“Usa ka Pagsulay sa Katiunay sa Imong Gugma”

UNSAY gipahinumdom kanimo sa mga pulong sa ibabaw? Paglutos ug kalisdanan? Pagkasinakit? Kanang mga pulonga gisulat sa sinugdan ni apostol Pablo diha sa usa ka sulat ngadto sa mga Kristohanon sa karaang Corinto. Kana bililhon kaayo sa katawhan ni Jehova karong adlawa sa pagkaagi nga ang ‘katiunay sa ilang gugma’ susamang ginasulayan. Apan sa unsang paagi? Sa pagtubag, susihon nato ang nahitaboan sa mga pulong ni Pablo.

Ang Pasikaranan sa Pagsulay

Mga duha ka dekada tapos sa pagtukod sa Kristiyanidad, ang kongregasyon sa Jerusalem nalisdan sa pinansiyal. Kay nagpuyo sa maong kuta sa Hudiyonhong pagsupak ug pagpihigpihig, latas sa katuigan ang mga Kristohanon “nag-antos sa usa ka dakong bugno ilalom sa mga kalisod,” nga nakasinati pa sa ‘pagsakmit sa ilang katigayonan.’ (Hebreohanon 10:32-34) Ang tabang sa gawas gikinahanglan.

Sa pagkamatuod, ang ilang Hentil nga kaigsoonan angay untang natandog nga mosanong sa ilang kahimtang. Kon buot sabton, utangan sila sa espesyal nga “utang” sa mga Kristohanon sa Jerusalem. Dili ba gikan man sa Jerusalem nga ang maayong balita mikanat ngadto sa mga Hentil? Si Pablo nangatarongan: “Kon ang Hudiyong mga Kristohanon nakig-ambit sa ilang espirituhanong mga bahandi uban sa mga Hentil, ang mga Hentil may dayag nga katungdanan nga moamot alang sa ilang materyal nga mga panginahanglan.”​—Roma 15:27, The New English Bible.

Pag-organisar sa Koleksiyon

Si Pablo gisugo sa nagmandong lawas nga “hinumdoman ang kabos [nga mga Kristohanon].” (Galacia 2:10) Busa gipahibalo niya ang mga Kristohanon sa Uropa ug sa Asia Minor mahitungod sa kahimtang sa Jerusalem. Ania ang mga tugon ni Pablo: “Karon mahitungod sa amot alang sa mga balaan, sumala sa akong gitugon sa mga kongregasyon sa Galacia, mao usab kini ang inyong pagabuhaton. Sa matag unang adlaw sa semana ang matag usa kaninyo sa inyong kaugalingong panimalay magagahin sumala sa iya tingaling pag-uswag, aron nga inig-abot ko dili na himoon ang mga amot.”​—1 Corinto 16:1, 2.

Pinaagi sa pagbadyet sa ilang salapi niining paagiha, walay mobati nga giobligar o gipugos sa dihang himoon na ang pag-amotay. Ang mga igsoon walay kahadlok nga ang ilang salapi gamiton sa dili hustong paagi o mausik. Ang ‘inuyonang mga lalaki’ lamang ang tugotan sa paghatod sa natigom nga salapi, nga si Pablo mokuyog mismo kon gikinahanglan.​—1 Corinto 16:3-5.

Ang sanong sa mga taga-Corinto? Bisan pag ang mga igsoon miuyon sa tambag ni Pablo, ang amot wala gayod mapadala. (2 Corinto 8:6, 10, 11) Tingali ang mga ansiano puliki kaayo sa pagsulbad sa pagkabahinbahin, imoralidad, ug ubang suliran sa kongregasyon nga bahin niana si Pablo nagsulat.

‘Magmadagayaon sa Maluluton nga Paghatag’

Sa bisan unsang paagi, gisulatan sila ni Pablo ug laing sulat nga nag-ingon: “Karon buot kami nga masayod kamo, mga igsoon, mahitungod sa dili-takos nga kalulot sa Diyos nga gihatag ngadto sa mga kongregasyon sa Macedonia, nga panahon sa dakong pagsulay ilalom sa pagsakit ang ilang madagayaon nga kalipay ug ang ilang tuman nga kakabos nagpadagaya sa ilang bahandi sa ilang pagkamanggihatagon. Kay sumala sa ilang tinuod nga katakos, oo, ako nagapamatuod, labaw sa ilang tinuod nga katakos kadto gihimo, samtang sa kinabubut-on sila nagpadayon sa pagpangamuyo kanamo alang sa pribilehiyo sa malulutong paghatag ug alang sa bahin sa ministeryo nga gilaraw alang sa mga balaan. Ug dili lamang sumala sa among gilaoman, kondili sa sinugdan sila naghatag sa ilang kaugalingon ngadto sa Ginoo ug nganhi kanamo pinaagi sa kabubut-on sa Diyos. Kadto miagak namo sa pag-agda kang Tito nga, maingon nga siya ang nag-una niini sa inyong taliwala, angay usab nga iyang tiwason kining samang malulutong paghatag sa inyong bahin. Bisan pa niana, maingon nga kamo nagamadagayaon sa tanang butang, sa pagtuo ug sa pulong ug sa kahibalo ug sa bug-os nga pagkamainiton ug niining among gugma alang kaninyo, hinaot kamo usab modagaya niining malulutong paghatag.”​—2 Corinto 8:1-7.

Ang panig-ingnan sa nagsakripisyo-sa-kaugalingong mga taga-Macedonia mihatag sa mga taga-Corinto ug daghan nga palandongon. Ang Corinto maoy sanglitanan tungod sa iyang bahandi, kaluho, ug komersiyo. Ang pila sa mga igsoon didto tingali may pagkakabos, apan, sa katibuk-an, ang kongregasyon pihong maarang-arang kay sa mga Kristohanon sa Macedonia nga diha sa “tuman nga kakabos.” Bisan pa niana, ang mga taga-Macedonia miamot ug “labaw sa ilang tinuod nga katakos.” Wala na sila agdaha ni Pablo sa pag-amot. Sila ‘nangamuyo’ pa ‘uban sa paghangyo’ nga sila makabahin sa maong pag-amot! Kadto pamatuod nga ang mga Kristohanon sa Macedonia tinuod nga “naghatag sa ilang kaugalingon ngadto sa Ginoo [sa walay-pagpanukong pagpahinungod] ug kang [Pablo ug sa iyang mga kauban],” nga nagpasakop sa ilang teokratikanhong pagdumala.

Gisulayan Bahin sa Ilang Gugma ug Kamahinatagon

Ang mga taga-Corinto kaha samang matukmod nga ‘modagaya sa malulutong paghatag’? Sa unang miduaw sa Corinto, si Pablo napugos sa pagsuportar sa iyang kaugalingon ingong tigbuhat ug tolda. (Buhat 18:1-3) Gipadayon niya kining lagdaa sa pagsuportar sa kaugalingon bisan pag natukod ang usa ka kongregasyon didto, nga milikay sa paggamit sa iyang “awtoridad” ingong bug-os-panahong magwawali aron modawat sa hinabang nga salapi.​—1 Corinto 9:3-12.

Matud sa komentarista sa Bibliya nga si Thomas Scott: “Malagmit, nasaksihan niya ang pila ka butang sa kinaiya sa mga Kristohanon sa Corinto, nga sa sinugdan maoy nakadani niya sa dili pagdawat ug suportar gikan kanila.” Tingali kay naimpluwensiyahan sa mahakogong materyalismo alirong nila, ang may pagkadatong mga Kristohanon basin sa yano dili hilig nga mahimong mahinatagon. Si Pablo basin nahadlok usab nga ang mahunahunaon-sa-negosyong mga taga-Corinto magkuwestiyon sa iyang motibo kon modawat siyag pinansiyal nga suportar. Basin diha pa kadtong si kinsa, sama sa pipila sa Tesalonica, tapolan ug nagtinguhag pasangil aron magsalig sa pangabuhi sa ilang isigka-Kristohanon.​—2 Tesalonica 3:7-12.

Bisan unsay kahimtang, si Pablo ug ang iyang mga kauban mipalabi sa pagsuportar sa ilang kaugalingon, “aron nga kami dili makahatag ug babag sa maayong balita mahitungod kang Kristo.” (1 Corinto 9:12) Ugaling, sa wala madugay si Pablo naglisod sa pinansiyal, nga ang balita nakaabot sa kabos nga mga igsoong nagpuyo sa Filipos. Giingnan ni Pablo ang mga taga-Corinto: “Ang ubang mga kongregasyon akong gikawatan pinaagi sa pagdawat sa mga tagana aron makaalagad kaninyo; ug ngani sa dihang ako diha uban kaninyo ug nakaagom ug kawalad-on, ako wala magpabug-at kang bisan kinsa, kay ang mga igsoon nga nangabot gikan sa Macedonia [lagmit sa Filipos] madagayaong nagtagana sa akong kakulangan. Oo, sa tanang panahon ako wala magpabug-at kaninyo ug magpadayon nga ingon.”​—2 Corinto 11:8, 9; itandi ang Filipos 4:15, 16.

Tinuod, si Pablo mismo miangkon nga siya wala ‘modawat ug mga tagana’ gikan sa mga taga-Corinto. Apan sa dihang gisulayan ni Pablo ang pagbalibad sa pag-abiabi sa babayeng taga Filipos nga si Lidia, ‘siya nagpaadto gayod kanamo.’ (Buhat 16:15) Gipakita ba sa mga taga-Corinto ang samang malahutayon nga kabalaka sa materyal nga kaayohan ni Pablo? Ang usa mahibulong. Sa bisan unsang paagi, nasabtan ni Pablo nga ang kahimtang nga naglangkit sa kongregasyon sa Jerusalem mihatag ug higayon sa pagsusi kon kaha ang mga taga-Corinto may hilig nga maghinakog o kon kaha miuswag sa kamahinatagon. Busa siya miagda:

“Dili sa paagi sa pagsugo kaninyo, kondili . . . sa pagsulay sa katiunay sa inyong gugma, nga ako nagasulti. Kay dili ko tuyo nga kini mahimong sayon alang sa uban, apan lisod alang kaninyo [nga mao, dili ingon nga ang uban makalingkawas ug kamo magaantos; kondili pinaagi sa pag-angay-angay ang inyong kapin basin makahulip sa ilang kakulangan, aron ang ilang kapin makahulip usab sa inyong kakulangan, aron mahimo ang pag-angay-angay. Sumala sa nahisulat: ‘Ang tawo nga may daghan wala makabaton ug daghan kaayo, ug ang tawong may diyutay wala makabaton ug diyutay kaayo.’”​—2 Corinto 8:8, 13-15.

Dayag, nakalabang ang mga taga-Corinto sa ilang pagsulay. Usa ka panahon sa ulahi si Pablo mitaho: “Kadtong anaa sa Macedonia ug Acaya [diin nahimutang ang Corinto] nahimuot sa pagpakigbahin sa ilang mga butang pinaagi sa pag-amot alang sa mga kabos sa mga balaan sa Jerusalem.”​—Roma 15:26.

Pag-atubang sa Pagsulay Karong Adlawa

Kita ba, hinunoa, nakapasar sa mga pagsulay sa gugma ug kamahinatagon nga nagatungha karong adlawa? Kita nagapuyo sa “mga panahon nga lisod sagubangon.” (2 Timoteo 3:1-5) Daghan kanato ang nabug-atan sa pinansiyal nga mga kapit-os. Ug usahay “ang pangibog sa unod ug ang pangibog sa mga mata ug ang mapagawalong pasundayag sa pangabuhian sa usa” nagamugna sa ilang kaugalingong mga kapit-os. (1 Juan 2:16) Pagkadali nga mahimong mahunahunaon-sa-kaugalingon, nga dili sensitibo sa mga panginahanglan sa uban!

Sa katibuk-an, ang mga Saksi ni Jehova karong adlawa nakaatubang sa mga pagsulay sa ilang inigsoong gugma sa talagsaong paagi. Pananglitan, sa Marso 3, 1985, ang usa ka linog nahitabo sa Santiago, Chile. Ginatos ka igsoon ang nawad-an sa ilang mga balay ug mga kabtangan. Dihadiha, giorganisar sa mga kongregasyon ang mga singkamot sa pagtabang. “Sa mga oras lamang,” mitaho ang mga igsoon, “ang pipila nangabot nga may pagkaon, sinina, mga habol ug ubang mapuslanong mga butang.” Ang mga amot nangabot usab gikan sa tibuok kalibotan. Ang susamang mga hitabo nahitabo sa daghang panahon latas sa katuigan.

Apan dili kinahanglang magpaabot kitag katalagman sa pagpamatuod sa atong inigsoong gugma. Kon ang isigka-Kristohanon maglisod sa pinansiyal, kita mahimong sensitibo sa ilang mga panginahanglan, nga himoon ang labaw pa kay sa pag-ingon, “Painiti ug busga ang inyong kaugalingon.” (Santiago 2:15, 16) Ug komosta kadtong anaa sa bug-os-panahong pag-alagad nga “nagapangabuhi pinaagi sa maayong balita.” Sama kang Pablo, kana sila dili moobligar ni magdahom ug pinansiyal nga tabang gikan niadtong ilang ginaalagaran. Bisan pa niana, daghan ang natukmod sa pagpakitag kamahinatagon ngadto niadtong nagahago sa ‘pagpugas ug espirituwal nga mga butang’ alang kanila.​—1 Corinto 9:11, 14.

Ug komosta ang mga panginahanglan sa tibuok-kalibotang organisasyon sa mga Saksi ni Jehova? Ang 1989 Yearbook of Jehovah’s Witnesses nagtaho nga “sa 1988 nga tuig sa pag-alagad ang Watch Tower Society migastog $29,834,676.97 sa pag-atiman sa espesyal nga mga payunir, mga misyonaryo ug nagapanawng mga magtatan-aw sa ilang sangyawanang mga asaynment.” Dagko usab ang gasto sa pag-atiman ug pagpamalit sa mga pasilidad sa sangang-buhatan, kasangkapan, makinarya, papel​—nga dili na hisgotan ang pasukaranang mga gastos sa pagkinabuhi sa tibuok-yutang pamilyang Bethel, nga karon moabot sa kapin sa 9,000! Dugang pa, mga 18 ka proyekto sa pagtukod ug pagbag-o ang karon ginahimo sa lainlaing mga sangang-buhatan, ug 19 sa among hedkuwarter sa Brooklyn, New York. Ikaw ba nakigbahin sa panalaping pagsuportar sa maong tibuok-kalibotang buluhaton?

Sama sa unang siglo, karong adlawa tanan nagapakigbahin sa pag-atiman sa maong responsabilidad, apil ang dili dato, kinsa, pinaagi sa ilang tinagdiyutayng mga amot, nagpamatuod nga mao ang lintunganay sa pinansiyal nga suportar sa Sosyedad. Ang uban nakadiskobreng mapuslanon ang pagsunod sa sulundang gihatag sa 1 Corinto 16:2 ug regular nga nagabadyet sa kaugalingong salapi aron iamot sa lokal nga Kingdom Hall. Ang pipila tingali mohukom sa pag-amot ug salapi nga direkta ngadto sa Watch Tower Society sa 25 Columbia Heights, Brooklyn, New York 11201, o sa usa sa mga sangang-buhatan niini.

Magmasaligon nga si Jehova nagamatikod niadtong si kinsa, pinaagi sa ilang kamahinatagon, nagapamatuod sa katiunay sa ilang gugma. Ayaw hikawi ang imong kaugalingon sa mga panalangin! Si Pablo misaad: “Dugang pa, ang Diyos makapadagaya sa tanan niyang dili-takos nga kalulot kaninyo, aron nga, samtang kamo sa kanunay nakabaton sa bug-os nga katagbawan sa kaugalingon sa tanang butang, kamo unta makabatog daghan alang sa tanang maayong buhat.”​—2 Corinto 9:8.

[Kahon sa panid 26]

KON GIUNSA SA PIPILA PAG-AMOT ALANG SA BULUHATON SA GINGHARIAN

◻ MGA GASA: Ang kinabubut-ong mga donasyong kuwarta ikapadalang direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, o ngadto sa lokal nga sangang-buhatan sa Sosyedad. Ang propiedad sama sa balay ug yuta, ingon man alahas o ubang mahal nga butang, ikadonar usab. Ang mubong sulat nga nagaingon nga kana donasyon angay magauban sa maong mga amot.

◻ KONDISYONAL-DONASYON NGA KAHIKAYAN: Ang kuwarta ikahatag ngadto sa Watch Tower Society nga pakuptan, uban sa kondisyon nga enkasog gikinahanglan, kini ibalik sa nagdonar.

◻ INSURANCE: Ang Watch Tower Society manganlan nga benepisyaryo sa usa ka life-insurance policy o sa retiro/pensiyon nga plano. Ang Sosyedad angay pahibaloon sa maong kahikayan.

◻ TRUSTS: Ang mga tinigom sa bangko ikabutang nga in trust for sa Sosyedad. Kon kini gihimo, palihog pahibaloa ang Sosyedad. Ang stocks, bonds, ug propiedad ikadonar usab ubos sa kahikayan nga makabenepisyo ang nagdonar panahon nga siya buhi. Kining paagiha maghanaw sa gastos ug kadili-tino sa pagpamatuod sa testamento, samtang nagatino nga madawat sa Sosyedad ang propiedad sa panahon sa pagkamatay.

◻ MGA TESTAMENTO: Ang propiedad o kuwarta ikahatag sa Watch Tower Society pinaagi sa testamento nga sa legal gihimo. Ang usa ka kopya angay ipadala ngadto sa Sosyedad.

Alang sa dugang impormasyon ug tambag bahin niini, pagsulat sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, o sa lokal nga sangang-buhatan sa Sosyedad.