Mosanong Ka ba sa Gugma ni Jesus?
“Ang gugma nga nabatonan ni Kristo nagaaghat kanamo.”—2 CORINTO 5:14.
1. Sa unsang paagi ikahubit ang gugma ni Jesus?
SA PAGKATINUOD, pagkadalayegon sa gugma ni Jesus! Kon atong palandongon ang iyang dili-maasoy nga pag-antos samtang iyang gitagana ang lukat, nga pinaagi lamang niana kita makabaton ug kinabuhing walay kataposan, siyempre ang atong mga kasingkasing mapukaw sa pag-apresyar kaniya! Si Jehova nga Diyos ug si Jesus mismo ang miuna sa paghimog tikang. Sila ang unang nahigugma kanato, samtang mga makasasala pa kita. (Roma 5:6-8; 1 Juan 4:9-11) Kay nahibalo nga ang “gugma ni Kristo,” misulat si apostol Pablo, “nagalabaw sa kahibalo.” (Efeso 3:19) Gani, ang gugma ni Jesus nagalabaw pa sa akademiko nga kahibalo. Kini labaw pa sa bisan unsang butang nga nakita o naeksperyensiyahan sukad sa mga tawo.
2. Unsay dili-makapugong kang Jesus sa paghigugma kanato?
2 Misulat ngadto sa mga Kristohanon sa Roma, si Pablo nangutana: “Kinsa ba ang makapahimulag kanato gikan sa gugma ni Kristo? Ang kasakitan ba o kasamok o paglutos o gutom o pagkahubo o katalagman o ang espada ba?” Dili makapugong ni Jesus kining mga butanga sa paghigugma kanato. “Kay masaligon ako,” mipadayon si Pablo, “nga walay kamatayon o kinabuhi o mga manulonda o mga kagamhanan o mga butang karon o mga butang umalabot o mga gahom o kahabugon o giladmon o bisan unsa sa mga binuhat ang makapahimulag kanato gikan sa gugma sa Diyos nga anaa kang Kristo Jesus nga atong Ginoo.”—Roma 8:35-39.
3. Unsa lamang ang hinungdan nga kita isalikway ni Jesus ug sa iyang Amahan?
3 Ang gugma ni Jehova nga Diyos ug ni Jesus alang kanimo ingon niana ka gamhanan. Usa lamang ka butang ang makapahunong kanila sa paghigugma kanimo, ug kana mao ang imong kinabubut-ong pagsalikway sa ilang gugma pinaagi sa pagdumili sa pagbuhat sa ilang gihangyo. Ang usa ka propeta sa Diyos mipatin-aw niadto sa usa ka hari sa Judea: “Si Jehova magauban kanimo basta imong pamatud-an nga ikaw nagauban kaniya; ug kon imong pangitaon siya, imo siya nga makaplagan, apan kon imo siya nga isalikway, iya usab ikaw nga isalikway.” (2 Cronicas 15:2) Kinsa ba kanato ang buot nga mopalayo gikan sa ingon niana ka kahibulongan, ka maluloy-ong mga higala sama kang Jehova nga Diyos ug sa iyang Anak, si Jesu-Kristo?
Tukmang Pagsanong sa Gugma ni Jesus
4, 5. (a) Sa unsang paagi ang gugma ni Jesus alang kanato makaapekto sa atong relasyon sa isigkatawo? (b) Tungod sa gugma ni Jesus kanato kinsa ang kinahanglan natong higugmaon?
4 Sa unsang paagi ikaw sa personal apektado sa walay-utlanang gugma ni Jesus kanimo? Sa unsang paagi angay ka nga maapektohan? Buweno, gipakita ni Jesus kon sa unsang paagi ang iyang pagpasundayag sa gugma angay makaapekto sa atong mga relasyon uban sa isigkatawo. Human mapaubsanong mialagad sa iyang mga apostoles pinaagi sa paghugas sa ilang mga tiil, si Jesus miingon: “Ako naghatag kaninyo ug panig-ingnan, aron nga, ang gibuhat ko kaninyo, mao usay inyong buhaton.” Siya midugang: “Ako naghatag kaninyo ug bag-o nga sugo, nga maghigugmaay kamo sa usa ug usa; sama sa akong paghigugma kaninyo, nga kamo usab maghigugmaay sa usa ug usa.” (Juan 13:15, 34) Ang iyang mga tinun-an nakakat-on, ug sila napalihok sa pagsunod sa iyang gihimo. “Pinaagi niini nahibaloan nato ang gugma,” si apostol Juan misulat, “kay siya mihatag man sa iyang kalag alang kanato; ug kita kinahanglan magahatag sa atong mga kalag alang sa atong mga igsoon.”—1 Juan 3:16.
5 Lain pa, makawang nato ang katuyoan sa kinabuhi ug ministeryo ni Jesus kon kita matukmod sa paglihok sa iyang panig-ingnan tungod lang sa paghigugma ug sa pag-alagad sa intereses sa isigkatawo. Dili ba angay ang gugma ni Jesus motukmod usab kanato sa pagbalos sa paghigugma kaniya ug ilabina sa paghigugma sa iyang Amahan, nga nagtudlo kaniya sa tanang butang nga iyang nahibaloan? Ikaw ba mosanong sa gugma ni Kristo ug moalagad sa kabubut-on sa iyang Amahan sama kaniya?—Efeso 5:1, 2; 1 Pedro 1:8, 9.
6. Sa unsang paagi naapektohan si Pablo sa gugma ni Jesus alang kaniya?
6 Palandonga ang kaso ni Saulo, kinsa sa ulahi nailhang Pablo. Sa usa ka higayon iyang gilutos si Jesus, “nagpangusmo sa paghulga sa pagpatay sa mga tinun-an.” (Buhat 9:1-5; Mateo 25:37-40) Sa dihang si Pablo nakadangat sa pagkaila gayod kang Jesus, siya mapasalamaton kaayo sa pagdawat sa kapasayloan nga dili lamang siya andam sa pag-antos alang kang Jesus kondili siya andam usab nga magpakamatay alang kaniya. “Gilansang ako uban kang Kristo,” siya misulat. “Dili na ako ang nabuhi . . . Sa pakatinuod, ang kinabuhi nga karon akong gikinabuhi sa lawas akong gikinabuhi pinaagi sa akong pagtuo sa Anak sa Diyos, nga nahigugma kanako ug mitugyan sa iyang kaugalingon alang kanako.”—Galacia 2:20.
7. Ang gugma ni Jesus nagaaghat kanato sa pagbuhat ug unsa?
7 Pagkagamhanang puwersa diha sa atong mga kinabuhi ang gugma nga gibati ni Jesus alang kanato! “Ang gugma nga nabatonan ni Kristo nagaaghat kanamo,” misulat si Pablo ngadto sa mga taga Corinto, ‘sa dili na magkinabuhi alang sa atong kaugalingon, kondili alang kaniya nga namatay alang kanato ug gibanhaw.’ (2 Corinto 5:14, 15) Sa pagkamatuod, ang pagkamapasalamaton kang Jesus sa paghatag sa iyang kinabuhi alang kanato angay mopalihok kanato sa pagtuman sa bisan unsa nga iyang gihangyo. Niini lamang paagiha nga kita makapamatuod nga tinuod nato siya nga gihigugma. “Kon nahigugma kamo kanako, inyong pagatumanon ang akong mga sugo,” miingon si Jesus. “Ang nagabaton sa akong mga sugo ug nagatuman niini, kini siya mao ang nahigugma kanako.”—Juan 14:15, 21; itandi ang 1 Juan 2:3-5.
8. Sa unsang paagi ang gugma ni Jesus nakaapekto sa mga kinabuhi sa daghang mga makasasala?
8 Sa dihang mahibalo sa mga sugo ni Jesus, ang mga makihilawason, mananapaw, homoseksuwal, kawatan, palahubog, ug mga tikasan sa karaang Corinto misanong sa gugma ni Jesus pinaagi sa paghunong sa pagbuhat niadtong mga buhata. Gisulatan sila ni Pablo: “Kamo gihinloan na, . . . kamo gipahayag na nga matarong sa ngalan sa atong Ginoong Jesu-Kristo.” (1 Corinto 6:9-11) Sa susama, ang gugma ni Jesus nagaaghat sa kadaghanan karong adlawa sa paghimog talagsaong mga kausaban sa ilang mga kinabuhi. “Ang matuod nga mga kadaogan sa Kristiyanidad nakita diha sa paghimong maayong mga tawo niadtong nagtuo sa iyang mga doktrina,” misulat ang manalaysay nga si John Lord. “May pamatuod kita sa ilang matarong nga mga kinabuhi, sa ilang walay ikasaway nga moral, sa ilang pagkamaayong lungsoranon, ug sa ilang Kristohanong mga sukdanan sa pamatasan.” Pagkadakong kalainan ang nahimo sa mga pagtulon-an ni Jesus!
9. Unsay nalangkit sa pagpatalinghog kang Jesus?
9 Siyempre, walay pagtuon nga mahimo sa usa ka tawo karong adlawa nga molabaw pa ka hinungdanon kay sa pagtuon sa kinabuhi ug ministeryo ni Jesu-Kristo. “Tutoki pag-ayo si . . . Jesus,” miawhag si apostol Pablo. “Sa pagkatinuod, palandonga ninyo pag-ayo [kana] siya.” (Hebreohanon 12:2, 3) Sa panahon sa pagkausab sa dagway ni Jesus, ang Diyos mismo misugo maylabot sa iyang Anak: “Patalinghogi ninyo siya.” (Mateo 17:5) Kinahanglang ipasiugda, hinunoa, nga ang pagpatalinghog kang Jesus nag-apil ug labaw pa kay sa yanong pagpamati sa iyang gipamulong. Kini nagkahulogan sa pagsunod sa iyang mga sugo, oo, pagsundog kaniya pinaagi sa pagbuhat sa iyang gihimo sa paagi sa iyang paghimo niini. Kita nagasanong sa gugma ni Jesus pinaagi sa pagdawat kaniya ingong atong sulondan, pinaagi sa suod nga pagsunod sa iyang mga tunob.
Kon Unsay Buot ni Jesus nga Maoy Atong Buhaton
10. Kinsa ang gibansay ni Jesus ug alang sa unsang katuyoan?
10 Ang sugo ni Jesus gikan sa Diyos mao ang pagsangyaw mahitungod sa Gingharian sa iyang Amahan, ug iyang gibansay ang iyang mga sumusunod sa pagbuhat sa samang buluhaton. “Mangadto kita sa ubang dapit,” iyang giingnan ang iyang unang mga tinun-an, “aron didto usab magawali ako, kay mao kanay hinungdan ngano nga mianhi ako dinhi.” (Marcos 1:38; Lucas 4:43) Sa ulahi, human bug-os gibansay ang 12 ka apostoles, gisugo sila ni Jesus: “Samtang magapanglakaw kamo, pagwali kamo nga magaingon, ‘Ang gingharian sa mga langit haduol na.’” (Mateo 10:7) Sa milabay ang pipila ka bulan, human nakabansay sa 70 pa, iyang gipadala sila uban sa sugo: “Sultihi sila ninyo nga nagaingon, ‘Ang gingharian sa Diyos ania nahiduol na kaninyo.’” (Lucas 10:9) Sa matin-aw, maoy tinguha ni Jesus nga ang iyang mga tinun-an mahimong mga magwawali ug mga magtutudlo.
11. (a) Sa unsang paagi ang mga tinun-an ni Jesus nagabuhat ug labi pa ka dagkong mga buhat kay sa iyang gihimo? (b) Unsay nahitabo sa mga tinun-an ni Jesus human nga siya gipatay?
11 Nagpadayon si Jesus sa pagbansay sa iyang mga tinun-an alang niining buluhatona. Sa panahon sa kataposang gabii sa hapit na siyang patyon, iyang gidasig sila niining mga pulonga: “Ang may pagtuo kanako magahimo usab sa mga buhat nga akong ginabuhat; ug labi pa ka dagkong mga buhat kay niini ang iyang pagabuhaton.” (Juan 14:12) Ang mga buluhaton sa iyang mga sumusunod labi pa ka dako kay sa iyang gibuhat tungod kay sa ilang pagministeryo ilang maabot ang mas daghan pang mga tawo diha sa usa ka luna nga mas dako ug sa mas taastaas nga panahon. Apan, human nga gipatay si Jesus, ang iyang mga tinun-an nahimong inaktibo tungod sa kahadlok. Sila nagtagotago ug wala magpadayon sa pagbuhat sa buluhaton nga iyang gibansay sila sa pagbuhat. Ang uban namalik pa gani sa negosyo sa pagpangisda. Ugaling, sa dili-makalimtang paagi, iyang napasilsil diha sa pito ang buot niya nga maoy buhaton nila, ug sa tanan niyang mga sumusunod.
12. (a) Unsang milagro ang gihimo ni Jesus diha sa Dagat sa Galilea? (b) Unsa, sa dayag, ang gipasabot ni Jesus sa dihang iyang gipangutana si Pedro kon iya ba Siya nga gihigugma “labaw pa niini”?
12 Si Jesus nagmateryalisar sa tawhanong lawas ug mipakita diha sa Dagat sa Galilea. Ang pito ka apostoles diha sa usa ka sakayan apan wala makadakop ug isda sa tibuok gabii. Si Jesus nanawag diha sa baybayon: “Itaktak ninyo ang pukot dapit sa tuo sa sakayan, ug aduna kamoy makuha.” Sa dihang milagrosong napuno ang pukot sa isda nga hapit na gani kining masisi, kadtong diha sa sakayan nakaamgo nga si Jesus diay kanang anaa sa baybayon, ug sila nagdali sa dapit nga siya naghulat. Human gidalitan sila ug pamahaw, si Jesus, hayan nagtan-aw sa dakong kuha sa isda, nangutana kang Pedro: “Simon anak ni Juan, gihigugma mo ba ako labaw pa niini?” (Juan 21:1-15) Matin-aw nga ang gipasabot ni Jesus mao, Mas gihigugma ba nimo ang negosyo sa pangisda kay sa buluhatong pagwali nga giandam ko ikaw nga maoy imong buhaton?
13.Sa unsang paagi gamhanang napasilsil ni Jesus diha sa iyang mga sumusunod ang paagi nga sila kinahanglang mosanong sa iyang gugma?
13 Si Pedro mitubag: “Oo, Ginoo, nasayod ka nga gihigugma ko ikaw.” Si Jesus mitubag: “Pakan-a ang akong mga karnero.” Sa ikaduhang higayon nangutana si Jesus: “Simon anak ni Juan, gihigugma mo ba ako?” Si Pedro mitubag na usab, sa walay duhaduha uban sa mas kusganong pasalig: “Oo, Ginoo, nasayod ka nga gihigugma ko ikaw.” Si Jesus misugo na usab: “Pakan-a ang akong nati nga mga karnero.” Sa ikatulong higayon si Jesus nangutana: “Simon Anak ni Juan, gihigugma mo ba ako?” Sa pagkakaron si Pedro naguol kaayo. Sa pipila pa lamang ka adlaw nga milabay, tulo ka higayong iyang gilimod si Jesus, busa siya nagpalandong tingali nga nagduhaduha si Jesus sa iyang pagkamaunongon. Busa, sa ikatulong higayon, si Pedro mitubag, tingali sa mapangaliyopoon nga tuno: “Ginoo, nasayod ikaw sa tanan; nasayod ka nga gihigugma ko ikaw.” Si Jesus yanong mitubag: “Pakan-a ang akong nati nga mga karnero.” (Juan 21:15-17) May ikaduhaduha pa ba kon unsay gusto ni Jesus nga maoy buhaton ni Pedro ug sa iyang mga kauban? Pagkakusganong iyang napasilsil diha kanila—ug niadtong buot mahimong mga tinun-an karong adlawa—nga kon ilang gihigugma siya, sila makig-ambit sa buluhaton sa paghimog-tinun-an!
14. Diha sa ubang mga okasyon, sa unsang paagi gipakita ni Jesus ang paagi sa angay nga pagsanong sa iyang mga tinun-an sa iyang gugma?
14 Sa milabay ang pipila ka adlaw tapos niadtong panagsultihay diha sa baybayon, si Jesus mipakita diha sa usa ka bukid sa Galilea ug gisugo ang malipayong nagtigom nga mga 500 ka sumusunod: “Busa panglakaw kamo ug himoa ninyong mga tinun-an ang tanang kanasoran, . . . magatudlo kanila sa pagtuman sa tanang mga butang nga gisugo ko kaninyo.” (Mateo 28:19, 20; 1 Corinto 15:6) Palandonga lang kana! Ang mga lalaki, mga babaye, ug kabataan tanan nanagpakadawat niining sama nga sugo. Sa ulahi pa gayod, sa wala pa mosaka sa langit, gisultihan ni Jesus ang iyang mga tinun-an: “Kamo akong mga saksi . . . hangtod sa kinatumyang bahin sa yuta.” (Buhat 1:8) Tapos niining tanan nga pahimangno, dili ikahibulong nga si Pedro, sa milabay ang pila ka tuig, miingon: “Gisugo kita [ni Jesus] sa pagwali sa katawhan ug sa paghatag ug bug-os nga pagpanghimatuod.”—Buhat 10:42.
15. Maylabot sa unsa ang dili-kaduhaduhaan?
15 Dili-kaduhaduhaan kon unsay angay natong pagsanong sa gugma ni Jesus. Sama sa iyang gisugo sa mga apostoles: “Kon tumanon ninyo ang akong mga sugo, magapabilin kamo sa akong gugma . . . Kamo mga higala ko kon magatuman kamo sa akong isugo kaninyo.” (Juan 15:10-14) Ang pangutana mao, Magpakita ka ba ug apresasyon sa gugma ni Jesus pinaagi sa pagsunod sa iyang sugo sa pag-ambit sa buluhatong paghimog-tinun-an? Matuod, dili kini masayon alang kanimo tungod sa nagkalainlaing mga katarongan. Apan dili usab kadto masayon kang Jesus. Palandonga ang mga kausaban nga gikinahanglan alang kaniya.
Sunda ang Panig-ingnan ni Jesus
16. Unsang katingalahang panig-ingnan ang gihatag ni Jesus?
16 Gitagamtam sa bugtong Anak sa Diyos ang labaw nga posisyon sa langitnong himaya nga superyor pa kay sa tanang mga manulonda. Siya adunahan gayod kaayo! Apan siya kinabubut-ong mihaw-as sa iyang kaugalingon, natawo ingong usa ka sakop sa kabos nga pamilya, ug nagdako nga gilibotan sa masakiton, himalatyong mga tawo. Iyang gihimo kini alang kanato, sama sa gipatin-aw ni apostol Pablo: “Kamo nasayod na sa dili-takos nga kalulot sa atong Ginoong Jesu-Kristo, nga bisan tuod siya dato siya nahimong kabos alang kaninyo, aron kamo mahimong dato pinaagi sa iyang kakabos.” (2 Corinto 8:9; Filipos 2:5-8) Pagkamaayo nga panig-ingnan! Pagkadako nga pagpasundayag sa gugma! Walay bisan usa ang nakahatag ug labaw pa ug nakaantos ug grabe pa alang sa uban. Walay bisag usa ang nagpaposible aron ang uban makatagamtam ug labaw nga bahandi, oo, kinabuhing walay kataposan diha sa kahingpitan!
17. Unsang dalan ang gibutang sa atong atubangan, ug unsay mosangpot sa pagsunod niana?
17 Kita makasunod sa panig-ingnan ni Jesus ug makahatag ug samang kaayohan sa uban. Sa masubsob, giawhag ni Jesus ang mga tawo nga mahimong iyang mga sumusunod. (Marcos 2:14; Lucas 9:59; 18:22) Gani, si Pedro misulat: “Ngadto niini nga dalan gitawag kamo, tungod kay si Kristo nag-antos alang kaninyo, naghatag kaninyo ug panig-ingnan aron inyong sundon pag-ayo ang iyang mga tunob.” (1 Pedro 2:21) Mosanong ka ba sa gugma ni Kristo bisan kon magkahulogan kinig pag-antos aron makaalagad sa iyang Amahan sama kaniya? Pagkadako sa kaayohang mahatag niini nga dalan ngadto sa uban! Gani, pinaagi sa pagsunod sa panig-ingnan ni Jesus, pinaagi sa bug-os nga pagpadapat sa mga pagtulon-an nga iyang nadawat gikan sa iyang Amahan, “maluwas mo ang imong kaugalingon ug ang mga magapatalinghog kanimo.”—1 Timoteo 4:16.
18. (a) Unsang panig-ingnan ang gihatag ni Jesus maylabot sa iyang tinamdan sa mga tawo? (b) Sa unsang paagi misanong ang mga tawo sa personalidad ni Jesus?
18 Aron labing matabangan ang mga tawo, kinahanglang mobati usab kita ug sama sa gibati ni Jesus. Ang tagna mahitungod kaniya nagaingon: “Siya maluoy sa timawa ug sa kabos.” (Salmo 72:13) Ang iyang mga sumusunod makamatikod nga “gihigugma” ni Jesus kadtong iyang gipakigsultihan ug nga siya tinuod gayod nga motabang kanila. (Marcos 1:40-42; 10:21) “Sa pagkakita sa mga tawo,” ang Bibliya nag-ingon, “naluoy siya kanila, tungod kay sila gipanitan ug nagkatibulaag nga samag karnero nga walay magbalantay.” (Mateo 9:36) Bisan ang mabug-at ug mga sala nakabati sa iyang gugma ug nadani kaniya. Pinaagi sa iyang tuno sa tingog, paggawi, ug paagi sa pagtudlo, sila mibating haruhay uban kaniya. Ingong resulta, gipangita siya bisan sa tinamay nga mga maniningil ug buhis ug mga babayeng bigaon.—Mateo 9:9-13; Lucas 7:36-38; 19:1-10.
19. Sa unsang paagi gisundog ni Pablo si Jesus, ug unsay mosangpot sa atong pagbuhat ug sama?
19 Ang unang-siglong mga tinun-an ni Jesus misundog sa iyang mahigugmaong panig-ingnan. Gisulatan ni Pablo ang pipila nga iyang gialagaran: “Nagmalulot kami diha sa taliwala ninyo, ingon sa iwa nga nagaalima sa iyang kaugalingong mga anak . . . ingon sa amahan ngadto sa iyang mga anak, kami padayong nagmaymay sa matag usa kaninyo, ug paglipay ug pagpanghimatuod kaninyo.” (1 Tesalonica 2:7-11) Gibati ba ninyo ang samang tinuod nga kabalaka niadtong anaa sa inyong teritoryo nga maoy bation sa mahigugmaong mga ginikanan alang sa ilang minahal nga mga anak? Ang pagpakita ug samang kabalaka sa imong tuno sa tingog, sa ekspresyon sa imong nawong, ug sa imong aksiyon mopahimo sa balita sa Gingharian nga madanihon ngadto sa mga karnerohon.
20, 21. Unsa ang pipila ka modernong-adlawng mga pananglitan sa mga tawo nga nagasunod sa panig-ingnan sa gugma ni Jesus?
20 Sa usa ka matugnaw nga adlaw sa Espanya duha ka Saksi nakahinagbo ug tigulang nga babaye nga nagsungkod diin ang iyang balay grabe kaayo ka bugnaw tungod kay nahurot na ang kahoy nga igsusugnod. Siya naghulat sa iyang anak nga lalaki nga makapauli gikan sa trabaho aron sa pagbugha pa ug kahoy. Ang mga Saksi ang mibugha sa kahoy ug gibinlan usab siya ug mga magasin aron iyang mabasa. Sa dihang mipauli na ang anak nakadayeg kaayo siya sa mahigugmaong pagtagad sa mga Saksi sa iyang inahan nga iyang gibasa ang basahon, misugod sa pagtuon sa Bibliya, gibawtismohan, ug sa ulahi misulod sa payunir nga ministeryo.
21 Sa Australia gisultihan sa usa ka tawo ug sa iyang asawa ang miduaw nga mga Saksi nga wala silay kuwarta nga ikapalit ug pagkaon sa ilang pamilya. Milakaw ang magtiayong Saksi ug namalit ug pagkaon diha sa groseriya apil na ang mga karmelitos alang sa mga anak. Nakahilak ang mga ginikanan, ug miingon nga nawad-an na sila ug paglaom nga gumikan niana sila nagplano nga maghikog. Ang duha nagsugod sa pagtuon sa Bibliya, ug ang asawa bag-o pa nga gibawtismohan. Usa ka babaye sa Tinipong Bansa nga may pagpihig sa mga Saksi mitaho human nakaila ug usa: “Wala na ako makahinumdom kon unsay among giestoryahan apan nahinumdom ako sa iyang pagkamaluloton kaayo kanako ug unsa siya ka maabiabihon ug mapaubsanon. Tinuod nga nadani ako kaniya ingong tawo. Giapresyar ko gayod ang iyang pagkahimong higala hangtod karong adlawa.”
22. Human sa pagsusi sa kinabuhi ni Jesus, unsay atong konklusyon mahitungod kaniya?
22 Kon kita mosanong sa gugma ni Jesus pinaagi sa pagbuhat sa buluhaton nga iyang gihimo sa paagi sa pagbuhat niya niana, pagkakatingalahang mga panalangin ang atong matagamtam! Ang pagkabantogan ni Jesus dayag ug hilabihan gayod. Kita mapukaw sa pagpalanog sa mga pulong sa Romanong gobernador nga si Poncio Pilato: “Tan-awa! Ang tawo!” Oo, “Ang tawo,” ang labing bantogang tawo nga nabuhi sukad.—Juan 19:5.
Unsaon Nimo Pagtubag?
◻ Unsa ka dako ang gugma ni Jesus?
◻ Tungod sa gugma ni Jesus kinsa ang kinahanglan natong higugmaon, ug ang iyang gugma nagaaghat kanato sa pagbuhat ug unsa?
◻ Unsa nga buluhaton nga buot ni Jesus nga maoy atong buhaton?
◻ Sa unsang paagi dato si Jesus, ug nganong siya nahimong kabos?
◻ Sa unsang paagi sundon nato si Jesus sa paagi sa iyang pag-alagad sa katawhan?
[Hulagway sa panid 15]
Si Jesus naghatag ug sumbanan sa pagpakitag gugma
[Hulagway sa panid 17]
Gamhanang gipakita ni Jesus kon sa unsang paagi ipasundayag sa iyang mga tinun-an ang gugma alang kaniya