Ang Usa ka Kasaulogan

Kini nga pagsaulog gipailaila ni Jesus sa adlaw sa iyang kamatayon. Gihandom niya ang Hudiyonhong piyesta sa Paskuwa uban sa iyang mga apostol. Unya iyang gipasa ang pila ka walay lebadurang tinapay sa Paskuwa ngadto kanila, nga nag-ingon: “Kini nagakahulogan sa akong lawas nga igahatag alang kaninyo.” Sunod, gipasa ni Jesus ang kopa sa bino, nga nag-ingon: “Kini nga kopa nagakahulogan sa bag-ong kasabotan tungod sa akong dugo, nga igabubo alang kaninyo.” Siya usab nag-ingon: “Padayong buhata kini sa paghandom kanako.” (Lucas 22:19, 20; 1 Corinto 11:24-26) Kini nga pagsaulog gitawag nga Panihapon sa Ginoo, o ang Memoryal. Kini mao lamang ang selebrasyon nga gisugo ni Jesus nga saulogon sa iyang mga sumusunod.

Daghang iglesya nangangkon nga ilang gihimo kini nga pagsaulog duyog sa tanan nilang ubang mga piyesta, apan ang kadaghanan naghandom niini nga lahi sa paagi nga gisugo ni Jesus. Tingali ang labing hinungdanong kalainan mao ang ka subsob sa pagsaulog. Ang ubang mga iglesya nagsaulog niini matag bulan, matag semana, kada adlaw pa gani. Mao ba kini ang gipasabot ni Jesus sa dihang iyang giingnan ang iyang mga sumusunod: “Padayong buhata kini sa paghandom kanako”? Ang The New English Bible nag-ingon: “Buhata kini ingong paghandom kanako.” (1 Corinto 11:24, 25) Unsa ka subsob pagasaulogon ang usa ka memoryal o kasumaran? Kasagaran, makausa lamang sa usa ka tuig.

Hinumdomi, usab, nga gisugdan ni Jesus kini nga pagsaulog ug unya namatay sa petsang Nisan 14 sa Hudiyonhong kalendaryo.a Kadto mao ang adlaw sa Paskuwa, usa ka piyesta nga nagpahinumdom sa mga Hudiyo sa dakong kaluwasan nga ilang naagian sa Ehipto sa ika-16 nga siglo W.K.P. Nianang panahona, ang paghalad ug usa ka kordero misangpot ug kaluwasan sa Hudiyonhong panganay, samtang gipatay sa manulonda ni Jehova ang tanang panganay sa Ehipto.​—Exodo 12:21, 24-27.

Sa unsang paagi kini makatabang sa atong pagsabot? Aw, ang Kristohanong apostol Pablo nagsulat: “Si Kristo nga atong paskuwa gikahalad na.” (1 Corinto 5:7) Ang kamatayon ni Jesus mao ang mas labaw nga halad sa Paskuwa, nga naghatag sa katawhan ug kahigayonan alang sa mas bililhon nga kaluwasan. Busa, alang sa mga Kristohanon ang Memoryal sa kamatayon ni Kristo maoy mipuli sa Hudiyonhong Paskuwa.​—Juan 3:16.

Ang Paskuwa maoy tinuig nga selebrasyon. Nan, makataronganon nga ingon usab niini ang Memoryal. Ang Paskuwa​—ang adlaw nga si Jesus namatay​—kanunay nga mahulog sa ika-14ng adlaw sa Hudiyonhong bulan sa Nisan. Busa, ang kamatayon ni Kristo kinahanglang handomon makausa sa usa ka tuig sa adlaw sa kalendaryo nga katumbas sa Nisan 14. Sa 1994 kanang adlawa maoy Sabado, Marso 26, human sa pagsalop sa adlaw. Apan, ngano man nga ang mga iglesya sa Kakristiyanohan wala maghimo niining adlawa nga usa ka linaing pagsaulog? Ang lakbit nga pagtuki sa kasaysayan motubag nianang pangutanaha.