Pagkinabuhi Alang Karong Adlawa O Alang sa Walay Kataposang Umaabot?
“Kita giluwas niini nga paglaom.”—ROMA 8:24.
1. Unsay gitudlo sa mga Epicureanhon, ug sa unsang paagi kanang matanga sa pilosopiya nakaapektar sa ubang mga Kristohanon?
GISULATAN ni apostol Pablo ang mga Kristohanon nga nagpuyo sa Corinto: “Naunsa man nga ang pipila taliwala kaninyo nagaingon nga walay pagkabanhaw sa mga patay?” (1 Corinto 15:12) Sa dayag, ang makahilong pilosopiya sa manggialamong Grego nga si Epicurus mikaylap taliwala sa unang-siglong mga Kristohanon. Mao nga gihatagag pagtagad ni Pablo ang Epicureanhong doktrina: “Mangaon kita ug manginom, kay ugma kita mangamatay.” (1 Corinto 15:32) Dili motuo sa bisan unsang paglaom sa kinabuhi sa likod sa kamatayon, ang mga sumusunod sa pilosopo nagtuo nga ang unodnong kalipay mao ang bugtong o pangunang maayo sa kinabuhi. (Buhat 17:18, 32) Ang pilosopiyang Epicureanhon maoy makikaugalingon, matahapon, ug makapaubos gayod.
2. (a) Nganong peligroso kaayo ang dili pagtuo sa pagkabanhaw? (b) Sa unsang paagi gipalig-on ni Pablo ang pagtuo sa mga Kristohanon sa Corinto?
2 Dako ang nadahig niining dili pagtuo sa pagkabanhaw. Si Pablo nangatarongan: “Kon, sa pagkatinuod, walay pagkabanhaw sa mga patay, ni si Kristo gibangon. Apan kon si Kristo wala bangona, ang among pagwali tino nga kawang, ug ang atong pagtuo kawang. . . . Kon niining kinabuhia lamang kita naglaom diha kang Kristo, sa tanang tawo kita ang labing angay kaluy-an.” (1 Corinto 15:13-19) Oo, kon walay paglaom sa usa ka walay kataposang umaabot, ang Kristiyanidad mahimong “kawang.” Kini mahimong walay katuyoan. Nan, dili ikatingala nga ubos sa impluwensiya niining paganong panghunahuna, ang kongregasyon sa Corinto nahimong pugaran sa mga suliran. (1 Corinto 1:11; 5:1; 6:1; 11:20-22) Busa, si Pablo nagtinguha sa paglig-on sa ilang pagtuo sa pagkabanhaw. Migamit ug puwersadong katarongan, mga pangutlo sa Kasulatan, ug mga ilustrasyon, bug-os niyang napamatud-an nga ang paglaom sa pagkabanhaw dili tinukodtukod kondili usa ka kamatuoran nga seguradong matuman. Pinasukad niini, siya nakaawhag sa iyang isigkamagtutuo: “Magmalig-on, dili-matarog, nga kanunay may daghang buhaton diha sa buluhaton sa Ginoo, nga nahibalo nga ang inyong kahago dili kawang may kalabotan sa Ginoo.”—1 Corinto 15:20-58.
“Padayon sa Pagbantay”
3, 4. (a) Sumala kang Pedro, unsang peligrosong tinamdan ang molamoy sa uban sa kataposang mga adlaw? (b) Bahin sa unsa nga kinahanglan natong pahinumdoman ang atong kaugalingon?
3 Karon, daghan ang adunay negatibo, pagkinabuhi alang karong adlawa nga tinamdan. (Efeso 2:2) Sama gayod kini sa gitagna ni apostol Pedro. Siya naghisgot bahin sa “mga mabiaybiayon uban sa ilang mga pagbiaybiay . . . ug manag-ingon: ‘Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.’” (2 Pedro 3:3, 4) Kon ang matuod nga mga magsisimba nagpadaog sa maong panghunahuna, sila mahimong “dili-aktibo o dili-mabungahon.” (2 Pedro 1:8) Makalilipay, dili ingon niana ang kadaghanan sa katawhan sa Diyos karon.
4 Dili sayop nga mahimong maikagon sa umaabot nga kataposan sa presenteng daotang sistema. Hinumdomi ang kaikag nga gipakita sa mga apostoles mismo ni Jesus: “Ginoo, ipasig-uli mo ba ang gingharian sa Israel niining panahona?” Si Jesus mitubag: “Dili inyoha ang pagbatog kahibalo sa mga panahon o mga yugto sa panahon nga gikabutang sa Amahan sa iyang kaugalingong kamandoan.” (Buhat 1:6, 7) Kadtong mga pulonga adunay paninugdang nga mensahe nga iyang gipamulong diha sa Bukid sa mga Olibo: “Wala kamo mahibalo kon sa unsang adlawa moabot ang inyong Ginoo. . . . Sa takna nga wala ninyo hunahunaa nga kini mao, ang Anak sa tawo moabot.” (Mateo 24:42, 44) Kinahanglang pahinumdoman nato kanunay ang atong kaugalingon nianang tambaga! Ang uban tingali matental sa tinamdan, ‘Maayo segurong maghinayhinay akog diyutay ug dili na lang kaayo magkabalaka.’ Pagkadakong sayop niana! Palandonga si Santiago ug Juan, nga “Mga Anak sa Dalugdog.”—Marcos 3:17.
5, 6. Unsang mga leksiyon ang atong makuha gikan sa mga panig-ingnan ni Santiago ug Juan?
5 Kita nahibalo nga si Santiago maoy usa ka madasigon kaayong apostol. (Lucas 9:51-55) Sa dihang natukod ang Kristohanong kongregasyon, dayag nga aktibo kaayo siya. Apan sa bata pa kaayo si Santiago, gipapatay siya ni Herod Agripa I. (Buhat 12:1-3) Sa ato kahang hunahuna si Santiago, sa pagkakita nga matapos ug kalit ang iyang kinabuhi, naguol nga siya nagmadasigon kaayo, nga nagkugi sa iyang ministeryo? Dili gayod! Seguradong nalipay siya nga nagugol niya ang labing maayong mga tuig sa iyang may pagkamubo nga kinabuhi diha sa pag-alagad kang Jehova. Karon, walay usa kanato ang makahibalo kon ang atong kinabuhi matapos ug kalit. (Ecclesiastes 9:11; itandi ang Lucas 12:20, 21.) Busa maalamon gayod nga kita magpabiling madasigon ug aktibo kaayo sa pag-alagad kang Jehova. Nianang paagiha atong mahuptan ang atong maayong ngalan uban kaniya ug padayong magkinabuhi uban sa atong walay kataposang palaaboton.—Ecclesiastes 7:1.
6 Adunay nalangkit nga leksiyon labot kang apostol Juan, kinsa presente sa dihang mainitong miagda si Jesus, “Padayon sa pagbantay.” (Mateo 25:13; Marcos 13:37; Lucas 21:34-36) Gipatalinghogan kana ni Juan, nga nag-alagad nga masiboton sa daghang dekada. Sa pagkamatuod, mopatim-aw nga siya ang nagpabiling-buhi sa tanang ubang mga apostoles. Sa dihang tigulang na kaayo si Juan, nga nakatan-aw ug balik sa daghang katuigan sa matinumanong kalihokan, naglantaw ba siya niini nga usa ka sayop, dili hustong pagkatultol o dili-timbang nga kinabuhi? Wala gayod! Siya maikagon gihapon kaayong nagtan-aw sa umaabot. Sa dihang ang nabanhawng Jesus miingon, “Oo; ako moabot sa madali,” si Juan dihadihang mitubag, “Amen! Umari ka, Ginoong Jesus.” (Pinadayag 22:20) Si Juan dayag nga wala magkinabuhi sa presente, nga nangandoy ug mahinay ug kalmadong ‘normal nga kinabuhi.’ Siya determinadong magpadayon sa pag-alagad uban sa tanan niyang kinabuhi ug kusog, bisan kanus-a moabot ang Ginoo. Kita komosta?
Mga Basehanan sa Pagtuo sa Kinabuhing Walay Kataposan
7. (a) Sa unsang paagi ang paglaom sa kinabuhing walay kataposan ‘gisaad sa wala pa ang kapanahonan nga dugay nang naglungtad’? (b) Sa unsang paagi gipatin-aw ni Jesus ang paglaom sa kinabuhing walay kataposan?
7 Makasalig ka nga ang paglaom sa kinabuhing walay kataposan dili maoy usa ka hinimog-tawo nga damgo o handurawan. Sumala sa giingon sa Tito 1:2, ang atong diyosnong debosyon gipasukad “sa paglaom sa kinabuhing walay-kataposan nga gisaad sa Diyos, si kinsa dili makabakak, sa wala pa ang kapanahonan nga dugay nang naglungtad.” Maoy orihinal nga katuyoan sa Diyos nga ang tanang masinugtanong katawhan mabuhi sa walay kataposan. (Genesis 1:28) Walay bisan unsa, dili bisan ang pagrebelde ni Adan ug Eva, ang makababag niini nga katuyoan. Ingon sa narekord sa Genesis 3:15, ang Diyos dihadihang nagsaad ug usa ka “binhi” nga mowagtang sa tanang kadaot nga napahamtang diha sa katawhan. Sa dihang ang “binhi” o Mesiyas, si Jesus, miabot, iyang gihimo ang paglaom sa kinabuhing walay kataposan nga usa sa iyang pangunang mga pagtulon-an. (Juan 3:16; 6:47, 51; 10:28; 17:3) Pinaagi sa paghalad sa iyang hingpit nga kinabuhi ingong lukat, nabatonan ni Kristo ang legal nga katungod sa paghatag ug kinabuhing walay kataposan diha sa katawhan. (Mateo 20:28) Ang uban sa iyang mga tinun-an, 144,000 ang tanan, mabuhing walay kataposan diha sa kalangitan. (Pinadayag 14:1-4) Sa ingon ang pipila sa madunot nga mga tawo “magsul-ob ug pagkadili-madunoton”!—1 Corinto 15:53.
8. (a) Unsa ang “pagkadili-madunoton,” ug nganong gihatag kini ni Jehova ngadto sa 144,000? (b) Unsang paglaom ang gitanyag ni Jesus alang sa “ubang mga karnero”?
8 Ang “pagkadili-madunoton” nagkahulogan ug labaw pa kay sa yanong pagkadili na gayod mamatay. Nalangkit niini ang “gahom sa usa ka dili-malaglag nga kinabuhi.” (Hebreohanon 7:16; itandi ang Pinadayag 20:6.) Apan, unsay nakab-ot sa Diyos sa paghatag sa maong talagsaong gasa? Hinumdomi ang hagit ni Satanas nga walay usa sa mga linalang sa Diyos ang mahimong kasaligan. (Job 1:9-11; 2:4, 5) Pinaagi sa paghatag sa 144,000 ug pagkadili-madunoton, gipakita sa Diyos ang iyang bug-os nga pagsalig niining grupoha nga sa pagkatalagsaon nakatubag sa hagit ni Satanas. Apan komosta ang nahibilin sa katawhan? Gisultihan ni Jesus ang unang mga sakop niining “gamayng panon” sa mga manununod sa Gingharian nga sila “molingkod sa mga trono aron sa paghukom sa napulog-duha ka tribo sa Israel.” (Lucas 12:32; 22:30) Kini nagpaila nga ang uban makadawat ug kinabuhing walay kataposan dinhi sa yuta ingong mga sakop sa iyang Gingharian. Samtang kining “ubang mga karnero” wala hatagig pagkadili-madunoton, sila makadawat ug “kinabuhing walay-kataposan.” (Juan 10:16; Mateo 25:46) Sa ingon ang kinabuhing walay-kataposan maoy paglaom sa tanang Kristohanon. Dili kini handurawan kondili maoy usa ka butang nga bug-os “nga gisaad sa Diyos, si kinsa dili makabakak,” ug gibayran sa bililhong dugo ni Jesus.—Tito 1:2.
Sa Halayo Pang Umaabot?
9, 10. Unsa ang tin-awng mga ilhanan nga kita duol na sa kataposan?
9 Si apostol Pablo nagtagna nga ang “makuyaw nga mga panahong lisod sagubangon” magpaila nga kita miabot na sa dili-ikalalis nga “kataposang mga adlaw.” Samtang ang tawhanong katilingban sa atong palibot mangahugno diha sa kahimtang sa pagkawalay-gugma, kahakog, pagtagbaw-sa-kaugalingon, ug pagkadili-diyosnon, wala ba kita makaamgo nga ang adlaw ni Jehova sa pagpahamtang sa iyang mga paghukom niining daotang sistema sa kalibotan duol na kaayo? Samtang nagakadaghan ang kapintasan ug pagdumot, dili ba nakita nato sa atong tanang palibot ang katumanan sa dugang mga pulong ni Pablo: “Ang mga tawo nga tuman-kadaotan ug mga impostor mosamot pa kangil-ad”? (2 Timoteo 3:1-5, 13) Ang uban malaomong mosinggit ug “Kalinaw ug kasegurohan,” apan ang tanang mga palaaboton sa kalinaw mahanaw, kay “ang kalit nga kalaglagan modangat dihadiha kanila ingon sa pag-ul-ol sa kasakit sa usa ka babayeng mabdos; ug sila dili gayod makaikyas.” Kita wala pasagdi diha sa kangitngit kon bahin sa kahulogan sa atong mga panahon. Busa, “managtukaw kita ug managhupot sa atong panimuot.”—1 Tesalonica 5:1-6.
10 Dugang pa, ang Bibliya nagpaila nga ang kataposang mga adlaw maoy “mubo nga yugto sa panahon.” (Pinadayag 12:12; itandi ang 17:10.) Ang kadaghanan nianang “mubo nga yugto” dayag nga milabay na. Ang tagna ni Daniel, pananglitan, tukmang nagbatbat sa gubat tali “sa hari sa amihanan” ug “sa hari sa habagatan” nga miabot hangtod niining sigloha. (Daniel 11:5, 6) Ang nabilin na lang nga pagatumanon pa mao ang kataposang pag-atake “sa hari sa amihanan,” nga gihubit diha sa Daniel 11:44, 45.—Tan-awa Ang Bantayanang Torre sa Hulyo 1, 1987, ug Nobyembre 1, 1993, alang sa panaghisgot bahin niining tagnaa.
11. (a) Sa unsang sukod natuman ang Mateo 24:14? (b) Unsay gipaila sa mga pulong ni Jesus nga narekord sa Mateo 10:23?
11 Anaa usab ang tagna ni Jesus nga “kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Karon, ginahimo sa mga Saksi ni Jehova ang ilang buluhaton diha sa 233 ka kayutaan, mga grupo sa kaislahan, ug mga teritoryo. Matuod, aduna pa gihapoy mga teritoryo nga wala pa mataak, ug tingali sa tinudlong panahon ni Jehova, ang pultahan sa higayon mobukas. (1 Corinto 16:9) Bisan pa, ang mga pulong ni Jesus nga narekord sa Mateo 10:23 makapahinuklog: “Dili gayod ninyo makompleto ang libot nga rota sa mga siyudad sa Israel hangtod moabot ang Anak sa tawo.” Samtang ang maayong balita tino nga igapahayag sa tibuok yuta, dili nato maabot mismo ang tanang bahin sa yuta uban sa mensahe sa Gingharian sa dili pa “moabot“ si Jesus ingong Tiglaglag.
12. (a) Unsang ‘pagpanimbre’ ang gipunting sa Pinadayag 7:3? (b) Unsay kahulogan sa nagkadiyutayng gidaghanon sa mga dinihogan sa yuta?
12 Palandonga ang teksto sa Pinadayag 7:1, 3, nga nag-ingon nga ang “upat ka hangin” sa kalaglagan gikuptan “hangtod nga amo nang mahuman ug timbri ang mga ulipon sa atong Diyos sa ilang mga agtang.” Kini wala magpunting sa unang pagpanimbre, nga nahitabo sa dihang nadawat niadtong sakop sa 144,000 ang langitnong pagpanawag. (Efeso 1:13) Kini nagpunting sa kataposang pagpanimbre, sa dihang sila tino nga nailhan ingong nasulayan ug matinumanong “mga ulipon sa atong Diyos.” Ang gidaghanon sa tinuod nga dinihogang mga anak sa Diyos nga buhi dinhi sa yuta nagkadiyutay na kaayo. Dugang pa, ang Bibliya tin-awng nag-ingon nga “gumikan sa mga pinili” kanang unang yugto sa dakong kasakitan “pagapamub-on.” (Mateo 24:21, 22) Ang kadaghanan sa nangangkong dinihogan maoy mga tigulang na. Dugang pa, dili ba kini nagtimaan nga duol na ang kataposan?
Usa ka Matinumanong Magbalantay
13, 14. Unsa ang responsibilidad sa magbalantay nga matang?
13 Kasamtangan, maayong atong patalinghogan ang pagtultol nga gihatag sa ‘kasaligan nga ulipon.’ (Mateo 24:45) Sa kapin sa usa ka gatos ka tuig, ang modernong-adlawng “ulipon” matinumanong nag-alagad ingong “magbalantay.” (Ezequiel 3:17-21) Ang Bantayanang Torre sa Enero 1, 1984, nagbatbat: “Ang maong magbalantay nagapaniid sa unsang paagi ang mga hitabo nagakaugmad sa yuta ingong katumanan sa tagna sa Bibliya, nagapasidaan sa umaabot nga ‘dakong kasakitan ingon nianang wala pa mahitabo sukad sa sinugdan sa kalibotan’ ug nagamantala sa ‘maayong balita sa butang mas maayo.’”—Mateo 24:21; Isaias 52:7.
14 Hinumdomi: Buluhaton sa magbalantay ang pagsinggit sa “iyang makita.” (Isaias 21:6-8) Sa panahon sa Bibliya ipalanog sa magbalantay ang pasidaan bisan pag ang posibleng kapeligrohan layo pa kaayo nga dili klarong mailhan. (2 Hari 9:17, 18) Sa pagkamatuod may sayop nga mga pagsinggit ang nahitabo sa maong panahon. Apan ang usa ka maayong magbalantay dili magpanuko tungod sa kahadlok nga maulawan. Kon ang imong balay nagakasunog, unsa kahay imong bation kon walay miabot nga bombero tungod kay nagtuo sila nga basin ug sayop nga pasidaan kadto? Dili, kita nagpaabot nga mosanong dihadiha ang maong mga tawo sa bisan unsang timaan sa kapeligrohan! Sa samang paagi, ang magbalantay nga matang namulong kon gikinahanglan sa mga kahimtang.
15, 16. (a) Nganong adunay gihimong mga pagpasibo sa atong pagsabot sa tagna? (b) Unsay atong makat-onan gikan sa matinumanong mga alagad sa Diyos nga nasayop sa pagsabot sa pipila ka tagna?
15 Apan, sa nagkaugmad ang mga hitabo, ang atong pagsabot sa tagna mas mitin-aw. Ang kasaysayan nagpakita nga talagsa ra, kon mahitabo man, nga bug-os nga nasabtan ang mga tagna nga gikan sa Diyos una pa ang katumanan niini. Gisultihan sa Diyos si Abram kon unsa ka dugay nga ang iyang binhi mahimong “dumuloong sa usa ka yuta nga dili ila,” nga mao, 400 ka tuig. (Genesis 15:13) Apan, si Moises wala-sa-panahong nagtanyag sa iyang kaugalingon ingong manluluwas.—Buhat 7:23-30.
16 Palandonga usab ang mga tagna bahin sa Mesiyas. Agig paghinumdom daw tin-aw kaayo nga ang kamatayon ug pagkabanhaw sa Mesiyas gitagna. (Isaias 53:8-10) Bisan pa, ang mga tinun-an mismo ni Jesus wala makasabot niining kamatuorana. (Mateo 16:21-23) Sila wala makasabot nga ang Daniel 7:13, 14 matuman sa panahon sa umaabot nga pa·rou·siʹa, o “pagkaanaa,” ni Kristo. (Mateo 24:3) Busa sila nasayop ug 2,000 ka tuig sa ilang kalkulasyon sa dihang nangutana sila kang Jesus: “Ginoo, ipasig-uli mo ba ang gingharian sa Israel niining panahona?” (Buhat 1:6) Bisan human nga natukod nag maayo ang Kristohanong kongregasyon, padayong nanagpanungha ang sayop nga mga ideya ug dili-tukmang mga pagpaabot. (2 Tesalonica 2:1, 2) Bisan tuod ang pipila usahay adunay sayop nga mga hunahuna, dayag nga gipanalanginan ni Jehova ang buluhaton sa unang-siglong mga magtutuo!
17. Unsa ang angay natong panglantaw bahin sa mga pagpasibo sa atong pagsabot sa Kasulatan?
17 Kinahanglang ipatin-aw usab sa magbalantay nga matang karon ang mga hunahuna niini matag karon ug unya. Apan, may makaduhaduha ba nga gipanalanginan ni Jehova ang ‘kasaligan nga ulipon’? Gawas pa, kon sabton sumala sa konteksto, dili ba halos ang mga pagpasibo nga nahitabo diyutay ra kaayo? Ang atong paninugdang pagsabot sa Bibliya wala mausab. Ang atong pagtuo nga kita nagkinabuhi na sa kataposang mga adlaw labi pang nalig-on karon!
Pagkinabuhi Alang sa Usa ka Walay Kataposang Umaabot
18. Nganong maglikay kita sa pagkinabuhi alang sa karon lamang?
18 Ang kalibotan mahimong moingon, ‘Mangaon kita ug manginom, kay ugma kita mangamatay,’ apan dili angay nga mahimong ingon niini ang atong tinamdan. Nganong maningkamot sa walay kapuslanan sa mga kalingawang imong makuha sa kinabuhi karon samtang makapanlimbasog ka alang sa usa ka walay kataposang umaabot? Kana nga paglaom, dili-madunoton man nga kinabuhi sa langit o kinabuhing walay kataposan dinhi sa yuta, dili damgo, ni handurawan. Tinuod gayod kini nga gisaad sa Diyos “si kinsa dili makabakak.” (Tito 1:2) Daghan kaayo ang pamatuod nga ang katumanan sa atong paglaom duol na! “Ang panahong nabilin mubo na.”—1 Corinto 7:29.
19, 20. (a) Unsay paglantaw ni Jehova sa mga pagsakripisyo nga atong ginahimo alang sa Gingharian? (b) Nganong magkinabuhi kita uban ang walay kataposang palaaboton?
19 Tinuod, kining sistemaha mas nakalungtad nag dugay kay sa gituohan sa daghan. Ang pipila tingali karon nagtuo nga kon nahibaloan lang unta nila kini sa una pa, dili unta sila maghimog pipila ka mga pagsakripisyo. Apan ang usa dili angay magbasol nga nakahimog pagsakripisyo. Gawas pa, ang pagsakripisyo maoy usa ka paninugdang bahin sa pagkahimong usa ka Kristohanon. Ang mga Kristohanon ‘nagadumili sa pag-angkon sa ilang kaugalingon.’ (Mateo 16:24) Dili gayod kita angay mobati nga ang atong mga paningkamot sa pagpahimuot sa Diyos walay kapuslanan. Si Jesus nagsaad: “Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod ug alang kanako ug tungod ug alang sa maayong balita nga dili makabaton ug usa ka gatos ka pilo karon . . . ug sa umaabot nga sistema sa mga butang kinabuhing walay-kataposan.” (Marcos 10:29, 30) Usa ka libo ka tuig sukad karon, unsa ba ka hinungdanon ang imong trabaho, balay, o pondo sa bangko? Bisan pa, ang mga pagsakripisyo nga imong nahimo alang kang Jehova mahimong makahuloganon sa milyonmilyong katuigan gikan karon—bilyonbilyong katuigan gikan karon! “Kay ang Diyos dili usang dili-matarong nga kalimtan ang inyong buhat.”—Hebreohanon 6:10.
20 Busa, magkinabuhi kita uban sa walay kataposang palaaboton, nga magatutok sa atong mga mata, “dili sa mga butang makita, kundili sa mga butang nga dili-makita. Kay ang mga butang nga makita lumalabay, apan ang mga butang nga dili-makita walay-kataposan.” (2 Corinto 4:18) Si manalagnang Habacuc nagsulat: “Ang panan-awon maoy alang sa tinudlong panahon, ug kini nagadali paingon sa kataposan, ug kini dili magbakak. Bisan kini malangan, padayon sa pagpaabot niini; kay kini moabot gayod. Kini dila magalangan.” (Habacuc 2:3) Sa unsang paagi ang ‘pagpadayon sa pagpaabot’ sa kataposan makaapektar sa paagi sa pagtuman sa atong mga responsibilidad sa personal ug sa pamilya? Hisgotan kining mga butanga sa among sunod nga mga artikulo.
Mga Punto Alang sa Repaso
◻ Sa unsang paagi ang pipila karon naapektohan sa daw nalangan nga pag-abot sa kataposan niining sistema sa mga butang?
◻ Unsa ang basehanan sa atong paglaom sa kinabuhing walay kataposan?
◻ Unsa ang angay natong panglantaw sa mga pagsakripisyo nga atong ginahimo alang sa intereses sa Gingharian?
[Kapsiyon sa panid 15]
Ang tibuok-kalibotang buluhatong pagsangyaw kinahanglang matapos sa dili pa moabot ang kataposan