Pabilhi ang Pagkamahinatagon ni Jehova

MAHINATAGON nga Diyos si Jehova. (Sant. 1:17) Gikan sa bituonong kalangitan ngadto sa lunhawng katanoman sa yuta, ang kalalangan ni Jehova nagaawit sa iyang pagkamahinatagon.—Sal. 65:12, 13; 147:7, 8; 148:3, 4.

Dako kaayo ang pagpabili sa salmista sa iyang Maglalalang nga tungod niana nagkomposo siyag awit nga nagdayeg sa mga buhat ni Jehova. Basaha ang Salmo 104, ug tan-awa kon dili ka ba usab mobatig sama niana. Ang salmista miingon: “Ako magaawit kang Jehova sa tibuok kong kinabuhi; ako magaawit ug mga pagdayeg sa akong Diyos samtang ako buhi.” (Sal. 104:33) Mao ba sab nay imong gusto?

KINALABWANG EHEMPLO SA PAGKAMAHINATAGON

Gusto ni Jehova nga sundogon nato ang iyang pagkamahinatagon ug naghatag siyag maayong mga rason. Matikdi ang iyang gipasulat kang Pablo: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan; nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit, nga maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.”—1 Tim. 6:17-19.

Dihang gisulat ni Pablo ang ikaduha niyang sulat sa kongregasyon sa Corinto, iyang gipasiugda ang hustong tinamdan sa paghatag. “Ipabuhat sa matag usa ang sumala sa iyang gihukom diha sa iyang kasingkasing,” miingon si Pablo, “dili nga kontragusto o pinugos, kay gihigugma sa Diyos ang malipayong maghahatag.” (2 Cor. 9:7) Dayon, gihisgotan niya kon kinsay makabenepisyo sa pagkamahinatagon: ang nakadawat, kinsa natagan-an sa panginahanglan; ug ang naghatag, kinsa nakatagamtam ug espirituwal nga mga panalangin.—2 Cor. 9:11-14.

Gitapos ni Pablo kini nga bahin sa sulat pinaagi sa paghisgot sa kinadak-ang ebidensiya sa pagkamahinatagon sa Diyos. Si Pablo misulat: “Salamat sa Diyos tungod sa iyang dili-mahubit nga walay bayad nga gasa.” (2 Cor. 9:15) Dayag, ang gasa ni Jehova naglakip sa tanang pagkamaayo nga gipakita niya sa iyang katawhan pinaagi ni Jesu-Kristo. Dako kaayo kini nga dili bug-os mahubit sa mga pulong ang bili niini.

Unsaon nato pagpakita ang atong pagpabili sa tanang nahimo ug pagahimoon ni Jehova ug sa iyang Anak alang kanato? Ang usa ka paagi mao ang madagayaong paghatag sa atong panahon, kusog, ug kahinguhaan sa pagpalambo sa putli nga pagsimba kang Jehova, gamay man kini o dako.—1 Cron. 22:14; 29:3-5; Luc. 21:1-4.

Kon sa Unsang Paagi ang Uban Midonar Alang sa Tibuok Kalibotang Buluhaton

Sama sa panahon ni apostol Pablo, daghan karon ang ‘naggahin,’ o nagbadyet, ug salapi aron ihulog sa contribution box sa kongregasyon nga gimarkahag “Worldwide Work.” (1 Cor. 16:2) Matag bulan, ang mga kongregasyon magpadala niini nga salapi ngadto sa branch office sa mga Saksi ni Jehova nga nagdumala sa ilang nasod. Puwede sab kang direkta nga magpadala ug mga donasyon sa legal nga korporasyon nga gigamit sa mga Saksi ni Jehova sa inyong nasod. Aron mahibalo sa pangunang korporasyon nga gigamit sa mga Saksi ni Jehova sa inyong nasod, palihog kontaka ang branch office. Ang adres makita sa www.jw.org/ceb. Kini ang matang sa mga donasyon nga direkta nimong ikapadala:

OUTRIGHT DONATIONS

Mga donasyon nga gihimo pinaagig bank transfer, debit card, o credit card. Sa pipila ka branch, posible usab kining himoon diha sa jw.org o sa ubang haom nga website.
Mga donasyon nga salapi, alahas, o ubang mahalong butang. Ilakip ang sulat nga nag-ingong kini maoy outright donation, o donasyon nga walay kondisyones.

CONDITIONAL DONATION ARRANGEMENT

Mga donasyong salapi nga mahimong ibalik kon gikinahanglan sa nagdonar.
Ilakip ang usa ka sulat nga nag-ingong ang donasyon maoy kondisyonal.

CHARITABLE PLANNING

Gawas sa mga gasa nga salapi ug ubang mahalong butang, aduna pay laing mga paagi sa paghatag aron makatabang sa buluhaton sa Gingharian sa tibuok kalibotan. Kini gihisgotan dinhi. Bisag unsa pang paagi sa pagdonar ang gusto nimong pilion, palihog kontaka una ang inyong branch office aron masayran kon unsa nga mga paagi ang puwede sa inyong nasod. Kay lainlain man ang legal nga mga kinahanglanon ug balaod bahin sa buhis, importante nga mokonsultag abogado ug tax adviser sa dili pa mopilig kinamaayohang paagi sa pagdonar.

Insurance: Donasyon diin ang korporasyon nga gigamit sa mga Saksi ni Jehova ang gihimong benepisyaryo sa usa ka life insurance policy o retirement/pension plan.

Bank Accounts: Mga deposito sa bangko, sertipiko sa deposito, o indibiduwal nga mga pondo sa pagretiro nga gingalan o gihimong payable on death ngadto sa korporasyon nga gigamit sa mga Saksi ni Jehova, depende sa mga requirement sa lokal nga bangko.

Stocks and Bonds: Mga stock ug bond nga direktang gidonar ngadto sa korporasyon nga gigamit sa mga Saksi ni Jehova, o kaha pinaagig transfer on death nga kasabotan.

Real Estate: Mabaligya nga balay ug yuta nga direktang gidonar ngadto sa korporasyon nga gigamit sa mga Saksi ni Jehova. O kon kini gipuy-an pa, puwedeng maghimog kasabotan nga makapuyo niini ang nagdonar samtang siya buhi pa.

Gift Annuity: Mga stock ug bond o salapi nga gidonar ngadto sa korporasyon nga gigamit sa mga Saksi ni Jehova. Dunay himoong kasabotan nga ang nagdonar, o ang usa nga iyang gitudlo, modawat ug espesipikong annuity payment matag tuig samtang siya buhi pa. Ang nagdonar makakuhag discount sa iyang income tax sa tuig nga gihimo ang gift annuity.

Wills and Trusts: Propidad o salapi nga mahimong ipapanunod ngadto sa korporasyon nga gigamit sa mga Saksi ni Jehova pinaagig legal nga testamento, o pinaagi sa paghimo sa korporasyon ingong benepisyaryo sa usa ka trust agreement. Dunay bentaha kini nga kasabotan kay mahimong makunhoran ang bayranan sa buhis.

Ang terminong “charitable planning” nagpasabot nga kinahanglang abanteng magplano ang modonar. Para matabangan kadtong gustong mosuportar sa tibuok kalibotang buluhaton sa mga Saksi ni Jehova pinaagig charitable planning, gihimo ang brosyur nga Charitable Planning to Benefit Kingdom Service Worldwide nga mabatonan sa Iningles ug Kinatsila. Ang brosyur naghatag ug impormasyon bahin sa lainlaing paagi sa paghatag ug donasyon, ihatag man kini karon o inigkamatay sa nagdonar. Lagmit dili tanang impormasyon sa brosyur ang puwede sa imong kahimtang tungod sa mga balaod bahin sa buhis o uban pang balaod sa inyong nasod. Busa human mabasa ang maong brosyur, konsultaha ang imong abogado o tax adviser. Pinaagi niini nga mga paagi sa pagdonar, daghan ang nakasuportar sa atong tibuok kalibotang buluhaton ug dako ang nakunhod sa ilang buluhisan. Kon mabatonan kini nga brosyur sa inyong nasod, pangayog kopya sa sekretaryo sa inyong kongregasyon.

Alang sa dugang impormasyon, mahimo nimong kontakon ang branch office.