Ang Pulong ni Jehova Buhi
Mga Pangunang Punto sa mga Sulat Ngadto sa mga Taga-Corinto
SI apostol Pablo nabalaka pag-ayo sa espirituwal nga kahimtang sa kongregasyon sa Corinto. Iyang nadunggan nga dunay dili pagsinabtanay sa mga igsoon didto ug ilang gitugotan nga magpadayon ang imoralidad. Ang kongregasyon nagsulat usab kang Pablo aron magpakisayod bahin sa pipila ka butang. Busa sa mga tuig 55 K.P., sa dihang didto siya sa Efeso panahon sa iyang ikatulong misyonaryong panaw, gisulat ni Pablo ang una sa iyang duha ka sulat ngadto sa mga taga-Corinto.
Ang ikaduhang sulat, nga lagmit gisulat pipila lamang ka bulan human sa iyang unang sulat, maoy sumpay sa nahauna. Sa daghang paagi, ang kahimtang sa gawas ug sulod sa kongregasyon sa Corinto niadtong unang siglo susama usab sa atong adlaw, busa ang mensahe sa mga sulat ni Pablo ngadto sa mga taga-Corinto bililhon usab alang kanato.—Heb. 4:12.
‘MAGTUKAW, BAROG NGA MALIG-ON, MAGMAKUSGANON’
“Kamong tanan magasulti nga may panagkauyon,” miawhag si Pablo. (1 Cor. 1:10) Walay ‘laing patukoranan gawas kang Jesu-Kristo,’ nga diha niini gipasukad ang Kristohanong mga hiyas. (1 Cor. 3:11-13) Bahin sa usa ka makihilawason diha sa kongregasyon, si Pablo miingon: “Kuhaa ang tawong daotan gikan sa inyong taliwala.” (1 Cor. 5:13) “Ang lawas dili alang sa pakighilawas,” siya miingon, “kondili alang sa Ginoo.”—1 Cor. 6:13.
Sa pagtubag sa “mga butang nga bahin niini [sila] misulat,” si Pablo mihatag ug praktikal nga tambag sa mga minyo ug tagsaanon. (1 Cor. 7:1) Human hisgoti ang Kristohanong pagkaulo, kahapsay panahon sa Kristohanong mga tigom, ug ang mga ebidensiya nga tinuod ang pagkabanhaw, si Pablo mitambag: “Magtukaw, barog nga malig-on sa pagtuo, magpakalalaki, magmakusganon.”—1 Cor. 16:13.
Tubag sa mga Pangutana Bahin sa Kasulatan:
1:21—Mogamit ba si Jehova ug “kabuangan” aron luwason kadtong may pagtuo? Dili gayod. Apan, kay “ang kalibotan pinaagi sa kaalam niini wala makaila sa Diyos,” daw kabuangan alang kanila ang paagi sa Diyos sa pagluwas sa katawhan.—Juan 17:25.
5:5—Unsay buot ipasabot sa ‘pagtugyan sa [daotang] tawo kang Satanas alang sa kalaglagan sa unod, aron nga ang espiritu maluwas’? Kon ang usa ka dili mahinulsolong mamumuhat ug kalapasan mapalagpot gikan sa kongregasyon, siya mahimong bahin na usab sa daotang kalibotan ni Satanas. (1 Juan 5:19) Busa, siya ikaingon nga gitugyan ngadto kang Satanas. Sa dihang mapalagpot na ang maong makasasala, malaglag o mawagtang na ang daotang impluwensiya diha sa kongregasyon ug motunhay ang espiritu, o ang nagpatigbabaw nga tinamdan sa kongregasyon.—2 Tim. 4:22.
7:33, 34—Unsay buot ipasabot sa “mga butang sa kalibotan” nga gikabalak-an sa mga minyo? Si Pablo nagtumong sa adlaw-adlawng panginahanglan nga angayng hunahunaon sa mga minyo. Kini naglakip sa pagkaon, besti, ug puy-anan, apan wala maglakip sa daotang mga butang niining kalibotana, nga angayng likayan sa mga Kristohanon.—1 Juan 2:15-17.
11:26—‘Kanunay’ bang saulogon ang kamatayon ni Jesus, ug “hangtod” kanus-a? Si Pablo wala magpasabot nga subsob nga saulogon ang kamatayon ni Jesus. Ang Gregong pulong nga gigamit alang sa “ingon kamakanunayon sa” nagkahulogan ug “sa matag higayon.” Busa, si Pablo nagpasabot nga sa matag higayon nga ang dinihogang mga Kristohanon makig-ambit sa mga emblema sa Memoryal, kas-a sa usa ka tuig sa Nisan 14, ilang “gimantala ang kamatayon sa Ginoo.” Ila kining himoon ‘hangtod sa iyang pag-abot,’ sa ato pa, hangtod nga sila mabanhaw sa langit.—1 Tes. 4:14-17.
13:13—Sa unsang paagi ang gugma labaw kay sa pagtuo ug paglaom? Sa dihang ang “mga butang nga gilaoman” moabot na ug “ang masaligan nga pagpaabot” niini matapos na, ang papel sa pagtuo ug paglaom matapos na usab. (Heb. 11:1) Ang gugma labaw kay sa pagtuo ug paglaom sa pagkaagi nga kini magpabilin hangtod sa kahangtoran.
15:29—Unsay kahulogan sa pagkahimong “gibawtismohan aron mahimong mga patay”? Si Pablo wala magpasabot nga ang mga buhi magpabawtismo alang sa mga nangamatay nga wala mabawtismohi. Ang pagbawtismo sa dinihogan-sa-espiritu nga mga Kristohanon nga gihisgotan ni Pablo dinhi nagtumong sa ilang pagpabiling maunongon hangtod sa ilang kamatayon ug human niana sila banhawon ngadto sa espirituhanong kinabuhi.
Mga Leksiyon Alang Kanato:
1:26-31; 3:3-9; 4:7. Ang mapainubsanong pagpanghambog diha kang Jehova, dili sa atong kaugalingon, makapatunhay sa panaghiusa diha sa kongregasyon.
2:3-5. Samtang nagsangyaw sa Corinto, ang sentro sa Gregong pilosopiya ug edukasyon, si Pablo lagmit nabalaka kon madani ba niya ang iyang mga mamiminaw. Bisan pa niana, wala niya tugoti nga ang bisan unsang kahuyangan o kahadlok mobabag sa iyang pagtuman sa buluhaton nga gihatag sa Diyos kaniya. Sa susama, dili nato tugotan nga ang malisod nga mga kahimtang mobabag kanato sa pagpahayag sa maayong balita sa Gingharian sa Diyos. Sama kang Pablo, makasalig usab kita nga si Jehova motabang kanato.
2:16. Aron mabatonan “ang panghunahuna ni Kristo” angay natong masayran kon unsa ug kon nganong ingon niana ang iyang panglantaw, ug kon unsaon nato siya pagsundog nianang bahina. Angay usab nga bug-os natong sayron ang iyang personalidad, ug sundogon ang iyang panig-ingnan. (1 Ped. 2:21; 4:1) Hinungdanon gayod nga tun-an nato pag-ayo ang kinabuhi ug ministeryo ni Jesus!
3:10-15; 4:17. Angay gayod natong susihon ug pauswagon ang atong katakos sa pagpanudlo ug paghimog mga tinun-an. (Mat. 28:19, 20) Kon kita dili maayong motudlo, ang atong ginatun-an sa Bibliya lagmit dili makalahutay sa mga pagsulay sa ilang pagtuo, ug lagmit masakitan kita pag-ayo nga ang atong kaluwasan “nahisamag nag-agi sa kalayo.”
6:18. Aron ‘makakalagiw gikan sa pakighilawas’ angay natong likayan ang mga buhat nga matawag ug por·neiʹa maingon man ang pornograpiya, moral nga kahugawan, paghanduraw bahin sa sekso, pagbirigbirig—bisan unsa nga mahimong mosangpot ngadto sa pakighilawas.—Mat. 5:28; Sant. 3:17.
7:29. Ang mga minyo angayng magmabinantayon nga basig malinga na sila sa usag usa ug mahimo na lamang ikaduha sa ilang kinabuhi ang intereses sa Gingharian.
10:8-11. Nasuko pag-ayo si Jehova sa dihang nagbagulbol ang mga Israelinhon batok kang Moises ug Aaron. Kita maalamon kon kita magbantay nga dili maugmad ang pagkabagulbolan.
16:2. Kita regular nga makahatag ug amot alang sa tibuok-kalibotang buluhaton nga pagsangyaw kon aduna kitay abante ug sistematiko nga pagplano.
‘MAGPADAYON SA PAGKANAPASIBO PAG-USAB’
Gisultihan ni Pablo ang mga taga-Corinto nga sila angayng “malulotong magpasaylo ug maghupay” niadtong nadisiplina nga nagmahinulsolon. Bisag ang iyang unang sulat nakapasubo kanila, si Pablo nagmaya tungod kay ang ilang ‘kasubo misangpot sa paghinulsol.’—2 Cor. 2:6, 7; 7:8, 9.
‘Ingon nga sila nagadagaya sa tanang butang,’ si Pablo nagdasig sa mga taga-Corinto nga ‘magmadagayaon usab sa pagpanghatag.’ Human tubaga ang mga magsusupak, siya mihatag ug pangataposang tambag sa tanan: “Magpadayon sa pagmaya, sa pagkanapasibo pag-usab, sa pagkahupay, sa paghunahuna nga may panag-uyon, sa pagpuyo nga madaiton.”—2 Cor. 8:7; 13:11.
Tubag sa mga Pangutana Bahin sa Kasulatan:
2:15, 16—Sa unsang paagi kita nahimong “humot nga alimyon ni Kristo”? Kita nahimong humot nga alimyon tungod kay atong gisunod ang gitudlo sa Bibliya ug atong ginasangyaw ang mensahe niini. Ang maong “alimyon” lagmit dili humot alang sa mga dili matarong, apan kini humot alang kang Jehova ug niadtong matinud-anog kasingkasing nga mga tawo.
5:16—Sa unsang paagi nga ang dinihogang mga Kristohanon “wala nay tawo nga ginaila sumala sa unod”? Wala nila lantawa ang mga tawo sa kalibotanong paagi, nga magpakitag paboritismo pinasukad sa bahandi, rasa, o kagikan sa usa. Ang bililhon alang kanila mao ang ilang relasyon sa ilang isigka-magtutuo.
11:1, 16; 12:11—Tinuod ba nga si Pablo dili makataronganon sa iyang pagpakiglabot sa mga taga-Corinto? Dili gayod. Apan alang sa uban, siya hambogiro ug dili makataronganon tungod sa paagi sa iyang pagpangatarongan aron panalipdan ang iyang pagka-apostol.
12:1-4—Kinsa ang “gisakgaw ngadto sa paraiso”? Sanglit ang Bibliya wala maghisgot ug laing tawo nga adunay susamang panan-awon ug ang maong pamulong gibungat sa dihang gidepensahan ni Pablo ang iyang pagka-apostol, lagmit naghisgot siya sa iyang kaugalingong kasinatian. Ang nakita sa apostol diha sa panan-awon lagmit mao ang espirituwal nga paraiso nga gitagamtam sa Kristohanong kongregasyon sa “panahon sa kataposan.”—Dan. 12:4.
Mga Leksiyon Alang Kanato:
3:5. Gipakita niining bersikuloha nga pinaagi sa iyang Pulong, iyang balaang espiritu, ug sa yutan-ong bahin sa iyang organisasyon, si Jehova nagkuwalipikar sa mga Kristohanon aron matuman nila ang ilang ministeryo. (Juan 16:7; 2 Tim. 3:16, 17) Angay kitang magtuon pag-ayo sa Bibliya ug sa binase-sa-Bibliya nga mga publikasyon, hugot nga mag-ampo alang sa balaang espiritu, ug regular nga motambong ug makigbahin sa Kristohanong mga tigom.—Sal. 1:1-3; Luc. 11:10-13; Heb. 10:24, 25.
4:16. Sanglit ginabag-o ni Jehova ang ‘atong sulod nga pagkatawo sa adlaw-adlaw,’ angay gayod natong pahimuslan ang mga tagana ni Jehova, nga dili tugotan nga molabay ang adlaw nga wala makonsiderar ang espirituwal nga mga butang.
4:17, 18. Ang paghunahuna nga ang “kasakitan makadiyot lamang ug magaan” makatabang kanato nga magpabiling maunongon kang Jehova panahon sa kalisdanan.
5:1-5. Nindot kaayo ang pagpahayag ni Pablo sa gibati sa dinihogang mga Kristohanon maylabot sa ilang paglaom sa langitnong kinabuhi!
10:13. Kasagaran, kita mosangyaw diha lamang sa teritoryo sa atong kongregasyon gawas kon dunay kahikayan nga motabang kita diin mas dako ang panginahanglan.
13:5. Aron ‘masulayan kon kita anaa ba sa pagtuo,’ angay natong tinoon nga ang atong panggawi nasubay sa atong nakat-onan sa Bibliya. Aron ‘mapamatud-an kon unsa kita sa atong kaugalingon,’ angay natong susihon kon unsa ka lig-on ang atong relasyon sa Diyos, kon unsa ka hait ang atong “gahom sa pagsabot,” ug kon unsa ka buhi ang atong pagtuo. (Heb. 5:14; Sant. 1:22-25) Pinaagi sa pagpadapat sa tambag ni Pablo, kita makapadayon sa paglakaw diha sa dalan sa kamatuoran.
[Hulagway sa panid 26, 27]
Unsay kahulogan sa pamulong nga “ingon kamakanunayon sa inyong pagkaon niini nga tinapay ug pag-inom niini nga kopa”?—1 Cor. 11:26