Sa Pagkatakos Sauloga ang Memoryal

MAOY sa gabii sa Nisan 14, 33 K.P., nga gisugdan paghimo ni Jesus ang Memoryal.a Bag-o pa lang niya natapos ang pagsaulog sa Paskuwa nga selebrasyon uban sa iyang 12 ka apostol, mao nga kita makatino sa petsa. Human papahawaa ang mabudhion, si Judas, si Jesus “mikuha ug tinapay, nagpasalamat, gipikaspikas kini ug gihatag kini kanila, ug miingon: ‘Kuhaa kini, kini nagkahulogan sa akong lawas.’ Ug nga mikuha ug kopa, siya mitanyag ug mga pasalamat ug gihatag kini kanila, ug miinom silang tanan gikan niini. Ug miingon siya kanila: ‘Kini nagkahulogan sa akong “dugo sa kasabotan,” nga igabubo alang sa daghan.’”​—Marcos 14:22-24.

Si Jesus nagsugo sa iyang mga tinun-an sa paghandom sa iyang kamatayon tungod sa pagkamahinungdanon niini. (Lucas 22:19; 1 Corinto 11:23-26) Ang iyang halad mao ang bugtong halad nga makatubos sa katawhan gikan sa tunglo sa napanunod nga sala ug kamatayon. (Roma 5:12; 6:23) Ang tinapay ug ang bino nga iyang gigamit maoy mga simbolo sa iyang hingpit nga lawas ug sa iyang dugo. Kay nasayod sa orihinal nga petsa, kita makasaulog sa okasyon sa katumbas nga adlaw kada tuig, sama sa gihimo sa Hudiyonhong Paskuwa. Apan kinahanglang saulogon nato kana sa takos nga paagi. Ngano?

Si apostol Pablo miingon nga kadtong makig-ambit sa mga emblema sa tinapay ug bino “magpadayon sa pagmantala sa kamatayon sa Ginoo, hangtod sa iyang pag-abot.” (1 Corinto 11:26) Sa ingon ang sentro sa selebrasyon mao ang kamatayon ni Jesus ug ang kahulogan niana alang sa katawhan. Ang okasyon maoy ugdang, nga maoy panahon nga pamalandongon ang pagkamaayo sa Diyos ug ang apresasyon nga angay natong huptan alang kang Jehova ug sa iyang Anak. (Roma 5:8; Tito 2:14; 1 Juan 4:9, 10) Busa, si Pablo nagpasidaan: “Busa si bisan kinsa nga sa pagkadili-takos mokaon sa tinapay o moinom sa kopa sa Ginoo mahisad-an maylabot sa lawas ug sa dugo sa Ginoo.”​—1 Corinto 11:27.

Sa Pagkatakos​—Sa Unsang Paagi?

Dayag, ang Diyos dili mahimuot kon atong pasipalahan ang okasyon pinaagi sa pagtuman sa kuwestiyonableng mga tulomanon o pagsagop sa paganong mga kustombre. (Santiago 1:27; 4:3, 4) Kini magsalindot sa popular nga mga okasyon panahon sa Easter. Aron masunod ang sugo ni Jesus nga “padayong buhata kini sa paghandom [kaniya],” buot natong saulogon ang Memoryal sumala sa pagsugod niya paghimo niini. (Lucas 22:19; 1 Corinto 11:24, 25) Kini magsalikway sa mga adorno nga gidugang sa pagsaulog sa mga simbahan sa Kakristiyanohan. Ang New Catholic Encyclopedia miangkon nga “ang Misa karong adlawa dakog kalainan gikan sa yano kaayong seremonyas nga gisunod ni Kristo ug sa Iyang mga Apostol.” Ug pinaagi sa kanunay nga pagsaulog sa Misa, nga adlaw-adlaw pa, ang Kakristiyanohan mibulag gikan sa katuyoan ni Jesus ug naghimo niana nga ordinaryong okasyon.

Si Pablo misulat sa mga Kristohanon sa Corinto bahin sa dili-takos nga pagpakig-ambit tungod kay mitungha ang usa ka suliran sa kongregasyon may kalabotan sa Panihapon sa Ginoo. Ang pipila wala magtahod sa pagkasagrado niana. Gidala nila ang ilang panihapon ug gikaon kana sa wala pa o sa panahon sa tigom. Kasagarang sila nangaon ug nanag-inom nga hinobra. Nakapaduka kadto kanila ug nakapahabol sa ilang mga sentido. Tungod kay dili igmat sa kaisipan ug sa espirituwal, sila “wala makaila sa lawas” ug sa ingon ‘nahisad-an maylabot sa lawas ug sa dugo sa Ginoo.’ Kasamtangan, kadtong walay panihapon gigutom ug nabalda usab. Halos walay usa kanila ang diha sa kondisyon nga makaambit sa mga emblema uban ang apresasyon ug bug-os nga kaamgohan sa kaugdang sa okasyon​—nga ang selebrasyon maoy paghandom sa kamatayon sa Ginoo. Kini misangpot sa paghukom batok kanila, kay sila nagpakita sa kawalay-tahod, pagtamay pa, alang niana.​—1 Corinto 11:27-34.

Pagkamailahon Gikinahanglan

Ang pipila miambit sa mga emblema sa Memoryal bisan tuod, sa ulahi, ilang naamgohan nga dili sila angayng moambit. Kadtong si kinsa angay nga moambit sa mga emblema sa Memoryal napili sa Diyos ug adunay pamatuod sa espiritu sa Diyos bahin niana. (Roma 8:15-17; 2 Corinto 1:21, 22) Dili ang ilang personal nga desisyon o determinasyon ang maghimo nilang takos. Ang Diyos naglimite sa gidaghanon niadtong si kinsa magmando uban ni Kristo sa mga langit sa 144,000, nga diyutay ra kon itandi sa tanan nga makapahimulos sa lukat ni Kristo. (Pinadayag 14:1, 3) Ang pagpili nagsugod sa adlaw ni Jesus, busa karong adlawa adunay pipila ra ka tig-ambit. Ug samtang ang pipila kanila hiapsan sa kamatayon, ang maong gidaghanon angay nga mous-os.

Nganong ang pipila sayop nga moambit sa mga emblema? Mahimong tungod sa nangaging relihiyosong mga pagtuo​—nga ang tanang matinumanon moadto sa langit. O mahimong tungod sa ambisyon o kahakog​—usa ka pagbati nga ang usa labawng takos kay sa uban​—ug sa tinguha nga mainila. Tingali kini resulta sa kusganong mga pagbati gumikan sa bug-at nga mga suliran o trahedya nga ang usa mawad-ag interes sa kinabuhi sa yuta. Mahimong tungod usab sa suod nga panaghigala sa usang adunay langitnong pagkatinawag. Kitang tanan kinahanglang mahinumdom nga ang desisyon iyaha lamang sa Diyos, dili atoa. (Roma 9:16) Busa kon ang usa ka tawo, “human sa pagsusi,” makadiskobre nga siya dili gayod takos nga makaambit sa mga emblema, angay nga siya molikay na karon.​—1 Corinto 11:28.

Ang paglaom nga gibutang sa Diyos sa atubangan sa kadaghanang tawo mao ang kinabuhing dayon sa usa ka paraisong yuta. Kana maoy usa ka dakong panalangin nga paaboton, ug usa nga dali kitang madani. (Genesis 1:28; Salmo 37:9, 11) Maoy sa yuta nga ang mga matinumanon mahiusa sa binanhaw nilang mga minahal ug motagbo sa mga matarong sa kakaraanan, sama ni Abraham, Sara, Moises, Rahab, David, ug Juan Bautista​—tanan sila nga namatay sa wala pa buksi ni Jesus ang dalan paingon sa langitnong kinabuhi.​—Mateo 11:11; itandi ang 1 Corinto 15:20-23.

Kadtong may yutan-ong mga paglaom sa pagkatakos nagsaulog sa Panihapon sa Ginoo pinaagi sa ilang pagtambong ug matinahorong pagpamati, bisan pag dili sila moambit sa tinapay ug sa bino. Sila makapahimulos usab sa halad ni Kristo, nga makapaarang nila nga makabatog maayong kahimtang atubangan sa Diyos. (Pinadayag 7:14, 15) Samtang mamati sila sa diskurso nga ipakigpulong, mapalig-on ang ilang apresasyon sa sagradong mga butang, ug modako ang ilang tinguha sa pagpabilin nga nahiusa sa katawhan sa Diyos sa bisan diin.

Karong tuiga, sa pagsalop sa adlaw sa Martes, Abril 2, ang Memoryal pagasaulogon diha sa kapig 78,000 ka kongregasyon sa mga Saksi ni Jehova sa tibuok yuta. Motambong ka ba?

[Footnote]

[Hulagway sa panid 8]

Ang mga Saksi ni Jehova nagsaulog sa Memoryal kausa matag tuig