Ang Atong Bahandi, Usa ka Modernong-Adlawng Ministeryo sa Himaya
“Atong nabatonan kining bahandia diha sa mga sudlanang-yuta, aron ang gahom nga labaw sa kasagaran iya sa Diyos ug dili sa atong kaugalingon.”—2 CORINTO 4:7.
1. (a) Unsang mahimayaong bahandi nga mahimo natong mabatonan, ug ngano? (b) Giunsa paghubit sa Bibliya ang paghatag sa Moisesnong Kasugoan?
ANG ministeryo sa pagsangyaw “niining maayong balita sa gingharian” sa panahon sa konklusyon niining sistema sa mga butang sa pagkamatuod maoy usa ka bahandi, usa ka kabtangan nga labing hamili. Tungod kay si Jehova mao ang usa ka Diyos sa himaya, ang pag-alagad sa Diyos maoy usa ka ministeryo sa himaya, sa ingon usa ka bahandi. (Mateo 24:14; 2 Corinto 3:18–4:1) Mahitungod sa mahimayaong paghatag sa Moisesnong Kasugoan, kini ang nasulat diha sa Exodo 34:29, 30: “Ug nahitabo sa dihang si Moises milugsong gikan sa Bukid Sinai uban ang duha ka papan sa Pagpamatuod diha sa kamot ni Moises sa dihang siya milugsong gikan sa bukid, ug si Moises wala mahibalo nga ang panit sa iyang nawong misilaw tungod sa iyang pagpakigsulti kang [Jehova]. Sa dihang si Aaron ug ang tanan nga mga anak ni Israel nakakita kang Moises, ania karon, tan-awa! ang panit sa iyang nawong misilaw ug sila nahadlok sa pagduol kaniya.”
2. Unsay gilandongan sa pag-alagad sa Moisesnong Kasugoan, ug nganong ang naulahing ministeryo labi pang mahimayaon?
2 Ang bersikulo 32 ngadto sa 34 midugang: “Ug unya ang tanan nga mga anak ni Israel miduol kaniya, ug siya misugod sa paghatag kanila ingon nga sugo sa tanan nga gisulti ni Jehova kaniya didto sa Bukid sa Sinai. Sa dihang si Moises nakahuman na sa pagsulti kanila, nagbutang siya ug usa ka pandong sa iyang nawong. Apan sa diha nga si Moises miadto sa atubangan ni Jehova sa pagpakigsulti kaniya, gikuha niya ang pandong hangtod nga nakapahawa siya.” Kana nga pag-alagad sa Moisesnong Kasugoan naglandong sa ministeryo sa bag-ong pakigtugon pinaagi sa Tigpataliwala, si Jesu-Kristo. Busa, kon mahimayaon ang una nga ministeryo, labaw na ka mahimayaon ang ulahi, “ang pag-alagad sa espiritu,” milabaw niana sa himaya! (2 Corinto 3:7-11) Kini labi pang mahimayaon tungod kay kini adunay kahimayaan nga nagpabilin, ug ang mga sumusunod ni Jesu-Kristo nakig-ambit niini.—Roma 12:11.
3. (a) Unsa ang kamatuoran mahitungod sa ministeryo sa mga Saksi ni Jehova, apan nganong kini dili-makita sa daghang mga tawo? (b) Unsay nagpamatuod nga si Moises diha sa mahimayaong presensiya ni Jehova?
3 Busa, sa ingon usab nga ang ministeryo sa mga Saksi ni Jehova maoy usa nga mahimayaon. Kini, hinunoa, dili makita sa kadaghanang mga tawo nga gibutaan sa bakak nga relihiyon. Bisan pag daghan ang adunay Bibliya ug tingali nakabasa niana, sila walay ‘mga mata nga makakita.’ (2 Pedro 1:5-9) Aron makuha ang tabon sa ilang mga mata, sila kinahanglang moliso ngadto kang Jehova diha sa pagtuo, kay sa dihang si Moises miadto atubangan sa presensiya ni Jehova, iyang gikuha ang iyang pandong nga nagtabon sa iyang nawong gikan sa mga Hudiyo. (2 Corinto 3:16) Ang mga Israelinhon nahadlok nga makakita sa himaya sa Diyos diha sa nawong sa ilang tigpataliwala ug naghangyo nga tabonan kini gikan sa ilang mga mata. Sama nga ang phosphorescent nga substansiya nga maladlad sa kahayag moamag diha sa kangitngit, sa ingon si Moises, nga ilang tigpataliwala, mibanaag sa himaya ni Jehova, nga nagpamatuod nga siya nakaatubang ni Jehova.
4. Sa unsang paagi gisunod sa dili-magtutuong mga tawo karong adlawa ang mga Hudiyo sa karaan, apan unsay wala kahadloki sa mga sumusunod sa Dakong Moises?
4 Si Moises naglandong sa dakong Propeta sa Diyos, si Jesu-Kristo. Sama sa iyang gilandongan, kining Dakong Moises dili mahadlok nga direktang makakita sa himaya ni Jehova. Hangtod karon, hinunoa, ang dili-matinoohong mga tawo gibutaan sa Yawa ug sa iyang Babilonyanhong relihiyon nagasundog sa mga Hudiyo sa karaan ug nagadumili sa pagtan-aw, o sa pagsabot, sa himaya sa dakong Moises, si Jesu-Kristo. (2 Corinto 3:12-15) Apan, ang iyang tinuod nga mga sumusunod dili mahadlok nga motan-aw sa pagbanaag sa himaya ni Jehova ingon sa gipasidlak gikan sa nawong ni Jesu-Kristo. Nakagawas gikan sa Babilonyanhong impluwensiya, sila gidasig sa pagpakita sa himaya sa Diyos. “Busa,” misulat si Pablo, “sanglit kay kita nakabaton man sa maong paglaom, atong gigamit ang dakong kagawasan sa pagsulti.”—2 Corinto 3:12.
Mga Tigpabanaag sa Himaya sa Diyos
5. Sa unsang paagi atong ikapabanaag ang himaya sa Diyos ug mahisama kang Moises diha sa taluktok sa bukid sa presensiya ni Jehova?
5 Gikuha ni Jesu-Kristo ang pandong pinaagi sa pagpadayag ug pagmantala kang Jehova nga Diyos kanato. (Juan 1:14, 17, 18) Busa angay nga kita modan-ag, ug sa ingon ang himaya sa Diyos modan-ag “sa mahimayaong maayong balita mahitungod kang Kristo, nga mao ang larawan sa Diyos,” nga kinahanglan nga atong imantala. Ang kasanag niini mao “ang mahimayaong kahibalo sa Diyos pinaagi sa nawong ni Kristo.” Kinahanglang atong ipabanaag kining himayaa pinaagi sa pagsulti sa himaya ni Jehova ug sa himaya sa iyang Gingharian pinaagi sa iyang Anak. (2 Corinto 4:4-6) Sama kang Moises diha sa taluktok sa bukid sa presensiya ni Jehova, ang Iyang mga Saksi sa yuta dili magtabon sa ilang mga kasingkasing gikan sa himaya ni Jehova. Sila nagadayeg sa himaya nga gipabanaag sa nawong sa Anak ug Hari ni Jehova, si Jesu-Kristo. Sa ingon, sila kinahanglang magpadan-ag sa uban sa kahayag mahitungod sa himaya sa Diyos.
6. Sa unsang paagi gihubit ni Pablo ang atong ministeryo sa himaya diha sa 2 Corinto 3:18, ug busa sa unsang mga paagi kita sa ingon “nabag-o”?
6 Ngadto sa tanang kaubang mga saksi sa kahimayaan ni Jehova, gihubit kini ni apostol Pablo niining mga pulonga: “Ug kitang tanan, uban sa nawong nga dili-tinaptapan mopabanaag sama sa mga salamin sa himaya ni Jehova, ginausab ngadto sa pagkasama sa iyang panagway gikan sa himaya ngadto sa himaya, maingon nga kini nagagikan ni Jehova ang Espiritu.” (2 Corinto 3:18) Kon kita dugang makadawat sa himaya niini nga kahayag, dugang nga kita kinahanglang mosidlak, ug busa dugang nga kita mabag-o. Ang mga hunahuna gibag-o ug giusab, bisag walay makitang mga kausaban sa lawas ug nawong. Ang kahayag sa mahimayaong mensahe nga atong ginapadan-ag ang mopatunghag kalainan diha kanato. Ang atong mga kinabuhi mabag-o aron mahimong sama kang Kristo, samtang atong giandam ang atong kaugalingon sa pagtuman sa bulahan nga pag-alagad sa pagpakaylap niining mahimayaong kahayag ngadto sa uban.—Hebreohanon 13:15.
7. Gikan sa unsang tuboran ang tinuod nga himaya, ug sa unsang paagi atong ipahayag ang maong himaya?
7 Kining tanang kausaban maoy tungod sa espiritu, o aktibong gahom, sa Diyos. Ang mga klero sa Kakristiyanohan wala magpabanaag sa himaya ni Jehova nga Diyos apan nagpakaaron-ingnon aron makamugna ug talan-awon. Ang himaya dili maoy atong himaya, ug dili kinahanglan nga magsul-ob kita ug maanindot nga eklesiyastikanhong besti nga sida, bulawan, ug nagagilak-gilak nga mga alahas. Ang tinuod nga himaya nagagikan sa espiritu sa Diyos ug ginapahayag sa paghatag ug mahimayaong pamatuod mahitungod kang Jehova ang Espiritu.
Ang Tanan Maoy Bulahan nga mga Tigdalag-Kahayag
8, 9. Unsang pagdasig ang gihatag ni Pablo kanato sa 2 Corinto 4:1, 2, ug unsang determinasyon ang gikinahanglan niini sa atong bahin?
8 Diha sa 2 Corinto 4:1, 2 atong mabasa: “Busa, maingon nga nakabaton man kita niini nga ministeryo sumala sa kaluoy nga gipakita kanamo, kami dili mohunong; apan among gisalikway ang linimbong nga paagi nga igakaulaw, wala magalakaw sa lipatlipat, ni nagsambog sa pulong sa Diyos, apan pinaagi sa pagpadayag sa kamatuoran nagapaila sa among kaugalingon ngadto sa tanang tawhanong tanlag diha sa panan-aw sa Diyos.” Gikaluy-an kita sa Diyos nga naghatag kanato niini nga ministeryo. Kini maoy usa ka tambag sa pagdasig kanato nga magpadayong maisogon, ug kini maoy atong buhaton! Sanglit kita gipaboran ug kahayag gikan sa Pulong sa Diyos, kita obligado sa pagpasidlak niini ngadto sa uban.—Itandi ang Mateo 5:14-16.
9 Ang mga butang nga igakaulaw sa mga tawo, sama sa panglimbong, ilang ginatago pinaagi sa panikas ug panglipat. Apan kita walay ikaulaw tungod kay ang atong mensahe ug buluhaton dili panglimbong kondili matarong ug tinuod. Busa, atong ipasidlak ang bug-os nga himaya sa kahayag. Dili nato tagdon ang Pulong sa Diyos sa malimbongong paagi. Ang pagbuhat sa ingon magkahulogan nga nagatagad niini nga mahakogon alang sa personal nga ganansiya, himaya, bentaha, ug kalibotanong gahom ug aron makalikay sa pagsupak ug paglutos gikan sa kalibotan. Kadtong walay kahadlok nga moduol kang Jehova nga walay tabon ang mga nawong ug motutok sa mahimayaong kahayag sa kamatuoran dili usab mahadlok sa pag-atubang sa ilang responsabilidad. Ilang itugot nga ang kahayag mobanaag gikan kanila.
10. Nganong dili sayop sa mga Saksi ni Jehova kon ang maayong balita tinabonan gikan sa panan-aw sa ubang mga tawo?
10 Kon may mitugot nga mataptapan ang maayong balita sa Gingharian gikan sa ilang panan-aw, dili kini sayop sa mga Saksi ni Jehova, kondili kini maoy ilang kaugalingong sayop. Ang maayong balita sa Gingharian dili tinago. Ang tibuok-yutang pagsangyaw nga buluhaton sa mga Saksi ni Jehova nabantog. Busa, sila makaingon sama sa gipamulong ni apostol Pablo: “Kining mga butanga wala buhata diha sa usa ka suok.” Sa pagkamatuod, sumala sa iyang gisulat, ang maayong balita “gikawali ngadto sa tanang binuhat sa silong sa langit.”—Buhat 26:26; Colosas 1:23.
11. Nganong ang mahimayaong maayong balita tinabonan diha sa daghan kayong katawhan?
11 Ang mga tawo nga diha kanila natago ang maayong balita sa Gingharian sa Diyos maoy mga magsusupak, sila gibutaan sa Yawa. (Itandi ang Mateo 12:30.) Gawas kon sila mobulag gikan sa bakak nga relihiyon ug sa mga lit-ag sa Yawa, sila mahilinya sa kalaglagan. Ubos sa impluwensiya sa demonyo, kining mga tawhana nagbutang ug taptap sa ilang kaugalingong mga mata, kay si apostol Pablo miingon sa 2 Corinto 4:3-5: “Kon, ugaling ang maayong balita nga among gimantala sinalipdan, kini tinabonan lamang ngadto kanila nga nagakalaglag, diin ang mga hunahuna sa mga dili magtutuo gibutaan sa diyos niining sistema sa mga butang, aron sila dili makakita sa kahayag sa mahimayaong maayong balita mahitungod kang Kristo, nga mao ang dagway sa Diyos. Kay kami nagwali, dili sa among kaugalingon, kondili kang Kristo Jesus ingong Ginoo, ug kami ingong inyong mga ulipon tungod kang Jesus.”
12. Kon itandi sa mga nabutaan sa hunahuna, sa unsang paagi ang katawhan ni Jehova nagasanong sa mga pulong sa 2 Corinto 4:6?
12 Ang mga tawong gibutaan sa hunahuna dili buot nga motuo. Ang ilang dili-pagtuo nagbukas sa ilang mga hunahuna sa pag-asdang sa mga demonyo. (1 Timoteo 4:1) Sila dili makakita sa himaya ni Jehova o sa banaag niini diha sa panagway ni Jesus, ang Dakong Moises. Ang katawhan ni Jehova nagakuha sa mahimayaong kahayag gikan sa Bibliya ug gipasiga kini ngadto sa uban. Busa ang tanang mga alagad sa Diyos maoy mga tigdalag-kahayag, ug ang Diyos nagsugo sa kahayag sa pagsidlak. Ang kahayag kinahanglang mosidlak gikan sa katawhan sa Diyos ug ipadan-ag diha sa uban nga anaa sa kangitngit ug nameligrong malaglag. Sama gayod kini sa gipamulong diha sa 2 Corinto 4:6: “Kay ang Diyos nag-ingon: ‘Gikan sa kangitngit mosidlak ang kahayag,’ ug siya nagasidlak diha sa atong mga kasingkasing sa pagdan-ag kanila sa mahimayaong kahibalo sa Diyos diha sa nawong ni Kristo.” Tungod niini, gituman sa mga Saksi ni Jehova ang balaang sugo ug gipasidlak ang ilang kahayag ngadto sa uban, sa kahimayaan sa Diyos.
Mahimayaong Bahandi Diha sa Mahuyang nga mga Sudlanan
13. Ang paghatag ug bulahan nga pag-alagad sa pagkahimong mga tigdalag-kahayag diha sa linalang nga mga tawo mosangpot ug unsa?
13 Diha niining dili-matukib nga dakong pribilehiyo sa pag-alagad, hinungdanon kaayo nga ang mga tigdalag-kahayag magpamatuod nga takos sa pagbaton sa kahayag pinaagi sa paghupot sa ilang pagkamaunongon sa Diyos. Sa pagtuman niining kahibulongang pribilehiyo sa pag-alagad, ang Diyos wala mogamit sa balaang mga manulonda, nga nangandoy sa pagsud-ong niining mga butanga, apan iyang gihatag kining talagsaong pribilehiyo sa pag-alagad diha sa mga linalang nga tawo. (1 Pedro 1:12) Kini iyang gibuhat sa pagbayaw sa iyang kaugalingong gahom bisan sa tawhanong kahuyangan. Ang 2 Corinto 4:7 nag-ingon: “Hinunoa, atong nabatonan kining bahandia diha sa mga sudlanang-yuta, aron ang gahom nga labaw sa kasagaran iya sa Diyos ug dili sa atong kaugalingon.”
14. (a) Unsa “kining bahandi diha sa mga sudlanang-yuta”? (b) Nganong si Moises ug si Jesu-Kristo maoy mga maalamong panig-ingnan alang kanato maylabot sa bahandi?
14 Ang mga sudlanan sa karaang panahon sagad gamiton ingong mga sulodlan alang sa mga butang bililhon. Unsa kining mahimayaong bahandi nga nabatonan sa mga Saksi ni Jehova diha sa mahuyang, mga sudlanang-yuta—sila mismo, ingong mahuyang nga mga linalang gikan sa abog sa yuta? Kining bahandia dili lamang ang kahayag nga nagasidlak diha sa ilang mga kasingkasing. Kini mao ang ministeryo niana nga kahayag, diin ang ministeryo, o pag-alagad, kinahanglang pagahimoon sa ilang yutan-ong mga lawas. Ang ministeryo mao ang pagpasidlak sa kahayag nga gipadan-ag sa Diyos diha sa ilang mga kasingkasing. Kini nga ministeryo maoy usa ka maayong bahandi sanglit kini maoy usa ka bililhong pribilehiyo sa pag-alagad nga gipakig-ambitan karon dili lamang sa dinihogang nahibilin sa “gamayng panon” kondili usab sa “dakong panon” sa “ubang mga karnero” sa Maayong Magbalantay, si Jesu-Kristo. (Lucas 12:32; Juan 10:14-16; Pinadayag 7:9) Si Moises ug ang iyang antitipo maoy maalamong mga panig-ingnan alang kanato, sa pagsentro sa atong kasingkasing diha niining bahandia sa balaang pag-alagad, “kay diin gani ang imong bahandi, atua usab ang imong kasingkasing.”—Mateo 6:19-21; Hebreohanon 11:26.
15, 16. (a) Sa unsang paagi ang gahom nga labaw sa kasagaran nagpakitang nagagikan sa Diyos ug dili sa atong kaugalingon? (b) Nganong ang tanang pagsupak sa kalibotan mapakyas sa pagbungkag sa mga sudlanang-yuta sa Diyos?
15 Nan, sa unsang paagi nga ang gahom nga labaw sa kasagaran nagpakitang nagagikan sa Diyos ug dili sa atong kaugalingon? Niining paagiha: Ang maong mahuyang, mga sudlanang-yuta ingon nga kita nga naghupot niining gipakahamili nga pag-alagad ug sugo maoy dili-takos ug dili gayod makadala sa mao nga kadungganan sa atong kaugalingon. Dugang pa, kita nga mga Saksi ni Jehova nailalom sa tanang matang sa pagpiit sa kaaway sa pagsulay sa pagbungkag kanato ug sa pagpusgay kanato aron sa paghimo kanato nga dili-takos sa pagdala sa sugo gikan sa Diyos. Busa, ang gahom sa Dakong Komisyonado mao ang nagtabang kanato nga makabarog sa grabe nga pagdaogdaog niining kalibotana ug sa pagpabiling malig-on sa sugo ug sa pagpamatuod nga takos nga mapabilin diha sa iyang pag-alagad. Sa ingon, ang tanang pagsupak sa kalibotan mapakyas sa pagbuak sa yutan-ong mga sudlanan sa Diyos ug sa pagkuha gikan kanila sa ilang bililhong bahandi, kay kini ang nahisulat diha sa 2 Corinto 4:8-12:
16 “Kami gilisod sa tanang paagi, apan dili piniotan nga dili makalihok; kami nangalibog, apan dili bug-os nga walay lutsanan; kami gilutos, apan wala pasagdi; nangapukan, apan wala mangalaglag. Sa kanunay nagaantos kami sa lawas ang makamatay nga pagdagmal nga gipaagom kang Jesus, aron ang kinabuhi ni Jesus usab madayag dinhi sa atong mga lawas. Kay kita nga buhi kanunay nga ginaatubang ngadto sa kamatayon tungod kang Jesus, aron ang kinabuhi ni Jesus madayag usab dinhi sa among mga lawas nga may kamatayon. Busa dinhi kanato nagalihok ang kamatayon, apan ang kinabuhi [pinaagi sa pagsangyaw sa maayong balita sa Gingharian] diha kaninyo.”
Gipakahamili sa Dakong Panon “Kining Bahandia”
17. Sa unsang paagi gipabilhan sa dakong panon “kining bahandia” sa ministeryo sa himaya?
17 “Dinhi kanato nagalihok ang kamatayon, apan ang kinabuhi nagalihok diha kaninyo.” Kining pulonga aplikado sa dinihogang mga Kristohanon. Apan, kini makapahunahuna kanato bahin sa relasyon sa dinihogang nahibilin sa Diyos sa dakong panon sa ubang mga karnero. Ang nahibilin nahibalo nga ilang taposon sa kataposan ang ilang yutan-ong kurso diha sa kamatayon sama kang Jesus, apan sila adunay mga kauban nga makig-ambit kanila sa mahimayaong bahandi sa pag-alagad, sa pagtabang kanila pinaagi sa pagbuhat sa kinadak-ang buluhaton sa pagsangyaw sa maayong balita sa Gingharian. Sama sa dinihogang nahibilin, ang dakong panon sa ubang mga karnero karong adlawa nagapabili nga ang bugtong bahandi nga makalabang sa kalayonhong gubat sa Armageddon ug padayong dili-masunog ug dili-maut-ot ngadto sa bag-ong kalibotan mao kining bahandi sa binulahan nga ministeryo, ang pag-alagad kang Jehova nga Diyos ug sa iyang mahimayaong Hari, si Jesu-Kristo. Ang dakong panon hugot nga magpabilin diha niini, “nagahatag sa [Diyos] ug balaang pag-alagad sa adlaw ug gabii diha sa iyang templo.”—Pinadayag 7:15.
18. (a) Unsay mahitabo sa dili madugay sa bakak nga himaya niining kalibotana? (b) Unsang “himaya” ang gidumilian ni Jesus, ug ang pagbuhat sa unsa nga nakabaton siya ug usa ka labawng himaya?
18 Sa dili madugay, taposon sa Diyos ang mini nga himaya niining presente daotang sistema sa mga butang—usa ka “himaya” nga nagpadayon sukad nga gidala ni Satanas nga Yawa si Jesus sa hataas nga bukid ug gipakita kaniya ang tanang mga gingharian sa kalibotan ug “ang ilang kahimayaan.” (Lucas 4:5, 6) Gidumilian ni Jesus ang gitanyag nga himaya gikan nianang usa ka tuboran ug nagpadayon sa kurso sa kalihokan sa yuta nga giuyonan sa Diyos. Sa pagbuhat niini, siya pagapurong-purongan sa usa ka himaya nga labaw bisan sa himaya nga iya, ang bugtong Anak sa Diyos, nga gitagamtam sa langit una pa sugdi ang iyang yutan-ong buluhaton ingon sa gilaraw ni Jehova.—Juan 5:36; 17:5; Filipos 2:9-11.
19. Unsang dungganong pribilehiyo sa pag-alagad ang haduol na sa iyang bug-os nga katumanan, ug unsay atong determinasyon niining bahina?
19 Ang gitagnang kataposan niining yawan-ong sistema sa mga butang dili moabot sa dili pa ikahatag ang pagpamatuod sa Gingharian sa tibuok yuta ingong usa ka dakong kataposan sa kalihokan sa mga sumusunod ni Jesu-Kristo, ang mga Saksi ni Jehova. (Mateo 24:14) Ang pagpamatuod sa Gingharian gikahatag na karon sulod sa kapitoan ug lima na ka tuig, ug sumala sa gipaila sa mga hitabo sa kalibotan sa atong panahon, ang gitagnang kataposan haduol na kaayo. Busa, ang dungganong pribilehiyo sa pagpakig-ambit diha sa ministeryo sa harianon, balaang kagamhanan haduol na gayod sa bug-os nga katumanan niini. (Mateo, mga kapitulo 24, 25; Marcos, kapitulo 13; Lucas, kapitulo 21) Ang atong pribilehiyo sa pagpakigbahin sa paghatag ug tibuok-yuta nga pamatuod sa natukod na nga Gingharian sa pagkamatuod maoy usa ka mahimayaong bahandi nga gipabilhan ug dako sa mga Saksi ni Jehova, ingong mga sumusunod sa iyang naentronong Anak, si Jesu-Kristo. Sila mainitong nagtinguha nga magpabilin diha niana hangtod matapos ang pagpamatuod sa Gingharian ug ang Labing Makagagahom nga Diyos, si Jehova, magapurongpurong sa kahimtang sa uniberso uban sa iyang kaugalingong pagpamatuod sa iyang pagkasoberano sa uniberso.—Sofonias 3:8.
Unsay Imong mga Tubag?
◻ Nganong mahimayaon ang ministeryo sa mga Saksi ni Jehova?
◻ Nganong ang maayong balita tinabonan gikan sa kadaghanan karong adlawa?
◻ Unsa “kining bahandia sa mga sudlanang-yuta”?
◻ Nganong gigamit sa Diyos ang mahuyang, mga sudlanang-yuta alang sa iyang bililhong pag-alagad?
◻ Sa unsang paagi gipabilhan sa katawhan ni Jehova “kining bahandia,” ug ngano?
[Hulagway sa panid 17]
Ang himaya sa Diyos gipabanaag sa dagway ni Jesu-Kristo, ang Dakong Moises. Ang mga Saksi ni Jehova bulahan sa pagdakop sa mahimayaong kahayag sa Diyos gikan sa Bibliya ug gipabanaag kini ngadto sa uban