakop sa teokratikanhong pagmando sa sekular nga mga awtoridad?
11 Kon ang mga Saksi ni Jehova nailalom sa teokrasya, pagmando sa Diyos, unsay ilang paglantaw sa nasodnong mga magmamando? Si Jesus miingon nga ang iyang mga sumusunod mahimong “dili bahin sa kalibotan.” (Juan 17:16) Apan, ang mga Kristohanon nag-ila sa ilang utang kang “Cesar,” ang sekular nga mga kagamhanan. Si Jesus miingon nga kinahanglang ilang “ibayad ang mga butang ni Cesar ngadto kang Cesar, apan ang mga butang sa Diyos ngadto sa Diyos.” (Mateo 22:21) Sumala sa Bibliya, ang tawhanong mga kagamhanan “napahimutang diha sa ilang relatibong mga posisyon pinaagi sa Diyos.” Si Jehova, ang Tuboran sa tanang awtoridad, nagtugot sa mga kagamhanan sa paglungtad, ug siya nagdahom kanila nga maghimog maayo ngadto niadtong ilalom sa ilang hurisdiksiyon. Sa dihang ilang himoon kini, sila maoy “ministro sa Diyos.” Ang mga Kristohanon magpasakop sa kagamhanan nga ilang gipuy-an “tungod sa [ilang] tanlag.” (Roma 13:1-7) Sa pagkatinuod, kon ang estado magsugo ug usa ka butang nga supak sa kasugoan sa Diyos, ang Kristohanon ‘magsugot sa Diyos ingong magmamando inay kay ang mga tawo.’—Buhat 5:29.
12. Sa dihang lutoson ang mga Kristohanon sa mga awtoridad, kang kinsang maayong panig-ingnan ang ilang sundon?
12 Komosta kon ang tinuod nga mga Kristohanon lutoson sa mga awtoridad sa kagamhanan? Nan ilang sundon ang panig-ingnan sa unang mga Kristohanon, kinsa nag-antos ug mga yugto sa grabeng paglutos. (Buhat 8:1; 13:50) Ang mga pagsulay sa pagtuo gidahom, sanglit si Jesus nagpasidaan nga kini moabot. (Mateo 5:10-12; Marcos 4:17) Bisan pa niana, kadtong unang mga Kristohanon wala mobalos batok sa ilang mga maglulutos; ni nangaluya ang ilang pagtuo ilalom sa kalisod. Hinunoa, ilang gisunod ang panig-ingnan ni Jesus: “Sa dihang siya gisultihag pasipala, wala siya mobalos sa pagsultig pasipala. Sa dihang nag-antos siya, wala siya manghulga, kundili nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.” (1 Pedro 2:21-23) Oo, ang Kristohanong mga prinsipyo nakadaog batok sa mga paghagit ni Satanas.—Roma 12:21.
13. Unsay pagsanong sa mga Saksi ni Jehova sa paglutos ug mabutangbutangong mga kampanya batok kanila?
13 Tinuod usab kini karong adlawa. Sulod niining sigloha, grabe ang pag-antos sa mga Saksi ni Jehova diha sa mga kamot sa daogdaogang mga magmamando—ingon gayod sa gitagna ni Jesus. (Mateo 24:9, 13) Diha sa ubang kayutaan, ang kabakakan ug mga pagdaot gipakaylap niadtong naningkamot sa pagpugos sa mga awtoridad sa paglihok batok niining sinserong mga Kristohanon. Sa gihapon, bisan pa sa maong “daotang taho,” ang mga Saksi sa ilang maayong paggawi nagrekomendar sa ilang kaugalingon ingong mga ministro sa Diyos. (2 Corinto 6:4, 8) Kon posible, ilang ipresentar ang ilang kaso ngadto sa mga opisyales ug atubangan sa mga korte sa yuta aron sa pagpasundayag sa ilang pagkawalay-sala sa daotang buhat. Ilang gamiton ang bisan unsang mga paagi nga bukas kanila sa pagdepensa sa dayag sa maayong balita. (Filipos 1:7) Apan human nga nahimo na nila ang tanan nilang maarangan nga nahiuyon sa balaod, ilang gitugyan ang mga butang diha sa mga kamot ni Jehova. (Salmo 5:8-12; Proverbio 20:22) Kon gikinahanglan, sila, sama sa unang mga Kristohanon, dili mahadlok sa pag-antos alang sa pagkamatarong.—1 Pedro 3:14-17; 4:12-14, 16.
Ibutang Pag-una ang Kahimayaan sa Diyos
14, 15. (a) Unsa ang labing importante alang niadtong nagpaluyo sa prinsipyo sa teokrasya? (b) Sa unsang okasyon nga si Solomon nagpakita ug maayong panig-ingnan sa pagkamapainubsanon sa iyang katungdanan sa pagkamagtatan-aw?
14 Sa dihang gitudloan ni Jesus ang iyang mga sumusunod sa pag-ampo, ang unang butang nga iyang gihisgotan mao ang pagbalaan sa ngalan ni Jehova. (Mateo 6:9) Kaharmonya niini, kadtong nagkinabuhi ilalom sa teokrasya nangita sa himaya sa Diyos, dili sa ilang kaugalingong himaya. (Salmo 29:1, 2) Ang Bibliya nagtaho nga sa unang siglo, kini mao ang kapangdolan alang sa uban nga nagdumili sa pagsunod kang Jesus tungod kay “ilang gihigugma ang himaya sa mga tawo,” sila gusto nga himayaon sa mga tawo. (Juan 12:42, 43) Sa pagkatinuod, nagkinahanglag pagkamapainubsanon ang pagbutang kang Jehova nga una kay sa pagpadako-sa-kaugalingon mismo.
15 Si Solomon nagpakita ug maayong espiritu niining bahina. Itandi ang iyang mga pulong panahon sa pagpahinungod sa mahimayaong templo nga iyang gitukod uban nianang kang Nabucodonosor mahitungod sa iyang mga nahimo sa pagpanukod. Uban sa naghingaping garbo, si Nabucodonosor nanghambog: “Dili ba mao kini ang Dakong Babilonya, nga akong gitukod mismo aron mahimong harianong puloy-anan pinaagi sa kusog sa akong gahom ug sa dungog sa akong pagkahalangdon?” (Daniel 4:30) Sa kasukwahi, mapainubsanong gipaubos ni Solomon ang iyang nahimo, nga nag-ingon: “Tinuod ba gayod nga mopuyo ang Diyos uban sa mga tawo sa yuta? Tan-awa! Ang langit, oo, ang langit sa kalangitan mismo, dili makapaarang kanimo; nan, unsa pa kaha kining balay nga akong gitukod?” (2 Cronicas 6:14, 15, 18; Salmo 127:1) Si Solomon wala magbayaw sa iyang kaugalingon. Siya nahibalo nga siya maoy usa lamang ka hawas ni Jehova ug nagsulat: “Moabot ba ang pagkamapahitas-on? Nan moabot ang kaulawan; apan ang kaalam anaa sa mga mapainubsanon.”—Proverbio 11:2.
16. Sa unsang paagi ang mga ansiyano napamatud-ang usa ka tinuod nga panalangin pinaagi sa pagdumili sa paghimaya sa ilang kaugalingon?
16 Ang Kristohanong mga ansiyano samang nagbayaw kang Jehova, dili ang ilang kaugalingon. Ilang gisunod ang tambag ni Pedro: “Kon ang usa magaalagad, paalagara siya ingon nga nagasandig diha sa kusog nga ginahatag sa Diyos; aron nga sa tanang butang mahimaya ang Diyos pinaagi ni Jesu-Kristo.” (1 Pedro 4:11) Gihubit ni apostol Pablo ang “katungdanan sa pagkamagtatan-aw,” dili ingong usa ka dakong posisyon sa pagkaprominente, kondili ingong “usa ka maayong buhat.” (1 Timoteo 3:1) Ang mga ansiyano gitudlo sa pag-alagad, dili sa pagmando. Sila maoy mga magtutudlo, ug mga magbalantay sa panon sa Diyos. (Buhat 20:28; Santiago 3:1) Ang mapainubsanon, nagasakripisyo-sa-kaugalingong mga ansiyano maoy tinuod nga panalangin sa usa ka kongregasyon. (1 Pedro 5:2, 3) “Padayong pakamahala ang ingon nianang matanga sa mga tawo,” ug pasalamati si Jehova nga siya nagtagana ug daghan kaayong kuwalipikadong mga ansiyano sa pagtuboy sa teokrasya niining “kataposang mga adlaw.”—Filipos 2:29; 2 Timoteo 3:1.
‘Magmaawaton sa Diyos’
17. Sa unsang mga paagi kadtong ilalom sa teokrasya nagasundog sa Diyos?
17 Si apostol Pablo nag-awhag: ‘Magmaawaton sa Diyos, ingon nga hinigugmang mga anak.’ (Efeso 5:1) Kadtong nagpasakop sa ilang kaugalingon sa teokrasya naningkamot nga mahisama gayod sa Diyos kutob sa mahimo alang sa mga tawong dili-hingpit. Pananglitan, ang Bibliya nag-ingon mahitungod kang Jehova: “Ang Bato, hingpit ang iyang kalihokan, kay ang tanan niyang mga dalan maoy hustisya. Usa ka Diyos sa pagkamatinumanon, nga kaniya walay inhustisya; siya matarong ug matul-id.” (Deuteronomio 32:3, 4) Aron masundog ang Diyos niining bahina, ang mga Kristohanon mangita ug pagkamatinumanon, pagkamatarong, ug timbang nga pagbati sa hustisya. (Miqueas 6:8; 1 Tesalonica 3:6; 1 Juan 3:7) Ilang gilikayan ang daghang butang nga mahimong dalawaton sa kalibotan, sama sa imoralidad, pagkamaibogon, ug kahakog. (Efeso 5:5) Tungod kay ang mga alagad ni Jehova nagsunod sa diyosnon, dili tawhanon, nga mga sukdanan, ang iyang organisasyon maoy teokratikanhon, mahinlo, ug maayo.
18. Unsa ang pangunang hiyas sa Diyos, ug sa unsang paagi gipabanaag sa mga Kristohanon kining hiyasa?
18 Ang pangunang hiyas ni Jehova nga Diyos mao ang gugma. “Ang Diyos gugma,” miingon si apostol Juan. (1 Juan 4:8) Sanglit ang teokrasya nagkahulogan man nga pagmando pinaagi sa Diyos, kini nagkahulogang pagmando pinaagi sa gugma. Si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Ang teokratikanhong organisasyon nagpakitag talagsaong gugma niining malisod nga kataposang mga adlaw. Sa panahon sa pagpuo sa kaliwat nga panag-away sa Aprika, ang mga Saksi ni Jehova nagpasundayag ug gugma ngadto sa tanan, bisag unsa pang etnikong pundok sila nasakop. Sa panahon sa gubat sa kanhing Yugoslavia, ang mga Saksi ni Jehova sa tanang dapit nagtinabangay sa usag usa, samtang ang ubang relihiyosong mga grupo nakigbahin nianang gitawag nga pagpatay ug pag-abog sa etnikong mga pundok. Sa personal nga kahimtang, ang mga Saksi ni Jehova naningkamot sa pagsunod sa tambag ni Pablo: “Kuhaa gikan kaninyo ang tanang mapangdaoton nga kayugot ug kasuko ug kapungot ug sininggitay ug maabusohong sinultihan uban sa tanang pagkadaotan. Apan magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.”—Efeso 4:31, 32.
19. Unsang mga panalangin ang moabot karon ug sa umaabot alang niadtong nagpasakop sa ilang kaugalingon sa teokrasya?
19 Kadtong nagpasakop sa teokrasya nagatagamtam ug dagkong mga panalangin. Sila adunay pakigdait sa Diyos ug sa isigka-Kristohanon. (Hebreohanon 12:14; Santiago 3:17) Sila adunay katuyoan sa kinabuhi. (Ecclesiastes 12:13) Sila adunay espirituwal nga kasegurohan ug usa ka tinong paglaom alang sa umaabot. (Salmo 59:9) Sa pagkatinuod, ilang ginatagamtam na ang pasiunang-pagtilaw nianang mahitabo sa dihang ang tanang katawhan mailalom sa teokratikanhong pagmando. Dayon, ang Bibliya nag-ingon, “dili nila pagadaoton o pagagub-on ang tibuok ko nga bukid nga balaan; tungod kay ang yuta mapuno gayod sa kahibalo ni Jehova ingon sa mga tubig nga nagatabon sa dagat.” (Isaias 11:9) Pagkamahimayaong panahon unya kana! Hinaot nga kitang tanan maghimo sa atong dapit diha nianang umaabot nga Paraiso nga tino pinaagi sa pagpabiling suod karon sa teokrasya.
Makapatin-aw Ka Ba?
◻ Unsa ang tinuod nga teokrasya ug asa kini makaplagan karon?
◻ Sa unsang paagi ang mga tawo nagpasakop sa teokratikanhong pagmando diha sa ilang mga kinabuhi?
◻ Sa unsang mga paagi nga ang tanang nailalom sa teokrasya nangita sa kahimayaan sa Diyos nga una inay kay sa ilang kaugalingong kahimayaan?
◻ Unsang pipila ka diyosnong mga hiyas ang gisundog niadtong nagpaluyo sa teokrasya?
[Hulagway sa panid 17]
Gibutang pag-una ni Solomon ang himaya sa Diyos inay ang iyang kaugalingong himaya