Kapitulo 12

Ang Pagtahud sa Awtoridad Kinahanglanon sa Malinawong Kinabuhi

 1-3. (a) Unsa ang nakaamot sa kanat nga pagsalikway sa awtoridad sa atong adlaw? (b) Sa unsang nagkalainlaing paagi kining pagpangisip gipahayag? (c) Asa mabati ang mga epekto?

ANG espiritu sa independensia nagatugob sa kalibutan karon. Ang kasagarang pagsalikway sa awtoridad naugmad, labi na taliwala niadtong natawo sukad sa Gubat sa Kalibutan II. Ngano? Alang sa usa ka butang, ang ilang mga ginikanan nakaobserbar ug nakasinati sa pagdaugdaug nga walay kasama, maingon man sa samag-diktador ug dunot nga mga taktika niadtong anaa sa gahum. Naugmad kanila ang hanap nga pagpanglantaw sa awtoridad. Ingon nga sangputanan, ang daghan kanila, sa dihang mga ginikanan na, wala magsilsil sa ilang mga anak sa pagtahud sa awtoridad. Ni ang opisyal nga mga inhustisya nga nakita sa mga anak nakatabang sa mga butang. Ingon nga resulta, ang pag-alsa batuk sa awtoridad nahimong kumon.

² Kanang pag-alsa gipahayag sa nagkalainlaing mga paagi. Usahay kini gipakita pinaagi sa pagsul-ob sa usa ka matang sa bisti o pamostura nga nagasalikway sa dinawat nga mga sukdanan. Tingali kini nagalakip sa publikong pagsukol sa kapolisan, o bisan sa pagkamaharuson ug pag-ulag dugo. Apan dili kini limitado niini. Bisan taliwala niadtong kinsa wala nagapahayag sa ilang kaugalingon niining mas hayag nga mga paagi, daghan ang wala nagatagad o nagalapas sa mga balaod kon sila wala nagauyon sa maong mga balaod o nakakaplag niini nga dili konbenyente.

³ Kining situasyon lalum nga nakaapektar sa atmospera sa mga puloy-anan, sa mga tunghaan, sa mga dapit trabahoan, ug sa mga kontak uban sa mga opisyal sa gobiyerno. Dugang ug dugang, ang mga tawo dili buot kang bisan kinsa sa pagsulti kanila kon unsa ang buhaton. Sila nagakab-ut sa ilang ginatuohan nga dakudakung kagawasan. Nagaatubang niining situasyon, unsa ang imong pagahimuon?

 4. Pinaagi sa atong ginahimo niining butang, nagapakita kita sa atong pagpangisip sa unsang isyu?

⁴ Ang imong kurso magapakita kon asa ka nagabarug sa isyu sa unibersohanong pagkasoberano ni Jehova. Nagatutok ka ba gayod kang Jehova ingon nga Tuboran sa matuod nga kalinaw ug kasegurohan? Pangitaon ug ipadapat mo ba sa imong kinabuhi ang ginaingon sa iyang Pulong? O ikaw ba maganunot uban kanilang sa kinaugalingon magahimo sa ilang kaugalingong mga desisyon kon unsa ang maayo ug dautan?​—Genesis 3:1-5; Pinadayag 12:9.

 5. (a) Unsa kasagaran ang nagaresulta sa pagsunod sa pagpanguna sa mga tawo kinsa nagasaad sa “kagawasan”? (b) Unsa ka libre ang tawo kinsa nagabuhat sa kabubut-on sa Diyos?

⁵ Ang usa ka hustong kahibalo sa Bibliya makapanalipud kanimo batuk sa pagkasalaag pinaagi niadtong kinsa, samtang ‘nagasaad sa kagawasan, nagalungtad nga mga ulipon sa kadunot sa ilang kaugalingon.’ Ang pagsunod sa maong mga tawo magapahaluna kanimo sa samang naulipong kahimtang. (2 Pedro 2:18, 19) Ang matuod nga kagawasan mabatonan lamang pinaagi sa pagtuon ug pagbuhat sa kabubut-on sa Diyos. Ang iyang balaang sugo mao “ang hingpit nga balaod nga iya sa kagawasan.” (Santiago 1:25) Kini mao ang ikaingon sanglit si Jehova wala nagadumili kanato, nagalimite kanato uban sa wala kinahanglana nga mga lagda nga wala nagaalagad sa mapuslanong katuyoan. Apan ang iyang balaod nagatagana sa matang sa paggiya nga mohatag ug kagawasan, kalinaw, ug kasegurohan nga pinasukad sa hustong relasyon uban sa Diyos ug uban sa atong isigkatawo.

6, 7. (a) Kinsa ang anaa sa labing maayong puwesto sa paglihok mahitungod sa pag-abuso sa awtoridad? (b) Sa unsang paagi ginapakita ni Jesus ang mahitabo sa mga tawo kinsa nagabutang sa balaod sa ilang kaugalingong mga kamot?

⁶ Mas maayo pa kang bisan kinsa, ang Diyos nasayod sa gilapdon sa pagkadautan sa tawo ug sayup nga paggamit sa awtoridad. Ug siya naghatag sa iyang pulong nga walay sapayan kon unsa ka taas kadtong nagapahinabo sa pagdaugdaug, siya magahukom kanila. (Roma 14:12) Sa tinudlong panahon sa Diyos, “ang dautan . . . pagaputlon gikan sa yuta; ug mahitungod sa mabudhion sila pagalukahon gikan niini.” (Proverbio 2:22) Apan dili magasangput sa bisan unsang malungtarong kaayohan alang kanato kon kita dili magpailub ug ibutang ang balaod sa atong kaugalingong mga kamot.​—Roma 12:17-19.

⁷ Sa gabii sa pagluib ug pag-aresto kaniya, si Jesus nagpasiugda niini ngadto sa iyang mga apostol. Tungod sa mga kahimtang sa yuta, lakip sa presensiya sa mapintas nga mga mananap, ang mga tawo kalagmitan nagadalag mga hinagiban. Ug nianang okasyona dunay duha ka espada sa taliwala sa mga apostol ni Jesus. (Lucas 22:38) Unsa ang nahitabo? Buweno, ilang nakita ang usa ka maharusong pagtuis sa hustisya sa dihang gidakop si Jesus nga walay pasikaranan. Busa si apostol Pedro sa kasuko naglanit sa iyang espada ug nagtigbas sa dalunggan sa usa sa mga tawo. Apan si Jesus nag-uli sa naputol nga dalunggan ug nagtambag kang Pedro: “Iuli ang imong espada sa iyang sakub, kay ang tanan niadtong kinsa nagagamit sa espada mamatay sa espada.” (Mateo 26:52) Daghang mga tawo, bisan sa atong adlaw, ang naluwas unta sa hilaw nga kamatayon pinaagi sa pagsunod niining tambag.​—Proverbio 24:21, 22.

Hustong Pagpanglantaw sa Sekular nga Awtoridad

 8. (a) Sumala sa gipahayag sa Roma 13:​1, 2, sa unsang paagi lantawon sa mga Kristohanon ang sekular nga mga magmamando? (b) Unsa ang buot ipasabut sa gipahayag nga sila “nahaluna sa ilang relatibong mga dapit pinaagi sa Diyos”?

⁸ Sa dihang nagasulat sa mga Kristohanon sa Roma, si apostol Pablo inspirado sa Diyos sa paghisgut sa unsang paagi sila magagawi sa ilang kaugalingon sa relasyon sa sekular nga mga awtoridad. Misulat siya: “Pasagdi ang tagsa ka kalag magpasakup sa hataas nga mga awtoridad, kay walay awtoridad gawas sa pagtugot sa Diyos; ang nagalungtad nga mga awtoridad nagabarug nga nahaluna sa ilang relatibo nga mga dapit pinaagi sa Diyos. Busa siya kinsa nagasupak sa awtoridad nagabarug batuk sa kahikayan sa Diyos; kadtong kinsa nagabarug batuk niini makadawat ug paghukom sa ilang kaugalingon.” (Roma 13:1, 2) Nagapasabut ba kini nga ang Diyos nagapahaluna niining sekular nga mga magmamando sa gahum? Ang Bibliya tinong nagatubag nga wala! (Lucas 4:5, 6; Pinadayag 13:1, 2) Apan sila nagalungtad tungod sa iyang permiso. Ug ang ‘relatibo nga dapit’ nga okupado nila sa kurso sa tawhanong kasaysayan gitino sa Diyos. Unsa man kanang dapit?

 9. Bisan pa mga opisyal nagabuhat sa dautang mga buhat, ngano nga kita makapakitag pagtahud kanila?

⁹ Ang kasulatan nga gikutlo pa nagaingon nga kini usa nga “hataas.” Busa ang mga opisyal sa gobiyerno tratahon uban sa pagtahud. Ang mga balaod nga ilang ginapasunod kinahanglan tagdon. Wala kini nagapasabut nga ikaw nagadayeg sa mga indibiduwal, ni ikaw nagauyon sa bisan unsang kadunot nga anaa kanila. Apan ang pagtahud hustong ipakita tungod sa katungdanan nga okupado nila.​—Tito 3:1, 2.

10. Sa unsang paagi lantawon ang pagbayad sa mga buhis, ug ngano?

¹⁰ Sa dakung sukod, ang sekular nga mga balaod nagabuhat alang sa kaayohan. Sila nagatabang sa paghupot sa kahusay ug nagapasalig sa usa ka sukod sa panalipud alang sa mga tawo ug sa ilang kabtangan. (Roma 13:3, 4) Labot pa, ang mga gobiyerno kasagaran nagatagana sa mga dalan, sa pag-alagad sa sanitasyon, sa pagpanalipud sa sunog, edukasyon, ug sa uban pa nga nagahatag kaayohan sa katawhan. Pagabayaran ba sila niining mga pag-alagad? Magabayad ba kita sa mga buhis? Kining sulirana sagad magtulod ug kusganong mga pagbati tungod sa taas nga balayranan sa buhis ug sa kasagaran dili hustong paggamit sa mga pundo publiko. Sa panahon ni Jesus, usab, ang maong suliran dunay kalangkitan sa politika. Apan si Jesus wala nagpakita nga ang nagalungtad nga situasyon mahimong katarungan sa bisan unsang pagdumili sa pagbayad. Nagapasabut sa salapi nga binuhat sa Romanong Cesar, siya nag-ingon: “Nan, bayri si Cesar sa mga butang ni Cesar, apan ang Diyos sa mga butang sa Diyos.” (Mateo 22:17-21; Roma 13:6, 7) Wala, si Jesus wala magpaluyo sa ideya nga ang tagsa mahimong balaod sa iyang kaugalingon.

11, 12. (a) Sa unsang paagi nagapakita ang Kasulatan nga dunay lain pang awtoridad nga palandungon? (b) Unsa ang imong buhaton kon ang sekular nga mga magmamando magapagula sa mga orden nga sukwahi sa mga kinahanglanon sa Diyos, ug ngano?

¹¹ Bisan pa niana, si Jesus nagpakita nga si “Cesar,” ang sekular nga estado, dili lamang ang awtoridad nga palandungon. “Ang hataas nga mga awtoridad” dili hataas pa sa Diyos o tupong kaniya. Sa kasukwahi, sila ubos kaayo kaniya. Busa ang ilang awtoridad limitado, dili bug-os. Tungod niini, ang mga Kristohanon kanunay nag-atubang sa kritikal nga desisyon. Usa kini ka desisyon nga kinahanglan atubangon mo usab. Kon ang mga tawo sa gahum mangayo alang sa ilang kaugalingon kon unsa ang iya sa Diyos, unsa ang imong pagahimuon? Kon sila magadumili sa ginasugo sa Diyos, kinsa ang imong pagasugton?

¹² Ang mga apostol ni Jesu-Kristo matinahuron apan lig-on nga nagpahayag sa ilang baruganan sa mga membro sa taas nga korte sa Jerusalem: “Dili kami makahunong sa pagsulti mahitungod sa mga butang nga among nakita ug nadunggan. . . . Kinahanglan kami magasugot sa Diyos ingon nga magmamando inay kay sa mga tawo.” (Buhat 4:19, 20; 5:29) Ang mga gobiyerno may panahong naghimog mga pagdili diha sa mga emerhensiya, ug kana masabtan. Apan usahay ang mga pagdili sa gobiyerno mahimong tuyoon sa pagbalda sa atong pagsimba sa Diyos ug nagahimo nianang imposible ang pagtuman sa hatag-Diyos nga mga obligasyon. Nan unsa? Ang dinasig nga Pulong sa Diyos nagatubag: “Kinahanglan kami magasugot sa Diyos ingon nga magmamando inay kay sa mga tawo.”

13, 14. (a) Unsa ka maampingon kita nga dili magsugot sa sekular nga mga balaod alang lamang sa personal nga mga katarungan? (b) Gikan sa mga Kasulatan, ipakita ang mga katarungan niini.

¹³ Bisan tuod ang pagtuman niining obligasyona ngadto sa Diyos magpasumpaki sa gipatuman ni “Cesar,” kini lahi kaayo sa independiente nga pagbungkag sa mga balaod nga kita dili nagauyon. Matuod nga, sa personal nga pagpangisip, ang pipila ka balaod maorag wala kinahanglana o labihan ra kaayo nga mapig-uton. Apan dili kana nagapamatarung sa pagsalikway sa mga balaod nga wala nahasumpaki sa mga balaod sa Diyos. Unsa na man kon ang tanang tawo magasugot lamang sa mga balaod nga ilang ginabati makahatag ug kaayohan sa kaugalingon? Kini mosangpot lamang ngadto sa anarkiya.

¹⁴ May mga panahon nga hayan bation sa usa ka tawo nga isalikway niya ang awtoridad ug sa pagbuhat lamang sa nagapahamuot kaniya tungod kay lagmit dili siya madakpan ug masilotan. Pero adunay dakung peligro niini. Samtang ang maong dili pagtagad sa balaod mahimong sa una maglangkit lamang sa menor nga mga butang, ang pagkadili masilotan sa usa ka tawo mahimong magpaisug kaniya sa dakudakung paglapas. Ang Ecclesiastes 8:11 nagapahayag: “Tungod kay ang sentensiya batuk sa usa ka dautang buhat wala sa gilayon ikapahamtang, mao kana ngano ang kasingkasing sa mga anak sa mga tawo bug-os nga nangahas sa pagbuhat ug dautan.” Apan ang matuod nga katarungan sa pagsugot sa balaod yanong tungod ba lamang sa kahadluk sa silot sa dili pagsugot? Alang sa usa ka Kristohanon, dunay mas kusganong katarungan. Ang apostol nga si Pablo nagtawag niana nga “mapugsanong katarungan”​—ang handum alang sa usa ka hinlong konsiyensiya. (Roma 13:5) Ang usa ka tawo kansang konsiyensiya nabansay sa mga prinsipyo sa Kasulatan nahibalo nga ang pagsunod sa usa ka malapasong kurso maoy pagbarug “batuk sa kahikayan sa Diyos.” Bisan kon ang ubang mga tawo nahibalo o wala sa atong ginabuhat, ang Diyos nahibalo, ug ang atong paglaum alang sa umaabut nga kinabuhi nagadepende kaniya.​—1 Pedro 2:12-17.

15. (a) Unsa ang magagiya sa usa ka tawo sa iyang pagpanglantaw sa magtutudlo sa tunghaan o sa usa ka amo? (b) Niining paagi nagalikay kita nga mainpluensiyahan sa kang kansang espiritu?

¹⁵ Ang sama matuod man bahin sa pagpanglantaw sa usa ka batan-on sa iyang magtutudlo sa tunghaan ug sa pagpanglantaw sa hamtung sa iyang sekular nga amo. Ang kamatuoran nga daghang mga tawo palibut kanato ang nagabuhat sa dautang mga butang dili ang nagatinong butang. Nahibalo man o wala ang magtutudlo o ang amo sa atong ginabuhat dili makahimo sa bisan unsang kalainan. Ang pangutana mao, Unsa ang husto? Unsa ang nagapahimuot sa Diyos? Labot pa, kon ang ginapabuhat kanato dili supak sa balaod sa Diyos o matarong mga prinsipyo, kita nagakooperar. Ang mga magtutudlo sa tunghaan kasagaran mga representante sa sekular nga gobiyerno, mao nga mga ahente sa “hataas nga mga awtoridad,” ug busa takus sa pagtahud. Ug mahitungod sa sekular nga mga amo, ang prinsipyo sa Bibliya sa Tito 2:9, 10 mahimong ipadapat, bisan tuod si Pablo misulat niana sa lahi nga relasyon, nga mao ila sa mga ulipon ngadto sa ilang mga agalon. Si Pablo miingon: “Magpahimuot kanila sa maayo, . . . magpakita sa bug-os nga pagkamaunongon, aron nga [ikaw] mahimong magdayandayan sa pagtulon-an sa atong Manluluwas, ang Diyos, sa tanang mga butang.” (Tito 2:9, 10) Busa, atong malikayan ang inpluensiya ni Satanas, kansang espiritu “nagapalakaw sa mga anak sa pagkamasupilon,” ug atong matukod ang malinawong mga relasyon uban sa atong isigkatawo.​—Efeso 2:2, 3.

Awtoridad Sulod sa Puloy-anan

16. Unsang kinahanglanon alang sa harmonya nga kinabuhi sa panimalay ang gipahayag sa 1 Corinto 11:3?

¹⁶ Ang sirkulo sa panimalay maoy laing dapit nga ang pagtahud sa awtoridad makahimog malinawong mga relasyon. Kasagaran ang maong makapahimuot nga relasyon kulang, nga nagasangko sa kagun-oban sa mga relasyon sa panimalay. Unsa ang mahimo sa pagpauswag sa situasyon? Ang prinsipyo sa pagkaulo ingon sa gipahimutang sa 1 Corinto 11:3, mao ang magatubag: “Ang ulo sa tagsa ka lalaki mao ang Kristo; unya ang ulo sa usa ka babaye mao ang lalaki; unya ang ulo ni Kristo mao ang Diyos.”

17. (a) Mahitungod sa pagkaulo, unsa ang puwesto sa lalaki? (b) Unsang maayong panig-ingnan ang gipahaluna ni Kristo mahitungod sa pagkaulo sa bana?

¹⁷ Matikdi nga kining pahayaga sa kahikayan ni Jehova wala nagatumong una sa pagkaulo sa lalaki. Hinuon, nagadapit pagtagad sa kamatuoran nga dunay usa kang kansa ang lalaki magatutok alang sa direksiyon, usa kang kansang panig-ingnan kinahanglan iyang pagasundon. Kanang usa mao si Jesu-Kristo. Siya mao ang ulo sa lalaki. Ug sa iyang mga pagtratar sa iyang kongregasyon, nga gipakasama sa usa ka pangasaw-onon, si Kristo nagpasundayag sa paagi sa paghimo nga usa ka kalampusan sa pagkaulo sa bana. Ang iyang maayong panig-ingnan nagapalihok sa usa ka masinugtanong pagsanong sa iyang mga sumusunod. Sa dihang siya nanguna, inay nga usa ka boss, bagis ug labihan ra ka estrikto sa iyang mga sumusunod, si Jesus “maaghup ug mapaubsanon sa kasingkasing,” sa pagkaagi nga sila nakakaplag ug kapahulayan sa ilang mga kalag. (Mateo 11:28-30) Nagtamay ba siya kanila tungod sa ilang mga kakulian? Sa kasukwahi, siya mahigugmaong mitambag kanila ug naghatag gani sa iyang kinabuhi sa paghinlo kanila sa mga sala. (Efeso 5:25-30) Pagkadakung panalangin sa bisan unsang panimalay ang pagbaton sa usa ka lalaki kinsa sinserong nagapanlimbasug sa pagsunod sa maong panig-ingnan!

18. (a) Sa unsang mga paagi ang usa ka asawa makapakita nga siya nagatahud sa awtoridad sa iyang bana? (b) Sa unsang paagi ang mga anak magapakita sa pagtahud sa ilang mga ginikanan, ug ngano?

¹⁸ Kon duna sa maong matang sa pagkaulo sa puloy-anan, dili malisud alang sa usa ka babaye sa paglantaw ngadto sa iyang bana. Ug ang pagsugot sa mga anak mahimong masayon ra. Apan dunay daku nga mahimong ikatampo usab sa asawa ug mga anak sa kalipay sa panimalay. Pinaagi sa iyang pagkakugihan sa pag-atiman sa panimalay ug pinaagi sa iyang espiritu sa kooperasyon, ang usa ka asawa nagapakita nga siya adunay “lalum nga pagtahud alang sa iyang bana.” Matuod ba kana sa imong panimalay? (Efeso 5:33; Proverbio 31:10-15, 27, 28) Mahitungod sa mga anak, ang kinabubut-ong pagsugot sa amahan ug inahan nagapakita nga sila nagahatag dungog sa ilang mga ginikanan, ingong kinahanglanon sa Diyos. (Efeso 6:1-3) Dili ba adunay mas labaw nga kalinaw ug dakudakung pagbati sa personal nga kasegurohan, sa maong panimalay kay sa usa diin ang pagtahud sa awtoridad kulang?

19. Kon ikaw nagainusara lamang sa panimalay kinsa nagapanlimbasug nga magiyahan sa Pulong sa Diyos, unsay imong kinahanglang buhaton?

¹⁹ Makatabang ka sa paghimo sa imong puloy-anan nga mahimong sama niana. Magapili man ang ubang mga membro sa panimalay sa paglaban sa mga paagi ni Jehova o dili, ikaw makahimo niana. Ang uban mahimong magasanong sa imong maayong panig-ingnan. (1 Corinto 7:16; Tito 2:6-8) Bisan pa kon sila dili mosanong, ang imong gibuhat nagabarug ingon nga pamatuod sa pagkamatarung sa mga paagi sa Diyos, ug kana usa ka butang nga dili gamay ang bili.​—1 Pedro 3:16, 17.

20, 21. (a) Sa unsang paagi ang Bibliya nagapakita nga ang awtoridad sa usa ka bana ug sa mga ginikanan dili absoluto? (b) Busa, uban sa unsang desisyon mahimong atubangon ang usa ka Kristohanong asawa o ang nagatuong mga anak, ug unsa ang magapalihok kanila?

²⁰ Ibutang sa hunahuna nga ang entirong bayanan sa awtoridad sa panimalay gikan sa Diyos. Busa ang mga lalaki magpasakup kang Kristo, ang mga asawa magpasakup sa ilang mga bana “kay kini angay sa Ginoo,” ug ang mga anak magpasakup sa ilang mga ginikanan “kay kini makapahimuot sa Ginoo.” (Colosas 3:18, 20; 1 Corinto 11:3) Busa ang Diyos sa kabililhon dili ikasalindot, mahimo ba? Kini nagakahulogan nga ang awtoridad sa usa ka bana ibabaw sa iyang asawa, ug sa mga ginikanan ibabaw sa ilang mga anak, usa nga relatibo. Nga mao, ang Kristohanong kapikas ug mga anak magpasakup una sa Diyos ug kang Kristo, nga nagasunod sa ilang tambag. Ngadto sa pipila dili matinuohong mga magtiayon o mga ginikanan ang maong ideya tingali sa sinugdan mahimong dili magapahimuot. Apan kini sa matuod nagabuhat alang sa ilang kaayohan, tungod kay kini magatabang sa paghimo sa nagatuo nga kapikas ug mga anak nga mas kasaligan ug mas matinahuron.

²¹ Apan, unsa na man kon ang usa ka bana magapangayo sa iyang asawa nga magabuhat sa usa ka butang nga dili “angay sa Ginoo”? Kon unsa ang iyang buhaton magapasundayag kon siya ba matuod nga may ‘kahadluk sa matuod nga Diyos’ o wala. (Ecclesiastes 12:13) Mao man usab sa mga anak nga may igo nang panuigon sa pagsabut ug pagsugot sa Pulong sa Diyos. Kon ang ilang mga ginikanan wala nagapakig-ambit sa ilang tinguha sa pag-alagad kang Jehova, ang mga anak kinahanglan magahukom kon sila ba magapamatuod sa ilang pagkamaunongon sa Diyos o makigduyog sa luna sa mga ginikanan nga walay tinguha niana. (Mateo 10:37-39) Apan gawas pa sa ilang unang obligasyon sa Diyos, ang mga anak kinahanglan magpasakup sa “tanang butang,” bisan pa kon kini nagakahulogan sa paghimo sa mga butang nga dili nila gusto. (Colosas 3:20) Kining kursoha sa panggawi mahimong makadani gani sa ilang mga ginikanan ngadto sa mga tagana ni Jehova sa kaluwasan. Kini sa pagkamatuod “makapahimuot sa Ginoo” kon ang nagapalihok sa usa mao ang pagkamaunongon kang Jehova ug sa iyang matarung mga paagi, dili ang pagsupak nga natawo sa usa ka independiente nga espiritu.

Sa Kristohanong Kongregasyon

22, 23. (a) Sa unsang paagi ang Kristohanong mga magtatan-aw nagaalagad sa mga membro sa kongregasyon? (b) Busa, unsang pagpanglantaw ang atong batonan nganha kanila sumala sa Hebreohanon 13:17?

²² Kanang samang pagkamaunongon kang Jehova kinahanglan ipakita sa atong pagpanglantaw sa iyang Kristohanong kongregasyon ug niadtong kinsa nagaatiman niana. Si Jehova nagtagana sa mga magtatan-aw sa pagbantay sa “panon.” Wala sila nagadawat ug suweldo apan nagahatag sa ilang kaugalingon tungod sa matuod nga kabalaka alang sa ilang Kristohanong mga igsoong lalaki ug babaye. (1 Pedro 5:2; 1 Tesalonica 2:7-9) Sila nagatabang sa kongregasyon sa pagtuman sa bulohaton nga pagsangyaw sa maayong balita sa Gingharian sa Diyos. Usab, uban sa kabalaka alang sa matag membro sa kongregasyon, sila nagatabang niini kanila sa pagtuon kon unsaon sa pagpadapat sa mga prinsipyo sa Bibliya sa ilang mga kinabuhi. Labot pa, kon ang bisan kinsang membro sa kongregasyon mahiligas sa kalapasan nga wala sa bug-os makaamgo niana, ang panlimbasug ginahimo sa pagpahiuli kaniya. (Galacia 6:1) Kon ang usa ka membro nagasalikway sa Kasulatanhong tambag ug nagapadayon sa seryosong pagkadautan, ang mga magtatan-aw nagatino nga siya palagputon. Sa ingon ang kongregasyon mapanalipdan gikan sa iyang nagadunot nga inpluensiya.​—1 Corinto 5:12, 13.

²³ Sa pag-ila niining mahigugmaong tagana ni Jehova sa pagpaneguro sa kalinaw taliwala sa iyang katawhan, kinahanglan kita magapatalinghug sa tambag nga makaplagan sa Hebreohanon 13:17: “Magmasinugtanon niadtong kinsa nagapanguna taliwala kaninyo ug magpasakup, kay sila nagabantay sa inyong mga kalag sama niadtong kinsa magahatag ug husay; aron nga sila magabuhat niini uban sa kasadya ug dili uban sa kasubo, kay kini makadaut kaninyo.”

24, 25. (a) Sa unsang paagi ang ginatudlo sa mga ansiano magainpluensiya sa paagi sa atong pagpanglantaw kanila? (b) Kanus-a ug asa nato ipadapat ang ginatudlo kanato sa Bibliya? Ngano?

²⁴ Ang Bibliya nagapasiugda nga ang pangunang katarungan ngano kining mga magtatan-aw o mga ansiano takus sa pagtahud mao nga sila nagatudlo sa “pulong sa Diyos.” (Hebreohanon 13:7; 1 Timoteo 5:17) Ug mahitungod sa gahum nianang “pulong,” ang Hebreohanon 4:12, 13 nagapahayag: “Ang pulong sa Diyos buhi ug may gahum ug mas mahait pa sa bisan unsang espada nga duha ang sulab ug nagadulot bisan ngadto sa nagabahin sa kalag ug espiritu, ug sa mga lutahan ug sa kauyokan niini, ug makaarang sa pagtugkad sa mga hunahuna ug mga katuyoan sa kasingkasing. Ug walay linalang ang dili dayag sa iyang panan-aw, apan ang tanang mga butang hubo ug dayag nga bukas sa mga mata niya kang kinsa kita magahatag ug husay.”

²⁵ Busa ang mga kamatuoran diha sa Pulong ni Jehova nagayagyag sa kalainan tali sa kon unsa daw napadayag ang usa ka tawo ug kon unsa gayod siya. Kon siya adunay dalisay nga pagtuo sa Diyos ug usa ka matuod nga tinguha sa pagpahimuot sa iyang Maglalalang, ang iyang panukbil o tinguha sa husto magsumbaliksilaw sa “himaya sa Diyos” bisan kon walay nagatan-aw nga mga ansiano sa kongregasyon. (Roma 3:23) Dili siya maghimog pipila di-kasulatanhong paggawi tungod lamang kay dili kana apil sa seryosong mga sala nga ang usa ka tawo mahimong palagpoton gikan sa kongregasyon. Busa, kon ang bisan kinsa may hilig sa dili tanto pagtagad sa bisan unsang tambag nga makaplagan sa Pulong sa Diyos, maayo nga susihon sa maampingon kon unsa ang iyang matuod nga pagpanglantaw sa Diyos. Nahimo ba siya nga sama nianang tawo kang kansa ang Salmo 14:1 nagaingon: “Ang usa nga walay buot nagaingon”​—dili, dili sa publiko​—apan “sa iyang kasingkasing: ‘Walay Jehova’”?

26, 27. (a) Nganong importante ang ugdang pagtagad sa “tagsa ka pulong” ni Jehova? (b) Sa unsang paagi ang atong mga kinabuhi apektado kon kita nagapakitag pagtahud sa awtoridad?

²⁶ Sa dihang gitintal sa Yawa, si Jesus nagpahayag: “Ang tawo mabuhi . . . sa tagsa ka pulong nga nagagula sa baba ni Jehova.” (Mateo 4:4) Nagatuo ka ba nga ang “tagsa ka pulong” ni Jehova importante, nga walay usa igasalikway? Ang pagsugot sa pipila sa mga kinahanglanon ni Jehova, samtang nagaisip sa uban nga dili importante, yanong dili pa igo. Mahimong magalaban kita sa pagkamatarung sa pagkasoberano ni Jehova o magadapig kita sa kiliran sa Yawa maylabot sa isyu pinaagi sa pagpahaluna sa atong kaugalingong sukdanan sa maayo ug sa dautan. Malipayon kadtong kinsa nagapakita nga sila sa matuod nahigugma sa balaod ni Jehova.​—Salmo 119:165.

²⁷ Ang maong mga tawo wala malit-agi sa nagabahing espiritu sa kalibutan. Ni sila nagabuhat sa makauulaw nga paggawi niadtong kinsa nagasalibay sa moral nga pagpugong. Ang lalum nga pagtahud kang Jehova ug sa iyang matarung mga paagi nagahatag ug kalig-on sa ilang mga kinabuhi. Ang maong pagtahud alang kang Jehova ug sa iyang mga paagi magpaarang kanila sa pagbaton sa hustong pagtahud sa yutan-ong mga awtoridad, nga hinungdanon sa malinawong pagkinabuhi.

[Hulagway sa panid 134]

Mga apostol ni Jesus misulti sa hataas hukmanan: “Kinahanglan kaming magasugot sa Diyos ingong magmamando kay sa mga tawo”