Isalikway ang Tanang Ideya nga Supak sa Kahibalo sa Diyos!

 1. Unsay gipasidaan ni apostol Pablo sa dinihogang mga Kristohanon?

SI APOSTOL Pablo nagpasidaan: “Hunong na.” Sa unsa? “Hunong na sa pagpaimpluwensiya niini nga sistema sa mga butang.” (Roma 12:2) Gisulti kini ni Pablo sa unang siglong mga Kristohanon. Nganong gihatag niya kanang direktang pasidaan ngadto sa mga Kristohanon nga napahinungod sa Diyos ug dinihogan sa balaang espiritu?​—Roma 1:7.

2-3. Unsay gipaningkamotang buhaton ni Satanas aron mahilayo ta kang Jehova, pero unsaon nato pagtangtang ang mga butang nga nakagamot na pag-ayo sa atong hunahuna?

² Nabalaka si Pablo kay ang pipila ka Kristohanon dayag nga naimpluwensiyahan sa sayop nga mga pangatarongan ug pilosopiya nga gipasiugda sa kalibotan ni Satanas. (Efe. 4:17-19) Puwede sab nang mahitabo kang bisan kinsa kanato. Si Satanas, ang diyos niining sistemaha sa mga butang, naggamit ug lainlaing taktika sa paningkamot nga mahilayo ta kang Jehova. Pananglitan, kon gusto tang mahimong inila, pahimuslan niya kana aron motalikod ta kang Jehova. Gamiton pa gani niya ang atong eksperyensiya, kultura, o edukasyon aron sundogon nato ang iyang panghunahuna.

³ Posible bang matangtang nato ang mga butang nga “lig-ong naparilan” o nakagamot na pag-ayo sa atong hunahuna? (2 Cor. 10:4) Matikdi ang tubag ni Pablo: “Gipukan namo ang mga pangatarongan ug ang tanang tag-as nga butang nga batok sa kahibalo sa Diyos, ug gibihag namo ang tanang hunahuna aron himoon kining masinugtanon sa Kristo.” (2 Cor. 10:5) Oo, sa tabang ni Jehova matangtang nato ang sayop nga panghunahuna. Sama nga ang medisina makawala sa makadaot nga epekto sa hilo, ang Pulong sa Diyos makawala sab sa makadaot nga epekto sa kalibotan ni Satanas.

 4. Unsang mga kausaban ang gihimo sa daghan kanato dihang atong gidawat ang kamatuoran?

⁴ Hinumdomi ang mga kausaban nga kinahanglan nimong himoon dihang midawat ka sa kamatuoran sa Pulong sa Diyos ug midesisyon sa pag-alagad kang Jehova. Daghan kanato ang may daotang mga binuhatan kaniadto nga kinahanglang biyaan. (1 Cor. 6:9-11) Mapasalamaton gyod ta nga gitabangan ta ni Jehova sa pagbiya niana.

 5. Sumala sa Roma 12:2, unsang duha ka butang ang kinahanglan natong himoon?

⁵ Pero kinahanglang dili ta magkompiyansa. Bisag gihunong na nato ang seryosong mga sala nga atong ginahimo sa wala pa ta mabawtismohi, kinahanglang maningkamot gihapon ta sa paglikay sa bisan unsa nga makatental nato sa pagbuhat pag-usab niana. Unsaon nato nâ paghimo? Si Pablo mitubag: “Hunong na sa pagpaimpluwensiya niini nga sistema sa mga butang, kondili pag-usab mo pinaagi sa pagbag-o sa inyong hunahuna.” (Roma 12:2) Busa duha ka butang ang kinahanglan natong himoon. Una, kinahanglang ‘mohunong ta sa pagpaimpluwensiya’ niining kalibotana. Ikaduha, kinahanglan tang ‘mag-usab’ pinaagi sa pagbag-o sa atong hunahuna.

 6. Unsay atong makat-onan sa giingon ni Jesus sa Mateo 12:43-45?

⁶ Ang pag-usab nga gihunahuna ni Pablo wala lang magtumong sa panggawas nga kausaban. Mag-apektar ni sa tibuok natong pagkatawo. (Tan-awa ang kahong “Nabag-o na ba Gyod o Nagpakaaron-ingnon?”) Kinahanglang bug-os natong bag-ohon ang atong hunahuna​—atong panglantaw, pagbati, ug tinguha. Busa kitang tanan kinahanglang mangutana sa kaugalingon, ‘Ang mga kausaban ba nga akong ginahimo aron mahimong tinuod nga Kristohanon panggawas lang, o ginausab ba gyod nako ang akong hunahuna ug kasingkasing?’ Importante nga makita nato ang kalainan. Sa Mateo 12:43-45, gipakita ni Jesus kon unsay angayng buhaton. (Basaha.) Kanang mga pulonga nagtudlog importanteng kamatuoran: Dili igo nga wad-on lang ang sayop nga mga hunahuna; kinahanglan nato kining pulihan ug mga hunahuna nga giuyonan sa Diyos.

 7. Unsaon nato pagbag-o ang atong hunahuna ug kasingkasing?

⁷ Posible ba gyong mausab ang atong panghunahuna o ang atong sulod nga pagkatawo? Ang Pulong sa Diyos nagtubag: “Angay nga padayon ninyong bag-ohon ang inyong panghunahuna, ug isul-ob ang bag-ong personalidad nga gihimo sumala sa kabubut-on sa Diyos, nga nahiuyon sa tinuod nga pagkamatarong ug pagkamaunongon.” (Efe. 4:23, 24) Oo, posibleng mausab nato ang atong hunahuna ug kasingkasing, pero dili ni sayon. Dili igo nga suklan lang nato ang sayop nga mga tinguha ug mohunong sa paghimog daotan. Kinahanglang bag-ohon nato ang atong “panghunahuna.” Apil niini ang pagbag-o sa atong mga tinguha, tendensiya, ug motibo. Nagkinahanglan nig padayong paningkamot.

8-9. Giunsa pagpakita sa eksperyensiya sa usa ka brader nga kinahanglang bag-ohon nato ang atong hunahuna ug kasingkasing?

⁸ Hisgotan nato ang pananglitan sa usa ka brader nga bayolente kaniadto. Dihang gibiyaan na niya ang paghuboghubog ug pagpakig-away, mikuwalipikar siya sa bawtismo, ug naghatag tog maayong pamatuod sa gamayng komunidad diin siya nagpuyo. Pero usa ka gabii niana, wala madugay human sa iyang bawtismo, nakaatubang siyag wala damhang pagsulay. May hubog nga miadto sa iyang balay ug gihagit siyag away. Sa sinugdan nakapugong pa ang brader. Pero dihang gipasipalahan sa tawo ang ngalan ni Jehova, wala na siya kapugong. Migawas siya ug gikulata ang tawo. Nganong gihimo to niya? Bisag ang iyang pagtuon sa Bibliya nakatabang niya nga makapugong sa iyang pagkabayolente, wala pa niya mabag-o ang iyang panghunahuna. Sa ato pa, wala pa niya mausab ang iyang sulod nga pagkatawo.

⁹ Pero wala mosurender ang brader. (Prov. 24:16) Sa tabang sa mga ansiyano, siya padayong miuswag. Ngadtongadto, mikuwalipikar siya nga mahimong ansiyano. Dayon usa ka gabii niana, sa gawas sa Kingdom Hall, nakaatubang siyag pagsulay nga susama sa miagi. Dihay hubog nga mangulata na unta sa laing ansiyano. Unsay gihimo sa brader? Sa kalmado ug mapainubsanong paagi, siya nakig-estorya sa hubog, gialam-alaman kini, ug gitabangan nga makauli. Nganong lahi na man ang iyang reaksiyon? Nabag-o na ang iyang panghunahuna. Nahimo na siyang tinuod nga makigdaiton ug mapainubsanon. Nakahatag nig kadayeganan kang Jehova!

10. Unsay kinahanglan natong himoon aron mabag-o ang atong hunahuna ug kasingkasing?

¹⁰ Kini nga mga kausaban dili awtomatikong mahitabo. Tingali kinahanglan tang ‘maningkamot pag-ayo’ sulod sa daghang katuigan. (2 Ped. 1:5) Wala magpasabot nga tungod kay dugay na tang nag-alagad kang Jehova, mahitabo na ang maong mga kausaban. Kinahanglan tang maningkamot pag-ayo nga bag-ohon ang atong sulod nga pagkatawo. Dunay importanteng mga paagi nga makatabang nato sa paghimog kausaban. Atong hisgotan ang pipila niana.

11. Sa unsang paagi ang pag-ampo makatabang nato sa pagbag-o sa atong panghunahuna?

¹¹ Ang unang importanteng paagi mao ang pag-ampo. Kinahanglan tang moampo sama sa gibuhat sa salmista: “Putlia ang akong kasingkasing, Oh Diyos, ug hatagi kog espiritu nga bag-o ug lig-on.” (Sal. 51:10) Angay natong ilhon nga kinahanglan tang magbag-o sa atong panghunahuna ug mangayog tabang kang Jehova. Nganong makaseguro ta nga tabangan ta ni Jehova sa paghimog kausaban? Madasig ta sa gisaad ni Jehova bahin sa mga gahig ulo nga mga Israelinhon sa panahon ni Ezequiel: “Hatagan nako silag nagkahiusang kasingkasing, ug ibutang nako kanila ang usa ka bag-ong espiritu . . . ug hatagan nako silag kasingkasing nga unod [o, kasingkasing nga mosunod sa paggiya sa Diyos].” (Ezeq. 11:19; footnote) Si Jehova andam motabang sa maong mga Israelinhon nga magbag-o, ug andam pod siyang motabang nato.

12-13. (a) Sumala sa Salmo 119:59, unsay angay natong pamalandongon? (b) Unsay angay nimong ipangutana sa kaugalingon?

¹² Ang ikaduhang importanteng paagi mao ang pagpamalandong. Sa atong pagbasa sa Pulong sa Diyos kada adlaw, kinahanglan tang mogahin ug panahon sa pagpamalandong, o paghunahuna pag-ayo, kon unsang hunahuna ug pagbati ang angay natong usbon. (Basaha ang Salmo 119:59; Heb. 4:12; Sant. 1:25) Angay natong susihon kon duna tay mga hunahuna ug pagbati nga naimpluwensiyahan sa kalibotanong panghunahuna. Kinahanglan nga matinud-anon natong dawaton nga duna tay mga kahuyangan ug dayon maningkamot ta nga wad-on kana.

¹³ Pananglitan, pangutan-a ang kaugalingon: ‘Duna ba koy gamayng kasina sa akong kasingkasing?’ (1 Ped. 2:1) ‘Gibati ba nakong mas maayo ko sa uban tungod sa akong kagikan, edukasyon, o kahimtang sa kinabuhi?’ (Prov. 16:5) ‘Ubos ba ang akong pagtan-aw niadtong lahi nakog kahimtang o rasa?’ (Sant. 2:2-4) ‘Ganahan ba ko sa mga butang nga gitanyag sa kalibotan ni Satanas?’ (1 Juan 2:15-17) ‘Malingaw ba ko sa imoral ug bayolente nga mga kalingawan?’ (Sal. 97:10; 101:3; Amos 5:15) Ang tubag niini nga mga pangutana mahimong magpaila kon unsay angay nimong bag-ohon. Pinaagi sa pagwagtang niining nakagamot nga mga hunahuna o pagbati, mapalipay nato ang atong langitnong Amahan.​—Sal. 19:14.

14. Nganong importante ang pagpilig maayong mga higala?

¹⁴ Ang ikatulong importanteng paagi mao ang pagpilig maayong mga higala. Nakamatikod man ta o wala, ang atong mga higala dakog impluwensiya kanato. (Prov. 13:20) Sa trabahoan o eskuylahan, lagmit gilibotan ta niadtong dili makatabang nato sa pag-ugmad sa panghunahuna sa Diyos. Pero sa atong mga tigom makakita tag pinakamaayong mga higala. Didto madasig ta, o mapalihok, “sa pagpakitag gugma ug sa paghimog maayong mga buhat.”​—Heb. 10:24, 25.

15-16. Sa unsang paagi sulayan ni Satanas pagbag-o ang atong hunahuna?

¹⁵ Pero hinumdomi nga determinado si Satanas nga bag-ohon ang atong hunahuna. Gamiton niya ang tanang matang sa ideya aron kontrahon ang impluwensiya sa Pulong sa Diyos.

¹⁶ Si Satanas padayong naggamit sa samang pangutana nga iyang gisukna kang Eva sa tanaman sa Eden: “Tinuod ba nga miingon ang Diyos . . . ?” (Gen. 3:1) Sa kalibotan nga gikontrolar ni Satanas, sagad makadungog tag mga pangutana nga makapaduhaduha nato, sama sa: ‘Tinuod ba nga dili mouyon ang Diyos nga magminyo ang parehong lalaki o parehong babaye? Tinuod ba nga dili gusto sa Diyos nga magselebrar mog Pasko ug adlawng natawhan? Tinuod ba nga gidahom sa inyong Diyos nga dili mo magpaabonog dugo? Tinuod ba nga gidahom sa usa ka mahigugmaong Diyos nga dili mo makig-uban sa na-disfellowship nga mga minahal?’

17. Unsay angay natong buhaton kon dunay mokuwestiyon sa atong mga pagtulon-an, ug unsay resulta niana sumala sa Colosas 2:6, 7?

¹⁷ Kinahanglang kombinsido ta sa atong mga pagtulon-an. Kon dili nato susihon ang tubag sa importanteng mga pangutana bahin sa atong pagtulon-an, basin magsugod na ta pagduhaduha. Ngadtongadto, ang atong pagduhaduha makadaot sa atong panghunahuna ug pagtuo. Busa, unsay kinahanglan natong buhaton? Ang Pulong sa Diyos nag-ingon nga bag-ohon nato ang atong hunahuna, aron atong mapamatud-an sa atong kaugalingon “ang maayo ug dalawaton ug hingpit nga kabubut-on sa Diyos.” (Roma 12:2) Pinaagi sa regular nga pagtuon, atong mapamatud-an sa atong kaugalingon ang mga kamatuoran nga atong nakat-onan sa Bibliya. Ug makaseguro ta nga husto ang mga sukdanan ni Jehova. Dayon, mahisama ta sa kahoy nga nakagamot pag-ayo, “lig-on” diha sa pagtuo.​—Basaha ang Colosas 2:6, 7.

18. Unsay makatabang nato nga masuklan ang makadaot nga mga epekto sa kalibotan ni Satanas?

¹⁸ Walay laing makahimo sa pagpalig-on sa imong pagtuo gawas kanimo, busa padayon sa pagbag-o sa imong panghunahuna. Pag-ampo pirme ug pangayoa ang tabang sa espiritu ni Jehova. Pamalandong pag-ayo ug padayong susiha ang imong hunahuna ug mga motibo. Pangitag maayong mga higala nga makatabang nimo sa pagbag-o sa imong panghunahuna. Pinaagi niana, imong masuklan ang makadaot nga epekto sa kalibotan ni Satanas ug molampos ka sa pagpukan sa ‘mga pangatarongan ug tanang tag-as nga butang nga batok sa kahibalo sa Diyos.’​—2 Cor. 10:5.