Sunda ang Kinalabwan nga Dalan sa Gugma

SI Jehova nga Diyos mao ang larawan sa gugma. (1 Juan 4:8) Ang iyang Anak, si Jesu-Kristo, miingon nga kinahanglang atong higugmaon ang Diyos ug ang atong silingan. (Mateo 22:37-40) Ngani, gipalihok ni Jehova ang tibuok uniberso pinasukad niining hiyasa! Sa ingon alang sa walay kataposang kinabuhi sa bisan diin nga dapit, kinahanglang atong sundon ang dalan sa gugma.

Ang Diyos nagpakitag gugma sa nasod sa Israel apan sa ulahi gisalikway kanang organisasyona tungod sa ilang pagkadimatinumanon. Unya iyang giila ang kongregasyon sa mga tinun-an ni Jesus ingong Iyang bag-ong organisasyon. Sa unsang paagi? Pinaagi sa linain nga mga kapadayagan sa balaang espiritu nga naghatag kanilag gahom sa pagsultig lainlaing mga pinulongan ug sa pagpanagna. Busa, sa Pentekostes 33 K.P., 3,000 ka Hudiyo ug mga kinabig nahimong mga magtutuo ug mibiya sa karaang organisasyon alang sa bag-ong organisasyon sa Diyos. (Buhat 2:1-41) Sukad nga gikunsaran ug mga gasa sa espiritu human niadto ang mga apostol ni Jesus, ang maong mga kapadayagan natapos sa dihang nangamatay na sila. (Buhat 8:5-18; 19:1-6) Apan sa maong panahon ang mga gasa nagpamatuod nga may pag-uyon ang Diyos sa espirituwal nga Israel.​—Galacia 6:16.

Ang mga milagro nga misangpot gikan sa mga gasa sa espiritu nakahatag kaayohan. Ugaling, ang pagpakitag gugma o dili-mahakogong pagtagad sa uban mas hinungdanon kay sa pagbaton sa mga gasa sa espiritu. Gipakita ni apostol Pablo kini diha sa iyang unang sulat sa mga taga Corinto (c. 55 K.P.). Diha niana naghisgot siya bahin sa gugma ingong “kinalabwan nga dalan.” (1 Corinto 12:31) Kana nga dalan mao ang gihisgotan diha sa 1 Corinto kapitulo 13.

Kon Walay Gugma, Kita Walay Kapuslanan

Si Pablo nangatarongan: “Kon ako magasultig mga pinulongan sa mga tawo ug sa mga manulonda apan walay gugma, ako sama lamang sa usa ka masaba nga agong o piyangpiyang nga nagatagingting.” (1 Corinto 13:1) Kon walay gugma, walay kapuslanan ang pagsultig hinatag-sa-espiritu nga tawhanong pinulongan o sa pinulongan sa mga manulonda sa langit. Gipalabi ni Pablo ang pagsultig lima ka makapalig-ong mga pulong imbes sa napulo ka libo diha sa usa ka pinulongan nga dili masabtan sa mga tawo. (1 Corinto 14:19) Ang tawo nga walay gugma mahisama sa “usa ka masaba nga agong”​—usa ka gahob, makapikal nga agong—​o sa usa ka walay tuno nga “piyangpiyang.” Ang walay-gugma nga pagsultig mga pinulongan dili makahupay, dili makalig-on sa espirituwal nga paagi sa paghimaya sa Diyos ug dili makatabang sa iyang katawhan. Karong adlawa, kita magpakitag gugma pinaagi sa paggamit ug masabtang sinultihan diha sa Kristohanong ministeryo.

Ang apostol sunod miingon: “Kon ako may gasa sa pagpanagna ug nakasabot sa tanang mga tinago ug sa tanang kahibalo, ug kon ako makabaton sa hingpit nga pagtuo nga tungod niana arang ko nga mabalhin ang mga bukid, apan walay gugma, ako walay kapuslanan.” (1 Corinto 13:2) Ang milagrosong pagpanagna, ang linain nga pagsabot sa balaang mga tinago, ug ang hinatag-sa-espiritu nga kahibalo hayan makahatag kaayohan sa uban apan dili sa mga tawong nakabaton sa maong mga gasa kon ang gigasahan niini di-mahigugmaon. Gigamit ni Pablo ang linain nga pagsabot sa balaang mga tinago sa pagtabang sa uban, ug ang gasa sa kahibalo nakaarang kaniya sa pagtagna sa pagkaluwas sa mga biktima sa pagkalunod sa barko. (Buhat 27:20-44; 1 Corinto 4:1, 2) Bisan pa, kon iyang ‘nabatonan ang tanang kahibalo ug ang tanang pagtuo’ apan di-mahigugmaon, siya walay kapuslanan sa panan-aw ni Jehova.

Karong adlawa, ang espiritu ni Jehova nakapaarang sa iyang mga Saksi sa pagsabot sa mga tagna sa Bibliya ug sa balaang mga tinago ug nagatultol kanila sa pagpaambit sa maong kahibalo ngadto sa uban. (Joel 2:28, 29) Ang espiritu nagapatungha usab ug pagtuo nga gikinahanglan sa pagsagubang sa samag bukid nga mga kababagan. (Mateo 17:20) Sanglit ginahimo man kining mga butanga sa espiritu, sayop ang pagpangitag personal nga himaya gikan kanila. Wala gayod kitay kapuslanan gawas kon buhaton nato ang mga butang alang sa kahimayaan sa Diyos ug higugmaon siya ug ang isigkatawo.​—Galacia 5:6.

Walay Kaayohang Makuha Gikan sa Walay-gugma nga Halad

Si Pablo miingon: “Kon ipanghatag ko ang tanan ko nga katigayonan aron ipakaon sa uban, ug kon ihatag ko ang akong lawas, aron ako magpasigarbo, apan walay gugma, kini walay kaayohan kanako.” (1 Corinto 13:3) Kon walay gugma, walay kaayohang makuha si Pablo kon ihatag niya ang tanang butang nga iyang gipanag-iya aron ipakaon sa uban. Gantihan kita sa Diyos tungod sa gugma nga nagapaluyo sa atong mga gasa, dili sa ilang materyal nga bili o tungod kay kita nagapangitag himaya ingong mga maghahatag, sama sa bakakong Ananias ug Sapira. (Buhat 5:1-11) Si Pablo naghatag ug maayong panig-ingnan pinaagi sa mahigugmaong paghatag sa iyang kaugalingon may kalabotan sa ministeryo sa paghatag hinabang alang sa mga magtutuo sa Judea.​—1 Corinto 16:1-4; 2 Corinto 8:1-24; 9:7.

Bisan ang walay-gugma nga pagkamartir ingong usa ka saksi sa kamatuoran walay kapuslanan sa Diyos. (Proverbio 25:27) Si Jesus naghisgot bahin sa iyang halad apan wala kana ipasigarbo. Inay magpasigarbo iyang gihatag ang iyang kaugalingon sa kinabubut-on tungod sa gugma. (Marcos 10:45; Efeso 5:2; Hebreohanon 10:5-10) Ang iyang espirituwal nga mga igsoon ‘nagtugyan sa ilang mga lawas ingon nga halad nga buhi’ diha sa pag-alagad sa Diyos dili sa nagahimaya-sa-kaugalingon nga pagkamartir kondili diha sa ordinaryong mga paagi nga mohatag kahimayaan kang Jehova ug nagapakita sa ilang gugma kaniya.​—Roma 12:1, 2.

Pila ka Paagi nga Kita Mapalihok sa Gugma

Si Pablo misulat: “Ang gugma mapailobon ug maluloton.” (1 Corinto 13:4a) Alang sa kadaghanan, ang hataas-nga-pailob sa Diyos sukad nga nakasala si Adan nagkahulogan ug paghinulsol nga motultol sa kaluwasan. (2 Pedro 3:9, 15) Kon kita may gugma, mapailobon natong tudloan ang uban sa kamatuoran. Atong likayan ang pagsilaob sa kasuko ug magmahunahunaon sa uban ug magmapinasayloon. (Mateo 18:21, 22) Ang gugma maluloton usab, ug kita mapasuod sa Diyos tungod sa iyang kalulot. Ang bunga sa iyang espiritu nga kalulot mopugong kanato nga dili magmapugsanon sa uban sama nga siya dili mapugsanon kanato. (Efeso 4:32) Ang gugma mopahimo pa kanatong maluloton ngadto sa mga tawong ingrato.​—Lucas 6:35.

Si Pablo midugang: “Ang gugma dili abughoan, dili tigpagawal, dili tigpaburot.” (1 Corinto 13:4b) Ang pangabugho maoy usa ka buhat sa unod nga mopalayo sa usa gikan sa Gingharian sa Diyos. (Galacia 5:19-21) Ang gugma mopugong kanato nga dili masina sa mga kabtangan sa uban o sa maayong mga kahimtang. Kon siya makadawat ug usa ka pribilehiyo sa pag-alagad nga atong gitinguha, ang gugma mopahimo kanato sa pagkalipay uban kaniya, atong suportahan siya, ug magpasalamat sa Diyos nga siya magamit alang sa kaayohan sa kongregasyon.

Sanglit ang gugma “dili tigpagawal,” kini dili motukmod kanato sa pagpasigarbo bahin sa gitugot sa Diyos kanato nga maoy buhaton diha sa iyang pag-alagad. Ang pipila ka taga Corinto nagpasigarbo nga daw gikan kanila ang mga gasa sa espiritu, apan kini maoy gikan sa Diyos, sama sa mga pribilehiyo sa iyang modernong-adlaw nga organisasyon. Inay ipasigarbo ang atong posisyon diha sa organisasyon sa Diyos, nan, magbantay kita nga dili kita mahulog. (1 Corinto 1:31; 4:7; 10:12) Ang gugma “dili tigpaburot,” apan ang hunahuna sa tawong dili-mahigugmaon basin ug moburot tungod sa pagpadako sa kaugalingon. Ang tawong mahigugmaon dili mobati nga labaw sa uban.​—1 Corinto 4:18, 19; Galacia 6:3.

Dili Bastos, Hakog, Masilagon

Ang gugma “dili magalihok nga binastos, dili mahunahunaon sa iyang kaugalingong kaayohan, dili masuk-anon.” (1 Corinto 13:5a) Kini mopalambo sa maayong pamatasan, diyosnong paggawi, pagtahod sa awtoridad, ug maligdong ug batasan diha sa Kristohanong mga tigom. (Efeso 5:3-5; 1 Corinto 11:17-34; 14:40; itandi ang Judas 4, 8-10.) Sanglit ang gugma mopabati sa tanan nga gikinahanglan, sama sa tanang bahin sa tawhanong lawas, ang mahigugmaong kongregasyon maoy usa ka dapit sa kalinaw ug dalangpanan. (1 Corinto 12:22-25) Inay mahakogong ‘maghunahuna sa kaugalingong kaayohan,’ ang gugma mopahimo kanato sa pagsakripisyo sa atong mga katungod usahay ug sa pagpakitag kaikag sa uban ug sa ilang kaayohan. (Filipos 2:1-4) Ang gugma mopahimo kanato nga ‘mahimong tanang butang ngadto sa tanang matang sa mga tawo, aron kita makaluwas ug pipila’ pinaagi sa atong ministeryo.​—1 Corinto 9:22, 23.

Ang gugma “dili masuk-anon.” Ang pagsilaob sa kasuko maoy mga buhat sa makasasalang unod, apan ang gugma mopahimo kanatong “mahinay sa kasuko.” (Santiago 1:19; Galacia 5:19, 20) Bisan pa kon may katarongan kitang masuko, ang gugma dili mopahimo kanato nga padayong nasuko, busa naghatag luna sa Yawa. (Efeso 4:26, 27) Ilabinang likayan sa mga ansiano ang kasuko kon mapakyas ang isigkamagtutuo sa pagtuman sa pila ka sugyot.

Si Pablo usab miingon bahin sa gugma: “Ang gugma dili madumtanon.” (1 Corinto 13:5b) Ang gugma dili magbaton ug listahan sa nahimong mga kasaypanan, samag mga talaan diha sa libro sa kuwenta. Kini makakitag maayo diha sa isigkamagtutuo ug dili mobalos sa tinuod o hinanduraw nga mga kasaypanan. (Proverbio 20:22; 24:29; 25:21, 22) Ang gugma motabang kanato sa “pagkab-ot sa mga butang nga mohatag ug kalinaw.” (Roma 14:19) Si Pablo ug Bernabe naglalis ug nagbulag diha sa pag-alagad sa Diyos, apan ang gugma maoy nag-ayo sa kabingkilan ug nagsanta kanila batok sa paghambin sa pagdumot.​—Levitico 19:17, 18; Buhat 15:36-41.

Kiling sa Pagkamatarong ug sa Kamatuoran

Mahitungod sa gugma, si Pablo mipadayon sa pag-ingon: “Ang gugma wala magkalipay tungod sa dili-matarong, apan nagamaya sa kamatuoran.” (1 Corinto 13:6) Ang uban malipay sa pagkadili-matarong nga “sila dili matulog hangtod nga sila makabuhat ug daotan.” (Proverbio 4:16) Apan diha sa organisasyon sa Diyos kita dili makig-away sa usag usa o malipay kon may usa nga mahulog sa sala. (Proverbio 17:5; 24:17, 18) Kon dunay igong gugma alang sa Diyos ug pagkamatarong diha sa kongregasyon sa Corinto, dili unta ipalabay ang imoralidad didto. (1 Corinto 5:1-13) Lakip sa ubang mga butang, ang gugma sa pagkamatarong mosanta kanato gikan sa pagkalingaw sa telebisyon, salida sa sine, o sa mga pasundayag sa teyatro sa pagkadaotan.

Ang gugma “nagamaya sa kamatuoran.” Dinhi ang kamatuoran gitandi sa pagkadili-matarong. Kini dayag nga nagkahulogan nga ang gugma mopahimo kanato sa pagmaya sa impluwensiya sa pagkamatarong sa kamatuoran diha sa mga tawo. Kita malipay sa mga butang nga makapalig-on sa mga tawo ug nga mopalambo sa kawsa sa kamatuoran ug sa pagkamatarong. Ang gugma mopugong kanato sa pagpamakak, mohatag kalipay kanato kon mapamatud-ang walay sala ang inosente, ug mopalipay kanato sa kadaogan sa kamatuoran sa Diyos.​—Salmo 45:4.

Kon sa Unsang Paagi ang Gugma Nakiglabot sa Tanang Butang

Nagpadayon sa iyang kabatbatan sa gugma, si Pablo misulat: “Kini mopailob sa tanang butang, motuo sa tanang butang, molaom sa tanang butang, moantos sa tanang butang.” (1 Corinto 13:7) ‘Moantos sa tanang butang,’ ang gugma mosanta sa kasuko sama nga makasanta sa ulan ang maayong atop. Kon may makapasilo kanato apan mangayog pasaylo, ang gugma mopahimo kanato sa pag-antos sa pasipala, pasayloon ang nakasala imbes itabi ang maong mga butang. Diha sa gugma maningkamot kita nga ‘makabig ang atong igsoon.’​—Mateo 18:15-17; Colosas 3:13.

Ang gugma “motuo sa tanang butang” diha sa Pulong sa Diyos ug mopahimo kanatong mapasalamaton sa espirituwal nga pagkaon nga ginatagana sa “matinumanon ug maalamong ulipon.” (Mateo 24:45-47) Bisag dili kita malimbongan, ang gugma mopugong kanato sa pagbaton ug dili-matuohon nga kasingkasing ug mopugong kanato sa dili paghunahuna ug daotan sa isigkamagtutuo. (Ecclesiastes 7:21, 22) Ang gugma usab “molaom sa tanang butang” nga natala sa Kasulatan, sama sa mga kamatuoran bahin sa Gingharian sa Diyos. Gipalihok tungod sa gugma, atong ginalaoman ug ginaampo ang labing maayong resulta sa masulayong mga kahimtang. Ang gugma mopalihok usab kanato sa pagsulti sa uban sa katarongan sa atong paglaom. (1 Pedro 3:15) Dugang pa, ang gugma “moantos sa tanang butang,” apil ang mga sala batok kanato. (Proverbio 10:12) Ang gugma sa Diyos usab motabang kanato sa pag-antos sa paglutos ug sa ubang mga pagsulay.

Si Pablo midugang: “Ang gugma dili mapakyas.” (1 Corinto 13:8a) Ang gugma dili mapakyas sama nga dili mapakyas si Jehova. Sanglit ang atong walay kataposang Diyos maoy larawan sa gugma, kining hiyasa dili gayod mawala. (1 Timoteo 1:17; 1 Juan 4:16) Ang uniberso kanunay nga pagamandoan gayod sa gugma. Busa mag-ampo kita nga tabangan kita sa Diyos sa pagbuntog sa hakog nga mga kinaiya ug ipasundayag kining di-mapakyas nga bunga sa iyang espiritu.​—Lucas 11:13.

Mga Butang nga Hapit Nang Taposon

Nagtudlo sa unahan, si Pablo misulat: “Kon aduna may mga gasa sa pagpanagna, kini pagataposon ra unya; kon aduna may pagsultig mga dila, kini pagahunongon ra unya; kon aduna may kahibalo, kini pagataposon ra unya.” (1 Corinto 13:8b) ‘Ang mga gasa sa pagpanagna’ nakahimo sa mga nakabaton niini sa pagsultig bag-ong mga tagna. Bisan tuod ang maong mga gasa nawala human nga natukod ang Kristohanong kongregasyon ingong organisasyon sa Diyos, ang iyang gahom sa pagtagna dili gayod matapos, ug ang iyang Pulong nasudlan sa tanang tagna nga atong gikinahanglan karon. Ang hinatag-sa-espiritu nga katakos sa pagsultig mga pinulongan mihunong na usab, ug ang linain nga kahibalo ‘gitapos na,’ sumala sa gitagna. Apan ang kompletong Pulong ni Jehova nagtagana sa atong gikinahanglang masayran alang sa kaluwasan. (Roma 10:8-10) Dugang pa, ang katawhan sa Diyos napuno sa iyang espiritu ug nagapamunga niini.

Si Pablo mipadayon: “Kay dili hingpit ang atong kahibalo ug maingon man ang atong pagpanagna; apan kon ang hingpit moabot na, ang dili-hingpit pagataposon ra unya.” (1 Corinto 13:9, 10) Ang mga gasa sa kahibalo ug pagtagna dili-kompleto. Dayag, ang maong tagna dili detalyado, ug dili-hingpit ang pagbutyag sa matag manalagna sa umaabot, kulang sa hingpit nga kahibalo labot sa iyang gitagna. Karon, hinunoa, ang pagsabot sa tagna anam-anam nga nakompleto. Pananglitan, ang mga kamatuoran nga nagatuman sa tagna sa Bibliya nagpamatuod nga nadawat ni Jesus ang harianong awtoridad ibabaw sa katawhan sa 1914. Sukad niadto, kita nakadangat na sa “panahon sa kataposan” ug ginatagamtam ang padayon nga pagtubo sa espirituwal nga kahibalo ug pagsabot sa tagna sa Bibliya. (Daniel 12:4) Busa, kita hapit nang makadangat sa hingpit nga kahibalo ug ‘ang hingpit’ haduol na.

Ang Labing Dakong Hiyas Nagapabilin

Naghisgot labot sa kauswagan sa kongregasyon, si Pablo misulat: “Sa bata pa ako, nagsulti ako sama ug bata, naghunahuna sama ug bata, nangatarongan sama ug bata; apan karon nga hamtong na ako, akong gibiyaan ang mga kinaiya sa usa ka bata.” (1 Corinto 13:11) Sanglit ang usa ka bata nagalihok sumala sa limitadong kahibalo ug kaugmaran sa lawas, kini madala ngadto ug nganhi, nga samag gitabyog sa duyan. Apan ang usa ka tawong hamtong ugmad na ug lawas, may mas dakong kahibalo, ug sagad dili daling maimpluwensiyahan. Giwala na niya ang binata nga mga hunahuna, tinamdan, ug mga paagi. Sa susama, human nga mitubo ang yutan-ong organisasyon sa Diyos gikan sa pagkabata, Siya mihukom nga kini wala na magkinahanglan sa mga gasa sa espiritu sa pagtagna, sa mga pinulongan, ug kahibalo. Bisan pa nga ang presenteng-adlaw nga mga sakop sa kongregasyon, nga karon tigulang na, mibati usab nga wala magkinahanglan sa maong mga gasa, sila malipay sa pag-alagad sa Diyos ubos sa pagtultol sa iyang espiritu.

Si Pablo midugang: “Kay sa karon kita nagasud-ong sa hanap nga panagway daw pinaagi sa salamin, apan makita ra unya nato kini sa nawong ug nawong. Sa karon bahin lamang ang akong nahibaloan, apan unya masabtan ko ra ang tanan.” (1 Corinto 13:12) Sa bata pa ang kongregasyon, dili kadto panahon sa Diyos sa pagbutyag sa pipila ka butang. Busa, hanap kini nga nakita, samag nagtan-aw ang mga Kristohanon sa usa ka lubog nga salamin. (Buhat 1:6, 7) Apan klaro na ang atong panan-aw. Ang katumanan sa tipo ug tagna klaro nang makita, kay mao na kini ang panahon sa pagpadayag sa Diyos. (Salmo 97:11; Daniel 2:28) Bisag si Pablo nakaila sa Diyos, ang kinalabwan nga kahibalo bahin kang Jehova ug ang labing suod nga relasyon Kaniya moabot sa dihang ang apostol mabanhaw ngadto sa langitnong kinabuhi, busa nagadawat sa bug-os nga ganti sa iyang Kristohanong dalan.

Mihinapos sa iyang paglarawan sa gugma, si Pablo misulat: “Ug karon, nagapabilin kining tulo, pagtuo, paglaom, gugma; apan ang labing dako niini mao ang gugma.” (1 Corinto 13:13) Bisan pa nga natapos na ang milagrosong mga gasa sa espiritu, ang kongregasyon karong adlawa nakabaton sa bug-os nga kahibalo ug katarongan alang sa labi pang tugob nga pagtuo, paglaom, ug gugma. Kini adunay pagtuo nga ang tanang butang nga gisaad sa Diyos sama ra nga natuman. (Hebreohanon 11:1) Ang mga bahin sa pagtuo matapos sa dihang matuman na ang mga butang nga gitagna sa Pulong sa Diyos. Ang mga bahin sa paglaom mohunong sa dihang atong makita ang ginalaoman nga mga butang. Apan ang gugma magpabilin sa walay kataposan. Busa, pasagding ang tanang mga Saksi ni Jehova magpadayon sa pagsunod sa kinalabwan nga dalan sa gugma.