Pagpakaylap sa Kahumot sa Kahibalo sa Diyos

“Salamat sa Diyos nga kanunayng nagatultol kanato diha sa usa ka madaogong parada uban kang Kristo ug nagpakaylap sa kahumot sa kahibalo mahitungod kaniya pinaagi kanato diha sa tanang dapit!”—2 CORINTO 2:14.

1. Unsang kahumot ang atong gihisgotan dinhi, ug sa unsang paagi ang pribilehiyo sa pagpakaylap niini pagalantawon?

SIMHOT, simhot! Um-m-m-m! Nasimhot ba nimo ang matam-is nga kahumot? Kami wala maghisgot dinhi bahin sa kahumot sa nagabuswak nga kabulakan kondili, hinunoa, sa usa ka malarawanong kahumot nga nagagikan sa labing pinili nga mga sinulat sa yuta. Kining mga sulata wala magagikan sa yanong mga tawo kondili kini maoy malarawanong pungpong sa mga bulak nga dinasig sa Usa nga naglalang usab sa mahumot nga kabulakan nga nagadayandayan sa yuta. Ang pribilehiyo sa pagpakaylap niini nga kahumot sa kahibalo sa Diyos maoy usa ka dakong bahandi. Oo, kini maoy usa ka pag-alagad nga ilabinang bililhon—wala mabatoni sa tanan, wala ambiti sa katawhan sa katibuk-an.

2. Kanus-a ang mga disipulo ni Kristo misugod sa pagpakaylap sa malarawanong kahumot, ug uban sa unsang resulta?

² Kining bililhong bahandi gitugyan diha sa mga tinun-an ni Kristo sa dihang sila gipailaila ngadto sa usa ka aktibong pag-alagad kang Jehova nga Diyos sa adlaw sa Pentekostes sa tuig 33 sa atong Kumong Panahon. Napuno sa balaang espiritu, sila misugod sa pagpakaylap sa usa ka malarawanong kahumot, nagapatin-aw “sa kahibulongang mga butang sa Diyos.” (Buhat 2:1-4, 11) Pinaagi kanila ang kahumot sa kahibalo sa Diyos mahiadto sa uban, dili lamang ngadto sa sirkunsado lumad nga mga Hudiyo kondili ngadto sa dili-sirkunsadong mga nasod, mga tribo, katawhan, ug mga pinulongan. (Buhat 10:34, 35) Ang matuod nga mga tinun-an naglantaw niini nga pag-alagad nga labi pang bililhon kay sa tanang materyal nga bahandi nga ginatigom sa mga tawo alang sa ilang kaugalingon.

3. Ngadto sa unsang sukod gihimo ang buluhatong pagpakaylap sa kahumot sa kahibalo sa Diyos, ug unsang pangutana ang angay natong ibangon sa atong kaugalingon?

³ Karong adlawa, ang dakong buluhaton sa pagpakaylap sa kahumot sa kahibalo sa Diyos ginabuhat sa tibuok yuta—diha sa usa ka sukod nga mas dako pa sukad masukad sa tawhanong kasaysayan. Kini naglakip sa pagsangyaw sa tanang katawhan mahitungod sa karong natukod na nga Gingharian sa Diyos ubos sa iyang tinudlong Hari, si Jesu-Kristo. (Mateo 6:10; Buhat 1:8) Gilantaw ba nimo ang pag-alagad sa pagmantala sa Hari ug sa iyang Gingharian ingong usa ka hamili kaayong bahandi? Si Jesu-Kristo, nga maoy nanguna sa pagsangyaw sa maayong balita niana nga Gingharian, nagpabili niini nianang paagiha, naghatag ug sumbanan.—Mateo 4:17; 6:19-21.

Pagpahumot sa Dalan sa Madaogong Parada

4. Sumala sa 2 Corinto 2:14, sa unsang paagi ang Diyos karon nagatultol sa iyang mga alagad sa yuta, ug unsang karaang batasan ang gipunting sa mga pulong ni Pablo?

⁴ Nganong ang pag-alagad sa Diyos maoy usa ka butang nga pakahamilion? Usa ka katarongan mao nga bisan karon kadtong nag-alagad kang Jehova adunay talagsaong pribilehiyo nga tultolan sa Diyos ngadto sa usa ka dako madaogong parada. Sumala sa New International Version, ang 2 Corinto 2:14 nag-ingon: “Salamat sa Diyos, nga kanunayng nagtultol kanato sa madaogong parada diha kang Kristo ug pinaagi kanato napakaylap sa tanang dapit sa kahumot sa kahibalo kaniya [“naghimo sa atong kahibalo kaniya nga mapakaylap sa tibuok yuta sama sa usa ka madanihong pahumot!” Phillips].” Kadtong mga pulonga ni apostol Pablo mopatim-aw nga nagpunting sa usa ka karaang batasan sa mga parada sa kadaogan.a

5, 6. (a) Unsay mahitabo sa panahon sa madaogong parada sa karaang Roma, ug unsa ang kahulogan sa matam-is nga kahumot alang sa nagkalainlaing mga tawo? (b) Unsa ang espirituwal nga aplikasyon sa ilustrasyon sa 2 Corinto 2:14-16?

⁵ Sa mga adlaw sa Romanhong republika, ang usa sa labing taas nga pasidungog nga ikahatag sa Senado diha sa usa sa nagmadaogong heneral mao ang pagtugot kaniya sa pagsaulog sa iyang kadaogan pinaagi sa ka maluhong parada sa kadaogan. Ang Romanhong parada hinay nga moagi diha Via Triumphalis ug patungas sa nag-ikis-ikis nga dalan ngadto sa templo ni Jupiter ibabaw sa Bungtod Capitoline. Ang mga hari, mga prinsipe, ug mga heneral nga nabihag sa gubat, uban sa ilang mga anak ug mga katabang, nag-uban nga kinadenahan, sagad gihuboan, alang sa ilang kaparotan ug kaulawan.

⁶ Samtang moagi ang parada sa siyudad sa Roma, ang mga tawo mangitsa ug mga bulak sa atubangan sa karwahi sa mangdadaog, ug ang nagsunog nga insenso nagpahumot sa tibuok nga rota. Kining matam-is nga kahumot nagkahulogan ug kadungganan ug labi pang lig-on nga kinabuhi alang sa madaogong mga sundalo. Apan kini nagkahulogan ug kamatayon ngadto sa wala-pasayloa nga mga bihag nga pamatyon inigkahuman sa parada. Kini naghatag kahayag sa espirituwal nga aplikasyon sa ilustrasyon ni Pablo diha sa 2 Corinto 2:14-16. Kana nga hulagway naghawas kang Pablo ug kaubang mga Kristohanon ingong debotadong mga sakop sa Diyos, “uban kang Kristo,” ang tanan nagasunod kaniya diha sa madaogong parada sa Diyos ug gipangunahan Niya diha sa dako madaogong parada ubay sa nangalimyong rota.

Ang Kahumot sa Kinabuhi o ang Kabaho sa Kamatayon

7, 8. (a) Sa unsang paagi gipakaylap sa mga Saksi ni Jehova ang matam-is nga kahumot sa kahibalo sa Diyos? (b) Samtang gipakaylap sa mga Saksi ni Jehova ang malarawanong kahumot, unsay pagsanong sa mga tawo nga ginaluwas? (c) Unsay pagsanong sa mga tawong nagakalaglag?

⁷ Pinaagi sa pagpakaylap sa tanang dapit sa mga kamatuoran sa Bibliya mahitungod sa Gingharian sa Diyos ubos ni Kristo, ang mga Saksi ni Jehova nagapakaylap, nagapasundayag, ug nagabutyag bisan diin sa mahumot nga kaamyon sa kahibalo sa mapuanguron nga Diyos kansang kamatuoran nagpagawas kanila gikan sa bakak nga relihiyon. Sila madaogong nagmartsa diha sa pag-alagad kang Jehova. Ang ilang mga halad sa pag-alagad ingong iyang mga Saksi ug sa iyang Hari nahisamag humot nga insenso kang Jehova. Sa ingon, kita makaapresyar kon unsay buot ipasabot sa apostol sa dihang siya miingon: “Alang sa Diyos kita ang kahumot ni Kristo sa taliwala kanila nga ginaluwas ug kanila nga nagakalaglag; alang sa naulahi ingon nga baho sa kamatayon ngadto sa kamatayon, ug sa nahauna ingon nga kahumot sa kinabuhi ngadto sa kinabuhi [“usa ka hinungdanong kahumot nga mohatag ug kinabuhi,” The New English Bible; “ang makapalagsik nga kahumot sa kinabuhi mismo,” Phillips].”—2 Corinto 2:15, 16.

⁸ Ang matinud-anong mga tawo nga samag-karnero nga disposisyon nakatilaw sa katam-is sa kahibalo ni Jehova nga gipakaylap sa iyang mga Saksi. Alang niining klaseha sa mga tawo ang pagsangyaw nga buluhaton adunay kaamyon sa maayong panglawas ug kinabuhi, sa pagkinabuhi, sa nagahatag-ug-kinabuhi nga kamatuoran. Sila nagapasalamat kang Jehova ug sa iyang Hari, kansang madaogong parada sila nagaapil, ug sa makusog nagasinggit: “Ang kaluwasan nautang nato gikan sa atong Diyos, nga naglingkod sa trono, ug sa Kordero.” (Pinadayag 7:10) Sila nagaginhawa sa atmospera sa kamatuoran sa Gingharian, nga maoy makapalagsik nga kahumot sa kinabuhi nga motultol sa kinabuhi. Apan gidaot ni Satanas ug sa iyang mga demonyo ang mga gahom sa panimaho niadtong nagapabilin sa bakak nga relihiyon, mao nga ilang gisap-ongan ang ilang mga ilong ug mayubitong nagadumili sa kamatuoran. Alang “kanilang nagakalaglag,” ang kamatuoran ug ang matinumanong mga magdadala niini nagpakaylap ug baho sa kamatayon nga motultol sa kamatayon. O sama sa pagkapahayag niini sa New International Version: “Alang kanila kita maoy mga baho sa kamatayon.” Ang Phillips nga hubad naghubad niini: “Alang sa naulahi kini daw sama sa makamatayng baho sa kalaglagan.”

9. Unsang pangutana karon ang gibangon ni Pablo, ug unsaon nimo pagtubag, ug ngano?

⁹ “Ug kinsa ang angay niining mga butanga?” ang apostol nangutana. (2 Corinto 2:16) Sa ato pa, “ug kinsa ang kuwalipikado sa buluhaton nga sama niini?” (The Jerusalem Bible) “Ug alang sa maong pag-alagad nga sama niini kinsa ang takos?” (Weymouth) Ang tubag sa Kasulatan mao: Ang mga Saksi ni Jehova! Ngano? Tungod kay ang dedikadong mga tawo lamang kinsa matinud-anon, sinsero, ug wala mangitag mahakogong ganansiya ug kinsa nagasulti sa kamatuoran, sa matin-aw ug sa walay pagkompromiso uban sa bakak nga relihiyon, mao ang kuwalipikado alang niining buluhatona sa pagpakaylap sa kahumot sa kahibalo sa Diyos.—Colosas 1:3-6, 13; 2 Timoteo 2:15.

10. Nganong ang mga klero dili kuwalipikado sa buluhaton sa pagpakaylap sa kahumot sa kahibalo sa Diyos?

¹⁰ Ang mga klero sa Kakristiyanohan, kinsa nagapangitag maayong baroganan niining kalibotana, napakyas sa pagkahimong kuwalipikado ug takos alang niining dili-mahakogong pag-alagad. Ngano? Tungod kay sila napakyas sa pagkab-ot sa kinahanglanon nga gipaila sa pulong ni Pablo: “Kami dili mga magbabaligya sa pulong sa Diyos sama sa kadaghanang mga tawo, apan uban sa katim-os, oo, ingong mga pinadala sa Diyos, ubos sa panan-aw sa Diyos, diha kang Kristo, kami nagapanulti.” (2 Corinto 2:17) O sama sa pagkapahayag niini sa New International Version: “Dili sama sa kadaghanan, wala namo ibaligya ang pulong sa Diyos alang sa ganansiya. Hinunoa, diha kang Kristo kami nagasulti atubangan sa Diyos uban ang katim-os, samag mga tawo nga pinadala sa Diyos.”

11, 12. (a) Nganong ang mga Saksi ni Jehova dili “magbabaligya sa pulong sa Diyos” tungod sa pagdawat ug mga amot? (b) Lahi sa sinambogang bersiyon sa Kristiyanidad nga gipalit sa daghan, unsay ginapresentar sa mga Saksi ni Jehova?

¹¹ Ang mga Saksi ni Jehova pinadala sa Diyos, ug sila nagabuhat sa ilang pagsangyaw nga buluhaton ubos sa panan-aw sa Diyos. Samtang sila nagatagana ug bililhong mga libro ug ubang mga publikasyon nga nagpatin-aw sa Pulong sa Diyos ug nagadawat sa boluntaryong mga amot alang sa tibuok yutang buluhatong pagsangyaw sa Gingharian, ang maong buhat dili maoy pagpamaligya o pagsambog sa Pulong sa Diyos. Sa pagkamatuod, ang maong mga amot sa yano maoy tabang sa pagpakaylap sa kahibalo sa Diyos ngadto sa uban.

¹² Daghan kaayo karong adlawa, nahibalo o wala mahibalo, nagapalit ug sinambogang bersiyon sa Kristiyanidad, tungod kay kini mohaom sa ilang hakog nga mga tinguha ug dili makapiot sa ilang paagi sa kinabuhi. Sila nagtuo nga gidawat sila sa Diyos tungod sa ilang pangangkon nga sila adunay gugma kaniya diha sa ilang mga kasingkasing. Apan, sa dihang ang Pulong sa Diyos makita nga sukwahi sa ilang mga pagtuo ug paggawi, ilang tuison ang mga Kasulatan aron ipataas ang kaugalingong mga opinyon ibabaw sa hustong pagsabot sa Bibliya. (Mateo 15:8, 9; 2 Pedro 3:16) Apan ang mga Saksi ni Jehova nagapresentar sa putli, walay-sambog nga kamatuoran gikan sa Bibliya, sa ingon nagapatunghag usa ka matam-is nga kahumot nga madawat sa Diyos ug sa iyang matuod nga mga magsisimba. Mao nga ilang gisalikway ang tanang relihiyosong mga tradisyon ug mga kababagan aron mabatonan ang matuod nga kahibalo sa Diyos.

13. Kinsa, gawas sa dinihogang mga Kristohanon, ang anaa sa madaogong parada sa Diyos, ug unsay gibuhat nila bisan asa sila moadto?

¹³ Sa pagkamatuod, ang pagkaanaa sa madaogong parada sa Diyos uban kang Kristo maoy usa ka dili-ikatandi nga pribilehiyo nga gitagamtam dili lamang sa dinihogang mga Kristohanon kondili sa “dakong panon” usab sa “ubang karnero” bisan karon, kay ang kadaogan sa Gingharian haduol na. (Pinadayag 7:4, 9; Juan 10:16) Samtang atong ginapaabot ang dugang pa nga kadaogan sa atong nagmadaogong Hari, bisan asa kita moadto atong ginapakaylap ang nagahatag-ug-kinabuhi nga kahibalo sa Diyos nga samag pahumot, o mahalong insenso, alang sa mga tawo kansang mga kasingkasing nangandoy sa kamatuoran ug pagkamatarong. Pagkadakong pribilehiyo alang niadtong takos alang niining talagsaong buluhaton!—Juan 17:3; Colosas 3:16, 17.

Awtorisado nga Mahimong mga Tigpahumot

14. Nganong kadtong nagapakaylap sa kahumot sa kahibalo sa Diyos wala magkinahanglag sertipiko sa awtorisasyon gikan sa mga tawo?

¹⁴ Apan kadto bang nagapakaylap sa kahumot sa kahibalo sa Diyos ug sa iyang Gingharian nagkinahanglag diploma o sertipiko sa awtorisasyon gikan sa mga tawo? Dili! Kita maoy sinugo na, o tinudlo, ingong mga Saksi alang sa Supremong Usa sa uniberso. Busa, kita kinahanglang dili magpanuko sa paggawas sa kanataran sa pagpakaylap sa kahumot sa maayong balita sa Gingharian sa Diyos. Isilsil sa hunahuna nga si Jehova ang nagatultol kanato. Ang ministeryo ni Jesus gihimo bisan pa sa “pagsupak sa mga makasasala.” (Hebreohanon 12:3) Apan, ang rekord ni Jesus sa kalihokan sa kanataran, ingon sa makita sa Bibliya, matuod gihapon, ug ang iyang buluhaton sa kanataran nagahatag ug maayong komendasyon kaniya ug nangatarongan nga pabor sa iyang pagkahimong usa ka matuod nga ministro ni Jehova nga Diyos.

15. Giunsa pagpakita ni apostol Pablo nga ang matuod nga mga Kristohanon wala magkinahanglag “mga sulat sa rekomendasyon”?

¹⁵ Si apostol Pablo nakaatubang ug samang mahagitong situwasyon sa iyang panahon pinaagi sa paghatag niini nga argumento: “Nagsugod na ba usab kita sa pagrekomendar sa atong kaugalingon? O kita ba, tingali, sama sa ubang mga tawo, nagkinahanglag mga sulat sa rekomendasyon nganha kaninyo o gikan kaninyo? Kamo mismo mao ang among sulat, nga nakulit diha sa among mga kasingkasing ug nahibaloan ug ginabasa sa tanang mga tawo. Kay kamo nagpakita nga usa ka sulat kang Kristo nga gisulat pinaagi kanamo ingong mga ministro, sinulat dili sa tinta kondili sa espiritu sa buhi nga Diyos, dili diha sa mga papan nga bato, kondili sa unodnong mga papan, diha sa mga kasingkasing.”—2 Corinto 3:1-3.

16. Unsang matanga sa sulat ang gipresentar sa mga Saksi ni Jehova ingong gipahayag nga pamatuod nga ang ilang ministeryo gikan sa Diyos?

¹⁶ Ang kalibotanong mga awtoridad dili modawat sa atong pagkasinugo ingong mga Saksi ni Jehova. Apan pasagdi nga ang atong buluhaton sa pagpakaylap sa kahumot sa kahibalo ni Jehova ang mosulti mismo! Kining buluhatona dili gayod mapala, bisan pag ang ubang mga tawo modumili sa pagbasa niining gipahayag nga pamatuod sa atong ministeryo. Ang mga klero mopresentar sa ilang mga sertipiko gikan sa klerikanhong mga lawas nga nagamando. Apan, kana hinunoa, maoy mga piraso sa papel nga walay kapuslanan, mga pulong sa tawo. Ang mga Saksi ni Jehova, gawas pa nga nagkutlo ug kalig-onan gikan sa Pulong sa Diyos, nagbarog ingong mga pamatuod diha sa unod ug dugo. Ang dakong panon sa ubang karnero kinsa naabot sa maayong balita sa Gingharian natigom usab ngadto sa tuong kiliran sa Hari ni Jehova. (Mateo 25:33, 34) Kining tanan maoy atong sulat sa rekomendasyon, usa ka sulat nga kita ingong mga Saksi ni Jehova nagadala bisan diin diha sa atong mga kasingkasing ug mga hunahuna ug ikapasundayag nga masaligon. Kadtong mobarog alang sa unibersohanong pagkasoberano sa Diyos ug makigbahin sa pag-alagad sa Diyos uban sa mga Saksi ni Jehova sila mismo maoy dokumento sa rekomendasyon nga dili malikayang mabasa ug mahiboan sa tanang tawo.

17. Sa unsang paagi ang atong “sulat kang Kristo” gisulat, ug nganong si Pablo nag-ingon nga kini gisulat diha sa mga kasingkasing?

¹⁷ Siyempre, masuko niini ang bakak nga mga relihiyonista ug masina sa dihang ilang mabasa kini. Bisan pa niana, ang nagkadaghang dakong panon sa ubang mga karnero maoy mga sulat sa rekomendasyon gikan kang Jesu-Kristo, ang Maayong Magbalantay, si kinsa nagagamit sa tanang mga Saksi ni Jehova diha sa iyang buluhaton sa pagkamagbalantay. Kita mao ang igsusulat, o ang tawhanong instrumento, nga iyang gigamit sa pagsulat niining sulata. Kining sulata wala isulat sa tinta nga mapapas, apan kini gikulit ug pinaagi sa aktibong puwersa, o espiritu, sa Diyos, nga nagalihok sulod kanato. Kini dili sama sa kaso ni Moises sa dihang ang balaod sa Napulo ka Sugo gisulat sa tudlo sa Diyos diha sa duha ka papan nga bato. Ang atong sulat gisulat diha sa unodnong mga papan sa tawhanong mga kasingkasing, sanglit ang atong espirituwal nga ministeryo nagapatunghag kausaban sa hunahuna ug kasingkasing diha sa mga dumadawat sa mahumot nga maayong balita.

18. Unsang resulta ang naghimo sa mga dumadawat sa maayong balita nga usa ka sulat sa rekomendasyon?

¹⁸ Ang atong buluhaton uban sa Pulong sa Diyos nagahatag usa ka impresyon diha sa mapabilhong mga dumadawat sa maayong balita ug nagahatag ug talagsaong mga kausaban. Ang ilang desisyon sa pag-alagad sa Diyos napamatud-ang dili kinalit-kalit nga pagbarog tungod sa usa ka emosyonal nga kainit nga napukaw diha kanila pinaagi sa nagasiyagit nga magwawali. Hinunoa, kini nagahawas ug permanente nga kausaban sa ilang mga kinabuhi pinasukad sa kristal-nga-katin-aw nga mga kamatuoran sa Balaang Bibliya. Ang gugma alang sa matuod nga Diyos, si Jehova, maoy nagpukaw kanila sa ‘paghukas sa ilang daang kinaiya uban ang malimbongong mga tinguha niini ug sa pagsul-ob sa bag-ong kinaiya,’ nga nagapasundayag “sa bunga sa espiritu.” (Efeso 4:20-24; Galacia 5:22, 23) Busa, ang resulta, naghimo kanilang usa ka sulat sa rekomendasyon. Kini mas tin-aw nga nagasulti kay sa bisan unsang sinulat-sa-kamot nga sulat pinaagi kanamo o pinaagi sa bisan unsang makitang organisasyon nga magpadala kanato.

19. Giunsa paghubit ni Pablo ang mga kuwalipikasyon sa “mga ministro sa bag-ong pakigtugon,” ug adunay unsang epekto ang ilang buluhaton diha sa dakong panon?

¹⁹ Diha sa 2 Corinto 3:4-6 si Pablo nagpadayon: “Karon pinaagi ni Kristo kita aduna niining matanga sa pagsalig sa Diyos. Dili nga kita takos sa pag-isip sa bisan unsa ingon nga kami gayod ang nagpasiugda niini, kondili ang atong pagkahimong takos nagagikan sa Diyos, nga mao sa pagkamatuod mao ang naghimo kanato nga takos nga mahimong mga ministro sa bag-ong pakigtugon.” Bisan pag ang dinihogang nahibilin lamang mao ang “mga ministro sa bag-ong pakigtugon,” ang ilang buluhaton nagaapektar sa dakong panon sa ubang mga karnero, ug kini magaapektar pa sa dili maisip nga gidaghanon sa maong ubang mga karnero nga pagatigomon pa. Kini mao ang pagsalig nga nabatonan sa tanang mga Saksi ni Jehova pinaagi ni Kristo Jesus ngadto kang Jehova nga Diyos. Ang nahibilin mapasalamatong nagdasig sa dakong panon sa ubang mga karnero sa pag-ambit sa bug-os nga kasingkasing diha sa ‘paghimog-sulat’ nga ministeryo nga gitagna ni Jesus sa Mateo 24:14 ug sa Mateo 28:19, 20.

20. (a) Unsay gipaila sa taho sa Yearbook bahin niadtong nagapakaylap sa kahumot sa kahibalo sa Diyos? (b) Unsay ikaingon sa tanan kanato bahin sa atong kuwalipikasyon alang sa paghimog-sulat nga ministeryo?

²⁰ Mao kana ang ilang gihimo, sumala sa makita diha sa 1990 Yearbook nga taho diin ang mga Saksi ni Jehova gipakita nga nagapakaylap sa kahumot sa kahibalo sa Diyos diha sa 212 ka nasod. Sila may gidaghanong kapin sa 3,787,000 ka aktibong mga magmamantala, ug sa miaging tuig lamang sila nakagugol ug 835,000,000 ka oras sa pagsangyaw niining maayong balita sa Gingharian. Diha sa Panihapon sa Ginoo sa miaging tuig, 9,479,064 ang mitambong. Ang dinihogang nahibilin ug ang mga sakop sa dakong panon sa ubang mga karnero makaingon: “Ang among pagkahimong kuwalipikado nagagikan sa Diyos.” O sama sa pagkapahayag niini sa The Jerusalem Bible: “Ang among tanang kuwalipikasyon nagagikan sa Diyos.”

21. Unsay angay buhaton natong tanan, ug ngano?

²¹ Busa, ipakaylap ang matam-is, nagahatag-kinabuhing kahumot sa kahibalo sa Diyos sa tanang dapit! Himoa nga ang atmospera sa inyong teritoryo sa kongregasyon tugob sa kahumot sa kahibalo kang Jehova. Unya, ingong usa ka nagmadaogon teokratikanhong Heneral, siya magatultol kaninyo diha sa iyang madaogong parada samtang ang tanan niyang mga Saksi magapadayon diha niining modernong-adlawng ministeryo sa kahimayaan!

[Footnote]

Unsaon Nimo sa Pagtubag?

◻ Unsang ilustrasyon ang gigamit ni Pablo diha sa 2 Corinto 2:14-16?

◻ Unsay epekto diha sa uban ang pagpakaylap sa kahumot sa kahibalo sa Diyos?

◻ Kinsa lamang ang kuwalipikado niining buluhatona, ug ngano?

◻ Nganong ang mga tigpahumot wala magkinahanglag sinulat-sa-kamot nga mga sulat sa rekomendasyon alang sa ilang buluhaton?