Ugmara ang Gugma nga Dili Gayod Mapakyas
‘Ang gugma molahutay sa tanang butang. Ang gugma dili gayod mapakyas.’—1 COR. 13:7, 8.
1. (a) Sa unsang paagi sagad gihulagway ang gugma? (b) Kang kinsa ug sa unsa nila sagad gipakita ang ilang gugma?
DAGHAN nang napatik nga basahon bahin sa gugma. Kining hiyasa gibayaw ug gihimong madanihon diha sa mga awit. Tinuod, ang gugma gikinahanglan sa tawo. Apan ang mga basahon ug mga salida sa sine sagad nagpasiugda lamang niana diha sa hinimo-himong mga estorya, ug kini mapalit bisag asa. Ugaling, talagsa ra kaayo ang nagpakitag tinuod nga gugma sa Diyos ug sa silingan. Atong makita nga natuman ang gitagna sa Bibliya bahin sa kataposang mga adlaw. Ang mga tawo mahimong ‘mahigugmaon sa ilang kaugalingon, mahigugmaon sa salapi, . . . mahigugmaon sa kalipayan inay nga mga mahigugmaon sa Diyos.’—2 Tim. 3:1-5.
2. Unsang pasidaan ang gihatag sa Bibliya bahin sa sayop nga matang sa gugma?
2 Ang mga tawo adunay katakos sa pagpakitag gugma, apan ang Pulong sa Diyos nagpasidaan kanato batok sa sayop nga matang sa gugma. Ug gihubit sa Bibliya kon unsay mahitabo sa dihang moturok sa kasingkasing kanang matanga sa gugma. (1 Tim. 6:9, 10) Nahinumdom ka ba sa gisulat ni apostol Pablo bahin kang Demas? Bisan tuod kanunay niyang kauban si Pablo, si Demas nahaylo sa paghigugma sa mga butang nga gitanyag sa kalibotan. (2 Tim. 4:10) Si apostol Juan nagpasidaan usab sa mga Kristohanon batok niini nga kapeligrohan. (Basaha ang 1 Juan 2:15, 16.) Ang paghigugma sa kalibotan ug sa lumalabay nga mga butang ug mga paagi niini kasukwahi sa paghigugma sa Diyos ug sa mga butang nga naggikan kaniya.
3. Unsang hagit ang atong giatubang, ug unsang mga pangutana ang motungha?
3 Kita dili bahin niining kalibotana, bisag nagpuyo kita niini. Busa, usa ka hagit ang paglikay sa sayop nga panglantaw sa kalibotan bahin sa gugma. Hinungdanon nga dili nato tugotan ang atong kaugalingon nga malit-agan sa sayop o hiwi nga matang sa gugma. Busa, kang kinsa nato angayng ugmaron ug ipasundayag ang may-prinsipyo nga gugma? Unsang mga tagana ang motabang kanato sa pag-ugmad sa gugma nga molahutay sa tanang butang ug dili gayod mapakyas? Sa unsang paagi kini makabenepisyo kanato karon ug makaapektar sa atong kaugmaon? Nagkinahanglan kitag mga tubag sumala sa panglantaw sa Diyos aron magiyahan kita sa hustong paagi.
Pag-ugmad ug Gugma Kang Jehova
4. Sa unsang paagi motubo ang atong gugma sa Diyos?
4 Ang pag-ugmad mahimong magpasabot ug pag-andam ug pagpalambo sa usa ka butang. Handurawa ang usa ka mag-uuma nga naghago sa pag-andam sa yuta ug pagpugas sa mga binhi. Iyang gidahom nga motubo kana. (Heb. 6:7) Sa samang paagi, ang atong gugma sa Diyos angayng motubo o molalom. Unsay gikinahanglan aron mahitabo kini? Kinahanglang andamon nato ang atong kasingkasing, diin gipugas ang binhi sa kamatuoran bahin sa Gingharian. Mahimo nato kini pinaagi sa makugihong pagtuon sa Pulong sa Diyos aron mouswag ang atong kahibalo bahin kaniya. (Col. 1:10) Ang regular nga pagtambong ug pagpakig-ambit sa mga tigom sa kongregasyon makapauswag usab sa atong kahibalo. Ang matag usa ba kanato naningkamot sa pagpauswag sa atong kahibalo?—Prov. 2:1-7.
5. (a) Sa unsang paagi kita makakat-on bahin sa pangunang mga hiyas ni Jehova? (b) Unsay imong ikasulti bahin sa hustisya, kaalam, ug gahom sa Diyos?
5 Si Jehova nagpadayag sa iyang personalidad diha sa Bibliya. Pinaagi sa pagtuon sa Kasulatan ug padayong pagkuhag kahibalo bahin kang Jehova, mas molalom ang atong apresasyon sa iyang mga hiyas—ang hustisya, gahom, kaalam ug, labaw sa tanan, ang iyang dili-hitupngang gugma. Si Jehova nagpakitag hustisya diha sa tanan niyang mga paagi ug sa iyang hingpit nga balaod. (Deut. 32:4; Sal. 19:7) Kita makapamalandong bahin sa tanang linalang ni Jehova ug mahingangha sa iyang labaw nga kaalam. (Sal. 104:24) Ang uniberso naghatag usab ug pamatuod nga si Jehova mao ang Tuboran sa dinamikong kusog ug walay-kinutobang gahom.—Isa. 40:26.
6. Sa unsang paagi gipasundayag sa Diyos ang iyang gugma kanato, ug sa unsang paagi kana nakaapektar kanimo?
6 Unsay ikasulti bahin sa kinalabwang hiyas sa Diyos, ang gugma? Kini masangkaron ug nag-apektar kanatong tanan. Iyang gipasundayag ang maong gugma pinaagi sa pagtagana sa halad lukat. (Basaha ang Roma 5:8.) Ang maong tagana mahimong mabatonan sa tanang tawo, apan kadto lamang mosanong sa gugma sa Diyos ug magpasundayag ug pagtuo sa iyang Anak ang makabenepisyo niana. (Juan 3:16, 36) Ang paghatag ni Jehova kang Jesus ingong halad pasig-uli sa atong mga sala angayng magpalihok kanato sa paghigugma usab kaniya.
7, 8. (a) Unsay kinahanglang himoon aron atong ikapakita ang atong gugma sa Diyos? (b) Unsay wala makapugong sa katawhan sa Diyos sa pagtuman sa iyang mga sugo?
7 Sa unsang paagi atong ikapasundayag ang atong gugma sa Diyos agig balos sa tanan nga nahimo niya alang kanato? Ang inspiradong tubag makahuloganon kaayo: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Oo, ang gugma kang Jehova nga Diyos magtukmod kanato sa pagtuman sa iyang mga sugo. Usa kana sa mga rason kon nganong kita nagpamatuod bahin sa iyang ngalan ug Gingharian, nga makabenepisyo sa uban. Ang pagbuhat niana gikan sa kadagaya sa atong kasingkasing maoy ebidensiya nga atong gituman ang mga sugo sa Diyos uban ang putling motibo.—Mat. 12:34.
8 Ang atong mga igsoon sa tibuok kalibotan nagpadayon sa pagsugot sa mga sugo sa Diyos bisan pag dili sila tagdon sa mga tawo ug gisalikway ang mensahe sa Gingharian. Wala sila mohunong sa pagpaningkamot sa pagtuman sa bug-os sa ilang ministeryo. (2 Tim. 4:5) Sa susama, kita mapalihok sa pagpaambit sa kahibalo sa Diyos kutob sa atong maarangan maingon man sa pagtuman sa uban pa niyang mga sugo.
Kon Nganong Atong Gihigugma si Jesu-Kristo
9. Unsay giantos ni Kristo, ug nganong nahimo niya kana?
9 Gawas pa sa paghigugma sa Diyos, adunay daghang rason kon nganong atong ugmaron ang gugma alang sa iyang Anak. Bisag wala pa gayod nato makita si Jesus, molalom ang atong gugma kaniya samtang nagtuon kita bahin kaniya. (1 Ped. 1:8) Unsa ang pipila sa mga butang nga giantos ni Jesus? Samtang iyang gibuhat ang kabubut-on sa iyang Amahan, si Jesus gidumtan nga walay pasikaranan, gilutos, gibutangbutangan, gibiaybiay, ug gipakaulawan. (Basaha ang Juan 15:25.) Ang gugma ni Jesus sa iyang langitnong Amahan nagtukmod kaniya sa pag-antos sa maong mga pagsulay. Kay gitukmod sa gugma, ang paghalad niya sa iyang kinabuhi nagtaganag lukat alang sa daghan.—Mat. 20:28.
10, 11. Tungod sa gihimo ni Jesus alang kanato, unsay atong tumong?
10 Ang gibuhat ni Jesus magpalihok kanato sa paghigugma usab kaniya. Samtang atong palandongon ang gihimo ni Kristo alang kanato, mas molalom ang atong gugma kaniya. Ingong iyang mga sumusunod, himoon natong tumong ang pag-ugmad ug pagpakita sa samag-Kristo nga gugma aron makalahutay kita sa pagtuman sa iyang sugo nga isangyaw ang Gingharian ug maghimog mga tinun-an.—Mat. 28:19, 20.
11 Ingong balos sa gugma ni Kristo sa tanang tawo, kita matukmod sa pagtuman sa gisugo kanato sa dili pa moabot ang kataposan. (Basaha ang 2 Corinto 5:14, 15.) Ang gugma nga gipasundayag ni Kristo nakatabang gayod kaniya sa pagtuman sa katuyoan sa Diyos alang sa katawhan. Ug kon sundon pag-ayo sa matag usa kanato ang ehemplo nga gibilin ni Kristo, aduna kitay bahin nianang langitnong katuyoan. Kana nagkinahanglan nga ato gayong ugmaron ang gugma sa Diyos kutob sa atong mahimo. (Mat. 22:37) Pinaagi sa pagsunod sa gitudlo ni Jesus ug pagtuman sa iyang mga sugo, atong ikapakita nga kita nahigugma kaniya ug determinadong ituboy ang pagkasoberano sa Diyos bisag unsa pay mahitabo, sama sa gibuhat ni Jesus.—Juan 14:23, 24; 15:10.
Pagpangagpas sa Labaw Pa Gayod nga Paagi sa Gugma
12. Unsay gipasabot ni Pablo sa ekspresyong “labaw pa gayod nga paagi”?
12 Si apostol Pablo maoy tigsundog ni Kristo. Tungod kay iyang gisunod pag-ayo ang tunob ni Kristo, si Pablo may kagawasan sa pagdasig sa iyang mga igsoon nga mahimong tigsundog kaniya. (1 Cor. 11:1) Bisan tuod giawhag niya ang mga Kristohanon sa Corinto nga masibotong tinguhaon ang pipila ka gasa sa espiritu nga gipadayag sa unang siglo, sama sa pagpanambal ug pagsultig lainlaing pinulongan, gipakita ni Pablo kanila nga diha pay mas maayong butang nga angay nilang pangagpason. Sa 1 Corinto 12:31, siya miingon: “Ako magpakita kaninyo sa labaw pa gayod nga paagi.” Ang konteksto sa nagsunod nga mga bersikulo nagpakita nga mao kini ang labaw pa gayod nga paagi sa gugma. Sa unsang paagi nahimo kanang labaw? Giilustrar ni Pablo kon unsay iyang gipasabot. (Basaha ang 1 Corinto 13:1-3.) Kon siya adunay talagsaong mga katakos ug nakahimog dagkong mga butang apan walay gugma, mapuslanon ba kana? Dili! Kay natukmod sa espiritu sa Diyos, iyang gipatin-aw kining hinungdanong punto. Pagkaepektibo gayod sa ilustrasyon nga iyang gihatag!
13. (a) Unsa ang tinuig nga teksto sa 2010? (b) Sa unsang diwa nga ang gugma dili gayod mapakyas?
13 Dayon gihubit ni Pablo kanato kon unsa ang gugma ug kon unsay wala ipasabot niini. (Basaha ang 1 Corinto 13:4-8.) Karon, paggahin ug panahon sa pagsusi kon imo bang nakab-ot ang mga kinahanglanon sa gugma. Hatagig pangunang pagtagad ang kataposang mga pulong sa bersikulo 7 ug ang unang tudling-pulong sa bersikulo 8: ‘Ang gugma molahutay sa tanang butang. Ang gugma dili gayod mapakyas,’ nga maoy atong tinuig nga teksto sa 2010. Matikdi nga sa bersikulo 8, si Pablo miingon nga ang mga gasa sa espiritu, lakip na ang pagpanagna ug ang pagsultig lainlaing pinulongan—nga gigamit sa bag-o pang natukod ang Kristohanong kongregasyon—wagtangon ra. Kini matapos. Apan ang gugma magpabilin. Ang gugma maoy kinaiyahan mismo ni Jehova, ug siya walay-pagkatapos. Busa ang gugma dili gayod mapakyas, o matapos. Kini magpabilin ingong hiyas sa atong Diyos nga walay-pagkatapos.—1 Juan 4:8.
Gugma nga Molahutay sa Tanang Butang
14, 15. (a) Sa unsang paagi ang gugma motabang kanato sa paglahutay sa mga pagsulay? (b) Nganong wala mokompromiso ang usa ka batan-ong brader?
14 Unsay makatabang sa mga Kristohanon sa paglahutay sa bisan unsang pagsulay, kalisdanan, ug mga problema nga ilang maagoman? Ang pangunang makatabang kanila mao ang gugma nga pinasukad sa prinsipyo. Ang maong gugma naglangkit ug labaw pa kay sa pagsakripisyo lamang sa materyal nga mga butang. Kini magtukmod kanato sa paghupot sa atong integridad bisan hangtod sa kamatayon. (Luc. 9:24, 25) Palandonga ang pagkamatinumanon sa mga Saksi nga nag-antos diha sa mga kampo konsentrasyon, kampo sa pinugos nga pagtrabaho, ug sa mga bilanggoan panahon ug human sa Gubat sa Kalibotan II.
15 Usa ka batan-ong Aleman nga Saksi nga ginganlag Wilhelm nagpamatuod niini. Inay mokompromiso, siya nagpabiling maunongon sa dihang nag-atubang ug kamatayon pinaagi sa payring eskuwad sa mga Nazi. Sa usa ka sulat panamilit ngadto sa iyang pamilya, siya miingon: “Labaw sa tanan kinahanglang higugmaon nato ang Diyos, ingon sa gisugo sa atong Lider si Jesu-Kristo. Kon kita mobarog dapig kaniya, siya magaganti kanato.” Sa ulahi, diha sa usa ka artikulo sa Bantayanang Torre, ang usa ka membro sa iyang pamilya misulat: “Latas sa gubot nga panahon, ingong pamilya among giseguro nga among unahon ang among gugma sa Diyos.” Mao kanay tinamdan sa daghang igsoon nga sa pagkakaron nabilanggo didto sa Armenia, Eritrea, Habagatang Korea, ug sa uban pang kayutaan. Wala gayod molubad ang gugma niining mga igsoona alang kang Jehova.
16. Unsay naagoman sa atong mga igsoon sa Malawi?
16 Diha sa daghang dapit, ang lainlaing matang sa paglutos nagsulay sa pagtuo ug pagkamalahutayon sa atong mga igsoon. Sulod sa 26 ka tuig ang mga Saksi ni Jehova sa Malawi nakaagom sa mga pagdili, grabeng pagsupak, ug sa daghang linuog nga mga buhat. Ang ilang pagkamalahutayon gigantihan. Sa dihang nagsugod ang paglutos, dihay mga 18,000 ka Saksi sa maong nasod. Trayenta ka tuig sa ulahi miuswag ug kapin sa duha ka pilo ang ilang gidaghanon. Kini mikabat ug 38,393. Ingon usab niana ang nahitabo sa ubang kayutaan.
17. Unsay giatubang sa pipila diha sa mga panimalay nga nabahin tungod sa relihiyon, ug nganong nakalahutay sila sa dili maayong pagtratar?
17 Ang direktang pag-atake nganha sa katawhan sa Diyos malisod tingali. Apan, mas lisod ang pagsupak nga naagoman sa matag Kristohanon gikan sa mga membro sa pamilya. Mahimong pit-oson sila sa mga membro sa pamilya o sa mga paryente. Dili ba gitagna man kana ni Jesus nga mahitabo? Oo, ug daghan ang nakasinati sa iyang giingon. (Mat. 10:35, 36) Ang mga tin-edyer nakaagom ug pagsupak gikan sa ilang dili-magtutuong mga ginikanan. Ang uban gipalayas pa gani, apan maluloton silang gisagop sa mga Saksi. Ang uban wala na ilhang anak. Unsay nakatabang kanila sa paglahutay sa dili maayong pagtratar? Dili lamang ang ilang gugma sa mga igsoon kondili, labaw sa tanan, ang ilang tiunay nga gugma kang Jehova ug sa iyang Anak.—1 Ped. 1:22; 1 Juan 4:21.
18. Sa unsang paagi ang gugma nga molahutay sa tanang butang makatabang sa Kristohanong mga magtiayon?
18 Adunay daghan pang kahimtang sa kinabuhi nga nagkinahanglag gugma nga molahutay sa tanang butang. Diha sa kaminyoon, ang gugma motabang sa mga magtiayon sa pagtamod sa gipamulong ni Jesus: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:6) Sa dihang makasinatig ‘kasakitan sa unod’ angayng hinumdoman sa minyong mga Kristohanon nga si Jehova mao ang pangunang bahin sa ilang kaminyoon. (1 Cor. 7:28) Ang iyang Pulong nag-ingon nga ang ‘gugma molahutay sa tanang butang,’ ug ang bana ug asawa nga nasul-oban niining hiyasa mapalihok sa pag-unong sa usag usa ug sa pagpalig-on sa ilang kaminyoon.—Col. 3:14.
19. Unsay nahitabo taliwala sa katawhan sa Diyos human sa mga katalagman?
19 Ang gugma motabang kanato sa paglahutay sa tanang butang panahon sa mga katalagman. Napamatud-an kini sa dihang nahitabo ang usa ka linog didto sa habagatang Peru ug sa dihang ang Bagyong Katrina mihapay sa mga bahin sa Gulpo didto sa United States. Daghan sa atong mga igsoon ang nawad-an sa ilang balay o materyal nga kabtangan. Ang gugma nagtukmod sa tibuok-kalibotang kongregasyon sa pagtaganag hinabang, ug ang mga boluntaryo mitabang sa pagtukod sa balay sa mga igsoon ug sa pag-ayo sa mga Kingdom Hall. Ang maong mga buhat nagpamatuod nga ang atong mga igsoon nahigugma ug nag-atiman sa usag usa sa tanang panahon ug sa bisan unsang kahimtang.—Juan 13:34, 35; 1 Ped. 2:17.
Ang Gugma Dili Gayod Mapakyas
20, 21. (a) Nganong bililhon kaayo ang gugma? (b) Nganong determinado ka nga magpakitag gugma?
20 Taliwala sa katawhan ni Jehova karon, atong makita ang kaalam sa pagpangagpas sa labaw pa gayod nga paagi sa gugma. Sa pagkatinuod, kini maoy mopatigbabaw sa tanang kahimtang. Matikdi kon sa unsang paagi kana gipasiugda ni apostol Pablo. Una, siya miingon nga ang mga gasa sa espiritu mohunong ra ug ang Kristohanong kongregasyon mouswag ngadto sa pagkahamtong. Dayon siya mihinapos: “Hinunoa, karon nagpabilin ang pagtuo, paglaom, gugma, kining tulo; apan ang kinalabwan niini nila mao ang gugma.”—1 Cor. 13:13.
21 Human mabag-o ang tanang butang, ang atong gituohan ug gilaoman nahitabo na, busa matapos na ang atong pagtuo ug paglaom niana. Apan komosta ang gugma? Kini dili gayod mapakyas, o matapos. Kini magpabilin. Sa dihang matagamtam na ang kinabuhing walay kataposan, segurado nga atong makita ug masabtan ang daghan pang bahin sa gugma sa Diyos. Pinaagi sa pagbuhat sa kabubut-on sa Diyos diha sa pagpangagpas sa labaw pa nga paagi sa gugma nga dili gayod mapakyas, ikaw mahimong magpabilin hangtod sa kahangtoran.—1 Juan 2:17.
Unsay Imong Tubag?
• Nganong angay kitang magbantay batok sa sayop nga matang sa gugma?
• Ang gugma motabang kanato sa pag-antos sa unsa?
• Sa unsang diwa nga ang gugma dili gayod mapakyas?
[Blurb sa panid 27]
Tinuig nga teksto sa 2010: ‘Ang gugma molahutay sa tanang butang. Ang gugma dili gayod mapakyas.’—1 Cor. 13:7, 8.
[Hulagway sa panid 25]
Ang gugma sa Diyos magtukmod kanato sa pagsangyaw
[Hulagway sa panid 26]
Ang dili-mapakyas nga gugma nakatabang sa atong mga igsoon sa Malawi sa paglahutay sa mga pagsulay