Tiquico—Usa ka Piniyalang Isigkaulipon

SA LAINLAING mga okasyon, si Tiquico mibiyahe uban kang apostol Pablo ug nagsilbing mensahero niya. Siya maoy emisaryo nga kapiyalan ug salapi ug mga responsibilidad sa pagdumala. Sanglit ang Kasulatan nagpasiugda sa iyang pagkakapiyalan​—usa ka hiyas nga hinungdanon alang sa tanang Kristohanon​—tingali buot nimong mahibalo ug dugang bahin kaniya.

Gihubit ni Pablo si Tiquico ingong iyang “hinigugmang igsoon ug kasaligang ministro ug isigkaulipon diha sa Ginoo.” (Colosas 4:7) Nganong ingon man niana ang pag-isip sa apostol kaniya?

Ang Misyon sa Pagdalag Hinabang sa Jerusalem

Mitungha ang materyal nga panginahanglan taliwala sa mga Kristohanon sa Judea sa mga 55 K.P. Uban sa tabang sa mga kongregasyon sa Uropa ug Asia Minor, giorganisar ni Pablo ang usa ka koleksiyon aron sa pagtabang kanila. Si Tiquico, nga gikan sa distrito sa Asia, may bahin sa misyon sa pagdalag hinabang.

Human hatagig mga instruksiyon kon unsaon pagdumala kining maong amot, si Pablo misugyot nga ang kapiyalang mga tawo ipadala sa Jerusalem o moadto didto uban kaniya, nga magdala sa kuwarta. (1 Corinto 16:​1-4) Sa dihang misugod siya sa dugay nga panaw gikan sa Gresya paingon sa Jerusalem, giubanan siya sa daghang lalaki, ang usa kanila lagmit mao si Tiquico. (Buhat 20:4) Ang daghang kauban lagmit gikinahanglan tungod kay nagdala sila ug salapi nga gipiyal kanila sa daghang kongregasyon. Ang panginahanglan sa seguridad lagmit maoy dakong hinungdan, sanglit ang mga tulisan maoy hulga sa luwas nga pag-agi.​—2 Corinto 11:26.

Sanglit si Aristarco ug Trofimo mikuyog kang Pablo sa Jerusalem, ang uban naghunahuna nga lagmit miuban usab si Tiquico ug ang uban pa. (Buhat 21:​29; 24:​17; 27:​1, 2) Tungod kay si Tiquico nalangkit niining programa sa pagdalag hinabang, usa siya sa pipila nga gisugyot nga mao ang “igsoong lalaki” nga nagbuhat uban kang Tito sa Gresya sa paghikay sa koleksiyon ug kinsa ‘gitudlo sa mga kongregasyon nga mahimong nagapánawng kauban [ni Pablo] may kalabotan niining malulotong gasa.’ (2 Corinto 8:​18, 19; 12:​18) Kon ang unang sugo nga gituman ni Tiquico maoy responsableng sugo, ang iyang ikaduha susama niana.

Gikan sa Roma Ngadto sa Colosas

Lima o unom ka tuig sa ulahi (60-​61 K.P.), si Pablo naglaom nga mapagawas gikan sa iyang unang pagkabilanggo sa Roma. Si Tiquico uban kaniya, gatosan ka kilometros gikan sa pinuy-anan. Nianang tungora si Tiquico mibalik sa Asia. Nakapaarang kini kang Pablo sa pagpadalag mga sulat ngadto sa Kristohanong mga kongregasyon sa maong dapit ug pagpapauli sa milayas nga ulipon ni Filemon, si Onesimo, sa Colosas. Si Tiquico ug Onesimo nagdala ug labing menos tulo ka sulat nga karon nalakip sa kanon sa Bibliya​—usa ngadto sa mga taga-Efeso, usa ngadto sa mga taga-Colosas, ug ang usa ngadto kang Filemon. Lagmit may sulat usab nga gihatod ngadto sa kongregasyon sa Laodicea, usa ka siyudad nga mga 18 kilometros gikan sa Colosas.​—Efeso 6:​21; Colosas 4:​7-9, 16; Filemon 10-​12.

Si Tiquico dili lamang tighatod ug sulat. Siya maoy piniyalang personal nga mensahero, kay si Pablo misulat: “Sa tanan kong mga kalihokan si Tiquico, nga akong hinigugmang igsoon ug kasaligang ministro ug isigkaulipon diha sa Ginoo, magapahibalo kaninyo. Sa tuyo mismo nga inyong mahibaloan ang mga butang maylabot kanamo ug aron siya makahupay sa inyong mga kasingkasing, ako nagapadala kaniya nganha kaninyo.”​—Colosas 4:​7, 8.

Gipakita sa eskolar nga si E. Randolph Richards nga ang usa ka tigdalag sulat “kasagarang maoy personal nga koneksiyon tali sa awtor ug sa mga tagadawat dugang pa sa sinulat nga koneksiyon. . . . [Usa ka katarongan] sa panginahanglan ug kapiyalang tigdala mao [nga] siya kasagarang magdala ug dugang impormasyon. Ang usa ka sulat maghubit tingali sa mubo sa usa ka kahimtang, kasagaran uban sa pangagpas sa awtor, apan ang tigdala gidahom nga mosaysay sa mga detalye ngadto sa tigdawat.” Bisan tuod ang usa ka sulat maghisgot tingali sa mga pagtulon-an ug dinaliang mga hilisgotan, ang ubang mga butang ipasa nga binaba pinaagi sa piniyalang mensahero.

Ang mga sulat ngadto sa mga taga-Efeso, sa mga taga-Colosas, ug kang Filemon diyutay rag gisulti bahin sa kahimtang ni Pablo. Sa ingon si Tiquico kinahanglang magpasa ug personal nga impormasyon, magsaysay sa mga sirkumstansiya ni Pablo sa Roma, ug makasabot pag-ayo sa mga kahimtang diha sa mga kongregasyon aron makahatag ug pagdasig. Ang mga mensahe ug mga responsibilidad nga ingon niini ipiyal lamang niadtong kasaligan sa paghawas nga matinud-anon sa nagsulat. Si Tiquico maoy ingon niana nga tawo.

Pagdumala sa Lagyong mga Asaynment

Human mapagawas gikan sa pagkabilanggo diha sa balay sa Roma, si Pablo naghunahuna nga ipadala si Tiquico o si Artemas ngadto kang Tito sa isla sa Creta. (Tito 1:​5; 3:12) Panahon sa ikaduhang pagkabilanggo ni Pablo sa Roma (lagmit sa mga 65 K.P.), ang apostol nagpadala pag-usab kang Tiquico sa Efeso, lagmit aron mopuli kang Timoteo, nga makapanaw niadtong panahona aron mahiuban kang Pablo.​—2 Timoteo 4:​9, 12.

Dili tin-aw kon si Tiquico miadto sa Creta ug Efeso niining yugtoa. Bisan pa niana, ang mga reperensiya nga sama niini nagsugyot nga siya nagpabiling usa sa suod nga kaubanan ni Pablo hangtod sa kataposang mga tuig sa ministeryo sa apostol. Kon si Pablo naghunahuna nga ipadala siya sa responsable ug tingali malisod nga mga misyon puli kang Timoteo ug Tito, dayag nga si Tiquico nahimong hamtong nga Kristohanong magtatan-aw. (Itandi ang 1 Timoteo 1:​3; Tito 1:​10-13.) Ang iyang pagkaandam nga mobiyahe ug gamiton sa lagyong mga asaynment naghimo kaniyang mapuslanon kang Pablo ug sa tibuok Kristohanong kongregasyon.

Karong adlawa, ang nagasakripisyo sa kaugalingon nga mga Kristohanon andam nga moalagad sa Diyos diha sa lokal nga mga kongregasyon sa mga Saksi ni Jehova o motanyag sa ilang kaugalingon aron sa pagpauswag sa mga intereses sa Gingharian sa ubang dapit. Linibo ang malipayong midawat ug mga asaynment ingong mga misyonaryo, nagapanawng mga magtatan-aw, internasyonal nga mga alagad sa mga proyekto sa konstruksiyon, diha sa tibuok-kalibotang hedkuwarter sa Watch Tower Society, o sa usa sa mga sangang buhatan niini. Sama kang Tiquico, sila dili ilado, apan sila maoy kugihang mga trabahador, ‘kasaligang mga ministro’ nga gimahal sa Diyos ug gihigugma sa ubang mga Kristohanon ingong piniyalan nga ‘mga isigkaulipon diha sa Ginoo.’