Ang Pagkamanggihatagon Makalipay

INGONG mahigugmaon nga Kristohanong magtatan-aw, si apostol Pablo nahingawa gayod sa pagtabang sa iyang mga isigkamagtutuo. (2 Corinto 11:28) Busa, sa tungatunga sa katuigang 50 sa unang siglo sa atong Komong Panahon sa dihang siya nag-organisar sa pagpangolekta ug kuwarta alang sa nanginahanglang mga Kristohanon sa Judea, iyang gipahimuslan ang higayon sa pagtudlo ug hinungdanong leksiyon bahin sa pagkamanggihatagon. Gipasiugda ni Pablo nga ang malipayong paghatag gipabilhan ug dako ni Jehova: ‘Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.’—2 Corinto 9:7.

Nagkapangkapangka, Apan Bukhad ug Palad

Ang kadaghanang unang-siglong mga Kristohanon dili ilado sa katilingban. Si Pablo miingon nga taliwala kanila “dili daghan ang gamhanan.” Sila mao “ang huyang nga mga butang sa kalibotan,” “ang tinamay nga mga butang sa kalibotan.” (1 Corinto 1:26-28) Pananglitan, ang mga Kristohanon nga nagpuyo sa Macedonia ‘kabos sa hilabihan’ ug ‘nailalom sa kasakitan.’ Bisan pa niana, ang timawa nga taga-Macedonia nga mga magtutuo mihangyo sa pribilehiyo sa pag-amot sa pinansiyal nga paagi alang sa “ministeryo nga gikatagana alang sa mga balaan”; ug ang ilang gihatag, si Pablo nagpamatuod, maoy “labaw sa ilang maarangan”!—2 Corinto 8:1-4.

Bisan pa, ang dagayang pagpanghatag wala sukda sa kantidad nga nahatag. Hinunoa, ang motibo, pagkaandam sa pagpaambit, ug disposisyon sa kasingkasing mao ang hinungdanon. Si Pablo miingon ngadto sa mga Kristohanon sa Corinto nga ang hunahuna ug kasingkasing nalangkit sa paghatag ug mga amot. Siya miingon: “Ako nahibalo sa inyong pagkaandam sa hunahuna nga akong gipanghambog sa mga Macedonianhon bahin kaninyo, . . . ug ang inyong kasibot nakasugnib sa kadaghanan kanila.” Sila ‘nakahukom diha sa ilang kasingkasing’ sa paghatag nga madagayaon.—2 Corinto 9:2, 7.

‘Ang Ilang Espiritu Nag-aghat Kanila’

Tingali anaa sa hunahuna ni apostol Pablo ang unang panig-ingnan sa dagayang pagpanghatag, nga nahitabo sa kamingawan kapin sa 15 ka siglo una pa sa iyang panahon. Ang 12 ka tribo sa Israel nakagawas na gikan sa pagkaulipon sa Ehipto. Sila anaa na karon sa tiilan sa Bukid sa Sinai, ug gisugo sila ni Jehova sa pagtukod ug tabernakulo alang sa pagsimba ug sangkapan kana ug mga gamit sa pagsimba. Nagkinahanglan kini ug daghang kahinguhaan, ug ang nasod gidapit sa pag-amot.

Sa unsang paagi misanong ang mga Israelinhon? “Sila nangabot, ang matag usa kansang kasingkasing nagtukmod kaniya, ug sila nagdala, ang matag usa kansang espiritu nagdasig kaniya, sa amot kang Jehova alang sa buluhaton sa tolda nga tagboanan.” (Exodo 35:21) Ang nasod dagaya bang nanghatag? Oo! Ang mosunod nga taho mao ang gisubay ngadto kang Moises: “Ang katawhan nagdala ug daghan kaayo kay sa gikinahanglan sa pag-alagad alang sa buluhaton nga gisugo ni Jehova nga pagahimoon.”—Exodo 36:5.

Unsay pinansiyal nga kahimtang sa mga Israelinhon niadtong panahona? Dili pa dugay sa miagi, sila maoy miserableng mga ulipon, ‘gidaogdaog sa mabug-at nga palas-anon,’ nga nagkinabuhi ug usa ka ‘mapait nga kinabuhi,’ usa ka kinabuhi sa “kasakit.” (Exodo 1:11, 14; 3:7; 5:10-18) Nan, wala gayoy posibilidad nga sila bahandianon. Tinuod, ang mga Israelinhon mibiya sa yuta nga nag-ulipon kanila uban sa mga panon sa mga karnero ug mga baka. (Exodo 12:32) Apan kadto dili dako kaayo ug kantidad, sanglit human dayon sa pagbiya sa Ehipto, sila nagreklamo nga sila walay karne ni tinapay nga makaon.—Exodo 16:3.

Nan, diin nanguha ang mga Israelinhon ug mga butang nga ilang giamot sa pagtukod sa tabernakulo? Gikan sa ilang mga agalon kanhi, ang mga Ehiptohanon. Ang Bibliya nag-ingon: “Ang mga anak sa Israel . . . nangayo sa mga Ehiptohanon ug mga butang nga plata ug mga butang nga bulawan ug mga kupo. . . . Gihatag [sa mga Ehiptohanon] kanila ang ilang gipangayo.” Kining mga buhat sa pagkamanggihatagon sa bahin sa mga Ehiptohanon maoy panalangin gikan kang Jehova, dili gikan kang Paraon. Ang balaang rekord nag-ingon: “Si Jehova naghatag sa katawhan ug pabor sa mga mata sa mga Ehiptohanon, mao nga ilang gihatag kanila ang ilang gipangayo.”—Exodo 12:35, 36.

Nan, handurawa lang kon unsay gibati sa mga Israelinhon. Ang mga kaliwatan nag-antos sa mapait nga pagkaulipon ug kawalad-on. Karon sila may kagawasan na ug dagaya sa mga kabtangan. Unsay ilang gibati bahin sa pagpaambit sa uban niadtong maong mga kabtangan? Tingali mibati sila nga ilang kinitaan kini ug may katungod sa pagtago niini. Apan, sa dihang gihangyo sa pag-amot sa pinansiyal nga paagi aron sa pagsuportar sa putli nga pagsimba, sila miamot—ug dili kontragusto o sa tinihik! Sila wala malimot nga si Jehova ang nagpaarang aron sila makabaton ug materyal nga mga butang. Busa, sila mihatag nga madagayaon sa ilang plata ug bulawan ug mga binuhi. Sila “mainandamon ug kasingkasing.” Ang ilang ‘mga kasingkasing nagdasig kanila.’ ‘Ang ilang espiritu nag-aghat kanila.’ Kadto maoy tinuod gayod nga “kinabubut-ong pagpanghatag ngadto kang Jehova.”—Exodo 25:1-9; 35:4-9, 20-29; 36:3-7.

Pagkamainandamon sa Paghatag

Ang gidak-on sa amot dili kinahanglang maghawas sa pagkamanggihatagon sa naghatag. Si Jesu-Kristo kas-a nagtan-aw samtang ang mga tawo nanghulog ug kuwarta sa mga panudlanag bahandi sa templo. Ang mga tawong sapian nanghulog ug daghang sensilyo, apan nakadayeg si Jesus sa dihang nakakita siya ug usa ka kabos nga babayeng balo nga naghulog ug duha ka gagmayng mga sensilyo nga gamay kaayog bili. Siya miingon: ‘Kining babayeng balo, bisan kabos, naghulog ug labaw pa kay kanilang tanan. . . . Gikan sa iyang kawalad-on [siya] naghulog sa tanan niyang panginabuhian.’—Lucas 21:1-4; Marcos 12:41-44.

Ang gisulti ni Pablo ngadto sa mga taga-Corinto nahiuyon niini nga hunahuna ni Jesus. Kon bahin sa pag-amot aron sa pagtabang sa nanginahanglang mga isigkamagtutuo, si Pablo miingon: ‘Kon ang pagkaandam anaa nang daan, kini ilabinang dalawaton sumala sa nabatonan sa usa, dili sumala sa wala kaniya.’ (2 Corinto 8:12) Oo, ang mga amot walay kalabotan sa pag-indigay o pagtandiay. Ang tawo mohatag sumala sa iyang maarangan, ug si Jehova malipay sa espiritu sa pagkabukhad ug palad.

Bisag walay usa ang makapadato kang Jehova, kinsa maoy tag-iya sa tanang butang, ang pag-amot maoy usa ka pribilehiyo nga naghatag sa mga magsisimba ug higayon sa pagpasundayag sa ilang gugma alang kaniya. (1 Cronicas 29:14-17) Ang mga amot gihatag, dili alang sa pagpagarbo o alang sa ubang hakog nga mga motibo, kondili pinaagi sa hustong tinamdan ug sa pagpauswag sa matuod nga pagsimba, makapalipay ug uban niana ang panalangin sa Diyos. (Mateo 6:1-4) Si Jesus miingon: “Adunay labaw nga kalipay sa paghatag kay sa pagdawat.” (Buhat 20:35) Atong matagamtam ang bahin niana nga kalipay pinaagi sa paghatag sa atong kusog diha sa pag-alagad kang Jehova ug pinaagi sa paggahin ug usa ka butang gikan sa atong materyal nga mga kabtangan sa pagsuportar sa matuod nga pagsimba ug pagtabang sa mga tawong nanginahanglan.—1 Corinto 16:1, 2.

Pagkamainandamon sa Paghatag Karong Panahona

Karong panahona, ang mga Saksi ni Jehova malipay sa pagtan-aw sa tibuok kalibotan nga kauswagan sa pagsangyaw niining “maayong balita sa gingharian.” (Mateo 24:14) Sulod sa kataposang dekada sa ika-20ng siglo, kapin sa 3,000,000 ka tawo ang gibawtismohan aron sa pagsimbolo sa ilang pagpahinungod kang Jehova nga Diyos, ug duolan sa 30,000 ka bag-ong mga kongregasyon ang natukod. Oo, un-tersiya sa mga kongregasyon sa mga Saksi ni Jehova nga naglungtad karon natukod panahon sa kataposang napulo ka tuig! Ang dakong bahin niini nga pag-uswag maoy resulta sa paghago sa sinserong Kristohanong mga lalaki ug babaye kinsa naghatag sa ilang panahon ug kusog aron sa pagduaw sa ilang isigkatawo ug sa pagsugilon kanila bahin sa mga katuyoan ni Jehova. Ang uban niini nga kauswagan maoy resulta sa buluhaton sa mga misyonaryo, kinsa mibiya sa ilang mga puloy-anan ug mipanaw ngadto sa lagyong kayutaan aron sa pagtabang didto pinaagi sa buluhaton nga pagsangyaw sa Gingharian. Ang pag-uswag miresulta sa pag-organisar ug bag-ong mga sirkito, diin gikinahanglan ang pagtudlo ug bag-ong mga magtatan-aw sa sirkito. Lain pa, dugang pang mga Bibliya ang gikinahanglan aron magamit sa pagsangyaw ug sa personal nga pagtuon. Dugang pinatik nga literatura ang gikinahanglan. Ug sa nagkalainlaing nasod, kinahanglang padak-an ang mga tinukod sa sanga o pulihan ug mas dagkong mga lugar. Kining tanang dugang mga panginahanglan natagan-an pinaagi sa tabang sa kinabubut-ong mga amot gikan sa katawhan ni Jehova.

Usa ka Panginahanglan ug mga Kingdom Hall

Usa ka dakong panginahanglan ang nakita duyog sa pag-uswag sa gidaghanon sa mga Saksi ni Jehova mao kanang sa mga Kingdom Hall. Nadayag diha sa mga surbi nga gidumala sayo sa tuig 2000 ang panginahanglan ug kapin sa 11,000 ka Kingdom Hall diha sa kabos nga mga nasod, diin limitado ang panalapi. Palandonga ang Angola. Bisan pa sa sibil nga gubat sa daghang tuig, kanang nasora nakasinati ug aberids nga tinuig nga pag-uswag nga mga 10 porsiyento sa gidaghanon sa mga magmamantala sa Gingharian. Apan, ang kadaghanan sa 675 ka kongregasyon niining dakong Aprikanhong nasod nagtigom diha sa gawas. Aduna lamay 22 ka Kingdom Hall ang nasod, ug niini 12 lamang ang adunay nindot nga matang sa atop.

Sama usab ug kahimtang ang Demokratikanhong Republika sa Congo. Bisan pag dunay halos 300 ka kongregasyon sa kaulohang siyudad sa Kinshasa, didto aduna lamay napulo ka Kingdom Hall. Sa tibuok nasod, kining nasora adunay dinaliang panginahanglan ug kapin sa 1,500 ka Kingdom Hall. Tungod sa kusog nga pag-uswag sa mga nasod sa Sidlakang Uropa, ang Rusya ug Ukraine nagtaho ug gitapo nga panginahanglan ug ginatos ka Kingdom Hall. Ang kusog kaayong pag-uswag sa Latin Amerika gipasiugda sa Brazil, diin didto adunay kapin sa tunga sa milyong mga Saksi ug dako ang panginahanglan ug dugang mga Kingdom Hall.

Aron katagan-an ang mga panginahanglan niining mga nasora, ang mga Saksi ni Jehova nagpalakaw ug gipakusog nga programa sa pagtukod ug mga Kingdom Hall. Ang programa gipondohan sa dagayang mga amot sa tibuok-kalibotan nga panag-igsoonay, mao nga bisan ang kinapobrehan nga mga kongregasyon makabaton ug maarang-arang nga sentro sa pagsimba.

Sama sa panahon sa karaang Israel, dako ang nahimo tungod kay ang sinserong mga Kristohanon ‘nagpasidungog kang Jehova sa ilang bililhong mga butang.’ (Proverbio 3:9, 10) Ang Nagamandong Lawas sa mga Saksi ni Jehova buot magpahimulos niining kahigayonan sa pagpahayag ug tim-os nga pasalamat kang bisan kinsa kansang kasingkasing nagdasig kaniya sa pagpakigbahin niining kinabubut-ong paghatag. Ug kita makasalig nga ang espiritu ni Jehova magpadayon sa pagpukaw sa mga kasingkasing sa iyang katawhan aron sa pagsuportar sa mga panginahanglan sa nagauswag kanunay nga buluhaton sa Gingharian.

Samtang nagpadayon ang tibuok-kalibotan nga pag-uswag, hinaot nga kita magpadayon sa pagpangitag mga kahigayonan sa pagpakita sa atong pagkamalipayon ug pagkaandam sa paghatag sa atong kusog, atong panahon, ug atong mga kahinguhaan. Ug hinaot nga atong maagoman ang tinuod nga kalipay nga mahatag niana nga espiritu.

[Kahon sa panid 29]

“GAMITA KINI NGA MAALAMON!”

“Diyes anyos ako. Ako nagpadala kaninyo niining maong kuwarta aron makapalit kamo ug papel o bisan unsa aron sa paghimog mga libro.”—Cindy.

“Gusto nakong ipadala nganha kaninyo kining kuwartaha aron makahimo kamo ug daghan pang mga libro alang kanamo. Gitigom ko kining kuwartaha pinaagi sa pagtabang sa akong papa. Busa gamita kini nga maalamon!”—Pam, edad siyete.

“Naguol ako bahin sa bagyo. Hinaot nga luwas kamo sa peligro. Kining [$2, T.B.] mao lamang ang kuwarta nga nasulod sa akong bangko.”—Allison, edad kuwatro.

“Rudy ang akong ngalan, ug 11 anyos ang akong edad. Ang akong igsoong si Ralph sayis. Ug ang akong igsoong si Judith duha ug tunga. Nagtigom kami gikan sa among alawans sulod sa tulo ka bulan aron makatabang sa atong mga igsoon diha sa [gigusbat sa gubat nga dapit]. Nakatigom kami ug 20 dolyares nga among gipadala karon.”

“Naguol ako sa mga igsoon [nga giagian ug bagyo]. May kita ako nga 17 dolyares gikan sa pagtrabaho uban sa akong papa. Wala nako ipadala kining kuwartaha alang sa usa ka partikular nga butang, busa bahala na kamo niini.”—Maclean, edad otso.

[Kahon sa panid 31]

Mga Paagi sa Paghatag nga Gipili sa Uban

MGA AMOT NGADTO SA TIBUOK-KALIBOTAN NGA BULUHATON

Daghan ang mogahin, o magbadyet, ug salapi nga ilang ihulog diha sa mga kahon sa kontribusyon nga gimarkahang “Amot Alang sa Tibuok-Kalibotang Buluhaton sa Sosyedad—Mateo 24:14.” Matag bulan ipadala sa mga kongregasyon kining salapia ngadto sa tibuok-kalibotang hedkuwarter sa Brooklyn, New York, o sa lokal nga sangang buhatan.

Ang kinabubut-ong mga donasyong salapi mahimong ipadala usab nga direkta ngadto sa Treasurer’s Office Watch Tower Bible and Tract Society of the Philippines, P. O. Box 2044, 1060 Manila, o sa opisina sa Sosyedad nga nag-alagad sa inyong nasod. Ang alahas o ubang mahalong mga butang mahimong ikadonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.

KONDISYONAL-DONASYON NGA KAHIKAYAN

Ang salapi mahimong ihatag ngadto sa Watch Tower Society sa linaing kahikayan diin, engkaso ang tigdonar dunay personal nga panginahanglan, ang donasyon ikabalik kaniya. Alang sa dugang impormasyon, palihog pakisusi sa Treasurer’s Office sa adres nga gitala sa itaas.

GIPLANONG PAGHATAG

Dugang pa sa direktang mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini nag-apil sa:

Insyurans: Ang Watch Tower Society mahimong nganlan nga benepisyaryo sa usa ka polisa sa life in­sur­ance o sa pagretiro/pensiyon nga programa.

Mga Salapi nga Gideposito sa Bangko: Ang mga salapi nga gideposito sa bangko, mga sertipiko sa mga deposito, o indibiduwal nga mga deposito sa pagretiro mahimong ikabutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko.

Stocks and Bonds: Ang mga stock, o aksiyones, ug mga bond ikadonar ngadto sa Watch Tower Society ingong direkta nga gasa.

Balay ug Yuta: Ang ikabaligyang balay ug yuta ikadonar ngadto sa Watch Tower Society pinaagi kaha sa paghatag dihadiha o pagreserba sa tibuok kinabuhi sa balay o yuta alang sa tigdonar, kinsa mahimong magpadayon pagpuyo niana samtang buhi pa siya. Angay niyang kontakon ang Sosyedad sa dili pa buhatag papeles ang bisan unsang balay o yuta nga idonar sa Sosyedad.

Wills and Trust: Ang propiedad o salapi mahimong ikabilin ngadto sa Watch Tower Society pinaagi sa usa ka legal-pagkabuhat nga testamento, o ang Sosyedad mahimong nganlang usa ka benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “giplanong paghatag,” kining mga matanga sa donasyon kasagarang nagkinahanglan ug mga pagplano sa bahin sa tigdonar. Sa pag-abag sa mga indibiduwal nga nagtinguha nga makabenepisyo ang Sosyedad pinaagi sa pipila ka porma sa giplanong paghatag, ang Sosyedad nag-andam ug brosyur nga Iningles ug Kinatsila nga nag-ulohang Charitable Planning to Benefit Kingdom Ser­vice Worldwide. Gisulat ang brosyur ingong pagsanong sa daghang pangutana nga nadawat sa Sosyedad bahin sa mga gasa, wills, ug trusts. Naundan usab kini ug dugang mapuslanong impormasyon sa mga pagplano bahin sa balay ug yuta, sa pinansiyal, ug sa buhis. Ug gidisenyo kini sa pagtabang sa mga indibiduwal sa Tinipong Bansa nga nagaplano sa paghimog espesyal nga gasa ngadto sa Sosyedad karon o paghatag sa kabilin sa pagkamatay aron sa pagpilig labing mapuslanon ug episyenteng pamaagi uban ang angayng pagtagad sa ilang pamilya ug personal nga mga kahimtang. Kining maong brosyur mabatonan pinaagi sa paghangyo ug kopya direkta gikan sa Charitable Planning Office.

Human mabasa ang brosyur ug makonsulta ang Charitable Planning Office, daghan ang nakaabag sa Sosyedad ug sa samang higayon, nakapadako sa mga benepisyo sa buhis sa pagbuhat niini. Ang Cha­rit­a­ble Planning Office angayng pahibaloon ug makadawat ug kopya sa bisan unsang dokumento maylabot sa bisan asa niining mga kahikayana. Kon interesado ka sa bisan asa niining mga kahikayan sa giplanong paghatag, angay nimong kontakon ang Charitable Planning Office, pinaagi sa sulat o sa telepono, diha sa adres nga gilista sa ubos o sa opisina sa Sosyedad nga nag-alagad sa inyong nasod.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (845) 306-0707