GARBO

Hingapin nga pagtamod-sa-kaugalingon; dili makataronganong pagbati sa pagkalabaw tungod sa talento, katahom, bahandi, ranggo, ug uban pa; matamayon nga panggawi o pagtratar; pagkamapalabilabihon o pagkagarboso sa pamatasan; pagkamapahitas-on. Sa pipila ka kahimtang, ang garbo adunay maayong kahulogan, diin kini nagtumong sa usa ka pagbati sa kangaya o kalipay tungod sa usa ka buhat o butang nga napanag-iya. Ang pipila ka pulong nga parehog kahulogan sa garbo mao ang egotismo, pagkagarboso, pagkamapahitas-on.

Ang Hebreohanong berbo nga ga·ʼahʹ sa literal nagkahulogang “motubo; motaas” ug mao ang lintunganayng pulong sa daghang Hebreohanong mga pulong nga may ideya nga garbo. Kining susama nga mga pulong gihubad nga “pagkamapahitas-on,” “pagbayaw-sa-kaugalingon,” ug, diha sa maayo ug sa dili-maayong mga diwa, “pagkahalangdon,” ug “pagkalabaw.”​—Job 8:11; Isa 9:9; Pr 8:13; Sal 68:34; Am 8:7.

Ang Gregong pulong nga kau·khaʹo·mai, nga nagkahulogang “pagpanghambog, pagpasigarbo, pagsadya,” gigamit usab sa maayo ug sa dili-maayong diwa, ug ang paggamit niini matino pinaagi sa konteksto.​—1Co 1:29; Rom 2:17; 5:2.

Ang Garbo Malimbongon ug Malaglagon. Ang tawong garboso lagmit wala mahibalo nga siya garboso ug mahimong ipasangil ang iyang mga lihok ngadto sa ubang mga hinungdan aron dili niya maatubang ang kamatuoran bahin sa iyang garbo. Ang matag tawo angayng bug-os nga magsusi sa iyang kaugalingon ug sa iyang mga motibo aron matino kon anaa ba kaniya kining dili-maayong kinaiya. Gipakita ni apostol Pablo ang panginahanglan sa pagbatog hustong motibo, ug ang kahibalo nga angayng batonan sa usa ka tawo bahin sa iyang kaugalingon labot niini, sa dihang siya miingon: “Kon ihatag ko ang tanan kong mga gipanag-iya aron pakaonon ang uban, ug kon itugyan ko ang akong lawas, aron ako makapanghambog [kau·kheʹso·mai], apan walay gugma, kini dili magapulos kanako.”​—1Co 13:3.

Busa, ang garbo angayng lukahon gikan sa pagkatawo sa usa alang sa iyang kaugalingong kaayohan. Labawng hinungdanon, kini kinahanglan niyang himoon kon buot niyang pahimut-an ang Diyos. Kinahanglang dumtan gani niya kini, kay ang Pulong sa Diyos nag-ingon: “Ang pagkahadlok kang Jehova mao ang pagdumot sa daotan. Ang pagbayaw-sa-kaugalingon ug ang pagkagarboso ug ang daotang dalan ug ang baba nga matuison akong gidumtan.”​—Pr 8:13.

Ang tawong dili maghanaw sa iyang garbo mag-antos. “Ang garbo nagauna sa pagkahagsa, ug ang mapahitas-ong espiritu nagauna sa pagkapukan” (Pr 16:18), ug “ang balay sa mga nagabayaw sa ilang kaugalingon pagalumpagon ni Jehova.” (Pr 15:25) Ubay-ubayng mga pananglitan sa pagkahagsa ang naagoman sa garbosong mga indibiduwal, mga dinastiya, ug mga nasod.​—Lev 26:​18, 19; 2Cr 26:16; Isa 13:19; Jer 13:9; Eze 30:​6, 18; 32:12; Dan 5:​22, 23, 30.

Ang garbo malimbongon. Si apostol Pablo nagtambag: “Kon ang usa naghunahuna nga siya mahinungdanon samtang siya walay pulos, siya naglimbong sa iyang kaugalingong hunahuna.” (Gal 6:3) Ang tawong garboso daw nagsubay sa dalan nga labing makaayo o mapuslanon alang kaniya, apan siya wala magtagad sa Diyos. (Itandi ang Jer 49:16; Pin 3:17.) Ang Bibliya nag-ingon: “Mas maayo pa nga magmapainubsanon sa espiritu uban sa mga maaghop kay sa makigbahin sa inagaw uban sa mga nagabayaw sa ilang kaugalingon.”​—Pr 16:19.

Pagpanghambog. Ang Gregong berbo nga kau·khaʹo·mai (panghambog) kanunayng gigamit sa pagtumong sa mahakogong garbo. Ang Bibliya nagpakita nga walay tawo ang adunay katungod sa pagpanghambog sa iyang kaugalingon o sa iyang mga nahimo. Diha sa Kristohanong kongregasyon sa Corinto, ang pipila miburot sa garbo sa ilang kaugalingon o sa ubang tawo, nga nagpahinabog pagkabahinbahin sa kongregasyon. Sila naghunahuna diha sa unodnon nga paagi, nga naglantaw sa tawo inay kang Kristo. (1Co 1:10-13; 3:​3, 4) Kining mga tawhana dili interesado sa espirituwal nga kaayohan sa kongregasyon, apan sila buot nga manghambog sa panggawas nga mga panagway, nga dili gayod buot motabang sa mga isigka-Kristohanon nga makaugmad ug maayong mga kasingkasing atubangan sa Diyos. (2Co 5:12) Busa, kusganong gibadlong ni apostol Pablo ang kongregasyon, nga gipakita nga sila walay katarongan nga manghambog diha kang bisan kinsa gawas diha kang Jehova nga Diyos ug sa iyang mga nahimo ngadto kanila. (1Co 1:​28, 29; 4:​6, 7) Ang lagda mao: “Siya nga nagapanghambog, manghambog siya diha kang Jehova.”​—1Co 1:31; 2Co 10:17.

Gihukman pa gani sa igsoon ni Jesus sa inahan nga si Santiago kadtong nanghambog bahin sa pipila ka kalibotanong mga proyekto nga ilang giplanong buhaton, nga nagsulti kanila: “Kamo nagpasigarbo sa inyong mapagawalong mga panghambog. Ang tanang pagpasigarbo nga ingon niana daotan.”​—San 4:13-16; itandi ang Pr 27:1.

Usa ka Maayong Kahulogan. Ang Hebreohanong pulong nga ga·ʼahʹ, ang Gregong pulong nga kau·khaʹo·mai, ug ang susamang mga porma niini gigamit usab sa paborableng diwa maylabot sa garbo o kangaya nga bation tungod sa usa ka butang nga gibuhat o napanag-iya. Ang salmista naghisgot bahin sa Israel ingong ‘ang garbo ni Jacob, nga gihigugma ni Jehova.’ (Sal 47:4) Diha sa usa ka tagna sa pagpasig-uli, si Isaias miingon nga ang mga bunga sa yuta mao unyay “butang igapasigarbo.” (Isa 4:2) Gisultihan sa apostol ang kongregasyon sa Tesalonica nga, ingong resulta sa ilang pagtuo, gugma, ug paglahutay, “kami nagpasigarbo kaninyo taliwala sa mga kongregasyon sa Diyos.” (2Te 1:​3, 4) Ang mga Kristohanon mapasigarbohon nga si Jehova maoy ilang Diyos, nga sila nakadangat sa pagkaila kaniya, ug nga siya nakaila kanila. Ilang gisunod ang prinsipyo: “Siya nga nagapanghambog papanghamboga tungod niining butanga mismo, ang pagkabaton ug hait nga salabotan ug ang pagkabaton ug kahibalo kanako, nga ako si Jehova, ang Usa nga nagapakita ug mahigugmaong-kalulot, hustisya ug pagkamatarong diha sa yuta.”​—Jer 9:24; itandi ang Luc 10:20.