Nakahatag katin-awan sa paghandom sa kamatayon ni Kristo mao ang mga pulong ni apostol Pablo: “Nadawat ko gikan sa Ginoo ang gikahatag ko usab kaninyo, nga ang Ginoong Jesus sa gabii sa pagbudhi kaniya mikuhag tinapay ug, human nakapasalamat, iyang gipikaspikas kini ug miingon: ‘Kini nagkahulogan sa akong lawas nga igahatag alang kaninyo. Ipadayon ninyo pagbuhat kini sa paghandom kanako.’ Mao usab ang iyang gihimo labot sa kopa, tapos sa panihapon, nga nag-ingon: ‘Kini nga kopa nagkahulogan sa bag-ong pakigtugon tungod sa akong dugo. Ipadayon ninyo pagbuhat kini, nga sama ka subsob sa inyong pag-inom niini, sa paghandom kanako.’ Kay sama ka subsob sa inyong pagkaon niining tinapay ug pag-inom niining kopa, ginasangyaw ninyo ang kamatayon sa Ginoo, hangtod sa iyang pag-anhi.”​—1 Corinto 11:23-26.

Pila ka Higayon Kini Saulogon?

Unsay gipasabot ni Pablo sa mga pulong: “Kay sama ka subsob sa inyong pagkaon niining tinapay ug pag-inom niining kopa, ginasangyaw ninyo ang kamatayon sa Ginoo, hangtod sa iyang pag-anhi”? Ang matinumanon dinihogang mga Kristohanon makig-ambit sa mga simbolo sa Memoryal nga “subsob” hangtod nga sila mamatay, nga sa ulahi pagabanhawon ngadto sa langitnong kinabuhi. Sa atubangan sa Diyos ug sa kalibotan, sila sa ingon masubsob nga magawali sa ilang pagtuo sa tagana ni Jehova sa halad ni Jesus. Hangtod kanus-a? “Hangtod sa iyang pag-anhi,” miingon si Pablo, dayag nga nagkahulogan nga kini nga mga pagsaulog magpadayon hangtod sa pag-anhi ni Jesus sa pagdawat sa iyang dinihogang mga sumusunod ngadto sa langit pinaagi sa pagkabanhaw sa panahon sa iyang “presensiya.” (1 Tesalonica 4:14-17) Kini nahiuyon sa mga pulong ni Kristo ngadto sa 11 ka maunongong mga apostoles: “Sa mahiadto na ako ug makaandam na akog luna alang kaninyo, moanhi ako pag-usab ug pagadawaton ko kamo nganhi uban kanako, aron nga diin gani ako atua usab kamo.”​—Juan 14:3.

Angay bang saulogon ang kamatayon ni Kristo kada adlaw o kaha kada semana? Buweno, gisugdan ni Jesus ang Panihapon sa Ginoo ug gipatay sa Paskuwa, nga maoy paghandom sa Israel sa kaluwasan gikan sa pagkaulipon sa Ehipto. Gani, siya gitawag nga ang “Kristo nga atong paskuwa” tungod kay siya mao ang Kordero nga gihalad alang sa mga Kristohanon. (1 Corinto 5:7) Ang Paskuwa gisaulog kausa lamang sa usa ka tuig, sa Nisan 14. (Exodo 12:6, 14; Levitico 23:5) Kini nagsugyot nga ang kamatayon ni Jesus angay pagasaulogon lamang nga sama ka subsob sa pagsaulog sa Paskuwa​—nga tinuig, dili kada adlaw o kada semana.

Sa daghang kasiglohan gisaulog sa daghang nag-angkong mga Kristohanon ang kamatayon ni Jesus kas-a lamang sa usa ka tuig. Tungod kay gisaulog nila kini sa Nisan 14, sila gitawag nga mga Quartodeciman, nga nagkahulogan “mga tigsaulog sa katorse.” Mahitungod kanila, ang manalaysay nga si J. L. von Mosheim misulat: “Nabatasan sa mga Kristohanon sa Asia Minor ang pagsaulog niining balaang piyesta, agig paghandom sa dihang gisugdan ang panihapon sa Ginoo, ug ang kamatayon ni Jesu-Kristo, sa samang higayon sa dihang nangaon ang mga Hudiyo sa ilang kordero sa Paskuwa, nga gihimo sa gabii sa ika-katorseng adlaw sa unang bulan [Nisan]. . . . Ilang gilantaw nga usa ka sugo nga angay sundon ang panig-ingnan ni Kristo.”