Tugoti ang Pulong sa Diyos nga Mogiya sa Imong mga Lakang
“Ang imong pulong maoy lampara sa akong tiil, ug kahayag sa akong alagianan.”—SALMO 119:105.
1, 2. Nganong ang kadaghanang tawo wala molampos sa pagpangitag tinuod nga kalinaw ug kalipay?
DIHA bay higayon nga nangutana ka kon unsang dalana ang angay nimong subayon? Tingali duol ka na sa imong adtoan apan wala ka makaseguro kon asa ka moliko. O tingali nasaag ka ug kinahanglan kang mobalik sa agi. Sa bisan hain niana, dili ba maalamon nga sundon ang gisulti sa usa nga sinati sa maong dapit? Ang maong tawo makatabang kanimo aron makaabot ka sa imong adtoan.
2 Sulod sa libolibong katuigan, ang katawhan sa katibuk-an naningkamot sa paggiya sa ilang kinabuhi nga wala mangayog tabang sa Diyos. Apan kon silasila ra, ang dili-hingpit nga mga tawo wala gayoy mahimo. Dili gayod nila makaplagan ang dalan nga motultol ngadto sa tinuod nga kalinaw ug kalipay. Nganong wala man sila makakaplag niana? Kapin sa 2,500 ka tuig kanhi, ang manalagnang si Jeremias miingon: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Si bisan kinsa nga mosulay sa pagtultol sa iyang lakang nga dili mangayog tabang gikan sa usa nga may katakos, tinong mapakyas. Sa pagkatinuod, ang katawhan nagkinahanglag pagtultol!
3. Nganong si Jehova nga Diyos takos gayod nga motultol sa katawhan, ug unsay iyang gisaad?
3 Si Jehova nga Diyos takos gayod nga motagana sa maong pagtultol. Ngano? Tungod kay siya nakasabot sa pagkagama sa mga tawo labaw kay ni bisan kinsa. Ug nahibalo gayod siya kon sa unsang paagi ang tawhanong rasa nahitipas ug nahisalaag. Nahibalo usab siya kon unsay gikinahanglan aron mahibalik sila sa hustong dalan. Dugang pa, ingong Maglalalang, si Jehova nahibalo gayod kon unsay labing maayo alang kanato. (Isaias 48:17) Busa, bug-os kitang makasalig sa iyang saad nga nasulat diha sa Salmo 32:8: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” Makaseguro kita nga si Jehova makatagana sa kinamaayohang pagtultol. Apan sa unsang paagi siya nagagiya kanato?
4, 5. Sa unsang paagi ang mga pulong ug pahinumdom sa Diyos makatultol kanato?
4 Ang usa ka salmista miingon diha sa iyang pag-ampo kang Jehova: “Ang imong pulong maoy lampara sa akong tiil, ug kahayag sa akong alagianan.” (Salmo 119:105) Ang mga pulong ug pahinumdom sa Diyos makita diha sa Bibliya, ug makatabang kini kanato sa pagbuntog sa kababagan nga atong maatubang diha sa dalan nga atong gisubay. Sa pagkatinuod, kon basahon nato ang Bibliya ug magpagiya kita niana, atong masinati mismo ang gihubit sa Isaias 30:21: “Ang imong mga igdulungog makadungog ug pulong sa imong luyo nga mag-ingon: ‘Mao kini ang dalan. Lakaw kamo niini.’”
5 Apan, matikdi nga ang Salmo 119:105 nagpunting sa duha ka magkalambigit nga katuyoan sa Pulong sa Diyos. Una, kini nagsilbing lampara sa atong tiil. Sa dihang kita mag-atubang sa adlaw-adlawng mga suliran, ang mga prinsipyo nga makaplagan diha sa Bibliya maggiya sa atong mga lakang aron kita makahimog maalamong mga desisyon ug makalikay sa mga lit-ag ug laang niining kalibotana. Ikaduha, ang mga pahinumdom sa Diyos maglamdag sa atong alagianan, nga motabang kanato sa paghimog mga pagpili nga nahiuyon sa atong paglaom nga mabuhing walay kataposan sa gisaad sa Diyos nga Paraiso. Sanglit hayag ang dalan sa unahan, atong makitang daan ang mga sangpotanan—maayo o daotan—sa usa ka buhat. (Roma 14:21; 1 Timoteo 6:9; Pinadayag 22:12) Susihon nato nga mas detalyado pa kon sa unsang paagi ang pulong sa Diyos nga makita diha sa Bibliya mahimong lampara sa atong tiil ug kahayag sa atong alagianan.
“Lampara sa Akong Tiil”
6. Ilalom sa unsang mga sirkumstansiya nga ang Pulong sa Diyos mahimong lampara sa atong tiil?
6 Kada adlaw, kita mohimog mga desisyon. Ang ubang mga desisyon ginagmay ra tingali, apan usahay mag-atubang kitag situwasyon nga magsulay sa atong moralidad, pagkamatinud-anon, o sa atong neyutralidad. Aron malamposong maatubang ang maong mga pagsulay, kinahanglan nga ang atong ‘mga gahom sa pagsabot mabansay sa pag-ila sa maayo ug sa daotan.’ (Hebreohanon 5:14) Pinaagi sa pagkuhag tukmang kahibalo sa Pulong sa Diyos ug pagsabot sa mga prinsipyo niini, atong mabansay ang atong tanlag aron kita makahimog mga desisyon nga makapahimuot kang Jehova.—Proverbio 3:21.
7. Hubita ang usa ka situwasyon diin ang usa ka Kristohanon mahimong makiling sa pagpakig-uban sa dili-magtutuong mga kauban sa trabaho.
7 Tagda ang usa ka pananglitan. Ikaw ba usa ka hamtong nga tawo nga sinserong naningkamot sa paglipay sa kasingkasing ni Jehova? (Proverbio 27:11) Kon mao, dalayegon ka. Apan handurawa sa makadiyot nga ang pipila nimo ka kauban sa trabaho nagtanyag kanimo ug tiket aron mouban ka kanila sa pagtan-aw ug usa ka indigay sa esport. Ganahan silang makig-uban nimo sa trabahoan ug gusto nilang makighugoyhugoy kanimo sa gawas sa trabahoan. Tingali nagtuo ka gayod nga kining mga tawhana dili man daotan. Basin aduna usab silay maayong mga prinsipyo sa kinabuhi. Unsa may imong buhaton? May kapeligrohan ba ang pagdawat sa maong pagdapit? Sa unsang paagi makatabang kanimo ang Pulong sa Diyos sa paghimog hustong desisyon niining butanga?
8. Unsang Kasulatanhong mga prinsipyo ang motabang kanato sa pagpangatarongan bahin sa pagpakig-uban?
8 Tagda ang pipila ka prinsipyo sa Kasulatan. Ang unang mosantop sa hunahuna mao kanang makaplagan diha sa 1 Corinto 15:33, nga nag-ingon: “Ang daotang pakig-uban makadaot sa mapuslanong pamatasan.” Ang pagsunod ba niining prinsipyoha nagkinahanglan nga likayan nimo sa bug-os ang mga dili-magtutuo? Ang tubag sa Kasulatan nianang pangutanaha maoy dili. Kon buot hunahunaon, si apostol Pablo mismo nagpakitag mahigugmaong konsiderasyon sa “tanang matang sa katawhan,” lakip na sa mga dili-magtutuo. (1 Corinto 9:22) Ang mismong diwa sa Kristiyanidad nagkinahanglan nga kita magpakitag kaikag sa uban—lakip na niadtong dili nato samag pagtuo. (Roma 10:13-15) Sa pagkatinuod, sa unsang paagi masunod nato ang tambag nga ‘buhaton ang maayo ngadto sa tanan’ kon atong ipalain ang atong kaugalingon gikan sa mga tawo nga lagmit nagkinahanglan sa atong tabang?—Galacia 6:10.
9. Unsang tambag sa Bibliya ang motabang kanato sa pagkahimong timbang diha sa atong relasyon sa atong mga kauban sa trabaho?
9 Apan, dunay klarong kalainan tali sa pagkamahigalaon ngadto sa usa ka kauban sa trabaho ug sa pagpakigsuod kaniya. Dinhi niini nalangkit ang laing prinsipyo sa Kasulatan. Gipasidan-an ni apostol Pablo ang mga Kristohanon: “Ayaw pagpayugo nga dili timbang sa mga dili-magtutuo.” (2 Corinto 6:14) Unsay kahulogan sa pulong “ayaw pagpayugo nga dili timbang sa mga dili-magtutuo”? Ang ubang mga Bibliya naghubad niining mga pulonga ingong “ayaw pagpakig-uban,” “ayaw sulayi nga mahisama kaniya,” o “hunong na sa pag-ugmad ug dili-hustong relasyon uban kaniya.” Kanus-a nga ang imong relasyon sa usa ka kauban sa trabaho mahimong dili-husto? Kanus-a kini molapas sa utlanan ug mahimong dili timbang nga pagpayugo? Ang Pulong sa Diyos, ang Bibliya, makatultol sa imong lakang niining situwasyona.
10. (a) Sa unsang paagi mipili si Jesus ug mga kauban? (b) Unsang mga pangutana ang makatabang sa usa ka tawo sa paghimog maayong mga desisyon bahin sa pagpakig-uban?
10 Tagda ang panig-ingnan ni Jesus, kinsa sukad sa panahon sa paglalang aduna nay gugma sa mga tawo. (Proverbio 8:31) Sa dinhi pa sa yuta, naugmad niya ang suod nga relasyon uban sa iyang mga sumusunod. (Juan 13:1) Siya ‘mibati pa ganig gugma’ sa usa ka tawo nga sayop nga nagiyahan sa iyang relihiyon. (Marcos 10:17-22) Apan naghimo usab si Jesus ug tatawng mga utlanan mahitungod sa iyang pagpili ug suod nga mga kauban. Wala siya makigsuod sa mga tawo nga dili gayod interesado sa pagbuhat sa kabubut-on sa iyang Amahan. Sa usa ka higayon, si Jesus miingon: “Kamo akong mga higala kon inyong buhaton ang ginasugo ko kaninyo.” (Juan 15:14) Tinuod, ikasinabot tingali nimo ang usa ka kauban sa trabaho. Apan pangutan-a ang imong kaugalingon: ‘Andam ba kining tawhana sa pagbuhat sa gisugo ni Jesus? Buot ba niyang makakat-on bahin kang Jehova, ang usa nga pagasimbahon sumala sa sugo ni Jesus? Ang iya bang moral nga mga sukdanan susama sa akong gisunod isip Kristohanon?’ (Mateo 4:10) Samtang ikaw makigsulti sa imong mga kauban sa trabaho ug magpadapat sa mga sukdanan sa Bibliya, mahimong tataw ang tubag niining mga pangutanaha.
11. Paghatag ug mga pananglitan diin ang Pulong sa Diyos angayng maggiya sa atong mga lakang.
11 Daghan pang mga situwasyon diin ang Pulong sa Diyos mahisamag lampara sa atong tiil. Pananglitan, ang walay-trabaho nga Kristohanon tanyagan tingalig trabaho nga gikinahanglan niya pag-ayo. Apan, ang eskedyul makahurot sa iyang panahon ug kusog, ug kon dawaton niya kana, makapalta siya sa ubay-ubayng Kristohanong mga tigom ug dili makapakigbahin sa ubang mga kalihokan nga nalangkit sa matuod nga pagsimba. (Salmo 37:25) Tingali ang laing Kristohanon gihaylo pag-ayo sa pagtan-aw ug kalingawan nga klarong naglapas sa mga prinsipyo sa Bibliya. (Efeso 4:17-19) Ang lain pa dali ra tingaling mahiubos sa mga kahuyangan sa mga isigkamagtutuo. (Colosas 3:13) Nianang tanang kahimtang, kinahanglang tugotan nato ang Pulong sa Diyos nga mahimong lampara sa atong tiil. Sa pagkatinuod, pinaagi sa pagsunod sa mga prinsipyo sa Bibliya, kita malamposong makaatubang sa bisan unsang suliran sa kinabuhi. Ang Pulong sa Diyos “mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.”—2 Timoteo 3:16.
“Kahayag sa Akong Alagianan”
12. Sa unsang paagi ang Pulong sa Diyos usa ka kahayag sa atong alagianan?
12 Ang Salmo 119:105 nag-ingon usab nga ang Pulong sa Diyos mahimong maglamdag sa atong alagianan, nga magdan-ag sa dalan sa unahan. Nahibalo kita kon unsay anaa sa umaabot, kay gipatin-aw sa Bibliya ang kahulogan sa makapaguol nga mga kahimtang sa kalibotan ug kon unsay sangpotanan niini. Oo, kita nasayod nga kita nagkinabuhi sa “kataposang mga adlaw” niining daotang sistema sa mga butang. (2 Timoteo 3:1-5) Ang pagkahibalo kon unsay anaa sa unahan angayng makaapektar gayod sa atong paagi sa pagkinabuhi karon. Si apostol Pedro misulat: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!”—2 Pedro 3:11, 12.
13. Sa unsang paagi ang pagkadinalian sa atong panahon makaapektar sa atong panghunahuna ug paagi sa pagkinabuhi?
13 Ang atong panghunahuna ug paagi sa pagkinabuhi kinahanglang magbanaag sa atong hugot nga pagtuo nga “ang kalibotan nagakahanaw ingon man ang tinguha niini.” (1 Juan 2:17) Ang pagpadapat sa mga giya sa Bibliya motabang kanato sa paghimog maalamong mga desisyon maylabot sa atong mga tumong sa umaabot. Pananglitan, si Jesus nag-ingon: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mateo 6:33) Pagkadalayegon nga makita ang daghang batan-on nga nagpakitag pagtuo sa gipamulong ni Jesus pinaagi sa pagsulod sa bug-os-panahong ministeryo! Ang uban—lakip na ang enterong mga pamilya—boluntaryong namalhin ngadto sa kayutaan diin adunay dakong panginahanglan sa mga magmamantala sa Gingharian.
14. Sa unsang paagi gipalapad sa usa ka Kristohanong pamilya ang ilang ministeryo?
14 Tagda ang usa ka Kristohanong pamilya nga may upat ka membro kinsa mibalhin ngadto sa Dominican Republic gikan sa Tinipong Bansa aron sa pag-alagad diha sa usa ka kongregasyon sa lungsod nga may molupyo nga 50,000. Ang kongregasyon adunay mga 130 ka magmamantala sa Gingharian. Apan sa Abril 12, 2006, duolan sa 1,300 ang mitambong sa Memoryal sa kamatayon ni Kristo! Ang umahan sa maong dapit ‘puti na kaayo aron anihon’ nga human sa lima lamang ka bulan, ang amahan, inahan, anak nga lalaki, ug anak nga babaye nagdumala na ug 30 ka panagtuon sa Bibliya. (Juan 4:35) Misaysay ang amahan: “Ang kongregasyon adunay 30 ka igsoon nga mibalhin dinhi aron sa pagtabang. Mga 20 ang gikan sa Tinipong Bansa, samtang ang uban naggikan sa Bahamas, Canada, Espanya, Italya, ug New Zealand. Sila nangabot nga naghinamhinam sa pagpakigbahin sa ministeryo ug adunay dakong epekto sa kadasig sa lokal nga mga igsoon.”
15. Unsang mga panalangin ang imong natagamtam tungod sa pag-una nimo sa mga intereses sa Gingharian?
15 Siyempre, daghan ang dili makahimo sa pagbalhin sa laing nasod aron moalagad diin mas dako ang panginahanglan. Apan kadtong makahimo niana—o makapasibo sa ilang mga sirkumstansiya aron makapakigbahin niana—seguradong makatagamtam ug daghang panalangin pinaagi sa pagpakig-ambit niining bahina sa ministeryo. Ug bisan asa ka mag-alagad, tagamtama ang kalipay nga maimoha sa dihang ikaw mag-alagad kang Jehova uban sa tibuok mong kusog. Kon unahon nimo ang mga intereses sa Gingharian, si Jehova nagsaad nga ‘ibubo nganha kanimo ang panalangin hangtod nga wala nay panginahanglan.’—Malaquias 3:10.
Pagbatog Kaayohan Gikan sa Giya ni Jehova
16. Sa unsang paagi makabaton kitag kaayohan kon magpagiya kita sa Pulong sa Diyos?
16 Sa ato nang nasabtan, ang mga pulong ni Jehova naggiya kanato sa duha ka magkalambigit nga paagi. Kini nagsilbing lampara sa atong tiil, nga nagtabang kanato sa pagpadayon sa pagsubay sa hustong direksiyon ug naggiya kanato sa dihang kinahanglan kitang mohimog mga desisyon. Ug kini maglamdag sa atong alagianan, nga makatabang kanato nga maklaro kon unsay anaa sa unahan. Kana, sa baylo, motabang kanato sa pagsunod sa tambag ni Pedro: “Andama ang inyong kaisipan alang sa buluhaton, hupti ninyo sa bug-os ang maayong panghunahuna; ibutang ang inyong paglaom diha sa dili-takos nga kalulot nga igahatag kaninyo inigpadayag ni Jesu-Kristo.”—1 Pedro 1:13.
17. Sa unsang paagi ang pagtuon sa Bibliya motabang kanato sa pagsunod sa pagtultol sa Diyos?
17 Walay duhaduha nga si Jehova nagtaganag giya. Ang pangutana mao, Mosunod ka ba niana? Aron masabtan ang pagtultol nga gitagana ni Jehova, magmadeterminado nga basahon ang usa ka bahin sa Bibliya kada adlaw. Palandonga ang imong gibasa, paningkamoti nga masabtan ang kabubut-on ni Jehova, ug paghunahuna ug mga paagi nga ikapadapat nimo ang maong impormasyon sa imong kinabuhi. (1 Timoteo 4:15) Unya, gamita ang imong “gahom sa pagpangatarongan” sa dihang ikaw mohimog personal nga mga desisyon.—Roma 12:1.
18. Kon magpagiya kita sa Pulong sa Diyos, unsang mga panalangin ang atong madawat?
18 Kon tugotan nato, ang mga prinsipyo nga makaplagan diha sa Pulong sa Diyos maglamdag sa atong hunahuna ug mogiya kanato sa dihang kita mohimog mga desisyon maylabot sa hustong dalan nga pagasubayon. Makasalig kita nga ang nasulat nga mga pulong ni Jehova maghimo “nga maalamon sa walay kasinatian.” (Salmo 19:7) Kon magpagiya kita sa Bibliya, atong mabatonan ang hinlong tanlag ug ang katagbawan nga bation gumikan sa pagpahimuot kang Jehova. (1 Timoteo 1:18, 19) Kon tugotan nato ang Pulong sa Diyos nga mogiya sa atong mga lakang sa adlaw-adlaw, gantihan kita ni Jehova sa kinalabwang panalangin nga kinabuhing walay kataposan.—Juan 17:3.
Nahinumdom Ka Ba?
• Nganong hinungdanon nga magpagiya kang Jehova nga Diyos sa atong mga lakang?
• Sa unsang paagi ang Pulong sa Diyos mahimong lampara sa atong tiil?
• Sa unsang paagi ang Pulong sa Diyos mahimong kahayag sa atong alagianan?
• Sa unsang paagi ang pagtuon sa Bibliya motabang kanato sa pagsunod sa pagtultol sa Diyos?
[Hulagway sa panid 15]
Kanus-a mahimong dili-maalamon ang pagpakig-uban sa dili-magtutuo?
[Hulagway sa panid 16]
Ang suod nga mga kauban ni Jesus mao kadtong nagbuhat sa kabubut-on ni Jehova
[Mga hulagway sa panid 17]
Gipasundayag ba sa atong paagi sa pagkinabuhi nga atong giuna ang mga intereses sa Gingharian?