“Gihigugma sa Diyos ang Malipayong Maghahatag”

Unsang matanga sa gasa ang pabilhan nimo pag-ayo? Seguradong kadaghanan nato malipayng makadawat ug gasa kon kini tinukmod sa gugma. Apan dili gayod kita malipay kon kini tungod lang sa obligasyon. Maylabot sa paghatag, hinungdanon ang motibo. Hinungdanon kini kanato, ug labaw sa tanan sa Diyos. Tagda ang inspiradong mga pulong ni apostol Pablo sa 2 Corinto 9:7.

Nganong gisulat ni Pablo kanang mga pulonga? Buot niyang dasigon ang mga Kristohanon sa Corinto nga suportahan ang pagpanghatag ug hinabang ngadto sa ilang kabos nga mga isigkamagtutuo sa Judea. Gipugos ba niya ang mga taga-Corinto sa paghatag? Sa kasukwahi, siya misulat: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” Susihon nato ang maong tambag.

“Sumala sa iyang gihukom diha sa iyang kasingkasing.” Ang usa ka tinuod nga Kristohanon mohatag kay siya nakahukom “diha sa iyang kasingkasing” sa pagbuhat niana, matod ni Pablo. Sa samang higayon, ang usa ka Kristohanon maghunahuna gayod sa panginahanglan sa iyang mga isigkamagsisimba. Sa orihinal nga pinulongan, ang pulong nga gihubad ug “gihukom” “adunay ideya sa pagtinong daan,” matod sa usa ka eskolar. Busa ang usa ka Kristohanon mamalandong kon unsay panginahanglan sa iyang mga isigkamagtutuo ug pangutan-on ang kaugalingon kon unsay iyang mahimo aron ikatagana kini.​—1 Juan 3:17.

“Dili nga kontragusto o pinugos.” Si Pablo naghisgot ug duha ka matang sa paghatag nga angay natong likayan​—may pagpanuko ug pinugos. Ang Gregong pulong nga gihubad ug “kontragusto” sa literal nagpasabot ug “naguol (o, nasubo).” Ang mohatag nga kontragusto, o may pagpanuko, mohatag “gikan sa kasingkasing nga gianugnan sa pagbuhig kuwarta,” matod sa usa ka reperensiya. Ang maghahatag nga napugos mohatag kay napit-os siya sa pagbuhat niana. Kinsa ba gayoy gustong modawat ug gasa gikan sa usa nga nagpanuko o napugos sa paghatag?

“Gihigugma sa Diyos ang malipayong maghahatag.” Kon ang usa ka Kristohanon mohukom sa paghatag, angay niya kanang himoon uban ang kalipay, o kangaya, miingon si Pablo. Sa pagkatinuod, ang kalipay maoy resulta sa paghatag nga may hustong motibo. (Buhat 20:35) Dili gayod matago sa malipayong maghahatag ang iyang kalipay. Gani, ang terminong “malipayon” mahimong maghubit sa pangsulod nga pagbati ug panggawas nga ekspresyon sa maghahatag. Matandog gayod sa malipayong maghahatag ang atong kasingkasing. Mapalipay usab niya ang kasingkasing sa Diyos. Ang laing hubad nag-ingon: “Ang Diyos nahigugma sa mga tawong mahigugmang mohatag.”​—Contemporary English Version.

Ang inspiradong mga pulong ni apostol Pablo maoy prinsipyo nga mogiya sa mga Kristohanon maylabot sa paghatag. Maghatag man kitag panahon, kusog, o materyal, buhaton nato kana nga kinabubut-on. Ug himoon nato kana kay malipay tang mohatag sa uban, ilabina niadtong nanginahanglan. Ang maong paghatag dili lang makapalipay nato kondili makapahimo natong hiligugmaon sa Diyos, kay ‘gihigugma niya ang malipayong maghahatag.’