Magmalipayon—Kaloy-i ang mga Sinakit

“Kadtong nagatamay sa iyang isigkatawo nagapakasala, apan malipayon kadtong may kaluoy sa mga sinakit.”—PROVERBIO 14:21.

SAMTANG nanambong sa Kristohanong miting ang tulo ka pamilya sa Pilipinas sa Lalawigan sa Pangasinan, naugdaw ang ilang balay tungod sa aksidenteng sunog. Dihang miabot sa balay, wala silay pagkaon o dapit nga katulogan. Ang kaubang mga Kristohanon, dihang nahibalo sa katalagman, miadto dayon nga may dalang pagkaon ug mihikay ug ilang kapuy-an sa uban diha sa kongregasyon. Sa pagkasunod buntag, miabot ang mga Kristohanon nga nagdalag mga kawayan ug ubang mga gamit para itukod. Nakadayeg ang mga silingan niining inigsoong gugma. Maayo ang epekto niini sa tulo ka pamilya. Naugdaw ang ilang balay, apan ang ilang pagtuo ug ubang Kristohanong mga hiyas nagpabilin ug mitubo tungod sa mahigugmaong pagtabang.​—Mateo 6:33; itandi sa 1 Corinto 3:12-14.

1, 2. Unsay nahitabo sa tulo ka pamilya sa Pilipinas, nga miagak kanato sa pagbangon sa unsang mga pangutana?

² Dili ba makapalipay ang mga eksperyensiya nga sama niini? Sila makalig-on sa atong pagtuo sa tawhanong kalulot ug ilabina sa gahom sa tinuod nga Kristiyanidad. (Buhat 28:2) Apan, ato bang gipabilhan, ang Kasulatanhong sukaranan sa ‘pagbuhat ug maayo ngadto sa tanan, ug ilabina kanila nga mga sakop sa panimalay sa pagtuo’? (Galacia 6:10) Ug sa unsang paagi makahimo kitag labaw pa niining bahina?

Usa ka Tagsaong Sumbanan Kanato

³ Gisultihan kita ni disipulong Santiago: “Ang tanang maayong gasa ug tanang hingpit nga regalo nagagikan sa kahitas-an.” (Santiago 1:17) Pagkatinuod niini, kay dagayang nagatagana si Jehova sa atong espirituwal ug materyal nga kaayohan! Apan, unsa ang iyang hatagag pangunang pagtagad? Ang espirituwal nga mga butang. Siya, pananglit, naghatag kanato sa Bibliya aron kita adunay espirituwal nga giya ug paglaom. Kana nga paglaom nasentro diha sa gasa sa iyang Anak, kansang halad maoy sukaranan sa pagpasaylo kanato ug sa pagbaton ug palaabutong kinabuhing dayon.​—Juan 3:16; Mateo 20:28.

4. Sa unsang paagi makita nga maikagon usab ang Diyos sa atong materyal nga mga panginahanglan?

⁴ Interesado si Jehova sa atong materyal nga kaayohan usab. Nangatarongan si apostol Pablo mahitungod niini sa mga tawo sa karaang Listra. Bisan pag dili sila tinuod nga mga magsisimba, dili sila makalimod nga ang Maglalalang, ‘nagbuhat ug maayo, nga naghatag kanato ug ulan gikan sa langit ug sa mabungahong mga panahon, nga nagabuhong sa atong mga kasingkasing sa pagkaon ug sa kalipay.’ (Buhat 14:15-17) Tungod sa gugma, gihatagan kita ni Jehova sa atong espirituwal nga mga panginahanglan ug nagatagana kanato sa atong pisikal nga kinabuhi. Dili ba makahunahuna ka nga may bahin kini sa iyang pagkahimong “malipayong Diyos”?​—1 Timoteo 1:11.

5. Unsay atong nakat-onan gikan sa mga pakig-atubang sa Diyos sa karaang Israel?

⁵ Ang pakig-atubang sa Diyos sa karaang Israel nagpakita sa iyang timbang nga pagtagad sa espirituwal nga panginahanglan sa iyang mga magsisimba ug sa ilang materyal nga kahimtang. Una, iyang gihimo ang Kasugoan nga mabatonan sa iyang katawhan. Gisugo ang iyang mga hari sa paghikay ug kaugalingong kopya sa Kasugoan, ug matag karon ug unya nagtigom ang iyang katawhan sa pagpamati sa Iyang Kasugoan nga basahon. (Deuteronomio 17:18; 31:9-13) Ang Kasugoan nagtagana alang sa tabernakulo kun templo ug alang sa mga pari sa pag-atiman sa mga halad aron ang mga tawo makabaton sa pag-uyon sa Diyos. Ang mga Israelitas regular nga nagtigom alang sa espirituwal nga mga piyesta, nga nagpasiugda sa ilang tuigtuig nga pagsimba. (Deuteronomio 16:1-17) Ingong resulta niining tanan, ang indibiduwal nga mga Israelitas nahimong adunahan sa espirituwal atubangan sa Diyos.

6, 7. Sa unsang paagi si Jehova nagpakita diha sa iyang Kasugoan sa iyang pagtagad sa pisikal nga panginahanglan sa mga Israelitas?

⁶ Apan, ang Kasugoan, nagpakita usab sa pagkamatinagdanon sa Diyos sa pisikal nga mga kahimtang sa iyang mga alagad. Tingali ang motungha sa imong hunahuna mao ang mga kasugoan nga gihatag sa Israel mahitungod sa kahindikan ug sa mga paagi aron masumpo ang pagkaylap sa impeksiyon. (Deuteronomio 14:11-21; 23:10-14) Apan dili usab nato kalimtan ang linaing mga tagana sa Diyos nga gihimo aron makatabang sa mga kabus ug sa mga sinakit. Ang dili maayong panglawas o katalagman sama sa sunog o baha mahimong mohatag kalisod sa usa ka Israelitas. Diha sa iya mismong Kasugoan gidawat ni Jehova nga dili tanan managsamag pagkabutang sa pinansiyal nga paagi. (Deuteronomio 15:11) Apan labaw pa ang iyang gihimo kay sa pagkaluoy lang sa kabus ug sa sinakit. Siya mihikay ug tabang.

⁷ Ang pagkaon mao ang ilang labing gikinahanglan. Busa misugo ang Diyos nga ang kabus sa Israel libre sa paghagdaw sa mga uma o sa kahoyng mga olibo ug sa mga parasan. (Deuteronomio 24:19-22; Levitico 19:9, 10; 23:22) Ang paagi sa Diyos wala magdasig sa mga tawo nga magtinapolan o magsalig sa ihatag sa katilingban dihang makahimo pa man sila sa pagtrabaho. Kinahanglang magkugi ang Israelinhong manghahagdaw, tingali mitrabaho ug taas nga oras ilalom sa mainit nga adlaw sa pagtigom ug pagkaon alang sa maong adlaw. Apan, dili nato kalimtan, nga niining paagiha ang Diyos sa mahunahunaon mitagana alang sa mga kabus.​—Itandi sa Ruth 2:2-7; Salmo 69:33; 102:17.

8. (a) Giawhag ang tagsa-tagsa ka Hudiyo sa pagbuhat ug unsa alang sa ilang mga igsoon? (Itandi sa Jeremias 5:26, 28.) (b) Sa unsang paagi imong ikatandi ang paglantaw nga gisugo sa Diyos nga huptan sa mga Hudiyo nga komun karon?

⁸ Dugang gipasiugda ni Jehova ang iyang kaikag sa mga sinakit pinaagi sa mga pahayag sama diha sa Isaias 58:6, 7. Sa usa ka panahon dihang ang pipila ka natagbaw sa kaugalingong mga Israelitas nagpakaaron-ingnong nagpuasa, ang propeta sa Diyos miingon: “Dili ba mao kini ang pagpuasa nga akong napili? . . . Sa pagpagawas sa mga dinaogdaog, ug nga inyong balion ang yugo? Dili ba mao ang pakigbahin sa imong tinapay uban sa gigutom, ug imo nga dad-on ang sinakit, ang walay puy-anan ngadto sa imong balay? Kon ikaw makakitag usa nga hubo, imo siya nga tampian, ug nga ikaw dili motago gikan sa imong kaugalingong unod?” Ampingan sa ubang mga indibiduwal karon kanang ilang gitawag nga ‘haruhay nga dapit.’ Andam sila sa pagtabang sa tawong nagkinahanglan kon dili kini makahatag ug personal nga pagsakripisyo o kahasol kanila. Pagkalahi nga espiritu ang gipasiugda sa pulong sa Diyos pinaagi kang Isaias!​—Tan-awa usab ang Ezekiel 18:5-9.

9. Unsay gitambag sa Kasugoan mahitungod sa paghulam, ug unsang kaisipan ang gidasig sa Diyos?

⁹ Ang kabalaka sa kabus nga mga igsoong Israelitas mahimong ikailustrar bahin sa paghulam ug kuwarta. Magpaabot ug tubo ang usa ka Israelitas kon magpahulam ug kuwarta sa tawong gustong mogamit niini aron sa pagpadako sa iyang negosyo. Apan, si Jehova miingon sa dili pagpangayog tubo, sa kuwartang gipahulam sa usa ka igsoong kabus, nga tungod sa kawalad-on basin matukmod hinoon siya sa pagbuhat ug daotan. (Exodo 22:25; Deuteronomio 15:7, 8, 11; 23:19, 20; Proverbio 6:30, 31) Ang kaisipan sa Diyos sa mga makaluluoy maoy sumbanan alang sa iyang katawhan. Gani kita gisaaran: “Kadtong may kaluoy sa kabus magapahulam kang Jehova, ug Iyang balosan siya sa iyang maayong buhat.” (Proverbio 19:17) Hunahunaa lang kana​—magapahulam kang Jehova, uban sa pasalig nga iya kang balosan sa igo!

10. Tapos nahatagag pagtagad ang panig-ingnan sa Diyos, unsay imong ipangutana sa imong kaugalingon?

¹⁰ Busa makapangutana kitang tanan: Unsay kahulogan alang kanako ang paglantaw ug pagtagad sa Diyos sa mga sinakit? Nagpakakat-on ba ako gikan sa iyang hingpit nga sumbanan ug nagsulay sa pagsundog niini? Makapauswag ba ako sa pagkahimong anaa sa dagway sa Diyos niining bahina?​—Genesis 1:26.

Kon Unsa ang Amahan, Mao Usab ang Anak

11. Sa unsang paagi managsama ang kabalaka ni Jesus sa iyang Amahan? (2 Corinto 8:9)

¹¹ Si Jesu-Kristo “mao ang larawan sa himaya [ni Jehova] ug ang dagway sa iyang pagkamao.” (Hebreohanon 1:3) Busa, kita makalaom nga iyang ipabanaag ang kabalaka sa iyang Amahan diha sa mga maikagon sa tinuod nga pagsimba. Iyang gihimo kini. Gipakita ni Jesus nga ang kakabus nga kinahanglang sulbaron ug una mao ang espirituwal nga kakabus: “Malipayon kadtong mahunahunaon sa ilang espirituwal nga panginahanglan, kay ila ang gingharian sa langit.” (Mateo 5:3; itandi sa Lucas 6:20.) Si Kristo miingon usab: “Kay alang niini ako nagpakatawo, ug alang niini ako mianhi sa kalibotan, aron magapanghimatuod ako sa kamatuoran.” (Juan 18:37) Busa, siya nailhan dili lamang usa ka tighimog milagro kun tig-ayo sa balatian kondili ingong Magtutudlo. (Marcos 10:17-21; 12:28-33) Mahitungod niini, tan-awa ang Marcos 6:30-34. Atong mabasa ang bahin sa panahon dihang nangitag pribadong oras si Jesus sa pagpahulay. Dayon “iyang nakita ang dakong panon . . . [kinsa] sama sa mga karnero nga walay magbalantay.” Unsay iyang reaksion? “Siya misugod sa pagtudlo kanila ug daghang mga butang.” Oo, gihatag ni Jesus ang iyang kaugalingon mismo sa pagtubag sa ilang dakong panginahanglan: kamatuoran nga sila mahimong mabuhi sa walay kataposan.​—Juan 4:14; 6:51.

12. Unsay atong makat-onan mahitungod sa hunahuna ni Jesus sumala sa Marcos 6:30-34 ug Marcos 6:35-44?

¹² Samtang gipunting ni Jesus ang espirituwal nga mga panginahanglan sa mapaubsanong mga Hudiyo, wala niya pasagdi ang ilang materyal nga mga panginahanglan. Ang asoy ni Marcos nagpakita nga alisto si Jesus sa mga panginahanglan sa literal nga pagkaon. Misugyot ang mga disipulo sa pagpalakaw una sa mga tawo sa “pagpalit sa ilang kaugalingong pagkaon.” Wala mosugot si Jesus. Dayon misugyot ang apostol sa posibilidad sa pagkuha sa pundong kuwarta nga ilang gidaladala ug sa paggamit niini sa pagpalit ug makaon. Apan, mipili si Jesus sa paghimo sa labing iladong milagro nga niini iyang gipakaon ang 5,000 ka lalaki, gawas pa sa mga babaye ug mga bata, sa pangunang pagkaon nga tinapay ug isda. Tingali hunahunaon sa uban karon nga masayon alang kang Jesus ang pagtagana sa panginahanglan sa panon sa katawhan sa milagrosong paagi. Apan, dili nato angay kalimtan ang kamatuoran nga siya may tinuod nga pagtagad, ug siya milihok alang niana.​—Marcos 6:35-44; Mateo 14:21.a

¹³ Tingali nakabasa ka na sa mga asoy sa Ebanghelyo nga nagpamatuod nga ang mga pagbati ni Jesus alang sa mga makaluluoy gipakita saylo pa sa mga kabus. Iyang giayo ang masakiton ug ang mga sinakit usab. (Lucas 6:17-19; 17:12-19; Juan 5:2-9; 9:1-7) Ni sa katuyoan lamang kadto sa pag-ayo niadtong anaa sa iyang duol. Usahay adtoon pa niya ang masakiton aron makatabang.​—Lucas 8:41-55.

14, 15. (a) Nganong makatino kita nga nagpaabot si Jesus nga ang iyang mga sumusunod mopakita usab ug kabalaka sama kaniya? (b) Unsay maayo natong ipangutana sa atong kaugalingon?

¹⁴ Apan, ang mga panginahanglan ba lamang sa kabus ug sa sinakit nga mga disipulo (o tigpangitag-kamatuoran) ang gitagad niadtong makataganag kahupayan pinaagi sa paghimog mga milagro? Dili. Ang tanang mga disipulo ni Jesus mabalak-on ug milihok sa hustong paagi. Pananglitan, iyang giawhag ang tawong dato nga gusto ug kinabuhing dayon: “Ibaligya ang tanan mong kabtangan ug ang halin ipanghatag sa mga kabus, ug makabaton kag bahandi didto sa langit.” (Lucas 18:18-22) Si Jesus mitambag usab: “Dihang magkombira ikaw, maoy dapita ang mga kabus, ang mga bakol, ang mga piang, ang mga buta; ug malipayon ka, tungod kay sila dili man makabalos kanimo. Ikaw pagabalosan ra unya sa pagpamanhaw sa mga matarong.”​—Lucas 14:13, 14.

¹⁵ Ang mga Kristohanon maoy mga sumusunod ni Kristo, busa makapangutana ang matag usa kanato: Sa unsang sukod nga gisunod nako ang kaisipan ug mga binuhatan ni Jesus ngadto sa mga kabus, sa mga sinakit, sa mga makaluluoy? Makapahayag ba ako, sama sa gipahayag ni apostol Pablo: “Panig-ingon kamo kanako, maingon nga ako nanig-ingon kang Kristo”?​—1 Corinto 11:1.

Pablo—Usa ka Malipayong Sulondan

16. Unsa ang dakong gikaigan ni apostol Pablo?

¹⁶ Tukma ang paghisgot kang Pablo ning bahina, kay siya maoy usa usab ka maayong sulondan nga sundogon. Sama sa atong malaoman, ang iyang gihatagag dakong pagtagad mao ang espirituwal nga mga panginahanglan sa uban. Siya maoy usa ka ‘tinugyanan nga pinadala ni Kristo, nga mihangyo sa uban, nga “Magpasig-uli ngadto sa Diyos.”’ (2 Corinto 5:20) Ang linain nga asaynment ni Pablo mao ang pagwali ug pagpalig-on sa mga kongregasyon sa taliwala sa mga dili Hudiyo. Siya misulat: “Ako gikapiyalan sa maayong balita ngadto sa mga walay sirkunsisyon.”​—Galacia 2:7.

17. Sa unsang paagi nasayod kita nga gihatagag pagtagad usab ni Pablo ang pisikal nga mga butang?

¹⁷ Sanglit miingon man si Pablo nga siya nanig-ingon kang Kristo, iya bang (sama kang Jehova ug Jesus) gitagad ang pisikal nga mga sakit o kalisod sa kaubang mga magsisimba? Pasagdi nga si Pablo ang motubag. Diha sa Galacia 2:9, siya mipadayon: ‘Si Santiago ug si Cepas [Pedro] ug si Juan nga mga gipanag-ila ingon nga mga haligi, mitunol kanato ug kang Bernabe sa tuong kamot sa pakig-ambitay, aron kami managpangadto sa mga kanasoran.’ Dayon sa sunod nga bersikulo si Pablo midugang: “Mao lamang nga buot nila nga among pagahinumdoman ang mga kabus. Kining butanga ako maikagon man gayod usab sa pagbuhat.” (Galacia 2:10) Busa nasabtan ni Pablo nga, bisan tuod usa siya ka misyonaryo ug apostol nga may mga responsabilidad sa daghang mga kongregasyon, dili mahimong sobra siya ka okupado nga dili na mopakitag kaikag sa pisikal nga kaayohan sa iyang mga igsoong lalaki ug babaye.

18. Kinsa ang “kabus” nga gipunting ni Pablo diha sa Galacia 2:10, ug nganong angay nilang madawat ang pagtagad?

¹⁸ Tingali, “ang mga kabus” nga iyang gihisgotan diha sa Galacia 2:10 maoy mga Hudiyohanong mga Kristohanon sa Jerusalem ug sa Judea. Sa sayo pa niini dihay “pagbagolbol . . . sa mga Gregog pinulongang mga Hudiyo batok sa Hebreohanog pinulongang mga Hudiyo, tungod kay ang ilang mga babayeng balo hisayloan sa adlaw-adlawng pag-apod-apod” sa pagkaon. (Buhat 6:1) Busa, dihang gihisgotan ang iyang pagkahimong apostol sa mga nasod, gipatin-aw ni Pablo nga wala siyay gisipyatan diha sa Kristohanong panag-igsoonay. (Roma 11:13) Siya nahibalo nga ang pisikal nga pag-atiman sa mga igsoon nalakip diha sa mga pulong: “Kinahanglang walay . . . pagkabahinbahin sa lawas, kondili ang tanang bahin niini may samang pagtagad sa usag usa. Ug kon ang usa ka bahin mag-antos ang ubang bahin niini magaantos usab.”​—1 Corinto 12:25, 26.

19. Unsay atong pamatuod nga milihok si Pablo ug ang uban tungod sa ilang kabalaka sa mga kabus?

¹⁹ Dihang ang mga Kristohanon sa Jerusalem ug sa Judea nag-antos tungod sa kakabus, lokal nga kagutmanan, o paglutos, ang ubang lagyong mga kongregasyon mitabang. Sila, sa pagkatinuod, nakahinumdom sa ilang nagkinahanglang mga igsoon diha sa mga pag-ampo sa tabang sa Diyos ug paglipay. Apan dili lang kana ang ilang gihimo. Si Pablo misulat nga “sila sa Macedonia ug Acaya nalipay sa pagpakig-ambit sa ilang mga butang pinaagi sa pagpadalag amot ngadto sa kabus sa mga balaan didto sa Jerusalem.” (Roma 15:26, 27) Kadtong mihatag ug pinansiyal nga mga amot sa ilang sinakit nga mga igsoon “gipadato sa tanang matang sa pagkamahinatagon, nga nagapabaha ug daghang mga pagpasalamat ngadto sa Diyos.” (2 Corinto 9:1-13) Dili ba makahatag kana kanila ug kalipay?

20. Nganong ang mga igsoong mihatag aron makatabang “sa mga kabus” malipayon?

²⁰ Ang mga igsoon nga nakigbahin sa ilang salapi diha sa “mga kabus sa mga balaan sa Jerusalem” may dugang sukaranan sa pagkalipay. Ang ilang pagtagad sa sinakit nakatabang sa mga tighatag nga makabaton sa pag-uyon sa Diyos. Atong nasabtan kon ngano nga sa paggamit sa Gregong pulong nga gihubad “amot” diha sa Roma 15:26 ug 2 Corinto 9:13 kini adunay ideya nga “timaan sa pag-ubanay, pamatuod sa inigsoong panaghiusa, gasa pa gani.” Kini gigamit diha sa Hebreohanon 13:16, nga nag-ingon: “Ayaw paghikalimti ang pagbuhat ug maayo ug ang pag-ambitay sa mga butang sa uban, kay ang maong mga halad makapahimuot sa Diyos.”

Magmalipayon ba Kita?

21. Unsa sa imong hunahuna ang makahatag sukaranan sa atong pagbaton ug kalipay?

²¹ Niining diskusyona, atong nasusi ang Kasulatanhong pamatuod nga si Jehova nga Diyos, si Jesu-Kristo, ug si apostol Pablo nag-atiman sa mga sinakit. Atong nakita nga silang tanan miila nga ang espirituwal nga mga panginahanglan mao ang unang hatagag pagtagad. Apan tinuod usab nga silang tanan nagpakita sa labing praktikal nga mga paagi sa ilang kaikag sa mga kabus, sa mga masakiton, ug sa nag-antos sa mga katalagman. Nakahatag kanilag kalipay ang paghatag ug praktikal nga tabang. Tinuod ba usab kini kanato? Si apostol Pablo nag-awhag kanato sa “paghinumdom sa mga pulong ni Ginoong Jesus, dihang siya miingon, ‘Labi pang bulahan ang paghatag kay sa pagdawat.’”​—Buhat 20:35.

22. Unsa pang mga butanga mahitungod niini ang angay nimong tagdon?

²² Apan, tingali mangutana ka: Unsay akong mahimo mismo? Unsaon ko sa pagkasayod kon kinsa gayod ang tinuod nga nagkinahanglan? Sa unsang paagi makahatag akog tabang sa paagi nga dili makadasig ug pagkatapolan, nga maluluton ug realistikanhon, nga nagatagad sa mga pagbati sa uban, ug nga timbang uban sa akong Kristohanong katungdanan sa pagpakaylap sa maayong balita? Ang sunod nga artikulo mopatin-aw sa mga bahin niining ulohana, nga nagahatag ug basehanan kanimo sa pagkaplag ug dugang kalipay.

[Mga footnote]

Imo Bang Natiman-an?

◻ Sa unsang paagi gipakita sa Diyos ang iyang kaikag sa atong espirituwal ug maingon man sa atong pisikal nga mga panginahanglan?

◻ Unsay nagpakita nga nabalaka si Jesus kay sa pagtabang lamang sa mga tawo pinaagi sa pagtudlo kanila sa kamatuoran?

◻ Unsang matanga sa sulondan ang gipakita ni Pablo diha sa mga kabus?

◻ Human nga nakatagad sa mga sulondan ni Jehova, Jesus ug ni apostol Pablo, unsay imong nakita nga kinahanglang buhaton?

3. Unsay atong mapaneguro mahitungod sa pagtagad ni Jehova kanato?

13. Unsay ubang ebidensiya ang gihatag ni Jesus bahin sa iyang kaikag sa kaayohan sa katawhan?

[Hulagway sa panid 13]

Kinahanglang ipadapat sa Kristohanong mga ansiano ug sa uban ang tambag ni Jesus diha sa Lucas 14:13, 14